ခီဖျိတၢ်ဒုးတၢ်ယၤအဃိကီးတရံးကီၢ်ဆၣ်ပူၤၦၤဟးၦ့ၤသဲးသၣ်လီၤစှၤ
လါနိၣ်၀့ဘၢၣ် ၉ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ကီးတရံးကီၢ်ဆၣ် သ၀ီတဖၣ်အပူၤ ခီဖျိတၢ်ဒုးတၢ်ယၤအဃိၦၤဟးၦ့ၤသဲးသၣ်တအိၣ်အါအါလၢၤဘၣ်လီၤစှၤ၀ဲအဃိ ၦၤမၤအီၣ်သဲးဖိတဖၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ ကီးတရံးကီၢ်ဆၣ်အပူၤဒုးယၤတၢ်ဖ့ၣ်စၢကဲထီၣ်ဒံး၀ဲတပယူာ်ဃီဒီးဆၢကတီၢ်ဘၣ်လၢကဘၣ်ဆါသဲးသၣ်လံဘၣ်ဆၣ်ၦၤဟဲၦ့ၤတအိၣ်ဘၣ်တကးဒံးဘၣ်အမဲာ်ညါကလဲၤဆါသဲးသၣ်လၢ၀့ၢ်ပူၤအဂီၢ်စ့ၢ်ကီးတၢ်ဒုးကဲထီၣ်လၢကီးတရံး၀့ၢ်ပူၤ၀့ၢ်ချၢတလီၢ်လီၢ်အဃိၦၤမၤသဲးဖိတဖၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ ကီးတရံးကီၢ်ဆၣ်ကလံၤထံးလီၢ်က၀ီၤကမျၢၢ်တဂၤစံး၀ဲ“ကလဲၤဆါသဲးသၣ်လၢ၀့ၢ်ပူၤခီဒၢးကျဲတၢ်ဟးထီၣ်က့ၤလီၤတၢ်ဘံၣ်တၢ်ဘၢတအိၣ်ဘၣ်အဃိဘၣ်သးကိၢ်စ့ၢ်ႉခဲအံၤနါက့ၦၤအိၣ်လၢ၀့ၢ်ပူၤတနီၤန့ၣ်စံၣ်အိၣ်ခူသူၣ်လံႉမ့၀ံၤပမ့တဆါဘၣ်သဲးသၣ်ဘၣ်န့ၣ်ပစ့တၢ်ဟဲနုာ််တအိၣ်ဘၣ်ႉဘၣ်ပာ်ဃာ်သဲးသၣ်ဒ်န့ၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဟီၣ်က၀ီၤပူၤသဲးသၣ်အိၣ်၀ဲခံကလုာ်လၢအမ့ၢ်သဲးသၣ်လၢအမံဘီလၢတၢ်စူၤခါတဖၣ်တၢ်မၤဃ့၀ဲလၢမုၢ်ဒီး သဲးသၣ်လၢအ၀ဲတခါန့ၣ်တၢ်လိ၀ဲလၢမုၢ်န့ၣ်လီၤႉသဲးသၣ်လၢတၢ်မၤဃ့အီၤလၢမ့ၣ်အူအံၤခီန့ၣ်အၦ့ၤဂ့ၤန့ၢ်ဒံးသဲးလၢတၢ်လိ၀ဲဒီးမုၢ်အဂ့ၢ်န့ၣ်သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ကတီၢ်ခဲအံၤလၢလီၢ်က၀ီၤအပူၤသဲးသၣ်လၢတၢ်လိဃ့အီၤလၢမ့ၣ်အူအံၤတပီၢ်န့ၣ်အၦ့ၤအိၣ်၀ဲ(၃၅၀၀)ကၠးလီၤဒီး ဘၣ်ဆၣ်မ့မ့ၢ်သဲးသၣ်လၢတၢ်လိအီၤလၢမုၢ်တပီၢ်န့ၣ်အၦ့ၤအိၣ်၀ဲ(၆၅၀၀)ကၠးညါအဂ့ၢ်န့ၣ် သ့ၣ်ညါဘၣ်န့ၣ်လီၤႉ “ခဲအံၤခီဖျိသဲးၦ့ၤအိၣ်ဂၢၢ်တပၢၢ်အဃိပၦ့ၤတဘူၣ်ဒံးဘၣ်ႉမ့၀ံၤလၢကီးတရံးႇနိၣ်တကီကျဲတကပၤန့ၣ်တၢ်ဒုးကဲထီၣ်အဃိပၦ့ၤတဘူၣ်ဒံးဘၣ်ႉပမ့ဟးၦ့ၤသဲးသၣ်လံန့ၣ်ပကဘၣ်က့ၤဆါအီၤလီၤအဃိတၢ်အိၣ်သးခဲအံၤလ့ၤတက့ၤဟးၦ့ၤသဲးသၣ်တဘၣ်ဂီၢ်ဒံးဘၣ်ႉတနံၣ်အံၤယဟံထဲသဲးဘီၣ်လီၤမီၤနီၤ”အဂ့ၢ်န့ၣ် လီၢ်က၀ီၤပူၤၦၤၦ့ၤသဲးသၣ်ဖိတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဟီၣ်က၀ီၤအပူၤခီဖျိတၢ်ဂၢၢ်တၢ်ကျၢၤတအိၣ်ဒံးဘၣ်အဃိလီၢ်က၀ီၤတၢ်လီၢ်တနီၤအပူၤန့ၣ် ၦၤဆါက့ၤထဲသဲးဘီၣ်တဖၣ်လီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ကီးတရံးကီၢ်ဆၣ်အပူၤလၢကီးတရံးကလံၤစိးဒီးကီးတရံးကလံၤထံးတကပၤန့ၣ်ၦၤဖံးအီၣ်မၤအီၣ်သူၣ်၀ဲသဲးသၣ်အါဒီးဖဲန့ၣ်အကျါမံၣ်ဖလါသ၀ီႇအစိသ၀ီႇလါဖါသ၀ီဒီးကီၣ်စဲၤသ၀ီသ့ၣ်တဖၣ်အံၤတနံၣ်ညါအံၤၦၤဟးၦ့ၤသဲးသၣ်လီၤစှၤ၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ
ခီဖျိပယီၤသုးနုာ်လီၤလၢကတၢၢ်တံာ်သ၀ီပူၤအဃိလီၢ်က၀ီၤကမျၢၢ်ဘၣ်ဃ့ၢ်ထီၣ်
လါနိၣ်၀့ဘၢၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ကတၢၢ်တံာ်သ၀ီအပူၤ ဖဲလါနိၣ်၀့ဘၢၣ် ၆ သီအနံၤန့ၣ် တၢ်ဒုးကဲထီၣ်လၢခံခီခံကပၤအဘၢၣ်စၢၤ၀ံၤအလီၢ်ခံခီဖျိပယီၤသုးနုာ်လီၤလၢသ၀ီပူၤအဃိ လီၢ်က၀ီၤကမျၢၢ်တဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ်သ့ၣ်ညါဘၣ်န့ၣ်လီၤႉ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲလါနိၣ်၀့ဘၢၣ် ၆ သီ ဟါခီအဆၢကတီၢ်န့ၣ်ပယီၤသုးနုာ်လီၤလၢကတၢၢ်တံာ်သ၀ီပူၤအဂၤ(၄၀)ဃၣ်ဃၣ်ဒီးကဘီယူၤစ့ၢ်ကီးဟဲတ့ၢ်လီၤမ့ၣ်ပိၢ်အဃိလီၢ်က၀ီၤကမျၢၢ်ဘၣ်ဃ့ၢ်ထီၣ်၀ဲအဂ့ၢ်န့ၣ်လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲမုၢ်ဟါလီၤ ၄ နၣ်ရံၣ်အခါန့ၣ် ပယီၤသုးကဘီယူၤ(၂)ဘ့ၣ်ဒီးဒုးသုးကဘီယူၤတဘ့ၣ် ဟဲခးလီၤတၢ်ႉခဲအံၤပယီၤသုးနါက့ဟဲနုာ်လီၤလၢကတၢၢ်တံာ်သ၀ီပူၤလံႉသ၀ီဖိတဖၣ်ဘၣ်အိၣ်၀ဲလၢဖၣ်ပူၣ်–ကမၤမိၣ်ကျဲကပၤၦၢ်ပူၤဒ်န့ၣ်လီၤမီၤနီၤႉပယီၤသုးကအိၣ်လၢအဂၤ(၄၀)ညါႉခဲအံၤၦၤလၢအိၣ်တ့ၢ်လၢသ၀ီပူၤညါအိၣ်တ့ၢ်ႉလၢသ၀ီပူၤန့ၣ်ၦၤခူၣ်မၤဂ့ၤထီၣ်တၢ်ပူၤလံမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါန့ၣ်လီၤႉ ပယီၤသုးလၢအနုာ်လီၤလၢဖၣ်ပူၣ်–ကမၤမိၢ်ကျဲ စ့ၤစွဲၤသ၀ီဒီးတီၤသူၤသ၀ီအဘၢၣ်စၢၤတဖၣ်အံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အိၣ်ခိးခးအ၀ဲသ့ၣ်လၢတၢ်ဘၢၣ်စၢၤတၢ်ဒုးကဲထီၣ်အဃိ ကတၢၢ်တံာ်သုးခိးကီၢ်ဆၢ(BGF)စ့ၢ်ကီးခးလီၤစၢၤကျိဖးဒိၣ်ဆူတၢ်ဒုးကဲထီၣ်အလီၢ်ကအိၣ်အဘျီ(၂၀)ဃၣ်ဃၣ်ညါအဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ ဒ်န့ၣ်အသိးဖဲစှၤသီအတီၢ်ပူၤအံၤပယီၤသုးမၤအါထီၣ်အသုးဂံၢ်ဘါလၢဖၣ်ပူၣ်–ကမၤမိၢ်သ၀ီတဖၣ်အပူၤ ဟဲအါထီၣ်၀ဲဒီးဒိးလီၤစ့ၢ်ကီးဟီၣ်လာ်မ့ၣ်ပိၢ်လၢကျဲမုၢ်ဒီတဘိအဂ့ၢ်န့ၣ် လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ တၢ်ဒုးကဲထီၣ်ဖဲလါနိၣ်၀့ဘၢၣ် ၆ သီဘျီ၀ဲန့ၣ်အပူၤပယီၤသုးသံ၀ဲ(၂)ဂၤဒီးဘၣ်ဒိ၀ဲ(၈)ဂၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤကမျၢၢ်အအိၣ်န့ၣ်လီၤႉ ဖဲအပူၤကွံာ်လါအီကူး ၂၁ သီအနံၤစ့ၢ်ကီး (KNLA)ထီၣ်မၤန့ၢ်၀ဲကတၢၢ်တံာ်သ၀ီကရူၢ်(BGF)သုးကလၢၤဖိ တဖျၢၣ်ဒီးမၤန့ၢ်ဃုာ်စ့ၢ်ကီး၀ဲကျိချံၦာ်သၣ်တနီၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲန့ၣ်လီၤႉ
ပယီၤသုးဟဲက့ၤဟ့ၣ်လီၤသးဆူ(KNU)အအိၣ်တဂၤႇဟဲက့ၤစိာ်ဃုာ်ကျိ(၂)ခိၣ်ဒီးကျိချံပှာ်သၣ်တဖၣ်
လါနိၣ်၀့ဘၢၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ် ဖဲလါနိၣ်၀့ဘၢၣ် ၆ သီအနံၤန့ၣ် ပယီၤသုးဟဲက့ၤဟ့ၣ်လီၤသးဆူခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အအိၣ်တဂၤဒီး ဟဲက့ၤစိာ်ဃုာ်၀ဲကျိ(၂)ခိၣ်ဒီးကျိချံၦာ်သၣ်တဖၣ် အဂ့ၢ်န့ၣ်သ့ၣ်ညါဘၣ်လၢၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ လၢကၠၤအ့စ့ၣ်ကၠံ၀့ၢ်ပယီၤသုးခီၣ်သုးရ့ၣ်(ခလရ–၂၈၄)အၦၤယဲနဲၤသွ့ဟဲက့ၤဟ့ၣ်လီၤသးဆူ(KNLA)သုးရ့ၣ် ၁၇ အအိၣ်ဒီးဟဲက့ၤစိာ်ဃုာ်၀ဲ MA1 တခိၣ်ႇ MA2 တခိၣ်ႇ ကျိဒၢ(၄)ခါႇ ကျိချံ(၂၄၀)ဖျၢၣ်ႇ စုာ်ကွံာ်မ့ၣ်ပိၢ်(၃)ဖျၢၣ်ႇ အံၤနၤကၤ(၄)ဖျၢၣ်ႇ (၄၀ မမ)အချံ(၁)ဖျၢၣ်ႇအံၣ်ကွ့မဲၣ်ဒီးဆ့ကၤဒီသဒၢကျိချံ(၁)စိၣ် အဂ့ၢ်န့ၣ် KNLA ပယိၤဂီၤသုးကျိၤ စံး၀ဲန့ၣ်လီၤႉ “အ၀ဲသ့ၣ်စံၣ်ထီၣ်န့ၣ်သၢဂၤမီၤနီၤႉအ၀ဲတဂၤခီန့ၣ်အခီၣ်ဒ့ချံးႉမ့၀ံၤအ၀ဲဟ့ၣ်လီၤက့ၤအကျိလၢအသကိးအအိၣ်ဒ်သိးအစံၣ်ကပူၤဖျဲးအဂီၢ်မီၤနီၤႉစံၣ်ပူၤဖျဲးထီၣ်န့ၢ်တဂၤလီၤႉအ၀ဲခံဂၤခီန့ၣ်ၦၤဖီၣ်ချုးကဒါက့ၤ၀ဲႉၦၤလၢအစံၣ်ပူၤဖျဲးထီၣ်တဂၤအံၤခီန့ၣ်ဟဲက့ၤစိာ်ဃုာ်၀ဲကျိ(၂)ခိၣ်ႇကျိဒၢပၣ်ခဲလၢာ်လီၤမီၤနီၤ”အဂ့ၢ်န့ၣ် KNLA သုးရ့ၣ်(၁၇) ပယိၤဂီၤသုးကျိၤ ၦၤဘၣ်မူဘၣ်ဒါတဂၤစံးဘၣ်ခ့ၣ်အဲးစံၣ်န့ၣ်လီၤႉ ဖဲအပူၤကွံာ်လါအီးကထိဘၢၣ် ၂၉ သီအနံၤစ့ၢ်ကီး ပယီၤသုးခီၣ်သုးရ့ၣ်(ခမရ–၃၅၈)ႇ(ခလရ–၂၈၄)ႇ(ခလရ–၄၃၂)သုးရ့ၣ်အၦၤ ၅ ဂၤ ဟဲက့ၤဟ့ၣ်လီၤသးဆူ(KNLA)သုးရ့ၣ် ၁၇ အအိၣ်ဒံးန့ၣ်လီၤႉဒ် KNLA (သုးက့ ၆) အတၢ်မၤနီၣ်စရီအသိးန့ၣ် သုးဟံးန့ၢ်တၢ်စိတၢ်ကမီၤ၀ံၤအလီၢ်ခံပယီၤသုးဒီးပၢၤကီၢ်ၦၤဘၣ်မူဘၣ်ဒါဟဲက့ၤဟ့ၣ်လီၤသး ဆူအ၀ဲသ့ၣ်သုးရ့ၣ်ကိးရ့ၣ်ဒဲးအအိၣ်ခဲလၢာ်အိၣ်၀ဲအဂၤ(၁၀၀)ဘျဲၣ်လံအဂ့ၢ်န့ၣ်သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါပယီၤသုးလၢတၢ်ဖီၣ်န့ၢ်အီၤလၢတၢ်ဒုးပျီပူၤတဖၣ်အိၣ်၀ဲအဂၤ(၉၀)ဘျဲၣ်အဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ်ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ ဒ်န့ၣ်အသိးဖဲအပူၤကွံာ်လါနိၣ်၀့ဘၢၣ် ၅ သီအနံၤစ့ၢ်ကီး ပယီၤသုးတြိၤ(၄၄)စုတီၤအဖီလာ်(ခမရ–၂) အၦၤတဂၤဟဲက့ၤဟ့ၣ်လီၤသးဆူ KNLA သုးရ့ၣ် ၂၇ (Cobra)သုးပာ်ဖှိၣ်သုးကျိၤအအိၣ်ဃုာ်ဒီး စုက၀ဲၤကျိချံၦာ်သၣ်တဖၣ်အသိး ဖဲလါအီးကထိဘၢၣ် ၂၈...
ၦၤလွံၢ်ဂၤလၢအဖီၣ်မၤတရီတပါမၤသံဖိသၣ်(၂)ဂၤအံၤတၢ်စံၣ်ညီၣ်လီၤလၢတၢ်သံဒီးကဘၣ်လီၤဃိာ်လၢနံၣ်ယံၤ
လါနိၣ်၀့ဘၢၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ် လ့ဖိသ၀ီအပူၤန့ၣ် ၦၤပိာ်ခွါ(၄)ဂၤလၢအဖီၣ်ဆူၣ်မၤတရီတပါမၤသံဖိသၣ်(၂)ဂၤအံၤ တၢ်စံၣ်ညီၣ်လီၤလၢတၢ်သံဒီး ကဘၣ်လီၤဃိာ်လၢနံၣ်ယံၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ ဖဲအပူၤကွံာ်လါအ့ဖြ့ၣ် ၂၄ သီအနံၤန့ၣ် ၦၤပိာ်ခွါ(၄)ဂၤလၢအဖီၣ်ဆူၣ်မၤတရီတပါ၀ဲဒၣ် ဖိသၣ်ပိာ်မုၣ်(၉)နံၣ်ဒီး (၁၂)နံၣ်ခံဂၤအံၤ ၀ီၢ်ရ့ၣ်ကီၢ်ဆၣ်ကညီဒီကလုာ်ပၢၤကီၢ်သုးမၤဖျါထီၣ်တၢ်ဂ့ၢ်၀ံၤအလီၢ်ခံ ဖဲအပူၤကွံာ်လါစဲးပထ့ဘၢၣ် ၂၈ သီအနံၤန့ၣ် ၦၤလၢအမၤကမၣ်တၢ်သ့ၣ်တဖၣ်အံၤ တၢ်စံၣ်ညီၣ်လီၤ၀ဲလၢတၢ်သံဒီးကဘၣ်လီၤဃိာ်လၢနံၣ်ယံၤ အဂ့ၢ်န့ၣ် သ့ၣ်ညါဘၣ်လၢဒူပျာ်ယာ်ကီၢ်ရ့ၣ် ကွီၢ်ဘျီၣ်ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ ၀ီၢ်ရ့ၣ်ကီၢ်ဆၣ်ပူၤ လ့ဖိသ၀ီဖိ စီၤမီၤခၠ့ၣ်ဆိ(၃၉)နံၣ်ဒီးစီၤဖါအဲၣ်တံ(၃၅)နံၣ်အံၤ ခီဖျိဖီၣ်ဆူၣ်မၤတရီတပါမၤသံကွံာ် လ့ဖိသ၀ီဖိသၣ်မုၣ်ဖိ(၉)နံၣ်ဒီး(၁၂)နံၣ်ခံဂၤအံၤအဃိကီၢ်သူလ့ၤကွီၢ်မ့ၣ်စံၣ်ညီၣ်ကွီၢ်စံၣ်ညီၣ်လီၤ၀ဲလၢတၢ်သံဒီးကဘၣ်လီၤဃိာ်လၢနံၣ်ယံၤဒီးမ့မ့ၢ်လ့နီၢ်(တီၤစိ)သ၀ီဖိစီၤအဲၣ်ဒိၣ်ထူ(၂၇)နံၣ်ဒီးလ့ဖိသ၀ီစီၤစိ၀့သါ(၂၃)နံၣ်ခံဂၤအံၤခီဖျိအ၀ဲသ့ၣ်ပၣ်ဃုာ်လၢတၢ်မၤတရီတပါတၢ်မၤသံမၤ၀ီပူၤအဃိတၢ်စံၣ်ညီၣ်လီၤအ၀ဲသ့ၣ်လၢကဘၣ်လီၤဃိာ်လၢနံၣ်ယံၤအဂ့ၢ်န့ၣ်ကီၢ်ရ့ၣ်စံၣ်ညီၣ်ကွီၢ်စံး၀ဲန့ၣ်လီၤႉ ဒူပျာ်ယာ်ကီၢ်ရ့ၣ် စံၣ်ညီၣ်ကွီၢ် ပဒိၣ်စီၤခၠၤလပၣ်စံး၀ဲလၢ“စီၤအဲၣ်ဒိၣ်ထူန့ၣ်ဘၣ်လီၤလၢဃိာ်ပူၤအနံၣ်(၁၀)ႉ မ့မ့ၢ်စီၤစိ၀့သါန့ၣ်ဘၣ်လီၤလၢဃိာ်ပူၤ(၁၇)နံၣ်ႉလၢအ၀ဲခံဂၤခီန့ၣ်တၢ်စံၣ်ညီၣ်သံအီၤမီၤနီၤႉမ့မ့ၢ်ၦၤလၢတၢ်စံၣ်ညီၣ်သံအီၤခံဂၤအံၤခီန့ၣ်ပကဘၣ်ပတံထီၣ်တၢ်မူးတၢ်ရၢ်ဆူလီၢ်ခၢၣ်သးစံၣ်ညီၣ်ကွီၢ်ဘျီၣ်အအိၣ်ႉအ၀ဲသ့ၣ်ခီန့ၣ်မၤဆါမၤပယွဲႇမၤသံႇမၤတရီတပါတၢ်မူးတၢ်ရၢ်မီၤနီၤႉလီၢ်ခၢၣ်သးသမံသမိး၀ဲမ့၀ံၤန့ၣ်ပကမၤဒ်တၢ်စံၣ်ညီၣ်လီၤတ့ၢ်ဃာ်၀ဲအသိးလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဘၣ်ဃး တၢ်ဂ့ၢ်ကဲထီၣ်သးခီန့ၣ်ဖဲအပူၤကွံာ်လါအ့ဖြ့ၣ် ၂၄ သီ ဂီၤခီ ၉ နၣ်ရံၣ်အဆၢကတီၢ်န့ၣ် လ့ဖိသ၀ီ ဖိသၣ်ပိာ်မုၣ်ဒီပုၢ်၀ဲၢ်ခံဂၤအံၤဖဲအ၀ဲသ့ၣ်လဲၤဃုအီၣ်တၢ်ဒိတၢ်လၣ်လၢသ၀ီချၢကျီးပူၤအခါလီၤမၢ်၀ဲ၀ံၤအလီၢ်ခံ ဖဲလါအ့ဖြ့ၣ် ၂၅ သီအနံၤန့ၣ် ကီၢ်ဆၣ်ကညီဒီကလုာ်ပၢၤကီၢ်သုးဒီးသ၀ီဖိတဖၣ်ဟးဃု၀ဲၦၤဒီပုၢ်၀ဲၢ်ခံဂၤအံၤ ထံၣ်က့ၤဖိသၣ်လၢအသံလံဒီးဖဲတၢ်သမံသမိးဖိသၣ်ခံဂၤအံၤအစိၣ်အခါန့ၣ်တၢ်ထံၣ်၀ဲလၢတၢ်မၤတရီတပါတ့ၢ်ဃာ်အ၀ဲသ့ၣ်အဂ့ၢ်န့ၣ်ပၢၤကီၢ်၀ဲၤကျိၤအတၢ်မၤနီၣ်မၤဃါအသိးသ့ၣ်ညါဘၣ်န့ၣ်လီၤႉ ၦၤမၤကမၣ်တၢ်ဖိလၢတၢ်စံၣ်ညီၣ်သံ၀ဲအံၤတဖၣ်ဒ်ခ့ၣ်အဲၣ်ယူၣ်ကီၢ်သူလ့ၤကွီၢ်မ့ၣ်သဲစးတၢ်ဘျၢ(၁၄)အသိးန့ၣ် တၢ်စံၣ်ညီၣ်သံလၢကီၢ်ရ့ၣ်စံၣ်ညီၣ်ကွီၢ်ဘျီၣ်ဆၢတဲာ်လီၤ၀ဲအံၤတၢ်ကဘၣ်ပတံထီၣ်အီၤဆူလီၢ်ခၢၣ်သးစံၣ်ညီၣ်ကွီၢ်ဘျီၣ်အအိၣ်ဒီးတၢ်ဃိထံသမံသမိးပာ်ဂၢၢ်ပာ်ကျၢၤတၢ်မူးတၢ်ရၢ်မ့၀ံၤမးတၢ်ကဘၣ်ဟံးထီၣ်ဖီၣ်ထီၣ်မၤ၀ဲဒ်တၢ်စံၣ်ညီၣ်လီၤတ့ၢ်ဃာ်၀ဲအသိးအဂ့ၢ်န့ၣ် သ့ၣ်ညါဘၣ်လၢခ့ၣ်အဲၣ်ယူၣ်ကွီၢ်မ့ၣ်သဲစးသနူပူၤအသိးန့ၣ်လီၤႉ
ပယီၤသုးပာ်ဖှိၣ်ခးလီၤကျိဖးဒိၣ်အဃိတလါအတီၢ်ပူၤကမျၢၢ်သံ(၁၃)ဂၤအဂ့ၢ် KNU ထုးထီၣ်ပာ်ဖျါ
လါနိၣ်၀့ဘၢၣ် ၈ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်သလ့ၤတၢ်ပၢဟီၣ်က၀ီၤအပူၤ ဖဲအပူၤကွံာ်လါအီးကထိဘၢၣ်တလါအတီၢ်ပူၤခီဖျိပယီၤသုးပာ်ဖှိၣ်ခးလီၤကျိဖးဒိၣ်အဃိကမျၢၢ်ဘၣ်သံ(၁၃)ဂၤ အဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲလါနိၣ်၀့ဘၢၣ် ၆ သီအနံၤန့ၣ်လီၤႉ လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤ ပယီၤသုးႇသုးခိးကီၢ်ဆၢ(BGF)ဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ် (KNLA)ႇကညီဒီကလုာ်ဂၢၤသးကရၢ(KNDO)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ံၤအလီၢ်ခံ ခီဖျိပယီၤသုးတကပၤခးလီၤကျိဖးဒိၣ်ဆူသ၀ီတဖၣ်အပူၤတကးဒံးဘၣ်အမဲာ်ညါခီဖျိကဘီယူၤစ့ၢ်ကီး ဟဲခးလီၤတၢ်အဃိကမျၢၢ်တၢ်သံတၢ်ဘၣ်ဒိဘၣ်ထံးဘၣ်အါ၀ဲဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ကမျၢၢ်သံတဖၣ်အကျါတနီၤန့ၣ်ဘၣ်၀ဲဒီးပယီၤသုးအကျိဖးဒိၣ်အိၣ်၀ဲအသိးတနီၤန့ၣ်ဘၣ်တၢ်မၤသံအီၤဆှူၣ်မဲာ်ကဲာ်မဲာ်လၢတၢ်ဂ့ၢ်တအိၣ်နီတမံၤဘၣ်ဒီးကမျၢၢ်ဘၣ်ဒိဘၣ်ထံး၀ဲ(၄၆)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤအသိးသ့ၣ် ညါဘၣ်န့ၣ်လီၤႉ ခီဖျိပယီၤသုးခးလီၤကျိဖးဒိၣ်ဆူဒူသ၀ီတၢ်ဖံးအီၣ်မၤအီၣ်လီၢ်ကျဲအဃိဘၣ်ဟးဂီၤ၀ဲကမျၢၢ်အဟံၣ်အဃီတနီၤအသိးလၢခ့ၣ်အဲၣ်ယူၣ်(သုးက့ ၁)ဟီၣ်က၀ီၤပူၤစ့ၢ်ကီးပယီၤသုးဒီး(BGF)ဒွဲၣ်အူအီၣ်၀ဲကမျၢၢ်အဟံၣ်(၁၈)ဖျၢၣ်ဒီး လၢချၢၣ်လွံၢ်ထူၣ်ကီၢ်ရ့ၣ်ပူၤစ့ၢ်ကီးဒွဲၣ်အူအီၣ်၀ဲကမျၢၢ်အဟံၣ်(၆)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်စံး၀ဲန့ၣ်လီၤႉ ကတီၢ်ခဲအံၤတၢ်ဆၢကတီၢ်တုၤဃီၤလၢလီၢ်က၀ီၤကမျၢၢ်ကဘၣ်ကူးဘုပာ်ဖှိၣ်ဘုလံဘၣ်ဆၣ် လၢခ့ၣ်အဲၣ်ယူၣ်ချၢၣ်လွံၢ်ထူၣ်ကီၢ်ရ့ၣ်(မိကီၢ်ဆၣ်)ပူၤန့ၣ် ခီဖျိပယီၤသုးတပျဲကမျၢၢ်လၢကကူးဘုဘၣ်အဃိ ကမျၢၢ်တဖၣ်ထံၣ်ဘၣ်၀ဲတၢ်လုၢ်အီၣ်နီၢ်ခိသးသမူတၢ်ကီတၢ်ခဲတဖၣ်အဂ့ၢ်န့ၣ်လီၢ်က၀ီၤကမျၢၢ်တဖၣ်စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ်အခါစ့ၢ်ကီးလၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤခီဖျိပယီၤသုးကဘီယူၤဟဲခးလီၤတၢ်ဒီးခးလီၤကျိဖးဒိၣ်အဃိကမျၢၢ်သံ(၆)ဂၤႇဘၣ်ဒိ(၁၁)ဂၤအဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ လၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤပယီၤသုးသုးရ့ၣ်(၅၀)ဘျဲၣ်ဒီးဟီၣ်က၀ီၤသုးခိးကီၢ်ဆၢ(BGF)သုးရ့ၣ်(၄)ရ့ၣ်ပာ်ဖှိၣ်ထီၣ်သးနုာ်လီၤမၤ၀ဲဒုးယၤတၢ်ဟူးတၢ်ဂဲၤအဃိဖဲအပူၤကွံာ်လါအီးကထိဘၢၣ်အတီၢ်ပူၤန့ၣ်တၢ်ဒုးကဲထီၣ်၀ဲ(၂၈၆)ဘျီဒီးပယီၤသုးကဘီယူၤဟဲခးလီၤတၢ်(၆)ဘျီအဂ့ၢ်န့ၣ််ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ စးထီၣ်ဖဲတနံၣ်အံၤလါယနူၤအါရံၤတုၤလၢလါအီးကထိဘၢၣ်န့ၣ်ပယီၤသုးဒီးဟီၣ်က၀ီၤ(KNLA)သုးပာ်ဖှိၣ်အဘၢၣ်စၢၤတၢ်ဒုးကဲထီၣ်၀ဲ(၃၈၄၅)ဘျီဒီးဖဲန့ၣ်ပယီၤသုးႇ(BGF)တကပၤသံ၀ဲ(၃၆၆၄)ဂၤႇဘၣ်ဒိ၀ဲ(၂၇၀၀)ဂၤအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ ဖဲအပူၤကွံာ်(၂၀၂၁)တနံၣ်အတီၢ်ပူၤလၢခ့ၣ်အဲၣ်ယူၣ်တၢ်ပၢဟီၣ်က၀ီၤတဖၣ်အပူၤတၢ်ဒုးကဲထီၣ်၀ဲ(၃၁၅၂)ဘျီဒီး ဖဲန့ၣ်ပယီၤသုးဒီးအစုတီၤဖီလာ်သုးခိးကီၢ်ဆၢ(BGF)တကပၤသံ၀ဲ(၂၁၉၀)ဂၤႇဘၣ်ဒိ(၂၀၄၈)ဂၤအဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲန့ၣ်လီၤႉ
ပလီကီၢ်ဆၣ်ပူၤ PDF ခိးထုးပယီၤသုးလၢမ့ၣ်ပိၢ်
လါနိၣ်၀့ဘၢၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် မၠ့ၣ်ကီၢ်ရ့ၣ် ပလီကီၢ်ဆၣ်အပူၤ ဖဲတနံၤအံၤဂီၤခီအဆၢကတီၢ်န့ၣ် PDF ခိးထုးပယီၤသုး အဂၤ(၅၀)ဃၣ်ဃၣ်လၢမ့ၣ်ပိၢ်ဒီး ဖဲန့ၣ်သံဘၣ်ဒိဘၣ်ထံးအိၣ်၀ဲအဂ့ၢ်န့ၣ် ဟီၣ်က၀ီၤတၢ်ဒီသဒၢကမျၢၢ်သုးတကပၤ စံး၀ဲန့ၣ်လီၤႉ ပလီဟီၣ်က၀ီၤအပူၤဖဲတနံၤအံၤလါနိၣ်၀့ဘၢၣ် ၇ သီ ဂီၤခီ ၅ နၣ်ရံၣ်ဃၣ်ဃၣ်အဆၢကတီၢ်န့ၣ် လၢ(မ့ထ့ၤ)သ၀ီကပၤ ပယီၤသုးလၢအဟဲထီၣ်ပိာ်ကျဲဒီးအခီၣ်တဖၣ်အံၤ ပလီ(PDF)အိၣ်ခိးထုးအ၀ဲသ့ၣ်ဒီးမ့ၣ်ပိၢ်ဃုဖျၢၣ်အဃိ ဖဲန့ၣ်ပယီၤသုးသံဘၣ်ဒိဘၣ်ထံးအဂၤ(၁၀)ဘျဲၣ်အဂ့ၢ်န့ၣ် ပလီ(PDF)ၦၤဘၣ်မူဘၣ်ဒါတဂၤစံးဘၣ် ခ့ၣ်အဲးစံၣ်ဒ်အံၤန့ၣ်လီၤႉ အ၀ဲစံး၀ဲလၢ“ဘၣ်ဃးဒီးတၢ်တခါအံၤပတထုးထီၣ်ပာ်ဖျါဘၣ်ဒံးဘၣ်ႉဖဲတဂီၤအံၤ ၅း၄၀ မံးနံးအခါန့ၣ် ၦၤခိးထုးပယီၤသုးဒီးမ့ၣ်ပိၢ်ဃုဖျၢၣ်ဖဲ(မ့ထ့ၤ)သ၀ီကပၤႉအ၀ဲသ့ၣ်တဟဲထီၣ်ဒီးသိလ့ၣ်ဘၣ်ႇဟဲဟးဒီးအခီၣ်ၦၤနီၣ်ဂံၢ်ကအိၣ်အဂၤ(၅၀)ဘျဲၣ်ညါႉပဒိးန့ၢ်ဘၣ်တၢ်ကစီၣ်လၢအ၀ဲသ့ၣ်ကဟဲထီၣ်အဃိပလဲၤအိၣ်ခိးထုးဒီးမ့ၣ်ပိၢ်လီၤ”အဂ့ၢ်န့ၣ်စံး၀ဲန့ၣ်လီၤႉ လၢမၠ့ၣ်–ဒ၀ဲၢ်ကျဲမုၢ်ခိၣ် ပလီကီၢ်ဆၣ် သ၀ီတဖၣ်န့ၣ် တၢ်ခိးထုးပယီၤသုးသိလ့ၣ်ကဲထီၣ်သးတလီၢ်လီၢ် တကးဒံးဘၣ်အမဲာ်ညါတၢ်ဒုးစ့ၢ်ကီးကဲထီၣ်ခဲအံၤခဲအံၤဒီးခီဖျိတၢ်ဒုးတၢ်ယၤအဃိလီၢ်က၀ီၤကမျၢၢ်လၢအကထိဘၣ်ဃ့ၢ်မှံဟးဖျိးတုၤလၢခဲအံၤတစုန့ၣ်လီၤႉ
ဒ၀ဲၢ်၀့ၢ်ပူၤ တၢ်ဟးလူၤဖီၣ်(CDM)ကၠိသရၣ်/မုၣ်ဟဲအါထီၣ်
လါအီးကထိဘၢၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ် လၢတနီသရံၣ်ကီၢ်ခီဒိၣ် ဒ၀ဲၢ်၀့ၢ်ပူၤ ဖဲစှၤသီအတီၢ်ပူၤအံၤပယီၤသုးဟးလူၤဖီၣ်(CDM)ကၠိသရၣ်/မုၣ်ဟဲအါထီၣ်အဃိ ဘၣ်ဟးစံၣ်အိၣ်ခူသူၣ်၀ဲအဂ့ၢ်န့ၣ် သ့ၣ်ညါဘၣ်လၢ(CDM)သရၣ်/မုၣ်တဖၣ်အအိၣ်န့ၣ်လီၤႉ သုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံလၢဒ၀ဲၢ်ကီၢ်ဆၣ်အပူၤ တၢ်ဟးလူၤဖီၣ်ၦၤ(CDM)ဖိဒီး ကမျၢၢ်ထံဖိကီၢ်ဖိတဖၣ်အိၣ်၀ဲဘၣ်ဆၣ် စးထီၣ်ဖဲအပူၤကွံာ်လါအီးကထိဘၢၣ်လၢာ်န့ၣ် ခီဖျိတၢ်ဟးလူၤဖီၣ်(CDM)ကၠိသရၣ်/မုၣ်ဟဲအါထီၣ်အဃိ ကၠိသရၣ်/မုၣ်တဖၣ်ဘၣ်ဟးစံၣ်အိၣ်ခူသူၣ်၀ဲအဂ့ၢ်န့ၣ် (CDM)ကၠိသရၣ်မုၣ်တဂၤစံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဘၣ်ဟးစံၣ်အိၣ်ခူသူၣ်န့ၣ်လၢညါလံၤလံၤလံႉဖဲစှၤသီအတီၢ်ပူၤအံၤဟဲဃံးဒိၣ်ထီၣ်တစဲးႉလၢ၀့ၢ်ပူၤနါက့ဒ်သုသ့ၣ်ညါအသိးလီၤပယီၤသုးသမံသမိးတၢ်ဟဲအါထီၣ်ႉလဲၤအိၣ်လၢပုၢ်ဖိ၀ဲၢ်ဖိအဟံၣ်တဘျီဘျီဘၣ်ဟးအိၣ်ဒ်န့ၣ်လီၤမီၤနီၤႉမ့ဟးသမံသမိးၦၤတမှံၤစရီလၢမုၢ်နၤခီန့ၣ်နးဒိၣ်တစဲးဒီးႉမ့ၢ်ကဘၣ်မၤမနုၤလဲၣ်မးတ့သၣ်ညါလၢၤဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ဖဲစှၤသီအတီၢ်ပူၤၦၤလၢအမၤ(CDM)တဖၣ်ဘၣ်ဟးစံၣ်အိၣ်ခူသူၣ်အဃိတကးဒံးဘၣ်အိၣ်တၢ်လီၢ်တဂၢၢ်တကျၢၤဘၣ်အမဲာ်ညါခီဖျိတၢ်ဖံးတၢ်မၤစ့ၢ်ကီးတအိၣ်ဘၣ်အဃိကျိၣ်စ့တၢ်ဟဲနုာ်တအိၣ်၀ဲဘၣ်အဂ့ၢ်န့ၣ်(CDM)သရၣ်မုၣ်လၢအဂၤတဂၤစ့ၢ်ကီးစံး၀ဲဒ်အံၤန့ၣ်လီၤႉ “ခဲအံၤပဟးတသ့နီတပူၤဘၣ်ႉပမ့ၢ်(CDM)အဃိနးဒိၣ်၀ဲတစဲးမီၤနီၤႉနဟးဒိးဆဲးကဲးလၢ၀့ၢ်ပူၤနါက့ဖဲအ၀ဲသ့ၣ်အဲၣ်ဒိးဖီၣ်၀ဲန့ၣ်ဖီၣ်၀ဲလီၤႉခီဖျိပဟးစံၣ်အိၣ်တၢ်လီၢ်လၢအံၤတတီၤလၢန့ၣ်တတီၤအဃိလၢကမၤအီၣ်မၤအီအဂီၢ်န့ၣ်တမ့ၢ်တၢ်ညီဘၣ်ႉကဘၣ်ဆဲးမၤဒ်လဲၣ်မးတသ့ၣ်ညါလၢၤဘၣ်”အဂ့ၢ်န့ၣ်စံး၀ဲန့ၣ်လီၤႉ လၢတနီသရံၣ်ကီၢ်ခီဒိၣ်အပူၤ ကူၣ်သ့၀ဲၤကျိၤၦၤမၤတၢ်ဖိလၢအနုာ်လီၤမၤ(CDM)အိၣ်၀ဲ(၉၀)မျးကယၤညါဒီး ခီဖျိဟီၣ်က၀ီၤပူၤတၢ်ဘံၣ်တၢ်ဘၢတအိၣ်ဘၣ်အဃိအါဒၣ်တက့ၢ်န့ၣ်ဘၣ်ဟးစံၣ်အိၣ်ခူသူၣ်၀ဲလၢ၀့ၢ်အဂၤတဖၣ်အိၣ်၀ဲအသိးတနီၤစ့ၢ်ကီးခီဖျိတၢ်ကီတၢ်ခဲအိၣ်ထီၣ်လၢတၢ်လုၢ်အီၣ်နီၢ်ခိသးသမူအဃိအ၀ဲသ့ၣ်သုးအလီၢ်လဲၤအိၣ်၀ဲဒၣ်လၢကီၢ်ကၠီၣ်တဲၣ်ဒီးမလ့ရှါထံကီၢ်အဂ့ၢ်န့ၣ်ဟီၣ်က၀ီၤၦၤဟ့ၣ်တၢ်ကစီၣ်ဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
ကညီကီၢ်စဲၣ်မုၢ်နံၤအဂီၢ်သုးမီၤစိရိၤပာ်လီၤတၢ်ဘံၣ်တၢ်ဘၢဃံးဒိၣ်န့ၢ်အပူၤကွံာ်နံၣ်
လါနိၣ်၀့ဘၢၣ် ၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢကညီကီၢ်စဲၣ် ဖၣ်အၣ်၀့ၢ်ပူၤ ကီၢ်စဲၣ်မုၢ်နံၤၦဲၤထီၣ်(၆၇)၀ီတ၀ီလၢသုးမီၤစိရိၤကမၤ၀ဲအံၤန့ၣ် တၢ်ပာ်လီၤ၀ဲတၢ်ဘံၣ်တၢ်ဘၢဃံးဒိၣ်န့ၢ်အပူၤကွံာ်မဟိတနံၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ လါနိၣ်၀့ဘၢၣ် ၇ သီအနံၤ လၢတၢ်ကစးထီၣ်အိးထီၣ်၀ဲ(၆၇)၀ီတ၀ီကညီကီၢ်စဲၣ်မုၢ်နံၤမူးအံၤအဂီၢ်န့ၣ် သုးမီၤစိရိၤပာ်လီၤ၀ဲတၢ်ဘံၣ်တၢ်ဘၢဃံးဃီၣ်ဒီၣ်လၢဖၣ်အၣ်၀့ၢ်တၢ်လီၢ်သကုၤဆးဒးအဂ့ၢ်န့ၣ် ကမျၢၢ်လၢအိၣ်၀့ၢ်ပူၤလၢတအဲၣ်ဒိးပာ်ဖျါအမံၤတဂၤစံး၀ဲဒ်အံၤန့ၣ်လီၤႉ “အပူၤကွံာ်မဟိတနံၣ်န့ၣ်ပာ်လီၤတၢ်ဘံၣ်တၢ်ဘၢဒုအိၣ်မီၤနီၤႉအိၣ်၀ဲပၢၤကီၢ်ဒီးသုးလီၤမီၤနီၤႉ အိၣ်ခိး၀ဲတၢ်လၢ ကျဲနုာ်လီၤႇတၢ်ဟးလီၢ်ကပၤဒ်န့ၣ်မီၤနီၤႉဘၣ်ဆၣ်တနံၣ်အံၤခီန့ၣ်လၢတၢ်ကလဲၤကီၢ်စဲၣ်ဘူၣ်ပျီပူၤကျဲဒီတကျိၤန့ၣ်အ၀ဲသ့ၣ်ကးတံၢ်ဃာ်၀ဲမီၤနီၤႉစးထီၣ်ပံးကျဲ၀ဲန့ၣ်လၢသုးဟံးန့ၢ်တၢ်စိတၢ်ကမီၤအခါလံၤလံၤလံႉကျဲ၀ဲန့ၣ်ၦၤခိၣ်ၦၤနၢ်လၢအဘၣ်ထွဲလိာ်သးဒီးသုးမီၤစိရိၤတဖၣ်အိၣ်၀ဲမီၤနီၤႉလၢဂီၤခီန့ၣ်ကီၢ်စဲၣ်ဘူၣ်ပျီပူၤန့ၣ်ပၢၤကီၢ်ဒီးသုးၦဲၤၦဲၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ ဖဲအပူၤကွံာ်မဟိတနံၣ်သုးမီၤစိရိၤတီခိၣ်ရိၣ်မဲမၤ၀ဲ(၆၆)၀ီတ၀ီကညီကီၢ်စဲၣ်ဘူၣ်အခါစ့ၢ်ကီး ၦၤဟဲဟးလၢဘူၣ်ပူၤအိၣ်၀ဲဘၣ်ဆၣ်ခီဖျိတၢ်ပာ်လီၤတၢ်ဘံၣ်တၢ်ဘၢအဃိၦၤဟဲဟးလၢဘူၣ်ပူၤအိၣ်စှၤလီၤအဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၁ သီအခါစ့ၢ်ကီး လၢတၢ်အိၣ်ခိးသဂၢၢ်လီၤကညီကီၢ်စဲၣ်မုၢ်နံၤၦဲၤထီၣ်(၆၇)၀ီတ၀ီ အံၤအဂီၢ်န့ၣ်တၢ်မၤ၀ဲတၢ်အိးထီၣ်(လၣ်ကမၠ့ၤ)ဖီကရၢၢ်အမူးဒီးတၢ်ရဲၣ်တၢ်ကျဲၤအံၤအပူၤ သုးမီၤစိရိၤအသုးခိၣ်သုးနၢ်တဖၣ်ဒီးသုးမီၤစိရိၤစုတီၤအဖီလာ်၀ဲၤကျိၤဘၣ်ထွဲခိၣ်နၢ်တဖၣ်လဲၤထီၣ်၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ကမျၢၢ်အိၣ်ဖၣ်အၣ်၀့ၢ်ပူၤလၢအဂၤတဂၤစ့ၢ်ကီးစံး၀ဲ“ယဆိမိၣ်ဒုဘူၣ်အံၤတမုာ်ဒ်သိးလၢညါခါဘူၣ်ဘၣ်ႉၦၤအိၣ်ခိးသမံသမိးတၢ်လၢ၀့ၢ်ပူၤတၢ်လီၢ်ကိးတီၤဒဲးလီၤႉစးထီၣ်ဖဲ(ဖၠၣ်စိမိၤ)ကၠိကျဲအံၤတုၤလၢတၢ်ကလဲၤဆူကီၢ်စဲၣ်မုၢ်နံၤဘူၣ်ကျဲဒီတကျိၤန့ၣ်အ၀ဲသ့ၣ်ဆီလီၤတြဲၤဒီးပယီၤသုးႇပၢၤကီၢ်အိၣ်ခိးသမံသမိးတၢ်”အဂ့ၢ်န့ၣ်စံး၀ဲန့ၣ်လီၤႉ ဖဲအပူၤကွံာ်မဟိတနံၣ်အခါ ကညီကီၢ်စဲၣ်မုၢ်နံၤတၢ်ရဲၣ်တၢ်ကျဲၤမူးအပူၤ ဒူသ၀ီဒိ(ဒုံး)နုာ်လီၤတပြၢတၢ်အိၣ်(၄)ဖုလီၤဒီးဘၣ်ဆၣ်တနံၣ်အံၤဒိလၢကနုာ်လီၤတပြၢတၢ်အိၣ်၀ဲ အဖု(၂၀)ဘျဲၣ်ညါန့ၣ်လီၤႉ ကညီကီၢ်စဲၣ်မုၢ်နံၤတၢ်ရဲၣ်တၢ်ကျဲၤဘျီ၀ဲအံၤအပူၤကီၢ်ဆၣ်ကိးဘ့ၣ်ဒဲးဃၣ်ဃၣ်အပူၤဒိတဖၣ်နုာ်လီၤတၢ်ပြၢဘၣ်ဆၣ် မ့မ့ၢ်နိၣ်တကီကီၢ်ဆၣ်ပူၤခီန့ၣ်ဒိနုာ်လီၤတၢ်ပြၢတအိၣ်၀ဲဘၣ်အဂ့ၢ်န့ၣ် လီၢ်က၀ီၤၦၤဟ့ၣ်တၢ်ကစီၣ်ဖိစံး၀ဲအသိး သ့ၣ်ညါဘၣ်န့ၣ်လီၤႉ
ကီးတရံးကမျၢၢ်ၦၤဃ့ၢ်တၢ်ဒုးဖိတကထိၣ်ဘျဲၣ်အဂီၢ်တၢ်လဲၤဆီၣ်ထွဲမၤစၢၤ၀ဲဂ့ၢ်ဂီၢ်အူတၢ်အီၣ်တၢ်အီတဖၣ်
လါနိၣ်၀့ဘၢၣ် ၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဖၣ်အၣ်ကီၢ်ရ့ၣ်အပူၤ ဖဲလါနိၣ်၀့ဘၢၣ် ၂ သီအနံၤန့ၣ် ကီးတရံးကီၢ်ဆၣ်လီၢ်က၀ီၤကမျၢၢ်တကထိဘျဲၣ်လၢအဟဲစံၣ်အိၣ်(နဘူကီၢ်ဆၣ်)ပူၤတဖၣ်အံၤအဂီၢ် ကညီပိာ်မုၣ်ကရၢ(KWO)ဒီးလီၢ်က၀ီၤခိၣ်နၢ်တဖၣ်ပာ်ဖှိၣ်ထီၣ်သးလဲၤဆီၣ်ထွဲမၤစၢၤ၀ဲဂ့ၢ်ဂီၢ်အူတၢ်အီၣ်တၢ်အီတဖၣ်န့ၣ်လီၤႉ စးထီၣ်ဖဲလါအီးကထိဘၢၣ်လၢာ်န့ၣ်ခီဖျိပယီၤသုးခးလီၤကျိဖးဒိၣ်ဒီးကဘီယူၤဟဲတ့ၢ်လီၤမ့ၣ်ပိၢ်လၢသ၀ီပူၤအဃိကီးတရံးကီၢ်ဆၣ်လီၢ်က၀ီၤကမျၢၢ်တဖၣ်လဲၤစံၣ်အိၣ်၀ဲလၢ(နဘူကီၢ်ဆၣ်)အဘူးအတံၢ်သ၀ီဒီးခီဖျိတၢ်လိၣ်တၢ်လဲးအိၣ်ထီၣ်အဃိဘၣ်လဲၤမၤစၢၤ၀ဲဂ့ၢ်ဂီၢ်အူတၢ်အီၣ်တၢ်အီဒ်အံၤလီၤအဂ့ၢ်န့ၣ် ခ့ၣ်အဲၣ်ယူၣ်(နဘူကီၢ်ဆၣ်) ကညီဒီကလုာ်ပၢၤကီၢ်သုး စီၤညၤစ့ၤ စံး၀ဲဒ်အံၤန့ၣ်လီၤႉ “ပယီၤသုးခးလီၤကျိဖးဒိၣ်လၢသ၀ီပူၤဒီးကဘီယူၤဟဲခးလီၤတၢ်အဃိၦၤဟဲဃ့ၢ်ထီၣ်လၢအံၤဟံၣ်ခိၣ်ခဲလၢာ်ကအိၣ်လၢအကယၤညါဒီးၦၤနီၣ်ဂံၢ်ကအိၣ်လၢအကထိညါမီၤနီၤႉအ၀ဲသ့ၣ်ဟဲစံၣ်အခါန့ၣ်နီၢ်တဂၤဆ့တဘ့ၣ်လီၤအဃိလိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီတဖၣ်မီၤနီၤႉအဃိန့ၣ်ပတီၣ်ဖျါထီၣ်လၢတၢ်ဖီခိၣ်ဒီးပဟဲမၤစၢၤ၀ဲဒ်အံၤလီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ခီဖျိတၢ်ဒုးကဲထီၣ်အဃိၦၤလၢအဟဲစံၣ်ထီၣ်လၢ(နဘူကီၢ်ဆၣ်)ပူၤတဖၣ်ဟံၣ်ခိၣ်ခဲလၢာ်အိၣ်၀ဲ(၁၉၃)ဖျၢၣ်ႇၦၤနီၣ်ဂံၢ်အိၣ်၀ဲ(၁၀၈၁)ဒီးဖဲန့ၣ်အကျါပၣ်ဃုာ်၀ဲၦၤသးနံၣ်(၁၈)ဆူဖီလာ်(၅၂၉)ဂၤန့ၣ်လီၤႉကတီၢ်ခဲအံၤခီဖျိတၢ်ဒုးကဲထီၣ်ဒံးအဃိတုၤလၢခဲအံၤအ၀ဲသ့ၣ်က့ၤလၢအဒူသ၀ီတဘူၣ်ဒံးဘၣ်ဒီးၦၤစံၣ်ထီၣ်တဖၣ်အကျါပၣ်ဃုာ်ဖိဒံဖိသၣ်ႇသူၣ်က့သးၦၢ်တဖၣ်အဃိလိၣ်ဘၣ်ဒံး၀ဲကသံၣ်ကသီႇတၢ်အီၣ်တၢ်အီတဖၣ်အဂ့ၢ်န့ၣ် စီၤညၤစ့ၤစံးအါထီၣ်၀ဲန့ၣ်လီၤႉ ကတီၢ်ခဲအံၤလၢကီးတရံးကီၢ်ဆၣ်အပူၤန့ၣ်တၢ်ဒုးကဲထီၣ်ဒံး၀ဲဒီးဖဲအပူၤကွံာ်စှၤသီအခါစ့ၢ်ကီး ခီဖျိပယီၤသုးခးလီၤကျိဖးဒိၣ်လၢသ၀ီပူၤအဃိကျိဖးဒိၣ်အက့အခီဘၣ်၀ဲ(ယီၣ်ကိာ်)သ၀ီဖံသးၦၢ်အနံၣ်(၆၀)ဘျဲၣ်တဂၤအခီၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိးသ့ၣ်ညါဘၣ်န့ၣ်လီၤႉ ဒ်န့ၣ်အသိးခီဖျိတၢ်ဒုးကဲထီၣ်အဃိလီၢ်က၀ီၤကမျၢၢ်တဖၣ်အိၣ်လၢအဟံၣ်တဘူၣ်လၢၤဘၣ်အသိး တၢ်ဆၢကတီၢ်စ့ၢ်ကီးဘၣ်လၢကဘၣ်ထုးဖှိၣ်ပာ်ဖှိၣ်ဘုလံဘၣ်ဆၣ်ခီဖျိအ၀ဲသ့ၣ်တကူးဘၣ်ဘုဒံးဘၣ်အဃိ ကျီၢ်ပနၢ်နုာ်လီၤအီၣ်အ၀ဲသ့ၣ်တၢ်မုၢ်တၢ်ဘိတၢ်ချံတၢ်သၣ်ဟးဂီၤ၀ဲအိၣ်အဂ့ၢ်န့ၣ် ကမျၢၢ်လၢအဃ့ၢ်တၢ်ဒုးတဖၣ်စံး၀ဲန့ၣ်လီၤႉ
တၢ်ပၢၢ်ဆၢကရူၢ်ဒီးပယီၤသုးတၢ်ဒုးကဲထီၣ်အခါ မ့ၣ်အူအီၣ်ကမျၢၢ်အဟံၣ် ၄ ဖျၢၣ်
လါနိၣ်၀့ဘၢၣ် ၄ သီႇ ၂၀၂၂ နံၣ်ႇ ခ့ၣ်အဲးစံၣ် လၢကီးတရံးကလံၤစိး(ခန့မူၤ)သ၀ီအပူၤန့ၣ် လီၢ်က၀ီၤတၢ်ပၢၢ်ဆၢသုးပာ်ဖှိၣ်ဒီးပယီၤသုးုအဘၢၣ်စၢၤ တၢ်ဒုးကဲထီၣ်အခါ ပယီၤသုးခးလီၤကျိဖးဒိၣ်အဃိ မ့ၣ်အူအီၣ်ဟးဂီၤ၀ဲကမျၢၢ်အဟံၣ် ၄ ဖျၢၣ်အဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၁ သီအနံၤန့ၣ် လၢကီးတရံးကလံၤထံး(ကမဲၤကိ)သ၀ီဒီး ကီးတရံးကလံၤစိး(ကီးတရံး–မၠၣ်၀တံၣ်)ကျဲလီၢ်လံၤ(ခန့မူၤ)သ၀ီႇအကၠူၤကိသ၀ီတကပၤန့ၣ် တၢ်ဒုးကဲထီၣ်၀ဲလၢလီၢ်က၀ီၤဂၢၤသးသုးဒီး ပယီၤသုးအဘၢၣ်စၢၤဒီးခီဖျိပယီၤသုးခးလီၤကျိဖးဒိၣ်အဃိ မ့ၣ်အူအီၣ်ဟးဂီၤ၀ဲကမျၢၢ်အဟံၣ်(၄)ဖျၢၣ်အဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ (ကၠီၤစှၤကိ)လီၢ်က၀ီၤဖိတဂၤစံး၀ဲ“တၢ်ဒုးကဲထီၣ်အခါန့ၣ်ကဘၣ်ဖဲမုၢ်ထူၣ်န့ၣ်မီၤနီၤႉတၢ်ဒုးကဲထီၣ်ဘျီပယီၤသုးခးလီၤကျိဖးဒိၣ်လၢ၀့ၢ်ပူၤတပယူာ်ဃီလီၤႉကျိဖးဒိၣ်လီၤတဲာ်ပိၢ်ဖးထီၣ်လၢ(အကၠူၤကိ)သ၀ီပူၤအဃိမ့ၣ်အူအီၣ်ဟံၣ်(၄)ဖျၢၣ်ႇကျီၢ်နါက့သံတဒု”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးလၢအဟဲထီၣ်လၢကီးတရံးကလံၤထံး(ကမဲၤကိ)သ၀ီအံၤဒီးတၢ်ပၢၢ်ဆၢကရူၢ်သုးပာ်ဖှိၣ်အဘၢၣ်စၢၤ တၢ်ဒုးကဲထီၣ်အဃိပယီၤသုးတကပၤသံတစှၤန့ၢ်(၅)ဂၤဘၣ်အဂ့ၢ်န့ၣ်ၦၤလၢဘူးဒီးတၢ်ပၢၢ်ဆၢကရူၢ်သုးပာ်ဖှိၣ်အံၤစံး၀ဲန့ၣ်လီၤႉ ဖဲအပူၤကွံာ်လါနိၣ်၀့ဘၢၣ် ၁ သီအနံၤစ့ၢ်ကီးန့ၣ် ကီးတရံး၀့ၢ်၀း၀းတရံးတၢ်လီၢ်လၢတၢ်ပၢၢ်ဆၢကရူၢ်ပာ်လီၤ၀ဲသုး တဖၣ်အံၤ ခီဖျိပယီၤသုးဟဲထီၣ်မၤ၀ဲတၢ်ထီၣ်ဒုးအဃိတၢ်ဒုးကဲထီၣ်၀ဲဒီး ဖဲန့ၣ်တၢ်ပၢၢ်ဆၢသုးပာ်ဖှိၣ်တကပၤ ဘၣ်ဟ့ၣ်လီၤကွံာ်အသးသမူ(၁)ဂၤဒီးဘၣ်ဒိ၀ဲ(၂)ဂၤအသိး ပယီၤသုးတကပၤစ့ၢ်ကီးသံဘၣ်ဒိဘၣ်ထံးအိၣ်၀ဲအဂ့ၢ်န့ၣ် တၢ်ပၢၢ်ဆၢသုးကရူၢ်တကပၤစံး၀ဲန့ၣ်လီၤႉ