လါယူၤလံ ၃၀ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ပယီၤသုးခးလီၤကျိဖးဒိၣ်အဃိ ဘၣ်သံဝဲကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အပှၤသုးဖိတဂၤ ဒီး ကၠိဖိပိၥ်မုၣ်လၢအသးနံၣ်တပှဲၤဒံးဘၣ်တဂၤအဂ့ၢ်န့ၣ် သ့ၣ်ညါဘၣ်လၢ လီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲအပူၤကွံၥ်လါယူၤလံ ၁၇ သီ ဟါခီ ၅း၃၀ အဆၢကတီၢ် လၢကၠဲးထိၣ်ကီၢ်ဆၣ် ခရၢၢ်ကရူၢ်အပူၤ တၢ်ဒုးကဲထီၣ်တအိၣ် ဘၣ်ဆၣ် ပယီၤသုး(၃၁၀)အမျိၥ်သုး ခးလီၤကျိဖးဒိၣ်(၂)ဖျၢၣ်လီၤတဲၥ်ပိၢ်ဖးထီၣ်ဝဲလၢသိခွးသ၀ီဒီး(ကျောက်ပုံကြီးကွင်း)သဝီဘၢၣ်စၢၤအဃိ ဘၣ်သံဝဲ KNLA သုးရ့ၣ်-၃ အပှၤသုးဖိ သးစၢ် စီၤအၤကၤအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်န့ၣ်အသိးတၢ်ကဲထီၣ်သးဝံၤ ဖဲလါယူၤလံ ၂၃ သီ မုၢ်ထူၣ်၁၂း၀၀ နၣ်ရံၣ်ဘျဲၣ်အဆၢကတီၢ်န့ၣ် ပယီၤသုးခီၣ်သုးရ့ၣ်(ခလရ-၈) အပှၤလၢအိၣ်ခိးကျဲ တၢ်ဘံၣ်တၢ်ဘၢဖဲဝ့ၢ်တကူၣ်- မီၣ်လမၠဲၣ်ကျဲအံၤတဖၣ် ပညိၣ်ခးလီၤဝဲ(၆၀ မမ)ကျိဖးဒိၣ် ၃ ဖျၢၣ်ဆူ အံလူၢ်ကရူၢ် အံလူၢ်ဖိသဝီပူၤအဃိ ဘၣ်သံဝဲကၠိဖိမုၣ် နီၢ်ခ့ၤနါမွ့(၁၅)နံၣ်တဂၤအံၤန့ၣ်လီၤ.
ဒ်လီၢ်ခၢၣ်သးကညီကူၣ်သ့ဆဲးလၤဝဲၤကျိၤ(KECD)ထုးထီၣ်ပၥ်ဖျါဝဲဖဲမဟါအသိးန့ၣ် ကၠိဖိမုၣ် နီၢ်ခ့ၤနါမွ့အံၤ မ့ၢ်ဝဲ(၈)တီၤကၠိဖိမုၣ် တဂၤ ဒီးခီဖျိကျိဖးဒိၣ်အက့အခီဖျိးဘၣ်ဝဲအနီၢ်ခိမိၢ်ပှၢ်ဒီတဂၤအဃိသံဝဲတဘျီဃီဖဲန့ၣ်အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်လၢန့ၣ်အမဲၥ်ညါပယီၤသုးခးလီၤကျိဖးဒိၣ်ဘျီဝဲအံၤအံလူၢ်ဖိသ၀ီ ကမျၢၢ်အဟံၣ်ဟးဂီၤဘၣ်ဒိဘၣ်ထံးဝဲ(၃)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
သုးမီၤစိရိၤအတၢ်မၤထီဒါပှၤဟီၣ်ခိၣ်ဖိခွဲးယၥ်အံၤ ကဲထီၣ်တၢ်တံၥ်လၢတၢ်ကူၣ်ဘၣ်ကူၣ်သ့တၢ်ဖံးလိမၤဒိးပူၤအသိး ဒုးအိၣ်ထီၣ် စ့ၢ်ကီးဝဲတၢ်ပျံၤတၢ်ဖုး,တၢ်ဟးဂူၥ်ဟးဂီၤ,တၢ်သံတၢ်ပှၢ်အဃိ အလီၢ်အိၣ်လၢထံဂုၤကီၢ်ဂၤဘၣ်ထွဲပှၤဘၣ်မူ ဘၣ်ဒါတဖၣ် ကပၥ်သူၣ် ပၥ်သးမၤလီၤတံၢ်ဒီးဟံထီၣ်ဖီၣ်ထီၣ်ဂ့ၢ်ဝီ အဂ့ၢ်န့ၣ် (KECD)စံးဝဲန့ၣ်လီၤ.
ဒ်န့ၣ်အသိးကၠဲးထိၣ်ကီၢ်ဆၣ် ၀ီၢ်ကျီၢ်ကရူၢ်အပူၤ ဖဲအပူၤကွံၥ်လါယူၤလံ ၂၁ သီ မုၢ်ဃ့ၢ်လီၤ ၂း၀၀ နၣ်ရံၣ်အဆၢကတီၢ်န့ၣ်စ့ၢ်ကီး တၢ်ဒုးကဲထီၣ်တအိၣ်ပယီၤသုးအ(Jet Fighter)ကဘီယူၤလဲၤတ့ၢ်လီၤဝဲမ့ၣ်ပိၢ်(၁)ဖျၢၣ် လီၤတဲၥ်ပိၢ်ဖးထီၣ်ဝဲလၢ(ဆောင်နိုင်ကြီး) သဝီ လီၢ်လံၤ ထံအီတၢ်မၤလီၢ်ကပၤ ဟံၣ်ဘၣ်ဒိဘၣ်ထံးဝဲတဖျၢၣ်ကဲထီၣ်ဒံးဝဲန့ၣ်လီၤ.
