KIC News

လါနိၣ်ဝ့ဘၢၣ် ၇သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)ဖၣ်အၣ်ကီၢ်ရ့ၣ်(နဘူ)တန့ခၠါကီၢ်ဆၣ်ထံဖိစီသဝီအပူၤ,ပှၤဃ့ၢ်တၢ်ဒုးလီၢ်အိၣ်ကဒုဖိသၣ်ပိၥ်ခွါသးနံၣ်(၂)နံၣ်လၢအလီၢ်မၢ်ဝဲတဂၤအံၤ,တုၤလၢခဲအံၤတၢ်တထံၣ်က့ၤဝဲဒံးဘၣ်အဂ့ၢ်,လီၢ်ကဝီၤပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဖိသၣ်ပိၥ်ခွါ(၂)နံၣ်လၢအလီၤမၢ်တဂၤအံၤအမံၤမ့ၢ်ဝဲ(စွဲထဲၣ်)ဒီးအဝဲအိၣ်ဆိးဝဲဟံၣ်ဘူးဝဲဒၣ်ကျဲမုၢ်ကပၤအဃိ,မဟါလါနိၣ်ဝ့ဘၢၣ်(၆)သီ,မုၢ်ထူၣ်(၁၁)နၣ်ရံၣ်အဆၢကတီၢ်လီၤမၢ်ဝဲသတူၢ်ကလၥ်အဖီခိၣ်,ထံဖိစီသဝီပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“ဖိသၣ်န့ၣ်န့ၢ်ထဲ(၂)နံၣ်ဒံးလီၤဟးခီၣ်တသ့ဒံးဘၣ်,အဝဲသ့ၣ်အိၣ်ဆိးဟံၣ်ဝဲဖဲသဝီပူၤန့ၣ်ဘူးဒီးကျဲမုၢ်ကပၤမီၤ.ဒီးကျဲမုၢ်တခီန့ၣ်သိလ့ၣ်,ဆဲးကဲးလ့ၢ်ထီၣ်လ့ၢ်လိၤလၢရၤမတံ,ဖၣ်အၣ်ဒီးတၢ်လီၢ်အဂၤဟးထီၣ်ဟးလီၤကိးနံၤဒဲးလီၤ.ဖိသၣ်န့ၣ်ညီနုၢ်အိၣ်လိၥ်ကွဲဝဲဖဲဟံၣ်မဲၥ်ညါန့ၣ်ထီဘိလီၤ.ဖဲမဟါ(၁၁)ရံၣ်န့ၣ်အိၣ်လိၥ်ကွဲဝဲဒီးအဖံဝံၤ,အဖံက့ၤလၢဟံၣ်လီၢ်ခံတစိၢ်တလီၢ်အဆၢကတီၢ်ဒီးဟဲက့ၤထီၣ်လၢဟံၣ်မဲၥ်ညါတဘျီ,တၢ်တထံၣ်အီၤလၢၤဘၣ်.လီၢ်မၢ်ကွံၥ်ဝဲသတူၥ်ကလၥ်အဃိန့ၣ်,ပှၤအါဂၤဆိကမိၣ်ပဲၥ်ထံနီၤဖးလၢပှၤဟးထီၣ်ဟးလီၤပှၤဒိးဆဲးကဲး,မ့တမ့ၢ်သိလ့ၣ်,ကါသ့ၣ်တဖၣ်န့ၣ်က့ၤကိးကွံၥ်ဝဲအီၤလီၤ”အဂ့ၢ်,စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ဖိသၣ်ပိၥ်ခွါအံၤလီၤမၢ်ကွံၥ်ဝဲသတူၢ်ကလၥ်အဖီခိၣ်,အမိၢ်အပၢ်ဒီးဖံဖုတဖၣ်အိၣ်ဝဲဒီးတၢ်သူၣ်ကိၢ်သးဂီၤဒီးဒုးသ့ၣ်ညါဝဲသဝီပှၤဘၣ်မူဘၣ်ဒါဒီးလူၤဃုက့ၤဝဲဒၣ်ဖိသၣ်အံၤအဖၢမုၢ်လီၤအဂ့ၢ်,ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဖိသၣ်ပိၥ်ခွါ(စွဲထဲၣ်)အံၤ,ခီဖျိအမိၢ်အပၢ်လဲၤဃုဖံးဃုမၤတၢ်လၢကီၢ်ကၠီၣ်တဲၣ်ပူၤအဃိအဝဲအိၣ်ဆိးဝဲဒီးအဖံအဖုအဂ့ၢ်,သ့ၣ်ညါဘၣ်န့ၣ်လီၤ. ဒီးအပူၤကွံၥ်အိၣ်ဆိးဝဲဒီးအဖံအဖုလၢကီးတရံးဝ့ၢ်တကပၤဘၣ်ဆၣ်ခီဖျိတၢ်ဒုးတၢ်ယၤဆူၣ်အဃိ,လဲၤဃီၤအိၣ်ကဒုဆိဝဲအသးလၢထံဖိစီသဝီဖဲဟံၣ်လၢဟံၣ်ကစၢ်တအိၣ်ဘၣ်တဖျၢၣ်အပူၤအဂ့ၢ်,ဒူသဝီပှၤဘၣ်မူဘၣ်ဒါတဖၣ်စံးစ့ၢ်ကီးဝဲဒၣ်န့ၣ်လီၤ. တကတီၢ်ဃီ,ထံဖိစီသဝီအံၤအပူၤကွံၥ်လါစဲးပထ့ဘၢၣ်အပူၤ,သုးကီၣ်ကး(အီၣ်စ့ၣ်ယၣ်)အသုးကျိၤပယီၤသုး(၂)ဂၤမၤပျံၤမၤဖုးဖီၣ်က့ၤကိးဝဲဖိသၣ်ပိၥ်မုၣ်(၁၂)နံၣ်တဂၤဖဲအလဲၤကွၢ်ကျီၢ်အခါကဲထီၣ်တ့ၢ်ဝဲအသးအမဲၥ်ညါ,(ယ့ၤခွဲတီၤ)မၠးပတဲၤကျဲအပူၤတၢ်တမျၥ်ဝဲလူၢ်ပျဲၢ်လီၢ်ကဝီၤပိၥ်မုၣ်လၢအဟဲက့ၤလၢကျဲတဂၤကဲထီၣ်တ့ၢ်ဒံးဝဲအသးအိၣ်ဝဲဒၣ်န့ၣ်လီၤ.

လါနိၣ်၀့ဘၢၣ် ၇ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)တၢ်ပၢဟီၣ်က၀ီၤအပူၤ လၢတၢ်ကဒုးလီၤပှီၢ်ကွံၥ်သုးမီၤစိရိၤ အဂီၢ်န့ၣ် ဖဲမဟါအနံၤ လၢ ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)အတၢ်တီခိၣ်ရိၣ်မဲအံၤတဆီ တၢ်ဒုးအိၣ်ဖျဲၣ်ထီၣ်ကဒီး၀ဲ ဂံၢ်ခီၣ်ထံးသုးတၢ်မၤလိဖိ(၈၀)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ဖဲမဟါလါနိၣ်၀့ဘၢၣ် ၆ သီအနံၤ လၢဒူသထူၣ်ကီၢ်ရ့ၣ်တၢ်လီၢ်တတီၤအပူၤ (KNLA)သုးက့ပှၤဘၣ်မူဘၣ်ဒါသုးခိၣ်သုးနၢ် တီခိၣ်ရိၣ်မဲ မၤ၀ဲ တၢ်ပျၢ်ဂံၢ်ခီၣ်ထံးသုးတၢ်မၤလိတၢ်ရဲၣ်တၢ်ကျဲၤတခါဒီး လၢဂံၢ်ခီၣ်ထံးသုးတၢ်မၤလိဘျီ၀ဲအံၤအပူၤန့ၣ်...

လါနိၣ်ဝ့ဘၢၣ်၆သီ, ၂၀၂၄နံၣ်, ခ့ၣ်အဲးစံၣ် ကီၢ်ပယီၤအပူၤပှၤလၢအမၤဟးဂီၤဝဲထံကီၢ်န့ၣ်,မ့ၢ်ဝဲသုးကီၣ်ကးကရူၢ်ကရၢအဃိ,သုးကီၣ်ကးအခိၣ်(မ့အီၣ်လဲၣ်)ဒီးအသုးကရူၢ်တဖုအံၤမ့တအိၣ်လၢၤဘၣ်သၢပျၢၤမး,တၢ်မုၣ်တၢ်ခုၣ်လၢကီၢ်ပယီၤထံလီၢ်ကီၢ်ပူၤအိၣ်ထီၣ်ဝဲဒၣ်ကသ့အဂ့ၢ်,ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢစံးဝဲဒၣ်န့ၣ်လီၤ. ဒ် UN,ASEAN ဒီးထံဂုၤကီၢ်ဂၤအတၢ်ဘၣ်ယိၣ်အိၣ်လၢ ကီၢ်ပယီၤတၢ်ပၢၢ်ဆၢအံၤကမၤဟးဂီၤက့ၤကီၢ်ပယီၤန့ၣ် တမ့ၢ်တၢ်လၢဘၣ် ဘၣ်ဒီး ပှၤလၢမၤဟးဂီၤကီၢ်ပယီၤန့ၣ် မ့ၢ်ဒၣ် မ့အီၣ်လဲၣ်ဒီးအသုးကရူၢ်လီၤအဃိန့ၣ် မ့အီၣ်လဲၣ်ဒီးအသုးကရူၢ်မ့ၢ်တအိၣ်လၢၤသၢပျၢၤမးကီၢ်ပယီၤပူၤတၢ်မုၥ်တၢ်ခုၣ်အိၣ်ထီၣ်ဝဲကသ့အဂ့ၢ်ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢအနဲၣ်ရွဲၣ်ခိၣ်ကျၢၢ်,ပဒိၣ်စီၤတၢ်ဒိၣ်မူစံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲ,မဟါလါနိၣ်ဝ့ဘၢၣ်(၅)သီအနံၤ,ဖဲ(K2C)ဒီး(NUG) ပၥ်ဖှိၣ်သးမၤဝဲတၢ်ကတိၤရှဲလဲတၢ်ဒီးတၢ်ကစီၣ်သန့ဝံၤအလီၢ်ခံဒ်အံၤန့ၣ်လီၤ. အဝဲစံးဝဲလၢ“(UN)),(ASEAN)ဃုၥ်ဒီးထံကီၢ်တနီၤလၢအနၢ်ပၢၢ်ပတၢ်ပၢၢ်ဆၢတၢ်ဂဲၤလိၥ်တနီၤန့ၣ်,ဆီၣ်ထွဲဝဲပှၤဖဲအကြၢးအဘၣ်န့ၣ်အိၣ်ဝဲလီၤ.ဘၣ်ဆၣ်သနၥ်က့တၢ်ဆီၣ်ထွဲမၤစၢၤလၢတတယၢၢ်ဃုလၢအလီၤတံၢ်လီၤဆဲးဒုပတဒိးန့ၢ်ဘၣ်ဒံးဘၣ်.လၢတၢ်န့ၣ်အဃိန့ၣ်,အလီၢ်အိၣ်ဒီးအရ့ဒိၣ်ဝဲလၢပကဘၣ်ကရၢကရိဒီးဒုးနၢ်ပၢၢ်ဝဲဒၣ်(UN)(ASEAN)ဃုၥ်ဒီးထံကီၢ်လၢအဆီၣ်ထွဲပှၤလၢဖီၣ်လစံၣ်အဖီခိၣ်တဖၣ်လၢ,ပတၢ်ပၢၢ်ဆၢအံၤအတၢ်အိၣ်န့ၣ်လီၤ.ပတၢ်ပၢၢ်ဆၢအံၤတမ့ၢ်တၢ်မၤဟးဂီၤထံကီၢ်ဘၣ်.ပှၤလၢမၤဟးဂီၤထံကီၢ်န့ၣ်မ့ၢ်ဒၣ်(မ့အီၣ်လဲၣ်)ဒီးအသုးကရူၢ်လီၤ.အဃိန့ၣ်(မ့အီၣ်လဲၣ်)ဒီးအသုးကရူၢ်တဖုအံၤမ့တအိၣ်လၢၤဘၣ်မး,တၢ်မုၥ်တၢ်ခုၣ်လၢဟီၣ်ကဝီၤအပူၤ,ထံလီၢ်ကီၢ်ပူၤဒီးဟီၣ်ခိၣ်ဒီဘ့ၣ်ကဲထီၣ်သးကသ့ဝဲလီၤ.”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ. တကတီၢ်ဃီ,ပကဘၣ်ပၥ်ဖျါထီၣ်န့ထံဂုၥ်ကီၢ်ဂၤသ့ၣ်တဖၣ်လၢကဘၣ်ပၥ်သူၣ်ပၥ်သးခီဖျိသုးကီၣ်ကးအတၢ်ဂိၥ်စုဂိၥ်ခီၣ်သ့ၣ်တဖၣ်န့ၣ်တမ့ၢ်လၢကဟဲစိၥ်န့ၢ်ကီၢ်ပယီၤတၢ်မုၥ်တၢ်ခုၣ်အမ့ၢ်အတီဘၣ်အသိး ASEAN စ့ၢ်ကီးသုတဆီၣ်ထွဲ မ့အီၣ်လဲၣ်ဒီးအသုးကရူၢ်လၢၤတဂ့ၤန့ၣ်အလီၢ်အိၣ်ဝဲသပှၢ်ကတၢၢ်အဂ့ၢ်...

လါနိၣ်ဝ့ဘၢၣ် ၆သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၆)ဒူပျၥ်ယၥ်ကီၢ်ရ့ၣ်တၢ်ပၢ,ဝီၢ်ရ့ၣ်ကီၢ်ဆၣ်ဟီၣ်ကဝီၤအပူၤတၢ်ဒုးကဲထီၣ်ဝဲခံသီတပယူၥ်ဃီလၢနိၣ်ခၠိနဲၣ်ပယီၤဒုးယၤသုးကလၢၤဒီးခိၣ်ဃၢၤတၢ်လီၢ်တဖၣ်အပူၤဒီးမဟါလါနိၣ်ဝ့ဘၢၣ်(၅)သီအနံၤအပူၤ,သုးကီၣ်ကးကဘီယူၤခးမၤဝဲတၢ်ခးလီၤတၢ်အိၣ်ဝဲအဂ့ၢ်,လီၢ်ကဝီၤဖိတဖၣ်စံးဝဲန့ၣ်လီၤ. စးထီၣ်ဖဲအပူၤကွံၥ်လါနိၣ်ဝ့ဘၢၣ်(၄)သီအနံၤအပူၤ,သုးကီၣ်ကးနိၣ်ခၠိနဲၣ်ဒုးယၤသုးကလၢၤ(စံနပ့ၤ)ဒီး(ကၠးပၣ်တီၤ)တၢ်လီၢ်(၃)တီၤအပူၤတၢ်ဒုးက့ၤဆူၣ်ထီၣ်ကဒါဝဲအမဲၥ်ညါ,သုးကီၣ်ကးတကပၤမၤဝဲကလံၤကျါတၢ်ခးလီၤတၢ်, အဝဲစံးဝဲလၢ“တၢ်ဒုးက့ၤဆူၣ်ထီၣ်ကဒါက့ၤစးထီၣ်လၢမဟါန့ၣ်လံ,ပယီၤသုးလၢအိၣ်ဝဲကလံၣ်အမျီၤသုးကလၢၤတဖၣ်န့ၣ်,ခးစိလီၤတၢ်အဃိ,ကျိဖးဒိၣ်လီၤတဲၥ်လၢပအိၣ်လိးရှါသဝီမုၢ်နုၥ်ဒံး.လၢခိၣ်ဃၢၤဟီၣ်ကဝီၤတဖၣ်အပူၤနါက့ၤလီၤတဲၥ်စ့ၢ်ကီးလီၤ.မ့မ့ၢ်လၢ(စံနပ့ၤ)သဝီတကပၤန့ၣ်ဟဲခးလီၤဝဲတၢ်ဒီးကဘီယူၤ(ယဟၣ်ယ့ၤ)န့ၣ်လီၤ.အကလုၢ်သီၣ်ဒီတဂီၤလီၤ.တၢ်ဘၣ်ဒိဘၣ်ထံးဒုပတသ့ၣ်ညါဒံးဘၣ်.ပသ့ၣ်ညါထဲတၢ်ခးလိၥ်သးတၢ်အိၣ်သးဒံးလီၤ.”အဂ့ၢ်,စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါ,ဒ်သိးကထီၣ်မၤန့ၢ်ကွံၥ်ဝဲနိၣ်ခၠိနဲၣ်ပယီၤဒုးယၤသုးကလၢၤအံၤအဂီၢ်,ကညီတၢ်ထူၣ်ဖျဲးသုးမုၢ်ဒိၣ်(KNLA)ဒီးတၢ်ပၢၢ်ဆၢသုးပၥ်ဖှိၣ်တကပၤကဝီၤကးတံၥ်ဃးဝဲ(နိၣ်ခၠိနဲၣ်ပယီၤဒုးယၤ)သုးကလၢၤအံၤအဃိ,တၢ်ဒုးဆူၣ်ထီၣ်ဝဲဒၣ်ဒီးအပူၤကွံၥ်ပယီၤသုးလၢအိၣ်(လိးရှါ)သုးကလၢၤတဖၣ်အံၤဂုၤက့ၤဝဲအလီၢ်ခံဟးထီၣ်ကွံၥ်ဝဲလၢအသုးကလၢၤအပူၤဝံၤက့ၤဆီလီၤက့ၤဝဲအသးလၢ(စံနပ့ၤ)သဝီခိၣ်ဃၢၤတၢ်လီၢ်တဖၣ်အပူၤအဖီခိၣ်,(KNLA)ဒီးတၢ်ပၢၢ်ဆၢသုးပၥ်ဖှိၣ်ကရူၢ်တကပၤကးတံၥ်ထီၣ်ခးဝဲအဝဲသ့ၣ်တဖၣ်အဃိ,တၢ်ဒုးဆူၣ်ထီၣ်ဝဲလၢခံခီခံကပၤအဘၢၣ်စၢၤအဂ့ၢ်,လီၢ်ကဝီၤဖိတဖၣ်စံးဝဲဒၣ်န့ၣ်လီၤ. တကးဒံးဘၣ်,သုးကီၣ်ကးအသုးကလၢၤလၢအိၣ်စီၤစုၤယံၤဝဲဒီး(ကၠးပၣ်တီၤ)ယ့ဒဝဲၢ်ကျဲမုၢ်ဖးဒိၣ်ထဲ(တတၢၣ်)တမံၤလၤ,လၢသုးကီၣ်ကးအ(စံၣ်ကူၤ)ပှၤဟဲထီၣ်မၤစၢၤတၢ်အဂၤ(၁၀၀)ဘျဲၣ်တၢ်လီၢ်အံၤ,တၢ်ပၢၢ်ဆၢသုးပၥ်ဖှိၣ်တကပၤလဲၤကးတံၥ်ထီၣ်ခးဝဲအဖီခိၣ်,တၢ်ဒုးဆူၣ်ထီၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ. လၢတၢ်န့ၣ်အဃိ,သုးကီၣ်ကးလၢအိၣ်ဝဲကလံၣ်တဖၣ်အံၤစ့ၢ်ကီးခးလီၤစၢၤဝဲတၢ်အမဲၥ်ညါ,အကဘီယူၤခးလီၤစၢၤစ့ၢ်ကီးတၢ်အဂ့ၢ်သ့ၣ်ညါဘၣ်န့ၣ်လီၤ. တကတီၢ်ဃီ,ခီဖျိသုးကီၣ်ကးခးလီၤစၢၤဝဲတၢ်ဒ်အံၤအဃိ,လိးရှါသဝီလၢသုးကီၣ်ကးတအိၣ်ဝဲလၢၤဘၣ်အလီၢ်အံၤ,လီၢ်ကဝီၤဖိတဖၣ်အိၣ်ဆိးဝဲတဘူၣ်လၢၤဘၣ်အသိး,သုးကီၣ်ကးက့ၤဆီလီၤအိၣ်ဆိးက့ၤဝဲအသး(စံနပ့ၤ)သဝီအံၤစ့ၢ်ကီးကမျၢၢ်လီၢ်ကဝီၤဖိတဖၣ်ဘၣ်ဃ့ၢ်ထီၣ်ကွံၥ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,အပူၤကွံၥ်လါနိၣ်ဝ့ဘၢၣ်(၄)သီအနံၤအပူၤနိၣ်တကီဃိၣ်သၢဖျၢၣ်ကျဲထံဃ့သဝီခိၣ်ဃၢၤတၢ်လီၢ်တဖၣ်အပူၤသုးကီၣ်ကး(ဂျဲးဖဲးတၢၣ်)ကဘီယူၤခံဘ့ၣ်ခးလီၤဝဲတၢ်ဆူတၢ်သူၣ်ထီၣ်လၢလီၢ်ကဝီၤဖိတဖၣ်တအိၣ်ဆိးဝဲလၢၤဘၣ်တၢ်လီၢ်တနီၤအပူၤအဃိ,တၢ်သူၣ်ထီၣ်တနီၤဘၣ်ဟးဂီၤဝဲအဂ့ၢ်,သ့ၣ်ညါဘၣ်ဒ်လီၢ်ကဝီၤဖိတဖၣ်စံးဝဲအသိးန့ၣ်လီၤ.

လါနိၣ်၀့ဘၢၣ် ၆ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)တၢ်ပၢဟီၣ်က၀ီၤအပူၤ လါအီးကထိဘၢၣ်တလါအတီၢ်ပူၤ တၢ်ဒုးကဲထီၣ်၀ဲ(၁၉)ဘျီဒီး ပယီၤသုးတကပၤသံဘၣ်ဒိဘၣ်ထံး၀ဲ(၄၇)ဂၤအဂ့ၢ်န့ၣ် ကီၢ်ရ့ၣ်တၢ်မၤနီၣ်စရီပူၤအသိးသ့ၣ်ညါဘၣ် န့ၣ်လီၤ. ဒူသထူၣ်ကီၢ်ရ့ၣ် ကၠဲးထိၣ်,ဘံလ့,သထူၣ်ဒီးဖၣ်အၣ်ကီၢ်ဆၣ်အပူၤ စးထီၣ်လါအီးကထိဘၢၣ် ၁ သီတုၤ ၃၁ သီ လၢတလါအတီၢ်ပူၤ န့ၣ် ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးပၥ်ဖှိၣ်ဒီးပယီၤသုးအဘၢၣ်စၢၤ တၢ်ခးလိၥ်သးကဲထီၣ်ခဲလၢၥ်အိၣ်၀ဲ (၁၉)ဘျီဒီး...

လါနိၣ်၀့ဘၢၣ် ၅ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ အပူၤကွံၥ်စှၤသီအခါ ခီဖျိပယီၤသုးကျိၤ နုၥ်လီၤဒီးတၢ်ဒုးကဲအဖီခိၣ် ကရူၢ်(၃)ဘ့ၣ်ကမျၢၢ်လၢအဃ့ၢ်ထီၣ်တဖၣ်တကီၢ်ခါခဲအံၤက့ၤဆူအဒူသ၀ီအဟံၣ်အဃီလံအဂ့ၢ်န့ၣ် ကီၢ်ရ့ၣ်ပှၤဘၣ်မူဘၣ်ဒါ စံး၀ဲန့ၣ်လီၤ. ဖဲလါအီးကထိဘၢၣ် ၃၀ သီတုၤလၢတလါအံၤလါနိၣ်၀့ဘၢၣ် ၃ သီအနံၤန့ၣ် ပယီၤသုးကျိၤနုၥ်လီၤ၀ဲဒၣ်လၢကၠဲးထိၣ်ကီၢ်ဆၣ် ၀ီၢ်ကျီၢ်, ဖွ့ဖူကၢ်,ဆီသုးခံကရူၢ်(၃)ဘ့ၣ်အံၤအပူၤတကးဒံးဘၣ် တၢ်ဒုးကဲထီၣ်စ့ၢ်ကီး၀ဲလၢပယီၤသုးဒီးဟီၣ်က၀ီၤ(KNLA)သုးရ့ၣ် ၃ သုးပၥ်ဖှိၣ်အဘၢၣ်စၢၤ...

လါနိၣ်ဝ့ဘၢၣ် ၄သီ, ၂၀၂၄နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်,ကၣ်ခၠါနၣ်ဘူရံၤသ့ၣ်ပှၢ်အပူၤဖိဒံဖိသၣ်ဒီးပိၥ်မုၣ်ပိၥ်မၢၤကညီကလုၥ်ဒူၣ်တနီၤလၢတၢ်ဖီၣ်ဃုၥ်ဝဲဒီးဖုအ့သံးတဖၣ်အံၤတၢ်ပျၢ်လီၤက့ၤဝဲအဂ့ၢ်,ဟီၣ်ကဝီၤအပူၤပှၤလၢအဟူးဂဲၤလၢပှၤကညီဖိဂ့ၢ်ဝီတဖၣ်စံးဝဲန့ၣ်လီၤ. ပှၤလၢတၢ်ပျၢ်လီၤကွံၥ်ဝဲတဖၣ်အံၤမ့ၢ်ဝဲဖိဒံဖိသၣ်ဒီးပိၥ်မုၣ်ပိၥ်မၢၤလၢအတၢ်ကမၣ်တအိၣ်ဘၣ်တဖၣ်ဒီး,တၢ်ပျၢ်လီၤကွံၥ်ဝဲအနီၢ်ဂံၢ်နီၢ်ဒွးထဲလဲၣ်ဒီးဆှၢကွံၥ်ဝဲတၢ်လီၢ်ဖဲလဲၣ်အဂ့ၢ်န့ၣ်,တၢ်တသ့ၣ်ညါဒံးဝဲဘၣ်အဂ့ၢ်,လီၢ်ကဝီၤပှၤဟူးဂဲၤလၢကညီကလုၥ်ဒူၣ်ဂ့ၢ်ဝီစီၤထံ၀ါစံးဝဲဒ်အံၤန့ၣ်လီၤ. အဝဲစံးဝဲလၢ“အခဲအံၤပှၤလၢတၢ်ကမၣ်တအိၣ်ဘၣ်တဖၣ်န့ၣ်သမံသမိးဝဲဝံၤပျၢ်လီၤကွံၥ်ဝဲတနီၤလံ,အိၣ်တ့ၢ်ထဲပှၤလၢအတၢ်ကမၣ်အိၣ်တဖၣ်န့ၣ်လီၤ.တၢ်ပျၢ်ကွံၥ်အဝဲသ့ၣ်လၢပှဲၤသီအနံၤလဲၣ်,ပှဲၤဂၤလဲၣ်ဒုတသ့ၣ်ညါလီၤတံၢ်ဒံးဘၣ်,ဖူအ့သံးဒီးအပျဲၢ်ခီၣ်ထံးအပှၤတဖၣ်ဒုအိၣ်ဒံးဒၣ်တၢ်လီၤတၢ်တပျၢ်လီၤဒံးဘၣ်.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ပှၤလၢတၢ်ဖီၣ်ဃုၥ်ဝဲဒီးဖုအ့သံးသ့ၣ်တဖၣ်အံၤမ့ၢ်ဒၣ်ပှၤမၤကမၣ်ဝဲဒၣ်သ့ၣ်ပှၢ်တၢ်သိၣ်တၢ်သီတၢ်ဘျၢဒီးအတၢ်ကမၣ်လၢအဂၤဒိၣ်ဒိၣ်မုၢ်မုၢ်တအိၣ်ဝဲဘၣ်အဃိ,တမ့ၢ်လၢတၢ်ကဟ့ၣ်အဝဲသ့ၣ်တဖၣ်တၢ်စံၣ်ညီၣ်ဒိၣ်ဒိၣ်မုၢ်မုၢ်ဘၣ်အဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. ဖဲအပူၤကွံၥ်လါစဲးပထ့ဘၢၣ်(၁၂)သီအနံၤန့ၣ်,ကၣ်ခၠါနၣ်ဘူရံၤကီၢ်ရ့ၣ်(Srinakarin Dam National Park)သ့ၣ်ပှၢ်အပူၤ,ကၠီၣ်တဲၣ်ပှၤဘၣ်မူဘၣ်ဒါဖီၣ်ဝဲကညီကလုၥ်ဒူၣ်ဖုအ့သံးဒီးအပျဲၢ်ပိၥ်ခွါ(၁၀)ဂၤ,ပိၥ်မုၣ်(၁၀)ဂၤ,ဖိသၣ်(၉)ဂၤဒီးကၠီၣ်တဲၣ်ထံဖိကီၢ်ဖိ(၁)ဂၤ,ခဲလၢၥ်(၃၁)ဂၤဒီးဆှၢဝဲဆူကၣ်ခၠါနၣ်ဘူရံၤတၢ်ဒုးဃၥ်အလီၢ်ဝံၤအလီၢ်ခံလါအီးကထိဘၢၣ်(၂၁)သီအနံၤအပူၤဖီၣ်ချူးကဒီးဝဲဖုအ့သံးအပှၤ(၁)ဂၤစ့ၢ်ကီးန့ၣ်လီၤ.ဒီးဖုအ့သံးအပှၤလၢတၢ်ဖီၣ်ချူးဝဲလၢအလီၢ်ခံကတၢၢ်တဂၤအံၤအဖိအမါတဖၣ်ဘၣ်တၢ်ဖီၣ်ချူးဝဲဖိဒီးအမါစးထီၣ်လၢလါစဲးပထ့ဘၢၣ်အခါလံၤလံၤလံအဂ့ၢ်,ကၠီၣ်တဲၣ်တၢ်ကစီၣ်တဖၣ်ပၥ်ဖျါဝဲန့ၣ်လီၤ. ဒ်ကၠီၣ်တဲၣ်တၢ်ကစီၣ်ပၥ်ဖျါဝဲအသိးန့ၣ်,ဖုအ့သံးဒီးအပှၤလၢတၢ်ဖီၣ်ချူးဝဲတဖၣ်အံၤမ့ၢ်ဝဲပှၤလၢအမၤဟးဂီၤသ့ၣ်ပှၢ်,လူၤမၤသံဆၣ်ဖိကီၢ်ဖိ,ဖီၣ်စုကဝဲၤခိၣ်စူကနၣ်အ့ၣ်လၢတဖိးမံသဲစး,နုၥ်လီၤအိၣ်ဆိးလၢကၠီၣ်တဲၣ်အပူၤလၢတဖိးမံသဲးစးဃုၥ်ဒီးတၢ်လူၤပိၥ်ထွဲဒိကနၣ်ကၠီၣ်တဲၣ်သ့ၣ်ပှၢ်တၢ်သိၣ်တၢ်သီတအိၣ်ဝဲတဖၣ်လီၤအဂ့ၢ်,ပၥ်ဖျါဝဲန့ၣ်လီၤ. ဒီးဒ်န့ၣ်အသိး,ဖုအ့သ့းလၢတီခိၣ်ရိၢ်မဲတၢ်ဒီးတၢ်ဖီၣ်ချူးအီၤတဂၤအံၤမ့ၢ်ပှၤတဂၤလၢတၢ်စူၢ်တၢ်နၥ်အီၤအိၣ်အါဝဲဒီးပှၤလၢအနၥ်ဝဲအီၤတဖၣ်အံၤမ့ၢ်ဝဲကညီကလုၥ်ဒူၣ်လၢအမ့ၢ်ကၠီၣ်တဲၣ်ထံဖိကီၢ်ဖိတဖၣ်တနီၤအသိး,တနီၤတခီမ့ၢ်ဝဲကညီကလုၥ်ဒူၣ်လၢတမ့ၢ်ကၠီၣ်တဲၣ်ထံဖိကီၢ်ဖိတဖၣ်ဘၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.

လါနိၣ်ဝ့ဘၢၣ် ၅သီ, ၂၀၂၄နံၣ်, ခ့ၣ်အဲးစံၣ်, ဒ်သိးခီကီၢ်ပှၤမၤတၢ်ဖိတဖၣ်ကဒိးန့ၢ်ဘၣ်ဖိးမံသဲးစးလံၥ်အုၣ်ကီၤသးလၢကအိၣ်ဆိးဖံးမၤအီၣ်အီလၢကၠီၣ်တဲၣ်ပူၤအဂီၢ်,တလါအံၤလါနိၣ်ဝ့ဘၢၣ်အတီၢ်ပူၤကၠီၣ်တဲၣ်ပှၤဘၣ်မူဘၣ်ဒါတဖၣ်ကအိးထီၣ်ဝဲတၢ်မၤ(CI)(Certificate_of_Identity)လံၥ်အုၣ်သးအလီၢ်ခံတီၤအဂ့ၢ်,ပှၤဟူးဂဲၤလၢခီကီၢ်ပှၤဂ့ၢ်ဝီပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ဘၣ်ဃးဒီးတၢ်ကအိးထီၣ်ဝဲ(CI)တၢ်မၤလံၥ်အုၣ်ကီၤသးတၢ်လီၢ်သ့ၣ်တဖၣ်အံၤန့ၣ်,ကၠီၣ်တဲၣ်ခီကီၢ်ပှၤမၤတၢ်ဖိကိၥ်တိၥ်ဝဲၤကျိၤခိၣ်စံးလီၤပၥ်ဖျါဝဲဖဲအပူၤကွံၥ်လါအီးကထိဘၢၣ်(၁၂)သီအနံၤ,လၢတၢ်မၤဝဲခီကီၢ်ပှၤမၤတၢ်ဖိဂ့ၢ်ဝီတၢ်အိၣ်ဖှိၣ်အပူၤအဂ့ၢ်,သ့ၣ်ညါဘၣ်န့ၣ်လီၤ. တၢ်လီၢ်ခံတီၤလၢတၢ်ကအိးထီၣ်ဝဲအံၤန့ၣ်မ့ၢ်ဝဲဒၣ်ဖဲကီၢ်ကၠီၣ်တဲၣ်ထံကီၢ်အခၢၣ်သး(စမိၤစခီ)ဒီး(စမိၤပရၣ်ကၣ်)တၢ်လီၢ်တဖၣ်အပူၤဒီးတၢ်ကအိးထီၣ်ဝဲတၢ်မၤ(CI)လံၥ်အုၣ်သးအဘျီဝဲအံၤန့ၣ်,ကမ့ၢ်ဝဲဒၣ်လၢ,ခီကီၢ်ပှၤမၤတၢ်ဖိလၢ,ကဘၣ်မၤအါထီၣ်ဝဲအလံၥ်အုၣ်ကီၤသး,(အသးနံၣ်)တဖၣ်အဂီၢ်ဃုၥ်ဒီး,ပှၤလၢအပတံထီၣ်ပၥ်ဝဲလံၥ်အုၣ်ကီၤသးတဖၣ်အဂီၢ်အဂ့ၢ်,ပှၤဟူးဂဲၤလၢခီကီၢ်ပှၤမၤတၢ်ဖိကမံးတံၥ်(JACBA)ပှၤနဲၣ်တၢ်အူမိကၠိစံးဝဲဒ်အံၤန့ၣ်လီၤ. အဝဲစံးဝဲလၢ“ကၠီၣ်တဲၣ်အပူၤတၢ်မၤန့ၢ်တ့ၢ်(CI)အလီၢ်န့ၣ်ခဲလၢၥ်အိၣ်ဝဲ(၈)တီၤန့ၣ်လီၤ.လၢကီၢ်ကၠီၣ်တဲၣ်ကလံၤစိးန့ၣ်အိၣ်ဝဲဖဲ(ကံၢ်မဲ),အခၢၣ်အသးခီန့ၣ်စမိၤစခီ(မဟါခၠဲ),(စမိၤပရၣ်ကၣ်)(ပထိထါနံ)မ့မ့ၢ်လၢကလံၤထံးတကပၤခီန့ၣ်(ရနီ)(စူးရၣ်ထါနံ)ဒီး(စိၤကျါ)န့ၣ်လီၤ.ခဲအံၤကအိးထီၣ်ဝဲတၢ်မၤလံၥ်အုၣ်သးအတၢ်လီၢ်ခံတီၤန့ၣ်မ့ၢ်ဝဲဖဲ(စမိၤစခီ)ဒီး(စမိၤပရၣ်ကၣ်)န့ၣ်လီၤ,သနါက့န့ၣ်တကီၢ်ခါခဲအံၤအဆိကတၢၢ်ကအိးထီၣ်ဆိဝဲလၢ(စမိၤစခီ)န့ၣ်လီၤ.အဝဲသ့ၣ်တခီတဲဝဲလၢကအိးထီၣ်ဝဲလံဘၣ်ဆၣ်န့ၣ်,မ့ၢ်ကအိးထီၣ်ဝဲမုၢ်နံၤမုၢ်သီလီၤတံၢ်လီၤဆဲးဒီး,အခါဖဲလဲၣ်ခီန့ၣ်ပတသ့ၣ်ညါဘၣ်ဒံးဘၣ်.ကအိးထီၣ်ဝဲအဘျီအံၤန့ၣ်,လၢပှၤပတံထီၣ်တၢ်ဖိတဖၣ်အဂီၢ်ဒီးပှၤလၢကမၤအါထီၣ်အလံၥ်လဲၢ်သးနံၣ်တဖၣ်အဂီၢ်ပၣ်ဃုၥ်ဝဲခဲလၢၥ်လီၤ”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,တၢ်ကအိးထီၣ်ဝဲတၢ်မၤ(CI)လံၥ်အုၣ်ကီၤသးအလီၢ်ဖဲ(စမိၤစခီ)အံၤန့ၣ်,ကအိးထီၣ်ဝဲတုၤလၢလါအ့ဖြ့ၣ်အပူၤအသိး,အိးထီၣ်ဝဲဖဲ(စမိၤစခီ)အပူၤအံၤန့ၣ်မ့ၢ်ဒ်သိးခီကီၢ်ပှၤမၤတၢ်ဖိဒ်အမ့ၢ်,ကီၢ်ပယီၤ,ကၣ်ဘီဒံယါ,လါအိၣ်,ဘံၣ်ယၣ်နၣ်ထံကီၢ်ခီကီၢ်ပှၤမၤတၢ်ဖိလၢအလံၥ်လဲၢ်သးနံၣ်လၢၥ်ဖဲလါအီးကထိဘၢၣ်(၃၁)တဖၣ်ကဒိးန့ၢ်မၤအါထီၣ်ဘၣ်အလံၥ်အလဲၢ်သးနံၣ်အဂီၢ်အဂ့ၢ်န့ၣ်, Director of Thai Labor Department (Somchai Morakotsriwan) စံးတ့ၢ်ဝဲလၢတၢ်မၤတၢ်အိၣ်ဖှိၣ်အပူၤအဂ့ၢ်(MigrantTimes)တၢ်ကစီၣ်ပၥ်ဖျါတ့ၢ်ဝဲဖဲအပူၤကွံၥ်လါအီးကထိဘၢၣ်(၂၄)သီအနံၤအိၣ်ဝဲဒၣ်န့ၣ်လီၤ. တကးဒံးဘၣ်,ဘၣ်ဃးဒီးတၢ်ကမၤဝဲ(CI)လံၥ်အုၣ်သးအံၤန့ၣ်,တၢ်ပဲၥ်ထံနီၤဖးဝဲလၢတၢ်မၤဝံၤမၤတဲၥ်ဆိဝဲန့ၢ်အဖီခိၣ်,တၢ်မၤကစၢ်အခိၣ်(အလုပ်ရှင်)တဖၣ်တီၣ်ထီၣ်ပၥ်ဝဲလံၥ်ဆူ(Prime Minister of...

လါနိၣ်ဝ့ဘၢၣ် ၅ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢမုၢ်တြီၢ်ကီၢ်ရ့ၣ်ဟီၣ်ကဝီၤအပူၤဖဲပူၤကွံၥ်လါအီးကထိဘၢၣ်(၁)သီတုၤ(၃၁)သီ,လါအီးကထိဘၢၣ်ဒီလါ အတီၢ်ပူၤတၢ်ဒုးကဲထီၣ်ဝဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)သုးက့နီၣ်ဂံၢ်(၅)ဒီးပယီၤသုးကီၣ်ကးအဘၢၣ်စၢၤခဲလၢၥ်အိၣ်ဝဲ(၁၃၆)ဘျီ,ပယီၤသုးကီၣ်ကးတကပၤအပှၤသံ(၂၉)ဂၤအဂ့ၢ်န့ၣ် ခ့ၣ်အဲၣ်ယူၣ်-မုၢ်တြီၢ်တၢ်ကစီၣ်ထုးထီၣ်ပၥ်ဖျါဝဲဖဲမဟါလါနိၣ်ဝ့ဘၢၣ်(၄)သီအနံၤန့ၣ်လီၤ. လၢလါအီးကထိဘၢၣ်ဒီလါအတီၢ်ပူၤခံခီခံကပၤတၢ်ဒုးကဲထီၣ်ဝဲ(၁၃၆)ဘျီဒ်အံၤအဖီခိၣ်ပယီၤသုးသံ(၂၉)ဂၤအကျါပၣ်ဃုၥ်သုးရ့ၣ်ခိၣ်တဂၤ,သုးရ့ၣ်ခိၣ်ခံတဂၤဒီးဒ်န့ၣ်အသိးပယီၤသုးဘၣ်ဒိစ့ၢ်ကီးဝဲအဂၤ(၃၀)အကျါပၣ်ဃုၥ်သုးဒ့ခိၣ်တဂၤစ့ၢ်ကီးန့ၣ်လီၤ. လၢန့ၣ်အမဲၥ် ညါပယီၤသုးကီၣ်ကးတၢ်သူၣ်ထီၣ်ဘၣ်ဟးဂီၤကွံၥ်ဝဲအိၣ်(၁၉)ဖျၢၣ်ဒီးသိလ့ၣ်ဘၣ်ဟးဂီၤကွံၥ်ဝဲတခိၣ်အဂ့ၢ်န့ၣ်တၢ်ပၥ်ဖျါအပူၤပၥ်ဖျါဝဲန့ၣ်လီၤ. လၢန့ၣ်အမဲၥ်ညါ(KNLA)သုးက့နီၣ်ဂံၢ်(၅)ဒီးသုးပၥ်ဖှိၣ်သ့ၣ်တဖၣ်ထီၣ်ဒုးမၤန့ၢ်ကွံၥ်ဝဲပယီၤသုးကီၣ်ကးသုးကလၢၤတဖျၢၣ်လၢအအိၣ်သူၣ်လီၤအသးဖဲသုးက့(၅)ဟီၣ်ကဝီၤဘုသိၣ်ကီၢ်ဆၣ်အပူၤတဖျၢၣ်လၢအမ့ၢ်ဝဲ(ခီပူး)သုးကလၢၤအံၤဃုၥ်ဒီးပယီၤသုးတၢ်စုကဝဲၤအါအါဂီၢ်ဂီၢ်အဂ့ၢ်န့ၣ်သ့ၣ်ညါဘၣ်န့ၣ်လီၤ. ဒ်န့ၣ်အသိးပယီၤသုးကီၣ်ကးအံၤတလါအတီၢ်ပူၤသူဝဲကလံၤကျါတၢ်ဒုးဟဲခးလီၤတၢ်ဒီးကဘီယူၤ,ဟဲတ့ၢ်လီၤမ့ၣ်ပိၢ်ဖးဒိၣ်ခဲလၢၥ်အိၣ်(၃၆၉)ဖျၢၣ်,ခးလီၤဝဲကျိဖးဒိၣ်(၄၄)ဖျၢၣ်ဆူကမျၢၢ်ဒူသဝီတၢ်အိၣ်တၢ်ဆိးလီၢ်ကျဲပူၤအဃိဘၣ်သံကမျၢၢ်(၃)ဂၤဒီးဘၣ်ဒိဝဲ(၅)ဂၤအသိးဘၣ်ဟးဂီၤကွံၥ်ဝဲကမျၢၢ်တၢ်ဖံးအီၣ်မၤအီၣ်လီၢ်ကျဲဒ်အမ့ၢ်စံၥ်လီၢ်ခုးလီၢ်,ကျီးလီၢ်ဒီးတၢ်ထူၣ်တၢ်ဘိသ့ၣ်တဖၣ်အါအါဂီၢ်ဂီၢ်န့ၣ်လီၤ. တကးဒံးဘၣ်ဘၣ်ဟးဂီၤကွံၥ်စ့ၢ်ကီးဝဲကမျၢၢ်တၢ်သူၣ်ထီၣ်ဒ်အမ့ၢ်ကမျၢၢ်ဟံၣ်(၉)ဖျၢၣ်,တၢ်ဘါယွၤကၠိဘျီၣ်ဒိၣ်(၁)ဖျၢၣ်,ကၠိတၢ်အီၣ်မ့ၤလီၢ်(၁)ဖျၢၣ်,တီၤဘျီၣ်ကၠိ(၁)ဖျၢၣ်,တီၤကၠိ(၁)ဖျၢၣ်,ဟံၣ်ဒွဲၣ်(၁)ဖျၢၣ်သ့ၣ်တဖၣ်အံၤအဂ့ၢ်န့ၣ်မုၢ်တြီၢ်လံၥ်တၢ်ပၥ်ဖျါပူၤအသိးသ့ၣ်ညါဘၣ်န့ၣ်လီၤ. ဒ်န့ၣ်အသိးခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ်သုးက့နီၣ်ဂံၢ်(၅)ဟီၣ်ကဝီၤအပူၤဖဲလါစဲးပထ့ဘၢၣ်(၁)သီတုၤအသီ(၃၀)လၢတလါအတီၢ်ပူၤ န့ၣ်တၢ်ဒုးကဲထီၣ်ဝဲလၢကညီဒီကလုၥ်တၢ်ထူၣ်ဖျဲးသုးမုၢ်ဒိၣ်သုးက့နီၣ်ဂံၢ်(၅)သုးပၥ်ဖှိၣ်ဒီးပယီၤသုးအဘၢၣ်စၢၤခဲလၢၥ်အိၣ်ဝဲ(၁၄၄)ဘျီ,ပယီၤသုးသံ(၇၄)ဂၤ,ဒီးဘၣ်ဒိ(၄၁)ဂၤအဂ့ၢ်န့ၣ်ခ့ၣ်အဲၣ်ယူၣ်မုၢ်တြီၣ်တၢ်ကစီၣ်ပၥ်ဖျါတ့ၢ်ဃၥ်ဝဲဖဲလါအီးကထိဘၢၣ်(၃)သီအနံၤန့ၣ်လီၤ.

လါနိၣ်၀့ဘၢၣ် ၄ သီ, ၂၀၂၄ နံၣ်, ခ့ၣ်အဲးစံၣ် ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တီခိၣ်ရိၣ်မဲ တၢ်ပၢၢ်ဆၢသုးပၥ်ဖှိၣ်ထီၣ်မၤန့ၢ်ကွံၥ် ခီပူးပယီၤသုးကလၢၤဝံၤအလီၢ်ခံ ပယီၤသုးလၢအဃ့ၢ်ဖျိးတဖၣ်လၢကက့ၤပၥ်ဖှိၣ်သးဒီး ဖၣ်ပူၣ်ဒုးယၤသုးကလၢၤအဂီၢ် ဂုၥ်ကျဲးစၢးဝဲဒၣ်အဂ့ၢ် သ့ၣ်ညါဘၣ်လၢကီၢ်ရ့ၣ်ပှၤဘၣ်မူဘၣ်ဒါအအိၣ်န့ၣ်လီၤ. ပယီၤသုးကီၣ်ကးအပှၤလၢတူၢ်တၢ်ဒုးတန့ၢ်ဒီးဃ့ၢ်ဖျိးကွံၥ်သ့ၣ်တဖၣ်အံၤလၢကက့ၤပၥ်ဖှိၣ်သးဒီးဖၣ်ပူၣ်ဒုးယၤသုးကလၢၤ ကရ့ၣ်နံၣ်ကိ(ကိး)ဝ့ၤနိၤသုးကလၢၤအဂီၢ်ဂုၥ်ကျဲးစၢးဝဲအဖၢမုၢ်ဒီး ပယီၤသုးသ့ၣ်တဖၣ်အံၤအသးတအိၣ်လၢကဟ့ၣ်လီၤသးဒီးယူၥ်ထီၣ်နီၣ်တယၢ်ဝါဘၣ်အဂ့ၢ် ခ့ၣ်အဲၣ်ယူၣ်-မုၢ်တြီၢ်ကီၢ်ရ့ၣ်အပှၤကတိၤတၢ်ပၢသုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံးဘၣ်ဝဲဒၣ် ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. အဝဲစံးဝဲလၢ“ဒုၣ်ဒါအသုးလၢအအိၣ်ဖဲ ခီပူးသုးကလၢၤ လၢတၢ်လဲၤထီၣ်ဒုးအီၤ,တူၢ်ဝဲတန့ၢ်ဘၣ်ဃ့ၢ်ထီၣ်ကွံၥ်သ့ၣ်တဖၣ်န့ၣ် ဂုၥ်ကျဲးစၢးက့ၤလူၤထီၣ်က့ၤဝဲဒၣ် ဖၣ်ပူၣ်ဒုးယၤသုးကလၢၤလၢအအိၣ်ဖဲ ကရ့ၣ်နံၣ်ကိ ပကိးလၢ ဝ့ၤနိၤန့ၣ်လီၤ. လၢကက့ၤပၥ်ဖှိၣ်သးအဂီၢ်ကျဲးစၢးဝဲသပှၢ်ကတၢၢ်န့ၣ်လီၤ....