လါအီကူး ၁၄ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃)မူကီၢ်ဆၣ် လၢ ၆ သီအတီၢ်ပူၤ ခီဖျိလၢပယီၤသုးခးလီၤကျိဖးဒိၣ် အံၤအဃိ ကမျၢၢ်သံ ၁ ဂၤ ဒီး ဘၣ်ဒိဝဲနးနးကျံၤကျံၤ ၆ ဂၤအဂ့ၢ်န့ၣ် ကီၢ်ရ့ၣ်တၢ်ကစီၣ်ထုးထီၣ်ပၥ်ဖျါဝဲအသိး သ့ၣ်ညါဘၣ်န့ၣ်လီၤ.
ဒ်ကီၢ်ရ့ၣ်တၢ်ကစီၣ်ပူၤပၥ်ဖျါဝဲအသိးန့ၣ် စးထီၣ်လါအီကူး ၅ သီ တုၤလၢ ၁၀ သီ လၢ(၆)သီအတီၢ်ပူၤအံၤ သုးမီၤစိရိၤစုတီၤဖီလၥ် ပယီၤသုးအံၤ ခးလီၤဝဲကျိဖးဒိၣ်(၅၅)ဖျၢၣ်တကးဒံးဘၣ်တ့ၢ်လီၤဝဲဒြိမ့ၣ်ပိၢ်(၃)ဖျၢၣ်ဆူဒူသဝီကမျၢၢ်အိၣ်ဆိးလီၢ်ကျဲအဃိ ကမျၢၢ်သံဘၣ်ဒိ ဘၣ်ထံးအမဲၥ်ညါဟံၣ်ဟးဂီၤဝဲ(၃)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢကျိဖးဒိၣ်အံၤအဃိကမျၢၢ်လၢအသံတဂၤမ့ၢ်ဝဲ ယဲလ့သူၤ(၂၀)နံၣ်ဒီးပှၤလၢအဘၣ်ဒိသ့ၣ်တဖၣ်န့ၢ်မ့ၢ်ဝဲ အူအီၤကိၤလ့(၄၃)နံၣ်, ဒီၤနါဘိၤ(၄၉)နံၣ်, အူအီၤသါစီၣ်(၂၄)နံၣ်,ကိၤစ့ၤယၤမၠိ(၂၇)နံၣ်,နီၢ်မူတ့(၄၄)နံၣ်,စီၤသါကၠံ(၂၀)နံၣ်သ့ၣ်တဖၣ်အံၤအဂ့ၢ်န့ၣ် လံၥ်တၢ်ပၥ်ဖျါ အပူၤပၥ်ဖျါဝဲန့ၣ်လီၤ.
ဘၣ်ဃးတၢ်ဂ့ၢ်အံၤ မူကီၢ်ဆၣ် ပှၤဘၣ်မူဘၣ်ဒါတဂၤ စံးတဲလၢ“ဒုၣ်ဒါဒုစးထီၣ်လၢပှၤထီၣ်(လဲၣ်ပၤ)ဝံၤလီၢ်ခံန့ၣ် အခးလီၤကျိဖးဒိၣ်ဒီး ဒြိတပယူၥ်ဃီတုၤလၢမုၢ် မဆါတနံၤအံၤလီၤ.ဖဲမူကီၢ်ဆၣ် တမ့ၢ်လၢထံကျိမုၥ်နုၥ်ဘၣ်,ထံကျိမုၢ်ထီၣ်တကပၤနါက့ တလါအံၤမးသး အခးလီၤကျိဖးဒိၣ်တၢ်ဟူးတၢ်ဂဲၤ အါမီၤနီၤ.အဃိကမျၢၢ်သံဘၣ်ဒိဘၣ်ထံးအါမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးမူကီၢ်ဆၣ်အမဲၥ်ညါလၢဆီထံးကီၢ်ဆၣ်အပူၤစ့ၢ်ကီး စးထီၣ်ဖဲအပူၤကွံၥ်လါယူၤလံ ၂၈ သီ တုၤတလါအံၤလါအီကူး ၅ သီ လၢ ၉ သီအတီၢ်ပူၤ ပယီၤသုးခးလီၤဝဲကျိဖးဒိၣ်(၁၉)ဘျီဆူလီၢ်ကဝီၤဒူသဝီ,တၢ်ဖံးအီၣ်မၤအီၣ်လီၢ်ကျဲအဂ့ၢ်န့ၣ် လံၥ်တၢ်ပၥ်ဖျါပူၤပၥ်ဖျါစ့ၢ်ကီးဝဲ အိၣ်န့ၣ်လီၤ.
လၢန့ၣ်အမဲၥ်ညါပယီၤသုးအံၤခီဖျိခးလီၤကျိဖးဒိၣ်တလီၢ်လီၢ်အဃိ ကမျၢၢ်သ့ၣ်တဖၣ်ဘၣ်ဟးထီၣ်က့ၤလီၤ,ဘၣ်အိၣ်လၢတၢ်ပျံၤတၢ်ဖုး ပူၤဒီး ကဖံးအီၣ်မၤအီၣ်တၢ်အဂီၢ်ထံၣ်ဘၣ်ဝဲတၢ်ကီတၢ်ခဲတုၤလၢခဲအံၤအဂ့ၢ်န့ၣ် ခ့ၣ်အဲၣ်ယူၣ် စံးဝဲန့ၣ်လီၤ.
