လါယူၤ ၁၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် သ့ၣ်ဘီဘိကရူၢ်ပူၤ သ့ၣ်ဘီဘိပယီၤသုးကလၢၤလီၤလံဘၣ်ဆၣ် ကၠိလၢအိၣ်ဟီၣ်က၀ီၤပူၤအံၤတဖၣ်ကအိးထီၣ်ကၠိအဂီၢ်တၢ်ဘံၣ်တၢ်ဘၢတအိၣ်ဒံး၀ဲဘၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါဒီးကၠိပှၤ ဘၣ်မူဘၣ်မူဘၣ်ဒါတဖၣ်စံး၀ဲန့ၣ်လီၤ.
သ့ၣ်ဘီဘိသုးကလၢၤလၢဟီၣ်က၀ီၤ(KNLA)သုးပၥ်ဖှိၣ်ထီၣ်န့ၢ်၀ဲဖဲအပူၤကွံၥ်လါယူၤ ၃ သီအနံၤအံၤ တကီၢ်ခါခဲအံၤသုးကလၢၤ လီၤလံဘၣ်ဆၣ် ဟီၣ်က၀ီၤဖဲန့ၣ်အပူၤခီဖျိတၢ်အိၣ်သးတဂၢၢ်တကျၢၤဒံးဘၣ်ဒီးကဘီယူၤစ့ၢ်ကီးလဲၤဆှၣ်တၢ်အိၣ်ဒံး၀ဲအဃိ ကအိးထီၣ်ကဒါကၠိအဂီၢ် တၢ်ကီတၢ်ခဲအိၣ်၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဃးတၢ်ဂ့ၢ်အံၤ သ့ၣ်ဘီဘိသ၀ီသးပှၢ် စီၤခုကျဲၤ စံး၀ဲလၢ “သ့ၣ်ဘီဘိသုးကလၢၤလီၤ၀ံၤလီၢ်ခံန့ၣ် ခံသီသၢသီတဘျီပယီၤသုး ကဘီယူၤဟဲဆှၣ်တၢ်မၢ်မၢ်လီၤ.အဃိပှၤမ့အိးထီၣ်ကၠိန့ၣ်ပှၤသးအုးလၢကဘီယူၤကဟဲကွံၥ်လီၤတၢ်ဒ်န့ၣ်မီၤနီၤ.မ့အိးထီၣ်နါက့တအိးထီၣ်လၢကၠိပူၤဘၣ်.ဘၣ်မနုၤအဃိလဲၣ်ကဘီယူၤန့ၣ်မ့ဟးကွံၥ်လီၤတၢ်န့ၣ်ဟးကွံၥ်လီၤတၢ်လၢကၠိလဲလဲလီၤ”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်စှၤသီအတီၢ်ပူၤအံၤအူကြ့ၣ်ထၣ်,ထံကပျၢၤသုးကလၢၤလၢအိၣ်ဘူးဖဲဟီၣ်က၀ီၤပူၤအံၤစ့ၢ်ကီးဟီၣ်က၀ီၤ(KNLA) သုးပၥ်ဖှိၣ်စးထီၣ်လဲၤက၀ီၤခး၀ဲဒီးဒြိသ့ၣ်တဖၣ်အဃိ ဂီၤလ့ပယီၤသုးကလၢၤက့ၤခးစိဃီၤ၀ဲကျိဖးဒိၣ်အိၣ်၀ဲအဂ့ၢ်န့ၣ် လီၢ်က၀ီၤ ပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
ဘၣ်ဆၣ်တကီၢ်ခါခဲအံၤဆၢကတီၢ်တုၤဃီၤ၀ဲလၢကၠိကဘၣ်အိးထီၣ်လံဒီးကၠိဖိတဖၣ်သုတစဲၤခံလၢတၢ်ဖံးလိမၤဒိးတဂ့ၤအဂီၢ် နွံလၢကဟဲတၢ်ရဲၣ်တၢ်ကျဲၤအိၣ်လၢတၢ်ကအိးထီၣ်က့ၤကၠိလၢတၢ်ဘံၣ်တၢ်ဘၢအလီၢ်တတီၤအဂ့ၢ်န့ၣ် သ့ၣ်ဘီဘိသ၀ီပူၤ တီနီၢ်တီၤထီကၠိ ကၠိခိၣ် သရၣ်စီၤအဲၣ်ဃူ စံး၀ဲဒ်အံၤန့ၣ်လီၤ.
“အပူၤကွံၥ်န့ၣ်ပတိၤလီၤလၢတလါအံၤ ၂ သီန့ၣ်ပကအိးထီၣ်ကဒါကၠိမီၤနီၤ.ဘၣ်ဆၣ်ခီဖျိလီၢ်က၀ီၤတၢ်ဒုးတၢ်ယၤအဖီခိၣ်ပဘၣ်ဃ့ၢ် ပလဲၥ်သးတစိၢ်ဖိ.အဃိခဲအံၤလါယူၤထီၣ် ၁၀ တုၤလၢ ၁၃ သီပကစးထီၣ်တူၢ်လိၥ်က့ၤပှၤကၠိဖိအမံၤ.ဒီးနွံလၢကဟဲ ၁၆ သီန့ၣ် ပက စးထီၣ်လဲၤက့ၤလၢတၢ်သိၣ်လိလီၤ.ပမ့ကွၢ်လၢတၢ်ဘံၣ်တၢ်ဘၢဒုတအိၣ်ဒံးဘၣ်.ဘၣ်ဆၣ်လၢတၢ်ကီတၢ်ခဲအပူၤဒုပကအိးထီၣ်စိလၢတၢ်ချၢတၢ်ဘံၣ်တၢ်ဘၢအလီၢ်လီၤ.ပကမၤလိတၢ်လၢကၠိပူၤဒုတသ့ဒံးဘၣ်.အခိၣ်သ့ၣ်ပပျံၤလၢကဘီယူၤကဟဲခးလီၤကဒါတၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢန့ၣ်အမဲၥ်ညါခဲအံၤဘၣ်၀ဲဒၣ်လၢတၢ်စူၤခါဒီးခီဖျိတၢ်အိးထီၣ်မၤလိတၢ်လၢကၠိပူၤလိၤလိၤတဘူၣ်ဒံးဘၣ်အဖီခိၣ်အံၤ လၢပှၤကၠိဖိ အဂီၢ်တၢ်ကီတၢ်ခဲတၢ်ဂ့ၢ်ကီပိၥ်ထွဲထီၣ်အခံလၢတၢ်မၤလိမၤဒိးအလီၢ်ဒီးအိၣ်ဆိးလီၢ်ကျဲတကပၤအဂ့ၢ်န့ၣ် သရၣ်ကၠိခိၣ် စီၤအဲၣ်ဃူ စံးအါထီၣ်၀ဲန့ၣ်လီၤ.
“ပတၢ်ကီတၢ်ခဲဒုအိၣ်လီၤဘၣ်မနုၤလဲၣ်ခဲအံၤတၢ်စူၤလံပှၤကၠိဖိအိၣ်ဒီဒူၣ်ညါအဃိပတၢ်သူၣ်ထီၣ်တအိၣ်လၢပှၤကၠိဖိကမၤလိတၢ်အဂီၢ်ဘၣ်.ပမၤစိဃၥ်လၢ(တၤလပၣ်)လီၤ.တၢ်လီၢ်တၢ်ကျဲဒုတဘၣ်လီၢ်ဘၣ်ဆးလၢဖိသၣ်အဂီၢ်ဘၣ်.မ့၀ံၤခံခါတခါန့ၣ်တနံၣ်အံၤဟံၣ်ဒွဲကၠိဖိန့ၣ်အိၣ်လၢ(၁၀၀)ဘျဲၣ်ညါ.အဃိလၢအ၀ဲသ့ၣ်အဂီၢ်န့ၣ်တၢ်အိးတၢ်ဆိး,တၢ်မံတၢ်ဂဲၤစ့ၢ်ကီးတၢ်ကီတၢ်ခဲအိၣ်လီၤ.ဘၣ်မနုၤအဃိလဲၣ်ပမၤလိလၢကၠိမိၢ်ပှၢ်တသ့ဒံးဘၣ်,ပဘၣ်မၤလိလၢတၢ်ချၢဒ်အံၤအဃိနသ့ၣ်ညါတၢလီၤတၢ်ကီတၢ်ခဲအိၣ်ခဲလၢၥ်လီၤ”အဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးတကီၢ်ခါခဲအံၤ လ့ဂီၤ,ဘျၢၣ်ဒိၣ်ကၠိဃုၥ်ဒီးကၠိလၢအိၣ်ဘူးသ့ၣ်ဘီဘိသ၀ီအံၤစ့ၢ်ကီး ခီဖျိလီၢ်က၀ီၤပူၤတၢ်အိၣ်သးဒ်အံၤ သ့ၣ်တဖၣ်အဃိ တုၤလၢခဲအံၤတၢ်တအိးထီၣ်ဒံး၀ဲကၠိဘၣ်အဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ.
တကးဒံးဘၣ်သ့ၣ်ဘီဘိသုးကလၢၤလီၤ၀ံၤလီၢ်ခံကမျၢၢ်လၢအဃ့ၢ်ထီၣ်တဖၣ်က့ၤအိၣ်က့ၤဆိးလၢဒူသ၀ီပူၤအိၣ်၀ဲလံဘၣ်ဆၣ် တနီၤန့ၣ်ဘၣ်ယိၣ်၀ဲလၢကဘီယူၤကဟဲခးလီၤကဒီးတၢ်အဃိအ၀ဲသ့ၣ်က့ၤအိၣ်လၢသ၀ီပူၤတဘူၣ်ဒံးဘၣ်ဟးစံၣ်အိၣ်ကဒုဒံးအသးလၢတၢ်ဘံၣ်တၢ်ဘၢအလီၢ်တုၤလၢခဲအံၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ.
သ့ၣ်ဘီဘိဒီးဘျၢၣ်ဒိၣ်သုးကလၢၤလၢအိၣ်ဘူးလိၥ်သးခံဖျၢၣ်အံၤစးထီၣ်လၢတၢ်ထီၣ်ခး၀ဲတုၤလၢသုးကလၢၤလီၤ၀ံၤတစုန့ၣ် ကျိဖးဒိၣ်အမဲၥ်ညါခီဖျိကဘီယူၤလဲၤတ့ၢ်လီၤမ့ၣ်ပိၢ်အဃိ သ့ၣ်ဘီဘိ,ကွံလၢၢ်ဆှုၣ်,တၤအုးထၣ်,လ့ဂီၤကမျၢၢ်သ့ၣ်တဖၣ် ဘၣ်ဃ့ၢ်ထီၣ်၀ဲအသိး ကမျၢၢ်သံဘၣ်ဒိဘၣ်ထံးတစှၤန့ၢ်(၇)ဂၤကဲထီၣ်ဒံး၀ဲန့ၣ်လီၤ.
တကီၢ်ခါခဲအံၤပယီၤသုးကလၢၤလၢအိၣ်ဆီလီၤသးဖဲကီၢ်ကၠီၣ်တဲၣ်-ကီၢ်ပယီၤကီၢ်ဆၢ ကီးတရံးကီၢ်ဆၣ်(သုးက့ ၆)ဟီၣ်က၀ီၤ ဒီတကျိၤအံၤန့ၣ် တၢ်ထီၣ်မၤန့ၢ်၀ဲသုးကလၢၤဒ်အမ့ၢ် ဘျၢၣ်ဒိၣ်သုးကလၢၤ,သ့ၣ်ဘီဘိ,ကနဲလ့,မီခံ,ထိကၠိသုးကလၢၤအိၣ်၀ဲဒီး ဘၣ်ဆၣ်မ့မ့ၢ်ဂီၤလ့ၤ,အူကြ့ၣ်ထၣ်,ဒီးထံကပျၢၤသုးကလၢၤသ့ၣ်တဖၣ်အံၤတၢ်ထီၣ်၀ဲတန့ၢ်အိၣ်တ့ၢ်ဒံး၀ဲအဂ့ၢ်န့ၣ် သ့ၣ်ညါဘၣ် န့ၣ်လီၤ.
