ကြုၢ်တု-ကီးတရံးကျဲမုၢ် က့ၤဒိၣ်စိကဒါန့ၢ်ဝဲလံအဂ့ၢ် သုးမီၤစိရိၤထုးထီၣ်ပၥ်ဖျါစံးဝဲ

လါယူၤလံ ၂၅ သီ, ၂၀၂၅ နံၣ်, ခ့ၣ်အဲးစံၣ်

ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူပျၥ်ယၥ်ကီၢ်ရ့ၣ်(သုးက့ ၆) ကီးတရံး-ကြုၢ်တုကျဲဒီတကျိၤ က့ၤဒိၣ်စိကဒါဝဲန့ၢ်လံ အဂ့ၢ်န့ၣ် သုးမီၤစိရိၤထုးထီၣ်ဘိးဘၣ်ရၤလီၤဝဲဖဲတနံၤအံၤလါယူၤလံ ၂၅ သီ လၢအဝဲသ့ၣ်အတၢ်ကစီၣ်(မြန်မာ့အလင်း)ပူၤ န့ၣ်လီၤ.

ကြုၢ်တု-ကီးတရံးကျဲဒီတကျိၤလၢတၢ်ဒုးတၢ်ယၤကဲထီၣ်လၢပယီၤသုးဒီးကညီဒီကလုၥ်တၢ်ထူၣ်ဖျဲးမုၢ်ဒိၣ်(KNLA), (PDF) အဘၢၣ်စၢၤလၢ တၢ်ဆၢကတီၢ်တံၥ်တၥ်ဝဲ(၃)လါဘျဲၣ်အံၤန့ၣ် ဖဲမဟါလါယူၤလံ ၂၄ သီအနံၤန့ၣ် တၢ်က့ၤထီၣ်မၤန့ၢ်ဒိၣ်စိက့ၤဝဲလံ အဂ့ၢ်န့ၣ် သုးမီၤစိရိၤစံးဝဲန့ၣ်လီၤ.

လၢတၢ်န့ၣ်အဃိ(KNLA),(PDF)သုးပၥ်ဖှိၣ်တကပၤဘၣ်ဂုၤကဒါဝဲလီၢ်ခံအသိး ဖဲအဝဲသ့ၣ်ဂုၤကဒါလီၢ်ခံအခါန့ၣ်စ့ၢ်ကီး ဒွဲၣ်အူအီၣ်ဝဲသိလ့ၣ်, မၤကၢ်လီၤ သ့ၣ်လၢကျဲပူၤ,မၤဟးဂီၤတိၤဒ်သိးပှၤလ့ၢ်လိၤလ့ၢ်ထီၣ်သုတန့ၢ်တဂ့ၤအဂီၢ်အဂ့ၢ်န့ၣ် သုးမီၤစိရိၤအတၢ်ကစီၣ်ပူၤပၥ်ဖျါဝဲန့ၣ်လီၤ.

စးထီၣ်ဖဲလါယူၤလံ ၂၀ သီအနံၤန့ၣ် ပယီၤသုးဒီးဘူးဒးကညီသုးမုၢ်ဒိၣ်(DKBA)အပှၤသ့ၣ်တဖၣ်ပၥ်ဖှိၣ်ထီၣ်သး ဟဲထီၣ် ဝဲဆူ ကီးတရံး-ကြုၢ်တု ပၢဆှၢရဲၣ်ကျဲၤသုးဝဲၤလီၢ်ခိၣ်သ့ၣ်(စကခ-၁၂)သုးကလၢၤ သူဝဲကျိဖးဒိၣ်သ့ၣ်တဖၣ်အါအါဂီၢ်ဂီၢ် အဃိ ဘၣ်ဂုၤကဒါလီၢ်ခံတစိၢ်တလီၢ်ဟဲကဲထီၣ်ဒ်အံၤလီၤအဂ့ၢ်န့ၣ် တၢ်ပၢၢ်ဆၢသုးပၥ်ဖှိၣ်ကရူၢ်တကပၤ စံးဝဲအသိးသ့ၣ်ညါဘၣ် န့ၣ်လီၤ.

လၢတၢ်န့ၣ်အဃိတကီၢ်ခါခဲအံၤ (KNLA)သုးပၥ်ဖှိၣ်လၢအိၣ်နွါခၠၤကိ,အ့ကၠံ,အိတပ့ၤ,ငါတဲၤသ၀ီတကပၤန့ၣ်သ့ၣ်တဖၣ် ဘၣ်ဂုၤက့ၤလီၢ်ခံအဂ့ၢ်န့ၣ် တၢ်ပၢၢ်ဆၢသုးကရူၢ်လၢအိၣ်မဲၥ်ညါတဂၤ စံးဝဲဒ်အံၤန့ၣ်လီၤ.

အဝဲစံးဝဲလၢ“ပယီၤသုးဒီး(DKBA)ပၥ်ဖှိၣ်ထီၣ်သးဟဲထီၣ်သုးကျိၤ(၃)ဘိ.ပယီၤသုးန့ၣ်အဝဲသ့ၣ်အိၣ်ခးဖှိၣ်လီၤဝဲကျိဖးဒိၣ်လၢတၢ်လီၢ်(၄)တီၤညါ. ခးလီၤဝဲ ဟီၣ်၀့ၣ်စၣ်ကျိဖးဒိၣ်, မံၤစဲ (Missile)ချံဒီဒူၣ်,ခဲအံၤတၢ်စူၤထံဒိၣ်အဃိ ပဘၣ်ယိၣ်လၢပပှၤ တကပၤ ကကတၥ်ထီသးအဃိ ပဂုၤကဒါလီၢ်ခံလီၤ. ဘၣ်ဆၣ်မ့မ့ၢ်လၢကျိဖးဒိၣ်ဒုနၤခးယၤခးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီ တၢ်ကစီၣ် န့ၣ်လီၤ.

ဒ်န့ၣ်အသိးဖဲတနံၤအံၤလါယူၤလံ ၂၅ သီ ဂီၤဃီအဆၢကတီၢ်န့ၣ်စ့ၢ်ကီး ပယီၤသုးလၢအိၣ်ကြုၢ်တုအံၤသ့ၣ်တဖၣ် လၢကလဲၤထီၣ် မၤဆှဲတၢ်လီၢ်ဆူကီးတရံးကီၢ်ဆၣ်တကပၤအံၤအဂီၢ် ကိးမၢဝဲလီၢ်ကဝီၤကမျၢၢ်အသိလ့ၣ်လၢ ကတီၣ်စၢၤန့ၢ် အဝဲသ့ၣ်ကျိချံပှၥ်သၣ်, အသုးသ့ၣ်တဖၣ်အဂ့ၢ်န့ၣ် လီၢ်ကဝီၤကမျၢၢ် စံးဝဲန့ၣ်လီၤ.

လီၢ်ကဝီၤကမျၢၢ်လၢအသ့ၣ်ညါကြုၢ်တုဟီၣ်ကဝီၤတၢ်အိၣ်သးတဂၤစံးဝဲလၢ“(ခမရ-၅၄၆)လၢအိၣ်ကြုၢ်တုအံၤခးလီၤဝဲ ဟီၣ်ဝ့ၣ်စၣ်. အဃိဖဲမဟါန့ၣ်ဘၣ်ကဒီးဝဲ(ကၤမရဲၣ်)သ၀ီပူၤတီၤဖုၣ်ကၠိတဖျၢၣ်. လၢယ့ၤပူၤ,ငါတဲၤ တိၤတဘိန့ၣ်စ့ၢ်ကီးကၢ်လၢၤလံ. လၢနွံတၢၣ်ဒီး ခွံတၢၣ်ကျဲတကပၤန့ၣ်နါက့ပယီၤသုးအကျိဖးဒိၣ်အဃိန့ၣ် ဟီၣ်ခိၣ်လီၤပှီၢ်,ကဲထီၣ်တၢ်ပူၤလၢၤလံ. ခီဖျိအဝဲသ့ၣ်ခးလီၤဝဲဒီး (မံၤစဲ)ချံ အဃိ သ၀ီဒီးကၠိဟးဂီၤခဲလၢၥ်လီၤ”အဂ့ၢ်န့ၣ် စံးဝဲန့ၣ်လီၤ.

ကီးတရံး-ကြုၢ်တုကျဲတၢ်ဒုးတၢ်ယၤလၢအစးထီၣ်ကဲထီၣ်ဖဲအပူၤကွံၥ်လါအ့ဖြ့ၣ် ၁၄ သီအနံၤအံၤ ခီဖျိလၢပယီၤသုးခးလီၤကျိဖး ဒိၣ်,ကဘီယူၤလဲၤခးလီၤတၢ်အဃိ ဒူသ၀ီပူၤကၠိဟးဂီၤကအိၣ်လၢအဖျၢၣ်(၁၀)ဘျဲၣ်ညါအသိး တိၤလၢအိၣ်ငါတဲၤသ၀ီပူၤ(၂)ဘိအံၤ ဒီးကျဲမုၢ်ဖးဒိၣ်စ့ၢ်ကီးဟးဂီၤအဃိ လီၤဆီဒၣ်တၢ်သိလ့ၣ်ဖးဒိၣ်တဖၣ် ကလဲၤထီၣ်ဆူကီးတရံးအဂီၢ်လဲၤတသ့ဒံးဘၣ်အဂ့ၢ်န့ၣ် လီၢ်ကဝီၤ ကမျၢၢ်စံးဝဲန့ၣ်လီၤ.

ဒ်သုးမီၤစိရိၤထုးထီၣ်ပၥ်ဖျါဝဲဖဲတနံၤအံၤအသိးန့ၣ် ကြုၢ်တု-ကီးတရံး လၢ(၃)လါဘျဲၣ်တၢ်ဒုးကဲထီၣ်အတီၢ်ပူၤအံၤန့ၣ် အဝဲသ့ၣ်ဒီး (KNLA),(PDF)အဘၢၣ်စၢၤတၢ်ဒုးကဲထီၣ်ဖးဒိၣ်ဝဲ(၇)ဘျီ, တၢ်ဘၣ်သဂၢၢ်ခးလိၥ်သးကဲထီၣ်(၈၅)ဘျီအဃိ မၤန့ၢ်ကျိအခိၣ်(၃၀)ဒီး ထံၣ်န့ၢ်ဝဲတၢ်ပၢၢ်ဆၢတကပၤအပှၤသံစိၣ်(၁၇)ဂၤအဂ့ၢ်န့ၣ် စံးဝဲန့ၣ်လီၤ.

သုးမီၤစိရိၤအံၤကထီၣ်ဒိၣ်စိက့ၤကြုၢ်တု-ကီးတရံးအံၤအဂီၢ် အသုးကျိၤဟဲထီၣ်လၢကျဲဘိဘိဘၣ်ဆၣ်ခီဖျိတၢ်ခိးခးအဝဲသ့ၣ်လၢ အဃိ သံဘၣ်ဒိဘၣ်ထံးအိၣ်ဝဲအါမးအဂ့ၢ်န့ၣ် သ့ၣ်ညါဘၣ်န့ၣ်လီၤ.