လါဖ့ၤဘြူၤအါရံၤ ၁၁ သီ, ၂၀၂၆ နံၣ်, ခ့ၣ်အဲးစံၣ်
ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ် အံလူၢ်ကရူၢ် ဒီး တကွံပူၤကရူၢ်အပူၤ ဖဲတလါအံၤလါဖ့ၤဘြူၤအါရံၤ ၇ သီ, ၈ သီအနံၤန့ၣ် ခီဖျိပယီၤသုးကျိၤနုၥ်လီၤဟူးဂဲၤအါအါဂီၢ်ဂီၢ်အဃိ ကမျၢၢ်(၆၀၃၆)ဂၤဘၣ်ဃ့ၢ်ထီၣ်ဝဲဒီး လၢပှၤသ့ၣ်တဖၣ်အံၤ အဂီၢ်လိၣ်ဘၣ်ဝဲဂ့ၢ်ဂီၢ်အူတၢ်ဆီၣ်ထွဲမၤစၢၤ အဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.
ကမျၢၢ်(၆၀၀၀)ဘျဲၣ်လၢအဃ့ၢ်ထီၣ်တဖၣ်အံၤ ကီၢ်ဆၣ်ပှၤဘၣ်မူဘၣ်ဒါကွၢ်ထွဲမၤစၢၤအဝဲသ့ၣ်တၢ်အီၣ်တၢ်အီဒီး ကသံၣ်ကသီ အိၣ်ဘၣ်ဆၣ် တၢ်လၢတၢ်ပှဲၤတအိၣ်ဝဲဘၣ်အဂ့ၢ်န့ၣ် ဒူသထူၣ်ကီၢ်ရ့ၣ် နဲၣ်ရွဲၣ် ပဒိၣ်စီၤအ့နဲၤ စံးဘၣ်ခ့ၣ်အဲးစံၣ်-ကညီတၢ်ကစီၣ် ဖဲမဟါ အနံၤ န့ၣ်လီၤ.
“ဒူသဝီလၢအဃ့ၢ်ထီၣ်တဖၣ်အံၤဘၣ်အိၣ်လၢတၢ်ဘၣ်ယိၣ်ဘၣ်ဘှီပူၤထီဘိလီၤ.ပယီၤသုးကျိၤမ့ဟဲနုၥ်လီၤတဘျီလၢ်လၢ်န့ၣ်ဘၣ်ဃ့ၢ် ပူၤဖျဲသးလီၤ. တၢ်အီၣ်ဒီးကသံၣ်ကသီသ့ၣ်တဖၣ်ပှၤအံးထွဲကွၢ်ထွဲအဝဲသ့ၣ်ဖဲတၢ်သ့အိၣ်အသိးဘၣ်ဆၣ် တၢ်လၢတၢ်ပှဲၤတအိၣ် ဘၣ်အဃိ လၢပှၤသ့ၣ်တဖၣ်အံၤအဂီၢ်လိၣ်ဘၣ်တၢ်မၤစၢၤဒ်အံၤလီၤ”အဂ့ၢ်န့ၣ် စံးဝဲန့ၣ်လီၤ.
တကီၢ်ခါခဲအံၤပယီၤသုးကျိၤလၢနုၥ်လီၤဟူးဂဲၤဖဲအံလူၢ်ကရူၢ်ပူၤအံၤတဖၣ် ဟးထီၣ်က့ၤလၢအလီၢ်လံဘၣ်ဆၣ်မ့မ့ၢ်လၢတကွံပူၤ ကရူၢ်ခီန့ၣ် ပယီၤသုးဆဲးအိၣ်ဒံးဝဲလၢသဝီပူၤအဂ့ၢ်န့ၣ် သ့ၣ်ညါဘၣ်လၢလီၢ်ကဝီၤပှၤဘၣ်မူဘၣ်ဒါအအိၣ်န့ၣ်လီၤ.
ပယီၤသုးကျိၤနုၥ်လီၤဘျီဝဲအံၤ အံလူၢ်ကရူၢ်ပူၤသဝီလၢအမ့ၢ် အံလူၢ်ဖးဒိၣ်သဝီ, ရှါစူၣ်,ဖုဝါသံၣ်,ချၢၣ်တိၢ်သဝီ, ကရၣ်ဝ့စ့ၣ်သဝီ ဟံၣ်ခိၣ်ပၥ်ဖှိၣ်(၁၂၆၆)ဖျၢၣ်, ပှၤနီၣ်ဂံၢ်(၅၃၈၀)ဂၤဃ့ၢ်ထီၣ်ဝဲအသိး မ့မ့ၢ်တကွံပူၤကရူၢ်ခီန့ၣ် ဒူသဝီလၢအမ့ၢ် ခၠါမၠ့ၣ်စူၣ် (ချမ်းမြေ့စု), ပတီၣ်တီ(ပိတောက်တော)သဝီ, စံကိ(ဇီးကုန်း)သဝီ ဟံၣ်ခိၣ်(၁၆၂)ဖျၢၣ် ပှၤနီၣ်ဂံၢ်(၆၅၆)ဂၤ ပၥ်ဖှိၣ်ခဲလၢၥ်(၆၀၃၆)ဂၤ ဃ့ၢ်ထီၣ်ဝဲ န့ၣ်လီၤ.
ကၠဲးထိၣ်ကီၢ်ဆၣ်ပူၤ ကရူၢ်တဖၣ်အံၤအမဲၥ်ညါလၢခရၢၢ်ကရူၢ်ဒီးဝီၢ်က့ကရူၢ်တကပၤန့ၣ်စ့ၢ်ကီး အပူၤကွံၥ်စှၤသီအခါ ပယီၤသုးကျိၤ လၢအနီၣ်ဂံၢ်ကအိၣ်(၂၀၀)ဘျဲၣ်အံၤနုၥ်လီၤဟူးဂဲၤဝဲအဃိ ဝီၢ်က့သဝီ,ထံပူၤပျီ(ကျောက်ရေတွင်း) ,ခၠီဝၣ်,ခရၢၢ်,မိၣ်ခမီၣ်,စ့ၣ်ကွ့ သဝီဖိကမျၢၢ်သ့ၣ်တဖၣ်အံၤဃ့ၢ်ထီၣ်စ့ၢ်ကီးဝဲအဂ့ၢ်န့ၣ် လီၢ်ကဝီၤပှၤဘၣ်မူဘၣ်ဒါလၢအိၣ်ဘူးဖဲန့ၣ်တဖၣ်စံးဝဲန့ၣ်လီၤ.
ဒ်န့ၣ်အသိးပယီၤသုးကျိၤတဖၣ်ခဲအံၤအိၣ်ဆီလီၤအသးဖဲ ဝီၢ်က့ကရူၢ် ထံပူၤပျီ(ကျောက်ရေတွင်း) သဝီအပူၤန့ၣ်လီၤ. တကးဒံးဘၣ် ပယီၤတဖၣ် အံၤစးထီၣ်လၢအဝဲသ့ၣ်နုၥ်လီၤဟူးဂဲၤဖဲန့ၣ်အခါန့ၣ် ခးသံဝဲကမျၢၢ်အိၣ်(၅)ဂၤ လံအဂ့ၢ်န့ၣ် လီၢ်ကဝီၤ(KNLA)ပှၤဘၣ် မူဘၣ်ဒါ လၢအိၣ်ဘူး ဖဲန့ၣ်တဂၤ စံးဝဲန့ၣ်လီၤ.
“လၢမိၣ်ခမီၣ်ဧါ(မ့တမ့ၢ်)ခရၢၢ်တကပၤန့ၣ်ပယီၤသုးခးသံပှၤကမျၢၢ် ၅ ဂၤ. ပိၥ်ခွါန့ၣ်(၄)ဂၤ,ပိၥ်မုၣ်န့ၣ်(၁)ဂၤ အကျါဖဲန့ၣ်ပၣ်ဃုၥ် ပှၤဖိသၣ်တဂၤပဒိးန့ၢ်တၢ်ကစီၣ်ဒ်န့ၣ်. ခဲအံၤပမၤန့ၢ်ကစီၣ်လၢပယီၤသုးန့ၣ်အိၣ်ဖဲ(ကၠီၣ်ယ့ၤတွ့)န့ၣ်လီၤ.အနီၣ်ဂံၢ်ကအိၣ်လၢ(၂၀၀) ဘျဲၣ်ညါ.ပနၢ်ဟူလၢအဝဲသ့ၣ်န့ၣ်ကနုၥ်လီၤလၢစံပၠီတကပၤ မ့ၢ်ဧါတမ့ၢ်ဧါတသ့ၣ်ညါဒံးဘၣ်ခဲအံၤပအိၣ်ခိးကွၢ်မၢ်မၢ်လီၤ”အဂ့ၢ် န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
တကးဒံးဘၣ်ဖဲလါဖ့ၤဘြူၤအါရံၤ ၇ သီ ပယီၤသုး(ခမရ-၂)ဒီး(ခလရ-၈)သုးပၥ်ဖှိၣ်လၢအနုၥ်လီၤဟူးဂဲၤဖဲ အံလူၢ်ကရူၢ် ဖုဝါသံၣ်ဒီး ချၢၣ်တိၢ် (ညောင်ထောက်)သဝီအခါန့ၣ်စ့ၢ်ကီးတၢ်ဒုးကဲထီၣ်ဝဲဒီးဟီၣ်ကဝီၤတၢ်ပၢၢ်ဆၢဝံၤ ဟံကမျၢၢ်အစဲးကၢး,ကျိၣ်စ့ တဖၣ် အမဲၥ်ညါ ဒွဲၣ်အူ အီၣ်ဝဲကမျၢၢ်အဟံၣ်(၂)ဖျၢၣ်လီၤကရဲတၢ်ဖိတၢ်လံၤပၣ်ဃုၥ်ဝဲခဲလၢၥ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
ဒ်ကီၢ်ရ့ၣ်ပှၤဘၣ်မူဘၣ်ဒါစံးဝဲအသိးန့ၣ် စးထီၣ်ဖဲ(၂၀၂၁)သုးဟံန့ၢ်တၢ်စိတၢ်ကမီၤဝံၤလီၢ်ခံန့ၣ် လီၤဆီဒၣ်တၢ် အံလူၢ်ကရူၢ်, ခရၢၢ်ကရူၢ်, ဝီၢ်က့ကရူၢ်ဒီး တကွံပူၤကရူၢ်ဒူသဝီကမျၢၢ်တဖၣ် ဘၣ်ကွၢ်ဆၢၣ်မဲၥ်ဝဲသုးမီၤစရိၤ အတၢ်ခးလီၤ ကျိဖးဒိၣ် ,ကဘီယူၤ, ဒြိတၢ်ဟူး တၢ်ဂဲၤသ့ၣ်တဖၣ်အံၤအဃိ အဝဲသ့ၣ်ဘၣ်ဃ့ၢ်အိၣ်ကဒုသးထီရီၤအဂ့ၢ်န့ၣ် သ့ၣ်ညါဘၣ်န့ၣ် လီၤ.
