လါအ့ဖြ့ၣ် ၁၄ သီ, ၂၀၂၆ နံၣ်, ခ့ၣ်အဲးစံၣ်
ပနၢ်အီၣ်ဘုတူၢ်သုးကလၢၤလၢ(သုးက့ ၇)အပှၤဒီးတၢ်ပၢၢ်ဆၢသုးပၥ်ဖှိၣ်ထီၣ်န့ၢ်ဝဲဖဲမဟါအနံၤအံၤ တၢ်ဒုးအပူၤတၢ်မၤဝဲကျိချံပှၥ်သၣ် အဂ့ၢ်န့ၣ် All Burma Students’ Democratic Front-ABSDF လၢအပၣ်ဃုၥ်လၢဒုးယၤတၢ်ရဲၣ်တၢ်ကျဲၤ ဘျီဝဲအံၤအပူၤ ထုးထီၣ်ပၥ်ဖျါဝဲဖဲတနံၤအံၤန့ၣ်လီၤ.
ပနၢ်အီၣ်ဘုတူၢ်(ကြယ်ပြောင်ကုန်း)သုးကလၢၤအံၤမ့ၢ်ဝဲခီၣ်ချ့သုးရ့ၣ်(ခမရ-၉၆၂)ဒုးယၤသုးကလၢၤအတၢ်ဒီသဒၢသုးကလၢၤဖိ တဖျၢၣ်ဒီး ဖဲမဟါ လါအ့ဖြ့ၣ် ၁၃ သီ ဂီၤခီအဆၢကတီၢ်န့ၣ် ဟီၣ်ကဝီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)ဒီးသိၣ်မှံၤ သုးပၥ်ဖှိၣ် ကရူၢ်လၢအဂၤ ပၥ်ဖှိၣ်ထီၣ်သးထီၣ်မၤန့ၢ်ကွံၥ်ဝဲသုးကလၢၤအံၤန့ၣ်လီၤ.
ဒ်(ABSDF)ပၥ်ဖျါထီၣ်တၢ်ဂီၤအသိးန့ၣ် လၢတၢ်ထီၣ်ဝဲသုးကလၢၤဘျီဝဲအံၤအပူၤ တၢ်မၤန့ၢ်ဝဲကျိအခိၣ်(၂၀)ဃၣ်ဃၣ်, ဃုၥ်ဒီးကျိဖးဒိၣ်,ကျိဖးဒိၣ်အချံ,ကျိချံပှၥ်သၣ်,စိၤလၤ(တၢ်လိမုၢ်),သုးတၢ်ပီးတၢ်လီလၢအဂၤအါမးန့ၣ်လီၤ.
ကျိချံပှၥ်သၣ်အမဲၥ်ညါဘၣ်ဃးပယီၤသုးသံဘၣ်ဒိဘၣ်ထံးတၢ်အိၣ်သးခီန့ၣ်တၢ်ပၥ်ဖျါဃုၥ်ဝဲတအိၣ်ဘၣ်ဘၣ်ဆၣ် လၢတၢ်ထီၣ် သုးကလၢၤဘျီဝဲအံၤအပူၤ ပယီၤသုးသံဘၣ်ဒိဘၣ်ထံးအိၣ်အသိး တၢ်ဖီၣ်န့ၢ်ဝဲအိၣ်အဂ့ၢ်န့ၣ် တၢ်ပၢၢ်ဆၢသုးကရူၢ်အပှၤ လၢတအဲၣ်ဒိး ပၥ်ဖျါအမံၤတဂၤစံးဝဲန့ၣ်လီၤ.
“ဖဲမဟါန့ၣ်ပယီၤသုးသံတ့ၢ်အိၣ်.အသံတဖၣ်န့ၣ်ဖျါလီၤဂၥ်လၢအသူကသံၣ်မူၤဘှီးကသံၣ်ကစၢ်ခီ.ဘၣ်မနုၤအဃိလဲၣ်န့ၣ်တဂၤတဂၤန့ၣ်ဃဲၤသံ. အဃ့ၢ်ထီၣ်ပှၤဖီၣ်န့ၢ်ကဒါနါက့အိၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ.
ပနၢ်အီၣ်ဘုတူၢ်လၢအမ့ၢ်ဒီသဒၢသုးကလၢၤအံၤအိၣ်ဆီလီၤအသးလၢခ့ၣ်အဲၣ်ယူၣ် ဖၣ်အၣ်ကီၢ်ရ့ၣ်(သုးက့ ၇) ခ့ၣ်အဲၣ်ယူၣ် လီၢ်ခၢၣ်သး မဲၢ်တရံး ,မုၣ်အ့ပူၤဆၢလၥ် မဲၢ်သဝီဟီၣ်ကဝီၤပူၤအံၤန့ၣ်လီၤ.
ဒ်န့ၣ်အသိးဖဲမဟါတၢ်လဲၤထီၣ်န့ၢ်ဝဲသုးကလၢၤအံၤဝံၤတနၤဃီဖဲဟါခီ ၉း၂၀ မံးဃၣ်ဃၣ်အဆၢကတီၢ်န့ၣ် လၢ(ခမရ-၉၆၂) မဲၢ်သဝီ ဒုးယၤသုးကလၢၤအံၤတဆီပယီၤသုးခးစိဃီၤဝဲကျိဖးဒိၣ်တစှၤန့ၢ်(၂)ဖျၢၣ်ဆူမုၣ်အ့ပူၤဟီၣ်ကဝီၤဒီး ဘၣ်ဆၣ်ပယီၤသုး ခးလီၤကျိဖးဒိၣ်ဘျီဝဲအံၤတၢ်ဘၣ်ဒိဘၣ်ထံး,တၢ်ဟးဂူၥ်ဟးဂီၤတအိၣ်ဝဲဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ.
