လါယူၤ ၃ သီႇ ၂၀၂၁ နံၣ်ႇ ခ့ၣ်အဲးစံၣ်
ဒ်သိးသုတကဲထီၣ်သုးမီၤစိရိၤအတၢ်သူအီၣ်တဂ့ၤအဂီၢ် ကညီသးစၢ်ၦာ်ဘျးစဲထုးထီၣ်လံာ်ဟ့ၣ်ပလီၢ်၀ဲ ပကိကီၢ်ခီ ကညီလံာ်လဲၢ်တၢ်ဆဲးတၢ်လၤကမံးတံာ်ကရူၢ် ဖဲမဟါ(လါယူၤ ၂)သီအနံၤန့ၣ်လီၤႉ
လၢပကိကီၢ်ခီ ကီၢ်ဆၣ်တနီၤန့ၣ် သုးမီၤစိရိၤအံၤဟ့ၣ်၀ဲတၢ်ဆီၣ်သနံးဒီးနုာ်လီၤကရၢကရိ၀ဲဒၣ် လံာ်လဲၢ်ဒီးတၢ်ဆဲးတၢ်လၤကရူၢ်အံၤလၢ တကီၢ်ခါကၠိကက့ၤအိးထီၣ်ကဒါအံၤ မၢ၀ဲကၠိဖိမိၢ်ပၢ်တဖၣ်ဟဲအးကၠိဖိအမံၤဒီး ကသိၣ်လိ၀ဲလံာ်ကညီအဂ့ၢ်န့ၣ်် ပကိကီၢ်ခီ ကညီသးစၢ်ၦာ်ဘျးစဲ ၦၤကတိၤတၢ်ပၢတဂၤ စံးဘၣ်ခ့ၣ်အဲးစံၣ်=ကညီတၢ်ကစီၣ်ဒ်အံၤန့ၣ်လီၤႉ
အ၀ဲစံး၀ဲလၢ“လၢပကိကီၢ်ခီတၢ်လီၢ်တနီၤအပူၤန့ၣ် အိၣ်၀ဲဒၣ်လၢသုးမီၤစိရိၤတၢ်ပၢဖီလာ်လံႉ ကဲထီၣ်သုးမီၤစိရိၤအတၢ်သူအီၣ်လံႉ တၢ်လီၢ်တနီၤစ့ၢ်ကီး ခီဖျိကဲထီၣ်သုးမီၤစိရိၤအတၢ်သူအီၣ်ဟဲအါထီၣ်အဃိ ဘၣ်ထုးထီၣ်၀ဲလံာ်တၢ်ပာ်ဖျါအံၤလီၤႉ တကီၢ်ခါခဲအံၤ သုးမီၤစိရိၤစ့ၢ်ကီးဟ့ၣ်တၢ်ဆီၣ်သနံးအါထီၣ်လီၤ”အဂ့ၢ်န့ၣ် စံး၀ဲန့ၣ်လီၤႉ
ဘၣ်ထွဲဒီဒတၢ်ကဲထီၣ်သုးမီၤစိရိၤအတၢ်သူအီၣ်တၢ်ဂ့ၢ်တၢ်ကျိၤခီန့ၣ် ပကိကီၢ်ခီ ကီၢ်ဆၣ်တနီၤ ကရၢကရိဒုးအိၣ်ထီၣ်၀ဲ လံာ်လဲၢ်ဒီးတၢ်ဆဲးတၢ်လၤကရူၢ်လၢအသီဒီး ဖဲတၢ်က့ၤဒုးအိၣ်ထီၣ်ဒ်န့ၣ်အခါန့ၣ် ပၣ်ဃုာ်၀ဲဒၣ်ဒီးအပူၤကွံာ်ကရၢဖိတဖၣ်အသိး ပၣ်ဃုာ်၀ဲကရၢဖိအသီတဖၣ်စ့ၢ်ကီးဒီး အါဒၣ်တက့ၢ်န့ၣ် မ့ၢ်ၦၤသ့ၣ်တဖၣ်လၢအဘူးဒီးသုးမီၤစိရိၤတဖၣ်လီၤအဂ့ၢ်န့ၣ် ပကိကီၢ်ခီ ကညီသးစၢ်ၦာ်ဘျးစဲ စံး၀ဲန့ၣ်လီၤႉ
လၢန့ၣ်အမဲာ်ညါ ပကိကီၢ်ခီ ကညီသးစၢ်ၦာ်ဘျးစဲဟ့ၣ်ပလီၢ်၀ဲ ပကိကီၢ်ခီ ကညီလံာ်လဲၢ်ဒီးတၢ်ဆဲးတၢ်လၤလၢ တဘၣ်ဆဲးမၤတၢ်လၢသုးမီၤစိရိၤအနဲၣ်ကျဲအဖီလာ်တဂ့ၤဒီး မ့ၢ်ဆဲးမၤ၀ဲန့ၣ် တၢ်ဂ့ၢ်မ့ၢ်ဟဲကဲထီၣ်တမံၤလၢ်လၢ်န့ၣ် လ့ၤတက့ၤတဟံးမူဒါဘၣ်န့ၣ်လီၤႉ
လၢတၢ်ထီဒါပၢၢ်ဆၢသုးမီၤစိရိၤသနူအပူၤ ကညီလံာ်လဲၢ်ဒီးတၢ်ဆဲးတၢ်လၤအံၤ ကပာ်ဖှိၣ်ပၢၢ်ဆၢသကိးတၢ်ဃုာ်ဒီးပကညီသးစၢ်တဖၣ်စ့ၢ်ကီးအဂ့ၢ်န့ၣ် ပကိကီၢ်ခီ ကညီသးစၢ်ၦာ်ဘျးစဲ ဆီၣ်တခူထီၣ်၀ဲန့ၣ်လီၤႉ
ပကိကီၢ်ခီ ကညီသးစၢ်ၦာ်ဘျးစဲအံၤ ဒ်သိးကညီသးစၢ်ကဒဲကဒဲဆဲးကျိးလိာ်သးကန့ၢ်အဂီၢ်ဒီး ဒ်သိးကညီဒီကလုာ်ဂ့ၢ်၀ီအံၤ ကညီသးစၢ်တဖၣ်အဘၢၣ်စၢၤကဟ့ၣ်ခီဟ့ၣ်နီၤလိာ်သးအသ့အဂီၢ် တိာ်ပာ်ပညိၣ်၀ဲဒီး ကရၢကရိဒုးအိၣ်ထီၣ်၀ဲဖဲ ၂၀၁၂ နံၣ်န့ၣ်လီၤႉ
