လါမးရှး ၆ သီႇ ၂၀၂၃ နံၣ်ႇ ခ့ၣ်အဲးစံၣ်
လၢဖၣ်အၣ်ကီၢ်ရ့ၣ် တၢ်ကြဲၢ်ကီၢ်ဆၣ်အပူၤ ၦၤသူၣ်အီၣ်ဖျးအီၣ်တၢ်ဖိလၢအိၣ်ကီၢ်ကၠီၣ်တဲၣ်–ကီၢ်ပယီၤကီၢ်ဆၢ သူမှဲကျိဒီတကျိၤအံၤတဖၣ်န့ၣ် တလါအံၤတၢ်ချံတၢ်သၣ်ဟးထီၣ်အကတီၢ်ခီဖျိၦၤဟ့ၣ်အၦ့ၤတဂ့ၤဘၣ်အဃိ ဒွး၀ဲတကၢကီၣ်လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကီၢ်ကၠီၣ်တဲၣ်–ကီၢ်ပယီၤကီၢ်ဆၢ သူမှဲကျိကပၤ သ့ၣ်မီၤကူၣ်ကရူၢ် တၢ်လဲၢ်သ၀ီႇကါထၣ်ႇထူပညၤဒီးကၠီၤက့ၣ်ထၣ် သ၀ီဖိလၢအသူၣ်အီၣ်ဖျးအီၣ်၀ဲတၢ်ချံတၢ်သၣ်သ့ၣ်တဖၣ်အံၤ အ၀ဲသ့ၣ်ကသူၣ်လီၤတၢ်အဂီၢ်ဘၣ်လဲၤဟံလိၢ်စ့လၢ ယိၤသ့ၣ်ခိၣ်အအိၣ်ဒီးတၢ်ချံတၢ်သၣ်လၢအဟးထီၣ်တဖၣ်ဘၣ်က့ၤဆါန့ၢ်ကဒါ၀ဲသ့ၣ်ခိၣ်တဖၣ်အံၤအဂ့ၢ်န့ၣ် ၦၤသူၣ်အီၣ်ဖျးအီၣ်တၢ်ဖိတဖၣ်စံး၀ဲန့ၣ်လီၤႉ
ဖဲတၢ်က့ၤဆါကဒါတၢ်ချံတၢ်သၣ်တဖၣ်အံၤအခါန့ၣ်ဘၣ်ဆါန့ၢ်အ၀ဲသ့ၣ်ဒ်တၢ်ပာ်ပနီၣ်အၦ့ၤအိၣ်အသိးလီၤအဃိ ဆါတၢ်ချံတၢ်သၣ်မ့၀ံၤန့ၣ်တၢ်ဖံးတၢ်မၤအဘူးအလဲမးတအိၣ်တ့ၢ်လၢၤဘၣ်အဂ့ၢ်န့ၣ် စီၤကြဲၢ်ထူလၢအသူၣ်အီၣ်ဖျးအီၣ်တၢ်ဖဲကီၢ်ဆၢအံၤ စံးဘၣ်ခ့ၣ်အဲးစံၣ်–ကညီတၢ်ကစီၣ်ဒ်အံၤန့ၣ်လီၤႉ
“ယိၤသ့ၣ်ခိၣ်န့ၣ်ဟ့ၣ်လီၤၦၤပဲအချံ၀ံၤဘျီန့ၣ်ပသူၣ်လီၤ၀ဲလီၤႉမ့ဘၣ်ဒ့တၢ်ချံတၢ်သၣ်အချံဘျီန့ၣ်ဘၣ်က့ၤဆါကဒါန့ၢ်အ၀ဲသ့ၣ်လီၤႉလၢနလိၣ်ဘၣ်အၦ့ၤအတၢန့ၣ်နတန့ၢ်ဘၣ်ဘၣ်ႉဖဲအ၀ဲသ့ၣ်ဟ့ၣ်၀ဲအသိးန့ၣ်နဘၣ်ဟံလီၤႉအ၀ဲသ့ၣ်ထုးထီၣ်န့ၢ်၀ဲအချံအဃိနဘၣ်က့ၤဆါကဒါန့ၢ်အ၀ဲသ့ၣ်လီၤႉနတဆါဘၣ်န့ၣ်တန့ၢ်ဘၣ်ႉနဆှဲစ့၀ံၤဘျီန့ၣ်လၢနစုပူၤန့ၣ်စ့တအိၣ်တ့ၢ်နီတဘးလၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ
တၢ်ချံတၢ်သၣ်လၢအဟးထီၣ်ဖဲသ၀ီပူၤအံၤတဖၣ်န့ၣ်တၢ်က့ၤဆါ၀ဲဆူကၠီၣ်တဲၣ်ခီပနံၣ်တဖၣ်အအိၣ်ဒီး စ့လၢနဆါတၢ်ချံတၢ်သၣ်န့ၢ်တဖၣ်အံၤခီဖျိတၢ်က့ၤထုးထီၣ်ဃုာ်၀ဲစ့လိၢ်အအ့ၣ်တဘျီဃီအဃိ ၦၤသူၣ်အီၣ်ဖျးအီၣ်တၢ်ဖိတဖၣ်လ့ၤတက့ၤဒွး၀ဲတကၢကီၣ်လၢၤဘၣ်အဂ့ၢ်န့ၣ် ၦၤသူၣ်အီၣ်ဖျးအီၣ်တၢ်ဖိ နီၢ်မုၣ်မုၣ် စ့ၢ်ကီးစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“အ၀ဲသ့ၣ်ဟ့ၣ်လီၤနၤစ့န့ၣ်အအ့ၣ်(၅)ဘးညါမီၤနီၤႉၦၤအိၣ်ဖဲသ၀ီပူၤတဖၣ်နါက့လဲၤဟံလိၢ်၀ဲႉသ့ၣ်ခိၣ်လၢနလဲၤဟံလိၢ်စ့လၢအအိၣ်တဖၣ်န့ၣ်နမ့ဆါတၢ်ချံတၢ်သၣ်ဘျီန့ၣ်အ၀ဲသ့ၣ်ထုးထီၣ်ကွံာ်၀ဲစ့လၢနလဲၤဟံလိၢ်ဆိဃာ်လၢအ၀ဲသ့ၣ်အအိၣ်ဒီးထုးကွံာ်၀ဲစ့အ့ၣ်တဘျီဃီလီၤႉအဃိန့ၣ်နဆှဲစ့မ့၀ံၤန့ၣ်တၢ်တအိၣ်တ့ၢ်နီတမံၤလၢၤဘၣ်ႉနသူၣ်အီၣ်ဖျးအီၣ်တၢ်န့ၣ်လီၤဂာ်ဒ်သိးနသူၣ်န့ၢ်တၢ်လၢသ့ၣ်ခိၣ်တဖၣ်န့ၣ်အဂီၢ်လီၤ”အဂ့ၢ်န့ၣ်စံး၀ဲန့ၣ်လီၤႉ
သုးဟံးန့ၢ်တၢ်စိတၢ်ကမီၤ၀ံၤအလီၢ်ခံထံရူၢ်ကီၢ်သဲးတၢ်အိၣ်သးတဂၢၢ်တကျၢၤလၢၤ၀ဲဘၣ်ဒီးလၢတၢ်ဂ့ၢ်အံၤအဃိ ပထံၣ်ဘၣ်လၢယိၤသ့ၣ်ခိၣ်တနီၤန့ၣ်ဟံးန့ၢ်၀ဲတၢ်ခွဲးတၢ်ယာ်ဒီးမၤလီၤစှၤၦၤမၤတၢ်ဖိအဘူးအလဲဒီးဟ့ၣ်တၢ်ချံတၢ်သၣ်အၦ့ၤတဂ့ၤလၢၤဘၣ်အိၣ်၀ဲအဂ့ၢ်န့ၣ် လီၢ်က၀ီၤခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ၦၤဘၣ်မူဘၣ်ဒါလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ
“တၢ်သ့ၣ်တဖၣ်အံၤယဆိမိၣ်ကဘၣ်ဃးလိာ်သးဒီးကီၢ်ပယီၤထံရူၢ်ကီၢ်သဲးတၢ်အိၣ်သးအံၤလီၤမီၤနီၤႉသုးဟံးန့ၢ်တၢ်စိတၢ်ကမီၤအဃိကမျၢၢ်ထံဖိကီၢ်ဖိလီၤဘၣ်တၢ်ကီတၢ်ခဲႉလီၤဘၣ်တၢ်ကီတၢ်ခဲအဃိအ၀ဲသ့ၣ်ဆီၣ်ဘံၣ်ဆီၣ်ဘၢ၀ဲၦၤကီၢ်ပယီၤဖိအံၤလီၤႉၦၤသူၣ်အီၣ်ဖျးအီၣ်တၢ်ဖိတဖၣ်အံၤဂုာ်ကျဲးစၢးမၤတၢ်နါက့တန့ၢ်ဘၣ်အမၠးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လီၢ်က၀ီၤကမျၢၢ်ၦၤသူၣ်အီၣ်ဖျးအီၣ်တၢ်ဖိလၢအိၣ်ကီၢ်ကၠီၣ်တဲၣ်–ကီၢ်ပယီၤကီၢ်ဆၢ သူမှဲကျိဒီတကျိၤအံၤတဖၣ် အါဒၣ်တက့ၢ်သူၣ်အီၣ်ဖျးအီၣ်၀ဲသဘ့ဟီၣ်လာ်ႇဘုခ့ႇနံၣ်သိႇဘီးက့ၣ်ဒီးရီဘၢၣ်တဖၣ်န့ၣ်လီၤႉဒ်န့ၣ်အသိးတၢ်သ့ၣ်တဖၣ်အံၤတၢ်က့ၤဆါ၀ဲဆူကီၢ်ကၠီၣ်တဲၣ်ပူၤဒီးဘၣ်ဂီၢ်၀ဲဒၣ်န့ၣ်လီၤႉ
ဘၣ်ဆၣ်ဖဲ(၂၀၂၁)လါဖ့ၤဘြူၤအါရံၤ ၁ သီ သုးဟံးန့ၢ်တၢ်စိတၢ်ကမီၤ၀ံၤအလီၢ်ခံန့ၣ် ခီဖျိစ့ယိၤအၦ့ၤထီၣ်ဒီးကီၢ်ပယီမပူၤတၢ်လုၢ်တၢ်ၦ့ၤထီၣ်အဃိၦၤသူၣ်အီၣ်ဖျးအီၣ်တၢ်ဖိတဖၣ်ဖံးအီၣ်မၤအီၣ်တၢ်တဘၣ်ဂီၢ်၀ဲလၢၤဘၣ်အဂ့ၢ်န့ၣ် သ့ၣ်ညါဘၣ်လၢၦၤသူၣ်အီၣ်ဖျးအီၣ်တၢ်ဖိတဖၣ်အအိၣ်န့ၣ်လီၤႉ
