DKBA ခိၣ်နၢ်ဒိၣ်ထီတနီၤတၢ်ဆီတလဲအိၣ်ထီၣ်
လါဒံၣ်စဲဘၢၣ် ၄သီ, ၂၀၂၄နံၣ်, ခ့ၣ်အဲးစံၣ် ဒံၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ် DKBA ခိၣ်နၢ်ဒိၣ်ထီတနီၤဘၣ်တၢ်သုးထီၣ်အဝဲသ့ၣ်လီၢ်လၤဒီးမူဒါအဂ့ၢ် DKBA လီၢ်ခၢၣ်သးထုးထီၣ်ပၥ်ဖျါဝဲဖဲလါဒံၣ်စဲဘၢၣ် ၃သီအနံၤန့ၣ်လီၤ. ဖဲလါဒံၣ်စဲဘၢၣ်(၃)သီအနံၤ DKBAလီၢ်ခၢၣ်သးတၢ်မၤကမံးတံၥ်မၤဝဲတၢ်အိၣ်ဖှိၣ်ဒီး ဒ်လီၢ်ခၢၣ်သးတၢ်မၤကမံးတံၥ်အတၢ်ဆၢတဲၥ်အိၣ်ဝဲအသိး,DKBA ခိၣ်နၢ်လၢတၢ်သုးထီၣ်လီၢ်လၤသ့ၣ်တဖၣ်န့ၣ်, ကျိၣ်ထူဘီလီၢ်ခၢၣ်သးသုးက့ခိၣ် သုးခိၣ်ကျၢၢ်ဖိစီၤစွ့ၣ်ဝၣ်န့ၣ်ဘၣ်တၢ်သုးထီၣ်အီၤလၢ DKBA သုးရိၣ်မဲခိၣ်ကျၢၢ်(၂) သုးခိၣ်ကျၢၢ်စိအဂ့ၢ်,ခီၣ်တဃၥ်ဒုးယၤခိၣ် သုးခိၣ်ဒိၣ်စိ စီၤဆါအီၣ်န့ၣ် ဘၣ်တၢ်သုးထီၣ်အီၤလၢ ပၢဆှၢသုးဂ့ၢ်ဝီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ်အလီၢ်ဒီး သုးရိၣ်မဲခိၣ်ကျၢၢ်(၂)လီၢ်လံၤ သုးခိၣ်ကျၢၢ်စိစီၤတၢ်ခုခီန့ၣ်ဘၣ်တၢ်ပၥ်ထီၣ်အီၤလၢ လီၢ်ခၢၣ်သးပှၤဟ့ၣ်ကူၣ်ဟ့ၣ်ဖးတၢ်အဂ့ၢ် ပၥ်ဖျါဝဲလၢ DKBA အလံၥ်ပၥ်ဖျါအပူၤန့ၣ်လီၤ. လၢတၢ်ဂ့ၢ်ဝဲအံၤအဖီခိၣ်န့ၣ် DKBA သုးရိၣ်မဲခိၣ်ကျၢၢ်(၂) သုးခိၣ်ကျၢၢ်စိစီၤစွ့ၣ်ဝၣ်စံးဝဲလၢ“EC တၢ်အိၣ်ဖှိၣ်အံၤဒ်အပူၤကွံၥ်တၢ်မၤတ့ၢ်အီၤအသိး အခဲအံၤဆၢကတီၢ်ဘၣ်လၢ တၢ်ဘၣ်ကိး EC တၢ်အိၣ်ဖှိၣ်အဃိန့ၣ် DKBA ခိၣ်နၢ်ဒိၣ်ထီသ့ၣ်တဖၣ်မၤဝဲတၢ်ထံၣ်လိၥ်သးန့ၣ်လီၤ. လၢတၢ်ထံၣ်လိၥ်သးအဖီခိၣ် ဘၣ်မနုၥ်ယဟံးထီၣ်သုးခိၣ်ကျၢၢ်(၂)အလီၢ်လဲၣ်န့ၣ် ခီဖျိသုးက့ခိၣ်,EC ဒီးဒုးယၤခိၣ်သ့ၣ်တဖၣ် ထံၣ်လၢ သုးခိၣ်ကျၢၢ်(၂)န့ၣ် အိၣ်ဒၣ်ခုၣ်ခုၣ်, သုးခိကျၢၢ်စ့ၢ်ကီးအိၣ်ဒၣ် ခုၣ်ခုၣ် အဃိန့ၣ် အဝဲသ့ၣ်ပၥ်ထီၣ်က့ၤယၤန့ၣ်လီၤ.ခီၣ်တဃၥ်ဒုးယၤခိၣ် ဆါအီၣ်ခီန့ၣ် ဘၣ်တၢ်ပၥ်ထီၣ်အီၤလၢ AG (ပၢဆှၢသုးဂ့ၢ်ဝီခိၣ်ကျၢၢ်)လၢ ဖုနီၣ်ဝ့အလီၢ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ဒံၣ်မိၣ်ကရ့ၣ်စံၣ်တၢ်ဘၣ်ဘျုးကညီသုးမုၢ်ဒိၣ် DKBA အံၤ နီၤဖးလီၤဝဲ တီနီၢ်မုၢ်ထီၣ်ဒီး တီနီၢ်မုၢ်နုၥ်သုးက့(၂)က့ဒီးမ့ၢ်ပၥ်ဖှိၣ်ဒီးလီၢ်ခၢၣ်သးန့ၣ်အသုးရ့ၣ်အိၣ်ဝဲခဲလၢၥ်...
တၢ်ခိးခးသုးကီၣ်ကးလၢတၢ်ဘၢၣ်တီၤ,ပယီၤသုးကီၣ်ကးသံ(၃)ဂၤ
လါဒံၣ်စဲဘၢၣ် ၃သီ, ၂၀၂၄နံၣ်, ခ့ၣ်အဲးစံၣ်, တလၢၤကီၢ်စဲၣ်,ယ့ကီၢ်ဆၣ်ဟီၣ်ကဝီၤအပူၤပယီၤသုးကီၣ်ကးအသုးသိလ့ၣ်လၢအဟဲခီဂၥ်ဝဲ(စိၤနသါ)သဝီၤအကျဲမုၢ်အံၤမ့ၢ်လၢတၢ်ခိးခးဝဲလၢကျဲတၢ်ဘၢၣ်တီၤအဃိပယီၤသုးကီၣ်ကးအပှၤသံ(၃)ဂၤဒီးတၢ်ဘၣ်ဒိဘၣ်ထံးအိၣ်အါဝဲအဂ့ၢ်(ယ့ဘလူ)အပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. ပယီၤသုးခီၣ်ချ့သုးရ့ၣ်လၢအမ့ၢ်ဝဲ(ခမရ-၃၄၃)အသုးသိလ့ၣ်တခိၣ်ဖဲတနံၤအံၤဂီၤခီ(၉)နၣ်ရံၣ်ဃၣ်ဃၣ်န့ၣ်လၢကလဲၤထီၣ်ဝဲတၢ်အိၣ် ဖှိၣ်အဂီၢ်ဟဲခီဂၥ်ဝဲ(စိၤနသါ)သဝီအဆၢကတီၢ်(ယ့ဘလူ)တၢ်ပၢၢ်ဆၢသုးကရူၢ်ဟူးဂဲၤခိးခးဝဲပယီၤသုးအံၤလၢကျဲတၢ်ဘၢၣ်တီၤအဂ့ၢ်(ယ့ဘလူ)တၢ်ပၢၢ်ဆၢသုးကရူၢ်ခိၣ်စံးဝဲဒၣ်န့ၣ်လီၤ. "မ့ၢ်လီၤဖဲတနံၤအံၤဂီၤခီဖဲနီၣ်ဂံၢ်(၈)ကျဲမုၢ်န့ၣ်ပအိၣ်ခိးဃၥ်ဝဲပယီၤသုးအသုးသိလ့ၣ်လၢကလဲၤထီၣ်တၢ်အိၣ်ဖှိၣ်လၢ(စက-၁၉)အအိၣ်မီၤနီၤ. ဒီးပနုၤလီၤခးဝဲလၢကျဲမုၢ်ခိၣ်န့ၣ်အဝဲသ့ၣ်အပှၤသံ(၃)ဂၤဒီးဘၣ်ဒိဘၣ်ထံးစ့ၢ်ကီးအိၣ်ဝဲလီၤ. မ့မ့ၢ်လၢတၢ်စုကဝဲၤဒုပတန့ၢ်ဘၣ်ဘၣ်. ဒီးမ့ၢ်လၢပှၤနီၣ်သိလ့ၣ်ဖိတဂၤန့ၣ်တလီၤဘၣ်အဃိဃ့ၢ်ဖျိးနီၣ်ကွံၥ်ဝဲသိလ့ၣ်မီၤနီၤ. ခံခီခံကပၤတၢ်ခးလိၥ်သးကဲထီၣ်ဝဲအိၣ်လီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိး(ယ့ကီၢ်ဆၣ်)ဟီၣ်ကဝီၤအပူၤန့ၣ်(ယ့ဘလူ)တၢ်ပၢၢ်ဆၢသုးပၥ်ဖှိၣ်ကရူၢ်ဟူးဂဲၤမၤဝဲဒုးယၤတၢ်ဟူးတၢ်ဂဲၤအိၣ်ဝဲခဲအံၤခဲအံၤဒီးအခဲအံၤတဘျီတၢ်ခးလိၥ်သးကဲထီၣ်ဝဲဖဲနီၣ်ဂံၢ်(၈)ကျဲမုၢ်ခိၣ်အံၤဝံၤအလီၢ်ခံပယီၤသုးခီၣ်ချ့သုးရ့ၣ်ဒ်အမ့ၢ်(ခမရ-၅၈၆,၃၄၃,၅၈၇,) သုးရ့ၣ်သ့ၣ်တဖၣ်ဟူးဂဲၤခးတပျုၤတပျီလီၤကဒါက့ၤဝဲကျိဖးဒိၣ်သ့ၣ်တဖၣ်အိၣ်ဝဲအဂ့ၢ်လီၢ်ကဝီၤဖိသ့ၣ်တဖၣ်စံးဝဲဒၣ်အသိးသ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါလၢခံခီခံကပၤတၢ်ခးလိၥ်သးကဲထီၣ်ဝဲအဖီခိၣ်ပယီၤသုးကီၣ်ကးတကပၤသံဘၣ်ဒိဘၣ်ထံးအိၣ်ဝဲအါအဂ့ၢ်သ့ၣ်ညါဘၣ်အသိးလၢ(ယ့ဘလူ)တၢ်ပၢၢ်ဆၢသုးကရူၢ်တကပၤအပှၤသုးဖိတဂၤအခီၣ်ဘၣ်ဒိအိၣ်ဝဲအဂ့ၢ်(ယ့ဘလူ)ကရူၢ်ခိၣ်စံးအါထီၣ်ဝဲဒၣ်န့ၣ်လီၤ.
သုးက့(၅)ဖီၣ်န့ၢ်အါထီၣ်ကဒီး မးထီပယီၤသုးဃ့ၢ်ဖျိး(၃၆)ဂၤ
လါဒံၣ်စဲဘၢၣ် ၃သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ကီၢ်သူလ့ၤတၢ်ပၢ မုၢ်တြီၢ်ကီၢ်ရ့ၣ်,သုးက့(၅)ဟီၣ်ကဝီၤ, ပယီၤသုးမးထီလၢအဃ့ၢ်ဖျိးသ့ၣ်တဖၣ် တၢ်ဖီၣ်ချုးမူဒံးန့ၢ် အါထီၣ်ကဒီး (၃၆)ဂၤအဂ့ၢ် သ့ၣ်ညါဘၣ်လၢကီၢ်ရ့ၣ်အပှၤဘၣ်မူဘၣ်ဒါအအိၣ်န့ၣ်လီၤ. ဖဲလါဒံၣ်စဲဘၢၣ် ၂သီအနံၤန့ၣ် ပယီၤသုးတဖုဃီလၢမးထီသုးကလၢၤလၢအဃ့ၢ်ဖျိးတဖုန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးက့(၅)ဒီးသုးပၥ်ဖှိၣ်ဖီၣ်မူဒံးန့ၢ်ကဒီးအီၤ (၃၆)ဂၤဒီးတၢ်စုကဝဲၤဒီးအလီၢ်လၤခီန့ၢ်တၢ်မၤလီၤတံၢ်အီၤအဖၢမုၢ်အဂ့ၢ် မုၢ်တြီၢ်ကီၢ်ရ့ၣ်တၢ်ကစီၣ်ဒီးတၢ်ဘိးဘၣ်ရၤလီၤအပှၤဘၣ်မူဘၣ်ဒါ ကၠူလံယၢၣ်ခုၣ် စံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ဖဲမဟါန့ၣ် ပဖီၣ်မူဒံးန့ၢ်ကဒီး(၃၆)ဂၤန့ၣ်လီၤ.ပယီၤသုး တဖုဃီဖဲမးထီလၢအဃ့ၢ်ဖျိးတဖုန့ၣ်လီၤ. တၢ်ဖီၣ်န့ၢ်အဝဲသ့ၣ်ဖဲ မးထီဒီးထွံၣ်သံအုၣ်အဘၢၣ်စၢၤန့ၣ်လီၤ.တၢ်စုကဝဲၤဒီးအဝဲသ့ၣ်မူဒါလီၢ်လၤန့ၣ်တၢ်မၤလီၤတံၢ်အီၤအဖၢမုၢ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ဒ်န့ၣ်အသိးလီၤ ဖဲအပူၤကွံၥ် လါနိၣ်ဝ့ဘၢၣ်(၃၀)သီအနံၤအခါစ့ၢ်ကီး မးထီပယီၤသုးလၢအဃ့ၢ်ဖျိးသ့ၣ်တဖၣ်ခီဖျိကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ဒီးသုးပၥ်ဖှိၣ်ခိးခးအဝဲသ့ၣ်ဖဲထွဲၣ်သံအုၣ်ဟီၣ်ကဝီၤအဃိ ပယီၤသုးသံ(၄)ဂၤဒီးန့ၢ်ဘၣ်တၢ်စုကဝဲၤဒ်အမ့ၢ် (MA1- ၃ခိၣ်) ဒီး (MA4- ၁ခိၣ်)အဂ့ၢ်သ့ၣ်ညါဘၣ်ဒ် ခ့ၣ်အဲၣ်ယူၣ်လီၢ်ခၢၣ်သးပၥ်ဖျါဝဲဒၣ်အသိးန့ၣ်လီၤ. တကတီၢ်ဃီ ပယီၤသုးဖၣ်ပူၣ်ဒုးယၤသုးကလၢၤတဖၣ်လၢကနီထီၣ်အပှၤဒ်သိးကထီၣ်မၤန့ၢ် တကွံလူၢ်(ငှက်ပျောတော)တၢ်လီၢ်အဂီၢ် သူဝဲဒၣ်ကလံၤကျါတၢ်ဒုးဟဲခးလီၤဝဲတၢ်ဒီးကဘီယူၤအိၣ်ဝဲတယူၤဃီအဂ့ၢ်သ့ၣ်ညါဘၣ်လၢ ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ်အပှၤဘၣ်မူဘၣ်ဒါအအိၣ်န့ၣ်လီၤ.
တၢ်တြဲၢ်ကီၢ်ဆၣ်အပူၤ,တၢ်အိးထီၣ်(အၣ်ဝၣ်ဒ့)တၢ်တၤကျိၣ်တၤစ့တၢ်လိၣ်ကွဲအါထီၣ်
လါဒံၣ်စဲဘၢၣ် ၂သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်,တၢ်တြဲၢ်ကီၢ်ဆၣ်သဝီတဖၣ်အပူၤအါတက့ၢ်တၢ်အိးထီၣ်ဝဲ(အၣ်ဝၣ်ဒ့)တၢ်တၤကျိၣ်တၤစ့တၢ်လိၣ်ကွဲအါထီၣ်ဒီးမၤဝဲဖျိဖျိဖျါဖျါအဂ့ၢ်,လီၢ်ကဝီၤဖိတဖၣ်စံးဝဲန့ၣ်လီၤ. တၢ်အိးထီၣ်ဝဲတၢ်လိၣ်ကွဲဟီၣ်ကဝီၤတဖၣ်အပူၤအံၤ,ကညီဖီၣ်စုကဝဲၤတၢ်ဃူတၢ်ဖိးကရူၢ်()လွံၢ်ကရူၢ်အံၤထုးထီၣ်ဘိးဘၣ်ရၤလီၤတ့ၢ်ဝဲလၢကဟံဝဲအရ့တုၤလီၤတီၤလီၤအိၣ်ဝဲဘၣ်ဆၣ်,တၢ်မၤပတုၥ်ကွံၥ်ဝဲတအိၣ်ဘၣ်အဃိ,အၣ်ဝၣ်ဒ့တၢ်လိၣ်ကွဲလီၢ်အိၣ်ဝဲအခါ(၁၀)ဘျဲၣ်အမဲၥ်ညါ,တၢ်အိးထီၣ်စ့ၢ်ကီးဝဲတၢ်ကွံၥ်ညၣ်အလီၢ်အခါ(၁၀)ဘျဲၣ်လီၤလီၤဆီဆီအိၣ်ဝဲအဂ့ၢ်,လီၢ်ကဝီၤဖိတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“တၢ်မၤတၢ်တၤကျိၣ်တၤစ့တၢ်လိၣ်ကွဲအံၤဖီၣ်စုကဝဲၤကရူၢ်ကရၢတဖၣ်မ့တဟ့ၣ်ခွဲးဘၣ်န့ၣ်,ပှၤမၤတဘူၣ်နီတဂၤဘၣ်.ခီဖျိဖီၣ်စုကဝဲၤကရူၢ်ကရၢအပူၤတဖုဖုဟ့ၣ်တၢ်ခွဲးတၢ်ယၤအဃိ,ပှၤမၤလီၤ.အခဲအံၤတၢ်တၤကျိၣ်တၤစ့တၢ်လိၣ်ကွဲအါထီၣ်တုၤလၢကွၢ်က့ၤတဘူၣ်လၢၤဘၣ်လံ”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ခီဖျိတၢ်တ့ထီၣ်ဘှီထီၣ်ဝဲတၢ်ဂဲၤကလံၣ်ပၣ်ကဝ့ၤအလီၢ်ဒီးတၢ်လိၣ်ကွဲဝဲတၢ်တၤကျိၣ်တၤစ့သ့ၣ်တဖၣ်အဃိ,လီၢ်ကဝီၤဖိတဖၣ်မုၢ်နၤခီမံတန့ၢ်ဘၣ်အမဲၥ်ညါ,သိလ့ၣ်,ဆဲးကဲးတဖၣ်လီၢ်မၢ်ဝဲအိၣ်အါထီၣ်ဒီးဒူသဝီအပူၤတၢ်ဘံၣ်တၢ်ဘၢတအိၣ်ဘၣ်အဂ့ၢ်,လီၢ်ကဝီၤဖိအံၤစံးအါထီၣ်ဝဲဒၣ်န့ၣ်လီၤ. တၢ်မၤဝဲတၢ်တၤကျိၣ်တၤစ့တၢ်ဖံးတၢ်မၤအံၤ,ဖီၣ်စုကဝဲၤကရူၢ်ကရၢတနီၤအတၢ်ပၣ်ဃုၥ်ပၣ်ဂီၢ်အိၣ်ဝဲအဃိ,တၢ်ဟံထီၣ်ဖီၣ်ထီၣ်အရ့အဂံၢ်စၢ်ဝဲဒီးလီၢ်ကဝီၤဖိတဖၣ်ပၥ်ဖျါထီၣ်အသးလဲၤတၢၣ်ဝဲအိၣ်ဝဲဘၣ်ဆၣ်,တၢ်ပတုၥ်ပံးကွံၥ်တအိၣ်ဝဲဘၣ်ဒီးမ့မ့ၢ်တခီတၢ်မၤဝဲထဲတၢ်သုးတၢ်လီၢ်တၢ်ကျဲလီၤအဂ့ၢ်,လီၢ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“အပူၤကွံၥ်ပဲကိတၢ်လိၣ်ကွဲလီၢ်လၢအဟဲဖျါထီၣ်လၢတၢ်ကစီၣ်အပူၤတဖၣ်န့ၣ်တအိၣ်လၢၤဘၣ်.သနါက့တၢ်လဲၤသုးအီၤဆူ,ပီယ့ၣ်ပူၤ,ထံဖိက့ၣ်တကပၤန့ၣ်လီၤ.လၢန့ၣ်တကပၤန့ၣ်အခဲအံၤတၢ်လိၣ်ကွဲလီၢ်လဲလဲလီၤ.မၤဝဲဖျိဖျိဖျါဖျါဖဲကျဲမုၢ်ကပၤန့ၣ်လီၤ”အဂ့ၢ်စံးဝဲန့ၣ်လီၤ. ဖၣ်အၣ်ကီၢ်ရ့ၣ်ဟီၣ်ကဝီၤအပူၤ,ဘၣ်ဃးတၢ်လိၣ်ကွဲတၢ်တၤကျိၣ်တၤစ့ဒီးတၢ်သူကသံၣ်မူၤဘှီးတဖၣ်အံၤတၢ်ကဟံအရ့တုၤလီၤတီၤလီၤအဂီၢ်,ကညီဖီၣ်စုကဝဲၤလွံၢ်ဖုဒ်အမ့ၢ်သုးက့(၇)ခ့ၣ်အဲးယူၣ်ကညီဒီကလုၥ်စၢဖှိၣ်ကရၢ,သုးခိးကီၢ်ဆၢ(BGF),ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA),ဒီးကညီတၢ်မုၥ်တၢ်ခုၣ်ကီၣ်ကးကရၢ(PC)ပှၤဘၣ်မူဘၣ်ဒါတဖၣ်ထုထီၣ်ရၤလီၤဝဲဖဲအပူၤကွံၥ်လါမ့ၤ(၂၉)သီအနံၤအပူၤအိၣ်ဝဲဒၣ်န့ၣ်လီၤ. ဒ်န့ၣ်အသိး,တၢ်ထုးထီၣ်ဝဲလံၥ်တၢ်နဲၣ်လီၤအိၣ်ဝဲဒၣ်ဘၣ်ဆၣ်,တၢ်အိးထီၣ်ဝဲတၢ်ကွံၥ်ညၣ်,တၢ်လိၣ်ကွဲတၢ်တၤကျိၣ် တၤစ့တဖၣ်အိၣ်ဝဲဒီတနံၣ်ကျၢၤအသိး,တၢ်လိၣ်ကွဲတၢ်တၤကျိၣ်တၤစ့ဘူၣ်အပူၤသုးခိးကီၢ်ဆၢ()ဟံန့ၢ်တၢ်ဘံၣ်တၢ်ဘၢအိၣ်ဝဲဒၣ်န့ၣ်လီၤ.
လီၢ်ကဝီၤဖိတဖၣ်လဲၤဖံးလဲၤမၤက့ၤတၢ်တဘူၣ်ခီဖျိ(ရွှ့ၣ်အ့မၠဲၣ်)ဃိၣ်တၢ်လူၢ်ခိၣ်သုးကီၣ်ကးအပှၤတဖၣ်ခးလီၤတၢ်
လါဒံၣ်စဲဘၢၣ် ၂သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်ကီးတရံးကီၢ်ဆၣ်ရၤမတံကလံၤထံးဂီၤလ့ၤဟီၣ်ကဝီၤအပူၤ သုးကီၣ်ကးအပှၤလၢအိၣ်(ရွှ့ၣ်အ့မၠဲၣ်)ဃိၣ်တၢ်လူၢ်ခိၣ်တဖၣ်ခးလီၤဝဲတၢ်အဃိ,ကမျၢၢ်လီၢ်ကဝီၤဖိတဖၣ်လဲၤဖံးလဲၤမၤက့ၤတၢ်တဘူၣ်လၢၤဘၣ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲန့ၣ်လီၤ. အပူၤကွံၥ်လါနိၣ်ဝ့ဘၢၣ်(၂၈)သီအနံၤ(KTLA)ကီၢ်သူလ့ၤသုးမုၢ်ဒိၣ်ဖီၣ်န့ၢ်ဝဲသုးကီၣ်ကးခလရ(၅၈၅)အသုးဒ့ခိၣ်(အၣ်ကၣ်ကၠီၣ်)ဒီးအပှၤ(၁၆)ဂၤ,လၢခိးတၢ်ဘံၣ်တၢ်ဘၢဖဲရွှ့ၣ်အ့မၠဲၣ်ဃိၣ်တၢ်လူၢ်ခိၣ်တဖၣ်ဝံၤအလီၢ်ခံ,သုးကီၣ်ကးအံၤက့ၤမၤအါထီၣ်ကဒီးဝဲအပှၤလၢကခိးတၢ်ဘံၣ်တၢ်ဘၢဖဲ(ရွှ့ၣ်အ့မၠဲၣ်)ဃိၣ်တၢ်လူၢ်ခိၣ်တဖၣ်တဘျီဃီအိၣ်ဝဲအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဒီးသုးကီၣ်ကးအပှၤလၢအဟဲထီၣ်အိၣ်ခိးတၢ်ဘံၣ်တၢ်ဘၢဖဲတၢ်လူၢ်ခိၣ်အသီတဒူၣ်အံၤ,ခီဖျိခးလီၤဝဲတၢ်ဆူကမျၢၢ်လီၢ်ကဝီၤဖိတဖၣ်တၢ်သူၣ်အီၣ်ဖျးအီၣ်အလီၢ်အဃိ,လီၢ်ကဝီၤဖိတဖၣ်လဲၤဖံးအီၣ်မၤအီၣ်က့ၤတၢ်တဘူၣ်ဝဲလၢၤဘၣ်အဂ့ၢ်,ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ရွှ့ၣ်အ့မၠဲၣ်တၢ်လူၢ်ခိၣ်တဒူၣ်န့ၣ်ပှၤလဲၤမၤအီၤဝံၤတဘျီ,အဝဲသ့ၣ်ဟဲထီၣ်အိၣ်ကဒီးဝဲလၢအသီတဒူၣ်လံ,နါက့မ့ၢ်အဟဲထီၣ်အိၣ်ကဒီးဆံးအါလဲၣ်တဒုတသ့ၣ်ညါဘၣ်ဒံးဘၣ်.ပှၤဟဲထီၣ်အိၣ်ခဲအံၤတဒူၣ်န့ၣ်,မဟါတဟါအနံၤဖဲပှၤသဝီဖိလဲၤဖံးအီၣ်မၤအီၣ်တၢ်အခါ,ကွၢ်စိဝဲဒီးခးစိလီၤဝဲဒီးမီထးဖိ,ကျိစဲးလးသ့ၣ်တဖၣ်အိၣ်ဝဲန့ၣ်လီၤ.ဘၣ်ဆၣ်သဝီဖိတဖၣ်ပတနၢ်ဟူဘၣ်ဒိဘၣ်ထံးဒံးဘၣ်.နါက့,ခီဖျိအဝဲသ့ၣ်ခးလီၤစိတၢ်ဖဲ,ပှၤသဝီဖိလဲၤကူးပဲ,လဲၤဘိးဘုခ့အဆၢကတီၢ်အဃိပှၤသဝီဖိတဖၣ်ဟးထီၣ်ဟးလီၤ,လဲၤဖံးအီၣ်မၤအီၣ်က့ၤတၢ်တဘူၣ်လၢၤဘၣ်”အဂ့ၢ်စံးဝဲဒၣ်န့ၣ်လီၤ. လၢအန့ၣ်အမဲၥ်ညါ,,ရွှ့ၣ်အ့မၠဲၣ်သဝီအံၤခီဖျိအိၣ်ဘူးဝဲဒၣ်ဒီးအူးကရ့ၣ်ထၣ်ပယီၤသုးကလၢၤအဃိသုးကီၣ်ကးအံၤဆီလီၤသးအိၣ်ဆိးခိးဝဲဒၣ်တၢ်ဘံၣ်တၢ်ဘၢလၢ,(ရွှ့ၣ်အ့မၠဲၣ်)သဝီခီခါဖၠၣ်အတၢ်လူၢ်ခိၣ်အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. အပူၤကွံၥ်လါနိၣ်ဝ့ဘၢၣ်(၂၈)သီအနံၤအပူၤတၢ်ဖီၣ်န့ၢ်ဝဲသုးကီၣ်ကးအပှၤ(၁၆)ဂၤအံၤ,တၢ်ဖီၣ်န့ၢ်ဃုၥ်ဝဲဒီးစုကဝဲၤတဖၣ်အသိး,တကတီၢ်ဃီ,သုးကီၣ်ကးအပှၤတဖၣ်အံၤတကီၢ်ခါခဲအံၤတၢ်ကတီၤပၥ်အဝဲသ့ၣ်တဖၣ်လၢ(KTLA)လီၢ်ခၢၣ်သးဝဲၤလီၢ်ခိၣ်သ့ၣ်တၢ်လီၢ်အပူၤအဖၢမုၢ်အဂ့ၢ်,(KTLA)လီၢ်ခၢၣ်သးပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဂီၤလ့ၤဟီၣ်ကဝီၤအပူၤအံၤသုးကီၣ်ကးအတၢ်လီၢ်တၢ်ကျဲဒ်အမ့ၢ်,ဘျၢၣ်ဒိၣ်,လ့ဂီၤ,အူးကရ့ၣ်ထၣ်,ကနဲလ့,ထံကပျၢၤ,မီခံ,ဘယ့ၣ်နီၤကိသုးကလၢၤတဖၣ်အိၣ်ဒံးဝဲဒၣ်ဒီး,ဒ်န့ၣ်အသိးအဒုးယၤသုးကလၢၤဒ်အမ့ၢ်ဂီၤလ့ၤ(စက-၁၃)ဒီးသ့ၣ်ဘီဘိ(တမ-၄၄)ဒုးယၤသုးကလၢၤသ့ၣ်တဖၣ်စ့ၢ်ကီးအိၣ်ဒံးဝဲဒၣ်အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဘၣ်ထွဲ(ICC)အပီၢ်ရီခိၣ်ဃ့ထီၣ်လၢတၢ်ကဖီၣ်သုးကီၣ်ကးခိၣ်တၢ်ဂ့ၢ်န့ၣ်မ့ၢ်တၢ်အကြၢးအဘၣ်လၢတၢ်ကဘၣ်မၤအီၤအဂ့ၢ်(KNU)စံးဝဲ
လါဒံၣ်စဲဘၢၣ် ၂ သီ, ၂၀၂၄ နံၣ်, ခ့ၣ်အဲးစံၣ် ဘၣ်ထွဲဒီးတၢ်မၤအၢမၤသီပှၤရိၤဟ့ကၠၢၣ်ဖိသ့ၣ်တဖၣ်အဖီခိၣ်ထံဂုၤကီၢ်ဂၤတၢ်မၤကမၣ်ကွီၢ်မ့ၣ်အကွီၢ်ဘျီၣ်(International Criminal Court-ICC)အပီၢ်ရီခိၣ်(ခါရ့ၤအ့ၣ်စဲၣ်အၤမဲၣ်ခီန်-Karim Asad Ahmad Khan)ဃ့ထီၣ်ဝဲအကွီၢ်ဘျီၣ်ဒ်သိး ကထုးထီၣ်ဝဲ(Warrant)လၢတၢ်ကဖီၣ်သုးကီၣ်ကးအခိၣ်(မ့အီၣ်လဲၣ်)တၢ်ဂ့ၢ်န့ၣ်မ့ၢ်တၢ်ဂ့ၢ်လၢအကြၢးအဘၣ်လၢတၢ်ကဘၣ်မၤအီၤအဂ့ၢ်(KNU)စံးဝဲဒၣ်န့ၣ်လီၤ. ဖဲအပူၤကွံၥ်လါနိၣ်ဝ့ဘၢၣ်(၂၇)သီအနံၤန့ၣ်(ICC)အပီၢ်ရီခိၣ်ဃ့ထီၣ်ဝဲလၢတၢ်ကထုးထီၣ်ဝဲ(Warrant)လၢတၢ်ကဖီၣ်သုးကီၣ်ကးအခိၣ်(မ့အီၣ်လဲၣ်)တၢ်ဂ့ၢ်ဘျီဝဲအံၤအဖီခိၣ်မ့ၢ်တၢ်ဃ့ထီၣ်လၢတစဲၤခံဒံးဘၣ်အသိးမ့ၢ်တၢ်ဂ့ၢ်အကြၢးအဘၣ်တခါလၢတၢ်ဘၣ်မၤအီၤအဂ့ၢ်န့ၣ်(KNU)အပှၤကတိၤတၢ်ပၢပဒိၣ်စီၤကျၢၤစ့စံးဝဲဒ်အံၤန့ၣ်လီၤ. "ဘၣ်ထွဲဒီးတၢ်ဂ့ၢ်အံၤန့ၣ်ပဝဲဒၣ်ကညီဒီကလုၥ်စၢဖှိၣ်ကရၢလၢအပူၤကွံၥ်အနံၣ်(၁၀)ဘျဲၣ်အခါလံၤလံၤပဂုၥ်ကျဲးစၢၤတ့ၢ်ဘၣ်ထွဲဒီးသုးမီၤစိရိသ့ၣ်တဖၣ်မၤဘၣ်ဒိပှၤဂ့ၢ်ဝီခွဲးယၥ်မးတကးဒံးဘၣ်,ဘၣ်ထွဲဒီးသုးတၢ်သိၣ်တၢ်သီတၢ်ဘျၢမၤကမၣ်ဝဲဒိၣ်ဒိၣ်မုၢ်မုၢ်သ့ၣ်တဖၣ်န့ၣ်တဲတ့ၢ်လံအနံၣ်တဖၣ်အနံၣ်ဘၣ်ဆၣ်ပှၤတကနၣ်ပတၢ်ပၥ်ဖျါသ့ၣ်တဖၣ်ဘၣ်ဒီးပှၤတပၥ်ပနီၣ်ပတၢ်ဘၣ်. ဘၣ်ဆၣ်ဒီးအခဲအံၤန့ၣ်ဘၣ်ထွဲဒီး(ရိၤဟ့ကၠၢၣ်)တၢ်ဂ့ၢ်အဖီခိၣ်ဒီးတၢ်ဟံထီၣ်ဂ့ၢ်ဝီဒ်အံၤန့ၣ်ပမ့ၢ်တဲဒုတစဲၤခံဒံးဘၣ်န့ၢ်ပတဲသ့လီၤ. လၢပဂီၢ်န့ၣ်မ့ၢ်တၢ်ဂ့ၢ်တခါလၢအကြၢးအဘၣ်လၢတၢ်ကဘၣ်မၤအီၤန့ၣ်ပထံၣ်ဝဲဒ်န့ၣ်လီၤမီၤနီၤ." အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ဒ်န့ၣ်အသိးကညီဒီကလုၥ်စၢဖှိၣ်ကရၢ(KNU),ကရ့ၣ်နံၣ်ဒီကလုၥ်တၢ်လဲၤထီၣ်လဲၤထီပၣ်တံၣ်(KNPP),ခၠ့ဒီကလုၥ်သုးမုၢ်ဒိၣ်(CNF)ဒီးဒီကလုၥ်တၢ်ဃူးတၢ်ဖိးအပဒိၣ်(NUG)သ့ၣ်တဖၣ်ပၥ်ဖှိၣ်ထုးထီၣ်ဝဲတၢ်ပၥ်ဖျါတဘ့ၣ်လၢတူၢ်လိၥ်ဝဲ(ICC)အပီၢ်ရီခိၣ်အတၢ်ဃ့ထီၣ်လၢကထုးထီၣ်ဝဲ(Warrant)လၢတၢ်ကဖီၣ်သုးကီၣ်ကးအခိၣ်မ့အီၣ်လဲၣ်အဂီၢ်အဂ့ၢ်န့ၣ်ထုးထီၣ်ပၥ်ဖျါဝဲဖဲလါနိၣ်ဝ့ဘၢၣ်အသီ(၃၀)အနံၤန့ၣ်လီၤ. လၢတၢ်ပၥ်ဖှိၣ်ထုးထီၣ်တၢ်ပၥ်ဖျါအံၤအပူၤဒ်သိးဒီးထံဂုၤကီၢ်ဂၤကဟံန့ၢ်ဘၣ်ဝဲသုးကီၣ်ကးအခိၣ်(မ့အီၣ်လဲၣ်)လၢအမၤအၢမၤသီကမျၢၢ်ထံဖိကီၢ်ဖိအရ့ကန့ၢ်အဂီၢ်ဒီးပၥ်ဖျါထီၣ်ဝဲအတၢ်မၤအၢမၤသီလၢကလုၥ်ဒူၣ်ဖိအဖီခိၣ်သ့ၣ်တဖၣ်ဒီးစံၣ်ညီၣ်ဟံးန့ၢ်ဝဲအရ့ဒ်ထံဂုၤကီၢ်ဂၤအတၢ်ဘျၢသဲးစးကျဲအိၣ်အသိးကန့ၢ်အဂီၢ်ကဂုၥ်ကျဲးစၢၤထုးဂံၢ်ထုးဘါ,မၤဝဲအဂ့ၢ်န့ၣ်တၢ်ပၥ်ဖျါပူၤအသိးပၥ်ဖျါဝဲန့ၣ်လီၤ. လၢန့ၣ်အမဲၥ်ညါဘၣ်ထွဲ(ICC)အပီၢ်ရီခိၣ်အတၢ်ဃ့ထီၣ်အံၤအဖီခိၣ်တၢ်ဂ့ၢ်တၢ်ကျိၤလၢမ့ၢ်ဘၣ်ပၥ်ဖှိၣ်မၤသကိးတၢ်အပတီၢ်မ့ၢ်အိၣ်ထီၣ်ဒီးတၢ်မ့ၢ်ကွဲမုၥ်ပှၤန့ၣ်ပသမၢအလီၢ်တအိၣ်ဘၣ်အဂ့ၢ်ပဒိၣ်စီၤကျၢၤစ့စံးအါထီၣ်ဝဲဒၣ်စ့ၢ်ကီးန့ၣ်လီၤ. တကးဒံးဘၣ်ကညီတၢ်ကရၢကရိဒ်အမ့ၢ်ကညီပိၥ်မုၣ်ကရၢ(KWO)တကပၤထုးထီၣ်လံၥ်တၢ်ပၥ်ဖျါဒီးဆီၣ်တခူထီၣ်ဝဲ(ICC)ပီၢ်ရီခိၣ်အတၢ်ဃ့ထီၣ်အိၣ်ဝဲအသိး(Barma Campaign UK)စ့ၢ်ကီးထုးထီၣ်ဘိးဘၣ်ရၤလီၤဝဲဒၣ်လံၥ်တၢ်ပၥ်ဖျါအိၣ်ဝဲအဂ့ၢ်သ့ၣ်ညါဘၣ် န့ၣ်လီၤ. (ICC)အပီၢ်ရီခိၣ်အတၢ်ဃ့ထီၣ်အဖီခိၣ်ကီၢ်ပယီၤအံၤတမ့ၢ်ဝဲဒၣ်(ICC)ကရူၢ်ဖိဘၣ်အဃိတၢ်ဃ့ထီၣ်ဝဲအံၤပၥ်ပနီၣ်ဝဲတသ့ဘၣ်အဂ့ၢ်သုးကီၣ်ကးတကပၤစံးဝဲဒၣ်န့ၣ်လီၤ. ဒ်န့ၣ်အသိးပူၤကွံၥ်အနံၣ်(၁၀)ဘျဲၣ်အဆၢကတီၢ်ဘၣ်ထွဲဒီးသုးမီၤစိရိၤသ့ၣ်တဖၣ်အတၢ်မၤအၢမၤနးကမျၢၢ်,မၤသံမၤဝီကမျၢၢ်သ့ၣ်တဖၣ်ဒီးလီၤဆီဒၣ်တၢ်ကညီဖိသ့ၣ်တဖၣ်လၢအတၢ်တူၢ်ဘၣ်ခီၣ်ဘၣ်တၢ်သ့ၣ်တဖၣ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢပၥ်ဖျါထီၣ် တ့ၢ်ဃၥ်အိၣ်ဝဲအဂ့ၢ်န့ၣ်သ့ၣ်ညါဘၣ်န့ၣ်လီၤ.
ဃိၣ်လိၥ်ကျိကၢၢ်နံၤ စ့ၣ်ခၠီသ၀ီဖိလၢဘၣ်သုးလီၢ်ခီဖျိထံဒိၣ်ဃိတဖၣ်တုၤခဲအံၤတက့ၤဘၣ်ဟံၣ်,သဂၢၢ်ဘၣ်အိၣ်ဆိးလီၢ်ကျဲတၢ်ဂ့ၢ်ကီ
လါဒံၣ်စ့ဘၢၣ် ၂ သီ, ၂၀၂၄ နံၣ်, ခ့ၣ်အဲးစံၣ် ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤ အပူၤကွံၥ်တၢ်စူၤခါခီဖျိဃိၣ်လိၥ်ကျိထံဒိၣ်ထီၣ်အဃိ စ့ၣ်ခၠီသ၀ီလၢအိၣ် ထံကျိကၢၢ်နံၤအံၤ သ၀ီဒီတဖျၢၣ်ကမျၢၢ်ခဲလၢၥ်ဘၣ်သုးလီၢ်သုးကျဲလဲၤအိၣ်လၢတၢ်လီၢ်ထီၣ်ထီအလီၢ်ဒီး တုၤလၢခဲအံၤ တက့ၤဘၣ်ဒံးလၢအဟံၣ်အဃီဘၣ်အဃိ သဂၢၢ်ဘၣ်၀ဲအိၣ်ဆိးလီၢ်ကျဲတၢ်ဂ့ၢ်ကီအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. ဖဲအပူၤကွံၥ်လါအီကူးတၢ်စူၤခါအဆၢကတီၢ် ခီဖျိတၢ်စူၤတပယူၥ်ဃီဒီးဃိၣ်လိၥ်ကျိထံဒိၣ်ထီၣ်တုၤလၢကျဲမုၢ်ခိၣ်အဃိ တကီၤဘိကရူၢ် ကိတါကၠံသ၀ီဃၢၤ စ့ၣ်ခၠီသ၀ီလၢအိၣ်ဖဲထံကျိကၢၢ်နံၤအံၤ ဟံၣ်လီၤထွံကဲထီၣ်သးအမဲၥ်ညါသ၀ီဒီတဖျၢၣ် ဘၣ်သုးလီၢ်သုးကျဲဆူတၢ်လီၢ်ထီၣ်ထီတုၤလၢခဲအံၤတၢ်ဆၢကတီၢ်ထီၣ်ဘးလၢ(၄)လါဃၣ်ဃၣ်လံအဂ့ၢ်န့ၣ် လီၢ်က၀ီၤပှၤဘၣ်မူ ဘၣ်ဒါ စံး၀ဲန့ၣ်လီၤ. တကီၢ်ခါခဲအံၤတၢ်စူၤထံဒိၣ်ထီၣ်ထံက့ၤလီၤတၢ်ဆၢကတီၢ်န့ၢ်ဖးယံၤလံဘၣ်ဆၣ် တုၤလၢခဲအံၤထံကျိၤဆဲးနုၥ်လီၤ၀ဲဒၣ်လၢ စ့ၣ်ခၠီသ၀ီပူၤဒီတဖျၢၣ်အဃိ နံၣ်လၢကဟဲသ၀ီဖိတဖၣ်လ့ၤတက့ၤက့ၤအိၣ်ဆိးဆီလီၤသးဒ်အပူၤကွံၥ်အသိးတသ့လၢၤဘၣ်ဒီး သ၀ီဒီတဖျၢၣ်ကဘၣ်သုးလီၢ်သူၣ်ထီၣ်က့ၤအဟံၣ်အဃီအဒူသ၀ီလၢတၢ်လီၢ်လၢအဂၤတတီၤအဂ့ၢ်န့ၣ် ဖၣ်အၣ်ကီၢ်ဆၣ် စံၥ်ပှဲၤသူၣ်ဖျး၀ဲၤကျိၤခိၣ် စီၤသူမဲလၢအလဲၤလီၤ ဃိထံတၢ်ဂ့ၢ်အံၤ စံး၀ဲဒၣ်ဒ်အံၤန့ၣ်လီၤ. “ဖဲတၢ်စူၤထံဒိၣ်အခါန့ၣ် ပှၤဟံၣ်လီၤထွံကအိၣ်ခံဖျၢၣ်သၢဖျၢၣ်ညါ.ဖဲတၢ်ကဲထီၣ်သးသီသီအခါန့ၣ် သ၀ီဖိတဖၣ်ဟဲအိၣ်၀ဲဒၣ် ဖဲကိတါကၠံသ၀ီဟးအိၣ်၀ဲလၢပှၤဟံၣ်လၢအံၤတနီၤလၢန့ၣ်တနီၤဒ်န့ၣ်လီၤ.ခဲအံၤတၢ်ယီၤထီၣ်လံအဃိအ၀ဲသ့ၣ်ဟဲက့ၤအိၣ်၀ဲဖဲသ၀ီပူၤလၢ သ့ၣ်ခီၣ်ထံးတနီၤ,လၢကၠိပူၤတနီၤ,ဟံၣ်တဖျၢၣ်န့ၣ်အိၣ်ဖှိၣ်၀ဲ ခံဟံၣ်သၢဟံၣ်ဒ်န့ၣ်လီၤ.မ့၀ံၤဟံၣ်လၢအဂၤတဖၣ်နါက့ထံဃိ အကျိၤဖဲအခၢၣ်သးတဘိဘျီ ခဲမဟိတနံၣ်အိၣ်တသ့လၢၤဘၣ်ကဘၣ်သုးလီၢ်သုးကျဲခဲလၢၥ်လီၤ. ခဲအံၤတၢ်လီၢ်န့ၣ်အိၣ်တ့ၢ်က့ၤ ထဲကၠိတကွဲးလီၤ.အဃိကၠိနါက့ခဲမဟိန့ၣ်ဘၣ်ယိၣ်လၢကဖျိးကွံၥ်.ပှၤကၠိဖိနါက့ခဲအံၤလဲၤထီၣ်က့ၤကၠိလၢကိတါကၠံသ၀ီလီၤ.ခဲမဟိဒုလ့ၤတက့ၤအိၣ်တသ့လၢၤဘၣ်အနီၢ်ကီၢ်လီၤ.”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကီၢ်ခါခဲအံၤစ့ၣ်ခၠီသ၀ီဖိတဖၣ်လၢကက့ၤသူၣ်ထီၣ်က့ၤအဒူသ၀ီလၢတၢ်လီၢ်အဂၤတတီၤအဂီၢ်လိၣ်ဘၣ်၀ဲဒၣ်ဟီၣ်ခိၣ်တၢ်လီၢ် တၢ်ကျဲအသိးဘၣ်ဃးတၢ်ဂ့ၢ်ကီလၢကမျၢၢ်သဂၢၢ်ဘၣ်၀ဲခဲအံၤတဖၣ်ဒူသ၀ီဘၣ်မူဘၣ်ဒါပၥ်ဖျါတီၣ်ဖျါထီၣ်တၢ်ဂ့ၢ်တၢ်ကျိၤ တၢ်အိၣ်သးဆူကီၢ်ဆၣ်ပှၤဘၣ်မူဘၣ်ဒါအအိၣ်လံအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤ. စ့ၣ်ခၠီသ၀ီအံၤအပူၤကွံၥ်တၢ်စူၤထံဒိၣ်ထီၣ်ကဲထီၣ်တ့ၢ်အသးအိၣ်၀ဲတလီၢ်လီၢ်ဘၣ်ဆၣ် သ၀ီဒီတဖျၢၣ်ဘၣ်သုးလီၢ်သုးကျဲ ပၢၢ်တုၤလၢက့ၤအိၣ်တသ့လၢၤဘၣ်ဒ်အံၤကဲထီၣ်တ့ၢ်အသးတအိၣ်နီတဘျီဒံးဘၣ်ဒီးတၢ်ကဲထီၣ်သးဒ်အံၤမ့ၢ်ဒၣ်အဆိကတၢၢ် တဘျီလီၤအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ. ဒ်န့ၣ်အသိးသ၀ီဖိတဖၣ်ခီဖျိဆဲးအိၣ်လၢအဒူသ၀ီအဟံၣ်အဃီတသ့လၢၤဘၣ်ဒီးလၢကတ့ထီၣ်အဟံၣ်လၢ တၢ်လီၢ်အဂၤအဂီၢ် အ၀ဲသ့ၣ်အိၣ်ကတဲၤကတီၤထီၣ်သးရိၢ်လီၤဃၥ်အဟံၣ်အဃီလံဘၣ်ဆၣ် တၢ်ဂ့ၢ်တၢ်ကျိၤလၢတၢ်တီၣ်ထီၣ်ဃၥ်၀ဲတဖၣ် တၢ်ဖီခိၣ် ခိၣ်နၢ်တၢ်ဆၢတဲၥ်တၢ်နဲၣ်လီၤမ့အိၣ်မးသ၀ီဖိစးထီၣ်တ့ထီၣ်ဘှီထီၣ်အဟံၣ်အဃီလၢတၢ်လီၢ်လၢအသီအံၤကသ့၀ဲလီၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. ဒ်ကီၢ်ရ့ၣ်တၢ်မၤနီၣ်စရီပူၤအိၣ်၀ဲအသိးန့ၣ်...
(KTLA)ဖီၣ်မူဒံးသုးကီၣ်ကးအပှၤ(၁၄)ဂၤအကျါပၣ်ဃုၥ်သုးဒ့ခိၣ်(၁)ဂၤ
လါနိၣ်ဝ့ဘၢၣ် ၂၉သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်,ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်ကီးတရံးကီၢ်ဆၣ်ရၤမတံကလံၤထံးဂီၤလ့ၤဟီၣ်ကဝီၤအပူၤ,မဟါလါနိၣ်ဝ့ဘၢၣ်(၂၈)သီအနံၤအပူၤ(KTLA)ကီၢ်သူလ့ၤသုးမုၢ်ဒိၣ်ဖီၣ်မူဒံးဝဲသုးကီၣ်ကးအပှၤ(၁၄)ဂၤအကျါပၣ်ဃုၥ်ဒီးအသုးဒ့ခိၣ်(၁)အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ. သုးကီၣ်ကးအပှၤတဖၣ်အံၤဒ်သိးကဒိးန့ၢ်ဘၣ်တၢ်ဘံၣ်တၢ်ဘၢလၢဟီၣ်ကဝီၤပူၤအဂီၢ်အဲၣ်ဒိးဖီၣ်လိၥ်စုမၤသကိးတၢ်ဒီးတၢ်ပၢၢ်ဆၢသုးပၥ်ဖှိၣ်ကရူၢ်တဖၣ်အိၣ်ဝဲဒၣ်ဘၣ်ဆၣ်,မ့မ့ၢ်လၢကတူၢ်ဃၣ်သးပၥ်လီၤစုကဝဲၤအဂီၢ်တခီအသးတအိၣ်ဝဲဘၣ်အဃိတၢ်ဖီၣ်မူဒံးကွံၥ်အဝဲသ့ၣ်တဖၣ်အဂ့ၢ်,(KTLA)ကီၢ်သူလ့ၤသုးမုၢ်ဒိၣ်,ဟီၣ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“သုးကီၣ်ကးအသုးဒ့ခိၣ်တဂၤအံၤ,အပူၤကွံၥ်တဲဘၣ်ဝဲပှၤကိးဖုဒဲးလၢအသါကမၤသကိးတၢ်လီၤ.ဘၣ်ဆၣ်,ပခိးအသုတလါဝံၤတလါနါက့တပၢၢ်ထီၣ်ဘၣ်.ပသ့ၣ်ညါလၢအိၣ်ဒၣ်ထဲလၢကဟံတၢ်ဆဲးကျိးဒီးပှၤ,လၢအသုကဒိးန့ၢ်ဘၣ်တၢ်ဟးထီၣ်ဟးလီၤတၢ်ဘံၣ်တၢ်ဘၢလၢဟီၣ်ကဝီၤအပူၤလီၤ.အဃိန့ၣ်,ပကွၢ်အတၢ်အိၣ်သးတဘၣ်ဂီၢ်ဘၣ်အဃိပမၢ်လိၥ်အီၤဒီးဖီၣ်တံၢ်ဃၥ်အီၤတဘျီဃီလီၤ.ဝံၤဒီးပမၢကိးလီၤအပှၤကိးဝဲတန့ၢ်အဃိ,ပခိးလဲၤဖီၣ်က့ၤလၢအပှၤလဲၤဒၢၣ်ထံဖဲ(ရွှ့ၣ်အ့မၠဲၣ်)သီခါဖၠၣ်တနီၤ.ဒီးခဲအံၤပဖီၣ်န့ၢ်(၁၄)ဂၤန့ၣ်လီၤ”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါ,ပယီၤသုးလၢတၢ်ဖီၣ်န့ၢ်ဝဲတဖၣ်အံၤမ့ၢ်ဝဲ(ခမရ)(၅၈၅)အပှၤလၢအိၣ်ခိးဝဲတၢ်ဘံၣ်တၢ်ဘၢဖဲအူးကရ့ၢ်ထၣ်,ဂီၤလ့ၤဒီးဆူးကလံကျဲတြၢ်ပူၤဒီးပှၤသ့ၣ်တဖၣ်အံၤအတၢ်အိၣ်ခိးလီၢ်အပူၤ,နီၢ်ဂံၢ်ခဲလၢၥ်အိၣ်ဝဲ(၂၄)ဂၤဘၣ်ဆၣ်,ခီဖျိတၢ်ဖီၣ်ကွံၥ်ဝဲ(၁၄)ဂၤဒီးတနီၤက့ၤဃ့ၢ်လီၤစှၤကွံၥ်ဝဲဆူအိးကရ့ၣ်ထၣ်သုးကလၢၤအပူၤအဃိ,တကီၢ်ခါခဲအံၤအိၣ်တ့ၢ်က့ၤထဲ(၇)ဂၤအဂ့ၢ်,အဝဲစံးဝဲဒၣ်န့ၣ်လီၤ. တကးဒံးဘၣ်,ပယီၤသုးလၢတၢ်ဖီၣ်န့ၢ်ဝဲတဖၣ်အံၤတကီၢ်ခါခဲအံၤတၢ်ဆှၢထီၣ်ကွံၥ်အဝဲသ့ၣ်တဖၣ်ဆူ(KTLA)လီၢ်ခၢၣ်သးဝဲၤလီၢ်ခိၣ်သ့ၣ်ပှၤဘၣ်မူဘၣ်ဒါတဖၣ်အစုပူၤလံဒီးမဟါတၢ်ဖီၣ်န့ၢ်ဝဲပယီၤသုးပှၤအိၣ်ခိးတၢ်ဘံၣ်တၢ်ဘၢတဖၣ်အံၤဝံၤအလီၢ်ခံ,သုးကီၣ်ကးတကပၤအဝီၢ်လ့ၤဒုးယၤသုးကလၢၤခးလီၤစိဝဲကျိဖိကျိဖးဒိၣ်အိၣ်ဝဲအသိး,ကဘီယူၤဟဲခးလီၤစ့ၢ်ကီးတၢ်အိၣ်ဝဲအဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. တကတီၢ်ဃီ,ဂီၤလ့ဟီၣ်ကဝီၤအပူၤပယီၤသုးတဖၣ်အံၤတကီၢ်ခါခဲအံၤအတၢ်လီၢ်ဒ်အမ့ၢ်,ဘျၢၣ်ဒိၣ်,သ့ၣ်ဘီဘိ,လ့ဂီၤ,အူးကရ့ၣ်ထၣ်,ကနဲလ့,ထံကပျၢၤ,မီခံ,ဘယ့ၣ်နီၤကိတဖၣ်အိၣ်ဒံးဝဲဒၣ်အဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဒီးဂီၤလ့ဒုးယၤသုးကလၢၤအပူၤအံၤခမရ(၅၈၅)(၅၅၉)ဒီး(၅၅၅)တဖၣ်ပၥ်ဖှိၣ်သးအိၣ်ဆိးဝဲဒီအပှၤနီၢ်ဂံၢ်အိၣ်ဝဲ(၂၀၀)ဂၤအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. ဒ်န့ၣ်အသိး,သုးကီၣ်ကးဂီၤလ့ၤဒုးယၤသုးကလၢၤအံၤဒ်အမ့ၢ်ဝဲဒုးယၤသုးကလၢၤဖးဒိၣ်တဖျၢၣ်အသိး,ဒ်သိးကဆှၢဝဲတၢ်အီၣ်တၢ်အီဆူအသုးကလၢၤ,အတၢ်လီၢ်တတီၤဘၣ်တတီၤအဂီၢ်,အပူၤကွံၥ်လဲၤလီၤပှ့ၤဝဲတၢ်ဆူဂီၤလ့ၤဝ့ၢ်ပူၤအိၣ်ဝဲထီဘိဒီးဖဲလါအီးကထိဘၢၣ်အပူၤတၢ်ပၢၢ်ဆၢသုးပၥ်ဖှိၣ်ခိးခးအဝဲသ့ၣ်လၢကျဲၤတီၤအိၣ်ဝဲအဃိ,အပှၤသုးဖိ(၂)ဂၤသံကွံၥ်ဝဲအသိး,ခမရ(၅၈၅)အသုးရ့ၣ်ခိၣ်ဒီး အမတ(၃၁၆)အသုးရ့ၣ်ခိၣ်ခံသ့ၣ်တဖၣ်ဘၣ်ဒိဒံးဘၣ်ထံးကဲထီၣ်သးအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.
ချၢၣ်ဃဲၤ BGF သုးကလၢၤအဃိ သ၀ီဖိက့ၤဟံၣ်တဘူၣ်ထံၣ်ဘၣ်တၢ်ကီတၢ်ခဲဒီးအဲၣ်ဒိးလၢကထုးကွံၥ်သုးကလၢၤ
လါနိၣ်၀့ဘၢၣ် ၂၉ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် ဘူၣ်ပြၢးကရူၢ်အပူၤ ခီဖျိလၢချၢၣ်ဃဲၤ(BGF) သုးကလၢၤအံၤအဃိ တုၤလၢခဲအံၤသ၀ီဖိတဖၣ်က့ၤဆူအဟံၣ်အဃီတဘူၣ်ဒံးဘၣ်,ထံၣ်ဘၣ်တၢ်ကီတၢ်ခဲဒီး အဲၣ်ဒိး၀ဲလၢတၢ်ကထုး ကွံၥ်သုးကလၢၤအံၤအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤ. ဖဲ(၂၀၂၁)သုးဟံန့ၢ်တၢ်စိတၢ်ကမီၤ၀ံၤလီၢ်ခံ ဖဲလါမးရှးအခါန့ၣ် လၢချၢၣ်ဃဲၤသ၀ီအပူၤ ပယီၤသုးဒီး(BGF)သုးပၥ်ဖှိၣ် နုၥ်လီၤဆ့ၣ်နီၤ အိၣ်၀ဲလၢသ၀ီပူၤတ့ထီၣ်ဘှီထီၣ်ဆီလီၤ၀ဲအသုးကလၢၤဒီးလၢအတၢ်တ့ထီၣ်သုးကလၢၤအံၤဖီခိၣ်ပၣ်ဃုၥ်၀ဲပှၤသ၀ီဖိအဟံၣ်အဃီတၢ်သူထီၣ်တစှၤန့ၢ်(၂၀)ဖျၢၣ်ဘၣ်အဃိသ၀ီဖိလၢအိၣ်သုးကလၢၤအခိၣ်အဃၢၤတဖၣ်ပျံၤတၢ်ဖုးတၢ်ဘၣ်ဟးစံၣ်အိၣ်လၢဒူသ၀ီအဂၤတုၤလၢခဲအံၤ တက့ၤဘၣ်လၢအဟံၣ်အဃီန့ၢ်၀ဲ(၃)နံၣ်ဘျဲၣ်လံအဂ့ၢ်န့ သ့ၣ်ညါဘၣ်န့ၣ်လီၤ. လၢသုးကလၢၤအံၤအဃိသ၀ီဖိတဖၣ်ခီဖျိဘၣ်ဟးစံၣ်အိၣ်လၢပှၤဒူသ၀ီတၢ်ဆၢကတီၢ်ယံၤထီၣ်လံအဃိ တၢ်ကီတၢ်ခဲအိၣ်ထီၣ်လၢ တၢ်အိၣ်တၢ်ဆိးအမဲၥ်ညါလၢကဖံးအီၣ်မၤအီၣ်အဂီၢ်စ့ၢ်ကီးတၢ်လီၢ်တၢ်ကျဲတအိၣ်ဘၣ်အဖီခိၣ် ကမျၢၢ်တဖၣ်အဲၣ်ဒိး၀ဲလၢ တၢ်ကထုးကွံၥ်သုးကလၢၤအံၤအဂ့ၢ်န့ၣ် ချၢၣ်ဃဲၤသ၀ီဖိတဖၣ် စံး၀ဲန့ၣ်လီၤ. ဘၣ်ဃးတၢ်ဂ့ၢ်အံၤန့ၣ် ချၢၣ်ဃဲၤသ၀ီဖိပိၥ်မုၣ်လၢအဘၣ်ကွၢ်ဆၢၣ်မဲၥ်၀ဲတၢ်ဂ့ၢ်ကီအံၤတဂၤ စံး၀ဲလၢ“(BGF)န့ၣ် ဟဲတ့ထီၣ် အသုးကလၢၤဖဲပဟံၣ်ကပၤန့ၣ်မီၤနီၤ.အ၀ဲသ့ၣ်ဂၢၤတၢ်န့ၣ်ပၣ်ဃုၥ်ပဟံၣ်အဃိပအိၣ်တသ့လၢၤဘၣ်ဘျီ ပဟးစံၣ်အိၣ်က့ၤလၢ အဂၤန့ၣ်.ပဟးစံၣ်အံၤန့ၢ်ခံနံၣ်ဘျဲၣ်လံ.၀ဲဒၣ်ပအဲၣ်ဒိးဘၣ်သးလၢအိၣ်ဖဲန့ၣ်လၢၤတဂ့ၤ,သုးလီၢ်လၢတၢ်လီၢ် အဂၤ.အ၀ဲသ့ၣ် အိၣ်တၢ်န့ၣ်လၢသ၀ီပူၤတီတီ,ဘၣ်ပၠးလၢပှၤဟံၣ်ဘျီတကဲးစ့ၢ်ဘၣ်.မ့ဆဲးအိၣ်ဒ်အံၤဒုတစိၤလၢပှၤပကဟးအိၣ်လၢအဂၤဒီးပတၢ်လီၢ်တၢ်ကျဲတအိၣ်ဘၣ်.နဟးအိၣ်လၢပှၤသ၀ီဒီးနဘၣ်ဖံးအီၣ်မၤအီၣ်စ့ၢ်.ခဲအံၤနဟးအိၣ်လၢပှၤသ၀ီဘျီနဖံးအီၣ်မၤအီၣ်တၢ်သ့၀ဲလဲၣ်.” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကးဒံးဘၣ်ဖဲ(BGF)နုၥ်လီၤအိၣ်၀ဲအခါန့ၣ် လၢကတ့ထီၣ်အသုးကလၢၤတၢ်သူၣ်ထီၣ်အဂီၢ် ဟံန့ၢ်ဆူၣ်၀ဲသ၀ီဖိဟံၣ်ပူၤ တၢ်ဖိတၢ်လံၤ,ဟံၣ်ထူၣ်,၀ၣ်သ့ၣ်တဖၣ်ဒီးဒ်န့ၣ်အသိးလၢအ၀ဲသ့ၣ်တၢ်လီၢ်အခိၣ်အဃၢၤန့ၣ်ဒိးလီၤဃၥ်၀ဲမ့ၣ်ပိၢ်အိၣ်၀း၀းတရံးအဃိ ပှၤကမျၢၢ်ဃုၥ်ဒီးဆၣ်ဖိကီၢ်ဖိဘၣ်ဒိဘၣ်ထံးအိၣ်၀ဲအသိး ကယဲၢ်မ့ၢ်သ၀ီဖိလၢအိၣ်ဘူးဖဲန့ၣ်တဖၣ်ဟးစံၣ်အိၣ်ကဒုသးခဲလၢၥ်လီၤ အဂ့ၢ်န့ၣ် လီၢ်က၀ီၤကမျၢၢ်လၢအဂၤတဂၤစ့ၢ်ကီး စံး၀ဲဒ်အံၤန့ၣ်လီၤ. “ဖဲပဟံၣ်တၢ်ခံလီၤတကုးန့ၣ်ပှၤအိၣ်တဘူၣ်နီတဂၤလၢၤဘၣ်.ဘၣ်မနုၥ်လဲၣ်န့ၣ်ဟံၣ်ခိၣ်ဟံၣ်ဃၢၤန့ၣ်ပှၤဒိးလီၤဃၥ်မ့ၣ်ပိၢ်. မ့ၣ်ပိၢ် ဘၣ်ပှၤသ၀ီဖိတဂၤဖဲအက့ၤဒ့အီၣ်ပနွဲၢ်သၣ်အခါန့ၣ်ဘၣ်အခီၣ်.မ့မ့ၢ်လၢကျီၢ်ပနၢ်,မဲးတဲးလဲး,ထီဖိတဖၣ်ဒုဘၣ်ဒီဒူၣ်.တၢ်ခိၣ်တၢ်ဃၢၤဖဲန့ၣ်န့ၣ်ပှၤလဲၤတဘူၣ်နီတဂၤဘၣ်.မ့၀ံၤအ၀ဲသ့ၣ်ဟဲအိၣ်အခါန့ၣ်ဟံပှၤသ့ၣ်ပှၤ၀ၣ်,ပှၤဟံၣ်ဖီလၥ်လၢပှၤပၥ်ဃၥ်ခူၣ်,ဘံၣ်ဒိၣ်တဖၣ်န့ၣ်ဟံ၀ဲခဲလၢၥ်လီၤ.ကယဲၢ်မ့ၢ်သူသ့န့ၣ်ဟံ၀ဲခဲလၢၥ်လီၤ.မ့ၢ်အမၤမနုၥ်လဲၣ်ဒုတသ့ၣ်ညါဘၣ်.ခဲအံၤပဘၣ်သးက့ၤအိၣ်လၢပကစၢ်ဟံၣ်က့ၤအိၣ်တဘူၣ်ဘၣ်.ဘၣ်ဟးအိၣ်လၢပှၤတ၀ီအံၤတနံၣ်၀ံၤတနံၣ်ခဲအံၤကဲထီၣ်သၢနံၣ်ဒီးလံ.တလီၤဆီနီမံၤဘၣ်,မ့ၢ်ကဘၣ်အိၣ်ဒီးဖးယံၤဧါတသ့ၣ်ညါဘၣ်.”အဂ့ၢ်န့ၣ် စံး၀ဲန့ၣ်လီၤ. ဒ်န့ၣ်အသိး(BGF)သ့ၣ်တဖၣ်အံၤသိလ့ၣ်လၢအလ့ၢ်ထီၣ်လ့ၢ်လိၤဖဲန့ၣ်တဖၣ်အ၀ဲသ့ၣ်အိၣ်ခိးသမံသမိးတၢ်,ခိးထၢ၀ဲတၢ်ခိတၢ်သွဲဒီး တကးဒံးဘၣ်လၢအ၀ဲသ့ၣ်ဟဲအိၣ်ဆီလီၤသးဒ်အံၤအဖီခိၣ် ကဲထီၣ်တၢ်နိးတၢ်ဘျးလၢကမျၢၢ်တၢ်ဟးထီၣ်က့ၤလီၤအမဲၥ်ညါ ကၠိစ့ၢ်ကီးတၢ်အိးထီၣ်၀ဲတဘူၣ်လၢၤဘၣ်တုၤလၢခဲအံၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ. ဒ်လီၢ်က၀ီၤပှၤဘၣ်မူဘၣ်ဒါစံး၀ဲအသိးန့ၣ်...
နိၣ်ဖိကညီဘၣ်ကီဘၣ်ခဲဒဲကဝီၤအပူၤ,မ့ၣ်အူအီၣ်ဟံၣ်(၃)ဖျၢၣ်
လါနိၣ်ဝ့ဘၢၣ် ၂၈သီ, ၂၀၂၄နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်,ကီၢ်ပယီၤကီၢ်ဆၢတးကီၢ်ရ့ၣ်,အူးဖၣ်ကီၢ်ဆၣ်,နိၣ်ဖိကညီဘၣ်ကီဘၣ်ခဲဒဲကဝီၤအပူၤ,တနံၤအံၤလါနိၣ်ဝ့ဘၢၣ်(၂၈)သီအနံၤအပူၤမ့ၣ်အူအီၣ်ကွံၥ်ဝဲကဝီၤဒ့(၆)အပူၤ,ပှၤဒဲကဝီၤဖိအဟံၣ်(၃)ဖျၢၣ်အဂ့ၢ်,ဒဲကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ. နိၣ်ဖိကညီဘၣ်ကီဘၣ်ခဲဒဲကဝီၤ,ကဝီၤဒ့(၆)အံၤဟံၣ်ခိၣ်အိၣ်ဝဲအဖျၢၣ်(၁၂၀)ဘျဲၣ်ဃၣ်ဃၣ်ဒီးတနံၤအံၤဂီၤခီ(၉)နၣ်ရံၣ်ဘျဲၣ်အဆၢကတီၢ်,တၢ်သွီလီတဲစိဂံၢ်(ပျးပီး)စးထီၣ်အူအီၣ်ဝဲအဃိမ့ၣ်အူအီၣ်ကွံၥ်ဝဲဟံၣ်(၃)ဖျၢၣ်သတူၢ်ကလၥ်အဂ့ၢ်,နိၣ်ဖိကညီဘၣ်ကီဘၣ်ဒဲကဝီၤ,အဒဲကဝီၤခိၣ်စီၤကၠီၤဝီၤစံးဝဲဒ်အံၤန့ၣ်လီၤ. အဝဲစံးဝဲလၢ“ကဲထီၣ်သးလၢကဝီၤဒ့(၆)အပူၤ,ဖဲတဂီၤအံၤ(၉)နၣ်ရံၣ်ဘျဲၣ်အဆၢကတီၢ်လီၤ.ကဲထီၣ်သးအခီၣ်ထံးခီၣ်ဘိလၢပျးပီးအူအီၣ်ထီၣ်အဃိလီၤ.လၢတၢ်န့ၣ်အဃိအူၣ်အီၣ်ဟးဂီၤကွံၥ်ဝဲဟံၣ်(၃)ဖျၢၣ်လၢတၢ်တအိၣ်တ့ၢ်နီတမံၤလၢၤဘၣ်န့ၣ်လီၤ.ကဝီၤဒ့(၆)အပူၤအံၤန့ၣ်ဟံၣ်အိၣ်(၁၂၀)ဘျဲၣ်.ပှၤဟံၣ်အူအီၣ်သၢဖျၢၣ်အပူၤဟံၣ်ဒူၣ်တဒူၣ်န့ၣ်,ကအိၣ်စှၤကတၢၢ်ကအိၣ်(၅)ဂၤန့ၣ်လီၤ.မ့ၣ်အူအီၣ်ထီၣ်အဆၢကတီၢ်ဟံၣ်ပူၤပှၤတအိၣ်နီတဂၤဘၣ်.”အဂ့ၢ်စံးဝဲန့ၣ်လီၤ. လၢန့ၣ်အမဲၥ်ညါ,မ့ၣ်အူအီၣ်ကွံၥ်ဝဲဟံၣ်သၢဖျၢၣ်အကျါပၣ်ဃုၥ်ဒီးဒဲကဝီၤပှၤပၢၤစ့ပှၤဘၣ်မူဘၣ်ဒါအဟံၣ်အဃိ,ဒဲကဝီၤကျိၣ်စ့တနီၤပၣ်ဃုၥ်ဝဲအသိး,ဟံၣ်လၢအအိၣ်ဘူး(၄)ဖျၢၣ်ဘၣ်ဟးဂီၤဝဲတဆံးတက့ၢ်အိၣ်ဝဲအဂ့ၢ်,နိၣ်ဖိဒဲကဝီၤခိၣ်စံးအါထီၣ်ဝဲဒၣ်န့ၣ်လီၤ. တကတီၢ်ဃီ,ဒဲကဝီၤဖိလၢအဟံၣ်အူအီၣ်ကွံၥ်ဝဲတဖၣ်အံၤ,ကဝီၤဒ့ခိၣ်နၢ်ဒီးဒဲကဝီၤပှၤဘၣ်မူဘၣ်ဒါတဖၣ်ရဲၣ်ကျဲၤန့ၢ်က့ၤအဝဲသ့ၣ်တဖၣ်လၢကဒိးန့ၢ်ဘၣ်က့ၤဂ့ၢ်ဝီၢ်အူတၢ်သူၣ်ထီၣ်ပီးလီလၢ(TBC)ဟ့ၣ်လီၤဝဲတဖၣ်အိၣ်ဝဲအဂ့ၢ်,ဒဲကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ. နိၣ်ဖိကညီဘၣ်ကီဘၣ်ခဲဒဲကဝီၤအံၤ,ဒ်သိးမ့ၣ်အူအီၣ်တၢ်,သုတကဲထီၣ်တဂ့ၤအဂီၢ်ဒဲကဝီၤပှၤဘၣ်မူဘၣ်ဒါတဖၣ်ဟ့ၣ်ပလီၢ်ဝဲပှၤဒဲကဝီၤဖိတဖၣ်အိၣ်ဝဲထီဘိအသိး,ဒ်သိးကတြီဆၢမ့ၣ်အူအီၣ်တၢ်သတူၢ်ကလၥ်အဂီၢ်ကဝီၤဒ့ကိးဘ့ၣ်ဒဲးအပူၤပၥ်လီၤဝဲဂ့ၢ်ဝီအူ(တၢ်မၤသံမ့ၣ်အူ)(မံသၣ်ပိ)တဖၣ်အိၣ်ဝဲအသိး,နဲၣ်လီၤဝဲဒဲကဝီၤဖိတဖၣ်လၢဟံၣ်ကိးဖျၢၣ်ဒဲးအပူၤဂ့ၢ်ဝီၢ်အူတၢ်မၤပံၥ်မ့ၣ်အူအဂီၢ်,ထံဘိၣ်တဖၣ်ကဘၣ်အိၣ်ဝဲဒၣ်အဂ့ၢ်,သ့ၣ်ညါဒ်ကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ. ဒ်န့ၣ်အသိး,နိၣ်ဖိကညီဘၣ်ကီဘၣ်ခဲဒဲကဝီၤအံၤအိၣ်သူၣ်လီၤဝဲအသးဖဲ(၁၉၉၇)နံၣ်ဒီးတကီၢ်ခါခဲအံၤကဝီၤဒ့ခဲလၢၥ်အိၣ်ဝဲ(၁၇)ဘ့ၣ်ဒီး,ဒဲကဝီၤဖိအနီၢ်ဂံၢ်ဒွးခဲလၢၥ်အိၣ်ဝဲ(၉၀၀၀)ခွံကထိဘျဲၣ်အဂ့ၢ်,(KRC)ကညီဘၣ်ကီခဲကမံးတံၥ်ဒဲကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ.