လါယူၤလံ ၁၁ သီ, ၂၀၂၆နံၣ်, ခ့ၣ်အဲးစံၣ်,
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ သုးက့(၄) တနီသရံၣ်ကီၢ်ဆၣ်,မီတီၤဟီၣ်ကဝီၤအပူၤ သုးဂ့ၢ်ဝီတၢ်ဟူးတၢ်ဂဲၤ အဆၢကတီၢ် ကမျၢၢ်လီၢ်ကဝီၤဖိတဖၣ် ကလူၤပိၥ်မၤထွဲဝဲတၢ်နဲၣ်လီၤ(၅)ထံၣ်အဂ့ၢ်, (Black Cobra Column) ထုးထီၣ်ပၥ်ဖျါဝဲဒၣ်ဖဲမဟါလါယူၤလံ(၁၀)သီအနံၤန့ၣ်လီၤ.
တနီသရံၣ်-မီၤတီ ကီၢ်ဆၢဟီၣ်ကဝီၤအပူၤ တကီၢ်ခါခဲအံၤ တၢ်ပၢၢ်ဆၢသုးပၥ်ဖှိၣ် ကစးထီၣ်ကဒီးဝဲ သုးဂ့ၢ် ဝီ တၢ်ဟူးတၢ်ဂဲၤအဃိ လၢကမျၢၢ်လီၢ်ကဝီၤဖိတဖၣ် တၢ်ဘံၣ်တၢ်ဘၢအဂီၢ်ကဘၣ်လူၤပိၥ်ထွဲဝဲဒၣ်တၢ်နဲၣ်လီၤ(၅)ထံၣ် အဂ့ၢ်,(Black Cobra Column) ထုးထီၣ်ဘိးဘၣ်ပၥ်ဖျါဝဲန့ၣ်လီၤ.
တၢ်နဲၣ်လီၤသ့ၣ်တဖၣ်အံၤမ့ၢ်ဝဲ-
(၁)စးထီၣ်လၢ မီတီၤဝ့ၢ်နုၥ်လီၤ(နကသတြဲၤ)တုၤလၢနီၣ်ဂံၢ်(၉)သဝီအပူၤ သိလ့ၣ်တၢ်ဝံစိၥ်တီဆှၢတဖၣ် တဘၣ်လ့ၢ် ထီၣ်လ့ၢ်လိၤဝဲဒၣ်ဘၣ်ဒီး ကမျၢၢ်တဖၣ်ကဘၣ်သူဝဲဟံၣ်သိလ့ၣ်လၢအဆံး,သိလ့ၣ်ယီၢ်(စဲးကၢး)အဂ့ၢ်
(၂)စးထီၣ်လၢ ထိၤခါကျဲဆဲးဖး ဒီး တုၤလၢနီၣ်ဂံၢ်(၉)သဝီကျဲအပူၤန့ၣ် လ့ၤတက့ၤတၢ်တဘၣ်ဟးထီၣ်က့ၤလီၤဝဲဘၣ်. တၢ်လီၢ်အံၤမ့ၢ်ဝဲတၢ်ပၥ်ပနီၣ်လီၢ်အဂ့ၢ်
(၃) တၢ်ပၥ်ပနီၣ်ဟီၣ်ကဝီၤတဖၣ်အပူၤ တၢ်မ့ဟးထီၣ်က့ၤလီၤဝဲန့ၣ် ကမၣ်လိၥ်သးဒီးသုးဂ့ၢ်ဝီတၢ်ပညိၣ်ခးအလီၢ်ဒီး တၢ်ဘၣ်ဒိဘၣ်ထံးကဲထီၣ်ဝဲသ့အဃိ တၢ်ကဘၣ်ပလီၢ်သးဒိကနၣ်လူၤပိၥ်ထွဲမၤဝဲအဂ့ၢ်
(၄) ပှၤလၢ အဟ့ၣ်သုးကရူၢ်တၢ်ကစီၣ်, ဟံးန့ၢ်ဝဲပယီၤသုးတၢ်ကစီၣ် ဒီးဆီၣ်ထွဲမၤစၢၤပယီၤသုးသ့ၣ်တဖၣ်အံၤ တၢ်ကသမံသမိးဒီးဟံးန့ၢ်ဝဲအရ့အဃိ ကမျၢၢ်လီၢ်ကဝီၤဖိတဖၣ် ကဘၣ်အိၣ်ပျီပျီရှဲရှဲဒီးသုးကရူၢ်. တဘၣ်မၤဘၣ်ထွဲသးဘၣ်.
(၅) သုးဂ့ၢ်ဝီတၢ်ဟူးတၢ်ဂဲၤအတီၢ်ပူၤ တၢ်ပညိၣ်ဝဲအဒိၣ်ကတၢၢ် တၢ်ကမၤဝဲတၢ်သမံသမိးဘၣ်ဃး တၢ်ဝံစိၥ်တီဆှၢ စုကဝဲၤပီးလီလၢ အဘၣ်ထွဲဒီးသုးကရူၢ်တဖၣ်အသိလ့ၣ်အဃိ တၢ်တဘၣ်စိၥ်ခီဆှၢဝဲစုကဝဲၤပီးလီတဖၣ်ဘၣ်အဂ့ၢ်ပၥ်ဖျါထီၣ်ဝဲဒၣ်န့ၣ်လီၤ.
လၢန့ၣ်အမဲၥ်ညါ,တၢ်နဲၣ်လီၤသ့ၣ်တဖၣ်အံၤတၢ်ကဖီၣ်ဝဲဒီး ကဟ့ၣ်ဝဲတၢ်ကမၣ်လၢဒိၣ်ဒိၣ်မုၢ်မုၢ်အိၣ်ဝဲဒၣ်သ့အဃိ ကမျၢၢ်လီၢ်ကဝီၤဖိတဖၣ် ကဘၣ်လူၤပိၥ်မၤထွဲဝဲ တၢ်တြီတံၥ်ပၥ်ပနီၣ်တဖၣ်အံၤ လီၤတံၢ်လီၤဆဲးအဂ့ၢ် ဆီၣ်တခူ ပၥ်ဖျါစ့ၢ်ကီးဝဲန့ၣ်လီၤ.
သုးကရူၢ်အံၤ စးထီၣ်ဖဲ (၂၀၂၆)နံၣ် လါအ့ဖြ့ၣ်အပူၤအဒုးယၤသုးကလၢၤ(၂)ဖျၢၣ်လၢသုးရ့ၣ်ပၣ်ဃုၥ်ဝဲ(၁၁)ရ့ၣ် သ့ၣ်တဖၣ်အံၤ နုၥ်လီၤမၤဝဲဟီၣ်ခိၣ်မဲၥ်ဖံးခိၣ်တၢ်ဟူးတၢ်ဂဲၤဒီးမၤဝဲကဘီယူၤတၢ်ထီၣ်ဒုးတ့ၢ်လီၤမ့ၣ်ပိၢ်, တၢ်ခးလီၤ ကျိဖးဒိၣ်, ဒြိတၢ်ထီၣ် ဒုးသ့ၣ်တဖၣ်စးထီၣ်လၢသဲဖၠူၤသဝီတုၤလၢမီတီၤဝ့ၢ်ကျဲမုၢ်ဒီတကျိၤအပူၤအိၣ်ဝဲအဃိ ကမျၢၢ် တၢ်ဘၣ်ဒိ ဘၣ်ထံး အါထီၣ်ဝဲအဖီခိၣ်တၢ်ပၢၢ်ဆၢသုးကရူၢ်တဖၣ် ဂုၤက့ၤအလီၢ်ခံလၢ မီတီၤဝ့ၢ်ဒီး ထိခၤ-မီတီၤကျဲမုၢ်ဖးဒိၣ်အပူၤ ဖဲ လါမ့ၤ (၁၆)သီအနံၤအဂ့ၢ် (Black Cobra Column) ပၥ်ဖျါဝဲန့ၣ်လီၤ.
တကတီၢ်ဃီ,လၢကဒိၣ်စိက့ၤဝဲ တနီသရံၣ်ကီၢ်ဆၣ်-မီတီ ကီၢ်ဆၢ ဟီၣ်ကဝီၤသိလ့ၣ်ကျဲအဂီၢ် အပူၤကွံၥ် မၤဝဲသုးကျိၤတၢ်ဟူးတၢ်ဂဲၤအဃိ (၂၀၂၄)နံၣ်လါဒံၣ်စဲဘၢၣ်အပူၤ တၢ်ဒုးကဲထီၣ်ဝဲဒီး တၢ်ပၢၢ်ဆၢသုးပၥ်ဖှိၣ် ကရူၢ် ကရၢတဖၣ်ဒီးတၢ်ဒုးလိၥ်သးအံၤ ယံၥ်ဝဲလၢ(၁)နံၣ်ဒီး (၄)လါဃၣ်ဃၣ်အဂ့ၢ်, သ့ၣ်ညါဘၣ်န့ၣ်လီၤ.
ဒ်န့ၣ်အသိး, တၢ်ထီၣ်ဒုးဒီတကတီၢ်အပူၤ တၢ်ပၢၢ်ဆၢသုးကရူၢ်တဖၣ်ခိးတြီဝဲသုးကရူၢ်န့ၢ်ဝဲ တကးဘၣ် ထီၣ်မၤန့ၢ်ဝဲသုးကရူၢ် တၢ်လီၢ်လၢအိၣ်ဖဲမီတီၤဝ့ၢ်တဖၣ်ဒီး ပၢၤဃၥ်ဝဲန့ၢ်တုၤ (၆)လါအိၣ်ဝဲဒီးသုးကရူၢ် တကပၤသံအဂၤ (၅၀၀) ဘျဲၣ် ဘၣ်ဒိဘၣ်ထံးအိၣ်ဝဲ(၁၀၀၀)ဘျဲၣ်အသိး,ဖီၣ်မူဒံးန့ၢ်ဝဲပယီၤသုးလၢတၢ်ဒုးပူၤ(၅၃)ဂၤအမဲၥ်ညါ ပယီၤသုးအပှၤလၢ နုၥ်လီၤအိၣ်ကဒုလၢ တၢ်ပၢၢ်ဆၢ သုးပၥ်ဖှိၣ်ကရူၢ်ပူၤအိဝဲ(၄၆)ဂၤအဂ့ၢ် ပၥ်ဖျါဝဲဃုၥ်ဝဲန့ၣ်လီၤ.
