လါအီးကထိဘၢၣ် ၃ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ် မၠၣ်ဝတံၣ်ဝ့ၢ်ဃၢၤလ့က့ၣ်ကိၥ်ဝ့ၢ်သီဟီၣ်ကဝီၤ ဖဲမဟါလါအီးကထိဘၢၣ် ၂ သီ မုၢ်နၤခီ ၁၁း၀၀ နၣ်ရံၣ်ဘျဲၣ်အဆၢကတီၢ်န့ၣ် တၢ်လဲၤတ့ၢ်လီၤဒြိမ့ၣ်ပိၢ်(၃)ဘ့ၣ်လၢ မ့လဲၣ်ပဲၤသဝီပူၤအဃိ တၢ်ဆါဟံၣ်ဒီး ကမျၢၢ်ဟံၣ် ဟးဂီၤအမဲၥ်ညါ ကမျၢၢ်ဘၣ်ဒိ(၂)ဂၤ အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဘၣ်ဃးတၢ်ကဲထီၣ်သးအံၤ မ့လဲၣ်ပၤသဝီ ပှၤဘၣ်မူဘၣ်ဒါတဂၤစံးဝဲလၢ“တၢ်ဟဲခးလီၤတၢ်ဒီးဒြိဒီးတၢ်တဘျီအံၤအိၣ်(၄)ဘျီလံ . အပူၤကွံၥ်ဟဲတ့ၢ်လီၤဝဲဖဲသီခါဖၠၣ်,ကၠိ,ကမျၢၢ်အဟံၣ်ဒီးခဲအံၤတဘျီဖဲမနၤန့ၣ်တ့ၢ်လီၤဝဲဖဲတၢ်ဆါဟံၣ်န့ၣ်.ဟံၣ်လၢအိၣ်တၢ်ဆါဟံၣ်ကပၤ(၂)ဖျၢၣ်နါက့ဟးဂီၤ.သဝီဖိလၢအအိၣ်ခိးဟံၣ်(၂)ဂၤစ့ၢ်ကီးဘၣ်ဒိဘၣ်ထံးတဆံးတက့ၢ်.ကိညၢ်လၢပှၤသဝီဖိတဖၣ်န့ၣ်လဲၤဟးပလဲၥ်ဆိသးလၢသူမှဲကျိကပၤန့ၣ်”အဂ့ၢ်န့ၣ် စံးဝဲန့ၣ်လီၤ.
တကီၢ်ခါခဲအံၤလၢလ့က့ၣ်ကိၥ်,ထံမဲးဝါခံ,ကၠီၣ်တီၤတကပၤန့ၣ် တၢ်ဒုးဆဲးကဲထီၣ်ဝဲလၢပယီၤသုးဒီးဟီၣ်ကဝီၤကညီဒီကလုၥ်တၢ်ထူၣ် ဖျဲး သုးမုၢ်ဒိၣ်(KNLA)သုးပၥ်ဖှိၣ်အဘၢၣ်စၢၤဒီး လၢတၢ်ဒုးအကတီၢ်န့ၣ်ပယီၤသုးအံၤသူဝဲဒြိ,ကျိဖးဒိၣ်,မံးစဲကျိခးလီၤဝဲတၢ်တပယူၥ်ဃီအဂ့ၢ်န့ၣ် သ့ၣ်ညါဘၣ်န့ၣ်လီၤ.
“ပယီၤသုးန့ၣ်သူဝဲကျိဖးဒိၣ်,ဒြိသ့ၣ်တဖၣ်အါမး.လၢပဝဲဒၣ်တကပၤနါက့သံဘၣ်ဒိဘၣ်ထံးအိၣ်.အဝဲသ့ၣ်စ့ၢ်ကီးသံဘၣ်ဒိဘၣ်ထံး အိၣ်ဒီဒူၣ်ညါ.ပှၤလၢအဘၣ်ဒိဘၣ်ထံးတဖၣ်န့ၣ်ပှၤက့ၤလီၤစိၥ်အီၤလၢမၠၣ်ဝတံၣ်တကပၤ”အဂ့ၢ်န့ၣ် ဟီၣ်ကဝီၤ(KNLA)သိၣ်မှံၤ သုးပၥ်ဖှိၣ်စံးဝဲန့ၣ်လီၤ.
ပယီၤသုးအံၤလ့က့ၣ်ကိၥ်ဟီၣ်ကဝီၤအမဲၥ်ညါလၢမဲၢ်ထီးသလ့-ဂီၤလ့ၤကျဲ ဖလူ,မ့လဲၣ်ပဲၤ,မဲၢ်ထီးသလ့သဝီပူၤသ့ၣ်တဖၣ်စ့ၢ်ကီး ဟးတ့ၢ်လီၤတၢ်ဒီးဒြိမ့ၣ်ပိၢ်အိၣ်ဝဲအဂ့ၢ်န့ၣ် တၢ်ပၢၢ်ဆၢသုးကရူၢ်တကပၤ စံးဝဲန့ၣ်လီၤ.
ဟီၣ်ကဝီၤဖဲန့ၣ်အပူၤ စးထီၣ်ဖဲလါစဲးပထ့ဘၢၣ် ၂၆ သီတုၤလၢတလါအံၤလါအီးကထိဘၢၣ် ၂ သီန့ၣ် ပယီၤသုးဟးတ့ၢ်လီၤတၢ်ဒီးဒြိမ့ၣ်ပိၢ် အိၣ်လံဝဲတစှၤန့ၢ်အဘျီ(၁၀)လံဒီးလၢတၢ်န့ၣ်အဃိသီခါဖၠၣ်,ကၠိ,တၢ်ဆါဟံၣ်,ကမျၢၢ်ဟံၣ်တၢ်သူၣ်ထီၣ်ဒီးကျးဆါတၢ်သ့ၣ်တဖၣ်ဟးဂီၤတကး ဒံးဘၣ်အမဲၥ်ညါကမျၢၢ်ဘၣ်ဒိကအိၣ်လၢ(၆)ဂၤလံအဂ့ၢ်န့ၣ် သ့ၣ်ညါဘၣ်န့ၣ်လီၤ.
