လါယူၤ ၂၆သီ, ၂၀၂၅နံၣ်,ခ့ၣ်အဲးစံၣ်,
ကီၢ်ကၠီၣ်တဲၣ်-ကီၢ်ပယီၤကီၢ်ဆၢဃိၣ်သၢဖျၢၣ်ဝ့ၢ်ပူၤ,မဟါလါယူၤ(၂၄)သီဂီၤခီအနၣ်ရံၣ်(၁၀)အဆၢကတီၢ်,ပှၤနီလ့ၣ်ယီၢ်(taxi)သးစၢ်ပိၥ်ခွါတဂၤဘၣ်တၢ်ကူးအကိၥ်ဘိဒီးဒီအဃိဘၣ်ဒိဝဲနးနးကျံၤကျံၤအဂ့ၢ်,ဝ့ၢ်လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
(taxi)ပှၤနီသိလ့ၣ်ယီၢ်ဖိလၢတၢ်ကူးအကိၥ်ဘိဒီးဘၣ်ဒိနးနးကျံၤကျံၤတဂၤအံၤမ့ၢ်ဝဲမီၤကၠီၣ်စ့ၣ်ဖၠိ(ကိး)ဘ့ၤလုၣ်ဝၣ်သးနံၣ်(၁၉)နံၣ်ဒီး,အဝဲမ့ၢ်ဝဲပှၤဟးနီၣ်သိလ့ၣ်ယီၢ်တီဆှၢပှၤဟးထီၣ်ဟးလီၤဖဲဃိၣ်သၢဖျၢၣ်ဝ့ၢ်ကီၢ်ဆၢ(တီၤထီကၠိ)မဲၥ်ညါတြဲၤတၢ်အိၣ်ခိးတၢ်အလီၢ်တဂၤအဂ့ၢ်,ဝ့ၢ်လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.
ဒီးမဟါလါယူၤ(၂၄)သီအနံၤအပူၤ,ဖဲအဝဲလဲၤတီဆှၢဝဲပှၤတဂၤလၢဝ့ၢ်ပူၤတၢ်လီၢ်အဂၤတတီၤအခါ,ပှၤလၢတီဆှၢဝဲတဂၤအံၤကူးအကိၥ်ဒီးဒီဝံၤဂုၥ်န့ၢ်ကွံၥ်အသိလ့ၣ်ယီၢ်အဂ့ၢ်,ဝ့ၢ်လီၢ်ကဝီၤပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ.
“ပှၤနီသိလ့ၣ်ယီၢ်ဖိမီၤကၠီၣ်စ့ၣ်ဖၠိအံၤဖဲအဝဲလဲၤတီဆှၢဝဲပှၤလၢတၢ်တသ့ၣ်ညါအမံၤဘၣ်တဂၤန့ၣ်လၢကလဲၤဆီတလဲဝဲအဆဲးကဲၤလၢဝ့ၢ်ပူၤတၢ်လီၢ်အဂၤတတီၤအဆၢကတီၢ်,လဲၤတုၤထီၣ်ဖဲရီဘၢၣ်ကျီးအခါ,ပှၤလၢတီဆှၢဝဲတဂၤအံၤအိၣ်လၢအလီၢ်ခံထုးထီၣ်ဒီကူးဝဲအကိၥ်ဘိဂုၢ်န့ၢ်ကွံၥ်ဝဲအသိလ့ၣ်ယီၢ်န့ၣ်လီၤ.ဒီးခီဖျိအဝဲဘၣ်ဒိဝဲနးနးအဃိစံၣ်ဃ့ဝဲတၢ်မၤစၢၤဒီးဘၣ်တၢ်ဆှၢဝဲအီၤလၢဝ့ၢ်တၢ်ဆါဟံၣ်တဆီဆူမီၣ်လမၠဲၣ်တၢ်ဆါဟံၣ်လံ”အဂ့ၢ်အဝဲစံးဝဲဒၣ်န့ၣ်လီၤ.
လၢန့ၣ်အမဲၥ်ညါ,ပှၤမၤကမၣ်တၢ်ဖိအံၤတကီၢ်ခါခဲအံၤတၢ်ဃုထံၣ်သ့ၣ်ညါဘၣ်ဝဲလံဘၣ်ဆၣ်,မ့မ့ၢ်သိလ့ၣ်ယီၢ်တခီတၢ်တဒိးန့ၢ်ဘၣ်က့ၤဒံးဝဲဒၣ်အဂ့ၢ်,သ့ၣ်ညါဘၣ်ဒ်လီၢ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်အသိးန့ၣ်လီၤ.
ဃိၣ်သၢဖျၢၣ်ဝ့ၢ်အံၤဘၣ်ဃးဒီးကသံၣ်မူၤဘှီး,တၢ်ဟုၣ်တၢ်ဘျၣ်,တၢ်ဂုၥ်န့ၢ်ဆူၣ်မၤန့ၢ်ဆူၣ်အဃိတၢ်ဘၣ်ဒိဘၣ်ထံး,တၢ်သံတၢ်ပှၢ်ကဲထီၣ်ဝဲသးခဲအံၤခဲအံၤအိၣ်ဝဲအဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
ခီဖျိတၢ်ကဲထီၣ်သးဒ်အံၤသ့ၣ်တဖၣ်အိၣ်ဝဲခဲအံၤခဲအံၤအဃိ,ဝ့ၢ်လီၢ်ကဝီၤကမျၢၢ်တဖၣ်ဘၣ်အိၣ်ဝဲလၢတၢ်ဘၣ်ယိၣ်ဘၣ်ဘှီပူၤအဂ့ၢ်,ဃိၣ်သၢဖျၢၣ်ဝ့ၢ်လီၢ်ကဝီၤဖိတဂၤစံးဝဲဒၣ်ဒ်အံၤန့ၣ်လီၤ.
“ခဲအံၤတၢ်သ့ၣ်တဖၣ်အံၤဝ့ၢ်ပူၤဟဲအါထီၣ်ဝဲဒၣ်န့ၣ်လီၤ.ကသံၣ်မူၤဘှီးမူး,တၢ်ဟုၣ်တၢ်ဘျၣ်,တၢ်ဂုၥ်န့ၢ်ဆူၣ်တၢ်တကး ဘၣ်တနီၤဘၣ်ဒီးကျိ,တနီၤတၢ်ကူၣ်မၤသံအီၤတၢ်တဖၣ်န့ၣ်ကဲထီၣ်သးခဲအံၤခဲအံၤလီၤ.အဃိလၢတၢ်ဘှါရှဲတၢ်ဂ့ၢ်ကီသ့ၣ်တဖၣ်အံၤအဂီၢ်န့ၣ်ပှၤတနီၤဟ့ၣ်ကူၣ်လၢဟံၣ်ကိးဖျၢၣ်ဒဲးကထီထီၣ်(CCTV)(သနၥ်က့)က့လီမ့အူတန့ၢ်ဘၣ်.ပှၤဘၣ်သူဒၣ်စိၤလၤလီၤအဃိတၢ်မၤတကဲထီၣ်ဘၣ်.အဃိန့ၣ်တၢ်ဘၣ်ယိၣ်ဘၣ်ဘှီအိၣ်ဝဲလၢတၢ်ဖံးအီၣ်မၤလီၢ်ဆၢကတီၢ်မ့ၢ်ဂ့ၤတၢ်လဲၤတၢ်က့ၤမ့ၢ်ဂ့ၤတၢ်မံတၢ်ဂဲၤအဆၢကတီၢ်မ့ၢ်ဂ့ၤမီၤ”အဂ့ၢ်စံးဝဲဒၣ်န့ၣ်လီၤ.
ဃိၣ်သၢဖျၢၣ်ဝ့ၢ်အံၤခီဖျိမ့ၢ်ဝဲကီၢ်ဆၢတၢ်လီၢ်တၢ်ကျဲအဃိ,တၢ်မူးတၢ်ရၢ်ကဲထီၣ်သးတဘျီလၢ်လၢ်အဆၢကတီၢ်တၢ်ဘှါရှဲအီၤကီခဲခီဖျိပှၤမၤကမၣ်တၢ်ဖိတဖၣ်ဃ့ၢ်ထီၣ်အိၣ်ကဒုသးလၢခံခီခံကပၤထံကီၢ်န့ၢ်ဝဲညီညီဒီး,တနီၤနီၤတခီကရူၢ်ကရၢတဖၣ်အိၣ်ပှိၤဝဲအီၤအဃိတၢ်ဟံးထီၣ်ဖီၣ်ထီၣ်အရ့ကီဝဲအဂ့ၢ်,ဝ့ၢ်လီၢ်ကဝီၤကမျၢၢ်တဖၣ်စံးဝဲဒၣ်န့ၣ်လီၤ.
