လါယနူၤအါရံၤ ၃၀ သီႇ ၂၀၂၃ နံၣ်ႇ ခ့ၣ်အဲးစံၣ်
ဖဲအပူၤကွံာ်လါယနူၤအါရံၤ ၂၇ သီအနံၤန့ၣ် ခီဖျိပယီၤသုးခးလီၤကျိဖးဒိၣ်ဆူသၣ်တီၣ်၀့ၢ်ပူၤအဃိ လီၢ်က၀ီၤကမျၢၢ်ပျံၤတၢ်ဖုးတၢ်ပာ်တ့ၢ်ကွံာ်အဟံၣ်အဃီဃ့ၢ်ထီၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲအသိး သ့ၣ်ညါဘၣ်န့ၣ်လီၤႉ
တချုးပယီၤသုးခးလီၤကျိဖးဒိၣ်ကဲထီၣ်ဒံးဘၣ်အခါဖဲလါယနူၤအါရံၤ ၂၇ သီ ဂီၤခီအဆၢကတီၢ်န့ၣ် သၣ်တီၣ်၀့ၢ် တၢ်ဒီသဒၢကမျၢၢ်သုးနုာ်လီၤခး၀ဲသၣ်တီၣ်၀့ၢ်(လ့ၣ်သိၤ)သုးရ့ၣ် ပယီၤသုးကလၢၤအံၤဒီး ခီဖျိပယီၤသုးရ့ၣ်ခိၣ်သံ(၁)ဂၤအဃိ အ၀ဲသ့ၣ်က့ၤခးလီၤကဒါကျိဖးဒိၣ်ဆူ၀့ၢ်ပူၤဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤႉ
ကမျၢၢ်လၢအိၣ်သၣ်တီၣ်၀့ၢ်ပူၤတဂၤစံး၀ဲ“တၢ်အိၣ်သးခဲအံၤန့ၣ်ၦၤအိၣ်ဖဲ၀့ၢ်ပူၤတဖၣ်ဃ့ၢ်ထီၣ်ခဲလၢာ်ဃၣ်ဃၣ်ညါလံႉ ၦၤအိၣ်တ့ၢ်လၢက၀ီၤဒ့ပူၤၦဲၤဂၤလဲၣ်မးနဂံၢ်အဒွးအီၤဘၣ်ဒံးႉအ၀ဲသ့ၣ်သုးရ့ၣ်ခိၣ်သံအဃိက့ၤခးလီၤကဒါကျိဖးဒိၣ်လၢ၀့ၢ်ပူၤလီၤႉယသကိးအဟံၣ်နါက့ဘၣ်စ့ၢ်ႉဘၣ်ၦၤဟံၣ်အိၣ်တနီၤဘၣ်ဆၣ်မ့မ့ၢ်ၦၤကညီဒုတဘၣ်နီတမံၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါတၢ်တနံၤန့ၣ်ပယီၤသုးခးပိၢ်ထီၣ်ကျိလၢ၀့ၢ်ပူၤဒီတနံၤကျၢၤညါဒီးဟးလူၤဖီၣ်၀ဲလီၢ်က၀ီၤကမျၢၢ်တကးဒံးဘၣ်အ၀ဲသ့ၣ်မၤဟးဂီၤ၀ဲကျဲကပၤမ့ၣ်အူတၢၣ်ႇဟးကိးဃါဆိၣ်တၢ်ထုတၢ်လၢတၢ်ဘါယွၤသရိာ်ကပၤဒီး ဟးဆှၣ်တၢ်လၢ၀့ၢ်ပူၤ၀ံၤအလီၢ်ခံအ၀ဲသ့ၣ်ခးလီၤ၀ဲကျိဖးဒိၣ်အံၤလီၤအဂ့ၢ်န့ၣ်လီၢ်က၀ီၤကမျၢၢ်တဂၤစံး၀ဲဒ်အံၤ န့ၣ်လီၤႉ
“တၢ်တနံၤန့ၣ်အသုးရ့ၣ်ခိၣ်သံအဃိအ၀ဲသ့ၣ်ဟးဆှၣ်တၢ်လၢ၀့ၢ်ပူၤႇခးပိၢ်ထီၣ်ကျိဒီတနံၤကျၢၤလီၤႉသးစၢ်လၢအလဲၤၦၤတၢ်ဖျီတဖၣ်ဖဲအဟဲက့ၤလၢကျဲအခါန့ၣ်ပယီၤသုးတီၢ်သဲၣ်ဖးကွံာ်သးစၢ်တဖၣ်အံၤအလီတဲစိခဲလၢာ်လီၤႉ မ့၀ံၤအ၀ဲသ့ၣ်ဟးခးလီၤကျိဖးဒိၣ်ဆူ၀့ၢ်ပူၤမီၤနီၤႉမ့ၣ်အူတၢၣ်လၢအိၣ်ကျဲကပၤတဖၣ်နါက့ပယီၤသုးဘၣ်ယိၣ်၀ဲလၢမ့ၣ်အူကကပီၤအဃိမၤဟးဂီၤကွံာ်၀ဲႉယတယးမုုၢ်နၤခီန့ၣ်ဒ်သိးအ၀ဲသ့ၣ်အိၣ်ခူသူၣ်ကညီအဂီၢ်လီၤ” အဂ့ၢ်န့ၣ် စံး၀ဲန့ၣ်လီၤႉ
ပယီၤသုးရ့ၣ်ခိၣ်လၢအသံတဂၤအံၤစးထီၣ်ဖဲအလီၤဘၣ်မူဒါန့ၣ်တဲပျံၤတဲဖုးႇရ့၀ဲဒၣ်(သၣ်တီၣ်)၀့ၢ်ပူၤၦၤကမျၢၢ်တဖၣ်ဆူၣ်ဆူၣ်ကိၤကိၤတကးဒံးဘၣ်အမဲာ်ညါပညိၣ်၀ဲလီၢ်က၀ီၤသးစၢ်တဖၣ်ဒီးဖီၣ်သမံသမိး၀ဲႇမၤဒၢၣ်မၤလီၤ၀ဲအိၣ်အဃိ လီၢ်က၀ီၤကမျၢၢ်ဘၣ်ဟးထီၣ်က့ၤလီၤလၢတၢ်ပလီၢ်ပဒီတၢ်ပျံၤတၢ်ဖုးပူၤအဂ့ၢ်န့ၣ်သ့ၣ်ညါဘၣ်န့ၣ်လီၤႉ
