လါစဲးပထ့ဘၢၣ် ၂၂ သီ, ၂၀၂၆ နံၣ်, ခ့ၣ်အဲးစံၣ်
လီၢ်ကဝီၤကမျၢၢ်ပှၤလီၢ်အိၣ်မှံဖိလၢအိၣ်ကီးတရံးဒီး ကြုၢ်တုအဘၢၣ်စၢၤဟီၣ်ကဝီၤပူၤလၢအဃ့ၢ်ထီၣ်တဖၣ်အံၤ ဒ်သိးအဝဲသ့ၣ် ကက့ၤဆူအနီၢ်ကစၢ်ဒူသဝီတၢ်လီၢ်တၢ်ကျဲဒီးက့ၤဖံးအီၣ်မၤအီၣ်က့ၤတၢ်ကသ့အဂီၢ်န့ၣ် (KNPC)လၢအပၣ်ဃုၥ်ဝဲ (KNA), (DKBA) ဒီး(KNU/KNLA-PC)ဖီၣ်စုကဝဲၤကရူၢ်(၃)ဒူၣ်အံၤ တၢ်ရဲၣ်တၢ်ကျဲၤအိၣ်လၢကထံၣ်လိၥ်တဲသကိးတၢ်ဒီးကီၢ်စဲၣ်သုးမီၤစိရိၤအပဒိၣ် အဂ့ၢ်န့ၣ် သ့ၣ်ညါဘၣ်န့ၣ်လီၤ.
ကီးတရံးဒီးကြုၢ်တုဟီၣ်ကဝီၤဘၢၣ်စၢၤဒူသဝီတဖၣ်အပူၤ အပူၤကွံၥ်စှၤနံၣ်အခါခီဖျိတၢ်ဒုးတၢ်ယၤကဲထီၣ်ဒိၣ်ဒိၣ်မုၢ်မုၢ်အဃိ လီၢ်ကဝီၤကမျၢၢ်တဖၣ်ဘၣ်ဃ့ၢ်ထီၣ်ဟးအိၣ်ကဒုသးလၢတၢ်လီၢ်အဂၤတၢ်ဆၢကတီၢ်ထီၣ်ဘးဝဲလၢ(၃)နံၣ်ဃၣ်ဃၣ်လံဒီး ဟီၣ်ကဝီၤ ပူၤဖဲန့ၣ်ခီဖျိပယီၤသုးအတၢ်ဟူးတၢ်ဂဲၤဒီးကျိဖးဒိၣ်အတၢ်လီၤဘၣ်ယိၣ်အိၣ်ဒံးဝဲအဃိ ထိၣ်ကီၤကိ(KNU/KNLA-PC)တၢ်ပၢဟီၣ် ကဝီၤပူၤအမဲၥ်ညါကမျၢၢ်တနီၤန့ၣ်လဲၤဃ့ၢ်ထီၣ်အိၣ်ဝဲလၢထံဆၢကီၢ်ဆၢစ့ၢ်ကီးအိၣ်ဝဲ န့ၣ်လီၤ.
အဃိတကီၢ်ခါခဲအံၤလီၢ်ကဝီၤကမျၢၢ်လၢအဃ့ၢ်ထီၣ်တဖၣ်ဒ်သိးကက့ၤအိၣ်ဘၣ်က့ၤလၢအဟံၣ်အဃီ,ကန့ၢ်က့ၤမၤ အီၣ်မၤအီ ဘၣ်က့ၤတၢ်ဒ်အပူၤကွံၥ်ကသ့အဂီၢ်ဒီး တၢ်ဒုးတၢ်ယၤစ့ၢ်ကီးကဆိကတီၢ်ကွံၥ်သးအဂီၢ်န့ၣ် ဖဲလါစဲးပထ့ဘၢၣ် ၇ သီ (KNPC) တၢ်အိၣ်ဖှိၣ်အခါ ဘၣ်တၢ်ဆၢလီၤဝဲတၢ်ဂ့ၢ်အခိၣ်သ့ၣ်တထံၣ်အံၤလၢတၢ်ကမၤဖျါထီၣ်အမိၢ်လံၤမိၢ်ပှၢ်အဂ့ၢ်န့ၣ် သ့ၣ်ညါဘၣ်လၢ ပှၤလဲၤ ထီၣ်တၢ်အိၣ်ဖှိၣ်အံၤတဖၣ်အအိၣ်န့ၣ်လီၤ.
ဘၣ်ဃးတၢ်ဂ့ၢ်အံၤ ဖဲပခ့ၣ်အဲးစံၣ်-ကညီတၢ်ကစီၣ်ဆဲးကျိးသံကွၢ်ဝဲ(KNU/KNLA-PC)ပှၤကတိၤတၢ်ပၢ သုးခိၣ်ဒိၣ်စိ စီၤကၠီၤညိၣ် အခါစံးဝဲလၢ “ဖဲလါစဲးပထ့ဘၢၣ် ၇ သီ ပ(KNPC)မၤတၢ်အိၣ်ဖှိၣ်အခါန့ၣ် လီၤဆီဒၣ်တၢ်ကမျၢၢ်လၢအဘၣ်ဃ့ၢ်လၢအအိၣ်ဖဲ ကီးတရံးဒီး ကြုၢ်တုအဘၢၣ်စၢၤတဖၣ်အံၤ ဒ်သိးကပူၤဖျဲးထီၣ်လၢတၢ်ဒုးတယၤ,တၢ်ဖှီၣ်တၢ်နး,ကက့ၤအိၣ်ဆိးဖံးအီၣ်မၤအီၣ်က့ၤ လၢအဟံၣ်အဃီကသ့အဂီၢ်န့ၣ် ပအဲၣ်ဒိးမၤစၢၤလၢကီၢ်စဲၣ်ဒီတဘ့ၣ်ဘၣ်ဆၣ်ခီဖျိထံရူၢ်ကီၢ်သဲးတၢ်အိၣ်သးအဃိ ပမၤအီၤတတုၤ ခဲလၢၥ်ဘၣ်. အဃိဒ်ပဖီၣ်တုၤပဝၥ်တုၤအသိးန့ၣ် ပကတဲသကိးတၢ်ဒီးကီၢ်စဲၣ်ပဒိၣ်လၢအထီၣ်ခဲအံၤ,ပကတဲနၢ်ပၢၢ်အဝဲသ့ၣ်ဒီး ဒ်သိးပထံၣ်လိၥ်သးဒီးအဝဲသ့ၣ်ကန့ၢ်အဂီၢ်န့ၣ် ပဃုကျဲလၢပကထံၣ်သးမီၤနီၤ” အဂ့ၢ်န့ၣ် စံးဝဲဒၣ်န့ၣ်လီၤ.
ဒ်န့ၣ်အသိးကီးတရံးဒီးကြုၢ်တုဟီၣ်ကဝီၤလၢကမျၢၢ်ဘၣ်ဃ့ၢ်မှံဟးဖျိးဝဲအံၤန့ၣ်အိၣ်ဝဲဒၣ်လၢခ့ၣ်အဲယူၣ် ဒူပျၥ်ယၥ်ကီၢ်ရ့ၣ်(သုးက့ ၆) တၢ်ပၢဟီၣ်ကဝီၤပူၤအဃိ ဘၣ်ဃးပှၤလီၢ်အိၣ်ကမှံတၢ်ဂ့ၢ်အံၤ တၢ်ရဲၣ်တၢ်ကျဲၤအိၣ်စ့ၢ်ကီးလၢကထံၣ်လိၥ်တဲသကိးတၢ်ဒီး ခိၣ်နၢ် ဘၣ်ထွဲ ပှၤဘၣ်မူဘၣ်ဒါတဖၣ်အိၣ်ဝဲအဂ့ၢ်န့ၣ် (KNU/KNLA-PC)သုးခိၣ်ဒိၣ်စိ စီၤကၠီၤညိၣ် စံးစ့ၢ်ကီးဝဲန့ၣ်လီၤ.
“ပမ့ဘၣ်ကွၢ်လၢကီးတရံးဒီးကြုၢ်တုဘၢၣ်စၢၤန့ၣ်ဘၣ်ထွဲလိၥ်သးဒီး(KNU/KNLA-PC)စ့ၢ်.ပမ့ကွၢ်လၢကီၢ်ပယီၤပဒိၣ်တကပၤ စ့ၢ်ကီးမ့ၢ်ဝဲကီးတရံးကီၢ် ဆၣ်. မ့ဘၣ်ကွၢ်လၢခ့ၣ်အဲၣ်ယူၣ်တကပၤစ့ၢ်ကီးအတၢ်ပၢဟီၣ်ကဝီၤလီၤ. ဒ်သိးပတၢ်တိၥ်ပးလၢပကမၤ ပတုၥ်ကွံၥ်တၢ်ဒုးတၢ်ယၤ, ကမျၢၢ်စ့ၢ်ကီးကက့ၤအိၣ်ဘၣ်လၢအဟံၣ်အဃီ,ကဒိးန့ၢ်ဘၣ်က့ၤတၢ်ဖံးတၢ်မၤဒီး တၢ်အိၣ်မူခါဆူညါ ကလဲၤထီၣ်လဲၤထီအဂီၢ်တဆီ ဘၣ်တဆီန့ၣ်ပကမၤထဲတဂၤန့ၣ်ပမၤတသ့ဘၣ်.တၢ်ကရၢကရိလၢအဘၣ်ထွဲတဖၣ် အတၢ်နၢ်ပၢၢ် ကဘၣ်ဒ်သိးလိၥ်သးကန့ၢ် အဂီၢ်ဒီးတၢ်ဖံးတၢ်မၤတဖၣ်အံၤပမၤဖျါထီၣ်အမိၢ်လံၤမိၢ်ပှၢ်ကသ့အဂီၢ်န့ၣ် တၢ်ဆဲးလိၥ်သးမ့ၢ်ဂ့ၤ, တၢ်ဂုၥ်ကျဲးစၢးဃုကျဲလၢကတဲသကိး တၢ်အဂီၢ်မ့ၢ်ဂ့ၤန့ၣ်အိၣ်ဝဲဒၣ်ထီဘိလီၤ”အဂ့ၢ်န့ၣ် စံးအါထီၣ်ဝဲန့ၣ်လီၤ.
တကးဒံးဘၣ် ကီးတရံး- ကြုၢ်တုဟီၣ်ကဝီၤအမဲၥ်ညါ လီၢ်ကဝီၤကမျၢၢ်လၢအဂၤလၢဘၣ်ကွၢ်ဆၢၣ်မဲၥ်တၢ်ဒုးတၢ်ယၤဘၣ်ဃ့ၢ်မှံ ဟးဖျိး တဖၣ်ကက့ၤအိၣ်က့ၤ လၢအဟံၣ်အဃီအဂီၢ်(KNPC)တၢ်ပၥ်သးအိၣ်လၢ ကဂုၥ်ကျဲးစၢးဃုကျဲစ့ၢ်ကီးလၢအဝဲသ့ၣ်အဂီၢ် အဂ့ၢ်န့ၣ် ကရူၢ်အံၤပှၤဘၣ်မူဘၣ်ဒါတဖၣ် စံးဝဲန့ၣ်လီၤ.
ဘၣ်ဆၣ်လၢကမျၢၢ်ပှၤလီၢ်အိၣ်ကမှံဖိအဂီၢ်ဘၣ်ဃးတၢ်ကလဲၤထံၣ်လိၥ်တဲသကိးတၢ်ဒီးကီၢ်စဲၣ်သုးမီၤစိရိၤပဒိၣ်ဘၣ်ထွဲပှၤဘၣ်မူ ဘၣ်ဒါအံၤန့ၣ် မုၢ်နံၤမုၢ်သီဒီးတၢ်လီၢ်တၢ်ကျဲလၢတၢ်ကလဲၤထံၣ်လိၥ်သးအံၤခီန့ၣ်တၢ်ဆၢတဲၥ်လီၤဝဲလီၤလီၤဆီဆီ တအိၣ်ဝဲဒံးဘၣ် အဂ့ၢ်န့ၣ် သ့ၣ်ညါဘၣ်လၢပှၤဘၣ်မူဘၣ်ဒါတဖၣ်န့ၣ်လီၤ.
ဖဲအပူၤကွံၥ်တလါအံၤလါစဲးပထ့ဘၢၣ် ၁၇ သီအခါန့ၣ်စ့ၢ်ကီး ကီးတရံးဒီးကြုၢ်တုကီၢ်ဆၣ်ပူၤကမျၢၢ်ပှၤလီၢ်အိၣ်ကမှံဖိလၢအလဲၤ စံၣ်အိၣ်ကဒုသးဖဲထိၣ်ကီၤကိအံၤတဖၣ် (KNPC)ကရူၢ်အံၤ လၢဟံၣ်ခိၣ်(၅၀၀၀)ဘျဲၣ်) ပှၤနီၣ်ဂံၢ်(၁၅၀၀၀)ဃၣ်ဃၣ် အဂီၢ် လဲၤဟ့ၣ်လီၤဒံးဝဲဟုသး,သိ,ညၣ်ဒၢဃုၥ်ဒီးဂံၢ်ခီၣ်ထံးတၢ်အီၣ်တၢ်အီတၢ်ဆီၣ်ထွဲမၤစၢၤလၢအဂၤတဖၣ်ဒံးန့ၣ်လီၤ.
