Home တၢ်ကစီၣ် (KNLA)လီၢ်ခၢၣ်သး ပ့ၢ်ဆှါခိၣ် သုးခိၣ်ဒိၣ်စီၤဘးခဲးလဲၤပူၤကွံာ် တၢ်ပာ်လီၤက့ၤအီၤ၀ံၤ

(KNLA)လီၢ်ခၢၣ်သး ပ့ၢ်ဆှါခိၣ် သုးခိၣ်ဒိၣ်စီၤဘးခဲးလဲၤပူၤကွံာ် တၢ်ပာ်လီၤက့ၤအီၤ၀ံၤ

868
0

လါယူၤလံ၁၃သီႇ ၂၀၁၉နံၣ်ႇ စးအဲၣ်စူ

ကညီဒီကလုာ်စၢဖှိၣ်ကရၢ ခ့ၣ်အဲၣ်ယူၣ်တၢ်တီခိၣ်ရိၣ်မဲဖီလာ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လီၢ်ခၢၣ်သးပ့ၢ်ဆှါခိၣ် သုးခိၣ်ဒိၣ်စီၤဘခဲးအံၤ စူးကွံာ်အသးဖဲလါယူၤလံ၁၁အနံၤဒီး တၢ်ပာ်လီၤက့ၤအ၀ဲတၢ်ရဲၣ်တၢ်ကျဲၤအံၤ ဘၣ်တၢ်မၤအီၤဖဲလါယူၤလံ၁၃သီ(KNLA) သုး၀ဲၤလီၢ်ခိၣ်သ့ၣ်သ့ၣ်ဘ့ၣ်ထၣ်န့ၣ်လီၤ.

စီၤဘးခဲးလၢအသးနံၣ်အိၣ်၆၇နံၣ်အံၤ ဟ့ၣ်၀ဲတၢ်သိၣ်လိလၢသုးက့(၅)ဘၣ်ဃးတၢ်ဘံၣ်တၢ်ဘၢ၀ံၤႇ ဖဲအ၀ဲက့ၤမံအိၣ်ဘှံး ဟါလီၤ(၃)နၣ်ရံၣ်ကတီၢ် စူးကွံာ်အသးခီဖျိသွံၣ်ထီၣ်တၢ်ဆါအဂ့ၢ်ၦၤလၢအဘူးဒီးအီၤတဖၣ်တဲ၀ဲန့ၣ်လီၤ.

“အ၀ဲစူးကွံာ်သးကတီၢ် ဒ်ပသ့ၣ်ညါအသိးအ၀ဲဟ့ၣ်တၢ်သိၣ်လိလီၤႇ အ၀ဲနာ်က့သ့ၣ်ညါလီၤအသးလီၤႉ တၢ်လၢအ၀ဲကဘၣ်သိၣ်လိတဖၣ် ဟ့ၣ်လီၤ၀ဲတၢ်ဆၢ ကတီၢ်အါန့ၣ်အလီၢ်၀ံၤသိၣ်လိ၀ဲတုၤအ၀ံၤန့ၣ်လီၤႇ သိၣ်လိ၀ဲ၀ံၤ ဖဲအ၀ဲက့ၤအိၣ်ဘှံးကတီၢ် မံဘၣ်အသးဒီးစူးကွံာ်အသးလီၤ”အဂ့ၢ်သုးခိၣ်လၢအိၣ်ဘူးဒီးအီၤတဂၤတဲဘၣ်ခ့ၣ်အဲၣ်စံၣ်န့ၣ်လီၤ.

သုးခိၣ်ဒိၣ်စီၤဘးခဲးအံၤ စးထီၣ်နုာ်လီၤတၢ်ပၢၢ်ဆၢဖဲ ၁၉၇၂နံၣ်၀ံၤ စးထီၣ်ဖီၣ်ထီၣ်မူဒါဒ်သိၣ်ဒူဖိတဂၤအသိးဒီး တုၤစူးကွံာ်သးတစု မ့ၢ်သုးခိၣ်တဂၤလၢၢအဟံး ထီၣ်ဖီၣ်ထီၣ်မူဒါလၢအဂ့ၤတဂၤလီၤအဂ့ၢ် အ၀ဲၦၤမၤသကိးတၢ်သုးခိိၣ်တဖၣ် ပာ်ပနီၣ်အီၤန့ၣ်လီၤ.

(KNLA)သုးခိၣ်ဒိၣ်စိတဂၤလၢအမ့ၢ်စီၤလးငွ့ၣ်တဲ၀ဲ“တၢ်ပၢဆၢလၢမုၢ်မဆါတနံၤညါအံၤ အတၢ်အိၣ်သးအိၣ်ဒ်လဲၣ်သနာ်က့ ထံၣ်၀ဲလၢအဂ့ၤ မၤလိန့ၢ်တၢ်လၢတၢ်တဂ့ၤဘၣ်တဖၣ်၀ံၤ နာ်၀ဲဒၣ်လၢတၢ်ပၢၢ်ဆၢအံၤ ကတုၤဖီတၢၣ်အမ့ၢ်အတီလီၤႉ နာ်၀ဲဒၣ်လၢ ပၦၤကလုာ်ကဘၣ်ထူၣ်ဖျဲး၀ံၤ မၤ၀ဲဒၣ်လၢသးအနီၢ်ကီၢ်လီၤ မ့ၢ်သုးခိၣ်အဂ့ၤတဂၤလီၤႇ မ့ၢ်ခိၣ်နၢ်တဂၤလၢ ပမၤၦဲၤအလီၢ်တန့ၢ်ဘၣ်အဃိသးအုးလၢအ၀ဲအဂီၢ်ဒီးတကပၤန့ၣ် ဒုးအိၣ်ဖျဲၣ်ထီၣ်၀ဲ ခိၣ်နၢ်အဂ့ၤတဖၣ်အဃိသးမံန့ၣ်လီၤ”အဂ့ၢ် တဲ၀ဲလီၤ.

သုးခိၣ်ဒိၣ်စီၤဘခဲးအံၤ ဟံးထီၣ်မူဒါဒ်အမ့ၢ် ပ့ၢ်ဆှါခိၣ်ႇ သုးရ့ၣ်ခိၣ်အမဲာ်ညါ တၢ်သိၣ်လိလၢအလိၣ်တဖၣ် ပၣ်ဃုာ်ဟ့ၣ်တၢ်သိၣ်လိ ဒ်တၢ်သိၣ်လိမူဒါခိၣ်တဂၤအသိးဒီး ဖဲ၂၀၁၂နံၣ် ကီၢ်ပဒိၣ်ဒီး ခ့ၣ်အဲၣ်ယူၣ်တဖၣ်မၤ၀ဲတၢ်မုာ်တၢ်ခုၣ်ကတီၢ် မ့ၢ်ၦၤလၢပၣ်ဃုာ်တဂၤအဂ့ၢ်သ့ၣ်ညါဘၣ်လီၤ.

အ၀ဲမ့ၢ်ၦၤလၢ ၀့ၢ်တကူၣ်ႇ အ့စ့ၣ်တၢ်လီၢ်ဒီး ဖျိထီၣ်၀ဲလံာ်စီဆှံကၠိလၢအ့စ့ၣ်၀ံၤ ဟဲနုာ်လီၤ၀ဲလၢကညီတၢ်ပၢၢ်ဆၢအပူၤန့ၣ်လီၤႇ ဖဲအ၀ဲစူးကွံာ်သးကတီၢ် အမၢၤနီၢ်မဲၢ်ရံၣ်စ့ႇ ဖိခွါ၂ဂၤ စီၤဘၣ်ဆိၣ်ဂ့ၤႇ စီၤဘၣ်တီ၀ါ ဃုာ်ဒီးအလံၤ၉ဂၤအိၣ်တ့ၢ်၀ဲအဂ့ၢ် သ့ၣ်ညါဘၣ်လီၤ.

တၢ်ပာ်လီၤ၀ဲစီၤဘခဲးတၢ်ရဲၣ်တၢ်ကျဲၤအပူၤ ကညီတၢ်ထူၣ်ဖဲးသုးမုၢ်ဒိၣ်(KNLA)ၦၤဘၣ်မူဘၣ်ဒါတဖၣ်ႇ တၢ်မၤလိဖိတဖၣ်ႇ စၢၤသွဲၣ်သီကၠိဖိတဖၣ်ဒီးအ၀ဲအဘူးအတံၢ်ၦၤသ့ၣ်ညါအီၤခဲလၢာ်၃၀၀ဃၣ်ဃၣ်ဟဲထီၣ်၀ဲန့ၣ်လီၤ.