ၦၤဖိဒံဖိသၣ်လၢအဃ့ၢ်တၢ်ဒုးတဖၣ် ဘၣ်၀ဲဒၣ်တၢ်ဟၢဖၢလူတၢ်ဆါအါမး

လါယူၤ ၂၀ သီႇ ၂၀၂၃ နံၣ်ႇ ခ့ၣ်အဲးစံၣ်

လၢတနီသရံၣ်ကီၢ်ခီဒိၣ် တနီသရံၣ်ကီၢ်ဆၣ်အပူၤ တၢ်စူၤခါအကတီၢ် ခီဖျိၦၤဃ့ၢ်မှံဟးဖျိးသ့ၣ်တဖၣ်အီဘၣ်ထံ တကဆှီဘၣ်အဃိ ၦၤဖိဒံဖိသၣ်တဖၣ်တၢ်ဟၢဖၢလူတၢ်ဆါကဲထီၣ်သးအါမးအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိး တဖၣ်စံး၀ဲန့ၣ်လီၤႉ

ကမျၢၢ်ၦၤဃ့ၢ်မှံဟးဖျိးလၢအိၣ်တနီသရံၣ်ကီၢ်ဆၣ်ပူၤတဖၣ်အါဒၣ်တက့ၢ်န့ၣ်သူအီ၀ဲဒၣ်ထံလၢထံကျိပူၤႇထံကစၢၢ်လီၤဒီး တၢ်စူၤခါအတီၢ်ပူၤခီဖျိထံတကဆှီဘၣ်အဃိၦၤဖိသၣ်(၅)နံၣ်ဒီးအနံၣ်တဆံဘျဲၣ်တဖၣ်အါဒၣ်တက့ၢ်န့ၣ်ဘၣ်၀ဲဒၣ်တၢ်ဟၢဖၢလူတၢ်ဆါအါမးအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤ စံး၀ဲဒ်အံၤန့ၣ်လီၤႉ

အ၀ဲစံး၀ဲလၢ“တနံၣ်အံၤတၢ်စူၤစဲၤခံအဃိထံတဂ့ၤအါအါဘၣ်မီၤနီၤႉအ၀ဲသ့ၣ်အီဘၣ်ထံအံၤအဃိၦၤဖိသၣ်တဖၣ် အါဒၣ်တက့ၢ်န့ၣ်အ၀ဲသ့ၣ်ဟၢဖၢလူမီၤနီၤႉအဃိစှၤသီအတီၢ်ပူၤအံၤတၢ်ဟၢဖၢလူတၢ်ဆါကဲထီၣ်သးဟဲအါထီၣ်၀ဲႉမ့၀ံၤပၢၢ်တုၤလၢအဂံၢ်အဘါလီၤ၀ဲ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဒ်န့ၣ်အသိးတလါအံၤလါယူၤထီၣ်တၢတနွံအခါန့ၣ်လၢၦၤလီၢ်အိၣ်ကမှံလီၢ်ဖဲန့ၣ်တဖၣ်ၦၤဘၣ်တိးကွ့တၢ်ညၣ်ဂိၢ်တၢ်ဆါအိၣ်၀ဲအဂၤ(၃၀၀)ဘျဲၣ်ညါဒီးတကီၢ်ခါခဲအံၤအ၀ဲသ့ၣ်အီဘၣ်ထံတကဆှီ၀ဲဘၣ်အသိးခီဖျိတဒိးန့ၢ်ဘၣ်ကသံၣ်ကသီတၢ်ဆီၣ်ထွဲမၤစၢၤကူကူလၢလၢဘၣ်အဃိ တကီၢ်ခါခဲအံၤကသံၣ်ကသီလီၤတူာ်လီၤကၤထီၣ်၀ဲလံအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ

အ၀ဲစံး၀ဲလၢ“လၢအံၤတကပၤန့ၣ်ကသံၣ်ကသီတၢ်ဆီၣ်ထွဲမၤစၢၤတအိၣ်ဘၣ်အဃိတၢ်ကီတၢ်ခဲအိၣ်မီၤနီၤႉဖဲအအိၣ်န့ၣ်ပကူစါယါဘျါအီၤဒ်န့ၣ်လီၤႉခဲအံၤတၢ်ညၣ်ဂိၢ်တၢ်ဆါႇတၢ်ဟၢဖၢလူတၢ်ဆါကဲထီၣ်သးအိၣ်မီၤနီၤႉကဲထီၣ်တုၤလၢၦၤသံဒုတအိၣ်ဒံးဘၣ်ႉတၢ်ဆါကဲထီၣ်တနံၣ်ဒီးတနံၣ်န့ၣ်တဒ်သိးလိာ်သးဘၣ်ႉတၢ်စူၤနါက့စဲၤခံအဃိတနံၣ်အံၤနးဒိၣ်၀ဲန့ၣ်ႉမ့၀ံၤတၢ်အီၣ်တၢ်အီစ့ၢ်ကီးလီၤတူာ်လီၤကၤထီၣ်လံ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ

ဟီၣ်က၀ီၤဖဲန့ၣ်အပူၤခီဖျိပယီၤသုးပံးဃာ်၀ဲတၢ်စိာ်ထီၣ်စိာ်လီၤတၢ်အီၣ်တၢ်အီဒီးကသံၣ်ကသီသ့ၣ်တဖၣ်အဃိ လၢၦၤဃ့ၢ်မှံဟးဖျိးသ့ၣ်တဖၣ်အံၤအဂီၢ်တၢ်အီၣ်တၢ်အီဒီးကသံၣ်ကသီလီၤတူာ်လီၤကၤထီၣ်၀ဲဒ်အံၤလီၤအဂ့ၢ်န့ၣ် ၦၤမၤစၢၤၦၤဃ့ၢ်မှံဟးဖျိးတဖၣ်စံး၀ဲန့ၣ်လီၤႉ

လၢတနီသရံၣ်ကီၢ်ဆၣ်အပူၤကမျၢၢ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၈၀၀၀)ဘျဲၣ်ညါဒီးတလါအံၤလါယူၤထီၣ်တၢတနွံအခါန့ၣ်လၢကီၢ်ဆၣ်၀ဲန့ၣ်အပူၤခီဖျိတၢ်ဒုးဆဲးကဲထီၣ်၀ဲလၢပယီၤသုးဒီးတၢ်ဒီသဒၢကမျၢၢ်သုးတဖၣ်အဘၢၣ်စၢၤအဃိ ၦၤဃ့ၢ်မှံဟးဖျိးအနီၣ်ဂံၢ်ဟဲအါထီၣ်၀ဲဒီးပယီၤသုးစ့ၢ်ကီးမၤအါထီၣ်သုးဂံၢ်ဘါအဂ့ၢ်န့ၣ် ဟီၣ်က၀ီၤတၢ်ကစီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ