လါအီကူး ၁၃သီ, ၂၀၂၅နံၣ်, ခ့ၣ်အဲးစံၣ်.
ဂၥ်သဝံလၢတၢ်ဆှၢအီၤဆူကီၢ်ကၠီၣ်တဲၣ်ပူၤ, အကျိၤ(ပဲးလိ)တနီၤန့ၣ် KTLA (ကီၢ်သူလ့ၤသုးမုၢ်ဒိၣ်) ဒိၣ်စိန့ၢ်ဝဲဒၣ်အဂ့ၢ်န့ၣ်တမ့ၢ်တၢ်အမ့ၢ်အတီဘၣ်ဒီးဟီၣ်ကဝီၤသ့ၣ်တဖၣ်န့ၣ်အိၣ်ဝဲဒၣ်လၢအဝဲသ့ၣ်ဟူးဂဲၤဟီၣ်ကဝီၤပူၤလီၤအဂ့ၢ် ဘျံးဒဝဲၢ်ကီၢ်ရ့ၣ်,လီၢ်ကဝီၤ KNLA အပှၤဘၣ်မူဘၣ်ဒါလၢအဟူးဂဲၤဖဲဟီၣ်ကဝီၤဝဲန့ၣ်တဂၤစံးဝဲဒၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဂၥ်သဝံအကျိၤဝဲအံၤန့ၣ် စးထီၣ်န့ၢ်ဝဲလၢပီၣ်လဲၣ်ပူၤ ခီတဲၥ်ဝဲဒၣ် ဒဝဲၢ်ဝ့ၢ်ဝံၤ ထီၣ်က့ၤဝဲဆူ နၣ်အ့ၣ်တီၣ်ကီၢ်ဆၢတဆီဆူ ကီၢ်ကၠီၣ်တဲၣ် ကၣ်ခၠၣ်နၣ်ဘူရံကီၢ်ရ့ၣ် အဂ့ၢ်သ့ၣ်ညါဘၣ်န့ၣ်လီၤ.ဂၥ်သဝံကျိၤဝဲအံၤန့ၣ် (KTLA) ဒိၣ်စိဝဲန့ၣ်အထီ ကံလိမံထၢၣ်(၄၀)အဂ့ၢ် ကီၢ်ကၠီၣ်တဲၣ်တၢ်စီၣ်(Bangkokpost) ပၥ်ဖျါတ့ၢ်ဝဲဒၣ်အိၣ်န့ၣ်လီၤ.
ဂၥ်သဝံအကျိၤဝဲအံၤန့ၣ် ကီၢ်ကၠီၣ်တဲၣ်ပူၤ ခီပနံၣ်တဖျၢၣ်လၢအမ့ၢ် (PTTEP) ခီပနံၣ်ပၢဝဲဒီး ဂၥ်သဝံကျိၤဝဲအံၤခီတဲၥ်ဘၣ်ဝဲ ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်,လၢၢ်ဒိၣ်စိကီၢ်ဆၣ်န့ၣ်လီၤ.ဒီးဂၥ်သဝံအကျိၤဝဲအံၤန့ၣ် အိၣ်ဝဲဒၣ်လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)သုးရ့ၣ်(၂၇)ဒီးသုးရ့ၣ်(၁၀) ဒုးယၤဟူးဂဲၤဟီၣ်ကဝီၤပူၤဒီး ဒ်(KTLA) သုးရိၣ်မဲခိၣ်ကျၢၢ်သုးခိၣ်နၢၤဒါစံးဝဲဒၣ်အသိးန့ၣ်တမ့ၢ်ဘၣ်အဂ့ၢ် (KNLA) သုးရ့ၣ်(၂၇)အသုးရ့ၣ်ခိၣ် သုးခိၣ်ဒိၣ်ဂီၢ်ဂ့ၢ် စီၤမူဂ့ၤစံးဘၣ်ဝဲ ခ့ၣ်အဲးစံၣ် ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ပမ့ၢ်ဘၣ်ကွၢ်တၢ်အိၣ်သးခဲအံၤန့ၣ် pipelineဝဲအံၤန့ၣ် ပဒုးယၤန့ၣ်ဟူးဂဲၤဝဲလၢ pipeline ဝဲအံၤအဖီခိၣ်ခဲလၢၥ်လီၤ.အခဲအံၤန့ၣ် pipeline ဝဲအံၤန့ၣ် ပတတဲတၢ်နီတမံၤ အဘၣ်ဃးဒီးဒုၣ်ဧီၣ်ပတတဲဘၣ်.တဘၣ်ဃးဒီးဒုၣ်ဒါဒီးတတဲဘၣ်.ကဘၣ်မၤဒ်န့ၣ်ကဘၣ်လဲၤဒ်န့ၣ်ပတတဲနီတမံၤဘၣ်.ခီဖျိလၢထံကီၢ်တဘ့ၣ်အဖီခိၣ်ဒီးမၤဝဲလီၤ.ဘၣ်ဃးဒီးတၢ်မၤအီၣ်မုၢ်ကျိၤဝဲကွၥ်န့ၣ်ပနၢ်တပၢၢ်ဘၣ်.ပသ့ၣ်ညါဒုးယၤတခါလီၤ.ယနၢ်ပၢၢ်လၢတၢ်ခဲလၢၥ်န့ၣ်နကဘၣ်ဒုးန့ၢ်အီၤလီၤ.နမ့ၢ်တဒုးန့ၢ်အီၤဘၣ်န့ၣ်နတန့ၢ်ဘၣ်တၢ်ကလီလီနီတခါဘၣ်.ပမ့ၢ်ကွၢ်ကဒါက့ၤ စးထီၣ်လၢ ပဟဲဆ့ၣ်နီၤဒီး အတၢ်တဲပျံၤတဲဖုးတဖၣ်န့ၣ်တဖိးမံလိၥ်သးဒီးဟီၣ်ခိၣ်မဲၥ်ဖံးခိၣ်တၢ်အိၣ်သးဘၣ်.”အဂ့ၢ်စံးဝဲဒၣ်န့ၣ်လီၤ.
ဒ် Bangkokpost တၢ်ကစီၣ်ပၥ်ဖျါဝဲဒၣ်အသိးန့ၣ် ဂၥ်သဝံအကျိၤဝဲအံၤ KTLA ဒိၣ်စိဃၥ်ဝဲန့ၢ် အကံလိမံထၢၣ်(၄၀)ဒီးခီဖျိဂၥ်ဝံခီပနံၣ်တၢ်မၤဝဲအံၤဘၣ်ဘျုးဝဲဒၣ်ပယီၤသုးကရူၢ်အဖီခိၣ် ကမၤဟးဂီၤဝဲမ့တမ့ၢ်ကပံးကွံၥ်ဝဲဒၣ်အဂ့ၢ် KTLA သုးရိၣ်မဲခိၣ်ကျၢၢ် သုးခိၣ်ကျၢၢ်နၢၤဒါစံးဝဲဒၣ်အဂ့ၢ်န့ၣ် Bangkokpost တၢ်ကစီၣ်ပၥ်ဖျါဝဲဒၣ်န့ၣ်လီၤ.ဘၣ်ဃးဒီးတၢ်ဂ့ၢ်ဝဲအံၤန့ၣ်ကီၢ်ကၠီၣ်တဲၣ်တကပၤအိၣ်ဝဲဒၣ်ဒီးတၢ်ဘၣ်ယိၣ်ဘၣ်ဘှီအဂ့ၢ် Bangkokpost တၢ်ကစီၣ်စံးဝဲဒၣ်စ့ၢ်ကီးန့ၣ်လီၤ.
လၢတၢ်ဂ့ၢ်ဝဲအံၤအဖီခိၣ်န့ၣ် ခ့ၣ်အဲးစံၣ် ဆဲးကျိးသံကွၢ်ဒီး KTLA သုးခိၣ်ကျၢၢ်နၢၤဒါဘၣ်ဆၣ် ဆဲးကျိးတန့ၢ်ဒံးဘၣ်အဂ့ၢ် ဒုးသ့ၣ်ညါဘၣ်ပှၤဒိကနၣ်တၢ်ဖိကိးဂၤဒဲးန့ၣ်လီၤ.
ဘၣ်ဃးဒီးတၢ်ဂ့ၢ်ဝဲအံၤန့ၣ် သုးခိၣ်ဒိၣ်ဂီၢ်ဂ့ၢ်စီၤမူဂ့ၤစံးဝဲဒၣ်လၢ“ယအဲၣ်ဒိးတဲအါထီၣ်ဘၣ်ဃး Pipeline တခါအံၤတဆဲး.ဘၣ်မနုၤလဲၣ်န့ၣ်အခဲအံၤန့ၣ်ပဆ့ၣ်နီၤလၢ Pipeline အဖီခိၣ်လီၤ.ပတတဲသီၣ်တဲသဲတၢ်နီတမံၤဒံးဘၣ်.တၢ်မၤလၢအအိၣ်ဒီးတၢ်မၤရဲၣ်ကျဲၤန့ၣ်ပှၤမၤဝဲလီၤ.ပှၤလၢတမၤတၢ်နီတမံၤတဂၤဟဲမၤပျံၤအီၣ်ဆၣ်ဒ်အံၤန့ၣ် ယဆိမိၣ်တဘၣ်ဘၣ်.ယတဲဝံၤလံဘၣ်ဃးလၢပဟူးဂဲၤဟီၣ်ကဝီၤ ပဟူးဂဲၤဟီၣ်ခိၣ်မဲၥ်ဖံးခိၣ်ပတဲမ့ၢ်တန့ၢ်ဘၣ်န့ၣ်အိၣ်လီၢ်တအိၣ်နီတဒူၣ်ဘၣ်.”အဂ့ၢ်စံးဝဲဒၣ်န့ၣ်လီၤ.
ဂၥ်သဝံတၢ်တိၤကျဲၤဝဲအံၤန့ၣ် ကီၢ်ပယီၤရ့ၣ်နီၣ်သိဒီးဂၥ်သဝံတၢ်မၤကရူၢ်(MOEG)ဒီးကီၢ်ကၠီၣ်တဲၣ်(PTTEP)ခီပနံၣ်သ့ၣ်တဖၣ်ဟံးဝဲတၢ်သးလီၤပလိၥ်ဒီးတၢ်တိၥ်ကျဲၤဝဲအံၤလီၤလၢဝဲလၢစ့ အမဲရကၤဒီလၣ် (၇၂)ကကွဲၢ်ဒီး ယတနၣ် ဂၥ်သဝံတၢ်တိၥ်ကျဲၤ,ယဲတခိၣ်ဂၥ်သဝံတၢ်တိၤကျဲၤဒီး စီတံၣ်ကၣ် ဂၥ်ဝံတၢ်တိၤကျဲၤသ့ၣ်တဖၣ်လၢကပၥ်ဖှိၣ်မၤသကိးတၢ်အဂီၢ်ဆဲးလီၤဝဲစုမုၢ်ကျၢၢ်ဖဲအပူၤ ၂၀၁၄နံၣ် လါအီကူး ၈သီအနံၤအခါအဂ့ၢ်သ့ၣ်ညါဘၣ်စ့ၢ်ကီးန့ၣ်လီၤ.
