လါအီးကထိဘၢၣ် ၁ သီ, ၂၀၂၅ နံၣ်, ခ့ၣ်အဲးစံၣ်
ကီၢ်ကၠီၣ်တဲၣ်-ကီၢ်ပယီၤကီၢ်ဆၢ ဃိၣ်သၢဖျၢၣ်ဝ့ၢ်လၢဟီၣ်ကဝီၤဖီၣ်စုကဝဲၤကရူၢ်ဒိၣ်စိဝဲဒၣ်အံၤ တကီၢ်ခါပယီၤသုးအပှၤ ဟးထီၣ်နုၥ်လီၤ အါထီၣ်ဝဲအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိစံးဝဲအသိး သ့ၣ်ညါဘၣ်န့ၣ်လီၤ.
စးထီၣ်ဖဲအပူၤကွံၥ်(၂၀၂၃)န့ၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒီး တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA) ဒိၣ်စိဝဲ ဃိၣ်သၢဖျၢၣ်ဝ့ၢ်အံၤဝံၤလီၢ်ခံ ပယီၤသုးဘၣ်သုးအလီၢ်ဟးထီၣ်အိၣ်က့ၤဝဲလၢဝ့ၢ်ချၢသုးကလၢၤတၢ်လီၢ်တဖၣ်အံၤန့ၣ်လီၤ.
ဘၣ်ဆၣ်စးထီၣ်ဖဲလါစဲးပထ့ဘၢၣ်ထီၣ်အံၤန့ၣ် ပယီၤသုးနုၥ်လီၤဟးထီၣ်လၢဝ့ၢ်ပူၤဟဲအါထီၣ်ဝဲဖျိဖျိဖျါဖျါအဂ့ၢ်န့ၣ် ပှၤလၢဘူးဒီးဝ့ၢ်ပူၤ ပှၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“ပယီၤသုးလၢအအိၣ်လၢတၢ်ချၢတဖၣ်န့ၣ်ခဲအံၤအနုၥ်လီၤဟးထီၣ်လၢဝ့ၢ်ပူၤဟဲအါထီၣ်.လၢညါခါန့ၣ်အဝဲသ့ၣ်ဟးထီၣ်တၢ် ချၢတဘူၣ်အါအါဘၣ်.အဝဲသ့ၣ်မ့ဟးထီၣ်ပှ့ၤအီၣ်တၢ်န့ၣ်ဟးထီၣ်ဒ်သိးကမျၢၢ်ဟးထီၣ်ခူသူၣ်ဝဲဒ်န့ၣ်လီၤ.ခဲအံၤအဟးထီၣ်ဒ်သိးကမျၢၢ်ဘၣ်ဆၣ်ဟးထီၣ်က့ၤလီၤဖျိဖျိဖျါဖျါလီၤ.ဟးထီၣ်လၢတၢ်ချၢနါက့ပှၤနီၣ်ဂံၢ်အါစ့ၢ်”အဂ့ၢ်န့ၣ် စံးဝဲန့ၣ်လီၤ.
တကးဒံးဘၣ်လၢသုးကလၢၤတၢ်လီၢ်တဖၣ်န့ၣ်စ့ၢ်ကီးပယီၤသုးမၤအါထီၣ်အဂံၢ်အဘါဟဲအါထီၣ်ဝဲအသိး အဝဲသ့ၣ်အံၤ တၢ်ရဲၣ်တၢ်ကျဲၤအိၣ်လၢအသုးကျိၤ ကနုၥ်လီၤလၢဟီၣ်ကဝီၤပူၤဘၣ်ဆၣ်တုၤလၢခဲအံၤနုၥ်လီၤတအိၣ်ဝဲဒံးဘၣ်အဂ့ၢ်န့ၣ် သ့ၣ်ညါဘၣ်လၢ တၢ်ပၢၢ်ဆၢကရူၢ်ကရၢတဖၣ်အအိၣ် န့ၣ်လီၤ.
သုးမီၤစိရိၤအံၤလၢကထီၣ်ဒိၣ်စိက့ၤ ဃိၣ်သၢဖျၢၣ်ကီၢ်ဆၢအံၤအဂီၢ် ခီဖျိအဝဲသ့ၣ်သုးကျိၤဟဲထီၣ်ဝဲလၢနိၣ်ခၠိနဲၣ်-လ့နိးကျဲ ဒီးခၠီနခွး ကၠၤအ့စ့ၣ်ကၠံကျဲတကပၤအဃိ တၢ်ဒုးကဲထီၣ်ဝဲဒီးဟီၣ်ကဝီၤတၢ်ပၢၢ်ဆၢသုးပၥ်ဖှိၣ်ကရူၢ်အံၤန့ၣ်လီၤ.
တကီၢ်ခါခဲအံၤဒူပျၥ်ယၥ်ကီၢ်ရ့ၣ်(သုးက့ ၆)ဃုၥ်ဒီးထံဆၢကီၢ်ဆၢ,ဟီၣ်ကဝီၤတၢ်လီၢ်လၢ(ခ့ၣ်အဲၣ်ယူၣ်)ဒိၣ်စိဝဲန့ၢ်သ့ၣ်တဖၣ်န့ၣ် သုးမီၤစိရိၤအံၤလၢကထီၣ်ဒိၣ်စိက့ၤဝဲအဂီၢ် သူဝဲဒၣ်ဂံၢ်ဘါ,ကျိဖးဒိၣ်လၢလၢပှဲၤပှဲၤဒီး ရၤလီၤဝဲဒၣ်အသုးကျိၤဟဲထီၣ်ဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
