လါအီကူး ၂၃ သီႇ ၂၀၂၂ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢမုၢ်တြီၢ်ကီၢ်ရ့ၣ်(သုးက့ ၅)ဟီၣ်က၀ီၤ ကတၢၢ်တံာ်သ၀ီကရူၢ်အပူၤ ဖဲမဟါလါအီကူး ၂၂ သီ ဂီၤခီ ၂ နၣ်ရံၣ်အဆၢကတီၢ်န့ၣ် ကညီဒီကလုာ်တၢ်ထူၣ်ဖျဲးသုုးမုၢ်ဒိၣ် (KNLA)သုးပာ်ဖှိၣ်နုာ်လီၤခး၀ဲသုးခိးကီၢ်ဆၢ(BGF)အိၣ်ခိးတၢ်လီၢ်တခါဖဲကည့ၤဒိၤတိၤအံၤအဃိ ဖဲန့ၣ်ခံခီခံကပၤသံ ဘၣ်ဒိဘၣ်ထံးအိၣ်၀ဲအဂ့ၢ်န့ၣ် သ့ၣ်ညါဘၣ်လၢသ၀ီဖိအအိၣ်န့ၣ်လီၤႉ
သုးခိးကီၢ်ဆၢ(BGF-၁၀၁၃)သုးကလၢၤဖိတခါလၢအိၣ်ကည့ၤဒိၤတိၤဖီခိၣ်လၢအိၣ်ဆီလီၤသးဖဲ ကတၢၢ်တံာ်သ၀ီကရူၢ်(ကဲတီ)သ၀ီကပၤ ဘီကၠိၣ်လဲၤသ၀ီပူၤအံၤ ဖဲကညီဒီကလုာ်တၢ်ထူၣ်ဖျဲးသုးမုၢ်(KNLA)သုးပာ်ဖှိၣ် နုာ်လီၤခးသုးကလၢၤယံာ်တခီနၣ်ရံၣ်ဃၣ်ဃၣ်အခါခီဖျိ(BGF)က့ၤခးလီၤကဒါကျိဖးဒိၣ်ဆူတၢ်ဒုးကဲထီၣ်လီၢ်အထံၣ်(၃၀)ဃၣ်ဃၣ်ညါအဃိ(KNLA)သုးပာ်ဖှိၣ်ဘၣ်ဂုၤက့ၤလီၢ်ခံအဂ့ၢ်န့ၣ် သ၀ီဖိတဖၣ်စံး၀ဲန့ၣ်လီၤႉ
တၢ်ဒုးကဲထီၣ်ဘျီ၀ဲန့ၣ်အပူၤ(BGF)တကပၤသံ၀ဲ(၂)ဂၤအသိးမ့မ့ၢ်(KNLA)သုးပာ်ဖှိၣ်တကပၤန့ၣ် ဘၣ်ဟ့ၣ်လီၤကွံာ်အသးမူ(၂)ဂၤအဂ့ၢ်န့ၣ် ကတၢၢ်တံာ်သ၀ီဖိတဂၤစံး၀ဲဒ်အံၤန့ၣ်လီၤႉ
“ကဘၣ်ဖဲဂီၤခီ ၂ နၣ်ရံၣ်န့ၣ်မီၤနီၤႉအခါဖဲန့ၣ်စးထီၣ်ခး၀ဲကျိဖးဒိၣ်ကျိဖိတဖၣ်မီၤနီၤႉဖဲကတၢၢ်တံာ်သ၀ီကျဲဟး ထီၣ်(ကဲတီ)သ၀ီကပၤန့ၣ်အိၣ်၀ဲဒီး(ကည့ၤဒိၤ)တိၤတဘိႉဖဲန့ၣ်(BGF)သုးကလၢၤဖိအိၣ်တဖျၢၣ်မီၤနီၤႉၦၤနုာ်လီၤခး၀ဲသုးကလၢၤ၀ဲန့ၣ်ႉကဲထီၣ်ဖးယံၤညါကအိၣ်လၢ(၁)နၣ်ရံၣ်ဃၣ်ဃၣ်ညါႉသုးကလၢၤလၢအိၣ်သ၀ီပူၤခးလီၤစၢၤကျိဖးဒိၣ်အဃိၦၤထီၣ်သ့သုးကလၢၤတန့ၢ်ဘၣ်ႉခးလီၤကျိဖးဒိၣ်ကအိၣ်လၢအဖျၢၣ်(၃၀)ဃၣ်ဃၣ်ညါႉခး၀ဲတပယူာ်ဃီလီၤႉ(BGF)သုးဘၣ်ဒိ(၂)ဂၤႉမ့မ့ၢ်(KNLA)တကပၤန့ၣ်အသံ(၂)ဂၤမီၤနီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်ဖဲမဟါန့ၣ်လီၤႉ
တၢ်ကဲထီၣ်သး၀ံၤအလီၢ်ခံ(BGF)ခးလီၤကျိဖးဒိၣ်ဆူဘီကၠိၣ်ထၣ်သ၀ီႇဘီကၠိၣ်လဲၤႇနၣ်ကၠီၣ်သ၀ီတဖၣ်အပူၤဒံးအဂ့ၢ်န့ၣ်သ၀ီဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
“ခးလီၤစၢၤ၀ဲကျိဖးဒိၣ်လၢကည့ၤဒိၤတိၤ(BGF)တြဲၤအိၣ်ခိးတၢ်လီၢ်စ့ၢ်မီၤနီၤႉလၢဘီကၠိၣ်ထၣ်ႇဘီကၠိၣ်လဲၤႇနၣ်ကၠီၣ်သ၀ီတကပၤန့ၣ်နါက့ခးလီၤ၀ဲကျိဖးဒိၣ်စ့ၢ်ႉကျိဖးဒိၣ်တနီၤန့ၣ်လီၤတဲာ်လၢသ၀ီပူၤအိၣ်ႉတနီၤန့ၣ်က့ၤလီၤတဲာ်ကဒါလၢအ၀ဲသ့ၣ်သုးဖိအိၣ်နါက့အိၣ်စ့ၢ်မီၤနီၤ”အဂ့ၢ်န့ၣ်ကတၢၢ်တံာ်သ၀ီဖိတဂၤဃီ၀ဲန့ၣ်စံး၀ဲန့ၣ်လီၤႉ
ဘၣ်ဃးတၢ်ဒုးကဲထီၣ်တၢ်ဂ့ၢ်ဒီးတၢ်သံတၢ်ဘၣ်ဒိဘၣ်ထံးတၢ်အိၣ်သးအံၤအဖီခိၣ်န့ၣ်(ခ့ၣ်အဲၣ်ယူၣ်)ဒီး(BGF)ထုးထီၣ်ပာ်ဖျါ၀ဲတၢ်ကစီၣ်လၢအဖိးသဲစးတအိၣ်ဒံး၀ဲဘၣ်အသိးခီဖျိတၢ်ဆဲးကျိးတၢ်ကီတၢ်ခဲအဃိတၢ်အိၣ်သးလီၤတံၢ်လီၤဆဲးတခီန့ၣ်ခ့ၣ်အဲးစံၣ်ပာ်ဂၢၢ်ပာ်ကျၢၤ၀ဲတန့ၢ်ဒံးဘၣ်န့ၣ်လီၤႉ
စးထီၣ်ဖဲအပူၤကွံာ်တလါန့ၣ်(BGF)နုာ်လီၤမၤအါထီၣ်သုးဂံၢ်ဘါလၢခီတီၢ်(မၠဲၣ်ကၠံငူၣ်)ဟီၣ်က၀ီၤအပူၤခံဘျီညါဒီး လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤအပူၤစ့ၢ်ကီးတၢ်ဒုးကဲထီၣ်၀ဲကိးမုၢ်နံၤဒဲးဃၣ်ဃၣ်အဂ့ၢ်န့ၣ် ခ့ၣ်အဲၣ်ယူၣ်ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
