ဖၣ်အၣ်ကီၢ်ဆၣ်ပူၤ ဖုသးၦၢ်ဒီမါ၀ၤခံဂၤလၢဘၣ်တၢ်ခးသံအီၤအံၤဒူၣ်ဖိထၢဖိလိၣ်ဘၣ်၀ဲလၢတၢ်တီတၢ်တြၢ်ကအိၣ်ထီၣ်

လါယူၤ ၁၂ သီႇ ၂၀၂၄ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ် တကီၤဘိကရူၢ်အပူၤ အပူၤကွံာ်လါအ့ဖြ့ၣ်အခါ ဘၣ်ဃးဖုသးၦၢ်ဒီမၤ၀ၤခံဂၤလၢအဘၣ်တၢ်လံၤခးသံအီၤအံၤ အဟံၣ်ဖိဃီဖိလိၣ်ဘၣ်၀ဲ တၢ်တီတၢ်တြၢ်ဒီးတၢ်ကဟံထီၣ်ဖီၣ်ထီၣ်ဂ့ၢ်၀ီတုၤလီၤတီၤလီၤအဂ့ၢ်န့ၣ် ဒူၣ်ဖိထၢဖိစံး၀ဲန့ၣ်လီၤႉ

ဖဲအပူၤကွံာ်(၂၀၂၄)လါအ့ဖြ့ၣ်(၂၂)သီ မုၢ်နၤခီ(၁၀)နၣ်ရံၣ်ဃၣ်ဃၣ်အဆၢကတီၢ်န့ၣ် လၢတကီၤဘိကရူၢ် မဲၢ်လဲထၣ်သ၀ီအပူၤ ဖီၣ်စုက၀ဲၤလၢတၢ်တသ့ၣ်ညါအမံၤ(၂)ဂၤ ဟဲထီၣ်ခးသံ၀ဲဒၣ်ဖါတံၢ်စီၤကးကါ(၈၀)နံၣ်ဒီး မုဂါနီၢ်စ့ၤပူၣ်(၇၆)နံၣ် ခံအဂၤအံၤလၢဟံၣ်ပူၤအဂ့ၢ်န့ၣ် ဖုသးၦၢ်ဒီမါ၀ၤ(၂)ဂၤလၢအဘၣ်တၢ်မၤသံအီၤအံၤ အဖိခွါအနီၢ်ကစၢ်ဒၣ်၀ဲစံး၀ဲန့ၣ်လီၤႉ

ဖုသးၦၢ်ဒီမါ၀ၤခံဂၤအဖိခွါ စီၤကိၤငဲၤ စံး၀ဲလၢ“တၢ်မၤသံတၢ်ဂ့ၢ်တၢ်ကျိၤခီန့ၣ်အ၀ဲသ့ၣ်ဟဲန့ၣ်ကဘၣ်ဖဲမုၢ်နၤခီ (၉)နၣ်ရံၣ် ဒီး(၁၀)နၣ်ရံၣ်အဘၢၣ်စၢၤန့ၣ်ႉဟဲတထံၣ်ဃီန့ၣ်တတဲတၢ်နီမံၤဘၣ်ႉဟံၣ်တဖျၢၣ်ပူၤန့ၣ်ၦၤအိၣ်ခဲလၢာ်(၃)ဂၤ လၢအ၀ဲတဂၤ န့ၣ်ၦၤကွးရီဘၢၣ်ဖိႉခးသံ၀ဲန့ၣ်ခံဂၤလီၤႉမ့မ့ၢ်လၢၦၤကွးရီဘၢၣ်ဖိန့ၣ်တခးသံ၀ဲဒၣ်ဘၣ်ႉခးသံ၀ဲလိၤလိၤၦၤသးၦၢ်ခံဂၤန့ၣ်လီၤႉယသံကွၢ်ၦၤလၢတၢ်ခိၣ်တၢ်ဃၢၤဖဲန့ၣ်ၦၤတဲယၤလၢၦၤဟဲန့ၣ်ၦၤဖိသၣ်ခံဂၤႉၦၤတဲလၢအကဲ၀ဲဒၣ် (DKBA)အၦၤႇ၀ဲဒၣ်ဒု ပတယးဒ်န့ၣ်လီၤႉမ့ၢ်ဂ့ၤတမ့ၢ်ဂ့ၤၦၤတယးဒ်န့ၣ်လီၣ်ဒုကမ့ၢ်လီၢ်ဧါသၢၣ်ႉဘၣ်မနုၤအဃိလဲၣ် ၦၤအိၣ်ဖဲန့ၣ်သၢဂၤခးသံ၀ဲခံဂၤ အ၀ဲတဂၤအိၣ်တီၢ်န့ၣ်သ့ၣ်ညါ၀ဲစ့ၢ်ႉဖဲန့ၣ်ၦၤထံၣ်တၢ်ကဲထီၣ်သး(သက်သေ)အိၣ်တဂၤစ့ၢ်မီၤနီၤ.ဘၣ်ဃးတၢ်ဂ့ၢ်အံၤပဆၢမုၢ်လၢ်လၢပှၤလၢမူဒါအိၣ်တဖၣ်ကဟံမူဒါ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

ၦၤဟဲခးသံတၢ်ဘျီ၀ဲအံၤမ့့မ့ၢ်မုဂါနီၢ်စ့ၤပူၣ်န့ၣ်တၢ်ခး၀ဲအသးနါၦၢ်(၂)ထံၣ်ႇအနၢ်တကံၤထံး(၁)ထံၣ် ဒီးဖါတံၢ် စီၤကးကါခီန့ၣ်တၢ်ခး၀ဲဒၣ်အမဲာ်ချံခံဖျၢၣ်လၢာ်တကပၤတထံၣ်အသိး တၢ်ပညိၣ်အိၣ်လိၤလိၤလၢကဟဲခးသံတၢ် ဒီးခးသံ၀ဲလၢတၢ်ဂ့ၢ်မနုၤအဃိလဲၣ်န့ၣ်တသ့ၣ်ညါ၀ဲလီၤတံၢ်ဘၣ်အဂ့ၢ်န့ၣ် ဒူၣ်ဖိထၢဖိတဖၣ်စံး၀ဲန့ၣ်လီၤႉ

တကးဒံးဘၣ်လၢန့ၣ်အမဲာ်ညါကရူၢ်ကရၢအၦၤလၢအဟဲခးသံတၢ်အံၤ တုၤလၢခဲအံၤတၢ်ဟံးထီၣ်ဖီၣ်ထီၣ်အရ့ တအိၣ်၀ဲဒၣ်နီမံၤဘၣ်အဃိ ဒံၣ်ဖိလၢအအိၣ်လီၤတဲာ်တဖၣ်လိၣ်ဘၣ်၀ဲတၢ်တီတၢ်တြၢ်အဲၣ်ဒိးလၢတၢ်ကဟံထီၣ်ဖီၣ် ထီၣ်ဂ့ၢ်၀ီတုၤလီၤတီၤလီၤအဂ့ၢ်န့ၣ် စီၤကိၤငဲၤ စံးအါထီၣ်၀ဲန့ၣ်လီၤႉ

ဒ်န့ၣ်အသိးတၢ်လီၢ်လၢတၢ်ကဲထီၣ်သးအလီၢ်အံၤအိၣ်၀ဲဒၣ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဖၣ်အၣ်ကီၢ်ဆၣ်အပူၤဒီး ဘၣ်ဆၣ်တၢ်လီၢ်ဖဲန့ၣ်အပူၤန့ၣ် ဖီၣ်စုက၀ဲၤကရူၢ်လၢအမ့ၢ် (ခ့ၣ်အဲၣ်ယူၣ်)အၦၤႇ(BGF),(DKBA),(PDF)အိၣ်ဆိးဟူးဂဲၤ၀ဲဒၣ်အဂ့ၢ်န့ၣ် ခ့ၣ်အဲၣ်ယူၣ်လီၢ်က၀ီၤၦၤဘၣ်မူဘၣ်ဒါအသိး သ့ၣ်ညါဘၣ်န့ၣ်လီၤ

ဘၣ်ဃးတၢ်ဂ့ၢ်တၢ်ကျိၤ၀ဲအံၤန့ၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲဒၣ်လၢ “တၢ်ကဲထီၣ်သးဒုအမ့ၢ်လီၤႉပသ့ၣ်ညါဘၣ်လၢတၢ်မုၢ်ၦၢ်တၢ်ဖုၦၢ်ခံဂၤတၢ်ခးသံအီၤလၢကျိမီၤနီၤႉတၢ်ကဲထီၣ်သးန့ၣ်ပ၀ဲဒၣ်ကီၢ်ဆၣ်ဒီးကရူၢ်ၦၤဘၣ်မူဘၣ်ဒါန့ၣ်လဲၤသမံသမိးအီၤဒီးထံၣ်၀ဲဒၣ်လၢတၢ်ခးသံအီၤဒီးကျိႉလၢခံပဃုသ့ၣ်ညါန့ၣ်ပသ့ၣ်ညါဘၣ် လၢၦၤခးသံ တၢ်န့ၣ်မ့ၢ်ဖီၣ်စုက၀ဲၤကရၢလၢအဂၤႉတၢ်န့ၣ်တဲအါလိာ်သးဒီးအတံ၀ံၤသးတမံ၀ဲဘၣ်ဘျီတဲ၀ဲလၢအတံဒီး အမုဂါန့ၣ်အူတၢ် လိၢ်တၢ်ဟဲခးသံ၀ဲဒၣ်န့ၣ်ပသ့ၣ်ညါဘၣ်ဒ်န့ၣ်လီၤႉလၢပကအိးထီၣ်တၢ်မူးတၢ်ရၢ်ပကဟံးထီၣ်ဖီၣ်ထီၣ် ဂ့ၢ်၀ီခီန့ၣ်ခီဖျိ တမ့ၢ်ပတၢ်ကရၢကရိဘၣ်ႇတမ့ၢ်စ့ၢ်ကီးၦၤကမျၢၢ်လၢပဟီၣ်က၀ီၤပူၤခးသံ၀ဲဘၣ်အဃိန့ၣ်ပဟံထီၣ်ဖီၣ်ထီၣ် အီၤတသ့ဘၣ် ခီဖျိမ့ၢ်ကရၢလၢအဂၤအဃိမီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ

ဘၣ်ဃးတၢ်ကဲထီၣ်သးအံၤဒ်လီၢ်က၀ီၤကမျၢၢ်လၢအိၣ်ဖဲန့ၣ်တဖၣ်စံး၀ဲအသိးန့ၣ် ၦၤခးသံတၢ်ဖိန့ၣ်မ့ၢ်၀ဲ(DKBA) အၦၤဒီးဒ်န့ၣ်အသိးအ၀ဲဒီးဖုသးၦၢ်ဒီမါ၀ၤခံဂၤအံၤမ့ၢ်၀ဲဒီဖိဒိၣ်ဖါတံၢ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

ဒ်န့ၣ်အသိးလၢကညီကီၢ်စဲၣ်ဟီၣ်က၀ီၤတနီၤအပူၤခီဖျိဖီၣ်စုက၀ဲၤကရူၢ်ကရၢလၢအဂၤတဖၣ်အိၣ်ဆီလီၤသး ဟူးဂဲၤ၀ဲ တၢ်လီၢ်တပူၤဃီအိၣ်အဃိ တၢ်မ့ဟဲကဲထီၣ်သးလၢတၢ်မၤသံမၤ၀ီမ့ၢ်ဂ့ၤႇတၢ်မူးတၢ်ရၢ်တၢ်ဂ့ၢ်ကီလၢအဂၤ မ့ဟဲအိၣ်ထီၣ် တမံၤလၢ်လၢ်န့ၣ် လၢတၢ်ကဟံးထီၣ်ဖီၣ်ဂ့ၢ်၀ီအဂီၢ် ၦၤကမျၢၢ်တဖၣ်ကဘၣ်လဲၤတီၣ်ဖျါထီၣ်လၢ တၢ်ကရၢကရိမနုၤအအိၣ် လဲၣ်န့ၣ်တသ့ၣ်ညါ၀ဲဘၣ်အဂ့ၢ်န့ၣ် ဟီၣ်က၀ီၤကမျၢၢ်စံး၀ဲဒၣ်အိၣ်န့ၣ်လီၤႉ