လါအီးကထိဘၢၣ် ၈ သီ, ၂၀၂၅ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅)ဟီၣ်ကဝီၤ တနံၤဃီအတီၢ်ပူၤ သုးမီၤစိရိၤကဘီယူၤလဲၤတ့ၢ်လီၤ မ့ၣ်ပိၢ်လၢတၢ်လီၢ်(၂)တီၤအဃိ ကမျၢၢ်ဘၣ်ဒိ ၃ ဂၤ အဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ဖဲလါအီးကထီဘၢၣ် ၆ သီ ဟါခီ ၆း၀၀ နၣ်ရံၣ်ဃၣ်ဃၣ်အဆၢကတီၢ်န့ၣ် လၢဘုသိၣ်ကီၢ်ဆၣ် ခီပူၣ်ကရူၢ် ဆီဘှဲဒၢသဝီ ဒီး ဖၣ်ပူၣ်ဝ့ၢ် ကဝီၤဒ့-၂ အပူၤ သုးမီၤစိရိၤကဘီယူၤလဲၤတ့ၢ်လီၤမ့ၣ်ပိၢ်ဒီး ဖဲန့ၣ်ဘၣ်ဒိဘၣ်ထံးဝဲဖၣ်ပူၣ်ဝ့ၢ်ပူၤကမျၢၢ်ပိၥ်မုၣ်(၂)ဂၤ ဒီး ပိၥ်ခွါ(၁)ဂၤဘၣ်ဟဲကဲထီၣ်ဝဲဒ်အံၤလီၤအဂ့ၢ်န့ၣ်(သုးက့ ၅)ပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် စီၤကျၢၤဒိၣ် စံးဝဲန့ၣ်လီၤ.
အဝဲစံးဝဲလၢ“ဖဲ ၆ သီ ဟါခီ ကဘၣ်ဖဲ ၆း၀၀ နၣ်ရံၣ်ခိၣ်ဃၢၤန့ၣ် အဟဲခးလီၤတၢ်ဖဲဆီဘှဲဒၢသဝီန့ၣ်. ပှၤတဲလၢတၢ်ဘၣ်ဒိဘၣ်ထံး တအိၣ်ဘၣ်. တကတီၢ်ဃီအခါန့ၣ်ခးလီၤဝဲလၢဖၣ်ပူၣ်ဝ့ၢ် ကဝီၤဒ့-၂ အပူၤအဃိ ဘၣ်ဒိဝဲပိၥ်မုၣ်(၂)ဂၤဒီး ပိၥ်ခွါ(၁)ဂၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ဒ်န့ၣ်အသိးသုးမီၤစိရိၤအံၤလၢကလဲၤထီၣ်ဆူကတၢတံၥ်-ဖၣ်ပူၣ်အဂီၢ်န့ၣ် စးထီၣ်ဖဲအပူၤကွံၥ်လါစဲးပထ့ဘၢၣ်ထီၣ်အံၤ ပယီၤသုး ဒီး(BGF),(DKBA)သုးခိၣ်ဘိၤဘံၣ်အပှၤသုးပၥ်ဖှိၣ်တဖၣ်အံၤလဲၤထုးဖှိၣ်ထီၣ်အသးဖဲကမၤမိၢ်ဝ့ၢ်ဃၢၤ ဝါဒူသဝီပူၤ ဒီးဖဲန့ၣ်တဆီ ဂုၥ်ကျဲးစၢးဟဲထီၣ်ဘၣ်ဆၣ်ခီဖျိ(KNLA)အပှၤ ခိးခးအဝဲသ့ၣ်လၢတၢ်ဘၢၣ်စၢၤအဃိတုၤခဲအံၤထီၣ်ဝဲတဖျိဒံးဘၣ်အဂ့ၢ်န့ၣ် သုးခိၣ်ဒိၣ် ဂီၢ်ဂ့ၢ် စီၤကျၢၤဒိၣ် စံးအါထီၣ်ဝဲန့ၣ်လီၤ.
“မ့မ့ၢ်လၢသုးကီၣ်ကးအပှၤဒီး(BGF),(DKBA)သုးပၥ်ဖှိၣ်လၢအိၣ်ဖဲဝါဒူသဝီတဖၣ်န့ၣ် ဖဲအဝဲသ့ၣ်ဟဲထီၣ်တၢ်ဒုးကဲထီၣ်က့ၤ ကဒါလီၢ်ဝံၤလီၢ်ခံအံၤန့ၣ်တဟဲထီၣ်ကဒါနီတဘျီဒံးဘၣ် အိၣ်ဒံးဒၣ်ဖဲဝါဒူသဝီဖဲန့ၣ်လီၤ. နါက့အတၢ်ပညိၣ်အိၣ်လၢကဟဲထီၣ်ဝဲ ဘၣ်ဆၣ်ခီဖျိပှၤခိးလီၤ အဝဲသ့ၣ်လၢတၢ်တီၤလိၤတၢ်ဘၣ်ဒိၣ်ဘၣ်ထံးအိၣ်အဃိက့ၤလီၤကဒါခိၣ်ခံဒီး ဟဲထီၣ်ဝဲတပၢၢ်ဒံးဘၣ်. ”အဂ့ၢ် န့ၣ် စံးဝဲန့ၣ်လီၤ.
တကးဒံးဘၣ်တကီၢ်ခါခဲအံၤဘူးထီၣ်ဘူးလီၤလၢတၢ်ဃုထၢလံအဃိသုးမီၤစိရိၤအံၤဆှၢထီၣ်အသုးဂံၢ်ဘါအါအါဂီၢ်ဂီၢ် ဂုၥ်ကျဲးစၢးဝဲ လၢကထီၣ်ဟံန့ၢ်က့ၤတၢ်လီၢ်လၢကလုၥ်ဒူၣ်ဟီၣ်ကဝီၤတၢ်ပၢၢ်ဆၢသုးကရူၢ်ထီၣ်န့ၢ်ဒိၣ်စိဝဲတဖၣ်အိၣ်ဝဲဒီး သူဝဲကဘီယူၤဟးခးလီၤ တၢ်လၢကမျၢၢ်အိၣ်ဆိးလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါသုးမီၤစိရိၤအံၤစးထီၣ်ဖဲတလါအံၤလါအီးကထိဘၢၣ်ထီၣ် ခ့ၣ်အဲၣ်ယူၣ် ချၢၣ်လွံၢ်ထူၣ်ကီၢ်ရ့ၣ်(သုးက့ ၃) ဒီး (သုးက့ ၅)အမဲၥ်ညါ ဖဲတနံၤအံၤဂီၤခီအဆၢကတီၢ်န့ၣ်စ့ၢ်ကီး လၢဘျံးဒဝဲၢ်ကီၢ်ရ့ၣ်(သုးက့ ၄) ထံမိၢ်ပှၢ်ဟီၣ်ကဝီၤ ထံခံကီၢ်ဆၢ မဲၢ်သမံၢ်ခံ(ထံခံ) သဝီတကပၤန့ၣ် ကဘီယူၤလဲၤခးလီၤတၢ်အဘျီ(၁၀) တ့ၢ်လီၤဝဲမ့ၣ်ပိၢ်အဖျၢၣ်(၄၀)ဘျဲၣ်အဃိ ကမျၢၢ်တၢ်သူၣ်ဟးဂီၤအိၣ်ဝဲ အဂ့ၢ် န့ၣ် သ့ၣ်ညါဘၣ်န့ၣ်လီၤ.
