တၢ်ပတု၁်ကွံ၁်ကၠီၣ်တဲၣ်လီမ့ၣ်အူလၢကၣ်စံၣ်နိၣ်၀့ၢ်သီတၢ်လီၢ်(၂)တီၤဘၣ်ဆၣ်ႇကၣ်စံၣ်နိၣ်တၢ်လီၢ်လၢအဂၤတဖၣ်မ့ၣ်အူဟဲဒံး၀ဲ

လါယူၤ ၁၂ သီႇ ၂၀၂၃ နံၣ်ႇ ခ့ၣ်အဲးစံၣ်

လၢကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ်ကီၢ်ဆၣ်အပူၤ တၢ်ပတုာ်ကွံာ်ကၠီၣ်တဲၣ်လီမ့ၣ်အူလၢ တရူး(ကၣ်စံၣ်နိၣ်) ၀့ၢ်သီ တၢ်လီၢ်(၂)တီၤဘၣ်ဆၣ် မ့မ့ၢ်(ကၣ်စံၣ်နိၣ်)တၢ်တၤကျိၣ်တၤစ့လီၢ်လၢအဂၤအခါ(၁၀)ဘျဲၣ် အံၤ မ့ၣ်အူဟဲဒံး၀ဲ အဂ့ၢ်န့ၣ် သ့ၣ်ညါဘၣ်လၢကမျၢၢ်လၢအအိၣ်ဘူးဒီးတရူး(ကၣ်စံၣ်နိၣ်)ကပၤသ့ၣ်တဖၣ်အံၤအအိၣ် န့ၣ်လီၤႉ

ဖဲအပူၤကွံာ်လါယူၤ ၆ သီ မုၢ်နၤခီ ၁၂ နၣ်ရံၣ်အဆၢကတီၢ်န့ၣ် တၢ်ပတုာ်ကွံာ်မ့ၣ်အူလၢ စွ့ၤကိၣ်ကိၤ(ကၣ်စံၣ်နိၣ်) ၀့ၢ်သီဒီး မဲၢ်ထီးသလ့(ကၣ်စံၣ်နိၣ်)၀့ၢ်သီတၢ်လီၢ်သ့ၣ်တဖၣ်အံၤဒီး ဘၣ်ဆၣ် မ့မ့ၢ်တရူး(ကၣ်စံၣ်နိၣ်)လီၢ်လၢအိၣ် မၠၣ်၀တံၣ်၀့ၢ် ဟီၣ်က၀ီၤပူၤတဖၣ်ခီန့ၣ်မ့ၣ်အူဟဲဒံး၀ဲအဂ့ၢ်န့ၣ် မဲၢ်ထီးသလ့လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ

“ခဲအံၤမ့ၣ်အူတဟဲလၢၤဘၣ်န့ၣ်မဲၢ်ထီးသလ့ဒီးစွ့ၤကိၣ်ကိၤလီၤႉလၢကၠီးခဲးႇဆိၣ်စံမၠဲၣ်ႇဂီၤလ့ၤႇဃိၣ်သၢဖျၢၣ် (DKBA) အကၣ်စံၣ်နိၣ်တဖၣ်န့ၣ်တမၤတဲာ်၀ဲမ့ၣ်အူဒံးဘၣ်မ့ၣ်အူဟဲဒံးအဖၢမုၢ်လီၤႉလၢမၠၣ်၀တံၣ်သူမှဲကျိကပၤ(BGF) အကၣ်စံၣ်နိၣ်လီၢ်စ့ၢ်ကီးမ့ၣ်အူဟဲဒံးလီၤႉအ့ဆ့လီၤမ့ၣ်အူကပီၤမၢ်မၢ်လီၤႉတၢ်ဒုးကဲထီၣ်နါက့အ့ဆ့လီၤႉမုၢ်နၤခီန့ၣ်ၦၤတရူးဖိႇၦၤယိၤဖိနုာ်လီၤဟးထီၣ်မၢ်မၢ်လီၤႉလၢတရူးအ(ကၣ်စံၣ်နိၣ်)တကပၤန့ၣ်ပတနၢ်ဟူၦၤလဲၤကွံာ်လီၤမ့ၣ်ပိၢ်ႇကဘီယူၤဟဲတ့ၢ်လီၤမ့ၣ်ပိၢ်တအိၣ်နီတဘျီဒံးဘၣ်ႉမ့မ့ၢ်တၢ်ဒုးခီန့ၣ်ကဲထီၣ်မၢ်မၢ်လီၤ”အဂ့ၢ်န့ၣ် မဲၢ်ထီးသလ့လီၢ်က၀ီၤကမျၢၢ်တဂၤ စံး၀ဲန့ၣ် လီၤႉ

ဖဲစှၤသီအတီၢ်ပူၤအံၤလၢမဲၢ်ထီးသလ့သ၀ီဆၢခိၣ်လဲၣ်ခၣ်တီၤႇကၠီၣ်တီၤကိႇကၠီၣ်မဲကိတကပၤန့ၣ် တၢ်ဒုးကဲထီၣ်၀ဲလၢ (KNLA)သုးပာ်ဖှိၣ်ဒီးပယီၤသုးအဘၢၣ်စၢၤဒီး စးထီၣ်ဖဲအပူၤကွံာ်လါအ့ဖြ့ၣ်ႇလါမ့ၤတုၤလၢတလါအံၤလါယူၤန့ၣ် တၢ်ဒုးကဲထီၣ်န့ၢ်၀ဲ(၂)လါဘျဲၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ်ႇစွ့ၤကိၣ်ကိၤႇကၠီးခဲးႇဂီၤလ့ၤလီၢ်က၀ီၤဒူသ၀ီတဖၣ်အံၤ သူ၀ဲဒၣ်ကၠီၣ်တဲၣ် လီမ့ၣ်အူအိၣ်၀ဲအသိးဒူသ၀ီလၢအသူ၀ဲကီၢ်ပယီၤလီမ့ၣ်အူအံၤစ့ၢ်ကီးအိၣ်၀ဲဘၣ်ဆၣ် ခီဖျိခံခီခံကပၤ တၢ်ဒုးကဲထီၣ်အဃိ ကီၢ်ပယီၤမ့ၣ်အူခိၣ်ခၠၢၣ်ဟးဂီၤ၀ဲဒီးတုၤလၢခဲအံၤတၢ်တဘှီဂ့ၤထီၣ်၀ဲဒံးဘၣ်အဃိ ဒူသ၀ီတနီၤ မ့ၣ်အူတဟဲဘၣ်အိၣ်၀ဲ (၆)လါဘျဲၣ်လံအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ

“လၢမၠၣ်၀တံၣ်ႇသ့ၤကါညံၣ်နီၣ်ႇကီးတရံးႇနိၣ်တကီႇဃိၣ်သၢဖျၢၣ်ႇကြုၢ်တုတကပၤန့ၣ် ကီၢ်ပယီၤလီမ့ၣ်အူတဟဲဘၣ် ကအိၣ်လၢဃုလါနွံလါလံႉဘၣ်သူက့ၤမ့ၣ်အူစဲးႇတၢ်လိမုၢ်(စိၤလၤ)ဒ်န့ၣ်လီၤႉတၢ်ဒုးစ့ၢ်ကီးကဲထီၣ်ႇကဘီယူၤစ့ၢ်ကီးဟဲခးလီၤတၢ်ဒီယုၢ်လီၤႉလၢမုၢ်ဆါခီန့ၣ်ဘၣ်မၤကျီးတခီခီဘၣ်ကနၣ်တခီခီလီၤႉမ့မ့ၢ်လၢမုၢ်နၤခီန့ၣ်ပဘၣ်ဟးစံၣ်မံဒ်အံၤယံၤလံမီၤနီၤ”အဂ့ၢ်န့ၣ် ကြုၢ်တုလီၢ်က၀ီၤကမျၢၢ်တဂၤ စံး၀ဲန့ၣ်လီၤႉ

တကီၢ်ခါခဲအံၤဘၣ်ဃးတၢ်မၤတဲာ်ကွံာ်လီမ့ၣ်အူလၢတရူးကၣ်စံၣ်နိၣ်၀့ၢ်သီတၢ်လီၢ်(၂)တီၤ၀ံၤလီၢ်ခံန့ၣ် ထံကီၢ်ခံဘ့ၣ်ကီၢ်ဆၢတၢ်ကရၢကရိတဖၣ်ပတထံၣ်အဟံးထီၣ်ဖီၣ်ထီၣ်ဂ့ၢ်၀ီလၢတရူး(ကၣ်စံၣ်နိၣ်)တၢ်လီၢ်လၢအဂၤသ့ၣ်တဖၣ်အံၤဒံးဘၣ်အဂ့ၢ်န့ၣ် မၠၣ်တ၀ံၣ်လီၢ်က၀ီၤကမျၢၢ်စံး၀ဲအသိးသ့ၣ်ညါဘၣ်န့ၣ်လီၤႉ