တချုးသုးကီၣ်ကးပတုၥ်ဆိဃၥ်တၢ်ဒုးဒံးဘၣ်စှၤနၣ်ရံၣ်အတီၢ်ပူၤလဲၤခးလီၤတၢ်ဆူ(သုးက့ ၅)ပူၤအဃိ ဖိသၣ်သံ ၂ ဂၤ,ဘၣ်ဒိ ၃ ဂၤ
လါအ့ဖြ့ၣ် ၃ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ဒွဲၣ်လိကီၢ်ဆၣ်အပူၤ ဖဲမဟါအနံၤန့ၣ် တချုးဒံးလၢသုးကီၣ်ကး ဘိးဘၣ်ရၤလီၤလၢကပတုၥ်ဆိဃၥ်တၢ်ဒုးဒံးဘၣ်စှၤနၣ်ရံၣ်အတီၢ်ပူၤ အကဘီယူၤလဲၤခးလီၤတၢ်အဃိ ဖိသၣ်သံ၀ဲ(၂)ဂၤဒီး ဘၣ်ဒိ(၃)ဂၤ အဂ့ၢ်န့ၣ် သုးက့ပှၤဘၣ်မူဘၣ်ဒါစံး၀ဲန့ၣ်လီၤ. ဖဲမဟါလါအ့ဖြ့ၣ် ၂ သီဟါခီ ၈ နၣ်ရံၣ်ဘျဲၣ်အဆၢကတီၢ်န့ၣ် လၢဟီၣ်ခိၣ်ဟူးတၢ်သံတၢ်ဘၣ်ဒိဘၣ်ထံးတၢ်ဟးဂူၥ်ဟးဂီၤ အတီၢ်ပူၤအံၤ သုးကီၣ်ကးအခိၣ်မ့အီၣ်လဲၣ်ဘိးဘၣ်ရၤလီၤ၀ဲလၢလါထီၣ် ၂ သီတုၤ ၂၂ သီ လၢအသီ(၂၀)အတီၢ်ပူၤ ကပတုၥ်ဆိဃၥ် ၀ဲတၢ်ဒုးတၢ်ယၤအဂ့ၢ်န့ၣ် သုးကီၣ်ကးအ(MRTV)တၢ်ကစီၣ်ပၥ်ဖျါ၀ဲန့ၣ်လီၤ. ဘၣ်ဆၣ်တချုးလၢသုးကီၣ်ကးဘိးဘၣ်ရၤလီၤလၢပကတုၥ်ဆိဃၥ်တၢ်ဒုးတၢ်ယၤဒံးဘၣ်တနံၤဃီစှၤနၣ်ရံၣ်အတီၢ်ပူၤ ဖဲဟါခီ ၄ နၣ်ရံၣ် အဆၢကတီၢ်န့ၣ် ပယီၤသုးမီၤစိရိၤအကဘီယူၤအံၤတၢ်ဒုးကဲထီၣ်တအိၣ်လဲၤတ့ၢ်လီၤ၀ဲမ့ၣ်ပိၢ်(၂)ဖျၢၣ်ဃုၥ်ဒီးကျိဖိတဖၣ်ဆူ (သုးက့ ၅) ကတၢတံၥ်ဒီးကမၤမိၢ်ဘၢၣ်စၢၤ လ့ဖိထၣ်ကရူၢ် န့ၤကၤသ၀ီပူၤန့ၣ်လီၤ. ခီဖျိကဘီယူၤအံၤအဃိ ဘၣ်သံ၀ဲဖိသၣ်အိၣ်ဖျဲၣ်သီ(၃)လါတဂၤဒီး ဖိသၣ်(၁၂)နံၣ်တဂၤအမဲၥ်ညါ ဘၣ်ဒိ၀ဲ(၃)ဂၤအဂ့ၢ်န့ၣ် (သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ်...
ကညီပိၥ်မုၣ်ကရၢမုၢ်နံၤဆၢက့ၤအပူၤတၢ်ဟ့ၣ်လၤကပီၤ၀ဲကညီပိၥ်မုၣ်ခိၣ်နၢ်(၅၇)ဂၤ
လါအ့ဖြ့ၣ် ၇ သီ, ၂၀၂၅ နံၣ်, ခ့ၣ်အဲးစံၣ် ကညီပိၥ်မုၣ်ကရၢ(KWO)နံၣ်ဆဲးဆၢပှဲၤထီၣ်(၄၀)၀ီတ၀ီလၢအလီၤဘၣ်၀ဲဖဲမဟါလါအ့ဖြ့ၣ် ၅ သီအနံၤအံၤ တၢ်ရဲၣ်တၢ်ကျဲၤအပူၤ တၢ်ဟ့ၣ်လၤကပီၤ၀ဲပိၥ်မုၣ်ခိၣ်နၢ်(၅၇)ဂၤအဟူးဂဲၤပၥ်ဖှိၣ်မၤသကိးတၢ်လၢတၢ်ကရၢကရိပူၤအံၤတဖၣ်န့ၣ်လီၤ. ကညီပိၥ်မုၣ်ခိၣ်နၢ်လၢအဘၣ်တၢ်ဟ့ၣ်လၤကပီၤအီၤတဖၣ်န့ၣ် မ့ၢ်ပိၥ်မုၣ်ကရၢခိၣ်နၢ်,ပှၤမၤသကိးတၢ်ဖိလၢအမၤတ့ၢ် တၢ်မၤ(၁၀)နံၣ် ဆူဖီခိၣ် (၄၉)ဂၤဒီး ပှၤတ၀ၢပိၥ်မုၣ်ခိၣ်နၢ်လၢအဂၤ(၈)ဂၤပၥ်ဖှိၣ်ခဲလၢၥ်(၅၇)ဂၤလၢအဟ့ၣ်လီၤသးဟူးဂဲၤမၤတၢ်လၢနံၣ်ယံၤ လါအါ တဖၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ဟ့ၣ်လၤကပီၤကညီပိၥ်မုၣ်ခိၣ်နၢ်အဂ့ၢ်အံၤန့ၣ် (KWO)ကရၢခိၣ် နီၢ်ကညီဖီ စံး၀ဲလၢ“ပဟ့ၣ်လၤကပီၤ၀ဲ ကညီပိၥ်မုၣ် ကရၢခိၣ်နၢ်လၢအမၤသကိးတၢ်န့ၢ်အနံၣ်(၃၀) မ့ၢ်ဂ့ၤ, (၂၅)နံၣ်ဆူဖီခိၣ်မ့ၢ်ဂ့ၤ, (၂၀)နံၣ်ဆူဖီခိၣ်, (၁၅)နံၣ်ဆူဖီခိၣ် ဒီး(၁၀)နံၣ်ဆူဖီခိၣ် သ့ၣ်တဖၣ်လီၤ.ဒ်န့ၣ်အသိးပဟ့ၣ်၀ဲဒၣ်တၢ် လၤကပီၤတၢ်ပၥ်ပနီၣ်၀ဲပှၤတ၀ၢပိၥ်မုၣ်ခိၣ်နၢ်(၈)ဂၤ. အ၀ဲသ့ၣ်န့ၣ်မၤတၢ်အကပၤကပၤ မၤတၢ်နံၣ်ယံၤလါယံၤနါက့အ၀ဲသ့ၣ်န့ၣ်တၢ်သ့ၣ်ညါပၥ်ပနီၣ်အီၤဘၣ်.အဃိန့ၣ်ပသ့ၣ်ညါပၥ်ပနီၣ်အီၤလၢမုၢ်တနံၤညါအံၤဒီး ပဟ့ၣ်အီၤ တၢ်လၤကပီၤတၢ်စံးဘျုးစံးဖှိၣ်သ့ၣ်တဖၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်- ကညီတၢ်ကစီၣ်န့ၣ်လီၤ. ပှၤတ၀ၢပိၥ်မုၣ်ခိၣ်နၢ်(၈)ဂၤလၢဒိးန့ၢ်ဘၣ်တၢ်လၤကပီၤသ့ၣ်တဖၣ်န့ၣ်မ့ၢ်၀ဲ ပိၥ်မုၣ်ခိၣ်နၢ်သ့ၣ်တဖၣ်လၢဟူးဂဲၤဖံးတၢ်လၢ ကီၢ်ရ့ၣ်ဒီးဒဲက၀ီၤပူၤဘၣ်ဃး ဆူၣ်ချ့,ကူၣ်သ့,ပှၤဂ့ၢ်၀ီ,ပှၤဟ့ၣ်ကူၣ်ဟ့ၣ်ဖးတၢ်တကပၤသ့ၣ်တဖၣ်န့ၣ်လီၤ. တကးဒံးဘၣ်တၢ်ဟ့ၣ်လၤကပီၤကညီပိၥ်မုၣ်ခိၣ်နၢ်(၅၇)ဂၤအမဲၥ်ညါတၢ်ဟ့ၣ်ဃုၥ်စ့ၢ်ကီး၀ဲတၢ်စံးဘျုးတၢ်ပၥ်ပနီၣ်ဆူ ပှၤနီၢ်တဂၤဒီး တၢ်ကရၢကရိမၤသကိးတၢ်(၅၄)ဒူၣ်န့ၣ်လီၤ. ကရူၢ်ကရၢ(၅၄)ဖုလၢအဒိးန့ၢ်ဘၣ်တၢ်စံးဘျုးပၥ်ပနီၣ်အကျါန့ၣ် ပၣ်ဃုၥ်စ့ၢ်ကီး ခ့ၣ်အဲးစံၣ်-ကညီတၢ်ကစီၣ်လၢအဟူး ဂဲၤဖံးမၤ တၢ်လၢတၢ်ကစီၣ်သန့တကပၤန့ၣ်လီၤ.ဘၣ်ဃးတၢ်ဒိးန့ၢ်ဘၣ်တၢ်ပၥ်ပနီၣ်အံၤန့ၣ် ခ့ၣ်အဲးစံၣ် အဲးဒံးထၢၣ် နါဖီၣ်ဂ့ၤ စံး၀ဲလၢ “ကညီပိၥ်မုၣ်ကရၢအမုၢ်နံၤပှဲၤထီၣ်အနံၣ်(၄၀)တၢ်ရဲၣ်တၢ်ကျဲၤန့ၣ်ပ၀ဲခ့ၣ်အဲးစံၣ်-ကညီတၢ်ကစီၣ်၀ဲၤလီၢ်န့ၣ်တသ့ဖဲအသ့ပမၤသ ကိးတၢ်အဖီခိၣ်န့ၣ်(KWO)ပၥ်ပနီၣ်ပှၤလၢတၢ်စံးဘျုးစံးဖှိၣ်အဃိယပၥ်ကဖၢလၢယသးလၢ(ခ့ၣ်အဲးစံၣ်)ပှၤမၤသကိးတၢ်ဖိခဲလၢၥ်အဂီၢ်လီၤ.ပမၤသကိးတၢ်လၢပှၤတ၀ၢပူၤအံၤယသးမုၥ်သးခုဒိၣ်မးလီၤ.မ့၀ံၤပှၤတ၀ၢပူၤန့ၣ်ပအိၣ်လီၤလီၤဆီဆီတသ့ဘၣ်.ပကဘၣ်မၤသကိးတၢ်လၢသနၢၣ်ဒၣ်၀ဲလီၤ”အဂ့ၢ်န့ၣ် စံး၀ဲန့ၣ်လီၤ. ဒ်န့ၣ်အသိးကညီပိၥ်မုၣ်ကရၢအံၤလၢနံၣ်(၄၀)အတီၢ်ပူၤ မ့ဘၣ်ထိၣ်သတြီၤအပူၤကွံၥ်ဒီးခဲအံၤန့ၣ် ဘၣ်ဃးတၢ်ဆီၣ်တံၢ်မၤနၢၤ, တၢ်ထံၣ်ဆံးသ့ၣ်တဖၣ်ဆံးလီၤစှၤလီၤ၀ဲအသိး တၢ်ဖံးတၢ်မၤစ့ၢ်ကီးအဂံၢ်ဆူၣ်ထီၣ်အါန့ၢ်အလီၢ်အဖီခိၣ်မ့ၢ်တၢ်မၤနၢၤဖးဒိၣ်တခါ အဂ့ၢ်န့ၣ်...
သုးကီၣ်ကးဘိးဘၣ်ရၤလီၤတၢ်ပတုၥ်တၢ်ခးအံၤမ့ၢ်ဒၣ်တၢ်မၤအိၣ်မံၤလီၤအဂ့ၢ်ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဝဲ
လါအ့ဖြ့ၣ် ၇ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ်(သုးက့-၄)ဟီၣ်ကဝီၤအပူၤပယီၤသုးကီၣ်ကးတကပၤဘိးဘၣ်ရၤလီၤဝဲဒၣ်တၢ်ပတုၥ် တၢ်ခးဘၣ်ဆၣ်ဟူးဂဲၤဆဲးမၤဒံးဝဲဒုးယၤတၢ်ဟူးတၢ်ဂဲၤ,လီၤဆီဒၣ်တၢ်ဟဲခးလီၤတၢ်လၢကလံၤကျါအဃိပယီၤသုးဘိးဘၣ်ရၤလီၤဝဲတၢ်ပတုၥ်တၢ်ခးအံၤမ့ၢ်ဒၣ်တၢ်မၤအိၣ်မံၤလီၤအဂ့ၢ်ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဝဲန့ၣ်လီၤ. စးထီၣ်ဖဲလါအ့ဖြ့ၣ်(၂)သီဒီးတုၤလီၤလၢ(၂၂)သီအနံၤအတီၢ်ပူၤန့ၣ်သုးကီၣ်ကးဘိးဘၣ်ရၤလီၤတ့ၢ်ဃၥ်ဝဲတၢ်ပတုၥ်တၢ်ခးအံၤ,စံးဝဲလၢတၢ်ကတိၤစၢၤမၤစၢၤဝဲပှၤလၢအတူၢ်ဘၣ်ဟီၣ်ခိၣ်ဟူးတဖၣ်အဂီၢ်ဒီးတၢ်သူၣ်ထီၣ်ဘှီထီၣ်တၢ်အဂီၢ်ဘၣ်ဆၣ်ပယီၤသုးအံၤအတၢ်မၤအိၣ်န့ၣ်ကမၤဝဲရုၢ်ရုၢ်လီၤအဃိတၢ်ဘိးဘၣ်ရၤလီၤတၢ်ပတုၥ်တၢ်ခးအံၤမ့ၢ်ဒၣ်တၢ်မၤအိၣ်မံၤလီၤအဂ့ၢ်နဲၣ်ရွဲၣ်ပဒိၣ်စီၤအဲၣ်နၤစံးဝဲန့ၣ်လီၤ. "ပယီၤသုးအံၤတမ့ၢ်ပှၤလၢအမၤတၢ်မ့ၢ်တၢ်တီနီဘျီဘၣ်. အတဲဝဲတၢ်ပတုၥ်တၢ်ခးနၥ်က့မ့ၢ်ဒၣ်တၢ်တဲအိၣ်မံၤလီၤ. ဒီးမ့ၢ်ဒၣ်တၢ်မၤပျုၢ်ဝဲ ဒၣ်ထံဂုၤကီၢ်ဂၤလီၤ. မ့မ့ၢ်ပဝဲတၢ်ပၢၢ်ဆၢဖိခီန့ၣ်ပနၥ်ကသ့ဧါ. ပသ့ၣ်ညါလီၤပယီၤသုးအံၤအတၢ်မၤအိၣ်န့ၣ်ကမၤဝဲရုၢ်ရုၢ်န့ၣ်လီၤ." အ ဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. မ့ၢ်ဘၣ်ကွၢ်က့ၤဖဲတၢ်ဘိးဘၣ်ရၤလီၤတၢ်ပတုၥ်တၢ်ခးအလီၢ်ခံဘျံးဒဝဲၢ်ကီၢ်ရ့ၣ်,သုးရ့ၣ်(၁၁)ဟီၣ်ကဝီၤအပူၤတၢ်ဒုးကဲထီၣ်ဝဲလၢပယီၤသုးကီၣ်ကးဒီးကညီဒီကလုၥ်တၢ်ထူၣ်ဖျဲးသုးမုၢ်ဒိၣ်,တၢ်ပၢၢ်ဆၢသုးပၥ်ဖှိၣ်အဘၢၣ်စၢၤဖဲဘျံး-ကီးသီကျဲမုၢ်တကပၤဒီးပယီၤသုးအံၤဟူး ဂဲၤခးလီၤကျိဖးဒိၣ်,တ့ၢ်လီၤဒြိမ့ၣ်ပိၢ်သ့ၣ်တဖၣ်အိၣ်ဝဲအဂ့ၢ်သ့ၣ်ညါဘၣ်ဒ်ကီၢ်ရ့ၣ်တၢ်ပၥ်ဖျါပူၤအသိးန့ၣ်လီၤ. ဒ်န့ၣ်အသိးလၢဘျံးဒဝဲၢ်ကီၢ်ရ့ၣ်,ကစၢၢ်ဒိၣ်ကီၢ်ဆၣ်ဟီၣ်ကဝီၤအပူၤပယီၤသုးကီၣ်ကးသ့ၣ်တဖၣ်ဟူးဂဲၤမၤဝဲဒုးယၤတၢ်ဟူးတၢ်ဂဲၤအိၣ်ဒံးဝဲအဖၢမုၢ်လီၤအဂ့ၢ်န့ၣ်ကီၢ်ဆၣ်အပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်စ့ၢ်ကီးန့ၣ်လီၤ. "မ့မ့ၢ်လၢဒုၣ်ဒါအိၣ်တကပၤတၢ်ဟူးတၢ်ဂဲၤန့ၣ်လဲၤက့ၤလဲၤက့ၤဝဲဒ်န့ၣ်လီၤ. ဘၣ်ဆၣ်သနၥ်က့ပယီၤသုးအံၤအိၣ်လၢအယံၤဒီးနၢ်ဟူတၢ် ကစီၣ်လၢပအိၣ်ဖဲန့ၣ်,ဖဲအံၤဘျီန့ၣ်ခးစိပှၤဒီးကျိဖးဒိၣ်လီၤ. မ့ၢ်ဝံၤန့ၣ်ဟးဃုကွၢ်တၢ်ဒီးဒြိန့ၣ်လီၤ. ပယီၤသုးအံၤအတၢ်ဟူးတၢ်ဂဲၤလၢဒြိ အိၣ်ဒီးကဘီယူၤအိၣ်ဝဲန့ၣ်လီၤ." အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါတနီသရံၣ်ကီၢ်ဆၣ်ဟီၣ်ကဝီၤအပူၤစ့ၢ်ကီးဖဲလါအ့ဖြ့ၣ်(၂)သီအနံၤန့ၣ်ပယီၤသုးကီၣ်ကးဆီလီၤအါထီၣ်ဝဲတၢ်အိၣ်ခိးတြဲၤအလီၢ်(၂)တီၤဒီးဖဲလါအ့ဖြ့ၣ်(၄)သီအနံၤန့ၣ်ပယီၤသုးကဘီယူၤ(K8-W)တဘ့ၣ်ဟဲတ့ၢ်လီၤမ့ၣ်ပိၢ်,ဟဲခးလီၤတၢ်ဖဲမိဒီၢ်ကျဲတၢ် လီၢ်ပူၤအဂ့ၢ်လီၢ်ကဝီၤတၢ်ကစီၣ်သန့တဖၣ်ပၥ်ဖျါဝဲအသိးဖဲတၢ်ပတုၥ်တၢ်ခးအဆၢကတီၢ်ဒၣ်လဲၥ်ပယီၤသုးကျိၤဟဲထီၣ်အိၣ်ဝဲအဂ့ၢ်သ့ၣ်ညါဘၣ်န့ၣ်လီၤ. ဒ်န့ၣ်အသိးဘျံးဒဝဲၢ်ကီၢ်ရ့ၣ်လၢလၢၢ်မုၢ်လါကီၢ်ဆၣ်ဟီၣ်ကဝီၤအပူၤန့ၣ်ဖဲအပူၤကွံၥ်လါအ့ဖြ့ၣ်(၃)သီအနံၤပယီၤသုးဖိအသီ(၆)ဂၤလၢတၢ်ဖီၣ်ဆူၣ်မၢဆူၣ်ကဲသုးသ့ၣ်တဖၣ်ဟဲဃ့ၢ်ပူၤဖျဲးထီၣ်အသးဆူခ့ၣ်အဲၣ်ယူၣ်,ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၁၁)အစုပူၤအိၣ်ဝဲအဂ့ၢ်သ့ၣ်ညါဘၣ်န့ၣ်လီၤ.
(ပရဲလိၥ်ကျိခဲၣ်ဖ့)တၢ်ဒိးန့ၢ်စ့အါန့ၢ်ဒံးတၢ်ပၥ်ပနီၣ်
လါအ့ဖြ့ၣ် ၆ သီ, ၂၀၂၅ နံၣ်, ခ့ၣ်အဲးစံၣ် လၢဒုးယၤအဂီၢ်ဒီးတၢ်ဒီသဒၢကမျၢၢ်အဂီၢ်တၢ်မၤဝဲ(ပရဲလိၥ်ကျိခဲၣ်ဖ့)အံၤစးထီၣ်လၢလါဖ့ၤဘြူၤအါရံၤ(၃)သီအနံၤဒီးတုၤလီၤလၢတၢ်ပျၢ်ဝဲ(ပရဲလိၥ်ကျိခဲၣ်ဖ့)မူးတၢ်ရဲၣ်ကျဲၤလါအ့ဖြ့ၣ်(၅)သီအနံၤလၢ(၂)လါအတီၢ်ပူၤအံၤန့ၣ်တၢ်ဒိးန့ၢ်ဘၣ်ဝဲစ့အါန့ၢ်ဒံးတၢ်ပၥ်ပနီၣ်ဝဲစ့ယိၤ(၃)ကကွဲၢ်အဂ့ၢ်န့ၣ်သ့ၣ်ညါဘၣ်န့ၣ်လီၤ. တၢ်မၤဝဲ(ပရဲလိၥ်ကျိခဲၣ်ဖ့)တၢ်ဃုစ့ပၥ်ကီၤအံၤမ့ၢ်ဒ်သိးတၢ်ကဒုးလီၤပှီၢ်ကွံၥ်ဝဲသုးမီၤစိရိၤသနူ,တၢ်ကမၤပျီကွံၥ်ဝဲသုးမီၤစိရိၤသုးကလၢၤလၢအအိၣ်ဖဲ(ပရဲလိၥ်ကျိ)ဟီၣ်ကဝီၤပူၤတဖၣ်အဂီၢ်ဒီးတၢ်ကဒီသဒၢဝဲကမျၢၢ်ထံဖိကီၢ်ဖိသ့ၣ်တဖၣ်အဂီၢ်အဃိတၢ်ပညိၣ်ပၥ်ပနီၣ်ဝဲစ့ယိၤ(၃)ကကွဲၢ်ဘၣ်ဆၣ်စ့တၢ်ဟဲနုၥ်အံၤအါန့ၢ်ဒံးတၢ်ပညိၣ်အီၤအဃိစံးဘျုးဘၣ်ပှၤကိးဂၤဒဲးလၢပၣ်ဃုၥ်ပၥ်ဂီၢ်လၢခဲၣ်ဖ့တဘျီအံၤပူၤအဂ့ၢ်ပရဲလိၥ်ကျိခဲၣ်ဖ့အပှၤပၢၤလီၢ်ဆ့ၣ်နီၤသရၣ်မုၣ်(နါကၠံၤအ့စွ့ၤ)စံးဝဲန့ၣ်လီၤ. "ပမုၢ်လၢ်လၢပကဟ့ၣ်ဘၣ်တၢ်သးခုကစီၣ်လၢပှၤကိးဂၤဒဲးအအိၣ်လီၤ. လၢပခဲၣ်ဖ့တဘျီအံၤတၢ်ကဲထီၣ်လိၣ်ထီၣ်အိၣ်အ ပတီၢ်ဒ်လဲၣ်မီၤနီၤ. ပမ့ၢ်တဲန့ၣ်ပတၢ်တိၥ်ပၥ်အိၣ်ဝဲစ့ယိၤ(၃)ကကွဲၢ်မီၤနီၤ. တၢ်(၃)ကကွဲၢ်န့ၣ်တမ့ၢ်အနီၣ်ဂံၢ်နီၣ်ဒွးလၢအအါ ဘၣ်, ပမ့ၢ်ကွၢ်က့ၤလၢပတၢ်ဖံးတၢ်မၤဒီတခါဒီးသုးက့ဒီတဘ့ၣ်တၢ်လိၣ်ဘၣ်အဂီၢ်န့ၣ်မီၤနီၤ. ဘၣ်ဆၣ်သနါက့န့ၣ်ပှၤလၢ ဟ့ၣ်တၢ်သ့ၣ်တဖၣ်စ့ၢ်ကီးလၢတၢ်ကီတၢ်ခဲအကလုၢ်ကလုၢ်,အကပၤကပၤအပူၤန့ၣ်ဟ့ၣ်မၤစၢၤပှၤလၢတၢ်သူၣ်အိၣ်သး အိၣ်အပူၤအဃိပတၢ်န့ၣ်ထီၣ်ဘးထီၣ်ဝဲဒၣ်န့ၣ်လီၤ. တၢ်ဝဲအံၤမ့ၢ်တမ့ၢ်လၢသုတၢ်ဟ့ၣ်ဂံၢ်ဟ့ၣ်ဘါန့ၣ်ပ(ပရဲလိၥ်ကျိ)ခဲၣ်ဖ့ အံၤတမ့ၢ်လၢကလဲၤအသးဘၣ်ဘျီဘၣ်ဒါဘၣ်န့ၣ်လီၤ. " အဂ့ၢ်န့ၣ်စံးဝဲန့ၣ်လီၤ. ခဲၣ်ဖ့တဘျီအံၤတၢ်ပညိၣ်ပၥ်ပနီၣ်ဝဲစ့ယိၤ(၃)ကကွၢ်ဘးဒီးဒ်တၢ်ပၥ်ဖျါထီၣ်ဝဲဖဲ(ပရဲလိၥ်ကျိ)ခဲၣ်ဖ့တၢ်ပျၢ်မူးတၢ်ရဲၣ်တၢ်ကျဲၤအပူၤန့ၣ်စ့လၢတၢ်ဒိးန့ၢ်ဘၣ်ဝဲအီၤခဲလၢၥ်အိၣ်ဝဲ(3637120.61)ဘးဒီးမ့မ့ၢ်လၢမျးကယၤန့ၣ်(၁၂၁.၄)မျးကယၤအဂ့ၢ်သ့ၣ်ညါဘၣ်ဝဲန့ၣ်လီၤ. လၢန့ၣ်အမဲၥ်ညါတၢ်မၤဝဲ(ခဲၣ်ဖ့)တၢ်ပျၢ်မူးတၢ်ရဲၣ်တၢ်ကျဲၤဝံၤဝဲလံဘၣ်ဆၣ်စ့လၢအဟဲနုၥ်လီၤအိၣ်ဒံးဝဲအဃိတၢ်ကထၢဖှိၣ်ပၥ်ဖှိၣ်ဝဲစ့စရီမ့ၢ်ဝံၤခဲလၢၥ်န့ၣ်တၢ်ကပၥ်ဖျါထီၣ်န့ၢ်က့ၤဝဲကမျၢၢ်ထံဖိကီၢ်ဖိသ့ၣ်တဖၣ်အဂ့ၢ်(ပရဲလိၥ်ကျိ)ခဲၣ်ဖ့ဒုးသ့ၣ်ညါဝဲဒၣ်န့ၣ်လီၤ. ဒ်န့ၣ်အသိးတၢ်ဒုးအိၣ်ထီၣ်ဝဲ(ပရဲလိၥ်ကျိခဲၣ်ဖ့)အံၤတၢ်ဒုးအိၣ်ထီၣ်ဝဲလၢတၢ်ပညိၣ်(၃)ထံၣ်လၢတၢ်ကဒုးလီၤပှီၢ်ကွံၥ်သုးမီၤစိရိၤသနူဒီးတၢ်ကမၤပျီကွံၥ်ဝဲသုးမီၤစိရိၤသုးကလၢၤဖဲ(ပရဲလိၥ်ကျိ)ဟီၣ်ကဝီၤပူၤတဖၣ်အဂီၢ်,တၢ်ကမၤဆူၣ်ထီၣ်တၢ်ဒီသဒၢကမျၢၢ်ထံဖိကီၢ်ဖိအဂီၢ်ဒီးအလီၢ်ခံကတၢၢ်တထံၣ်မ့ၢ်ဝဲတၢ်ဖီၣ်လိၥ်သးစုမၤသကိးတၢ်ဒီးကလုၥ်ဒူၣ်အဂၤသ့ၣ်တဖၣ်န့ၣ်လီၤ.
ဖၣ်အၣ်ဝ့ၢ်ပူၤသုးကီၣ်ကးအစုတီၤဖီလၥ်ခိၣ်နၢ်တဖၣ်ဟးထၢဝဲဟီၣ်ခိၣ်ဟူးစ့တၢ်မၤဘူၣ်ဃုၥ်ဒီးကမျၢၢ်တၢ်ဘၣ်ကဲသုးမံၤစရီ
လါအ့ဖြ့ၣ် ၇သီ, ၂၀၂၅နံၣ်, ခ့ၣ်အဲးစံၣ်, ကညီကီၢ်စဲၣ်ဖၣ်အၣ်ကီၢ်ရ့ၣ်,ဖၣ်အၣ်ဝ့ၢ်လီၢ်ကဝီၤအပူၤသုးကီၣ်ကးအစုတီၤဖီလၥ်ဟီၣ်ကဝီၤခိၣ်နၢ်ပှၤဘၣ်မူဘၣ်ဒါတဖၣ်အံၤဟးထၢဝဲဟီၣ်ခိၣ်ဟူးစ့မၤဘူၣ်အဆၢကတီၢ်ထၢဃုၥ်ဝဲဒီးကမျၢၢ်တၢ်ဘၣ်ကဲသုးစရီတကတီၢ်ဃီအိၣ်ဝဲအဂ့ၢ်,ဖၣ်အၣ်ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. အပူၤကွံၥ်လါမးရှး(၂၈)သီအနံၤအပူၤ,ဟီၣ်ခိၣ်ဟူးဒိၣ်ဒိၣ်မုၢ်မုၢ်ကဲထီၣ်ဝဲအသးလၢကီၢ်ပယီၤခၢၣ်သးတၢ်လီၢ်တဖၣ်အပူၤအိၣ်ဝဲအဖီခိၣ်လၢတၢ်ကမၤစၢၤဝဲကမျၢၢ်ပှၤဘၣ်ဒိဘၣ်ထံးတဖၣ်အဂီၢ်ဖၣ်အၣ်ဝ့ၢ်ပူၤသုးကီၣ်ကးအစုတီၤဖီလၥ်ကဝီၤဒ့ကရူၢ်ကရၢပှၤဘၣ်မူဘၣ်ဒါသ့ၣ်တဖၣ်အံၤဟးထၢဝဲစ့တၢ်မၤဘူၣ်လၢကဝီၤဒ့တဖၣ်အပူၤအိၣ်ဝဲအဂ့ၢ်,လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ. ဒီးသုးကီၣ်ကးအပှၤတဖၣ်အံၤတနံၤအံၤဖဲမၤဝဲတၢ်ထၢစ့မၤဘူၣ်အဆၢကတီၢ်ထၢဃုၥ်ဝဲတၢ်ဘၣ်ကဲသုးစရီတဘျီဃီအိၣ်ဝဲအသိး,ထၢစ့ၢ်ကီးဝဲတၢ်ဘၣ်ကဲသုးစ့အိၣ်ဝဲအဂ့ၢ်,ဖၣ်အၣ်ဝ့ၢ်ကဝီၤဒ့(၃)လီၢ်ကဝီၤကမျၢၢ်လၢတအဲၣ်ဒိးပၥ်ဖျါမံၤတဂၤစံးဝဲဒၣ်ဒ်အံၤန့ၣ်လီၤ. “တနံၤညါအံၤသုးကီၣ်ကးအစုတီၤဖီလၥ်ပှၤဘၣ်မူဘၣ်ဒါတဖၣ်န့ၣ်ဟဲလၢယဟံၣ်န့ၣ်လီၤ.ဟဲဝဲဒၣ်ဒီးဆ့ကၤဝါထဲကူစိၥ်ဃုၥ်ဒီးတၢ်မၤဘူၣ်ဒၢစတံခွးဝါဝါတဲဝဲဟဲထၢဟီၣ်ခိၣ်ဟူးစ့တၢ်မၤဘူၣ်,ဝံၤတထံၣ်ဃီကၠးဃုၥ်ဝဲဒၣ်ကမျၢၢ်တၢ်ဘၣ်ကဲသုးဒီးထၢဃုၥ်ဝဲစရီအသိးတဲဝဲတၢ်ဘၣ်ဟ့ၣ်တၢ်ဆီၣ်ထွဲမၤစၢၤဆံးအါဆံးအါတဘျီဃီအိၣ်ဝဲန့ၣ်လီၤ.ဖဲယအိၣ်ဆိးဟံၣ်တခီန့ၣ်ကမျၢၢ်တၢ်ဘၣ်ကဲသုးစရီန့ၣ်မၤနီၣ်န့ၢ်ဝဲယၤတဂၤ,မ့မ့ၢ်ပှၤဂၤတခီမၤနီၣ်ဧါတမၤနီၣ်ဧါယတသ့ၣ်ညါဘၣ်.တဲဝဲဟဲတၢ်ဂ့ၢ်တၢ်ကျိၤလၢထၢတၢ်ဘူၣ်နါက့မၤဃုၥ်ဝဲသုးစရီန့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါတၢ်မ့တအဲၣ်ဒိးလဲၤကဲကမျၢၢ်တၢ်ဘၣ်ကဲသုးဘၣ်တခီသုးကီၣ်ကးအံၤစံးဝဲလၢတၢ်ကဘၣ်ဟ့ၣ်ဝဲစ့ဆီၣ်ထွဲမၤစၢၤလၢစ့ပယီၤ(၁၀၀၀၀)ကၠးကိးလါဒဲးအိၣ်ဝဲအဂ့ၢ်,အဝဲစံးဝဲဒၣ်န့ၣ်လီၤ. သုးကီၣ်ကးကမျၢၢ်တၢ်ဘၣ်ကဲသုး(၁၂)ဝီတဝီတၢ်မၤလိအဂီၢ်ဖၣ်အၣ်ဝ့ၢ်လီၢ်ကဝီၤဒီးခိၣ်ဃၢၤကီၢ်ဆၣ်တနီၤအပူၤ,အပူၤကွံၥ်လါမးရှးထီၣ်သီအတီၢ်ပူၤတၢ်ဟးထၢဝဲစရီအိၣ်ဝဲအသိး,တၢ်ဆှၢခီဖျိဝဲလၢလံၥ်က့တဆီအိၣ်စ့ၢ်ကီးဝဲအဂ့ၢ်,သ့ၣ်ညါဘၣ်န့ၣ်လီၤ. ဒီးခီဖျိသုးကီၣ်ကးအံၤမၤဝဲတၢ်ထၢန့ၣ်ဆူၣ်ကိးန့ၢ်ဆူၣ်ကမျၢၢ်တၢ်ဘၣ်ကဲသုးဒ်အံၤအိၣ်ဝဲအဃိ,ကမျၢၢ်သူၣ်ဘီၣ်သးစၢ်ပိၥ်မုၣ်ပိၥ်ခွါဒီးပှၤလၢအသးနံၣ်တၢ်ပၥ်ပနီၣ်ဝဲတဖၣ်ဘၣ်ဃ့ၢ်ထီၣ်အိၣ်ကဒုဝဲအသးဆူတၢ်လီၢ်အဂၤအိၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ. ဘၣ်ဃးဒီးသုးကီၣ်ကးကမျၢၢ်တၢ်ဘၣ်ကဲသုးအံၤ,ကီၢ်ပယီၤအပူၤ(၂၀၂၁)သုးဟံးန့ၢ်တၢ်စိကမီၤအလီၢ်ခံတၢ်စးထီၣ်မၤဝဲဖဲ(၂၀၂၄)လါဖ့ၤဘြူၤအါရံၤအပူၤအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,ကီၢ်ပယီၤဒီတဘ့ၣ်အပူၤသုးကီၣ်ကးမၤဝဲတၢ်ထၢကမျၢၢ်တၢ်ဘၣ်ကဲသုးအံၤန့ၢ်ဝဲတနံၣ်ဘျဲၣ်ဃၣ်ဃၣ်လံဒီးတနံၣ်ဘျဲၣ်အတီၢ်ပူၤဟ့ၣ်ဝဲကမျၢၢ်တၢ်ဘၣ်ကဲသုး,သုးအတၢ်သိၣ်လိအိၣ်ဝဲ(၁၂)ဝီလံအဂ့ၢ်,သ့ၣ်ညါဘၣ်စ့ၢ်ကီးန့ၣ်လီၤ.
ဒ်သိးကသ့ဂုၥ်ထူၣ်ဖျဲးထီၣ်သးဒီးပၣ်ဃုၥ်လၢတၢ်တီခိၣ်ရိၣ်မဲပူၤကသ့အဂီၢ်ကွဲမုၥ်ဘၣ်ကညီပိၥ်မုၣ်ကိးဂၤဒဲးအဂ့ၢ်ကညီပိၥ်မုၣ်ကရၢဆီၣ်တခူထီၣ်
လါအ့ဖြ့ၣ် ၅ သီ, ၂၀၂၅ နံၣ်, ခ့ၣ်အဲးစံၣ် တနံၤအံၤလါအ့ဖြ့ၣ်(၅)သီအနံၤလၢအလီၤဘၣ်ဝဲကညီပိၥ်မုၣ်ကရၢအမုၢ်နံၤဆဲးဆၢပှဲၤထီၣ်ဝဲ(၄၀)ဝီတဝီအံၤအဖီခိၣ်ဒ်သိးပိၥ်မုၣ်သ့ၣ်တဖၣ်ကသ့ဂုၥ်ထူၣ်ဖျဲးထီၣ်အသးဒီးနုၥ်လီၤပၣ်ဃုၥ်လၢတၢ်တီခိၣ်ရိၣ်မဲအပူၤကသ့အဂီၢ်ကညီပိၥ်မုၣ်ကိးဂၤဒဲးကနုၥ်လီၤပၣ်ဃုၥ်မၤသကိးတၢ်ဒီးကညီပိၥ်မုၣ်ကရၢလၢတၢ်ဒုးသ့ထီၣ်ဘၣ်ထီၣ်ပိၥ်မုၣ်အဂ့ၢ်ကညီပိၥ်မုၣ်ကရၢဆီၣ်တခူထီၣ်စံးဝဲန့ၣ်လီၤ. လၢအနံၣ်လွံၢ်ဆံအတီၢ်ပူၤအံၤကညီပိၥ်မုၣ်ကရၢအိၣ်ဒီးတၢ်မၤနၢၤအါမးလၢတၢ်ဒုးပၣ်ဃုၥ်ပိၥ်မုၣ်သးစၢ်သ့ၣ်တဖၣ်လၢကဂဲၤလိၥ်ဒုးန့ၢ်ဝဲမုၣ်ခွါတၢ်တုၤသိးထဲသိး,နီၢ်ကစၢ်တၢ်စံၣ်ညီၣ်ပၢလီၤသးဒီးပၥ်ကဖၢလၢသးလၢမၤစၢၤဆီၣ်ထွဲဘၣ်ဝဲပိၥ်မုၣ်လၢအတူၢ်ဘၣ်တၢ်စုဆူၣ်ခီၣ်တကးလၢနီၢ်ခိ,နီၢ်သးတဖၣ်ကဒိးန့ၢ်ဘၣ်ဝဲတၢ်တီတၢ်တြၢ်ဒီးတၢ်ကတိၤန့ၢ်ခဲးပိၥ်မုၣ်တၢ်ခွဲးတၢ်ယၥ်အဂီၢ်သ့ၣ်တဖၣ်ဘၣ်ဆၣ်တၢ်တၤတၢ်ဒီးပှၤအိၣ်စ့ၢ်ကီးအါမးန့ၣ်လီၤ. တၢ်တၤတၢ်အိၣ်စ့ၢ်ကီးဒီးပှၤအါမးလၢတၢ်သ့သ့ၣ်ညါပၥ်ပနီၣ်ပှၤဒီးပိၥ်မုၣ်တဖၣ်အတၢ်ပၣ်ဃုၥ်ပၣ်ဂီၢ်လၢထံရူၢ်ကီၢ်သဲးပူၤအံၤအဃိပလိၣ်ဘၣ်ဒီးကွဲမုၥ်ဘၣ်ပှၤတဝၢခိၣ်နၢ်,ကရူၢ်ကရၢဒီးလီၤဆီဒၣ်တၢ်ကညီပိၥ်မုၣ်သးစၢ်ကိးဂၤဒဲးကဖီၣ်လိၥ်စုမၤသကိးတၢ်လၢပပှၤတဝၢကဒိးန့ၢ်က့ၤတၢ်တုၤသိးတဲသိး,မုၣ်ခွါတၢ်တုၤသိးထဲသိး,တၢ်တီတၢ်တြၢ်,နီၢ်ကစၢ်တၢ်စံၣ်ညီၣ်ပၢလီၤသးလၢပကီၢ်သူလ့ၤပူၤအံၤအဂ့ၢ်ကညီပိၥ်မုၣ်ကရၢဆီၣ်တခူထီၣ်ဝဲဖဲတနံၤလါအ့ဖြ့ၣ်(၅)သီအနံၤအံၤန့ၣ်လီၤ. ဒ်န့ၣ်အသိးကညီပိၥ်မုၣ်ကရၢ,လၢဆၢကတီၢ်တၢ်လဲၤကျဲအခဲအံၤန့ၣ်တၢ်ဘၣ်ကွၢ်ဆၢၣ်မဲၥ်ဘၣ်ဝဲတၢ်ကီတၢ်ခဲကအိၣ်ဝဲဒၣ်လီၤဘၣ်ဆၣ်ကညီပိၥ်မုၣ်ကရၢခဲလၢၥ်ကအိၣ်ဘၣ်လၢသးတဖျၢၣ်ဃီ,ဂံၢ်ဘါတခါဃီဒီးလၢတၢ်ပညိၣ်တခါဃီအဖီလၥ်န့ၣ်ကဂဲၤလိၥ်ဘၣ်ဒူဒူဒ်ကညီပိၥ်မုၣ်ကရၢခိၣ်နၢ်သ့ၣ်တဖၣ်ဂဲၤလိၥ်တ့ၢ်ဝဲအသိးအဂ့ၢ်ခ့ၣ်အဲၣ်ယူၣ်-နဲၣ်ရွဲၣ်ခိၣ်ကျၢၢ်သဃဲၤ(၂)ပဒိၣ်စီၤလးထိဟ့ၣ်သဆၣ် ထီၣ်ဝဲန့ၣ်လီၤ. "ဆၢကတီၢ်ခဲအံၤလၢပတၢ်ဖံးတၢ်မၤတၢ်လဲၤကျဲအပူၤတၢ်ဘၣ်ကွၢ်ဆၢၣ်မဲၥ်တၢ်ကီတၢ်ခဲသ့ၣ်တဖၣ်န့ၣ်ကအိၣ်ဝဲဒၣ်လီၤ. သနါက့ပက ညီပိၥ်မုၣ်ကရၢသ့ၣ်တဖၣ်ခဲလၢၥ်ကမ့ၢ်ဝဲသးတဖျၢၣ်ဃီ,ကမ့ၢ်ဝဲဂံၢ်ဘါတခါဃီန့ၣ်လီၤ. လၢတၢ်ပညိၣ်ဖီတၢၣ်တခါဃီအဖီလၥ်န့ၣ်ပက ဂဲၤလိၥ်ဒူဒူဒ်ကညီပိၥ်မုၣ်ကရၢခိၣ်နၢ်ဟ့ၣ်လီၤဝဲအသးသမူ,အသွံၣ်အထံဒီးအကပၢၤထံအသိးတက့ၢ်. ကညီပိၥ်မုၣ်ကရၢကအိၣ်ဖျါဒီး အသူးအသ့ၣ်လၢလၢပှဲၤပှဲၤအဂီၢ်ပဆၢမုၢ်လၢ်ဒီးဆၢဂ့ၤဆၢဝါဘၣ်ကိးဒံးနီၢ်ဂၤဒဲးန့ၣ်လီၤ." အဂ့ၢ်စံးဝဲဒၣ်န့ၣ်လီၤ. ကညီပိၥ်မုၣ်ကရၢအံၤအိၣ်ဆၢထၢၣ်လၢကညီပိၥ်မုၣ်တဖၣ်အဖံဘၣ်ခိၣ်ဒီးအစုတီၤလိၤလၢအဝဲသ့ၣ်တဖၣ်ဒုးဒိၣ်ထီၣ်ဒီးသူၣ်ထီၣ်န့ၢ်ဝဲကညီပိၥ်မုၣ်ကရၢအံၤအဃိပသ့ၣ်နီၣ်ပၥ်လၤပၥ်ကပီၤဘၣ်ဝဲပကညီပိၥ်မုၣ်ခိၣ်နၢ်လုၢ်ဒိၣ်ပှ့ၤဒိၣ်လၢအဟ့ၣ်လီၤတ့ၢ်အသးဒ်အမ့ၢ်(ပဒိၣ်နီၢ်စံးဖိရၤစ့ၣ်,ဖံမ့ၤရံၤအိ,ဒီးကထၢၣ်ပဒိၣ်နီၢ်ဘျုမ့နဲးစၣ်,သရၣ်မုၣ်ဖီလွဲ,ပဒိၣ်နီၢ်လၣ်ဖိ,သရၣ်မုၣ်ၡံရၢ်,သရၣ်မုၣ်လ့ဒယၢ်တၢ်မျၢ်ဝါဒီးသရၣ်မုၣ်နါဒါအဲၣ်ကျၢၤ)သ့ၣ်တဖၣ်န့ၣ်လီၤ. ကညီပိၥ်မုၣ်ကရၢအံၤဘၣ်တၢ်ဒုးအိၣ်ထီၣ်ကဒါက့ၤဝဲဖဲ(၁၉၈၅)နံၣ်ဒီးဒ်န့ၣ်အသိးကညီပိၥ်မုၣ်ကရၢအိၣ်ဝဲဒီးဝဲၤကျိၤလွံၢ်ဘိဒီးတၢ်ဟူးတၢ်ဂဲၤခိၣ်သ့ၣ်(၃)ခါလၢအမ့ၢ်တၢ်သူၣ်ထီၣ်တၢ်သ့တၢ်ဘၣ်ကံၢ်စီလၢပိၥ်မုၣ်ဒီးပှၤတဝၢအဂီၢ်, ကတိၤန့ၢ်ခဲးတၢ်ဒီးဟ့ၣ်တၢ်ဆီၣ်ထွဲမၤ စၢၤလီၤဆီဒၣ်ပိၥ်မုၣ်ဒီးဖိသၣ်,မၤဒိၣ်ထီၣ်ပိၥ်မုၣ်တဖၣ်အကလုၢ်ဒ်သိးတၢ်ကနၢ်ဟူပိၥ်မုၣ်ကလုၢ်တၢ်လိၣ်ဘၣ်သ့ၣ်တဖၣ်ဒီးမၤလိၣ်ထီၣ်ဖးထီၣ်အီၤန့ၣ်လီၤ.
ပယီၤသုးဖိအသီ(၆)ဂၤလၢတၢ်မၢဆူၣ်ကဲသုး ဟဲဃ့ၢ်ဖျိးထီၣ်ဆူခ့ၣ်အဲၣ်ယူၣ်(သုးက့-၄)အစုပူၤ
လါအ့ဖြ့ၣ် ၅ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢဘျံးဒဝဲၢ်ကီၢ်ရ့ၣ်,လၢၢ်မုၢ်လါကီၢ်ဆၣ်ဟီၣ်ကဝီၤအပူၤဖဲအပူၤကွံၥ်လါအ့ဖြ့ၣ်(၃)သီအနံၤန့ၣ်ပယီၤသုးဖိ အသီ(၆)ဂၤလၢတၢ်ဖီၣ်ဆူၣ်မၢဆူၣ်ကဲသုးသ့ၣ်တဖၣ်ဟဲဃ့ၢ်ပူၤဖျဲးထီၣ်အသးဆူခ့ၣ်အဲၣ်ယူၣ်,ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးရ့ၣ်(၁၁)အစုပူၤအဂ့ၢ်သ့ၣ်ညါဘၣ်န့ၣ်လီၤ. ပယီၤသုးဖိအသီ(၆)ဂၤလၢဃ့ၢ်ပူၤဖျဲးထီၣ်အသးသ့ၣ်တဖၣ်အံၤမ့ၢ်ဝဲသုးကီၣ်ကးခီၣ်သုးရ့ၣ်(ခလရ-၁၇)အပှၤသ့ၣ်တဖၣ်ဒီးမ့ၢ်ပှၤလၢ သုးကီၣ်ကးဖီၣ်ဆူၣ်မၢဆူၣ်နုၥ်လီၤထီၣ်ဝဲသုးတၢ်မၤလိနီၣ်ဂံၢ်(၈)ဝီတဝီဝံၤဆှၢထီၣ်ဝဲဆူတၢ်မဲၥ်ညါသုးအအိၣ်ဒီးမ့ၢ်လၢပှၤသ့ၣ်တဖၣ်အံၤတသးအိၣ်ကဲသုးဘၣ်အဃိဃ့ၢ်ပူၤဖျဲးထီၣ်အသးဒ်အံၤလီၤအဂ့ၢ်ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဝဲဒ်အံၤန့ၣ်လီၤ. "ပယီၤသုးလၢအဃ့ၢ်ဖျိးထီၣ်ဝဲသ့ၣ်တဖၣ်အံၤတမ့ၢ်အသးအိၣ်မၤသုးဘၣ်. တနီၤန့ၣ်ဟးဒီးပှၤဖီၣ်ဆူၣ်အီၤလၢကျဲပူၤဒီးတနီၤန့ၣ်လဲၤ မၤတၢ်လၢကီၢ်ကၠီၣ်တဲၣ်,ကၠီၣ်တဲၣ်ပၢၤကီၢ်ဖီၣ်အဝဲသ့ၣ်ဒီးဆှၢက့ၤဝဲဆူကီၢ်ပယီၤဒီးပယီၤသုးဖီၣ်ဆူၣ်အဝဲသ့ၣ်ဝံၤမၢကဲသုးန့ၣ်လီၤ. တၢ်မၢအဝဲသ့ၣ်ကဲသုးဒီးထီၣ်တၢ်မၤလိ,အဝဲသ့ၣ်ထီၣ်တၢ်မၤလိစံၣ်လီၤဒီးတၢ်မၢအဝဲသ့ၣ်ဟဲထီၣ်ဆူတၢ်မဲၥ်ညါသုးအအိၣ်မီၤနီၤ. မ့ၢ် လၢအဝဲသ့ၣ်န့ၣ်တသးအိၣ်မၤသုးဘၣ်အဃိဖဲအဝဲသ့ၣ်ဟဲထီၣ်လၢတၢ်မဲၥ်ညါအဆၢကတီၢ်ဒီးဃ့ၢ်ဖျိးထီၣ်ဝဲလီၤ." အဂ့ၢ်စံးဘၣ်ခ့ၣ်အဲး စံၣ်-ကညီတၢ်ကစီၣ်န့ၣ်လီၤ. ပယီၤသုးခီၣ်သုးရ့ၣ်(၁၇)အပှၤသီ(၆)ဂၤလၢဟဲဃ့ၢ်ပူၤဖျဲးထီၣ်အသးလၢ သုးက့-၄, သုးရ့ၣ်-၁၁ အစုပူၤသ့ၣ်တဖၣ်အံၤမ့ၢ်ဝဲ သုးဖိ ယဲဝ့ထိၣ်, သုးဖိအ့ၤအဲ, သုးဖိမၠ့ၣ်လွ့ၤ, သုးဖိအီၤမၠ့ၣ်လ့, သုးဖိမိထဲၣ်, သုးဖိယဲထဲၣ်သ့ၣ်တဖၣ်ဒီးလၢအကျါတနီၤန့ၣ်လဲၤထီၣ်မၤ တၢ်လၢကီၢ်ကၠီၣ်တဲၣ်ပူၤလၢတဖိးသဲးစးဘၣ်အဃိကၠီၣ်တဲၣ်ပၢၤကီၢ်ဖီၣ်ဝဲဝံၤဆှၢလီၤက့ၤဝဲဆူ(ကီၢ်သီဝ့ၢ်)တဆီပယီၤသုးဖီၣ်န့ၢ်ဆူဝဲသုးဒ်အံၤလီၤအဂ့ၢ်သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါပယီၤသုးကီၣ်ကးခီၣ်သုးရ့ၣ်(ခလရ-၁၇)အံၤလၢအပူၤကွံၥ်အဆၢကတီၢ်တၢ်ဒုးဟးဂီၤကွံၥ်ဝဲအီၤဒီတရ့ၣ်အဂ့ၢ်သ့ၣ် ညါဘၣ်အသိးအခဲအံၤလၢပယီၤသုးရ့ၣ်ဝဲန့ၣ်အပူၤပှၤအါဒၣ်တက့ၢ်မ့ၢ်ဝဲပှၤအသီဖိသ့ၣ်တဖၣ်အဂ့ၢ်န့ၣ်သ့ၣ်ညါဘၣ်လၢကီၢ်ရ့ၣ်အပှၤဘၣ်မူဘၣ်ဒါအအိၣ်န့ၣ်လီၤ. ဒီးတကတီၢ်ဃီဖဲမဟါလါအ့ဖြ့ၣ်(၄)သီအနံၤမုၢ်ထူၣ်(၁၂)နၣ်ရံၣ်ဘျဲၣ်အဆၢကတီၢ်န့ၣ်ပယီၤသုးကီၣ်ကးကဘီယူၤ(K8-W)တဘ့ၣ် ဟဲတ့ၢ်လီၤမ့ၣ်ပိၢ်ဖဲတနီသရံၣ်ကီၢ်ဆၣ်,မိဒီၢ်ကျဲ,ဖဲသံခိသဝီအဃၢၤတဘျီ,ခးလီၤဃုၥ်ဝဲကျိစ့ၢ်ကီးအဂ့ၢ်ကီၢ်ရ့ၣ်အပှၤဘၣ်မူဘၣ်ဒါစံးဝဲန့ၣ်လီၤ.
သုးကီၣ်ကးဘိးဘၣ်ရၤလီၤကပတုၥ်တၢ်ခးတစိၢ်တလီၢ်အဖီခိၣ်အံၤတၢ်နၥ်အီၣ်တအိၣ်ဘၣ်အဂ့ၢ် စံး၀ဲ
လါအ့ဖြ့ၣ် ၄ သီ, ၂၀၂၅ နံၣ်, ခ့ၣ်အဲးစံၣ် သုးကီၣ်ကးအံၤလၢတၢ်ကမၤစၢၤ၀ဲဟီၣ်ခိၣ်ဟူးပှၤဘၣ်ကီဘၣ်ခဲဖိတဖၣ်အဂီၢ် လါအ့ဖြ့ၣ် ၂ သီ တုၤ ၂၂ သီ လၢအသီ(၂၀)အတီၢ်ပူၤ ဘိးဘၣ်ရၤလီၤ၀ဲလၢကပတုၥ်ဆိဃၥ်၀ဲတၢ်ခးတစိၢ်တလီၢ်အံၤဖဲလါအ့ဖြ့ၣ် ၂ သီအနံၤဒီး ဘၣ်ဆၣ်အတၢ်ဘိးဘၣ်ရၤလီၤအဖီခိၣ်အံၤ တၢ်နၥ်အီၣ်အီၤတအိၣ်၀ဲဘၣ်အဂ့ၢ်န့ၣ် ကရူၢ်ကရၢတဖၣ်စံး၀ဲန့ၣ်လီၤ. သုးကီၣ်ကးအံၤစးထီၣ်ဖဲအဘိးဘၣ်ရၤလီၤလၢကပတုၥ်ဆိဃၥ်တၢ်ခး၀ံၤလီၢ်ခံမုၢ်ဆ့ၣ်ထီၣ်တုၤလၢခဲအံၤန့ၣ် သူ၀ဲကျိ ဖးဒိၣ်, ဒြိ,ကဘီယူၤဟးခးလီၤ၀ဲတၢ်လၢတၢ်လီၢ်သကုၤဆးဒးပူၤအဃိ ဖဲန့ၣ်တၢ်သံဘၣ်ဒိဘၣ်ထံး,တၢ်ဟးဂူၥ်ဟးဂီၤစ့ၢ်ကီး ကဲထီၣ် ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးသုးကီၣ်ကးအဘိးဘၣ်ရၤလီၤအဖီခိၣ်အံၤထံကီၢ်စှၤကိၥ်ဘ့ၣ်ကသးမံထွဲ၀ဲဘၣ်ဆၣ် ထံကီၢ်လၢအဂၤတဖၣ် ကအိၣ် ကွၢ်အ၀ဲသ့ၣ်အခီၣ်ခါဒီးဒ်န့ၣ်အသိးသုးကီၣ်ကးအံၤတမ့ၢ်စ့ၢ်ကီးပှၤလၢအသးစၢၢ်စၢ၀ဲတၢ်ပတုၥ်တၢ်ခးအံၤဘၣ်အဂ့ၢ်န့ၣ် Burma Campaign UK ပှၤနဲၣ်တၢ် နၣ်စိၤယၤဖါ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. “ဖဲကီၢ်ပယီၤဘၣ်ကွၢ်ဆၢၣ်မဲၥ်၀ဲတၢ်အိၣ်ဒ်အံၤအဆၢကတီၢ်န့ၣ်တၢ်ပၢၢ်ဆၢကရူၢ်ကရၢတနီၤပၥ်ဖျါထီၣ်၀ဲလၢကပတုၥ်ဃၥ်တၢ်ခးတစိၢ်တလီၢ်မီၤနီၤ.ဖဲန့ၣ်သုးမီၤစိရိၤနါက့ဘိးဘၣ်ရၤလီၤ၀ဲလၢကပတုၥ်ဃၥ်တၢ်ခးတစိၢ်တလီၢ်မီၤနီၤ.ပမ့ကွၢ်ဒ်သိးရရှါဒီးတရူးန့ၣ်ကသးမံ၀ဲလၢသုးမီၤစိရိၤအတၢ်အံၤလီၤ.ဘၣ်ဆၣ်ယဆိမိၣ်ထံဂုၤကီၢ်ဂၤလၢအဂၤတဖၣ်န့ၣ်ကဆဲးကွၢ်၀ဲအခီၣ်ခါလီၤ.မ့မ့ၢ်၀ဲဒၣ်ဒုလၢပတၢ်လဲၤခီဖျိအဖီခိၣ်န့ၣ်သုးမီၤစိရိၤအံၤတမ့ၢ်အသးစၢၢ်စၢ၀ဲဒၣ်တၢ်ပတုၥ်တၢ်ခးမူၤမူၤနီၢ်နီၢ်ဘၣ်.အ၀ဲသ့ၣ်ကတိၤထီၣ်တၢ်ဒ်အံၤကမ့ၢ်လၢတၢ်အိၣ်သးဒီးတၢ်ဆီၣ်သနံးအဖီခိၣ်လီၤ.အ၀ဲသ့ၣ်ရၤလီၤ၀ဲလၢကပတုၥ်တၢ်ခး၀ံၤအ၀ဲသ့ၣ်ကဘီယူၤန့ၣ်လဲၤခးလီၤတၢ်လၢတၢ်လီၢ်အါတီၤအပူၤလီၤ”အဂ့ၢ်န့ၣ် စံး၀ဲန့ၣ်လီၤ. တကးဒံးဘၣ်လၢန့ၣ်အမဲၥ်ညါဖဲဟီၣ်ခိၣ်ဟူးကမျၢၢ်ထံဖိကီၢ်ဖိဘၣ်ကွၢ်ဆၢၣ်မဲၥ်၀ဲတၢ်သံတၢ်ပှၢ်,တၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤ ဒိၣ်ဒိၣ်မုၢ်မုၢ်အကတီၢ်အံၤန့ၣ် သုးကီၣ်ကၣ်အံၤတဟ့ၣ်၀ဲတၢ်ဆီၣ်ထွဲမၤစၢၤအမဲၥ်ညါမၤတံၥ်တၥ်၀ဲကရူၢ်ကရၢလၢ အလဲၤဟ့ၣ် မၤစၢၤတၢ်တဖၣ်အိၣ်၀ဲန့ၣ်လီၤ. အဃိဒ်သိးတၢ်ဆီၣ်ထွဲမၤစၢၤကတုၤဃီၤလိၤလိၤဆူကမျၢၢ်လၢအတူၢ်ဘၣ်တၢ်တဖၣ်အစုပူၤအဂီၢ် (Burma Campaign UK) ပၥ်ဖျါထီၣ်ထံဂုၤကီၢ်ဂၤတဖၣ်လၢကဆှၢဃီၤတၢ်ဆီၣ်ထွဲမၤစၢၤဆူကလုၥ်ဒူၣ်တၢ်ပၢၢ်ဆၢကရူၢ်ကရၢဒီးပှၤတ၀ၢတၢ်ကရၢကရိ အစုပူၤအဂ့ၢ်န့ၣ် နၣ်စိၤယၤဖါ စံးအါထီၣ်၀ဲန့ၣ်လီၤ. ဒ်န့ၣ်အသိးဖဲလၢကမျၢၢ်ထံဖိကီၢ်ဖိဘၣ်ကွၢ်ဆၢၣ်မဲၥ်တၢ်နးတၢ်ဖှီၣ်အကလုၥ်ကလုၥ်အတီၢ်ပူၤအံၤ သုးကီၣ်ကးဘိးဘၣ်ရၤလီၤ လၢကပတုၥ်တၢ်ခးအိၣ်၀ဲဘၣ်ဆၣ်မၤဒံး၀ဲတၢ်ထီၣ်ဒုးလၢတၢ်လီၢ်အါတီၤအပူၤတုၤလၢခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ဘၣ်ဃးတၢ်ဂ့ၢ်အံၤ ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲလၢ“၀ဲဒၣ်ဒုပအိၣ်လၢတၢ်ပလီၢ်ပဒီပူၤလီၤ. ပတနၥ်အီၣ်အီၤဘၣ်.သုးကီၣ်ကးန့ၣ်မၤ၀ဲဒ်သိးအ(image)ကဂ့ၤလၢထံဂုၤကီၢ်ဂၤအမဲၥ်ညါလီၤ.တကးဒံးဘၣ်ဟံန့ၢ်၀ဲတၢ်ခွဲးတၢ်ယၤ.တဲ၀ဲလၢတၢ်ပတုၥ်တၢ်ခးဘၣ်ဆၣ်ကတီၤအသးဆူသုးဂံၢ်ဘါလီၤ.၀ံၤဒီးအတၢ်ဖံးတၢ်မၤအိၣ်လၢကမၤထီဒါကမျၢၢ်မ့ၢ်ဂ့ၤ,ကထီၣ်ဒုးတၢ်ပၢၢ်ဆၢကရူၢ်အိၣ်တၢ်လီၢ်န့ၣ်ကဆဲးမၤ၀ဲဒ်လၢညါ အသိးလီၤ.”...
သုးကီၣ်ကးပတုၥ်ဆိဃၥ်တၢ်ခးအတီၢ်ပူၤ ထီၣ်ခး၀ဲတၢ်လၢဘျံးဒ၀ဲၢ်ကီၢ်ရ့ၣ်ဟီၣ်က၀ီၤဒီးမၤအါထီၣ်သုးဂံၢ်ဘါ
လါအ့ဖြ့ၣ် ၄ သီ, ၂၀၂၅ နံၣ်, ခ့ၣ်အဲးစံၣ် သုးကီၣ်ကးအံၤဘိးဘၣ်ရၤလီၤ၀ဲလၢကပတုၥ်ဆိဃၥ်တၢ်ခးတစိၢ်တလီၢ်ဘၣ်ဆၣ်ဘိးဘၣ်ရၤလီၤ၀ဲ၀ံၤမုၢ်ဆ့ၣ်ထီၣ်လါမးရှး ၃ သီန့ၣ် လဲၤခး၀ဲတၢ်လၢခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄) ဟီၣ်က၀ီၤပူၤဒီး မၤအါထီၣ်၀ဲသုးဂံၢ်ဘါ လၢဟီၣ်က၀ီၤ၀ဲန့ၣ်အပူၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. လၢတနီသရံၣ်ကီၢ်ဆၣ် ဘျံးဒီးကီၢ်သီကျဲမုၢ် (၇၄)မံးလၥ်တၢ်လီၢ်န့ၣ် ဖဲမဟါလါအ့ဖြ့ၣ် ၃ သီ ဂီၤခီအဆၢကတီၢ်န့ၣ် ပယီၤသုးလဲၤ တ့ၢ်လီၤ၀ဲဒြိမ့ၣ်ပိၢ် တကးဒံးဘၣ်အမဲၥ်ညါခးလီၤ၀ဲကျိဖးဒိၣ်ဆူဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၁၁)တၢ်လီၢ် အဂ့ၢ်န့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲန့ၣ်လီၤ. “ဖဲတနံၤအံၤလါအဖြ့ၣ် ၃ သီန့ၣ် ပယီၤသုးန့ၣ်ဟဲကွံၥ်လီၤပပှၤသုးဒီးဒြိမီၤနီၤ. ဟဲကွံၥ်လီၤ၀ဲဖဲ(၇၄)မံးလၥ်န့ၣ်.အ၀ဲန့ၣ်အိၣ်ဖဲကီၢ်သီဒီး ဘျံး အကျဲ ဖဲသုးရ့ၣ်(၁၁)ဟီၣ်.တကးဒံးဘၣ်န့ၣ်အခးလီၤကျိဖးဒိၣ်စ့ၢ်.မ့၀ံၤအသုးလၢခီၣ်တကပၤန့ၣ်ထီၣ်မၤအါထီၣ်အဂံၢ်ဘါလၢပပှၤသုးဖိ အိၣ်တၢ်လီၢ်န့ၣ်.၀ံၤလၢကထီၣ်ဒုးပှၤအဂီၢ်န့ၣ်မၤအါထီၣ်အပှၤကအိၣ်လၢအဂၤ(၄၀)(၅၀)ညါ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲမဟါအနံၤန့ၣ်လီၤ. သုးကီၣ်အံၤလၢတၢ်ကမၤစၢၤ၀ဲဟီၣ်ခိၣ်ဟူးပှၤဘၣ်ကီဘၣ်ခဲဖိတဖၣ်အဂီၢ် စးထီၣ်ဖဲလါအ့ဖြ့ၣ် ၂ သီတုၤ ၂၂ သီ လၢအသီ(၂၀)အတီၢ်ပူၤ ဘိးဘၣ်ရၤလီၤ၀ဲလၢကပတုၥ်ဆိဃၥ်၀ဲတၢ်ခးတစိၢ်တလီၢ်အံၤန့ၣ်လီၤ. ဘၣ်ဆၣ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ်အမဲၥ်ညါ ဖဲမဟါလါမးရှး ၃ သီအနံၤ သုးကီၣ်ကးအံၤသူ၀ဲကျိဖးဒိၣ်,ကဘီယူၤလဲၤခးလီၤဆူ စကဲ, ကခၠ့ၣ်ကီၢ်စဲၣ်ဃုၥ်ဒီးတၢ်လီၢ်လၢအဂၤတဖၣ်အိၣ်၀ဲအဂ့ၢ်န့ၣ် တၢ်ကစီၣ်သန့တဖၣ်ပၥ်ဖျါထီၣ်၀ဲအိၣ်န့ၣ်လီၤ. ဒ်န့ၣ်အသိးဖဲလါအ့ဖြ့ၣ် ၂ သီ ဟါခီ...
သုးကီၣ်ကးဘိးဘၣ်ရၤလီၤတၢ်ပတုၥ်တၢ်ခးဘၣ်ဆၣ်ခးလီၤကျိဖးဒိၣ်လၢကမျၢၢ်ဒူသဝီပူၤအဖၢမုၢ်,ကမျၢၢ်ဘၣ်ဒိကဒီး(၁)ဂၤ
လါအ့ဖြ့ၣ် ၄ သီ, ၂၀၂၅ နံၣ်, ခ့ၣ်အဲးစံၣ် သုးကီၣ်ကးတကပၤဘိးဘၣ်ရၤလီၤဝဲတၢ်ပတုၥ်တၢ်ခးလၢအသီ (၂၀)အတီၢ်ပူၤဘၣ်ဆၣ်သုးကီၣ်ကးအံၤဟူးဂဲၤခးလီၤကျိဖးဒိၣ်ဒီးသူဝဲကလံၤကျါတၢ်ဒုးလၢကမျၢၢ်ဒူသဝီပူၤအဖၢမုၢ်ဒီးကမျၢၢ်ဘၣ်ဒိကဒီး(၁)ဂၤအဂ့ၢ်န့ၣ်ခ့ၣ်အဲၣ်ယူၣ်လီၢ်ခၢၣ်သးထုးထီၣ်ပၥ်ဖျါဝဲဖဲတနံၤလါအ့ဖြ့ၣ်(၄)သီအနံၤန့ၣ်လီၤ. လၢတၢ်ကတိစၢၤမၤစၢၤပှၤတူၢ်ဘၣ်ဟီၣ်ခိၣ်ဟူးတဖၣ်ဒီးလၢတၢ်ကသူၣ်ထီၣ်ဘှီထီၣ်က့ၤဝဲတၢ်အဂီၢ်ဖဲလါအ့ဖြ့ၣ်(၂)သီအနံၤသုးကီၣ်ကးဘိးဘၣ်ရၤလီၤဝဲတၢ်ပတုၥ်တၢ်ခးဘၣ်ဆၣ်ဖဲလါအ့ဖြ့ၣ်(၃)သီအနံၤလၢခ့ၣ်အဲၣ်ယူၣ်-ကီၢ်သူလ့ၤတၢ်ပၢဟီၣ်ကဝီၤချၢၣ်လွံၢ်ထူၣ် ကီၢ်ရ့ၣ်အပူၤ,မူကီၢ်ဆၣ်,ဟီၣ်ခိၣ်ဂီၤသဝီအပူၤန့ၣ်ပယီၤသုးကီၣ်ကးခးလီၤကျိဖးဒိၣ်အဃိဘၣ်ဒိဝဲပှၤပိၥ်မုၣ်သးစၢ်နီၢ်ခုၣ်ခုၣ်သးနံၣ်(၂၄)နံၣ်တဂၤအဂ့ၢ်န့ၣ်ခ့ၣ်အဲၣ်ယူၣ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. ဘၣ်ထွဲဒီးပယီၤသုးကီၣ်ကးဘိးဘၣ်ရၤလီၤတၢ်ပတုၥ်တၢ်ခးအံၤဝံၤအလီၢ်ခံချၢၣ်လွံၢ်ထူၣ်ကီၢ်ရ့ၣ်ဟီၣ်ကဝီၤအပူၤပယီၤသုးကီၣ်ကးတၢ်အိၣ်သးအိၣ်ဝဲဒ်လဲၣ်န့ၣ်လၢၢ်ဒိၣ်ကီၢ်ဆၣ်အပှၤကတိၤတၢ်ပၢပဒိၣ်စီၤဝါမုၢ်စံးဝဲဒ်အံၤန့ၣ်လီၤ. "ပလၢၢ်ဒိၣ်ကီၢ်ဆၣ်ဟီၣ်ကဝီၤအပူၤန့ၣ်ဘၣ်ထွဲဒီးဒုၣ်ဒါကပတုၥ်တၢ်ခး,ကပတုၥ်တၢ်ဟူးတၢ်ဂဲၤန့ၣ်အတဲဝဲဒီးအမၤဝဲန့ၣ်တပိၥ်လိၥ်အခံနီတဘျီဘၣ်. တၢ်နၥ်န့ၢ်တၢ်စ့ၢ်ကီးတအိၣ်လၢၤဘၣ်. ဘၣ်မနုၤလဲၣ်န့ၣ်ပကွၢ်က့ၤအဝဲသ့ၣ်ခးလီၤကျိဖးဒိၣ်ကိးမုၢ်နံၤဒီးပကမျၢၢ်ထံဖိ ကီၢ်ဖိတၢ်အိၣ်ယၢၤ,ဟံၣ်ဃီဒီးတၢ်ဘၣ်ဒိဘၣ်ထံးအိၣ်ဝဲထီဘိန့ၣ်လီၤ. ဒ်န့ၣ်အသိးကလံၤကျါတၢ်ဟူးတၢ်ဂဲၤလၢအမ့ၢ်ကဘီယူၤနါက့ အိၣ်ဝဲကိးနံၤဒဲးလီၤ. အဃိန့ၣ်သုးကီၣ်ကးအံၤတဲဝဲဒီးမၤဝဲန့ၣ်တပိၥ်လိၥ်အခံဘၣ်." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ် လီၤ. လၢန့ၣ်အမဲၥ်ညါဒ်တၢ်ပၥ်ဖျါပူၤအသိးပယီၤသုးကီၣ်ကးအံၤဖဲလါအ့ဖြ့ၣ်(၂)ဒီး(၃)သီအနံၤန့ၣ်ခးလီၤကျိဖးဒိၣ်ဖးဒိၣ်လၢချၢၣ်လွံၢ်ထူၣ်ကီၢ်ရ့ၣ်မူကီၢ်ဆၣ်ဒီးဆီထံးကီၢ်ဆၣ်ပူၤဒ်အံၤအဖီခိၣ်ကမျၢၢ်ဟံၣ်ဃီဘၣ်ဒိဘၣ်ထံးဝဲတကးဒံးဘၣ်ဘၣ်ဒိစ့ၢ်ကီးဝဲ(ဟီၣ်ခိၣ်ဂီၤ)သဝီဖိပိၥ်မုၣ်သးစၢ်တဂၤအဂ့ၢ်န့ၣ်သ့ၣ်ညါဘၣ်န့ၣ်လီၤ. ဒ်န့ၣ်အသိးတမ့ၢ်ထဲချၢၣ်လွံၢ်ထူၣ်ကီၢ်ရ့ၣ်တဘ့ၣ်ဧိၤဘၣ်,လၢဘျံးဒဝဲၢ်ကီၢ်ရ့ၣ်(သုးက့-၄)ဒီးမုၢ်တြီၢ်ကီၢ်ရ့ၣ်(သုးက့-၅)အပူၤစ့ၢ်ကီးပယီၤ သုးကီၣ်ကးအံၤခးလီၤကျိဖးဒိၣ်ဒီးသူဝဲကလံၤကျါကဘီယူၤဟဲတ့ၢ်လီၤမ့ၢ်ပိၢ်အဃိပှၤကမျၢၢ်လၢအမ့ၢ်ဖိဒံးဖိသၣ်ဘၣ်သံအိၣ်ထီၣ်တ့ၢ်ဝဲအဂ့ၢ်န့ၣ်လီၢ်ကဝီၤပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. လၢတၢ်န့ၣ်အဃိဖဲကမျၢၢ်ဘၣ်ကွၢ်ဆၢၣ်မဲၥ်ဘၣ်ဝဲန့ဆၢၣ်တၢ်တတၢတနါအဆၢကတီၢ်ဒၣ်လဲၥ်ပယီၤသုးအံၤသူဝဲကလံၤကျါကဘီယူၤ,ဒြိသ့ၣ်တဖၣ်ဟးတ့ၢ်လီၤမ့ၣ်ပိၢ်တကးဒံးဘၣ်ဒ်အခဲအံၤဘိးဘၣ်ရၤလီၤဝဲတၢ်ပတုၥ်တၢ်ခးအံၤအဆၢကတီၢ်န့ၣ်ခးလီၤကျိဖးဒိၣ်အိၣ်ဒံးဝဲအဖၢမုၢ်အဃိကမျၢၢ်သ့ၣ်တဖၣ်ဘၣ်အိၣ်ဘၣ်ဆိးလၢတၢ်ပျံၤတၢ်ဖုးတၢ်ဘၣ်ယိၣ်အပူၤထီဘိဒံးအဂ့ၢ်န့ၣ်ခ့ၣ်အဲၣ်ယူၣ်ပၥ်ဖျါထီၣ်ဝဲန့ၣ်လီၤ.