လါအိးကထိဘၢၣ် ၁၀ သီႇ၂၀၁၉နံၣ်ႇန့ၣ်နီၣ်ႉ
ကီၢ်ကၠီၣ်တဲၣ်–ကီၢ်ပယီၤ ကီၢ်ဆၢ နီၢ်ဂံၢ် ၁ တိၤ ထံဂုၤကီၢ်ဂၤ ကီၢ်ဆၢတိၤအဖီခိၣ် ၦၤကီၢ်ချၢဖိ ဟဲနုာ်လီၤလၢ အဖိးသဲစးဒ်အမ့ၢ်(E.Visa-Electronic Visa) အံၤ တနံၣ်အံၤ လါယနူၤအါရံၤ တုၤလါစဲးပထ့ဘၢၣ် ၉ လါကတီၢ် ၦၤအနီၢ်ဂံၢ်အိၣ်၀ဲ ၁၉ႇ၇၄၃ ဂၤဒီး အါန့ၢ်ဒံး နံၣ်လၢအပူၤကွံာ် တပူ(တစး)အဂ့ၢ် သ့ၣ်ညါဘၣ်လၢ ၦၤဘၣ်မူဘၣ်ဒါလၢ တိၤ၀ဲန့ၣ်တဖၣ် အအိၣ်န့ၣ်လီၤႉ
ဟဲနုာ်လီၤ၀ဲလၢ ရၤမတံကီၢ်ဆၢတြဲၤ ဒ်အမ့ၢ် (E.Visa) ဟဲဟးလိာ်ကွဲဒီး မုၢ်ကျိၤ၀ဲၤကွာ်ၦၤကီၢ်ချၢဖိ လၢမဟိတနံၣ် ၂၀၁၈ နံၣ်အပူၤ မုၣ်ခွါခဲလၢာ် အနီၢ်ဂံၢ်အိၣ်၀ဲ ၈ႇ၁၈၇ ဂၤဒီး တနံၣ်အံၤ ၂၀၁၉ နံၣ်စးထီၣ် လါယနူၤအါရံၤတုၤ လါစဲးပထ့ဘၢၣ်ကတီၢ် နီၢ်ဂံၢ်အိၣ်၀ဲ ၁၉ႇ၇၄၃ ဂၤအဃိ အါန့ၢ်ဒံးမဟိတနံၣ် ၁၁ႇ၅၅၆ ဂၤန့ၣ်လီၤႉ
ရၤမတံ–မဲဆီးကီၢ်ဆၢ ထံဂုၤကီၢ်ဂၤ တၢ်နုာ်လီၤဟးထီၣ်တြဲၤအပူၤ တၢ်အိးထီၣ်ဃာ်၀ဲ (E.Visa)အံၤ စးထီၣ်လၢ ၂၀၁၆ နံၣ် လါအီကူး ၂၅ သီနံၤကတီၢ်ဒီး တုၤလၢလါဒံၣ်စ့ဘၢၣ်အလၢာ် ထံဂုၤကီၢ်ဂၤဖိတဖၣ် ဟဲနုာ်လီၤ၀ဲ ၁ႇ၀၉၈ ဂၤ၀ံၤ လၢန့ၣ်အမဲာ်ညါ ၂၀၁၇ နံၣ်အပူၤ ၦၤဟဲနုာ်လီၤလၢ မုၢ်ကျိၤ၀ဲၤကွၢ်တၢ်မၤ တအိၣ်ဘၣ်ဒီး ဟဲနုာ်လီၤဟးလိာ်ကွဲဒ် (Visa)အံၤ မုၣ်ခွါခဲလၢာ်အိၣ်၀ဲ ၅ႇ၆၆၇ ဂၤအဂ့ၢ် သ့ၣ်ညါဘၣ်လၢ တၢ်မၤနီၣ်မၤဃါအပူၤန့ၣ်လီၤႉ
တၢ်ဟ့ၣ်တၢ်ပျဲလၢ တၢ်နုာ်လီၤဟးထီၣ်လၢ (E.Visa)၀ံၤအလီၢ်ခံ ရၤမတံ–မဲၢ်ဆီး နီၢ်ဂံၢ်တၢတိၤ ထံဂုၤကီၢ်ဂၤ တၢ်နုာ်လီၤဟးထီၣ်တြဲၤအပူၤ ဖဲ၂၀၁၆ လါအီကူာ်၂၅သီ တုၤ ၂၀၁၉ နံၣ် လါစဲးပထ့ဘၢၣ်ကတီၢ် ၦၤကီၢ်ချၢဖိတဖၣ် ဟဲနုာ်လီၤလၢ (E.Visa)ခဲလၢာ်အိၣ်၀ဲ ၃၄ႇ၆၉၅ ဂၤဒီး ၦၤက့ၤဟးထီၣ်စ့ၢ်ကီး အိၣ်၀ဲအဂ့ၢ် သ့ၣ်ညါဘၣ်လီၤႉ
