လါယူၤလံ ၂၂ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤထံဆၢကီၢ်ဆၢဒီတကျိၤန့ၣ် တၢ်ပၢဆှၢဒိၣ်စိဝဲန့ၢ်(၉၀)မျးကယၤလံအဂ့ၢ်န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ် ကရၢ ပှၤကတိၤတၢ်ပၢ ပဒိၣ်စီၤတီနံ စံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲအပူၤကွံၥ်လါယူၤလံ ၁၈ သီအနံၤန့ၣ်လီၤ.
ဒ်အပူၤကွံၥ်လါယူၤလံ ၁၈ သီ ISP Myanmar ထုးထီၣ်ပၥ်ဖျါဝဲတၢ်ဂ့ၢ်တၢ်ကျိၤအသိးန့ၣ် ကီၢ်သူလ့ၤ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဟီၣ်က၀ီၤ ဒီတကျိၤ သၢပူတပူန့ၣ် ခ့ၣ်အဲၣ်ယူၣ် ပၢဆှၢဒိၣ်စိဝဲန့ၢ်လံဒီး ဖဲန့ၣ်အကျါပၣ်ဃုၥ်ဝဲထံဆၢကီၢ်ဆၢတၢ်ကူၣ်လဲၤမၤ ကၤ သုးကလၢၤ ဒီး ကျဲသ့ၣ်တဖၣ်အဂ့ၢ်န့ၣ် လံၥ်တၢ်ပၥ်ဖျါအပူၤပၥ်ဖျါဝဲန့ၣ်လီၤ.
ဘၣ်ဃးတၢ်ဂ့ၢ်အံၤ ခ့ၣ်အဲၣ်ယူၣ် ပဒိၣ်စီၤတီနံ စံးဝဲလၢ“ပထံၣ်လၢထံဆၢကီၢ်ဆၢဒီတကျိၤအံၤ (၉၀)မျးကယၤန့ၣ်အိၣ်လၢပစုပူၤလံ. ဘၣ်မနုၤအဃိလဲၣ်ပမ့ဘၣ်ကွၢ်လၢ(သုးက့ ၄)ဟီၣ်ကဝီၤန့ၣ် သုးကလၢၤအိၣ်တ့ၢ်က့ၤထဲ နၣ်အ့ၤတီၤ(နတ်အိမ်တောင်)တဖျၢၣ်လီၤ . အဃိပမ့ဘၣ်ကွၢ်တၢ်အိၣ်သးသ့ၣ်တဖၣ် အံၤန့ၣ် လဲၤထီၣ်လဲၤထီသ့ဖးဒိၣ်ညါန့ၣ်ပစံးသ့လီၤ”အဂ့ၢ်န့ၣ် စံးဝဲန့ၣ်လီၤ.
လၢတၢ်ကသူၣ်ထီၣ်ဖဲၣ်ဒရၢၣ်ကီၢ်စၢဖှိၣ်အဂီၢ် ဘၣ်ဃးတၢ်ကဒုးအိၣ်ထီၣ်ကီၢ်သူလ့ၤပဒိၣ်အတၢ်ရဲၣ်တၢ်ကျဲၤအံၤတၢ်ကတဲၤ ကတီၤ၀ံၤ(၈၀)မျးကယၤဆူဖီခိၣ်လံအဂ့ၢ်န့ၣ် ခ့ၣ်အဲၣ်ယူၣ် ဘိးဘၣ်ရၤလီၤဒုးသ့ၣ်ညါလီၤတ့ၢ်ဝဲဖဲအပူၤကွံၥ်လါယူၤ ၁၄ သီ ကီၢ်သူလ့ၤမုၢ်နံၤအခါ အိၣ်ဝဲန့ၣ်လီၤ.
တနံၣ်အံၤ(၂၀၂၅)လၢဃုလါအတီၢ်ပူၤအံၤ ခ့ၣ်အဲၣ်ယူၣ် ကီၢ်ကၠီၣ်တဲၣ်ထံဆၢကီၢ်ဆၢဒီတကျိၤလၢအမ့ၢ် ခ့ၣ်အဲၣ်ယူၣ် (သုးက့ ၇),(သုးက့ ၄)ထံခံဟီၣ်က၀ီၤဒီး(သုးက့ ၆) မၠၣ်၀တံၣ်ကလံၤထံးဟီၣ်က၀ီၤပူၤန့ၣ် (KNLA)သုးပၥ်ဖှိၣ် ထီၣ်မၤန့ၢ်ဝဲပယီၤသုးကလၢၤ အိၣ်လံ တစှၤန့ၢ်(၁၅)ဖျၢၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤ.
တကးဒံးဘၣ်လီၤဆီဒၣ်တၢ်(သုးက့ ၇)ဟီၣ်ကဝီၤထံဆၢကီၢ်ဆၢန့ၣ် ပယီၤသုးကလၢၤအိၣ်တ့ၢ်က့ၤထဲမဲၢ်သဝီသုးကလၢၤဒီး မ့မ့ၢ်လၢ(သုးက့ ၆)ဟီၣ်ကဝီၤခီန့ၣ် သုးကလၢၤအိၣ်တ့ၢ်ဝဲထဲဂီၤလ့ၤဒုးယၤသုးကလၢၤဒီးထံသၢလဲၤ သုးကလၢၤသ့ၣ်တဖၣ် အံၤလီၤဒီး မ့မ့ၢ်လၢ(သုးက့ ၄)အံၤန့ၣ်အိၣ်တ့ၢ်က့ၤထဲ (နတ်အိမ်တောင်)သုးကလၢၤအံၤန့ၣ်လီၤ.
လၢတၢ်န့ၣ်အဃိဒ်သိးဟီၣ်ကဝီၤ လၢတၢ်ဒိၣ်စိဝဲန့ၢ်သ့ၣ်တဖၣ်အံၤ ဒ်သိးတၢ်သူၣ်ထီၣ်တၢ်ပၢတၢ်ြပးတၢ်ကန့ၢ်အဂီၢ်န့ၣ် အလီၢ်အိၣ်စ့ၢ်ကီး ဝဲလၢတၢ်ကဘၣ်သူဝဲခိၣ်နူၥ်ဂံၢ်ဘါပှၤသ့ပှၤဘၣ်အဂံၢ်အဘါတကးဒံးဘၣ်အမဲၥ်ညါ ကီၢ်ပူၤကီၢ်ချၢကညီ သူၣ်ဘီၣ် သးစၢ်သ့ၣ်တဖၣ်စ့ၢ်ကီးအလီၢ်အိၣ်လၢကဘၣ်ဟဲက့ၤ ပၥ်ဖှိၣ်မၤ သကိးတၢ်အဂ့ၢ်န့ၣ် ပဒိၣ်စီၤတီနံ ဆီၣ်တခူဝဲန့ၣ်လီၤ.
