ခီဖျိသုးတၢ်ဟူးတၢ်ဂဲၤဟဲအါထီၣ်အဃိ ၦၤလီၢ်အိၣ်ကမှံလၢအအိၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်အပူၤတဖၣ် တၢ်ကီတၢ်ခဲအိၣ်လၢကဒိးန့ၢ်ဘၣ်တၢ်အီၣ်တၢ်အီ
လါအီကူး ၂၃ သီႇ ၂၀၂၁ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤအပူၤ ဖဲတလါညါအံၤအတီၢ်ပူၤ ခီဖျိသုးမီၤစိရိၤအသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ်ဟူးဂဲၤဟဲအါထီၣ်အဃိ လီၢ်က၀ီၤပူၤကမျၢၢ်ၦၤလီၢ်အိၣ်ကမှံဖိတဖၣ်ကဒိးန့ၢ်ဘၣ်တၢ်အီၣ်တၢ်အီအဂီၢ် ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲစှၤသီအတီၢ်ပူၤအံၤ ခီဖျိသုးမီၤစိရိၤအသုးဟူးဂဲၤဟဲအါထီၣ်န့ၢ်ဒံးအပူၤကွံာ်လၢညါဒံးအဃိ ကမျၢၢ်ၦၤလီၢ်အိၣ်ကမှံလၢအဘၣ်ဃ့ၢ်မှံဟးဖျိးလၢကစၢၢ်ခိၣ်ကလိကျါတဖၣ် လၢကလဲၤဆှၢန့ၢ်အ၀ဲသ့ၣ်တၢ်အီၣ်တၢ်အီအဂီၢ်တၢ်ကီတၢ်ခဲဟဲအိၣ်ထီၣ်၀ဲအဂ့ၢ်န့ၣ် ကညီပိာ်မုၣ်ကရၢ(KWO)လၢအမၤစၢၤၦၤလီၢ်အိၣ်ကမှံအံၤ အနဲၣ်ရွဲၣ်ခိၣ်ကျၢၢ် နီၢ်ကညီဖီ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်လီၢ်လၢအဘူးဒီးသုးဟူးဂဲၤအလီၢ်န့ၣ် လီၢ်က၀ီၤဖိတဖၣ်က့ၤလၢသ၀ီတဘူၣ်ဘၣ်ႉ ဘၣ်စံၣ်အိၣ်ခူသူၣ်၀ဲဒၣ်လၢသ၀ီချၢလၢၦၢ်ပူၤလီၤႉ တနီၤန့ၣ်ဘၣ်ဟဲ၀ဲအီၣ်တၢ်အီၣ်တုၤ လၢအံတူၢ်ထၣ်ၦၤလီၢ်အိၣ်ကမှံအလီၢ်ညါလီၤႉ လၢကဒိးန့ၢ်ဘၣ်တၢ်အီၣ်တၢ်အီအဂီၢ်တၢ်ကီတၢ်ခဲအိၣ်မီၤနီၤႉ တၢ်မ့ဂၢၢ်ထီၣ်တစဲးန့ၣ်တနီၤန့ၣ်က့ၤအိၣ်လၢသ၀ီပူၤလီၤႉ ခဲအံၤပယီၤသုးဂံၢ်ဘါအါထီၣ်ကွ့ၢ်ကွ့ၢ်အဃိ မ့ၢ်ဟဲထီၣ်လံန့ၣ်တၢ်ဒုးကဲထီၣ်လံ လီၢ်က၀ီၤဖိစ့ၢ်ကီးဘၣ်စံၣ်ထီၣ်ကဒီး၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ ဒူသ၀ီလၢအအိၣ်ဘူးဒီးအံတူၢ်ထၣ်ၦၤလီၢ်အိၣ်ကမှံအလီၢ်တဖၣ် ပာ်ဃာ်၀ဲဂ့ၢ်ဂီၢ်အူတၢ်အီၣ်တၢ်အီလၢ ၦၤလီၢ်အိၣ်ကမှံဖိအဂီၢ် ဖဲအံတူၢ်ထၣ်အိၣ်၀ဲဘၣ်ဆၣ် တၢ်လီၢ်တနီၤလၢၦၤဃ့ၢ်မှံဟးဖျိးလဲၤစံၣ်အိၣ်အလီၢ်န့ၣ် ခီဖျိကျဲတၢ်ကီတၢ်ခဲဒီးတၢ်ဒုးတၢ်ယၤတၢ်အိၣ်သးအဃိ လၢကဆှၢတၢ်အီၣ်တၢ်အီအဂီၢ် တၢ်ကီတၢ်ခဲအိၣ်၀ဲအဖီခိၣ် တနီၤန့ၣ်ဆီၣ်ထွဲမၤစၢၤ၀ဲလၢစ့အိၣ်၀ဲအဂ့ၢ်န့ၣ် သ့ၣ်ညါဘၣ်လၢတၢ်ကရၢ်ကရိလၢအမၤစၢၤၦၤလီၢ်အိၣ်ကမှံဖိတဖၣ်အအိၣ်န့ၣ်လီၤႉ ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်အပူၤ စးထီၣ်ဖဲအပူၤကွံာ်လါမးရှးန့ၣ် သုးမီၤစိရိၤအသုး ဟဲကွံာ်လီၤမ့ၣ်ပိၢ်ဒီးကဘီယူၤအမဲာ်ညါ ခီဖျိခးလီၤကျိဖးဒိၣ်လၢဒူသ၀ီပူၤအဃိ လီၢ်က၀ီၤကမျၢၢ်ထံဖိကီၢ်ဖိ(၇၀ႇ၀၀၀)ဘျဲၣ်ဘၣ်ပာ်တ့ၢ်ကွံာ်အဟံၣ်အဃီအတၢ်လီၢ်တၢ်ကျဲဒီး တုၤလၢခဲအံၤတစုအါဒၣ်တက့ၢ်န့ၣ်တက့ၤဘၣ်ဒံးလၢအဟံၣ်အဃီဘၣ်ဒီး ဘၣ်ဟးဃ့ၢ်အိၣ်ခူသူၣ်ဒံး၀ဲလၢၦၢ်လၢ်ကျါအဂ့ၢ်န့ၣ် သ့ၣ်ညါဘၣ်လၢၦၤမၤစၢၤတၢ်ဖိအအိၣ်န့ၣ်လီၤႉ လၢန့ၣ်အမဲာ်ညါ ဖဲလါအီကူး ၁၇ သီဒီး ၁၉ သီအနံၤစ့ၢ်ကီး သုးမီၤစိရိၤအသုးကဘီယူၤဟဲဆှၣ်တၢ်လၢ ခ့ၣ်အဲၣ်ယူၣ် သုးက့(၅)ဟီၣ်က၀ီၤအပူၤအိၣ်၀ဲအဃိ...
ကီးတရံးကပၤ သုးမီၤစိရိၤအသုးဒီး သုးက့ ၆ အဘၢၣ်စၢၤတၢ်ဒုးစးထီၣ်ကဲထီၣ်
လါအီကူး ၂၃ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ် ကီးတရံး၀့ၢ်ကလံးထံး လၢကမဲၤကိသ၀ီတကပၤန့ၣ် ဖဲတနံၤအံၤ(လါအီကူး ၂၃)သီ မုၢ်ဃ့ၢ်လီၤ ၁ နၣ်ရံၣ်အဆၢကတီၢ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးသုးမီၤစိရိၤအသုးတဖၣ်အဘၢၣ်စၢၤ တၢ်ခးလိာ်သးစးထီၣ်ကဲထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးမီၤစိရိၤအသုးနီၣ်ဂံၢ်လၢအကယၤဒီးသုးခိးကီၢ်ဆၢ(BGF)သုးတဖၣ် ဖဲမဟါမုၢ်ဟါခါအဆၢကတီၢ်န့ၣ် နုာ်လီၤဟံန့ၢ်အလီၢ်အကျဲလၢကမဲၤကိသ၀ီပူၤ၀ံၤ တၢ်ဒုးစးထီၣ်ဟဲကဲထီၣ်၀ဲန့ၣ်လီၤႉ “တၢတ၀ီန့ၣ်ခး၀ဲဒၣ်ကျိဖးဒိၣ် ၃ ထံၣ်ႉ မ့ၢ်၀ံၤဘျီန့ၣ်ခး၀ဲကျိဖးဒိၣ်ကျိဖိတဖၣ်တပယူာ်ဃီလီၤႉ ကဲထီၣ်၀ဲလၢကမဲၤကိဒီးအီးဖးကၠံသ၀ီအဘၢၣ်စၢၤလီၤႉ ခးလိာ်သးခံခီယၢ်ပာ်လီၤႉ မ့ၢ်မတဂၤခးဆိ၀ဲလဲၣ်ဒုတသ့ၣ်ညါဘၣ်”အဂ့ၢ်န့ၣ် လီၢ်က၀ီၤဖိတဂၤ စံးဘၣ်ခ့ၣ်အဲးစံၣ်န့ၣ်လီၤႉ ခီဖျိတၢ်ခးလိာ်သးကဲထီၣ်အဃိ လီၢ်က၀ီၤကမျၢၢ် တဖၣ်ဘၣ်ယိၣ်ဘၣ်ဘှီပျံၤတၢ်ဖုးတၢ်ဒီးဃ့ၢ်ပူၤဖျဲးစံၣ်အိၣ်ခူသူၣ်အိၣ်၀ဲအသိး နုာ်လီၤအိၣ်ခူသူၣ်လၢဟံၣ်ဖီလာ်တၢ်ပူၤတဖၣ်စ့ၢ်ကီးအိၣ်၀ဲဒၣ်န့ၣ်လီၤႉ
သုးက့ ၆ ဒီး သုးမီၤစိရိၤအသုးတၢ်ခးလိာ်သးကဲထီၣ် ဖဲနိၣ်ဖိဒီးထံမူထၣ်သ၀ီအဘၢၣ်စၢၤ
လါအီကူး ၂၃ သီ၊ ၂၀၂၁ နံၣ်၊ ခ့ၣ်အဲးစံၣ် ဖဲမဟါ(လါအီကူး ၂၂)သီအနံၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးက့(၆)ဒီး သုးမီၤစိရိၤအသုးတဖၣ် တၢ်ခးလိာ်သးကဲထီၣ် ဖဲကညီကီၢ်စဲၣ် ရၤမတံ၀့ၢ်မုၢ်နုာ်တကပၤ နိၣ်ဖိဒီးထံမူထၣ်သ၀ီအဘၢၣ်စၢၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိသုးမီၤစိရိၤအသုးဟဲနုာ်လီၤတလၢ၀ဲ(KNLA)တၢ်ပၢဟီၣ်က၀ီၤအဃိ တၢ်ခးလိာ်သးဘၣ်ဟဲကဲထီၣ်ဒ်အံၤလီၤအဂ့ၢ်န့ၣ် KNLA တကပၤ စံးဘၣ်ခ့ၣ်အဲးစံၣ်န့ၣ်လီၤႉ “ဖဲတနံၤအံၤမုၢ်ဃ့ၢ်လီၤ ၂ နၣ်ရံၣ်အဆၢကတီၢ်န့ၣ် လၢထံမူထၣ်သ၀ီဆၢခိၣ်န့ၣ် တၢ်ခးလိာ်သးကဲထီၣ်ကအိၣ်၀ဲတခီနၣ်ရံၣ်ဃၣ်ဃၣ်ညါလီၤ”အဂ့ၢ်န့ၣ် KNLA သုးက့ ၆ သုးဖိတဂၤ စံးဘၣ်ခ့ၣ်အဲးစံၣ် ဖဲမဟါ(လါအီကူး ၂၂)သီအနံၤန့ၣ်လီၤႉ ခီဖျိတၢ်ခးလိာ်သးကဲထီၣ်အဃိ တၢ်တယးကွၢ်၀ဲလၢသုးမီၤစိရိၤအၦၤသံ၀ဲ ၃ ဂၤဘၣ်ဆၣ်သနါက့ ဘၣ်ထွဲဒီးပယီၤသုးအၦၤသံအိၣ်တအိၣ်ခီန့ၣ်တၢ်ပာ်ဂၢၢ်ပာ်ကျၢၤ၀ဲလီၤလီၤဆီဆီတအိၣ်ဘၣ်အဂ့ၢ်န့ၣ် သုးဖိတဂၤဃီအ၀ဲန့ၣ်စံးအါထီၣ်၀ဲန့ၣ်လီၤႉ ခီဖျိတၢ်ခးလိာ်သးကဲထီၣ်အဃိ သ၀ီဖိလၢအအိၣ်ဖဲသ၀ီအကပိၤကပၤဖဲန့ၣ်သ့ၣ်တဖၣ် ဃ့ၢ်ထီၣ်ဟးပလဲာ်အသးဒီး တကီၢ်ခါခဲအံၤသုးမီၤစိရိၤအသုးဒီး (KNLA)သုးတဖၣ်အဘၢၣ်စၢၤ တၢ်ခးလိာ်သးတအိၣ်လၢၤဘၣ်ဆၣ် ခံခီခံကပၤတၢ်ဖ့ၣ်ဆၢအိၣ်ဒံး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကၠၤအ့စ့ၣ်ကၠံကီၢ်ဆၣ်အပူၤ သုးမီၤစိရိၤအသုးပာ်တ့ၢ်ကွံာ်အသုးကလၢၤတဖျၢၣ်
လါအီကူး ၂၁ သီႇ ၂၀၂၁ နံၣ်ႇ ခ့ၣ်အဲးစံၣ် သုးမီၤစိရိၤအသုးကလၢၤလၢအအိၣ်ဆီလီၤသးဖဲကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ် ကျ့းသ၀ီပူၤအံၤ ဖဲတဂီၤအံၤလါအီကူး ၂၁ သီ ဂီၤခီဂီၤဂီၤအဆၢကတီၢ် အ၀ဲသ့ၣ်ပာ်တ့ၢ်ကွံာ်အသုးကလၢၤဒီးဟးထီၣ်ကွံာ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲ“ဖဲတဂီၤအံၤ ၇ နၣ်ရံၣ်အဆၢကတီၢ်န့ၣ် က့ၤထီၣ်၀ဲဒၣ်လၢကၠဲးဒိတကပၤလီၤႉ အ၀ဲသ့ၣ်က့ၤစိာ်ဃုာ်အကျိချံၦာ်သၣ်တဖၣ်ခဲလၢာ်လီၤႉ တၢ်ခးလိာ်သးဒုတအိၣ်နီတမံၤဘၣ်ႉ အ၀ဲသ့ၣ်က့ၤ၀ံၤအလီၢ်ခံ ခဲအံၤအ၀ဲသ့ၣ်သုးကလၢၤန့ၣ်ခ့ၣ်အဲၣ်ယူၣ်ဟဲရှဲလဲ၀ဲလံ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ အ၀ဲသ့ၣ်ပာ်တ့ၢ်ကွံာ်အသုးကလၢၤလၢသ၀ီပူၤ၀ံၤအလီၢ်ခံ ဖဲတနံၤအံၤမုၢ်ထူၣ် ၁၂ နၣ်ရံၣ်အဆၢကတီၢ်န့ၣ် လီၢ်က၀ီၤခ့ၣ်အဲၣ်ယူၣ်တဖၣ်ဟဲတုၤ၀ဲဒီး ဘျၢၣ်လီၤၦီၢ်ကွံာ်တၢ်သူၣ်ထီၣ်တဖၣ်လၢသိလ့ၣ်ဘူၣ်ဒိၣ်စၣ်ဒီး ဒွဲၣ်အူရှဲလဲကွံာ်၀ဲသုးကလၢၤန့ၣ််လီၤႉ ဘၣ်ဆၣ် မ့မ့ၢ်(BGF)သုးကလၢၤလၢအအိၣ်ဘူးဖဲတဖျၢၣ်န့ၣ် တၢ်တမၤဟးဂီၤ၀ဲနီတမံၤဘၣ်အဂ့ၢ်န့ၣ် သ၀ီဖိလၢအထံၣ်ဒီး အမဲာ်တဖၣ်စံး၀ဲန့ၣ်လီၤႉ သုးမီၤစိရိၤအသုးကလၢၤလၢအအိၣ်ဆီလီၤသးဖဲကျ့းသ၀ီပူၤအံၤ ဖဲ(၁၉၉၇)နံၣ် စီၤသူမူဟဲ တီခိၣ်ရိၣ်မဲ ကညီတၢ်မုာ်တၢ်ခုၣ်(KPF)ကရူၢ်လဲၤပာ်လီၤစုက၀ဲၤလၢပယီၤသုးအိၣ်အခါဟဲဆီလီၤ၀ဲသုးကလၢၤန့ၣ်လီၤႉ သုးကလၢၤ၀ဲအံၤအိၣ်ဆီလီၤအသးဖဲသ၀ီပူၤန့ၢ်၀ဲအနံၣ်(၂၀)ဘျဲၣ်လံဒီး ဖဲန့ၣ်သုးဖိနီၣ်ဂံၢ်ကအိၣ်၀ဲအဂၤ(၃၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကီၢ်ရ့ၣ်ႇ သုးက့ဟီၣ်က၀ီၤတနီၤအပူၤစ့ၢ်ကီး ဖဲစှၤသီအတီၢ်ပူၤအံၤ သုးမီၤစိရိၤအသုးပာ်တ့ၢ်ကွံာ်အသုးကလၢၤဒ်အံၤကဲထီၣ်သးစ့ၢ်ကီးအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
KNU သုးက့ ၅ ဟီၣ်က၀ီၤ လၢ(၁၅)သီအတီၢ်ပူၤ တၢ်ဒုးကဲထီၣ်ခဲလၢာ်(၅၆)ဘျီ သုးမီၤစိရိၤအၦၤသံ ၃၄ ဂၤအကျါပၣ်ဃုာ်ဒီးသုးရ့ၣ်ခိၣ် ၁ ဂၤ
လါအီကူး ၁၉ သီႇ ၂၀၂၁ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ သုးက့(၅)ဟီၣ်က၀ီၤ မုၢ်တြီၢ်ကီၢ်ရ့ၣ်အပူၤ စးထီၣ်ဖဲလါအီကူး ၁ သီတုၤလၢ ၁၅ သီအနံၤ သုးမီၤစိရိၤအသုးဒီး ကညီတၢ်ထူၣ်ဖျဲးသုးမုၢ်ဒိၣ် -KNLA အဘၢၣ်စၢၤ တၢ်ခးလိာ်သးကဲထီၣ်ပာ်ဖှိၣ်ခဲလၢာ်(၅၆)ဘျီဒီး ဖဲန့ၣ်သုးမီၤစိရိၤအၦၤသံ ၃၄ ဂၤအကျါပၣ်ဃုာ်ဒီးသုးရ့ၣ်ခိၣ်တဂၤအဂ့ၢ်န့ၣ် KNU သုးက့(၅)ထုးထီၣ်ပာ်ဖျါ၀ဲဖဲလါအီကူး ၁၇ သီအနံၤန့ၣ်လီၤႉ လၢန့ၣ်အမဲာ်ညါသုးမီၤစိရိၤအၦၤဘၣ်ဒိ ၁၅ ဂၤဒီး မ့မ့ၢ် သုးက့ ၅ တကပၤန့ၣ်အၦၤဘၣ်ဒိ ၃ ဂၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢတၢ်ခးလိာ်သးကဲထီၣ်အပူၤ သုးမီၤစိရိၤအသုးခး၀ဲကျိဖးဒိၣ်(၈၈)ဖျၢၣ်ဒီး ကျိဖိဆံး(၁ႇ၅၀၀)ဖျၢၣ်ဒီး လၢန့ၣ်အမဲာ်ညါခီဖျိခးလီၤကျိဖးဒိၣ်တဖၣ်ဆူလီၢ်က၀ီၤဒူဖိသ၀ီဖိတၢ်ဖံးအီၣ်မၤအီၣ်လီၢ်ကျဲအဃိ လီၢ်က၀ီၤဖိသံ၀ဲ ၁ ဂၤဒီးဘၣ်ဒိ ၁ ဂၤအဂ့ၢ်န့ၣ် ခ့ၣ်အဲၣ်ယူၣ် သုးက့(၅)ထုးထီၣ်ပာ်ဖျါ၀ဲန့ၣ်လီၤႉ တကီၢ်ခါခဲအံၤ လၢသုးက့(၅)ဟီၣ်က၀ီၤအပူၤ သုးမီၤစိရိၤအသုးဒီး(BGF)သုးပာ်ဖှိၣ်တဖၣ် ဟူးဂဲၤဟဲအါထီၣ်တကးဘၣ်လၢန့ၣ်အမဲာ်ညါ ခီဖျိမၤအါထီၣ်သုးဂံၢ်ဘါႇကျိဂံၢ်ဘါဒီးတၢ်အီၣ်တၢ်အီတဖၣ်အဃိ တၢ်ခးလိာ်သးဘၣ်ဟဲကဲထီၣ်ဒီးလီၢ်က၀ီၤ(KNLA)အသုးတဖၣ် ကိးမုၢ်နံၤဒဲးဃၣ်ဃၣ်ညါအဂ့ၢ်န့ၣ် KNU သုးက့ ၅ ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်...
ခီဖျိတၢ်ၦ့ၤထီၣ်အဃိ ဒူသ၀ီကမျၢၢ်လၢအစ့တၢ်ဟဲနုာ်တအိၣ်ဘၣ်တဖၣ်ထံၣ်ဘၣ်တၢ်ကီတၢ်ခဲ
လါအီကူး ၁၉ သီႇ ၂၀၂၁ နံၣ်ႇ ခ့ၣ်အဲးစံၣ် တကီၢ်ခါ ခီဖျိတၢ်ဖိတၢ်လံၤအၦ့ၤထီၣ်အဖီခိၣ် ဒူသ၀ီလၢအအိၣ်ဖဲကညီကီၢ်စဲၣ် ကီးတရံးကီၢ်ဆၣ်ကလံၤထံးတဖၣ် ခီဖျိလီၢ်က၀ီၤဖိတဖၣ်ကျိၣ်စ့တၢ်ဟဲနုာ်တအိၣ်ဘၣ်အဃိ လၢကအီၣ်ကအီအဂီၢ်ထံၣ်တၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဆၢကတီၢ်ခဲအံၤခီဖျိခိ၀ံၣ်တၢ်ဆါရၤလီၤသးဟဲအါထီၣ်အဃိ သ၀ီတနီၤန့ၣ်တၢ် (lock down)ဃာ်၀ဲဒီးတၢ်တြီ၀ဲတၢ်ဟးထီၣ်က့ၤလီၤအိၣ်၀ဲအသိး ခီဖျိတၢ်ၦ့ၤထီၣ််အဃိ လီၢ်က၀ီၤဖိတဖၣ်လၢကအီၣ်ကအီအဂီၢ်တၢ်ကိၢ်တၢ်ဂီၤဟဲအိၣ်ထီၣ်၀ဲအဂ့ၢ်န့ၣ် ကီးတရံးကီၢ်ဆၣ် သဒၢၣ်ခိၣ်သ၀ီဖိ စီၤမၠၣ်၀့ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“မ့ဘၣ်တဲန့ၣ် ဟံၣ်ဖိဃီဖိတနီၤအဂီၢ်ဒုမ့ၢ်တနး၀ဲဘၣ်ဆၣ်သနါက့ တနီၤခီ ဒုန့ၣ်ဟံဆိ၀ဲဒၣ် စ့လၢအဘူးအတံၢ်အအိၣ်ဒီး ၦ့ၤအီၣ်တၢ်စ့ၢ်ကီးအိၣ်မီၤနီၤႉ တနီၤစ့ၢ်ကီးန့ၣ်လဲၤဃုအီၣ်တၢ်တၢ်ဒိးတၢ်လၣ် လၢကျီးပူၤအိၣ်၀ဲလီၤႉ တၢ်ၦ့ၤနါက့ထီၣ် လၢညါန့ၣ်သိတကိန့ၣ်(၁၅၀၀)ကၠး ခဲအံၤန့ၣ်ထီၣ်တုၤလၢ(၂၅၀၀)ကၠးညါလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါကျးလၢအိၣ်ဖဲသ၀ီပူၤတဖၣ်နါက့ ဘၣ်လဲၤၦ့ၤကဒီးတၢ်ဖိတၢ်လံၤတဖၣ် ဆူကျ›းသ၀ီႇကၠဲးဒိႇကီးတရံးအဃိ တၢ်ၦ့ၤဘၣ်ထီၣ်၀ဲဒ်အံၤလီၤအဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ တကီၢ်ခါခဲအံၤဒူသ၀ီတဖၣ်လၢအမ့ၢ် သဒၢၣ်ခိၣ်ႇကျ့းႇကွ့ကလ့ဃုာ်ဒီးဒူသ၀ီလၢအိၣ်တီနီၢ်ကစၢၢ်ခီၣ်ထံးတဖၣ် ကျဲအိးထီၣ်ကဒါလံဘၣ်ဆၣ်သနါက့ တၢ်ကဘၣ်လဲၤဖံးမၤတၢ်ဒ်တၢ်ပာ်ပနီၣ်တၢ်ဆၢကတီၢ်အသိးလီၤဒီး မ့ၢ်လဲၤ ၦ့ၤတၢ်ဖိတၢ်လံၤန့ၣ်ဟ့ၣ်၀ဲအခွဲးတလါန့ၣ်(၃)သီ မ့တမ့ၢ်(၃)ဘျီလီၤအဂ့ၢ်န့ၣ် ဒူသ၀ီၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ကီးတရံးကလံၤထံးဟံၣ်ဖိဃီဖိလၢအစ့တၢ်ဟဲနုာ်တအိၣ်ဘၣ်တဖၣ်အါဒၣ်တက့ၢ်န့ၣ် ပာ်ဂံၢ်ပာ်ဘါသူ ၀ဲဒၣ်စ့လၢအဖိမုၣ်ဖိခွါလၢအလဲၤမၤတၢ်လၢကီၢ်ကၠီၣ်တဲၣ်တဖၣ်အအိၣ်လီၤဒီး ခီဖျိတၢ်ကးတံၢ်ဃာ်စ့ၢ်ကီးတၢ်ဟးထီၣ်က့ၤလီၤအဃိ အဖိမုၣ်ဖိခွါလၢ အအိၣ်ကီၢ်ကၠီၣ်တဲၣ်ပူၤတဖၣ်ဆှၢစ့တန့ၢ်၀ဲဘၣ်အဃိ ထံၣ်ဘၣ်တၢ်ကီတၢ်ခဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ တီနီၢ်ကစၢၢ်ခီၣ်ထံး လီၢ်က၀ီၤဖိတဂၤစံးစ့ၢ်ကီး၀ဲလၢ “လၢပအိၣ်တကပၤဒုခီဖျိဘူးဒီး၀့ၢ်အဃိကိညၢ်တစဲးလီၤဘၣ်ဆၣ်သနါက့ သ၀ီလၢအအိၣ်ယံၤဒီး၀့ၢ်တဖၣ်ဒုကီဒိၣ်၀ဲလီၤႉ တၢ်ဖိတၢ်လံၤတဖၣ်အၦ့ၤထီၣ်ႇကျိၣ်စ့တၢ်ဟဲနုာ်တအိၣ်ဘၣ် တၢ်လီၢ်ခဲလၢာ်ဃၣ်ဃၣ်ညါလီၤမီၤနီၤႉ ကျဲမ့ၢ်အိးထီၣ်မးလဲၤၦ့ၤတၢ်ကသ့လီၤ”အဂ့ၢ်န့ၣ် စံး၀ဲန့ၣ်လီၤႉ ကီးတရံး၀့ၢ်ပူၤခီဖျိတၢ်ထံၣ်န့ၢ်ၦၤဘၣ်ကူဘၣ်ဂာ်လၢခိ၀ံၣ်တၢ်ဆါဟဲအါထီၣ်အဃိ ဟီၣ်က၀ီၤ...
မၠၣ်၀တံၣ်ကီၢ်ဆၣ် သးစၢ်လၢယီၢ်ဘၣ်မ့ၣ်ပိၢ်တဂၤ ဘၣ်တၢ်ကူစါယါဘျါအီၤလၢတီနီၢ်တၢ်ဆါဟံၣ်
လါအီကူး ၂၀ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ်ႇ မၠၣ်၀တံၣ်ကီၢ်ဆၣ် မၠ့ၣ်တၤလ့မၠဲၤအကပိၤကပၤန့ၣ် ဖဲလါအီကူး ၁၆ သီအနံၤ သးစၢ်လၢအသးနံၣ်အိၣ်(၂၄)နံၣ်တဂၤယီၢ်ဘၣ်မ့ၣ်ပိၢ်ဘၣ်ဒိဘၣ်ထံး၀ဲဒီး တကီၢ်ခါခဲအံၤဘၣ်တၢ်ကူစါယါဘျါအီၤလၢကီးတရံးကီၢ်ဆၣ် တီနီၢ်တၢ်ဆါဟံၣ်လၢ KNU-ကညီဒီကလုာ််စၢဖှိၣ်ကရၢအိးထီၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဘၣ်ထွဲဒီးသးစၢ်တဂၤယီၢ်ဘၣ်မ့ၣ်ပိၢ်အဂ့ၢ်အံၤ ၦၤလၢအဘူးဒီးအီၤတဂၤစံး၀ဲ“အပူၤကွံာ် ၃ သီမီၤနီၤ ဘၣ်ဖဲဟါခီ ၄ နၣ်ရံၣ်ဘျဲၣ်ဘျဲၣ်အဆၢကတီၢ်န့ၣ် အလဲၤကျီ၀ၣ်ဟဲက့ၤဒီး ခီဖျိတၢ်အီၣ်တၢ်အီတအိၣ်ဘၣ်အဃိ အ၀ဲစိာ်ထီၣ်လီးလ့ဒီး လဲၤခးအီၣ်ထိၣ်ဒီးဖဲန့ၣ်ယီၢ်ဘၣ်၀ဲမ့ၣ်ပိၢ်လီၤမီၤနီၤႉ ဘၣ်တဘျီဃီ၀ံၤဟဲတုၤဖဲအံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ခီဖျိစီၤအဲၣ်စံၣ်ယီၢ်ဘၣ်မ့ၣ်ပိၢ်အဃိ အခီၣ်အထွဲတကပၤန့ၣ်လီၤသဘှံး၀ဲခဲလၢာ်ဒီး စးထီၣ်ဖဲအခီၣ်လ့ၢ်ခိၣ်ဖီလာ်န့ၣ်တၢ်ဒီၣ်တဲာ်ကွံာ်အီၤဒီး တကီၢ်ခါခဲအံၤသးသမူတၢ်ဘၣ်ယိၣ်တအိၣ်၀ဲဘၣ်အဂ့ၢ်န့ၣ် ကီးတရံးကီၢ်ဆၣ် တီနီၢ်တၢ်ဆါဟံၣ်ဆူၣ်ချ့ၦၤမၤတၢ်ဖိတဂၤ စံး၀ဲဒ်အံၤန့ၣ်လီၤႉ “အခီၣ်လၢအထွဲတကပၤန့ၣ်လီၤတဘှံး၀ဲဒီတခီလီၤမီၤနီၤႉ စးထီၣ်လၢအခီၣ်လ့ၢ်ခိၣ်ဖီလာ်န့ၣ် ဖဲမဟါန့ၣ်တၢ်ဒီၣ်တဲာ်ကွံာ်အီၤမီၤနီၤႉ မ့မ့ၢ်အခီၣ်လၢအစ့ၣ်တကပၤခီန့ၣ် မ့ဘၣ်တဲန့ၣ် အခီၣ်လၢအစ့ၣ်တကပၤန့ၣ်လၢအဂ့ၤဒုတမ့ၢ်ဘၣ်ႉ အကစၢ်အဲၣ်ဒိးခိးကွၢ်ဒံးအဃိပအိၣ်ခိးကွၢ်၀ဲတၢ်အိၣ်သးမီၤနီၤႉ အလီၢ်မ့အိၣ်ဒုကဘၣ်ဒီၣ်တဲာ်လီၤႉ ခဲအံၤန့ၣ်အခီၣ်လၢအစ့ၣ်တကပၤန့ၣ် တနုာ်လီၤဘၣ်(operation)ဒံးဘၣ်”အဂ့ၢ်န့ၣ် အ၀ဲစံး၀ဲန့ၣ်လီၤႉ စီၤအဲၣ်စံၣ်ယီၢ်ဘၣ်မ့ၣ်ပိၢ်၀ံၤအလီၢ်ခံ မၠဲၣ်ကလ့သ၀ီ တၢ်တိစၢၤမၤစၢၤကရူၢ်အသိလ့ၣ် လဲၤဆှၢအီၤဆူလ့က့ၣ်ကီာ််၀့ၢ်သီတၢ်ဆါဟံၣ်ဒီး ဖဲန့ၣ်တဆီတၢ်ဆှၢအီၤဆူမၠၣ်၀တံၣ်တၢ်ဆါဟံၣ်၀ံၤ ခီဖျိကသံၣ်သရၣ်တအိၣ်ဘၣ်အဃိ တၢ်ဟဲက့ၤဆှၢအီၤဆူတီနီၢ်တၢ်ဆါဟံၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ မ့ၣ်ပိၢ်လၢသးစၢ်ယီၢ်ဘၣ်၀ဲအံၤ မ့ၢ်ဖီၣ်စုက၀ဲၤကရူၢ်ဖဲလဲၣ်တဒူၣ်ဒိးလီၤဃာ်၀ဲလဲၣ်န့ၣ် တၢ်တသ့ၣ်ညါအီၤလီၤတံၢ်လီၤဆဲးဘၣ်ဆၣ် ဖဲဟီၣ်က၀ီၤ၀ဲန့ၣ်မ့ၢ်တၢ်လီၢ်လၢသုးခိးကီၢ်ဆၢ(BGF) ၁၀၂၂ သုးရ့ၣ်ဒီး သုးမီၤစိရိၤအသုးတဖၣ်အိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ...
တၢ်ခးသံသးစၢ်လၢအိၣ်အူးဖၠၣ်ဘၣ်ကီဘၣ်ခဲဒဲက၀ီၤပူၤတဂၤ
လါအီကူး ၁၈ သီႇ ၂၀၂၁ နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ အူးဖၠၣ်ဘၣ်ကီဘၣ်ခဲဒဲက၀ီၤအပူၤ သးစၢ်လၢအအိၣ်(၁၉)နံၣ်တဂၤအံၤ ဖဲအအိၣ်ဒဲက၀ီၤပူၤလီၤမၢ်၀ဲလၢအဟံၣ်၀ံၤအလီၢ်ခံ တၢ်စံး၀ဲလၢအလဲၤဟုၣ်တၢ်ဖဲမၠီၣ်သ၀ီတဖျၢၣ်လၢအအိၣ်ယံၤ၀ဲဒီးဒဲက၀ီၤ ၅ ကံလိမံထၢၣ်အံၤဒီး ဖဲလါအီကူး ၁၆ သီအနံၤဘၣ်တၢ်ခးသံကွံာ်အီၤအဂ့ၢ်န့ၣ် သ့ၣ်ညါဘၣ်လၢဒဲက၀ီၤၦၤဘၣ်မူဘၣ်ဒါအအိၣ်န့ၣ်လီၤႉ တၢ်ကဲထီၣ်သးတၢ်ဂ့ၢ်တၢ်ကျိၤခီန့ၣ် စးန့ၤအ့လၢအသးနံၣ်အိၣ်၀ဲ(၁၉)နံၣ်အံၤ ဖဲလါအီကူး ၁၄ သီအနံၤ လီၤမၢ်၀ဲလၢအဟံၣ်၀ံၤအလီၢ်ခံ မၠီၣ်သ၀ီသးၦၢ်ဆဲးကျိးဒုးသ့ၣ်ညါ၀ဲဒဲက၀ီၤၦၤဘၣ်မူဘၣ်ဒါလၢ သးစၢ်အံၤဟုၣ်ၦၤတၢ်ဖိတၢ်လံၤအဃိတၢ်ဖီၣ်ဃာ်အီၤဒီး ဖဲတၢ်ကလဲၤကိးက့ၤအီၤအဆၢကတီၢ် တၢ်တဲကျၢကဒီး၀ဲလၢတၢ်ခးသံကွံာ်အီၤလံအဂ့ၢ်န့ၣ် ဒဲက၀ီၤနဲၣ်ရွဲၣ် စီၤဆၣ်တူၢ် စံး၀ဲဒ်အံၤန့ၣ်လီၤႉ “အ၀ဲဒၣ်န့ၣ်လၢအပူၤကွံာ်န့ၣ်သူဘၣ်၀ဲတၢ်မူၤတၢ်ဘှီးအဃိမၤသးဒ်သိးဒီးအခိၣ်နူာ်န့ၣ်တဘၣ်လီၢ်ဘၣ်ဆးအါအါဘၣ်မီၤနီၤႉ အခးသံ၀ဲဆၢကတီၢ်န့ၣ် ဖဲလါအီကူး ၁၆ သီႇ မုၢ်ဆါခီ ၁၁ နၣ်ရံၣ်ဘျဲၣ်လီၤႉ ဖဲ ၁၀ နၣ်ရံၣ်ဘျဲၣ်အဆၢကတီၢ်န့ၣ်သ၀ီသးၦၢ်ဆဲးကျၢ၀ဲဒဲက၀ီၤၦၤဘၣ်မူဘၣ်ဒါမီၤနီၤ တဲ၀ဲလၢသုဒဲ က၀ီၤဖိတဂၤအဟုၣ်တၢ်အဃိၦၤဖီၣ်ဃာ်အဃိ တဲ၀ဲလၢလဲၤထီၣ်ကွၢ်မီၤနီၤႉ ၦၤဆဲးကျၢလီၤသးဒီးၦၤကလဲၤကွၢ်အဆၢကတီၢ်န့ၣ် ၦၤက့ၤထးဆဲးကျၢ ကဒါလၢဖိသၣ်၀ဲအံၤန့ၣ်ထွးထီၣ်ဃ့ၢ်ဒီးလဲၤဟံဒီကက့ၤမၤဆၢၦၤအဃိန့ၣ် ၦၤခးသံအီၤလံ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ သးစၢ်အံၤဘၣ်တၢ်ခးသံအီၤဒီးကျိ(၉ မမ)ဒီးဘၣ်၀ဲအဟၢဖၢ ၂ ထံၣ်ႇအစု ၁ ထံၣ်လီၤႉ ဘၣ်ဆၣ်သနးက့ ဖဲတၢ်ကဲထီၣ်သးအလီၢ်န့ၣ်တၢ်ထံၣ်န့ၢ်၀ဲကျိအဘ့ၣ် ၄ ခါဒီး ကျိ၀ဲအံၤအိၣ်၀ဲဒီးအလံာ်အလဲၢ်အဂ့ၢ်န့ၣ် စီၤဆၣ်တူၢ် စံးအါထီၣ်၀ဲန့ၣ်လီၤႉ ခီဖျိသးစၢ်အံၤသံလံအဃိ...
တၢ်ထံၣ်န့ၢ်ၦၤဘၣ်ခိ၀ံၣ် ၆ ဂၤလၢမဲၢ်လးအူးဘၣ်ကီဘၣ်ခဲဒဲက၀ီၤပူၤအဃိ တၢ်မၤဃံးထီၣ်တၢ်ဟးထီၣ်က့ၤလီၤ
လါအီကူး ၁၈ သီႇ ၂၀၂၁ နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မဲၢ်လးအူးဘၣ်ကီဘၣ်ခဲဒဲက၀ီၤအပူၤ ဖဲမဟါ(လါအီကူး ၁၇)သီအနံၤ တၢ်ထံၣ်န့ၢ်ၦၤဘၣ်ခိ၀ံၣ်တၢ်ဆါ ၆ ဂၤလၢဟံၣ်ဖိဃိဖိတဒူၣ်အအိၣ်အဃိ တၢ်မၤဃံးတၢ်ဟးထီၣ်က့ၤလီၤလၢဒဲက၀ီၤပူၤအဂ့ၢ်န့ၣ် သ့ၣ်ညါဘၣ်လၢဒဲက၀ီၤၦၤဘၣ်မူဘၣ်ဒါအအိၣ်န့ၣ်လီၤႉ ဖဲတၢ်သမံသမိးစီၤတၢ်ဟ့ၣ်ဘျုးအဟံၣ်ဖိဃီဖိလၢအအိၣ်ဖဲက၀ီၤဒ့(၂)အံၤအခါ အဟံၣ်ဖိဃီဖိ(၅)ဂၤဖျါ၀ဲလၢအအိၣ်ဒီးခိ၀ံၣ်တၢ်ဆါ၀ံၤအလီၢ်ခံ ဖဲတၢ်တနံၤဃီမုၢ်ဟါလီၤအဆၢကတီၢ်န့ၣ် ဘၣ်ကူဘၣ်ဂာ်ကဒီးအဟံၣ်ဖိဃီဖိ(၁)ဂၤအဂ့ၢ်န့ၣ် ဒဲက၀ီၤခိၣ် စီၤပူၤဒ့ စံး၀ဲဒ်အံၤန့ၣ်လီၤႉ “မ့ၢ်အဘၣ်ကူဒ်လဲၣ်န့ၣ်တသ့ၣ်ညါဘၣ်ႉ ဘၣ်ဆၣ်ပသံကွၢ်အ၀ဲသ့ၣ်န့ၣ် တဲ၀ဲလၢတဟးထီၣ်တၢ်ချၢဘၣ်မီၤနီၤႉ ဘၣ်ဆၣ်အ၀ဲသ့ၣ်န့ၣ်ဟးထီၣ်ဟုၣ်လၢတၢ်ချၢအိၣ်လီၤႉ ၀ံၤဘျီန့ၣ်ရ့လိၣ်သးဒီးကၠီၣ်တဲၣ်သုးတဖၣ်အိၣ်စ့ၢ်ကီးလီၤႉ ပဆိကမိၣ်ဒုကဘၣ်မ့ၢ်အဘၣ်ကူဘၣ်ဂာ်ဖဲန့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါခဲအံၤမ့ၢ်အတၢ်ဘျးစဲအိၣ်ထဲလဲၣ်န့ၣ်သ့ၣ်ညါတလၢၤဒံးဘၣ်ဒီး ခဲပအံၤဘိးဘၣ်သ့ၣ်ညါလီၤၦၤကိးဂၤဒဲးလၢ တဘၣ်ဟးထီၣ်ဟးလီၤဘၣ်ႇ ၦၤကိးဂၤဒဲးကဘၣ်အိၣ်လၢဟံၣ်ႇ တၢ်ဂ့ၢ်အရ့မ့ဒိၣ်မးဟးထီၣ်ဒီးတၢ်ကးဘၢနါဒ့ဒီး ခဲမုၢ်ဆ့ၣ်န့ၣ်ဟံၣ်လၢအိၣ်က၀ီၤဒ့(၂)ပူၤခဲလၢာ် ဆူၣ်ချ့ၦၤဘၣ်မူဘၣ်ဒါတဖၣ်ကဟဲသမံသမိးတၢ်အဂ့ၢ်န့ၣ် ဒဲက၀ီၤခိၣ် စီၤပူၤဒ့ စံးအါထီၣ်၀ဲန့ၣ်လီၤႉ ၦၤလၢအဘၣ်ကူဘၣ်ဂာ်လၢခိ၀ံၣ်တၢ်ဆါတဖၣ်အံၤ တၢ်ဆှၢအ၀ဲသ့ၣ်ဆူတၢ်ပာ်ပနီၣ်အလီၢ်ဒီး တၢ်တြီဃာ်စ့ၢ်ကီးတၢ်လဲၤထီၣ်က့ၤလီၤလၢအ၀ဲသ့ၣ်အဟံၣ််ခိၣ်ဟံၣ်ဃၢၤဒီး ၦၤလၢအဘၣ်ကူဘၣ်ဂာ်သ့ၣ်တဖၣ်မ့ၢ်၀ဲဒၣ်ပိာ်ခွါ ၃ ဂၤဒီး ပိာ်မုၣ် ၃ ဂၤန့ၣ်လီၤႉ လၢပိာ်မုၣ်တဖၣ်အကျါပၣ်ဃုာ်၀ဲဒီးဖိသၣ် ၈ နံၣ်တဂၤအဂ့ၢ်န့ၣ်် သ့ၣ်ညါဘၣ်လၢၦၤအိၣ်လၢဒဲက၀ီၤပူၤတဖၣ်အအိၣ်န့ၣ်လီၤႉ ၦၤအိၣ်လၢဒဲက၀ီၤပူၤတဂၤစံး၀ဲ“ဟံၣ်ကစၢ်န့ၣ််အတၢ်ကိၢ်ထီၣ်ဒီးဟဲပၠးသးလၢတၢ်ဆါဟံၣ်လီၤႉ ဟဲပၠး၀ဲဘျီဒုတၢ်ဘၣ်ယိၣ်အိၣ်အဃိတၢ်(lock down)အဟံၣ်လီၤႉ တၢ်လဲၤဆှၢသမံသမိးအ၀ဲသ့ၣ်ဆူ၀့ၢ်ပူၤဒီးဖဲန့ၣ်အစၢထီၣ်လၢအိၣ်ဒီးခိ၀ံၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါခဲအံၤစ့ၢ်ကီးခီဖျိတၢ်ဆါဘၣ်ကူဘၣ်ဂာ်ဟဲအိၣ်ထီၣ်လံအဃိ ၦၤအိၣ်လၢဒဲက၀ီၤပူၤတဖၣ်တၢ်ဘၣ်ယိၣ် ဘၣ်ဘှီဟဲအိၣ်ထီၣ်၀ဲဒီးလၢဒဲက၀ီၤအပူၤၦၤဟးထီၣ်က့ၤလီၤစှၤလီၤ၀ဲဒီး ဘၣ်ယိၣ်၀ဲလၢတၢ်အိၣ်သးကဟဲနးထီၣ်အဃိ ၦၤတနီၤနီၤန့ၣ်ၦ့ၤဃာ်တၢ်အီၣ်တၢ်အီအိၣ်၀ဲအဂ့ၢ်န့ၣ် ၦၤအိၣ်ဒဲက၀ီၤပူၤတဖၣ်စံး၀ဲန့ၣ်လီၤႉ ဖဲအပူၤကွံာ်စှၤလါအတီၢ်ပူၤစ့ၢ်ကီး ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မဲၢ်လးႇ...
သုးမီၤစိရိၤအသုးဒီး(BGF)သုးပာ်ဖှိၣ်ဟ့ၣ်ပလီၢ်ကမျၢၢ်လၢခံသီအတီၢ်ပူၤကဟးပလဲာ်သးလၢအ၀ံၤတဘျီဃီအဃိ သ၀ီဖိတဖၣ်ဘၣ်ဟးပလဲာ်သး
လါအီကူး ၁၈ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတလါအံၤလါအီကူး ၁၅ သီအနံၤ သုးမီၤစိရိၤအသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် ဟ့ၣ်ပလီၢ်၀ဲ မုၢ်တြီၢ်ကီၢ်ရ့ၣ် ဒွဲၣ်လိကီၢ်ဆၣ် မၤထီသ၀ီကရူၢ်ပူၤဒူသ၀ီတဖၣ်လၢခံသီအတီၢ်ပူၤကဟးပလဲာ်သးလၢအ၀ံၤအဃိ တကီၢ်ခါခဲအံၤလီၢ်က၀ီၤဖိတဖၣ်လဲၤဃ့ၢ်အိၣ်ခူသူၣ်၀ဲဒၣ််လၢဒူသ၀ီအဂၤတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ခီဖျိတၢ်ဟ့ၣ်ပလီၢ်၀ဲကမျၢၢ်သ့ၣ်တဖၣ်အဃိ လီၢ်က၀ီၤကမျၢၢ်တဖၣ်လၢကစံၣ်ပလဲာ်သးအဂီၢ် ဆၣ်ဖိကီၢ်ဖိလၢအဘုၣ်ဃာ်၀ဲလၢအမ့ၢ်ဆီႇထိးႇထိၣ်ဒ့ၣ်ႇမဲးတဲးလဲးဒီးကျီၢ်သ့ၣ်တဖၣ်အံၤ ဆါ၀ဲဖဲအကန့ၢ်အၦ့ၤထဲလဲၣ်ဂ့ၤဘၣ်ဆၣ် ခီဖျိၦၤၦ့ၤအတၢ်တအိၣ်ဘၣ်အဃိ တနီၤန့ၣ်ဒုးသ့ၣ်ညါမၢ၀ဲအဘူးတံၢ်လဲၤဟံက့ၤဆၣ်ဖိကီၢ်ဖိတဖၣ်အိၣ်၀ဲအဂ့ၢ်န့ၣ် လီၢ်က၀ီၤပိာ်မုၣ်လၢအအိၣ်ဘူးဖဲသ၀ီဖဲန့ၣ်တဂၤစံး၀ဲန့ၣ်လီၤႉ အ၀ဲစံး၀ဲလၢ“ဘူးတံၢ်လၢအိၣ်သ၀ီဖဲန့ၣ်တဖၣ်ဖဲမဟါန့ၣ်ဆဲးဃီၤဖိလီၤႉ မၢလဲၤဟံဆၣ်ဖိကီၢ်ဖိ လၢအဘုၣ်ပာ်၀ဲလၢဟံၣ်တဖၣ်လီၤႉ အ၀ဲသ့ၣ်ကဘၣ်စံၣ်လီၤအဃိ ၦၤဟ့ၣ်အ၀ဲသ့ၣ်တၢ်ဆၢကတီၢ်ခံသီလီၤႉ အ၀ဲသ့ၣ်နါက့လၢကပာ်တ့ၢ်ဒ်အံၤအမဲာ်ညါအီၣ်ကွံာ်၀ဲဒၣ်အဆီအထိၣ်ဒ့ၣ်တဖၣ်လီၤႉ တနီၤန့ၣ်ဘုၣ်၀ဲမဲးတဲးလဲးဒီဒူၣ်ညါလီၤႉ လၢကလဲၤဟံအဂီၢ်သ၀ီ၀ဲန့ၣ်နါက့ခဲအံၤလဲၤထီၣ်က့ၤလီၤတညီလၢၤဘၣ်” အဂ့ၢ်န့ၣ် စံး၀ဲန့ၣ်လီၤႉ ဖဲစှၤသီအတီၢ်ပူၤသ၀ီ၀ဲန့ၣ်အကပိၤကပၤန့ၣ် ဟီၣ်က၀ီၤကညီတၢ်ထူၣ်ဖျဲးသုးမုၢ်ဒိၣ်(KNLA)အသုးဒီး သုးမီၤစိရိၤအသုးႇ(BGF)သုးပာ်ဖှိၣ်တဖၣ်အဘၢၣ်စၢၤတၢ်ခးလိာ်သးကဲထီၣ်အိၣ်၀ဲဒီး KNLA တကပၤမ့ၢ်ဆဲးခးဒံး၀ဲန့ၣ် သုးမီၤစိရိၤတဲပျံၤတဲဖုး၀ဲလၢကခးဃုာ်၀ဲသ၀ီဖိတဖၣ်အဃိ လီၢ်က၀ီၤဖိတဖၣ်ဘၣ်ယိၣ်ဘၣ်ဘှီပျံၤတၢ်ဖုးတၢ်အဂ့ၢ်န့ၣ် လီၢ်က၀ီၤသ၀ီဖိလၢအအိၣ်သ၀ီအဂၤတဖျၢၣ်လၢတအဲၣ်ဒိးပာ်ဖျါအမံၤတဂၤ စံး၀ဲန့ၣ်လီၤႉ “အ၀ဲသ့ၣ်ဟ့ၣ်ပလီၢ်၀ဲသ၀ီလၢအအိၣ်ဘူးဒီးမၤထီသ၀ီတဖၣ်လီၤႉ အ၀ဲသ့ၣ်တဲ၀ဲလၢ(KNLA)က့ၤခးဆၢတၢ်လီၤႉ မ့ၢ်ဆဲးခးဒံး၀ဲန့ၣ်မတဂၤမတဂၤတသ့ၣ်ညါဘၣ်ႇကခး၀ဲခဲလၢာ်လီၤန့ၣ်တဲ၀ဲလီၤႉ အ၀ဲသ့ၣ်တဲ၀ဲဒ်န့ၣ်အဃိသ၀ီဖိတဖၣ်ပျံၤတၢ်မီၤနီၤႉ တနီၤန့ၣ်အိၣ်လၢသ၀ီပူၤတဘူၣ်လၢၤဘၣ် လဲၤစံၣ်အိၣ်၀ဲဒၣ်လၢသ၀ီအဂၤတဖၣ်လံ”အဂ့ၢ်န့ၣ် လီၢ်က၀ီၤဖိစံး၀ဲန့ၣ်လီၤႉ ဖဲလါအီကူး ၁၁ သီအနံၤ ဒွဲၣ်လိကီၢ်ဆၣ် မၤထီသ၀ီကရူၢ်ပူၤ ထွံၣ်သံအုၣ်ဒီးမၤထီသ၀ီအဘၢၣ်စၢၤ ဟီၣ်က၀ီၤ(KNLA)အသုးဒီးသုးမီၤစိရိၤအသုးတဖၣ်အဘၢၣ်စၢၤတၢ်ခးလိာ်သးကဲထီၣ်ဒီးလၢန့ၣ်အမဲာ်ညါ သုးမီၤစိရိၤအသုး(စကခ–၈)ႇ(ခမရ–၄၀၇)တဖၣ် က့ၤခးလီၤကဒါကျိဖးဒိၣ်လၢသွၣ်ခိၣ်သ၀ီပူၤအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်...