လါယူၤ ၂၆ သီ, ၂၀၂၅ နံၣ်, ခ့ၣ်အဲးစံၣ်
အပူၤကွံၥ်ကညီကျိၥ်ဃုၥ်ဒီးကီၢ်ပယီၤကလုၥ်ဒူၣ်ကျိၥ်လံၥ်မဲၥ်ဖျၢၣ်လၢတၢ်ဖးအီၤတန့ၢ်ခဲလၢၥ်ဘၣ်အံၤတဖၣ်လၢကဟဲခဲမုၢ်ဆ့ၣ် လါယူၤ ၂၆ သီ အနံၤအံၤ တၢ်စးထီၣ်သူဒီးကဟဲအိၣ်ဖျါထီၣ်သးလၢအဂ့ၢ်အ၀ီလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ကီၢ်ပယီၤပူၤကညီကလုၥ်ဃုၥ်ဒီးယိၤဒိၣ်,တလၢၤ,ရၢၣ်ခၢၣ်ကလုၥ်ဒူၣ်လၢအဂၤတဖၣ်အပူၤကွံၥ်ဖဲတၢ်ကွဲးလံၥ်ကွဲးလဲၢ် တီၣ်ထီၣ် ဆူ(facebook)ပူၤအခါန့ၣ် တၢ်သူ၀ဲ(Zawgyi font),( Unicode font)အိၣ်ဘၣ်ဆၣ် လံၥ်မဲၥ်ဖျၢၣ်သ့ၣ် တဖၣ် ဟဲအိၣ် ဖျါထီၣ်သးတဘၣ်ဘျီးဘၣ်ဒါ,တၢ်ဖး၀ဲတသ့ခဲလၢၥ်ဘၣ်န့ၣ်ပကထံၣ်ဘၣ်၀ဲလီၤ.
အဃိစးထီၣ်ဖဲအပူၤကွံၥ်(၂၀၂၄)လါယူၤလံ ၁၀ သီန့ၣ် ဒ်သိးတၢ်သူဒီးကွဲးကညီကျိၥ်လၢခီဖၠူထၢၣ်ဒီးလီတဲစိပူၤ ကသ့ညီအဂီၢ်န့ၣ် ခ့ၣ်အဲၣ်ယူၣ်-ကညီဒီ ကလုၥ်စၢဖှိၣ်ကရၢ (IT)ပှၤသ့ပှၤဘၣ်ကရူၢ်စးထီၣ်ရၤလီၤဒုးသ့ၣ်ညါ၀ဲကညီကျိၥ်(Unicode) အံၤန့ၣ်လီၤ.
တကးဒံးဘၣ်ဒ်သိးကညီကလုၥ်အကျိၥ်ကဒိၣ်ထီၣ်ထီထီၣ်,တၢ်ကွဲးအီၤဖးအီၤ ကလဲၤသးဘၣ်လိၥ်ဖိးဒ့,လံၥ်မဲၥ်ဖျၢၣ်ကဖျါထီၣ် ဘၣ်ဂ့ၢ်ဘၣ်၀ီအဂီၢ်န့ၣ် ဖဲ(၂၀၂၄)လါအီကူးအခါန့ၣ်စ့ၢ်ကီး တၢ်ဆှၢထီၣ်၀ဲတၢ်ဂ့ၢ်တၢ်ကျိၤဆူ(facebook Team)အအိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိး(face Team)ခီပနံၣ်ကတူၢ်လိၥ်ဘှါဆှဲ၀ဲလံၥ်မဲၥ်ဖျၢၣ်တၢ်ဂ့ၢ်ကီသ့ၣ်တဖၣ်အံၤအဂီၢ် ဖဲတနံၣ်အံၤ(၂၀၂၅) လါဖ့ၤဘြူၤအါရံၤအခါန့ၣ် တၢ်မၤ၀ဲတၢ်ဆဲးလီၤတၢ်ပတုၥ်သူက့ၤ(Zawgyi)ဒီးဆီၣ်ထွဲက့ၤ(Unicode) Campaign တၢ်ရဲၣ် တၢ်ကျဲၤလၢ(အီၤလါ)ပူၤအိၣ်ထီၣ် ၀ဲန့ၣ်လီၤ.
Campaign တၢ်ရဲၣ်တၢ်ကျဲၤအိၣ်ထီၣ်၀ံၤဖဲတလါအံၤလါယူၤ ၁၃ သီအနံၤန့ၣ် (Meta)ခီပနံၣ်ထုးထီၣ်ဒုးသ့ၣ်ညါဘိးဘၣ်ရၤ လီၤ၀ဲလၢစးထီၣ်ကဟဲလါယူၤ ၂၆ သီ အနံၤန့ၣ် ကီၢ်ပယီၤအပူၤ(facebook)ဒီး(Messenger)အံၤ တၢ်ကစးထီၣ် ပတုၥ်ကွံၥ် ၀ဲတၢ်သူ(Zawgyi font)ဒီးမ့မ့ၢ်တခီ တၢ်ကသူက့ၤထဲဒၣ်လၢ(Unicode)တခါဧိၤလီၤအဂ့ၢ်န့ၣ် စံး၀ဲန့ၣ်လီၤ.
ဒ်န့ၣ်အသိးခီဖျိလၢ(Zawgyi)ဒီး(Unicode)ခံခါလၢၥ်အံၤလံၥ်မဲၥ်ဖျၢၣ်တဖျါဘၣ်ဂ့ၢ်ဘၣ်၀ီဘၣ်အဖီခိၣ်အံၤစ့ၢ်ကီး လၢကညီဖိ အကျါတၢ်ကီတၢ်ခဲအိၣ်ဒိၣ်ဒိၣ်မုၢ်မုၢ်လၢကျိၥ်တၢ်ဆဲးကျိးဆဲးကျၢအဃိ ကညီ(IT)ပှၤသ့ပှၤဘၣ်တဖၣ်ဂုၥ်ကျဲးစၢးဟူးဂဲၤ၀ဲပၢၢ်တုၤလၢ အမိၢ်လံၤမိၢ်ပှၢ်ဟဲအိၣ်ဖျါထီၣ်၀ဲခဲအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢကျိၥ်လံၥ်မဲၥ်ဖျၢၣ်လဲၤသးဘၣ်ဂ့ၢ်ဘၣ်၀ီဒ်အံၤအဖီခိၣ် ကဲထီၣ်၀ဲတၢ်တိစၢၤမၤစၢၤဖးဒိၣ်လၢကညီကလုၥ်အဂီၢ်အဃိ လၢကဟဲ အံၤဆၢမုၢ်လၢ်လၢပှၤကိးဂၤဒဲးတဂၤဒီးတဂၤအဘၢၣ်စၢၤကမၤတၢ်ဆဲးကျိးဆဲးကျၢလၢကညီကျိၥ်(ပကစၢ်ကျိၥ်)အဂ့ၢ်န့ၣ် သးစၢ် စီၤအဲၣ်သကိး လၢအဟူးဂဲၤဘၣ်ဃးကညီလံၥ်လဲၢ်ဒီးတၢ်သ့တၢ်ဘၣ်တၢ်ဂုၤထီၣ်ပသီထီၣ်အံၤ စံး၀ဲန့ၣ်လီၤ.
“တၢ်လၢ(facebook)န့ၣ်မ့ၢ်၀ဲ(မံၣ်ဒံၣ်ယၢၣ်)တခါလီၤ.(မံၣ်ဒံၣ်ယၢၣ်)ဒုအိၣ်အကလုၥ်ကလုၥ်လီၤဘၣ်ဆၣ်ပှၤကီၢ်ပယီၤဖိဃုၥ်ဒီးပှၤကညီဖိန့ၣ်သူ၀ဲ(facebook)အါအဃိပမ့ကွဲးတၢ်ဂ့ၢ်တၢ်ကျိၤလၢ(facebook)ပူၤလၢပကစၢ်အကျိၥ်န့ၣ်ကညီကျိၥ်တဖၣ်န့ၣ်ကရၤလီၤအသးအါထီၣ်၀ဲ.၀ံၤဒီးကညီသးစၢ်တဖၣ်ကမၤလိအါထီၣ်က့ၤ,ကကွဲးအထီၣ်က့ၤကညီကျိၥ်.မ့ကွဲးအါထီၣ်၀ဲန့ၣ်ပကျိၥ်အံၤကလဲၤထီၣ်လဲၤထီအါထီၣ်မီၤနီၤ.လၢခံတခါဘၣ်ဃးမုၢ်ကျိၤ၀ဲၤကွၥ်,ပနံၥ်တၢ်ကၤတဖၣ်အံၤန့ၣ်ကမၤအီၤကသ့အါထီၣ်လၢ(အီၤလါ)ဖီၣ်ခိၣ်လီၤ.တကးဒံးဘၣ်တၢ်ကူၣ်ဘၣ်ကူၣ်သ့တဖၣ်န့ၣ်ပကွဲးလီၤရၤလီၤအီၤလၢပကျိၥ်(ကညီကျိၥ်)န့ၣ်ပတၢ်လဲၤထီၣ်လဲၤထီကအိၣ်အါထီၣ်မီၤနီၤ” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်လၢန့ၣ်အမဲၥ်ညါခီဖျိလၢတၢ်ပၥ်ပနီၣ်ပှၤဒ်အမ့ၢ်ပှၤတကလုၥ်အဃိ နံၤ၀ဲအံၤကဲထီၣ်စံၣ်စိၤနုၥ်တၢ်ပနီၣ်လၢကညီဖိဂီၢ် အဂ့ၢ်န့ၣ် ပှၤသ့ပှၤဘၣ်လၢဟူးဂဲၤလၢလံၥ်လဲၢ်တၢ်ဂုၤထီၣ်ပသီထီၣ်အဂီၢ်တဖၣ် စံး၀ဲန့ၣ်လီၤ.
ဒ်(facebook)ထုးထီၣ်ပၥ်ဖျါတ့ၢ်၀ဲအသိး စးထီၣ်ခဲမုၢ်ဆ့ၣ်အံၤ ကီၢ်ပယီၤကလုၥ်ဒူၣ်ဃုၥ်ဒီး ကညီကျိၥ်လၢအမ့ၢ် (စှီၤ,ပှိၢ်မုၢ်နုၥ်/ပှိၢ်မုၢ်ထီၣ်)အလံၥ်မဲၥ်ဖျၢၣ်လၢအပူၤကွံၥ်တၢ်အိးထီၣ်ဖး၀ဲတန့ၢ်ဘၣ်သ့ၣ်တဖၣ်အံၤ ကဟဲအိၣ်ဖျါထီၣ်၀ဲလၢအဂ့ၢ် အ၀ီန့ၣ်လီၤ.
