သုးမီၤစိရိၤကဘီယူၤဟဲဆှၣ်တၢ်လၢကၠၤအ့စ့ၣ်ကၠံ၀့ၢ်ပူၤအဃိကမျၢၢ်တဖၣ်အိၣ်ဒီးတၢ်ဘၣ်ယိၣ်ဘၣ်ဘှီ

လါယနူၤအါရံၤ ၁၀ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤန့ၣ် တၢ်ဒုးဆူၣ်ထီၣ်၀ဲလၢပယီၤသုးဒီးဟီၣ်က၀ီၤတၢ်ပၢၢ်ဆၢသုးပာ်ဖှိၣ်ကရူၢ် အဘၢၣ်စၢၤအံၤဒီး ခီဖျိသုးမီၤစိရိၤအကဘီယူၤဟဲဆှၣ်တၢ်အိၣ်ဒံးအဃိ လီၢ်က၀ီၤကမျၢၢ်တဖၣ်ဘၣ်ယိၣ်၀ဲလၢ တၢ်ကတ့ၢ်လီၤကဒီးမ့ၣ်ပိၢ်အဂ့ၢ်န့ၣ် လီၢ်က၀ီၤဖိစံး၀ဲန့ၣ်လီၤႉ

ဖဲလါယနူၤအါရံၤ ၈ သီ ဟါခီအဆၢကတီၢ်န့ၣ် ခံခီခံကပၤတၢ်ဒုးကဲထီၣ်၀ဲလၢကၠၤအ့စ့ၣ်ကၠံ၀့ၢ် ပယီၤသုးကျိဖးဒိၣ်တၢ်လီၢ်ႇခီၣ်သုးရ့ၣ်(ခလရ–၃၂)သုးကလၢၤကပၤဒီးပယီၤသုးအိၣ်ဆီလီၤသးတၢ်လီၢ်တဖၣ် ၀ံၤအလီၢ်ခံ မုၢ်ဆ့ၣ်ထီၣ်ဂီၤခီအဆၢကတီၢ်ခီဖျိသုးမီၤစိရိၤကဘီယူၤဟဲဆှၣ်တၢ်တပယူာ်ဃီအဃိ ကမျၢၢ်လၢအိၣ်၀့ၢ်ပူၤတဖၣ်ဘၣ်ယိၣ်၀ဲလၢတၢ်ကဟဲတ့ၢ်လီၤကဒီးမ့ၣ်ပိၢ်အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဂၤ စံး၀ဲဒ်အံၤန့ၣ်န့ၣ်လီၤႉ

“ကဘီယူၤဟဲဆှၣ်တၢ်ကိးမုၢ်နံၤဒဲးလီၤႉလၢမုၢ်နၤခီနါက့ဟဲႉတၢ်အိၣ်သးဒုတဂၢၢ်တကျၢၤဘၣ်မီၤနီၤႉဖဲအပူၤကွံာ်စှၤသီအခါနါက့ကဘီယူၤဟဲခးလီၤတၢ်ႉအ၀ဲသ့ၣ်ခးလီၤနါစိၤတၢ်အဃိပဘၣ်ပျံၤတၢ်စ့ၢ်ႉမ့၀ံၤဖဲမဟါနါက့ကျိဖးဒိၣ်ကလုၢ်သီၣ်ဒီတနၤကျၢၤလီၤႉကစံၣ်ခီဒၢးမ့ၢ်ကဘၣ်စံၣ်ဖဲလဲၣ်မးတသ့ၣ်ညါဘၣ်ႉကဘီယူၤမ့ဟဲလံန့ၣ်ပဘၣ်စံၣ်အိၣ်ခူသူၣ်လီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါယနူၤအါရံၤ ၉ သီအခါန့ၣ်လီၤႉ

ဖဲအပူၤကွံာ်လါယနူၤအါရံၤ ၄ သီအခါစ့ၢ်ကီး တၢ်ဒုးကဲ၀ဲထီၣ်ဒိၣ်ဒိၣ်မုၢ်မုၢ်လၢကၠၤအ့စ့ၣ်ကၠံ၀့ၢ်ပူၤအံၤဒီး ဖဲန့ၣ်သုးမီၤစိရိၤကဘီယူၤဟဲတ့ၢ်လီၤကဒါမ့ၣ်ပိၢ်လၢတၢ်ဒုးကဲထီၣ်လီၢ်အဃိ ၀့ၢ်ဃၢၤရီဘၢၣ်ကျီးၦၤမၤတၢ်ဖိဘၣ်ဒိ၀ဲ ၂ ဂၤဒံးန့ၣ်လီၤႉ

ခံခီခံကပၤတၢ်ဒုးကဲထီၣ်အဆၢကတီၢ်န့ၣ်သုးမီၤစိရိၤကဘီယူၤအံၤဟဲခးလီၤတၢ်ကိးမုၢ်နံၤဒဲးဒီး တၢ်ဒုးကဲထီၣ်အကတီၢ်ကမျၢၢ်လၢအိၣ်၀့ၢ်ပူၤတဖၣ်အံၤကဟးစံၣ်အဂီၢ်တၢ်လီၢ်တၢ်ကျဲတအိၣ်၀ဲဘၣ်အဃိ ဘၣ်နုာ်လီၤစံၣ်အိၣ်ခူသူၣ်၀ဲလၢဟံၣ်ပူၤဒ်န့ၣ်လီၤအဂ့ၢ်န့ၣ် စံး၀ဲန့ၣ်လီၤႉ

ဘၣ်ဆၣ်တၢ်ဒုးကဲထီၣ်အသီမ့ယံၤထီၣ်န့ၣ်လၢကအီၣ်ကအီအဂီၢ်တၢ်ကီတၢ်ခဲအိၣ်ထီၣ်သ့၀ဲဒီး ပယီၤသုးတကပၤစ့ၢ်ကီးခးလီၤဒံးကျိဖးဒိၣ်ဆူသ၀ီပူၤဒီးတၢ်လီၢ်လၢတၢ်ပၢၢ်ဆၢကရူၢ်ဟူးဂဲၤအိၣ်ဆိး၀ဲအလီၢ်အိၣ်ဒံး၀ဲအဂ့ၢ်န့ၣ် ကမျၢၢ်လၢအိၣ်ပူၤလၢအဂၤတဂၤစ့ၢ်ကီးစံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“ၦၤတနီၤန့ၣ်လဲၤစံၣ်အိၣ်၀ဲလၢတၢ်လီၢ်အဂၤလၢၦၤလီၢ်အိၣ်ကဒုအလီၢ်မီၤနီၤႉတနီၤခီန့ၣ်ဟးစံၣ်အိၣ်တၢ်လီၢ်တၢ်ကျဲတအိၣ်ဘၣ်ႉဘၣ်စံၣ်အိၣ်ခူသူၣ်၀ဲဖဲ၀့ၢ်ပူၤအံၤလီၤႉတၢ်ဒုးကဲထီၣ်အသီမ့ယံၤထီၣ်ဒုတဘၣ်ဂီၢ်လၢၤဘၣ်ႉမ့၀ံၤလၢ၀့ၢ်ချၢနါက့ပယီၤသုးအိၣ်မီၤနီၤႉၦၤသုးဖိတဖၣ်အိၣ်လၢၦၢ်ပူၤဟဲခး၀ဲပယီၤသုးမီၤနီၤႉတမ့ၢ်အဟဲခး၀ဲလၢ၀့ၢ်ဘၣ်ႉတၢ်အဃိန့ၣ်ပယီၤသုးက့ၤခးလီၤကဒါကျိဖးဒိၣ်ဆူသ၀ီပူၤဒီးတၢ်လီၢ်လၢတၢ်ပၢၢ်ဆၢကရူၢ်ဟူးဂဲၤအလီၢ်သ့ၣ်တဖၣ်န့ၣ်မီၤနီၤႉအဃိန့ၣ်ၦၤသ၀ီဖိတဖၣ်ဘၣ်ဃ့ၢ်ထီၣ်၀ဲဒ်န့ၣ်လီၤ”အဂ့ၢ်န့ၣ်စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

စးထီၣ်ဖဲတနံၣ်အံၤ လါယနူၤအါရံၤထီၣ် ၁ သီအနံၤန့ၣ် တၢ်ဒုးကဲထီၣ်၀ဲလၢကၠၤအ့စ့ၣ်ကၠံ၀့ၢ်ပူၤဒီးလ့နိးလီၢ်က၀ီၤအပူၤ ဒီးတၢ်နုာ်လီၤခးသုးမီၤစိရိၤအသုးကလၢၤႇဒွဲၣ်အူအီၣ်ကွံာ်သုးတၢ်သူၣ်ထီၣ်တဖၣ်အိၣ်၀ဲဘၣ်ဆၣ် ခီဖျိသုးမီၤစိရိၤကဘီယူၤဟဲက့ၤတ့ၢ်လီၤစၢၤမ့ၣ်ပိၢ်ကအိၣ်လၢ(၅)ဘျီဃၣ်ဃၣ်ညါအဃိဘၣ်သံ၀ဲတၢ်ပၢၢ်ဆၢသုးပာ်ဖှိၣ်ကရူၢ်(၁၅)ဂၤဃၣ်ဃၣ်ညါဒီးပယီၤသုးသံအဂၤ(၁၀၀)ဃၣ်ဃၣ်အဂ့ၢ်န့ၣ် တၢ်ပၢၢ်ဆၢသုးပာ်ဖှိၣ်ကရူၢ်စံး၀ဲန့ၣ်လီၤႉ

တကးဒံးဘၣ်လၢန့ၣ်အမဲာ်ညါစးထီၣ်လါယနူၤအါရံၤ ၁ သီတုၤလၢ ၅ သီန့ၣ် ခီဖျိသုးမီၤစိရိၤကဘီယူၤဟဲတ့ၢ်လီၤ မ့ၣ်ပိၢ်ကိးမုၢ်နံၤဒဲးအဃိကမျၢၢ်ဘၣ်ဒိဘၣ်ထံး၀ဲအဂၤ(၁၀)ဃၣ်ဃၣ်ညါဒီး သၤပယၤသ၀ီႇလ့နိးႇ၀့ခနးႇနိၣ်ခၠိနဲၣ်ႇ ခိၤခၤႇကၠီၣ်ဘလူႇကိၤယီၤ၊စ့ၤပၠ့သ၀ီဖိဘၣ်ဃ့ၢ်ထီၣ်၀ဲအဂၤ(၄၀၀၀)ဃၣ်ဃၣ်ညါန့ၣ်လီၤႉ

တကီၢ်ခါအံၤလီၢ်က၀ီၤကမျၢၢ်လၢအဘၣ်ဃ့ၢ်မှံဟးဖျိးတဖၣ်အဂီၢ်လိၣ်ဘၣ်၀ဲဂ့ၢ်ဂီၢ်အူတၢ်အီၣ်တၢ်အီဒီးကသံၣ်ကသီတဖၣ် အဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ