လါယူၤလံ ၁၆သီ, ၂၀၂၆နံၣ်, ခ့ၣ်အဲးစံၣ်,
ကညီသးစၢ် ပှၤသးဝံၣ်တၢ်ဖိမံၤဟူသၣ်ဖျါလၢအမ့ၢ် (Star Htoo)အံၤ အပူၤကွံၥ်လါယူၤလံ (၁၂)သီအနံၤန့ၣ် ဘၣ်တၢ်ဖီၣ်ဝဲ အီၤဖဲ ကီၢ်ကၠီၣ်တဲၣ် တးကီၢ်ရ့ၣ် မဲၢ်ရးမးဝ့ၢ် ကီၢ်ဆၢတၢ်အိၣ်ခိးတြဲၤတၢ်လီၢ် တတီၤ ဃုၥ်ဒီး ကသံၣ်မူၤဘှီး တဖၣ် အဂ့ၢ် ကၠီၣ်တဲၣ်စိၤရှၢၣ်မံးဒံးယၢၣ်တဖၣ်အပူၤ တၢ်ကစီၣ်ရၤလီၤဝဲအသးဒိၣ်ဒိၣ်မုၢ်မုၢ်န့ၣ်လီၤ.
ဖဲလါယူၤလံ(၁၂)သီအနံၤန့ၣ်, ကညီသးစၢ်ပှၤသးဝံၣ်တၢ်ဖိအံၤ တၢ်သမံသမိးအီၤအဆၢကတီၢ် တၢ်ထံၣ်န့ၢ်ဝဲလၢအစိၥ်ဝဲ ပံၤဝါ (Heroin) ၁၈.၈၈ ကရၤ ဃၣ်ဃၣ်အဂ့ၢ် တၢ်ကစီၣ်ရၤလီၤဝဲအသးန့ၣ်လီၤ.
တၢ်ကစီၣ်ရၤလီၤဝဲအသးလၢ ကညီသးစၢ်ပှၤသးဝံၣ်တၢ်ဖိအံၤ တကီၢ်ခါခဲအံၤ ဘၣ်တၢ်ဆှၢဝဲအီၤဆူ မဲၢ်ရမးဝ့ၢ် ပၢၤကီၢ် ဝဲၤဒၢးလံ ဘၣ်ဆၣ် ဘၣ်ဃးဒီးတၢ်ကဲထီၣ်သးအံၤ လၢ ကၠီၣ်တဲၣ်ပှၤဘၣ်မူဘၣ်ဒါတကပၤ ထုးထီၣ်ပၥ်ဖျါဝဲ တၢ်ဂ့ၢ်တၢ် ကျိၤလၢဖိးသဲစး လီၤတံၢ်လီၤဆဲးတအိၣ်နီတမံၤဒံးဘၣ်န့ၣ်လီၤ.
သးနံၣ် (၂၅) နံၣ် ကညီပှၤသးဝံၣ်တၢ်ဖိ (Star Htoo)အံၤ အိၣ်ဖျဲၣ်ထီၣ်ဝဲလၢ ကီၢ်ဆၢဘၣ်ကီဘၣ်ခဲဒဲကဝီၤ အပူၤဒီး လၢ ဘၣ်ကီဘၣ်ခဲဒဲကဝီၤတၢ်ရဲၣ်တၢ်ကျဲၤတဆီ သုးလီၢ်သုးကျဲလဲၤအိၣ်ဆိးဝဲလၢ အမဲရကၤထံကီၢ် စးထီၣ်လၢအနီၢ်ဆံး ခါ လံၤလံၤဒီး ကဲထီၣ်ကဲ အမဲရကၤ ထံဖိကီၢ်ဖိတဂၤန့ၣ်လီၤ.
အဝဲမ့ၢ်ကညီသးစၢ်တဂၤလၢ အမၤတၢ်သူၣ်ဝံၣ်သးဆၢလၢ အမဲရကၤထံကီၢ်ပူၤ ဒီး သူၣ်ဝံၣ်သးဆၢဝဲ ကိၤလၤဝါ ကျိၥ် တၢ်သးဝံၣ်တဖၣ် အမဲၥ်ညါ ကညီကျိၥ်စ့ၢ်ကီးသဝံၣ်ဝဲအိၣ် အဃိ ကညီသးစၢ်အကျါ မ့ၢ် ပှၤလၢ သူၣ်စၢ်သးဘီၣ်တဖၣ် ဘၣ်သူၣ်ဘၣ်သး ဝဲတဂၤန့ၣ်လီၤ.
ဘၣ်ဃးဒီးတၢ်ဂ့ၢ် ကဲထီၣ်သးအဖီခိၣ်, လၢကသ့ၣ်ညါလီၤတံၢ်ဝဲ တၢ်ဂ့ၢ်တၢ်ကျိၤအဂီၢ် (ခ့ၣ်အဲးစံၣ်-ကညီတၢ်ကစီၣ်) ဆဲးကျိးသံကွၢ်ဝဲ ပှၤလၢအဘူးဒီး (Star Htoo)တဖၣ်အဖၢမုၢ်အဂ့ၢ် ဒုးသ့ၣ်ညါဘၣ် ပှၤဒိကနၣ်တၢ်ဖိတဖၣ်န့ၣ်လီၤ.
