လါနိၣ်ဝ့ဘၢၣ် ၁၁သီ, ၂၀၂၅နံၣ်, ခ့ၣ်အဲးစံၣ်.
ကီၢ်ပယီၤ-ကီၢ်ကၠီၣ်တဲၣ် ကီၢ်ဆၢ ကၠါဖၠၣ် တၢ်လံၣ်အီၣ်လီအီၣ် ကျိၣ်စ့လၢ(online)ပူၤအခိၣ် ဒီးမ့ၢ်စ့ၢ်ကီးဝဲ ကညီကီၢ်စဲၣ်သုးခိးကီၢ်ဆၢ(BGF)အနဲၣ်ရွဲၣ်သုးခိၣ်ခၠံၣ်သူၣ် အသကိး ပှၤတရူးဖိ (ရှံကၠ့ၤကၠါအံၤ)န့ၣ် လၢအသီ(၉၀)တီၢ်ပူၤ ကီၢ်ကၠီၣ်တဲၣ်ကွီၢ်ဘျီၣ်ဆၢတဲၥ်လီၤဝဲလၢ တၢ်ကက့ၤဟ့ၣ်လီၤက့ၤအီၤဆူ တရူးကီၢ်ပဒိၣ်အစုပူၤအဂ့ၢ် သ့ၣ်ညါဘၣ်ဒ်ကီၢ်ကၠီၣ်တဲၣ်တၢ်ကစီၣ်သန့တနီၤပၥ်ဖျါဝဲဒၣ်အိၣ်အသိးန့ၣ်လီၤ.
ကၠါဖၠၣ်တၢ်ဖံးတၢ်မၤအခိၣ် ရှံကၠ့ၤကၠါအံၤန့ၣ် ခီဖျိတရူးထံကီၢ်ပဒိၣ်အတၢ်ဃ့ထီၣ်တဆီအဃိ ဖဲအပူၤကွံၥ် ၂၀၂၂နံၣ် လါအီကူးအဆၢကတီၢ်န့ၣ် ကီၢ်ကၠီၣ်တဲၣ်ဖီၣ်န့ၢ်ကွံၥ်ဝဲဒၣ်အီၤဖဲဝ့ၢ်ဘီကီးအပူၤန့ၣ်လီၤ.ဒီးဖဲ ၂၀၂၂ နံၣ်လါနိၣ်ဝ့ဘၢၣ်အတီၢ်ပူၤန့ၣ် တရူးဃ့ထီၣ်ဝဲဒၣ် ကီၢ်ကၠီၣ်တဲၣ်ဒ်သိး ကဟ့ၣ်က့ၤအဝဲသ့ၣ် ကၠါဖၠၣ်အခိၣ် ရှံကၠ့ၤကၠါအံၤ ဘၣ်ဆၣ် ကီၢ်ကၠီၣ်တဲၣ်တကပၤ က့ၤကွၢ်လီၤတံၢ်ကဒါက့ၤအဝဲသ့ၣ် သဲစးတၢ်ဘျၢဒီး ဒ်ကီၢ်ကၠီၣ်တဲၣ် တၢ်ဆှၢက့ၤပှၤထံဂုၤကီၢ်ဂၤဖိလၢမၤကမၣ်ကွီၢ်မ့ၣ် သဲစးတၢ်ဘျၢ ၁၉ဒီး၂၁အိၣ်ဝဲအသိးန့ၣ် ကီၢ်ကၠီၣ်တဲၣ် အကွီၢ်ဘျီၣ်ဆၢတဲၥ်လီၤဝဲလၢကက့ၤဆှၢက့ၤဝဲဒၣ် ရှံကၠ့ၤကၠါအံၤဖဲအသီ(၉၀)တီၢ်ပူၤဝံၤအလီၢ်ခံန့ၣ်လီၤ.
ရှံကၠ့ၤကၠါအံၤဒ်အမ့ၢ်ဝဲဒၣ် သုးခိၣ်ခၠံၣ်သူၣ်သကိးတဂၤအသိး ဒ်သိး အကဟးထီၣ်ဘၣ်လၢတၢ်ဒုးဃၥ်ပူၤအဂီၢ် ဖဲအပူၤကွံၥ်၂၀၂၄နံၣ်လါအီကူးအဆၢကတီၢ်န့ၣ် သုးခိၣ်ခၠံၣ်သူၣ်တီခိၣ်ရိၣ်မဲ မၤန့ၢ်အီၤတၢ်ထုကဖၣ်မူးတၢ်ရဲၣ်တၢ်ကျဲၤလီၤဘီလီၤမုၢ်တခါအိၣ်ဝဲဒၣ်န့ၣ်လီၤ.
ဒ်ကီၢ်ကၠီၣ်တဲၣ်တၢ်ကစီၣ်သန့ပၥ်ဖျါဝဲဒၣ်အသိးန့ၣ် ရှံကၠ့ၤကၠါအံၤ လၢ တၢ်လံၣ်အီၣ်လီအီၣ်ကျိၣ်စ့လၢOnlineတၢ်ဖံးတၢ်မၤအဂီၢ် အိးထီၣ်ဝဲ ဒၣ်(website) (239)ခါ ဒီးဝ့ၢ်သီတၢ်တိၤကျဲၤတဘျုးတီၤလၢထံကီၢ်ဒ်အမ့ၢ်(ခၣ်ဘီဒံယါ)ဒီးကီၢ်ပယီၤလၢအပၣ်ဃုၥ်ဒီး စွ့ၣ်ကိၣ်ကိၤဝ့ၢ်သီတၢ်တိၤကျဲၤအဂ့ၢ်စံးဝဲဒၣ်န့ၣ်လီၤ.
ရှံကၠ့ၤကၠါအံၤ ဖဲ၂၀၁၆-၂၀၁၇တီၢ်ပူၤ န့ၣ်စးထီၣ်သူဝဲဒၣ် ခၣ်ဘီဒံယါထံဖိကီၢ်ဖိခိၣ်ဂီၤဒီးလံၥ်ခီကီၢ် ဒီးဆီတလဲက့ၤအမံၤလၢအသီတဖျၢၣ်လၢအမ့ၢ် တၤကြ့ၤကဲၤ အဂ့ၢ် သ့ၣ်ညါဘၣ်အသိး ရှံကၠ့ၤကၠါအံၤ န့ၣ် လၢကဟဲဘျၢလီၤဝဲကျိၣ်စ့ဒီးကမၤဝဲ စွ့ၣ်ကိၣ်ကိၤဝ့ၢ်သီတၢ်တိၤကျဲၤဘၣ်ဃးတၢ်သူၣ်ထီၣ်ဟံၣ်ဃီအဂီၢ် ဖဲ ၂၀၁၆နံၣ်,လါဒံၣ်စဲဘၢၣ်အဆၢကတီၢ်န့ၣ် ဟဲဝဲဒၣ်လၢကီၢ်ပယီၤ,လၢကညီကီၢ်စဲၣ် ထံၣ်လိၥ်ဝဲသးဒီး BGF သုးခိၣ်ခၠံၣ်သူၣ်ဒီးဆဲးလီၤဝဲဒၣ်မံၤလၢလံၥ်ဃံးဃၥ်အပူၤအိၣ်ဝဲဒၣ်အဂ့ၢ်သ့ၣ်ညါဘၣ်န့ၣ်လီၤ.
ဒ်တၢ်ဃုထံၣ်သ့ၣ်ညါအိၣ်ဝဲအသိး, ဖဲ ၂၀၁၉နံၣ်အတီၢ်ပူၤန့ၣ် ခၣ်ဘီဒံယါ ထံကီၢ်ထုးထီၣ်ဝဲသဲစးတၢ်ဘျၢအသီတခါလၢအဘၣ်ဃးဒီး တၢ်လံၣ်အီၣ်လီအီၣ်ကျိၣ်စ့လၢ Online အဃိန့ၣ် ရှံကၠ့ၤကၠါ တၢ်ဖံးတၢ်မၤလၢအအိၣ်လၢ ကီၣ်ခၣ်ဘီဒံယါသ့ၣ်တဖၣ် တၢ်သုးက့ၤအီၤဆူ ကီၢ်ပယီၤ,ရၤမတံဟီၣ်ကဝီၤ စွ့ၣ်ကိၣ်ကိၤပူၤအဂ့ၢ် ပၥ်ဖျါဝဲဒၣ်န့ၣ်လီၤ.
စးထီၣ်ဖဲန့ၣ်ဝံၤအလီၢ် သုးခိၣ်ခၠံၣ်သူ ပၢ စွ့ၣ်ကိၣ်ကိၤဟီၣ်ကဝီၤအံၤန့ၣ် မံၤဟူသၣ်ဖျါထီၣ်ဝဲကယီကယီ လၢအိၣ်ဒီး တၢ်မၤကၤပှၤကညီ, တၢ်မၢန့ၢ်ဆူၣ်ပှၤမၤတၢ်ဖိ,ဒီးတဆီဘၣ်တဆီဖဲ ၂၀၂၀နံၣ်အလီၢ်ခံ န့ၣ် တၢ်ကတိၤလၢအမ့ၢ်ကၠါဖၠၣ်တၢ်ဖံးတၢ်မၤ(တၢ်လံၣ်အီၣ်လီအီၣ်ကျိၣ်စ့လၢ Online) အံၤအိၣ်ဝဲဒၣ်လၢစွ့ၣ်ကိၣ်ကိၤဟီၣ်ကဝီၤပူၤအဂ့ၢ် တၢ်ကစီၣ်ဖျါထီၣ်ဝဲဒၣ်လၢဟီၣ်ခိၣ်ဒီဘ့ၣ်အမဲၥ်သၣ်လိၤတုၤခဲအံၤန့ၣ်လီၤ.
ဘၣ်ဃးဒီးတရူးစံၣ်ညီဝဲဒၣ် ပှၤလၢမၤကမၣ်ကွီၢ်မ့ၣ်အဒိၣ်သ့ၣ်တဖၣ်န့ၣ် ပမ့ၢ်ကွၢ်က့ၤအဘူးကတၢၢ်ဖဲလါနိဝ့ဘၢၣ်(၄)သီအနံၤ သုးကရူၢ်စုတီၤဖီလၥ် ကိကၣ်ကလုၥ် အခိၣ်လီၢ်လံၤ ပဲၤဆီၣ်ခၠ့ၤဒီးအပှၤ လၢတရူးကီၢ်လိၣ်ဘၣ်ဝဲသ့ၣ်တဖၣ်န့ၣ် ဖဲအပူၤကွံၥ် ၂၀၂၄နံၣ် လါယနူၤအါရံၤ(၃၀)သီအနံၤ သုးကရူၢ် ဟ့ၣ်လီၤက့ၤဝဲဆူတရူးအစုပူၤ,ဒီးဖဲ ၂၀၂၅နံၣ် လါယူၤလံအခါန့ၣ်တၢ်စးထီၣ် လိၥ်ဘၢလိၥ်ကွီၢ်အဝဲသ့ၣ်ဝံၤဖဲတလါအံၤလါနိၣ်ဝ့ဘၢၣ်(၄)သီအနံၤတၢ်စံၣ်ညီၣ်တဲၥ်လီၤအဝဲသ့ၣ်တုၤလၢတၢ်သံန့ၣ်လီၤ.
ပဲၤဆီၣ်ခၠ့ၤဃုၥ်ဒီးအပှၤ(၅)န့ၣ် တၢ်စံၣ်ညီသံအဝဲသ့ၣ်,အဂၤ(၂)ဂၤတၢ်စံၣ်ညီၣ်သံ(ပတုၥ်),အဂၤ(၅)ဂၤန့ၣ်လီၤဃိၥ်ပူၤတစိၤသး,အဂၤ(၉)ဂၤန့ၣ်လီၤဃိၥ်ပူၤအနံၣ်(၂၀)န့ၣ်လီၤ.
ပဲၤဟံၣ်ဖိဃိဖိလၢတၢ်စံၣ်ညီသံအဝဲသ့ၣ်ခဲအံၤသ့ၣ်တဖၣ်န့ၣ်ဘၣ်တၢ်လိၥ်ကွီၢ်အဝဲသ့ၣ်တၢ်အမူးလၢ အမ့ၢ် တၢ်လံၣ်အီၣ်လီအီၣ်ကျိၣ်စ့လၢ(online),ခၣ်စံၣ်နိၣ်တၢ်မၤ,တၢ်မၤသံမၤဝီ,မၤဆါမၤပယွဲတၢ်,ဖီၣ်ကမဲတၢ်,ဃ့ဆူၣ်န့ၢ်ကျိၣ်စ့,မၢန့ၢ်ဆူၣ်ပှၤမၤတၢ်မၤလၢတၢ်မံဃုၥ်တၢ်မၤ,ဒီးပျဲနုၥ်လီၤပှၤလၢကီၢ်ပူၤတဖိးသဲစး,တၢ်တၤကျိၣ်တၤစ့,တၢ်လံၣ်အီၣ် ယွၤမ်စ့ ၂၉ ဘံလံယၢၣ်,တရူးထံဖိကီၢ်ဖိဘၣ်သံ(၆)ဂၤ,မၤသံလီၤသး(၁)ဂၤ,တၢ်ဆါကသံၣ်မူၤဘှီး တၢ်မူးတၢ်ရၢ်သ့ၣ်တဖၣ်အံၤန့ၣ်လီၤ.
အခဲအံၤ ရှံကၠ့ၤကၠါအံၤန့ၣ် အသီ(၉၀)တီၢ်ပူၤ ကီၢ်ကၠီၣ်တဲၣ်ကဆှၢက့ၤအီၤဆူ တရူးအစုပူၤဘၣ်ဆၣ် တၢ်တသ့ၣ်ညါဘၣ်မုၢ်နံၤမုၢ်သီလီၤတံၢ်လီၤဆဲးဘၣ်အသိး တရူး ကလိၥ်ကွီၢ်ဒီး ကစံၣ်ညီဝဲဒၣ် ရှံကၠ့ၤကၠါဒ်လဲၣ်န့ၣ်မ့ၢ်တၢ်ခါလၢပဘၣ်အိၣ်ခိးကွၢ်အီၤန့ၣ်လီၤ.
