လါယူၤ ၉ သီႇ ၂၀၂၃ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ဖၣ်အၣ်၀့ၢ်ပူၤ စှၤသီအတီၢ်ပူၤအံၤ ခီဖျိပယီၤသုးဟးလူၤဖီၣ်၀ဲသိလ့ၣ်ႇသိလ့ၣ်ယီၢ်(ဆဲးကဲး) လၢလံာ်လဲၢ်တအိၣ်ဘၣ်သ့ၣ်တဖၣ်အံၤဟဲအါထီၣ်၀ဲအဃိ တၢ်ကြဲၢ်ကီၢ်ဆၣ်ပူၤ သိလ့ၣ်လၢအလဲၤၦ့ၤ တၢ်ပနံာ်တၢ်ဖိတၢ်လံၤသ့ၣ်တဖၣ်အံၤလဲၤၦ့ၤတၢ်တဘူၣ်လၢၤဘၣ်အဃိ လၢကျးပူၤန့ၣ်နံာ်တၢ်ဖိတၢ်လံၤလီၤတူာ်ထီၣ်၀ဲလံ အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကျးလၢအိၣ်တၢ်ကြဲၢ်ကီၢ်ဆၣ်ပူၤတဖၣ်အံၤအါဒၣ်တက့ၢ်အ၀ဲသ့ၣ်လံၤၦ့ၤဆါ၀ဲပနံာ်တၢ်ဖိတၢ်လံၤလၢဖၣ်အၣ်၀့ၢ်ပူၤလီၤဒီး စးထီၣ်လါမ့ၤ ၁ သီန့ၣ် ခီဖျိပယီၤသုးလူၤဖီၣ်၀ဲသိလ့ၣ်ႇသိလ့ၣ်ယီၢ်(ဆဲးကဲး)လၢလံာ်လဲၢ်တအိၣ်ဘၣ်သ့ၣ်တဖၣ်အံၤ အဖီခိၣ် သိလ့ၣ်လၢအလဲၤၦ့ၤပနံာ်တၢ်ဖိတၢ်လံၤတဖၣ် ဟးထီၣ်တဘူၣ်လၢၤဘၣ်အဃိ လၢကျးပူၤန့ၣ် ပနံာ်တၢ်ဖိတၢ်လံၤ လီၤစှၤ၀ဲအဂ့ၢ်န့ၣ် ကျးကစၢ်တဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“အခိၣ်သ့ၣ်န့ၣ်တၢ်အီၣ်ဃ့မီၤနီၤႉခဲအံၤပတလဲၤၦ့ၤဘၣ်လၢ၀့ၢ်ပူၤလၢၤဘၣ်အဃိတၢ်အီၣ်ဃ့လီၤတူာ်ထီၣ်တအိၣ်လၢၤဘၣ်ႉမ့၀ံၤကလဲၤအဂီၢ်စ့ၢ်ကီးပလဲၤတဘူၣ်ဘၣ်အဃိနကလဲၤၦ့ၤဒ်လဲၣ်ႉသိလ့ၣ်လဲၤမ့တန့ၢ်လၢာ်ဘၣ်ဒုပကဘၣ်ဟံး န့ၢ်က့ၤ တၢ်ဖိတၢ်လံၤလၢသိလ့ၣ်လၢအဟဲဆါတၢ်ဖဲအံၤတဖၣ်အအိၣ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ
ခီဖျိသိလ့ၣ်လၢအဟဲဆါတၢ်ဖိတၢ်လံၤလၢဒူသ၀ီပူၤတဖၣ်အံၤဆါတၢ်ၦ့ၤဒိၣ်အဃိ ကျးတဖၣ်တၦ့ၤ၀ဲဘၣ်ဒီး မ့မ့ၢ်တခီလဲၤၦ့ၤ၀ဲလၢဖၣ်အၣ်၀့ၢ်လဲၤ၀ဲဒီးအကစၢ်သိလ့ၣ်ဒ်န့ၣ်လီၤဒီးခီဖျိပယီၤသုးဖီၣ်သိလ့ၣ်ဒ်အံၤအဃိ သိလ့ၣ်လၢအိၣ်ဒူသ၀ီပူၤတဖၣ်လဲၤၦ့ၤတၢ်တသ့လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
စီၤလွဲစ့ လၢအလဲၤၦ့ၤတၢ်လၢဖၣ်အၣ်၀့ၢ်ပူၤကိးနွံဒဲးအံၤ စံး၀ဲလၢ“ယဲဒၣ်န့ၣ်ယလဲၤၦ့ၤတၢ်တနွံတဘျီမီၤနီၤႉ ယကျးန့ၣ်ဆါတၢ်န့ၢ်အဃိတၢ်ဖိတၢ်လံၤလၢၤဖျဲၣ်မးႉခဲအံၤပတလဲၤၦ့ၤဘၣ်တၢ်န့ၢ်(၄)နွံလံႉကျးပူၤအံၤတၢ်ဖိတၢ်လံၤတအိၣ်တ့ၢ်အါအါလၢၤဘၣ်”အဂ့ၢ်န့ၣ် စံး၀ဲန့ၣ်လီၤႉ
ခီဖျိပယီၤသုးဖီၣ်၀ဲသိလ့ၣ်ႇသိလ့ၣ်ယီၢ်သ့ၣ်တဖၣ်ဒ်အံၤအဃိကျးဖးဒိၣ်လၢအိၣ်ကီၢ်ဆၣ်ဒူသ၀ီအပူၤတဖၣ်အံၤ တၢ်ဖိတၢ်လံၤတအိၣ်၀ဲလၢၤဘၣ်လီၤတူာ်ထီၣ်၀ဲလံဒီးခီဖျိကျးတနီၤန့ၣ်တၢ်ဖိတၢ်လံၤတအိၣ်၀ဲလၢၤဘၣ်အဃိ သ၀ီဖိတဖၣ်ဟးၦ့ၤအီၣ်တၢ်တဘၣ်လၢၤဘၣ်ထံၣ်ဘၣ်၀ဲတၢ်ကီတၢ်ခဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ
စးထီၣ်ဖဲအပူၤကွံာ်လါမ့ၤထီၣ်တနွံအခါန့ၣ်လၢဖၣ်အၣ်၀့ၢ်ပူၤခီဖျိပယီၤသုးဟးလူၤဖီၣ်သိလ့ၣ်ႇဆဲးကဲးလၢအလံာ်လဲၢ်တအိၣ်ဘၣ်တဖၣ်အံၤတကးဒံးဘၣ်အမဲာ်ညါဟးလူၤဖီၣ်၀ဲပၢၢ်တုၤလၢကျဲဖးဒ့ကျဲကဆူးတဖၣ်အဃိ တၢ်ဖီၣ်၀ဲသိလ့ၣ်လၢ အလဲၤၦ့ၤပနံာ်တၢ်ဖိတၢ်လံၤသ့ၣ်တဖၣ်ဒီးတၢ်ဃ့အီၣ်လိး၀ဲစ့ၢ်ကီးအိၣ်၀ဲအဂ့ၢ်န့ၣ် လီၢ်က၀ီၤၦၤနီသိလ့ၣ်ဖိတဖၣ် စံး၀ဲန့ၣ် လီၤႉ
