လါအီကူး ၁၆ သီႇ၂၀၂၃ နံၣ်ႇ ခ့ၣ်အဲးစံၣ်
ဖဲမဟါလါအီကူး ၁၅ သီ မုၢ်ဃ့ၢ်လီၤအဆၢကတီၢ်န့ၣ် စ့ပယိၤအၦ့ၤလီၤ၀ဲဒီး စ့ပယီၤတကလီၢ်န့ၣ် န့ၢ်က့ၤလၢစ့ယိၤ (၉၉၀)ဘးလီၤအဂ့ၢ်န့ၣ် ၦၤလၢအမၤတၢ်ခီလဲစ့ႇတၢ်ဆှၢလီၤစ့တၢ်ဖံးတၢ်မၤလၢအိၣ်ကီၢ်ကၠီၣ်တဲၣ်– ကီၢ်ပယီၤကီၢ်ဆၢတဖၣ် စံး၀ဲအသိး သ့ၣ်ညါ၀ဲန့ၣ်လီၤႉ
ဖဲမဟါလါအီကူး ၁၅ သီ ဂီၤခီအဆၢကတီၢ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ် စ့အလုၢ်အၦ့ၤအိၣ်၀ဲ စ့ပယီၤ(၁)ကလီၢ်န့ၣ် န့ၢ်ဒံး၀ဲလၢစ့ယိၤ(၁၀၀၀)ဘးဒံးဒီးဘၣ်ဆၣ်ဖဲမုၢ်ဃ့ၢ်လီၤန့ၣ်စ့ယိၤအိၣ်တ့ၢ်က့ၤထဲ(၉၉၀)ဘး လီၤ အဂ့ၢ်န့ၣ် သ့ၣ်ညါဘၣ်လၢမၠၣ်၀တံၣ် တၢ်ခီလဲစ့ႇတၢ်ဆှၢစ့တၢ်ဖံးတၢ်မၤကစၢ်တဖၣ်အအိၣ်န့ၣ်လီၤႉ
ခီဖျိစ့ပယီၤအၦ့ၤလီၤအဃိတကီၢ်ခါခဲအံၤၦၤကူၣ်လဲၤမၤကၤတၢ်ဖိတဖၣ်ဟံစ့ယိၤတအိၣ်အါအါလၢၤဘၣ်ဒီး ၦၤဟံစ့ပယီၤဟဲအါထီၣ်၀ဲအဂ့ၢ်န့ၣ် ၦၤမၤတၢ်ခီလဲစ့ႇတၢ်ဆှၢစ့တၢ်ဖံးတၢ်မၤလၢအိၣ်မၠၣ်၀တံၣ်ကီၢ်ဆၢတဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ
အ၀ဲစံး၀ဲလၢ“တနံၤအံၤစ့ယိၤလီၤတုၤ(၁၀၀၀)ဖီလာ်ညါႉၦၤဟဲခီလဲစ့ယိၤဆူစ့ပယီၤဟဲအါထီၣ်မီၤနီၤႉ အ၀ဲသ့ၣ်န့ၣ် အိၣ်ခိးကွၢ်စ့ယိၤအိၣ်တ့ၢ်(၁၀၀၀)ဆူဖီလာ်မီၤနီၤႉဒ်အ၀ဲသ့ၣ်မုၢ်လၢ်စ့ၦ့ၤအသိးန့ၣ်န့ၢ်လံအဃိၦၤဟဲဆှၢ လီၤစ့ဒီဒူၣ်ညါႉ မ့မ့ၢ်ၦၤကူၣ်လဲၤမၤကၤတၢ်ဖိတဖၣ်ခီန့ၣ်အ၀ဲသ့ၣ်ဟံစ့ယိၤလၢတၢ်လိၣ်အဖီခိၣ်လီၤတဟံစ့ယိၤအါအါ လၢၤဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်ဖဲမဟါလါအီကူး ၁၅ သီအနံၤန့ၣ်လီၤႉ
ခီဖျိစ့ပယီၤၦ့ၤလီၤကွ့ၢ်ကွ့ၢ်အဃိၦၤကူၣ်လဲၤမၤကၤတၢ်ဖိလၢအၦ့ၤစ့ယိၤတဖၣ်တၢ်ကီတၢ်ခဲအိၣ်ထီၣ်လၢအ၀ဲသ့ၣ်အဂီၢ် ဒီးဒ်န့ၣ်အသိးၦၤကူၣ်လဲၤမၤကၤတၢ်ဖိလၢအၦ့ၤဆါကၠီၣ်တဲၣ်တၢ်ဖိတၢ်လံၤတဖၣ်အဂီၢ်စ့ၢ်ကီးဆှူ၀ဲအဂ့ၢ်န့ၣ် ဖၣ်အၣ်၀့ၢ် ၦၤကူၣ်လဲၤမၤကၤတၢ်ဖိလၢအဆါကၠီၣ်တဲၣ်တၢ်ဖိတၢ်လံၤတဂၤ စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“တၢ်အိၣ်သးခဲအံၤန့ၣ်ၦၤဆါအီၣ်တၢ်ဖိနါက့တဘၣ်ဂီၢ်နီတစဲးလၢၤဘၣ်ႉစ့ၦ့ၤလီၤအဃိဒ်နသ့ၣ်ညါအသိးလီၤႇ ခဲအံၤလၢနကဆါတၢ်အဂီၢ်န့ၣ်မးနဘၣ်ပျံၤတၢ်လံႉတဘၣ်ဂီၢ်ဒ်သိးလၢညါလၢၤဘၣ်ႉအပူၤကွံာ်လၢညါန့ၣ်နဆါတၢ်ဒံးန့ၢ် အမၠးအိၣ်ဒံးအါလီၤႉခဲအံၤတမ့ၢ်ဒ်န့ၣ်လၢၤဘၣ်ႇနဆါတၢ်ဒံးန့ၢ်န့ၣ်ဒံးနဆှူအါလီၤ”အဂ့ၢ်န့ၣ် စံး၀ဲန့ၣ်လီၤႉ
ဖဲမဟါကီၢ်ပယီၤမုၢ်ကျိၤ၀ဲၤကွာ်တၢ်ဆါတၢ်ၦ့ၤအပူၤန့ၣ်ထူတဘးန့ၣ်အၦ့ၤအိၣ်၀ဲ(၃၈)ကလီၢ်ခိၣ်ဃၢၤညါဒီး မ့မ့ၢ်(အမဲရံၣ်ကၤ)စ့တဒီၣ်လၣ်န့ၣ်အၦ့ၤအိၣ်၀ဲ(၃၇၀၀)ကၠးန့ၣ်လီၤႉ ဒ်န့ၣ်အသိးလၢ၀့ၢ်တကူၣ် ဒးဆံၣ်သိ(92)တလံးထၢၣ် န့ၣ် အၦ့ၤအိၣ်၀ဲ(၂၃၀၅)ကၠးဒီး မ့မ့ၢ်လၢ(95)တလံးထၢၣ်န့ၣ်အၦ့ၤအိၣ်၀ဲ(၂၄၁၅)ကၠး အဂ့ၢ်န့ၣ် သ့ၣ်ညါဘၣ်လၢကီၢ်ပူၤ ၦၤမၤမုၢ်ကျိၤ၀ဲၤကွာ်ဖိတဖၣ်အအိၣ်န့ၣ်လီၤႉ
ခီဖျိစ့ယိၤၦ့ၤထီၣ်ဒီးစ့ပယီၤၦ့ၤလီၤအဃိၦၤလၢအၦ့ၤသူကၠီၣ်တဲၣ်တၢ်ဖိတၢ်လံၤတဖၣ်အံၤထံၣ်ဘၣ်၀ဲတၢ်ကီတၢ်ခဲ တကးဒံးဘၣ်အမဲာ်ညါလၢတၢ်ကစိာ်ဆှၢတၢ်ဖိတၢ်လံၤအဂီၢ်စ့ၢ်ကီးခီဖျိကီၢ်ကၠီၣ်တဲၣ်–ကီၢ်ပယီၤကီၢ်ဆၢကျဲစ့ၢ်ကီး လ့ၢ်ထီၣ်လ့ၢ်လိၤတညီဒ်သိးလၢညါလၢၤဘၣ်အဃိကၠီၣ်တဲၣ်တၢ်ဖိတၢ်လံၤအၦ့ၤဘၣ်ဒိၣ်ထီၣ်၀ဲလီၤအဂ့ၢ်န့ၣ် ၦၤၦ့ၤဆါပနံာ်တၢ်ဖိတၢ်လံၤတဖၣ်စံး၀ဲန့ၣ်လီၤႉ
