လါအီးကထိဘၢၣ် ၇ သီ, ၂၀၂၅ နံၣ်, ခ့ၣ်အဲးစံၣ်
ခံဝီတဝီ(KILC)စိၤအါစိၤကညီခိၣ်နၢ်တၢ်ကူၣ်လိၥ်အိၣ်ဖှိၣ်လၢတၢ်ကမၤဝဲဖဲကဟဲလါနိၣ်ဝ့ဘၢၣ်အတီၢ်ပူၤအံၤ သူၣ်ဘီၣ်သးစၢ် ခိၣ်နၢ်လၢအိၣ်ဒီးအကံၢ်အစီတၢ်သ့တၢ်ဘၣ်တဖၣ်လၢကဟဲထီၣ်ပၣ်ဃုၥ်ပၣ်ဂီၢ်သကိးအဂ့ၢ်န့ၣ် ခိၣ်နၢ်ပှၤဘၣ်မူဘၣ်ဒါ လၢအပၣ် ဃုၥ်လၢတၢ်တီခိၣ်ရိၣ်မဲတၢ်ကူၣ်လိၥ်အိၣ်ဖှိၣ်အပူၤအံၤတဖၣ် ကွဲမုၥ်ဝဲသူၣ်ဘီၣ်သးစၢ်သ့ၣ်တဖၣ်န့ၣ်လီၤ.
ကညီစၢၤသွဲၣ်သီခိၣ်နၢ်ဒီးခ့ခါဆၢကတီၢ်သးစၢ်ခိၣ်နၢ်တဖၣ် ဒ်သိးကသ့ပၥ်ဖှိၣ်မၤသကိးတၢ်လၢပှၤကလုၥ်တၢ်ဖံးတၢ်မၤတၢ်ဒိၣ် ထီၣ်ထီထီၣ်အဂီၢ်ဒီးတၢ်သူၣ်ထီၣ်က့ၤကီၢ်သူလ့ၤအဂီၢ်န့ၣ် လၢကဟဲလါနိၣ်ဝ့ဘၢၣ် ၈ သီ, ၉ သီ, ၁၀ သီအံၤ လၢကီၢ်သူလ့ၤ ဟီၣ်ကဝီၤ တၢ်လီၢ်တတီၤအပူၤ တၢ်ကမၤဝဲခံဝီတဝီ(Karen Intergenerational Leadership Conference-KILC) စိၤအါစိၤကညီခိၣ်နၢ်တၢ်ကူၣ်လိၥ်အိၣ်ဖှိၣ်အဂ့ၢ်န့ၣ် သ့ၣ်ညါဘၣ် န့ၣ်လီၤ.
ဘၣ်ဃးကညီသးစၢ်ခိၣ်နၢ်တၢ်ကူၣ်လိၥ်အိၣ်ဖှိၣ်လၢတၢ်ကမၤဝဲဘျီဝဲအံၤအတၢ်တိၥ်တၢ်ပညိၣ်မ့ၢ်ဒ်လဲၣ်န့ၣ် တၢ်ကူၣ်လိၥ်ကကဲထီၣ် လိၣ်ထီၣ်အဂီၢ် သရၣ်စီၤကပံး လၢအမ့ၢ်ပှၤဟ့ၣ်ကူၣ်ဟ့ၣ်ဖးတၢ်အံၤ စံးဝဲဒ်လၢ“တၢ်တိၥ်ပၥ်တၢတခါန့ၣ်စၢၤသွဲၣ်သီခိၣ်နၢ် တဖၣ်ဒီး ခိၣ်နၢ်လၢခ့ခါဆၢကတီၢ်ခဲအံၤတဖၣ်အတၢ်ပၥ်ဖှိၣ်မၤသကိးတၢ်ကအိၣ်ထီၣ်အဂီၢ်. ခံခါတခါန့ၣ်ကမ့ၢ်ဝဲတၢ်ထုးဖှိၣ်ဝၥ်ဖှိၣ် က့ၤလီၤဆီ ဒၣ်တၢ်ကညီသူၣ်ဘီၣ်သးစၢ်လၢအအိၣ်ဒီးတၢ်သ့တၢ်ဘၣ်တခါခါတဖၣ်ကဟဲက့ၤပၥ်ဖှိၣ်မၤသကိးတၢ်လၢတၢ်သူၣ်ထီၣ်ဘှီထီၣ်ကီၢ်သူလ့ၤအဂီၢ်.သၢခါတခါန့ၣ်တၢ်သူၣ်ထီၣ်ဘှီထီၣ်က့ၤကီၢ်သူလ့ၤအဂီၢ်(Human Resources)လၢပလိၣ်ဘၣ်သ့ၣ် တ ဖၣ်န့ၣ် ဒ်သိးပှၤမၤလၢပှဲၤက့ၤကသ့လၢစၢၤသွဲၣ်သီလၢကဟံထီၣ်ဖီၣ်က့ၤမူဒါအဂီၢ်န့ၣ်မ့ၢ်ဒၣ်တၢ်တိၥ်ပၥ်သၢခါလၢတၢ်ဒုးအိၣ်ထီၣ် (မ့တမ့ၢ်) တၢ်ကရၢကရိထီၣ်(KILC)လၢခံဝီတဝီအံၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
လၢတၢ်န့ၣ်အဃိကီၢ်ပူၤကီၢ်ချၢထံဆၢကီၢ်ဆၢသးစၢ်လၢအကံၢ်အစီအိၣ်သ့ၣ်တဖၣ်ကဟဲထီၣ်ပၣ်ဃုၥ်ပၣ်ဂီၢ်ဘၣ်လၢတၢ်တၢၣ်ပီၣ်တဲသကိးဘျီဝဲအံၤအပူၤ အဂ့ၢ်န့ၣ် သရၣ်စီၤကပံး ဆီၣ်တခူထီၣ်ဝဲသူၣ်ဘီၣ်သးစၢ်သ့ၣ်တဖၣ်ဒ်အံၤန့ၣ်လီၤ.
“ကညီဖိလၢအိၣ်တၢ်လီၢ်ကိးတီၤဒဲး,တမ့ၢ်ထဲလၢကီၢ်သူလ့ၤ-ကီၢ်ကၠီၣ်တဲၣ်ကီၢ်ဆၢတခါဘၣ်.တမ့ၢ်ထဲလၢကီၢ်မုၢ်နုၥ်,တမ့ၢ်ထဲလၢ ကၠီၣ်တဲၣ်ပူၤ,တမ့ၢ်ထဲလၢပှၤအိၣ်ကီၢ်ချၢဘၣ်.ခဲလၢၥ်ခဲစ့တၢ်ဝဲအံၤမ့ၢ်တၢ်ခွဲးတၢ်ယၥ်တခါလၢသးစၢ်လၢအိၣ်ဒီးတၢ်သ့တၢ်ဘၣ်တက လုၥ်ဂ့ၤတကလုၥ်ဂ့ၤမ့အဲၣ်ဒိးဆီၣ်ထွဲမၤစၢၤက့ၤကီၢ်သူလ့ၤတၢ်သူၣ်ထီၣ်ဘှီထီၣ်က့ၤဒီးတၢ်ဒိၣ်ထီၣ်ထီထီၣ်က့ၤလၢပှၤဒီတကလုၥ်အဂီၢ်အံၤညါန့ၣ်ယအဲၣ်ဒိးဟ့ၣ်ဂံၢ်ဟ့ၣ်ဘါလၢဝံသးစူၤဒုးသ့ၣ်ညါပတံထီၣ်ဂုၥ်ကျဲးစၢးဟဲပၥ်ဖှိၣ်မၤသကိးက့ၤတၢ်လၢပပှၤကလုၥ်ခါဆူညါအဂီၢ်မီၤနီၤ”အဂ့ၢ်န့ၣ် စံးဝဲန့ၣ်လီၤ.
ဒ်န့ၣ်အသိးလၢကထီၣ်ဘၣ်ခိၣ်နၢ်တၢ်ကူၣ်လိၥ်အိၣ်ဖှိၣ်အံၤအဂီၢ်န့ၣ် တၢ်ကဘၣ်ပတံထီၣ်ဆိအမံၤအသၣ်အဃိ သူၣ်ဘီၣ်သးစၢ် လၢအသးဆူၣ်ပၣ်ဃုၥ်လၢတၢ်ကူၣ်လိၥ်အိၣ်ဖှိၣ်အံၤတဖၣ် စးထီၣ်ပတံထီၣ်အမံၤသ့ဝဲဖဲတလါအံၤလါအီးကထိဘၢၣ် ၆ သီတုၤ ၂၂ သီအဂ့ၢ်န့ၣ် (KILC)ထုးထီၣ်ပၥ်ဖျါဝဲလၢအ (facebook page)ပူၤန့ၣ်လီၤ.
အပူၤကွံၥ်(၂၀၂၄)တၢ်ကူၣ်လိၥ်အိၣ်ဖှိၣ်အခါန့ၣ် သးစၢ်လၢလဲၤထီၣ်တၢ်အိၣ်ဖှိၣ်အံၤတဖၣ် တၢ်ပၥ်ပနီၣ်သးနံၣ်ကဘၣ်အိၣ် ၂၃ နံၣ် ဒီး ၄၀ နံၣ် အဘၢၣ်စၢၤအသိး အဝဲသ့ၣ်ကဘၣ်ဖျိထီၣ်စ့ၢ်ကီးဝဲတၢ်ပၥ်ပနီၣ်အတီၤပတီၢ်အိၣ်ဝဲအဂ့ၢ်န့ၣ် သ့ၣ်ညါဘၣ်န့ၣ်လီၤ.
ဘၣ်ဆၣ်တနံၣ်အံၤ သးစၢ်လၢအကလဲၤထီၣ်တၢ်တၢၣ်ပီၣ်တဲသကိးအံၤတဖၣ်ကဘၣ်အိၣ်(၂၀)နံၣ်ဆူဖီခိၣ်ဒီး ပှၤသ့ၣ် တဖၣ်အံၤ မ့တဖျိထီၣ်တၢ်ကူၣ်ဘၣ်ကူၣ်သ့အတီၤပတီၢ်ထီကၠိဘၣ်ဆၣ် ကဘၣ်မ့ၢ်သးစၢ်လၢအိၣ်ဒီးတၢ်သ့တၢ်ဘၣ်တမံၤမံၤလၢကမၤ သကိးက့ၤ တၢ်လၢတၢ်သူၣ်ထီၣ်က့ၤကီၢ်သူလ့ၤအတၢ်ဖံးတၢ်မၤပူၤအဂီၢ်န့ၣ် သရၣ်စီၤကပံး စံးအါထီၣ်ဝဲန့ၣ်လီၤ.
“အခဲအံၤအဖျိထီၣ်ကၠိဒီးအသးနံၣ်နံၣ်ပတတဲအါအါလၢၤဘၣ်.တၢ်ဂ့ၢ်န့ၣ်အိၣ်ခံမံၤ,ပတဲလၢကဘၣ်ဖျိထီၣ်ကၠိစံးတၢ်န့ၣ်ပအဲၣ်ဒိးသ့ၣ်ညါသးစၢ်လၢအဟဲထီၣ်တၢ်ထံၣ်လိၥ်သကိးသ့ၣ်တဖၣ်အံၤအိၣ်ဒီးအကံၢ်အစီမနုၤသ့ၣ်တဖၣ်လဲၣ်န့ၣ်ပအဲၣ်ဒိးသ့ၣ်ညါဒ်န့ၣ်လီၤ.ပတဲလၢသးစၢ်တဖၣ်ကဘၣ်ဖျိထီၣ်တၢ်တခါခါ,မၤလိတၢ်တခါခါအဃိန့ၣ်ပှၤဆိကမိၣ်လၢတၢ်အဝဲအံၤမ့ၢ်ပှၤလၢအိၣ်ဒီးတၢ်ခွဲးတၢ်ယၥ်လၢကမၤလိထီၣ်ဘၣ်ခီလ့းကၠိတဖၣ်အဂီၢ်လီၤဒ်န့ၣ်အိၣ်မီၤနီၤ.အဃိကဲထီၣ်ဒ်သိးတၢ်နီၤဖးအဆၢအဃိခဲအံၤပတမၤဒ်န့ၣ်လၢၤဘၣ်.သးစၢ်လၢအအိၣ်ဒီးတၢ်သ့တၢ်ဘၣ်တခါခါလၢအအဲၣ်ဒိးဟဲက့ၤပၥ်ဖှိၣ်မၤသကိးတၢ်လၢတၢ်ကသူၣ်ထီၣ်ဘှီထီၣ်က့ၤကီၢ်သူလ့ၤအဂီၢ်လီၤ.ပအဲၣ်ဒိးတဲန့ၣ်ကဘၣ်ဖျိတဲၥ်ဖျိတီၤတခါခါအမဲၥ်ညါန့ၣ်ကဘၣ်အိၣ်ဒီးတၢ်သ့တၢ်ဘၣ်တခါခါဒ်န့ၣ်လီၤ.မ့ဝံၤသးစၢ်တနီၤန့ၣ်တထီၣ်ဘၣ်ကၠိဘၣ်ဘၣ်ဆၣ်အဝဲသ့ၣ်ဃုသ့ၣ်ညါမၤလိတၢ်ဘၣ်ဃးလၢ(အၤထံၤ)တၢ်သ့တၢ်ဘၣ်တခါခါမီၤနီၤ.အဃိပတံထီၣ်လၢကဟဲထီၣ်တၢ်တၢၣ်ပီၣ်တဲသကိးအံၤသ့လီၤမီၤနီၤ.”အဂ့ၢ်န့ၣ် သရၣ်စီၤကပံး ဆှဲပၠးအါထီၣ်ဝဲန့ၣ်လီၤ.
တကးဒံးဘၣ်တၢ်ထံၣ်လိၥ်အိၣ်သကိးဘျီဝဲအံၤမ့ၢ်ဝဲတၢ်အိၣ်ကတဲၤကတီၤသးလၢခိၣ်နၢ်သီလၢကဆဲးမၤတၢ်လၢပှၤကလုၥ်အဂီၢ် အဃိ သးစၢ်ခိၣ်နၢ်လၢအတီခိၣ်ရိၣ်မဲတၢ်ကရၢကရိ,မၤပှၤကလုၥ်တၢ်ဖံးတၢ်မၤလၢခ့ခါဆၢကတီၢ်ခဲအံၤသ့ၣ်တဖၣ်ဒီး သူၣ် ဘီၣ်သးစၢ် လၢအိၣ်ဒီးတၢ်သ့တၢ်ဘၣ်သ့ၣ်တဖၣ်အံၤအလီၢ်အိၣ်လၢကဘၣ်ထံၣ်လိၥ်တၢၣ်ပီၣ်တဲသကိးတၢ်တကးဒံးဘၣ် သူၣ်ဘီၣ်သးစၢ် အတၢ်ထံၣ်လိၥ်အိၣ်သကိးအံၤအရ့ဒိၣ်စ့ၢ်ကီးဝဲလၢပှၤကလုၥ်ခါဆူညါတၢ်ဖံးတၢ်မၤဂီၢ်အဂ့ၢ်န့ၣ် ခ့ၣ်အဲၣ်ယူခိၣ်နၢ် စံးဝဲန့ၣ်လီၤ.
သးစၢ်ခိၣ်နၢ်တၢ်ကူၣ်လိၥ်အိၣ်ဖှိၣ်အံၤဖဲအပူၤကွံၥ်(၂၀၂၄)နံၣ် လါမ့ၤ ၁၈ သီ, ၁၉ သီ လၢခံသီအတီၢ်ပူၤအဆိ ကတၢၢ်တဘျီ ဘၣ်တၢ်မၤတ့ၢ်ဝဲဖဲ ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မဲၢ်ဆီးဝ့ၢ်တၢ်လီၢ်တတီၤဒီး ဖဲန့ၣ်တၢ်တဲသကိးဝဲဘၣ်ဃး ထံရူၢ်ကီၢ်သဲးတၢ်အိၣ် သး,ပၢြပးတၢ်အိၣ်သးဃုၥ်ဒီးတၢ်ဂ့ၢ်ခိၣ်တီလၢအဂၤတဖၣ်တၢ်တဲသကိးဝဲဒၣ်ဒီး တကတီၢ်ဃီလၢတၢ်ကူၣ် လိၥ်အိၣ်ဖှိၣ်ဘျီဝဲန့ၣ် အခါစ့ၢ်ကီး ကီၢ်ပူၤကီၢ်ချၢ,ထံဆၢကီၢ်ဆၢ ဂံၢ်ခီၣ်ထံးကညီတၢ်ကရၢကရိ ခိၣ်နၢ်,ပှၤမၤတၢ်ဖိလၢတၢ်ကရၢကရိ ပူၤဒီး သးစၢ်လၢ အကံၢ်အစီအိၣ်တဖၣ်လဲၤထီၣ် ခဲလၢၥ်အိၣ်ဝဲ အဂၤ(၁၂၀)ဃၣ်ဃၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
