ဖဲၣ်ဒရၢၣ်ဆူၣ်ချ့သနူကဟဲအိၣ်ဖျါထီၣ်အဂီၢ် တၢ်ဒုးအိၣ်ထီၣ်ဒီကလုာ်ဆူၣ်ချ့ကမံတံာ်
လါအီကူး ၁၇ သီႇ ၂၀၂၁ နံၣ်ႇ ခ့ၣ်အဲးစံၣ် ဒ်သိးတၢ်ကကွဲးလီၤပာ်လီၤဖဲၣ်ဒရၢၣ်ကီၢ်စၢဖှိၣ်ဆူၣ်ချ့(Nation Health Policy)သနူကန့ၢ်အဂီၢ် ဒီကလုာ်ဃူဖိး(NUG)ပဒိၣ်ဒီး ကလုာ်ဒူၣ်ဆူၣ်ချ့တၢ်ကရၢကရိ(EHOs)တဖၣ်ပာ်ဖှိၣ်ထီၣ်သး မၤ၀ဲဒၣ်တၢ်အိၣ်ဖှိၣ်တခါဒီး ဒုးအိၣ်ထီၣ်၀ဲဒီကလုာ်ဆူၣ်ချ့ကမံတံာ်တခါအဂ့ၢ်န့ၣ် ထုးထီၣ်ဘိးဘၣ်ရၤလီၤ၀ဲဖဲမဟါ(လါအီကူး ၁၆)သီအနံၤန့ၣ်လီၤႉ စးထီၣ်ဖဲလါအီကူး ၂ သီတုၤလၢ ၅ သီအနံၤ ဖဲ(NUG)ဆူၣ်ချ့ကိတိာ်၀ဲၤကျိၤဒီး ကလုာ်ဒူၣ်ဆူၣ်ချ့တၢ်ကရၢကရိတဖၣ်မၤ၀ဲဒီကလုာ်ဆူၣ်ချ့တၢ်အိၣ်ဖှိၣ်၀ံၤအလီၢ်ခံန့ၣ် ဘၣ်တၢ်ဒုးအိၣ်ထီၣ်၀ဲကမံတံာ်အံၤန့ၣ်လီၤႉ ဒ်သိးခိ၀ံၣ်တၢ်ဆါတၢ်ဂ့ၢ်ကီအကါဒိၣ်လၢတၢ်ဘှါရှဲ၀ဲလၢတကီၢ်ခါအခဲအံၤဖၣ်ဒီး တၢ်ကကွဲး လီၤမၤဖျါထီၣ်ဖဲၣ်ဒရၢၣ်ဆူၣ်ချ့ကျဲသနူအဂီၢ် ဘၣ်တၢ်ဒုးအိၣ်ထီၣ်၀ဲဒ်အံၤလီၤအဂ့ၢ်န့ၣ် လံာ်တၢ်ပာ်ဖျါအပူၤ ၦၤကတိၤတၢ်ပၢ ဒီၣ်ကထၢၣ်စ့ၣ်သံၣ်ယၣ်မီၣ် စံး၀ဲဒ်အံၤန့ၣ်လီၤႉ ဒီၣ်ကထၢၣ်စ့ၣ်သံၣ်ယၣ်မီၣ်စံး၀ဲလၢ“တကီၢ်ခါဆၢကတီၢ်တၢ်အိၣ်သးခဲအံၤ ဘၣ်ထွဲဒီးဖဲၣ်ဒရၢၣ်ဆူၣ်ချ့ တၢ်ရဲၣ်တၢ်ကျဲၤတၢ်မၤအကျဲသနူတၢ်ဂ့ၢ်တၢ်ကျိၤ လၢတၢ်ကဘှါရှဲ၀ဲလၢခဲအံၤန့ၣ် တကီၢ်ခါခိ၀ံၣ်ဃုာ်ဒီး ဆူၣ်ချ့တၢ်ဂ့ၢ်ကီတဖၣ်အံၤ ထုးဖှိၣ်လီၤသးခိၣ်ဒီးတၢ်အိၣ်သးလၢကဘၣ်ဘှါရှဲအီၤသ့ၣ်တဖၣ်ဒီး ဖဲၣ်ဒရၢၣ်ဆူၣ်ချ့သနူအဂီၢ် ဒ်သိးတၢ်ကကွဲးလီၤပာ်လီၤဖဲၣ်ဒရၢၣ်ဆူၣ်ချ့ကျဲသနူလၢအရ့ဒိၣ်တဖၣ်အဂီၢ် ဘၣ်တၢ်ဒုးအိၣ်ထီၣ်၀ဲလီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဒီကလုာ်ဆူၣ်ချ့ကမံတံာ်လၢတၢ်ဒုးအိၣ်ထီၣ်၀ဲအံၤ ကဘၣ်ကွဲးလီၤပာ်ပနီၣ်၀ဲဖဲၣ်ဒရၢၣ်ကီၢ်စၢ ဖှိၣ်ဆူၣ်ချ့သနူအမဲာ်ညါ ကဘၣ်ဟူးဂဲၤဖံးမၤတၢ်လၢကလုာ်ဒူၣ်ဟီၣ်က၀ီၤအပူၤ ကီၢ်စၢဖှိၣ်ကရူၢ်ဖိကီၢ်စဲၣ်ဆူၣ်ချ့တၢ်ဖံးတၢ်မၤအတၢ်ရဲၣ်ကျဲၤတဖၣ်ႇ ကဘၣ်ပာ်ဖှိၣ်မၤသကိးတၢ်ဒီး ထံဂုၤကီၢ်ဂၤတၢ်ကရၢကရိတဖၣ်ဒီး မ့ၢ်ဘၣ်သဂၢၢ်ဒီးတၢ်ကီတၢ်ခဲတမံၤဂ့ၤတမံၤဂ့ၤ ဒ်သိးကအိၣ်ဃာ်တဘျီဃီဒီးကက့ၤခီၣ်ဆၢကဒါလၢအဆိအချ့အဂီၢ် တၢ်ဒုးအိၣ်ထီၣ်၀ဲအတၢ်ပညိၣ် ၄ ထံၣ်အံၤအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့်ၣလီၤႉ ကမံတံာ်၀ဲအံၤအပူၤ ကရူၢ်ဖိ ၂၃ ဂၤဒီး ၦၤဟ့ၣ်ကူၣ်တၢ်(၁၀)ဂၤအကျါလၢအပၣ်ဃုာ်၀ဲ...
မဲၢ်တီၢ်တၢ်ဆါဟံၣ်ကက့ၤအိးထီၣ်ကဒါက့ၤ ပိာ်မုၣ်ပိာ်မၢၤတၢ်အိၣ်ဖျဲၣ်ဖိ၀ဲၤကျိၤ
လါအီကူး ၁၆ သီႇ ၂၀၂၁ နံၣ်ႇ ခ့ၣ်အဲးစံၣ် ခီဖျိခိ၀ံၣ်တၢ်ဘၣ်ကူဘၣ်ဂာ်အဃိ မဲၢ်တီၢ်တၢ်ဆါဟံၣ်လၢအဘၣ်တၢ်ကးတံၢ်အီၤယံၤ၀ဲသၢနွံဃၣ်ဃၣ်အံၤ စးထီၣ်ဖဲတနံၤညါအံၤလါအီကူး ၁၇ သီအနံၤန့ၣ် လၢၦၤမိၢ်ဒၢတဖၣ်အဂီၢ်တၢ်က့ၤအိးထီၣ်ကဒါတၢ်အိၣ်ဖျဲၣ်ဖိ၀ဲၤကျိၤလံအဂ့ၢ်န့ၣ် မဲၢ်တီၢ်တၢ်ဆါဟံၣ်ဟ့ၣ်ဒုးသ့ၣ်ညါ၀ဲဖဲမဟါ(လါအီကူး ၁၆)သီအနံၤန့ၣ်လီၤႉ တၢ်အိၣ်ဖျဲၣ်ဖိ၀ဲၤကျိၤ ၦၤဘၣ်မူဘၣ်ဒါ သရၣ်မုၣ်နီၢ်စိၤဖံၤယၤလၣ် စံး၀ဲလၢ“ပကအိးထီၣ်န့ၣ်တၢ်အိၣ်ဖျဲၣ်တခါဒံးလီၤမီၤနီၤႉ ပအိးထီၣ်ခဲလၢာ်တန့ၢ်ဒံးဘၣ်မီၤနီၤႉ ဘၣ်မနုၤအဃိလဲၣ်န့ၣ်ပမ့ၢ်ကွၢ်လၢတၢ်အိၣ်ဖျဲၣ်န့ၣ်အလိၣ်ဒိၣ်မီၤနီၤႉ မ့ဘၣ်ကွၢ်န့ၣ်ခဲအံၤမဲၢ်ဆီး တၢ်ဆါဟံၣ်စ့ၢ်ကီးအ၀ဲသ့ၣ်တၢ်ကီတၢ်ခဲအိၣ်စ့ၢ်မီၤနီၤႉ ၦၤမိၢ်ဒၢလၢအဟဲမၤကွၢ်သးလၢပအိၣ်သ့ၣ်တဖၣ်န့ၣ် ခီဖျိပပံးဃာ်တၢ်ဆါဟံၣ်အဖီခိၣ်န့ၣ် ဖဲတၢ်ဘၢၣ်စၢၤအံၤဘၣ်လဲၤအိၣ်ဖျဲၣ်အဖိလၢတၢ်ဆါဟံၣ်ဖးဒိၣ်လဲလဲလီၤမီၤနီၤႉ ပက့ၤအိးထီၣ်တၢ်ကွၢ်ထွဲတၢ်အိၣ်ဆူၣ်အိၣ်ချ့တၢ်ဖံးတၢ်မၤခဲလၢာ်တသ့ဘၣ်သနးက့န့ၣ် ဘၣ်ဃးလၢတၢ်အိၣ်ဖျဲၣ်တခါန့ၣ်ကပအိးထီၣ်ဆိကွၢ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢတၢ်ကက့ၤအိးထီၣ်တၢ်အိၣ်ဖျဲၣ်ဖိ၀ဲၤကျိၤအဂီၢ် ဒ်ခိ၀ံၣ်တၢ်တြီဆၢဒီသဒၢတၢ်ရဲၣ်တၢ်ကျဲၤအသိး ၦၤဟဲအိၣ်ဖျဲၣ်ဖိန့ၣ်ၦၤဟဲအိၣ်ခိးန့ၢ်ထဲတဂၤလီၤဒီး ၦၤမိၢ်ဒၢလၢအဟဲမၤကွၢ်သးဖဲမဲၢ်တီၢ်တၢ်ဆါဟံၣ်သ့ၣ်တဖၣ်န့ၣ် တချုးအအိၣ်ဖျဲၣ်ဒံးဘၣ်န့ၣ်တၢ်ကဘၣ်မၤကွၢ်အ၀ဲသ့ၣ်ခိ၀ံၣ်တၢ်ဆါအိၣ်တအိၣ်အဂ့ၢ်န့ၣ် သရၣ်မုၣ်နီၢ်စိၤဖံၤယၤလၣ် စံးအါထီၣ်၀ဲန့ၣ်လီၤႉ ဘၣ်ဆၣ်ခီဖျိခိ၀ံၣ်တၢ်ဆါဘၣ်ကူဘၣ်ဂာ်ရၤလီၤသးအိၣ်ဒံးအဃိ ဘၣ်ထွဲဒီးတၢ်ကွၢ်ထွဲတၢ်အိၣ် ဆူၣ်အိၣ်ချ့တၢ်ဖံးတၢ်မၤတဖၣ်လၢအမ့ၢ်တၢ်ကွဲးတၢ်ကါ၀ဲၤကျိၤႇ ၦၤနီၢ်ဒိၣ်(OPD/ IPD) ၀ဲၤကျိၤႇတၢ်ကူစါမဲာ်ချံ၀ဲၤကျိၤႇၦၤဖိသၣ် OPD/IPD ၀ဲၤကျိၤႇဘၣ်ဃးဒီးၦၤမိၢ်ဒၢဆူၣ်ချ့၀ဲၤကျိၤႇတၢ်ဆဲးဖိသၣ်ကသံၣ်ဒီသဒၢ၀ဲၤကျိၤတဖၣ် တၢ်ကကးတံၢ်ဃာ်ဒံး၀ဲတစိၢ်တလီၢ်အဂ့ၢ်န့ၣ် ထုးထီၣ်ဘိးဘၣ်သ့ၣ်ညါ၀ဲန့်ၣလီၤႉ ၦၤဆါလၢအအိၣ်ဒီးတၢ်ဆါယံၤတၢ်ဆါထၢတဖၣ်န့ၣ် အလီၢ်မ့အိၣ်လၢကဘၣ်သမံသမိးသးလၢခိ၀ံၣ်န့ၣ် ဆဲးကျိးမဲၢ်ဆီးတၢ်ဆါဟံၣ်လီတဲစိအနီၣ်ဂံၢ်တဖၣ်သ့၀ဲအသိး တၢ်ကီတၢ်ခဲမ့အိၣ်လၢကဘၣ်လဲၤပၠးသးန့ၣ် မၤစၢၤအ၀ဲသ့ၣ်လၢတၢ်ဘၢၣ်စၢၤသ့၀ဲဒီး ဘၣ်ထွဲဒီးၦၤအိၣ်ဒီးတၢ်ဆါယံၤဆါထၢတဖၣ်ကကူစါယါဘျါသးအဂီၢ် မ့လိၣ်ဘၣ်တၢ်မၤစၢၤန့ၣ် ဒုးသ့ၣ်ညါသရၣ်၊သရၣ်မုၣ်သ့၀ဲအဂ့ၢ်န့ၣ် မဲၢ်တီၢ်တၢ်ဆါဟံၣ်ထုးထီၣ်ဘိးဘၣ်ဒုးသ့ၣ်ညါလီၤ၀ဲန့ၣ်လီၤႉ ခီဖျိခိ၀ံၣ်တၢ်ဆါရၤလီၤသးအဃိ မဲၢ်တီၢ်တၢ်ဆါဟံၣ် ဆူၣ်ချ့ၦၤမၤတၢ်ဖိတဖၣ်ဃုာ်ဒီးအဟံၣ်ဖိဃီဖိတဖၣ်ဒီးၦၤတ၀ၢလၢဟ့ၣ်တၢ်ကွၢ်ထွဲတၢ်အိၣ်ဆူၣ်အိၣ်ချ့တၢ်ဖံးတၢ်မၤတဖၣ်ကပူၤဖျဲးလၢတၢ်ဘၣ်ယိၣ်အဂီၢ် စးထီၣ်ဖဲလါယူၤလံ ၁၅ သီအနံၤန့ၣ် မဲၢ်တီၢ်တၢ်ဆါဟံၣ်၀ဲၤကျိၤခဲလၢာ်ဘၣ်တၢ်ကးတံၢ်ဃာ်၀ဲအဂ့ၢ်န့ၣ် ဖဲအပူၤကွံာ်(လါယူၤလံ ၃၀)သီအနံၤန့ၣ် ထုးထီၣ်ပာ်ဖျါ၀ဲန့ၣ်လီၤႉ မဲၢ်တီၢ်တၢ်ဆါဟံၣ်လၢဒီၣ်ကထၢၣ်စ့ၣ်သံၣ်ယၣ်မီၣ်တီခိၣ်ရိၣ်မဲ၀ဲအံၤ...
မၤထူရၤအသးသဟီၣ် မ့ၢ်မူလၢပသးပူၤန့ၣ် အမျးကယၤၦဲၤလၢကတုၤလၢတၢ်မၤနၢၤအဖီတၢၣ်လၢအဆိအချ့အဂ့ၢ် သုးခိၣ်ကျၢၢ်စိ စီၤဘီကၠီၣ်ဟဲစံး၀ဲ
လါအီကူး ၁၃ သီႇ ၂၀၂၁ နံၣ်ႇ ခ့ၣ်အဲးစံၣ် ပမ့ၢ်လဲၤဒ်ကညီမၤထူရၤခိၣ်နၢ်ပာ်လီၤဃာ်တၢ်မၤအကျဲဖီၣ်တၢၣ်အသိးန့ၣ် အမျးကယၤၦဲၤလၢပ ကလဲၤတုၤလၢတၢ်မၤနၢၤအဖီတၢၣ်လၢအဆိအချ့အဂ့ၢ်န့ၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ် -KNLA သုးရိၣ်မဲခိၣ်ကျၢၢ်(၂)သုးခိၣ်ကျၢၢ်စိ စီၤဘီကၠီၤဟဲ စံးလီၤဆီၣ်တခူထီၣ်၀ဲဖဲမဟါ(လါအီကူး ၁၂)သီတၢ်မၤလၤကပီၤကညီမၤထူရၤမုုၢ်နံၤၦဲၤထီၣ် ၇၁ ၀ီတ၀ီဖဲ(Online)အပူၤအခါန့ၣ်လီၤႉ ၦၤလၢအပၣ်ဃုာ်ဂဲၤလိာ်လၢတကီၢ်ခါကညီတၢ်ပၢၢ်ဆၢဒီတကတီၢ်ဃီအပူၤတဖၣ် တၢ်နာ်န့ၢ်၀ဲ တၢ်မုၢ်လၢအဖီတၢၣ်လၢကညီမၤထူရၤခိၣ်နၢ်ပာ်လီၤဃာ်၀ဲတဖၣ်အဂံၢ်စၢ်၀ဲအဃိ တၢ်ပၢၢ်ဆၢအနံၣ်ဘၣ်ယံၤဘၣ်ထၢ၀ဲအဂ့ၢ်န့ၣ် သုးခိၣ်ကျၢၢ်စိ စီၤဘီကၠီၤဟဲ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ပမ့ၢ်ကွၢ်က့ၤတၢ်ပၢၢ်ဆၢတၢ်လဲၤကျဲၤတနီၤနီၤန့ၣ် ပဖီတၢၣ်ဒီးပတၢ်လဲၤကျဲန့ၣ်ပတနာ်ဘၣ်ႉ တၢ်အိၣ်သးအဖီခိၣ်ဒီးပမၤအီၤႉ တၢ်အဃိန့ၣ်အယီၤအဘျၣ်အိၣ်ႉ တၢ်ပၢၢ်ဆၢန့ၢ်အနံၣ် ၇၀ဘျဲၣ်လံႉ ခီဖျိလၢ တၢ်ဂ့ၢ်အ၀ဲန့ၣ်လီၤႉ အဃိသးန့ၣ် တၢ်လၢယအဲၣ်ဒိးတဲန့ၣ်လၢပလီၢ်ပကျဲပသနၢၣ်န့ၣ် ပတၢ်မုၢ်လၢ်ပဖီတၢၣ်န့ၣ် ယနာ်အီၤယမၤအီၤ ႉ မ့ၢ်ဘၣ်သံယကသံႇမ့ၢ်ဘၣ်မူန့ၣ်ယကမူ မၤထူရၤအသးသဟီၣ်အ၀ဲန့ၣ် မ့ၢ်မူလၢ ပသးပူၤန့ၣ်အမျးကယၤၦဲၤလၢပလဲၤကတုၤလၢပတၢ်မၤနၢၤအဖီတၢၣ်လၢအဆိအချ့လီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါတကီၢ်ခါကီၢ်ပယီၤအပူၤခီဖျိသုးဟံးန့ၢ်ကွံာ်တၢ်စိတၢ်ကမီၤအဃိ ဖဲဒုၣ်ဒါအတၢ်အိၣ်သးတဂၢၢ်တကျၢၤဟဲအိၣ်ထီၣ်အကတီၢ် တၢ်အိၣ်သးဂ့ၤကတၢၢ်လၢၦၤခဲလၢာ်အဂီၢ်ဒီး ကျဲလၢပလဲၤအီၤမ့ၢ်ကမၣ်န့ၣ်ဘှီဘၣ်က့ၤအီၤဒီး ကြၢးပလဲၤကျဲတဘိလၢအမ့ၢ်တၢ်ထူၣ်ဖျဲးအဖီတၢၣ်အဂ့ၢ်န့ၣ် KNLA သုးရိၣ်မဲခိၣ်ကျၢၢ်(၂)စံးအါထီၣ်၀ဲန့ၣ်လီၤႉ စးထီၣ်ဖဲအပူၤကွံာ်(၂၀၁၂)နံၣ် KNU- ကညီဒီကလုာ်စၢဖှိၣ်ကရၢအံၤ စးထီၣ်တဲသကိးတၢ်မုာ်တၢ်ခုၣ်ဒီး အူသ့စ့ၣ်ပဒိၣ်ဒီး ဖဲန့ၣ်ခိၣ်နၢ်တဖၣ်တၢ်ပာ်သးတဒ်သိးလိာ်သးဟဲအိၣ်ထီၣ်၀ဲဘၣ်ဆၣ် ဖဲ ၂၀၁၅ နံၣ် လါအီးကထိဘၢၣ် ၁၅...
ဖဲတၢ်လဲၤပာ်လီၤသုးက့ခိၣ်အစိၣ်အနံၤန့ၣ် သုးမီၤစိရိၤအသုးနုာ်လီၤဟံးန့ၢ်ကွံာ်(KNU)ကီၢ်ဆၣ်၀ဲၤဒၢး
လါအီးကူး ၁၃ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲလါအီကူး ၁၁ သီအနံၤ တၢ်လဲၤပာ်လီၤ(KNLA)သုးက့ ၁ သုးက့ခိၣ် သုးခိၣ်ကျၢၢ်ဖိ စီၤပျ့ၣ်အစိၣ်တၢ်ရဲၣ်တၢ်ကျဲၤအနံၤန့ၣ် သုးမီၤစိရိၤအသုးနုာ်လီၤဟံးန့ၢ်ကွံာ်၀ဲ KNU- ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် မီၤစကိၤကီၢ်ဆၣ်၀ဲၤဒၢးအဂ့ၢ်န့ၣ် KNU တကပၤ စံး၀ဲန့ၣ်လီၤႉ မီၤစကိၤကီၢ်ဆၣ်၀ဲၤဒၢးအံၤအိၣ်၀ဲဒၣ်ဖဲ ပီၤကီၢ်ဆၣ်ႇ သဲအ့ၤသ၀ီဒီးကတဲၣ်သ၀ီအဘၢၣ်စၢၤဒီး ဖဲ၀ဲၤဒၢးပူၤ သုးဖိတနီၤလဲၤ၀ဲလၢတၢ်လဲၤပာ်လီၤသုးက့ခိၣ်အဆၢကတီၢ် သုးမီၤစိရိၤအသုးနုာ်လီၤဟံးန့ၢ်ကွံာ်၀ဲ၀ဲၤဒၢးဒီး ၦၤလၢအိၣ်တ့ၢ်လၢ၀ဲၤဒၢး(၃)ဂၤအံၤစ့ၢ်ကီးဖီၣ်က့ၤကိး၀ဲအဂ့ၢ်န့ၣ် KNU ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤစိမၠ့ၣ် စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ဖဲန့ၣ်တမ့ၢ်ထဲလၢသုးရ့ၣ်ဘၣ်ႉ သုးက့ပာ်လီၤ၀ဲႇမ့ၢ်၀ဲဒၣ်ကီၢ်ဆၣ်အလီၢ်မီၤနီၤႉ ဖဲန့ၣ်အိၣ်၀ဲဒၣ်မူဒါခိၣ်တဂၤဒီးသုးဖိတနီၤမီၤနီၤႉ တအိၣ်အါအါဘၣ်ႉ တနီၤန့ၣ်လဲၤ၀ဲလၢတၢ်လဲၤပာ်လီၤသုးက့ခိၣ်တၢ်ရဲၣ်တၢ်ကျဲၤလီၤႉ ဖီၣ်က့ၤကိး၀ဲဒၣ်ၦၤအိၣ်တ့ၢ်ဖဲန့ၣ် ၃ ဂၤဒီး ခဲအံၤအ၀ဲသ့ၣ်ဟံးဃာ်၀ဲကီၢ်ဆၣ်၀ဲၤဒၢးလံမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ KNU ဒူသထူၣ်ကီၢ်ရ့ၣ်ပူၤ မီၤစကိၤ၀့ၢ်အံၤ ဖဲတဲာ်လွံၢ်တဲာ်အခါန့ၣ် ခီဖျိတၢ်အိၣ်သးအကလုာ်ကလုာ်အဃိကီၢ်ပယီၤအပဒိၣ်ပၢပြး၀ဲအဃိ ခ့ၣ်အဲၣ်ယူၣ်တကပၤဂုာ်ကဒါန့ၢ်၀ဲလီၢ်ခံအိၣ်၀ဲဘၣ်ဆၣ် ကၦၤတဖၣ်ဟးထီၣ်က့ၤလီၤဟူးဂဲၤ၀ဲလၢဟီၣ်က၀ီၤအပူၤအိၣ်ဒံး၀ဲထီဘိန့ၣ်လီၤႉ စးထီၣ်ဖဲ ၂၀၁၅ နံၣ် KNU ဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခး(NCA)၀ံၤအလီၢ်ခံန့ၣ် မ့ၢ်ကီၢ်ဆၣ်လၢတၢ်က့ၤဒုးအိၣ်ထီၣ်က့ၤ၀ဲတဘ့ၣ်အဂ့ၢ်န့ၣ် ပဒိၣ်စီၤစိမၠ့ၣ်...
သုးမီၤစိရိၤအသုးတြီ၀ဲလၢတဘၣ်မၤကညီမၤထူရၤမုၢ်နံၤလၢကီၢ်ခိၣ်စီၤဘးအူကၠံ အိၣ်ဖျဲၣ်ထီၣ်အလီၢ်ဘဲကယဲးသ၀ီပူၤဘၣ်
လါအီကူး ၁၂ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ (လါအီကူး ၁၂)သီအနံၤ လၢအလီၤဘၣ်၀ဲ(၇၁)၀ီတ၀ီ ကညီမၤထူရၤမုၢ်နံၤအံၤ တၢ်တဘၣ်မၤလၤကပီၤအီၤဖဲစီၤဘးအူကၠံအိၣ်ဖျဲၣ်ထီၣ်အလီၢ်ႇလၢအအိၣ်ဖဲအ့ယၣ်၀တံၣ်ကီၢ်ခီႇ ကၤကၠံဒီၣ်ကီၢ်ဆၣ်ႇ ဘဲးကယဲးသ၀ီပူၤအံၤတဂ့ၤအဂီၢ် သုးမီၤစိရိၤအသုးဟဲတြီ၀ဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ကညီမၤထူရၤမုၢ်နံၤၦဲၤထီၣ်(၇၁)၀ီတ၀ီလၢတၢ်မၤအီၤဖဲဘဲကယဲးသ၀ီပူၤအံၤ သုးမီၤစိရိၤအသုးတြီဃာ်ဒီးတဲ၀ဲလၢ တၢ်တဘၣ်လဲၤပာ်လီၤတၢ်သး အုးဖီကွီၤႇလဲၤဟ့ၣ်ထီၣ်တၢ်ယူာ်ယီၣ်တဖၣ်ဘၣ်န့ၣ်လီၤႉ လၢန့ၣ်အမဲာ်ညါ ဖဲတၢ်ကနုာ်လီၤဘဲကယဲးသ၀ီအပူၤန့ၣ် သုးမီၤစိရိၤအပၢၤကီၢ်သုးႇ သုးဖိဒီးပၢပြးကရူၢ်တဖၣ်ဟ့ၣ်ထီၣ်၀ဲလၢကသမံသမိးခိ၀ံၣ်တၢ်ဆါဒီး ဖဲတဂီၤအံၤဂီၤခီ ၅ နၣ်ရံၣ်တုၤလၢမုၢ်ထူၣ်တစု ကးတံၢ်၀ဲသ၀ီကျဲခိၣ်ထိးအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ လီၢ်က၀ီၤသးစၢ်လၢတအဲၣ်ဒိးပာ်ဖျါအမံၤတဂၤစံး၀ဲ“ၦၤလၢအဟဲဟ့ၣ်ထီၣ်တၢ်ယူးယီၣ်လၢကီၢ်ခိၣ်စီၤဘးအူကၠံအလၢၢ်ထူၣ်တဖၣ်ဒီးၦၤလဲၤပာ်လီၤဖီကွီၤတဖၣ်ခဲလၢာ်န့ၣ် ဘၣ်ဟဲက့ၤကဒါ၀ဲခဲလၢာ်လီၤမီၤနီၤႉ အ၀ဲသ့ၣ်တဟ့ၣ်နုာ်၀ဲ ဆူတၢ်ကိပူၤဘၣ်ဒီးတဲ၀ဲလၢတၢ်ဖီခိၣ်တၢ်ကလုၢ်အဃိ တဘၣ်မၤဘၣ်မီၤနီၤႉ တုၤလၢခဲအံၤန့ၣ်လၢ ကျဲခိၣ်ထိးန့ၣ်ပံးဃာ်၀ဲကျဲလီၤႉ ပၢၤကီၢ်သုးနီၣ်ဂံၢ်ကအိၣ်၀ဲ(၂၀)ဘျဲၣ်မီၤနီၤႉ သုးဖိနါက့ကအိၣ်လၢအဂၤ(၂၀)ဘျဲၣ်ညါဃုာ်ဒီးပၢပြးကရူၢ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဖဲ(၂၀၁၅)နံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢဒီးကီၢ်ပယီၤပဒိၣ်တဖၣ်အဘၢၣ်စၢၤ ဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခး(NCA)၀ံၤအလီၢ်ခံ စးထီၣ်ဖဲ ၂၀၁၆ နံၣ်န့ၣ် တၢ်မၤလၤကပီၤ၀ဲကညီမၤထူရၤမုၢ်နံၤ ဖဲစီၤဘးအူကၠံအိၣ်ဖျဲၣ်ထီၣ်အလီၢ်ဘဲကယဲးသ၀ီအပူၤဒီး ကညီကမျၢၢ်ထံဖိကီၢ်ဖိလၢတၢ်လီၢ်အါတီၤ ဟဲဟ့ၣ်ထီၣ်၀ဲတၢ်ယူာ်ယီၣ်ဆူ ကီၢ်ခိၣ်စီၤဘးအူကၠံအလၢၢ်ထူၣ်ဒီးပာ်လီၤ၀ဲတၢ်သးအုးဖီကွီၤတၢ်ရဲၣ်တၢ်ကျဲၤတဖၣ် တၢ်မၤ၀ဲကိးမုၢ်နံၣ်ဒဲးဃၣ်ဃၣ်ညါန့ၣ်လီၤႉ တနံၣ်အံၤလၢအလီၤဘၣ်၀ဲ(၇၁)၀ီတ၀ီ ကညီမၤထူရၤမုၢ်နံၤအံၤ လၢခ့ၣ်အဲၣ်ယူၣ် တၢ်ပၢဟီၣ်က၀ီၤအပူၤတနီၤစ့ၢ်ကီး သုးရ့ၣ်လၢအဘၣ်ထွဲတဖၣ်မၤလၤကပီၤ၀ဲကညီမၤထူရၤမုၢ်နံၤအိၣ််အသိး ကညီၦၤတ၀ၢတၢ်ကရၢကရိတဖၣ်စ့ၢ်ကီး မၤလၤကပီၤ၀ဲလၢ(သညူငညန)ပူၤစ့ၢ်ကီးအိၣ်၀ဲန့ၣ်လီၤႉ ဖဲ ၁၉၅၀ နံၣ်ႇ လါအီကူး ၁၂ သီအနံၤ...
လီၢ်က၀ီၤကမျၢၢ်ဃ့ထီၣ်၀ဲလၢကထုးကွံာ်တြဲၤလၢအအိၣ်ဖဲလၢၢ်ဒိၣ်–မိကျဲမုၢ်ခိၣ်
လါအီကူး ၁၂ သီႇ ၂၀၂၁ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်အပူၤ ဖဲတၢ်ကလဲၤလၢလၢၢ်ဒိၣ်ဒီးမိကျဲမုၢ်ခိၣ်အံၤန့ၣ် ဘၣ်ထွဲဒီးဂၢၤကီၢ်သုးဆီလီၤ၀ဲဒၣ်တြဲၤအံၤ ခီဖျိကဲထီၣ်တၢ်တံာ်တာ်လၢ ကမျၢၢ်ထံဖိကီၢ်ဖိတၢ်ဟးထီၣ်က့ၤလီၤအဃိ ၦၤဂ့ၢ်၀ီကရူၢ်လၢအအိၣ်ဟီၣ်က၀ီၤအပူၤ ဃ့ထီၣ်၀ဲဒ်သိးအထုးကွံာ်၀ဲတြဲၤအံၤအဂ့ၢ်န့ၣ် ထုးထီၣ်ဘိးဘၣ်ရၤလီၤဃ့ထီၣ်၀ဲဖဲ(လါအီးကူး၁၀)သီအနံၤန့ၣ်လီၤႉ ကၠိပ့ၤစ့ၣ်ဒီးအီလီစ့ၤတၢ်လီၢ်ခံခါလၢအအိၣ်ဖဲလၢၢ်ဒိၣ်ဒီးမိကျဲမုၢ်ခိၣ်အံၤ ဂၢၤကီၢ်သုးဆီလီၤတြဲၤဒီး ဆဲဲးကဲးလၢအလ့ၢ်လိၤဟးထီၣ်တဖၣ်ၦၤဒိး၀ဲတန့ၢ်ဘၣ် မၢဆံၣ်လီၤဆီၣ်ဆဲးကဲးအဃိ ဟးဘၣ်တဘျ့တဆှီ၀ဲဘၣ်ဒီးလီၢ်က၀ီၤဖိတဖၣ်ဃ့ထီၣ်၀ဲလၢကထုးကွံာ်၀ဲတြဲၤအံၤအဂ့ၢ်န့ၣ် ၦၤဂ့ၢ်၀ီကရူၢ်ဖိတဖၣ် စံး၀ဲဒ်အံၤန့ၣ်လီၤႉ “မ့တုၤလၢတြဲၤန့ၣ်မၢဆံၣ်လီၤဆီၣ်ဆဲးကဲးလီၤႉ ၦၤတနီၤန့ၣ်ခီဖျိတီၣ်ဃုာ်၀ဲဒီးတၢ်ဖိတၢ်လံၤအဃိ ကဲထီၣ်တၢ်တံာ်တာ်ဖးဒိၣ်ညါလီၤႉ အပူၤကွံာ်လၢညါန့ၣ်တိၤတြဲၤအံၤတအိၣ်ဘၣ်ႉ တၢ်က့ၤဆီလီၤက့ၤတြဲၤဖဲသုးမီၤစိရိၤဟံးန့ၢ်တၢ်စိတၢ်ကမီၤ၀ံၤအလီၢ်ခံလီၤႉ ဟ့ၣ်ထီၣ်၀ဲတၢ်ဂ့ၢ်လၢ ကသမံသမိးခိ၀ံၣ်ဒီးမၢၦၤစံၣ်လီၤဆီၣ်ဆဲးကဲးဒ်အံၤတဘၣ်ဃးနီတမံၤဘၣ်မီၤနီၤႉ ဖဲတြဲၤန့ၣ်တၢ်သမံသမိးခိ၀ံၣ်တခါမးတအိၣ်ဘၣ်ႉ ကမျၢၢ်တဖၣ်ဃ့ထီၣ်၀ဲအဃိ ပ၀ဲသ့ၣ်တဖၣ်စ့ၢ်ကီးပထုးထီၣ်၀ဲလံာ်ဃုာ်ဒီးကမျၢၢ်ဒီးပဃ့ထီၣ်၀ဲလီၤ” အဂ့ၢ်န့ၣ် ၦၤဂ့ၢ်၀ီကရူၢ်ဖိတဂၤ စံးဘၣ်ခ့ၣ်အဲးစံၣ်န့ၣ်လီၤႉလီၤႉ တၢ်လီၢ်လၢဂၢၤကီၢ်သုးဆီလီၤ၀ဲတြဲၤအလီၢ်န့ၣ် ခီဖျိမ့ၢ်၀ဲဒၣ်ခ့ၣ်အဲၣ်ယူၣ်တၢ်ပၢဟီၣ်က၀ီၤစ့ၢ်ကီးအဃိ မၤဟးဂီၤ၀ဲဒၣ်ဟီၣ်က၀ီၤပူၤတၢ်မုာ်တၢ်ခုၣ်တၢ်ဂၢၢ်တၢ်ကျၢၤဒ်အံၤန့ၣ် ပ၀ဲဃုာ်ဒီးကမျၢၢ်သ့ၣ်တဖၣ်လ့ၤတက့ၤတလိၣ်ဘၣ်၀ဲဘၣ်အဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ ဂၢၤကီၢ်သုးဆီလီၤအလီၢ်ဖဲကၠိပ့ၤစ့ၣ်ဒီးအီၣ်လီစ့ၤသ၀ီအပူၤယံၤ၀ဲလံဘၣ်ဆၣ် စးထီၣ်ဖဲ ၂၀၁၀ နံၣ်အလီၢ်ခံန့ၣ် တြဲၤသ့ၣ်တဖၣ်တအိၣ်လၢၤ၀ဲဘၣ်ဆၣ် ဘၣ်ဆၣ် စးထီၣ်ဖဲသုးမီၤစိရိၤဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံန့ၣ် ဘၣ်တၢ်က့ၤအိးထီၣ်ကဒါက့ၤတြဲၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲသုးမီၤစိရိၤဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံန့ၣ် ဖဲတၢ်ကနု၁်လီၤလၢၢ်ဒိၣ်၀့ၢ်ပူၤ သုးမီၤစိရိၤအသုးကလၢၤအမဲာ်ညါန့ၣ်စ့ၢ်ကီး ဆီလီၤ၀ဲဒၣ်တြဲၤယံၤ၀ဲတလါဘျဲၣ်၀ံၤအလီၢ်ခံ တၢ်က့ၤထုးကွံာ်ကဒါအိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲအပူၤကွံာ်(လါအီကူး ၁)သီအနံၤစ့ၢ်ကီး လၢၢ်ဒိၣ်ကီၢ်ဆၣ် ဘီမုာ်တိၤအဖီခိၣ်န့ၣ် သုးမီၤစိရိၤအသုး(ခလရ–၆၀)ဆီလီၤ၀ဲတြဲၤဒီး ကိးတြီ၀ဲဒၣ်လီၢ်က၀ီၤဖိလၢအဟးထီၣ်က့ၤလီၤတဖၣ်အိၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ
ပဒိၣ်မါရှၣ်သးစၢ်ခိၣ်နၢ်ဖိခိၣ်ဖး(၁၃)ဂၤတဂၤ စီၤမ့ချ့လၢအဟူးဂဲၤလၢၦၤဂ့ၢ်၀ီဒိးန့ၢ်ဘၣ်တၢ်လၤကပီၤခိၣ်ဖး
လါအီကူး ၁၀ သီႇ ၂၀၂၁ နံၣ်ႇ ခ့ၣ်အဲးစံၣ် ၂၀၂၀ နံၣ်အဂီၢ် KNU- ခ့ၣ်အဲၣ်ယူၣ် ကညီဒီကလုာ်စၢဖှိၣ်ကရၢ နဲၣ်ရွဲၣ်ခိၣ်ကျၢၢ်လီၢ်လံၤပဒိၣ်မါရှၣ်လါဖါ သးစၢ်ခိၣ်နၢ်ဖိခိၣ်ဖး(၁၃)ဂၤတဂၤအဂီၢ် ၦၤဟူးဂဲၤၦၤဂ့ၢ်၀ီတဂၤလၢအမ့ၢ်စီၤမ့ချ›ဒိးန့ၢ်ဘၣ်၀ဲခိၣ်ဖးတၢ်လၤကပီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ကီးတရံးကီၢ်ဆၣ်အပူၤ ၦၤလၢအဒုးအိၣ်ထီၣ်(Harmony Youth Association)ဒီးလၢအမ့ၢ်စ့ၢ်ကီးကရူၢ်အၦၤနဲၣ်တၢ်တဂၤလၢအမ့ၢ်စီၤမ့ချ့အံၤ ဟးဟ့ၣ်သ့ၣ်ညါနၢ်ပၢၢ်၀ဲဒၣ်ဂံၢ်ခီၣ်ထံးၦၤဂ့ၢ်၀ီခွဲးယာ်လၢလီၢ်က၀ီၤအပူၤအမဲာ်ညါ ဂံၢ်ခီၣ်ထံးၦၤပတီၢ်မုၢ်ဖိလၢအအိၣ်ဟီၣ်က၀ီၤပူၤတဖၣ်အဂီၢ်အ၀ဲဟူးဂဲၤဖံးမၤဘၣ်ထွဲဒီးကူၣ်သ့အဖီခိၣ် သးစၢ်ခိၣ်နၢ်ဖိခိၣ်ဖးလၢဖါဖီၣ်ဒ့ရှၢၣ်ဟ့ၣ်လၤကပီၤ၀ဲတနံၣ်တဘျီအံၤန့ၣ် ဘၣ်တၢ်ဟ့ၣ်လၤကပီၤ၀ဲအီၤလီၤအဂ့ၢ်န့ၣ် ဖါဖီၣ်ဒ့ရှၢၣ်ထုးထီၣ်ဘိးဘၣ်ရၤလီၤအသိးသ့ၣ်ညါဘၣ်န့ၣ်လီၤႉ “စီၤမ့ချ့အံၤလၢၦၤဂ့ၢ်၀ီတၢ်ကရၢကရိအပူၤ အိၣ်ဆၢထၢၣ်ဟူးဂဲၤ မၤတၢ်လၢကမျၢၢ်လၢအဘၣ်တၢ်ကွၢ်ကပာ်အီၤသ့ၣ်တဖၣ်အမဲာ်ညါ လၢၦၤဂ့ၢ်၀ီခွဲးယာ်ဒီးတၢ်ထဲသိးတုၤသိးအဂီၢ် မ့ၢ်ၦၤတဂၤလၢဖိသၣ်ကြၢးကွၢ်လိ၀ဲန့ၣ်လီၤႉ လၢကီးတရံးကမျၢၢ်အဂီၢ်ဒီးကညီကီၢ်စဲၣ်ဒီတဘ့ၣ်အဂီၢ် စီၤမ့ချ့ဒီးအတၢ်ကရၢကရိမၤစၢၤ၀ဲတၢ်ဒ်အံၤ ကြၢး၀ဲဒီးတၢ်သ့ၣ်ညါပာ်ပနီၣ်မၤစၢၤ၀ဲလီၤ”အဂ့ၢ်န့ၣ် ဖါဖီၣ်ဒ့ရှၢၣ်အၦၤနဲၣ်တၢ်နၣ်ဘွါဘွါဖါ လံာ်တၢ်ဘိးဘၣ်ရၤလီၤတၢ်ဟ့ၣ်လၤကပီၤခိၣ်ဖးအပူၤ စံး၀ဲန့ၣ်လီၤႉ စီၤမ့ချ့အံၤ လၢတၢ်မုာ်တၢ်ခုၣ်တၢ်မၤအကျဲတဖၣ်အပူၤန့ၣ် ဒ်သိးဂံၢ်ခီၣ်ထံးတၢ်ကရၢကရိတဖၣ်အကလုၢ်ကဟဲပၣ်ဃုာ်၀ဲအဂီၢ်ဒီး ဒ်သိးကမျၢၢ်တဖၣ်ကသ့ၣ်ညါဘၣ်အ၀ဲသ့ၣ်ဂံၢ်ခီၣ်ထံးခွဲးယာ်တဖၣ်အဂီၢ် နုာ်လီၤပၣ်ဃုာ်၀ဲလၢတၢ်ဟးဟ့ၣ်တၢ်သ့ၣ်ညါနၢ်ပၢၢ်လၢတၢ်မုာ်တၢ်ခုၣ်ႇတၢ်ကူၣ်ဘၣ်ကူၣ်သ့ပူၤအသိး ကမျၢၢ်ထံဖိကီၢ်ဖိလၢအဘၣ်ဃ့ၢ်မှံဟးဖျိးတဖၣ်အဂီၢ်ဒီးတၢ်သဘံၣ်သဘုၣ်အမဲာ်ညါ ဖဲခိ၀ံၣ်တၢ်ဆါသံသတြိာ်အကတီၢ် လီၢ်က၀ီၤဒူဖိသ၀ီဖိလၢအလီၤဘၣ်တၢ်ကီတၢ်ခဲတဖၣ်အဂီၢ် ဒ်သိးကဒိးန့ၢ်ဘၣ်တၢ်ဆီၣ်ထွဲမၤစၢၤတဖၣ်အဂီၢ်ပာ်ဖှိၣ်မၤသကိး၀ဲတၢ်အဂ့ၢ်န့ၣ် လံာ်တၢ်ဘိးဘၣ်ရၤလီၤအပူၤပာ်ဖျါ၀ဲန့ၣ်လီၤႉ ပဒိၣ်မါရှးလါဖါသးစၢ်ခိၣ်နၢ်ဖိခိၣ်ဖးအံၤ ကဘၣ်မ့ၢ်သးစၢ်လၢအတကွၢ်လီၤနီၢ်ကစၢ်တၢ်ဘၣ်ဘျုုးအဂီၢ်ဘၣ်ဒီး ဒ်သိးကညီဒီကလုာ်ကလဲၤထီၣ်လဲၤထီအဂီၢ် ကဘၣ်ဂုာ်ကျဲးစၢးမၤတၢ်လၢကကဲထီၣ်တၢ်တိစၢၤမၤစၢၤလၢတၢ်ကူၣ်ဘၣ်ကူၣ်သ့ႇၦၤဂ့ၢ်၀ီခွဲးယာ်ဒီးလုၢ်လၢ်တၢ်ဆဲးတၢ်လၤတဖၣ်အဂီၢ်ဒီး အသးနံၣ်ကဘၣ်မ့ၢ်(၃၅)နံၣ်ဆူဖီလာ်ကညီကလုာ်န့ၣ်လီၤႉ တၢ်ရဲၣ်ကျဲၤတိာ်ဃာ်၀ဲတၢ်ကဟ့ၣ်ခိၣ်ဖးဖဲတနံၣ်အံၤအတီၢ်ပူၤဘၣ်ဆၣ် မ့ၢ်လၢခိ၀ံၣ်အကတီၢ်တၢ်ကဟ့ၣ်၀ဲဒ်သိးဒီးတၢ်ရဲၣ်တၢ်ကျဲၤအသိးအဂီၢ်တၢ်ကီတၢ်ခဲအိၣ်အဃိ တၢ်ရဲၣ်တၢ်ကျဲၤလၢကဟ့ၣ်လီၤအဆၢကတီၢ်တဲလီၤတံၢ်၀ဲတသ့ဒံးဘၣ်ဒီး ခိၣ်ဖးအံၤတၢ်ကဟ့ၣ်မၤလၤကပီၤ၀ဲလၢအမဲရံၣ်ကၤစ့ဒီလၣ်(၄ႇ၀၀၀)အဂ့ၢ်န့ၣ် သ့ၣ်ညါဘၣ်လၢဖါဖီၣ်ဒ့ရှၢၣ်အအိၣ်န့ၣ်လီၤႉ ၦၤလၢအဒိးန့ၢ်ဘၣ်ခိၣ်ဖးလၤကပီၤ စီၤမ့ချ့စံး၀ဲလၢ“ဒ်ကညီသးစၢ်တဂၤအသိး ဒိးန့ၢ်ဘၣ်ကညီမၤထူရၤခိၣ်နၢ်တဂၤအခိၣ်ဖးဒ်အံၤ ယသးခုဒိၣ်မးလီၤႉ လၢယတၢ်မၤသကိး တၢ်လၢလီၢ်က၀ီၤအဂီၢ်ႇၦၤကလုာ်အဂီၢ်ႇတၢ်ဟ့ၣ်လၤကပီၤ၀ဲခိၣ်ဖးဒ်အံၤအဖီခိၣ် ယသးအဂံၢ်အဘါတဖၣ်ဟဲထီၣ်၀ဲအသိး မၤဆူၣ်ထီၣ်စ့ၢ်ကီးယဂံၢ်ယ ဘါလၢက ဟူးဂဲၤဖံးမၤအါထီၣ်ဒိၣ်န့ၢ်ဒံးအခဲအံၤလီၤမီၤနီၤ”အဂ့ၢ်န့ၣ်...
သုးမီၤစိရိၤအသုးဒီး(BGF) သုးပာ်ဖှိၣ်တဖၣ် ဟံ၀ဲတၢ်ဒီသဒၢလၢလီၢ်က၀ီၤပိာ်မုၣ်တဖၣ်အအိၣ်ဒီး လဲၤထီၣ်က့ၤလီၤဟူးဂဲၤ၀ဲအဂ့ၢ် KNU စံး၀ဲ
လါအီကူး ၁၁ သီႇ ၂၀၂၁ နံၣ်ႇ ခ့ၣ်အဲးစံၣ် KNU- ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဘံလ့ကီၢ်ဆၣ်အပူၤ သုးမီၤစိရိၤ အသုးဒီး သုးခိးကီၢ်ဆၢ(BGF)အသုးတဖၣ် ဟံးန့ၢ်၀ဲတၢ်ဒီသဒၢလၢ လီၢ်က၀ီၤပိာ်မုၣ်ပိာ်မၢၤတဖၣ်အအိၣ်ဒီး လဲၤထီၣ်က့ၤလီၤဟူးဂဲၤ၀ဲအဂ့ၢ်န့ၣ် KNU ဒူသထူၣ်ကီၢ်ရ့ၣ် စံး၀ဲန့ၣ်လီၤႉ သုးမီၤစိရိၤအသုးခီၣ်ချ›သုးရ့ၣ်(ခမရ–၄၀၆)ဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် ဖဲလါအီကူး ၇ သီအနံၤ န့ၣ် ဟဲထီၣ်၀ဲဒၣ်ဆူဘံလ့ကီၢ်ဆၣ် ပယၢ်ရီသ၀ီဒီး ဆီလီၤ၀ဲအသုးဖဲန့ၣ်(၃)သီ၀ံၤ ဖဲမဟါ(လါအီကူး ၁၀)သီ ဂီၤခီအဆၢကတီၢ် ဖဲအ၀ဲသ့ၣ်ဟးထီၣ်လၢကၠိ၀ဲသ၀ီအကတီၢ်ဒ်သိးအ၀ဲသ့ၣ်ကအိၣ်ဒီးတၢ်ဒီသဒၢအဂီၢ်် ကိးဃုာ်၀ဲဒၣ်ဒီးပိာ်မုၣ်ပိာ်မၢၤသးၦၢ်လၢအအိၣ်ဖဲသ၀ီပူၤတဖၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤစိမၠ့ၣ် စံးဘၣ်ခ့ၣ်အဲးစံၣ်န့ၣ်လီၤႉ “အိၣ်လၢပယၢ်ရီဒီးဟဲထီၣ်၀ဲလၢကၠိ၀ဲထံကျိတကပၤမီၤနီၤႉ ဖဲအ၀ဲသ့ၣ်ဟဲထီၣ်အခါကိးဃုာ်၀ဲဒီးပိာ်မုၣ်တ ဖၣ်မီၤနီၤႉ မၢအတၢ်ဟး၀ဲလၢအမဲာ်ညါလွံၢ်ဂၤယဲၢ်ဂၤအဂၤတဆံႇ ဖဲအခၢၣ်သးခီန့ၣ်ပာ်၀ဲခံဂၤသၢဂၤဒ်န့ၣ်မီၤနီၤႉ ယအဲၣ်ဒိးတဲန့ၣ်အ၀ဲသ့ၣ်မ့ၢ်လဲၤန့ၣ်လဲၤမ့ၢ်သဘျ့မီၤနီၤႉ ဟံး၀ဲတၢ်ဒီသဒၢလၢပိာ်မုၣ်ဒ်အံၤတလိၣ်လဲၤဘၣ်မီၤနီၤႉ သ၀ီဖိတဖၣ်ကျိမးတအိၣ်ဘၣ်န့ၣ်ႉ မၤ၀ဲဒ်အံၤတဂ့ၤဘၣ် တၢ်အံၤမ့ၢ်တၢ်မၤကမၣ်၀ဲၦၤဂ့ၢ်၀ီခွဲး ယာ်န့ၣ်ပတဲသ့လီၤ”အဂ့ၢ်န့ၣ် ပဒိၣ်စီၤစိမၠ့ၣ် စံး၀ဲန့ၣ်လီၤႉ သုးမီၤစိရိၤအသုးဒီး(BGF)သုးပာ်ဖှိၣ်တဖၣ် ဖဲအ၀ဲသ့ၣ်ဆီလီၤသးဖဲပယၢ်ရီသ၀ီပူၤလၢသၢသီအတီၢ်ပူၤန့ၣ် ပာ်လီၤအသုးလၢကၠိပူၤတကးဘၣ်အမဲာ်ညါ ဖဲအ၀ဲသ့ၣ်ဟဲတုၤလၢကၠိ၀ဲသ၀ီပူၤအကတီၢ်စ့ၢ််ကီး ပာ်လီၤအသုး ဖဲသီခါဖၠၣ်တၢ်သူၣ်ထီၣ်အလီၢ်အအဂ့ၢ်န့ၣ် KNU ဒူသထူၣ်ကီၢ်ရ့ၣ် ထုးထီၣ်ပာ်ဖျါ၀ဲဖဲမဟါ(လါအီကူး ၁၀)သီ...
ကညီကီၢ်စဲၣ်အပူၤခိ၀ံၣ်ၦၤဆါတဖၣ်အဂီၢ်လိၣ်ဘၣ်ဒံး၀ဲ Oxygen
လါအီကူး ၁၀ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ်အပူၤ ၦၤဆါလၢအဘၣ်ကူဘၣ်ဂာ်လၢခိ၀ံၣ်တၢ်ဆါလၢအ Oxygen (အီၣ်ကစံၣ်ကၠံၣ်)လီၤသ့ၣ်တဖၣ်အဂီၢ်လိၣ်ဘၣ်ဒံး၀ဲအီၣ်ကစံၣ်ကၠံၣ်အဂ့ၢ်န့ၣ် သ့ၣ်ညါဘၣ်လၢတၢ်ကရၢကရိလၢအမၤစၢၤကလီတၢ်တဖၣ်အအိၣ်န့ၣ်လီၤႉ တကီၢ်ခါခဲအံၤၦၤလၢအဘၣ်ကူဘၣ်ဂာ်လၢခိ၀ံၣ်တၢ်ဆါတနီၤန့ၣ် တလဲၤဒိးပၠးကူစါယါဘျါသးလၢတၢ်ဆါဟံၣ်ဘၣ်ဒီး ခီဖျိကူစါယါဘျါသးလၢဟံၣ်လီၤအဃိ လၢကဟးဃုန့ၢ်အီၣ်ကစံၣ်ကၠံၣ်ထံအဂီၢ်တၢ်ယံၤတၢ်နီၢ်အိၣ်၀ဲအသိး ဃုတဘၣ်ဘၣ်စ့ၢ်ကီးအိၣ်၀ဲအဂ့ၢ်န့ၣ် အၣ်နၣ်တၣ်ကသံၣ်ဒၢးလၢအကူစါယါဘျါကလီတၢ် ဆူၣ်ချ့ၦၤမၤတၢ်ဖိလၢအမၤစၢၤ၀ဲကရူၢ်လၢအဟးမၤစၢၤကလီတၢ်တဂၤ စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“ခဲအံၤဒုထံၣ်ဘၣ်တၢ်ကီတၢ်ခဲတစဲးလၢအီၣ်ကစံၣ်ကၠံၣ်အဂီၢ်မီၤနီၤႉ မ့မ့ၢ်သီခါဒုမၤစၢၤ၀ဲဒၣ်တၢ်ဆါဟံၣ်၀ဲအံၤတကးဒံးဘၣ်မၤစၢၤဃုာ်ဒီးၦၤဆါလၢအိၣ်တၢ်ချၢတဖၣ်အဃိ တၢ်ကီတၢ်ခဲဒုအိၣ်လီၤမီၤနီၤႉ မ့န့ၢ်အခါဒၢးန့ၢ်ႇမ့တန့ၢ်အခါဒၢးတန့ၢ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါဆၢကတီၢ်ခဲအံၤ တၢ်ကီတၢ်ခဲအိၣ်လၢကဒိးန့ၢ်ဘၣ်အီၣ်ကစံၣ်ကၠံၣ်ဒၢအဃိ ကျးလၢအဆါအီၣ်ကစံၣ်ကၠံၣ်ဒၢလၢတၢ်ချၢတနီၤန့ၣ် တဆါဘၣ်လၢၤအီၣ်ကစံၣ်ကၠံၣ်ဘၣ်အသိး ကျးတနီၤလၢအဆါအီၣ်ကစံၣ်ကၠံၣ်န့ၢ်တဖၣ်စ့ၢ်ကီးခီဖျိဆါ၀ဲအၦ့ၤဒိၣ်အဃိ ၦၤအါဒၣ်တက့ၢ်န့ၣ်ပာ်ဂံၢ်ပာ်ဘါ၀ဲတၢ်ကရၢကရိလၢအဟးမၤစၢၤကလီထၢနုာ်န့ၢ်၀ဲအီၣ်ကစံၣ်ကၠံၣ်ထံတဖၣ်လီၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ကီးတရံး၀့ၢ် ခိ၀ံၣ်ၦၤဆါ နါသီၤတၤစံး၀ဲ“ကျးလၢအဂၤန့ၣ်ပတထံၣ်လၢအထၢနုာ်အီၣ်ကစံၣ်ကၠံၣ်ထံဘၣ်ႉ ကျးလၢအထၢနုာ်လီၤဂ့ၢ်ဂီၢ်အူအိၣ်ဒုကအိၣ်မီၤနီၤႉ ပနၢ်ဟူလၢဘၣ်ဟ့ၣ်အၦ့ၤလၢအကလီၢ်ညါအဃိ ပလဲၤထၢနုာ်လီၤလၢတၢ်ကရၢကရိလၢအမၤစၢၤကလီတၢ်တဖၣ်အရူလီၤႉ တဘၣ်ဟ့ၣ်စ့ဘၣ်ဆၣ်သနးက့ ကွၢ်ဖဲပဟ့ၣ်န့ၢ်ဒီးထၢနုာ်လီၤတိၢ်မၤဘူၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဆၢကတီၢ်ခဲအံၤအီၣ်ကစံၣ်ကၠံၣ်ဒၢမ့အိၣ်ဘၣ်ဆၣ် လၢကမၤန့ၢ်အီၣ်ကစံၣ်ကၠံၣ်ထံအဂီၢ်တၢ်ကီတၢ်ခဲအိၣ်အဃိ ၦၤလၢအကျိၣ်အစ့အိၣ်တနီၤန့ၣ် လၢအီၣ်ကစံၣ်ကၠံၣ်ဒၢအလီၢ်န့ၣ်ၦ့ၤက့ၤ၀ဲလၢအီၣ်ကစံၣ်ကၠံၣ်ဆဲးအိၣ်၀ဲဘၣ်ဆၣ် အီၣ်ကစံၣ်ကၠံၣ်ဆဲးတဖၣ်အံၤအၦ့ၤအစှၤကတၢၢ်န့ၣ်(၁၅)ကလီၢ်ဘျဲၣ်တုၤလၢ(၂၀)ဃၣ်ဃၣ်အမဲာ်ညါ ခီဖျိဘၣ်သူ၀ဲဒီးမ့ၣ်အူဂံၢ်အဃိ ဖဲမ့ၣ်အူတဟဲဘၣ်အဆၢကတီၢ်န့ၣ်တၢ်ကီတၢ်ခဲအိၣ်အဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ လၢအတမ့ၢ်တၢ်ဆါဟံၣ်ဒီးခိ၀ံၣ်စဲၣ်ထၢၣ်အလီၢ်တဖၣ်ဘၣ် ခိ၀ံၣ်ၦၤဆါလၢအကူစါယါဘျါသးလၢဟံၣ်တနီၤလၢတၢ်ဟ့ၣ်နၢအီၤ(အီၣ်ကစံၣ်ကၠံၣ်)တဖၣ်အံၤ ဒိးန့ၢ်ဘၣ်အီၣ်ကစံၣ်ကၠံၣ်ဒၢဘၣ်ဆၣ် လၢကဘၣ်သူ၀ဲအကျိၤအကျဲႇအနီၣ်ဂံၢ်လၢကဘၣ်ဟ့ၣ်အီၣ်ကစံၣ်ကၠံၣ်တဖၣ်အံၤ ခီဖျိမၤ၀ဲလၢအတအိၣ်ဒီးသရၣ်တၢ်နဲၣ်ကျဲဘၣ်အဃိ ထံၣ်ဘၣ်တၢ်ကီတၢ်ခဲသ့ၣ်တဖၣ်အဂ့ၢ်န့ၣ် တၢ်ကရၢကရိလၢအမၤစၢၤကလီတၢ် ကရူၢ်ဖိတဂၤ စံး၀ဲန့ၣ်လီၤႉ
KNU သုးက့ ၁ သုးက့ခိၣ် သုးခိၣ်ကျၢၢ်ဖိ စီၤပျ့ၣ် စူးကွံာ်အသး
လါအီကူး ၁၀ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ(လါအီကူး ၁၀)သီ ဂီၤခီ ၄ နၣ်ရံၣ်ဘျဲၣ်အဆၢကတီၢ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ သုးက့(၁)သုးက့ခိၣ် သုးခိၣ်ကျၢၢ်ဖိ စီၤပျ့ၣ်(၅၆)နံၣ် စူးကွံာ်အသးလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ သုးက့ခိၣ် သုးခိၣ်ကျၢၢ်ဖိ စီၤပျ့ၣ်အံၤ စူးကွံာ်အသးဖဲဒူသထူၣ်ကီၢ်ရ့ၣ်ႇ ဒူသထူၣ်ကီၢ်ဆၣ် မယါကိသ၀ီအပူၤဒီး တကီၢ်ခါခဲအံၤအစိၣ်န့ၣ်ဘၣ်တၢ်ဟဲက့ၤစိာ်၀ဲဆူအအိၣ်တၢ်လီၢ်သးဟီထံအဂ့ၢ်န့ၣ် ဒူသထူၣ်ကီၢ်ရ့ၣ် ဖၣ်အၣ်ကီၢ်ဆၣ်ခိၣ် စီၤစၤဒၤသ့ ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ “ဒ်သိးပသ့ၣ်ညါန့ၣ်အသံ၀ဲလၢသွံၣ်ထီၣ်တၢ်ဆါမီၤနီၤႉ ဖဲမဟါဒီတနံၤန့ၣ်အသွံၣ်ထီၣ်လီၤႉ အသွံၣ်တလီၤဘၣ်ဒီးကဲထီၣ်သးတုၤလၢအသးသမူဘၣ်ဟးထီၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ သုးခိၣ်ကျၢၢ်ဖိ စီၤပျ့ၣ်အံၤ ထီၣ်၀ဲသိၣ်ဒူစိ(commando)သုးတၢ်မၤလိဃုာ်ဒီး ကညီတၢ်ထူၣ်ဖျဲးသုးမုၢ်ဒိၣ်(KNLA)သုးရိၣ်မဲခိၣ်ကျၢၢ်(၂) သုးခိၣ်ကျၢၢ်စိ စီၤဘီကၠီၤဟဲဒီး ဖဲအ၀ဲဟံးမူဒါလၢသုးက့(၁)ပူၤ သုးရ့ၣ် ၂ အသုးရ့ၣ်ခိၣ်ဒီးဒုးယၤခိၣ်မူဒါတဖၣ်၀ံၤအလီၢ်ခံ အ၀ဲဟံမူဒါလၢသုးက့ခိၣ်မူဒါအပူၤတုၤလၢအသးသမူဟးထီၣ်ကွံာ်ခဲအံၤတစုန့ၣ်လီၤႉ တၢ်ကပာ်လီၤသုးက့ခိၣ် စီၤပျ့ၣ်အစိၣ်တၢ်ရဲၣ်တၢ်ကျဲၤအံၤ တၢ်တိာ်ဃာ်၀ဲလၢ တၢ်ကပာ်လီၤအီၤဖဲခဲမုၢ်ဆ့ၣ်(လါအီကူး ၁၁)သီအနံၤအဂ့ၢ်န့ၣ် သုးက့(၁)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ