KIC News

လါဒံၣ်စဲဘၢၣ် ၄သီ, ၂၀၂၅နံၣ်, ခ့ၣ်အဲးစံၣ်. ကီၢ်ကၠီၣ်တဲၣ်-ကီၢ်ပယီၤ ကီၢ်ဆၢ ရမၤတံဝ့ၢ်ကလံၤထံး တၢ်ဘၣ်ဘျုးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ်-(DKBA) တၢ်ပၢဟီၣ်ကဝီၤ ကၠီးခဲးတၢ်လီၢ်အပူၤ ကၠါဖၠၣ်တၢ်မၤလီၢ်အ Website domain တခါ ကီၢ်အမဲရကၤ FBI မၤန့ၢ်ဒီးပံးကွံၥ်ဝဲဒၣ်အဂ့ၢ် FBI ပၥ်ဖျါတ့ၢ်ဝဲဒၣ်ဖဲအပူၤကွံၥ်လါဒံၣ်စဲဘၢၣ်(၁၂)သီအနံၤန့ၣ်လီၤ. ဒ် FBI စၤဒံၤယ့ၤကိၤ ပၥ်ဖျါဝဲဒၣ်အသိးန့ၣ် အဝဲသ့ၣ်တၢ်ဃုသ့ၣ်ညါအဖီခိၣ် ကီၢ်ပယီၤပူၤ DKBA...

လါဒံၣ်စဲဘၢၣ်(၂)သီ, ၂၀၂၅နံၣ်, ခ့ၣ်အဲၣ်စံၣ်, ကီၢ်ကၠီၣ်တဲၣ်ကီၢ်ပယီၤကၢ်ဆၢကညီဘၣ်ကီဘၣ်ခဲဒဲကဝီၤအဒိၣ်ကတၢၢ်တဖျၢၣ်လၢအမ့ၢ်ဝဲမဲၢ်လး(ကိး)ဘဲကျီးဒဲကဝီၤအံၤခီဖျိတၢ်သူဝဲတၢ်မူၤတၢ်ဘှီးအဃိ,တနံၤအံၤတၢ်စၢၢ်လီၤကိၥ်မၤသံလီၤက့ၤနီၢ်ကစၢ်သးကဲထီၣ်ကဒီးဝဲအဂ့ၢ်,ဒဲကဝီၤဖိတဖၣ်စံးဝဲဒၣ်န့ၣ်လီၤ. တနံၤအံၤလါဒံၣ်စဲဘၢၣ်(၂)သီအနံၤဂီၤခီ(၃)နၣ်ရံၣ်အဆၢကတီၢ်,မဲၢ်လးဒဲကဝီၤ,(C1a)ကဝီၤဒ့ဖိစီၤဒံၣ်ဝါသးနံၣ်(၂၇)နံၣ်အံၤ,စၢၢ်လီၤကိၥ်မၤသံလီၤက့ၤဝဲအကစၢ်သးလၢအသကိးဟံၣ်ကဲထီၣ်ဝဲအသးအဂ့ၢ်,ကဝီၤဒ့ပှၤဘၣ်မူဘၣ်ဒါတဂၤစံးဝဲဒ်အံၤန့ၣ်လီၤ. အဝဲစံးဝဲလၢ“မဟါအလဲၤတူၢ်ငါမၤတၢ်မၤလၢတၢ်ချၢဖဲအဘူးဒီးကါကျဲခိၣ်ဃၢၤအံၤဒံး,ဟဲက့ၤဘျီဘၣ်ဒီအဝဲစးထီၣ်မၤလီၤကစၢ်သးကဘၣ်မ့ၢ်ဖဲမုၢ်နၤယိၥ်အဆၢကတီၢ်လီၤ.တမ့ၢ်လၢအကစၢ်ဟံၣ်ဘၣ်,စၢၢ်လီၤကိၥ်ဖဲအသကိးဟံၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,ပှၤစၢၢ်လီၤကိၥ်မၤသံလီၤက့ၤကစၢ်သးတဂၤအံၤအစိၣ်န့ၣ်ကဝီၤဒ့ဘံၣ်ဘၢပှၤဘၣ်မူဘၣ်ဒါတဖၣ်ထံၣ်က့ၤဝဲဖဲတဂီၤအံၤတၢ်ဟးထီၣ်ဟးလီၤကွၢ်တၢ်အဆၢကတီၢ်အဂ့ၢ်,စံးစ့ၢ်ကီးဝဲဒၣ်န့ၣ်လီၤ. ပှၤလၢအစၢၢ်လီၤကိၥ်မၤသံလီၤက့ၤကစၢ်သးတဂၤအံၤအပူၤကွံၥ်မ့ၢ်ဝဲပှၤသူတၢ်မူၤတၢ်ဘှီး,အီသံးအီမ့ၤတဂၤဒီးမ့ၢ်စ့ၢ်ကီးဝဲပှၤလၢဘၣ်အီတ့ၢ်ဝဲ(စဲၤကိၤ)ကသံၣ်နံၣ်လၢဖးယံၥ်တဂၤအဂ့ၢ်,သ့ၣ်ညါဘၣ်န့ၣ်လီၤ.ဒီးခီဖျိအဝဲသူဝဲတၢ်မူၤတၢ်ဘှီးအဃိ,မၤဝဲတၢ်စုဆူၣ်ခီၣ်တကးလၢအဟံၣ်ဖိဃီဖိအဖီခိၣ်,အိၣ်ဝဲခဲအံၤခဲအံၤအဂ့ၢ်,ပှၤလၢအိၣ်ဘူးဖဲန့ၣ်တဖၣ်စံးဝဲဒၣ်န့ၣ်လီၤ. မဲၢ်လးကညီဘၣ်ကီဘၣ်ခဲဒဲကဝီၤအံၤအပူၤကွံၥ်လါအီးကထိဘၢၣ်ဒီးလါနိၣ်ဝ့ဘၢၣ်အပူၤပှၤဒဲကဝီၤဖိစၢၢ်လီၤကိၥ်မၤသံလီၤကစၢ်သးကဲထီၣ်ဝဲ(၆)ဂၤအဂ့ၢ်,သ့ၣ်ညါဘၣ်လၢဒဲကဝီၤခိၣ်နၢ်တဖၣ်အအိၣ်န့ၣ်လီၤ. ပှၤစၢၢ်လီၤကိၥ်မၤသံလီၤက့ၤကစၢ်သး(၅)ဂၤအကျါ,ကဲထီၣ်တ့ၢ်ဝဲအသးလၢဒဲကဝီၤအပူၤ,ဟံၣ်ခိၣ်ဟံၣ်ဃၢၤဒီးတၢ်သူၣ်တၢ်ဖျးကျီးအပူၤအသိး,လၢအဂၤတဂၤတခီကဲထီၣ်တ့ၢ်ဝဲအသးလၢ(ကီၢ်ကၠီၣ်တဲၣ်)(ဆၤကဲကီၢ်ရ့ၣ်)တၢ်လဲၤဖံးလဲၤမၤကထံပိၥ်အကျီးပူၤအဂ့ၢ်,သ့ၣ်ညါဘၣ်န့ၣ်လီၤ. ဒီးပှၤလၢအစၢၢ်လီၤကိၥ်မၤသံလီၤသးတဖၣ်အံၤမ့ၢ်ဝဲသူၣ်စၢ်သးဘီၣ်လၢအသူတၢ်မူၤတၢ်ဘှီးဒီးသူၣ်ခ့သးပှၢ်လၢအတူၢ်ဘၣ်ဝဲတၢ်ဆါထီရီၤတဖၣ်အဂ့ၢ်,သ့ၣ်ညါဘၣ်ဒ်ဒဲကဝီၤပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ. ဒ်န့ၣ်အသိး,ဘၣ်ဃးဒီးတၢ်မၤသံလီၤကစၢ်သးအံၤမဲၢ်လးဒဲကဝီၤအပူၤ,အပူၤကွံၥ်(၂၀၁၇-၂၀၁၈)နံၣ်အပူၤ,ကဲထီၣ်တ့ၢ်ဝဲသးအါဝဲအဖီခိၣ်,တၢ်ကရၢကရိဘၣ်ထွဲတဖၣ်နုၥ်လီၤမၤဝဲတၢ်သ့ၣ်ညါတၢ်ပၢၢ်တၢ်ဟ့ၣ်ခီဟ့ၣ်နီၤဝံၤအလီၢ်ခံလီၤစှၤကွံၥ်ဝဲဘၣ်ဆၣ်,တနံၣ်အံၤ(၂၀၂၅)လၢၥ်အပူၤအါထီၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ.

လါဒံၣ်စဲဘၢၣ် ၁သီ, ၂၀၂၅နံၣ်, ခ့ၣ်အဲးစံၣ်, ကညီကီၢ်စဲၣ်-ကီၢ်ကၠီၣ်တဲၣ်ကီၢ်ဆၢကီၢ်ဆၣ်(၅)ဘ့ၣ်အပူၤတၢ်ဘံၣ်တၢ်ဘၢအဂီၢ်,သူမွဲထံကျိကၢၢ်နံၤဒီတကျိၤအပူၤချံတြဲၤတၢ်အိၣ်ခိးတၢ်လီၢ် တဖၣ်,ကၠီၣ်တဲၣ်တကပၤဘိးဘၣ်ရၤလီၤဝဲလၢကပံးဝဲတုၤလါဒံၣ်စဲဘၢၣ်(၆)သီအနံၤဝံၤအလီၢ်ခံ,တၢ်စိၥ်ဆှၢခီဝဲပှၤကညီအလဲဒိၣ်ထီၣ်ဝဲအါန့ၢ်ဒံးအလီၢ်အဂ့ၢ်,ကီၢ်ဆၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်စံးဝဲဒၣ်န့ၣ်လီၤ. အပူၤကွံၥ်လါနိၣ်ဝ့ဘၢၣ်(၃၀)သီအနံၤဂီၤခီအဆၢကတီၢ်,ကီၢ်ပယီၤတကပၤအကျိဖးဒိၣ်ချံလီၤတဲၥ်ဝဲလၢကီၢ်ကၠီၣ်တဲၣ်မဲၢ်ဆီးဝ့ၢ်,မဲၢ်ကိးက့သဝီအပူၤ(၅)ဖျၢၣ်ဒီးဘၣ်ဒိဘၣ်ထံးဝဲကမျၢၢ်လီၢ်ကဝီၤဖိ(၃)ဂၤအဂ့ၢ်,သ့ၣ်ညါဘၣ်န့ၣ်လီၤ. တၢ်ကဲထီၣ်သးဝံၤအလီၢ်ခံတနံၤဃီအတီၢ်ပူၤကီၢ်ဆၣ်(၅)ဘ့ၣ်ဃုၥ်ဒီးမဲၢ်ဆီးဝ့ၢ်အပူၤချံတၢ်ဟးထီၣ်က့ၤလီၤတဖၣ်,တၢ်ကးတံၥ်ဝဲတုၤလၢလါဒံၣ်စဲဘၢၣ်(၆)သီအနံၤအဂ့ၢ်,ကၠီၣ်တဲၣ်ပှၤဘၣ်မူဘၣ်ဒါတဖၣ်ထုးထီၣ်ပၥ်ဖျါဝဲဒၣ်န့ၣ်လီၤ. ဒီးတၢ်ကးတံၥ်ဝဲချံတြဲၤတၢ်အိၣ်ခိးတၢ်လီၢ်ဘၣ်ဆၣ်တနံၤအံၤဂီၤခီအတီၢ်ပူၤသူမွဲကျိထံကျိကၢၢ်နံၤဒီတကျိၤအပူၤချံတြဲၤတဖၣ်ဟးထီၣ်က့ၤလီၤဝဲဒ်ညီနုၢ်အသိးအိၣ်ဝဲအဂ့ၢ်,လီၢ်ကဝီၤကမျၢၢ်တဂၤစံးဝဲဒၣ်ဒ်အံၤန့ၣ်လီၤ. အဝဲစံးဝဲလၢ“တဲဝဲလၢပှၤပံးနါက့,တဲဝဲဒ်န့ၣ်လီၤတနံၤအံၤချံတြဲၤတၢ်အိၣ်ခိးလီၢ်တဖၣ်ယထံၣ်ပှၤဟးထီၣ်က့ၤလီၤဒ်ညီနုၢ်အသိးလီၤ.”အဂ့ၢ်စံးဝဲဒၣ်န့ၣ်လီၤ. အပူၤကွံၥ်ချံတြဲၤတၢ်အိၣ်ခိးလီၢ်တဖၣ်အံၤစိၥ်ခီဆှၢဝဲပှၤကညီတဂၤန့ၣ်,ဟံဝဲစ့တဂၤလၢစ့ယိၤ(၈၀၀)ဘးအိၣ်ဝဲဘၣ်ဆၣ်,တကီၢ်ခါခဲအံၤတၢ်အိၣ်သးအဖီခိၣ်,တၢ်ဟးထီၣ်က့ၤလီၤအဂီၢ်ချံလဲထီၣ်ဝဲတဂၤ(၉၀၀)ဘးအဂ့ၢ်,သ့ၣ်ညါဘၣ်န့ၣ်လီၤ. လၢန့ၣ်အမဲၥ်ညါ,ပှၤလၢအဖီၣ်ယိၤဒိၣ်ကီၢ်စဲၣ်ဒီးမတလ့ကီၢ်ခီဒိၣ်(၁၃)ဒီး(၉)တၢ်ဂီၤခိၣ်တဖၣ်,တၢ်ဃ့ဝဲအီၤချံပှ့ၤလၢ(၁၀၀၀)ကထိဘးဆူဖီခိၣ်အဂ့ၢ်,သူမွဲကျိကၢၢ်နံၤပှၤလၢအဘူးဒီးချံတြဲၤတၢ်အိၣ်ခိးလီၢ်တဂၤစံးဝဲဒၣ်န့ၣ်လီၤ. အပူၤကွံၥ်လါအီကူးအပူၤကီၢ်ပယီၤပူၤဒုးယၤတၢ်သဘံၣ်သဘုၣ်အဃိ,တၢ်ပတုၥ်ကွံၥ်ဝဲကီၢ်ကၠီၣ်တဲၣ်ကီၢ်ပယီၤကီၢ်ဆၢတၢ်ရ့လိၥ်မုၥ်လိၥ်တိၤနီၢ်ဂံၢ်(၂)ဒီးလီၢ်ခံ,တၢ်စိၥ်ဆှၢခီဝဲတၢ်ဖိတၢ်လံၤလၢချံတြဲၤတၢ်အိၣ်ခိးလီၢ်တဖၣ်အဃိ,တၢ်ကွၢ်ဟုၣ်ကွၢ်စုၣ်က့ၤဝဲလၢချံတြဲၤတၢ်အိၣ်ခိးလီၢ်တဖၣ်အါထီၣ်ဝဲဒၣ်န့ၣ်လီၤ. တကးဒံးဘၣ်,အပူၤကွံၥ်လါနိၣ်ဝ့ဘၢၣ်ထီၣ်သီအပူၤပယီၤသုးကရူၢ်တကပၤနုၥ်လီၤသမံသမိးဝဲတၢ်လၢရၤမတံဝ့ၢ်ကီၢ်ဆၢဖီၣ်စုကဝဲၤကရူၢ်ကရၢချံတြဲၤတၢ်အလီၢ်တဖၣ်အပူၤအိၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ. တကတီၢ်ဃီ,လါနိၣ်ဝ့ဘၢၣ်(၃၀)သီအနံၤအပူၤ,ခီဖျိကၠီၣ်တဲၣ်တကပၤကမျၢၢ်တၢ်ဘၣ်ဒိဘၣ်ထံးအိၣ်ထီၣ်ဝဲအဃိ,ကၠီၣ်တဲၣ်ပှၤဘၣ်မူဘၣ်ဒါတဖၣ်နဲၣ်လီၤဝဲလၢတၢ်ကပံးကွံၥ်ဖိးဖရၣ်,အူးဖၣ်,ထၣ်စီၤယါ,မဲၢ်ရမၣ်ဃုၥ်ဒီးမဲၢ်ဆီးဝ့ၢ်ကီၢ်ဆၣ်(၅)ဘ့ၣ်အပူၤချံတၢ်အိၣ်ခိးတြဲၤတဖၣ်အဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,ကီၢ်ပယီၤတကပၤတၢ်ဒုးတၢ်ယၤတၢ်အိၣ်သးဒီးကျိဖးဒိၣ်လီၤတဲၥ်လၢကၠီၣ်တဲၣ်ပူၤအဃိ,မဲၢ်ကိးက့သဝီပူၤတကီၢ်ခါခဲအံၤကမျၢၢ်လီၢ်ကဝီၤဖိလၢအိၣ်ဘူးဒီးသူမွဲကျိကၢၢ်နံၤတဖၣ်မုၢ်ဆါအဆၢကတီၢ်တၢ်အိၣ်သးအဖီခိၣ်ဘၣ်အိၣ်ဝဲလၢတၢ်ပလီၢ်ပဒီသးအပူၤဒီး,ဘၣ်ဃ့ၢ်ထီၣ်မံဝဲလၢမုၢ်နၤခီအိၣ်ဝဲအမဲၥ်ညါ,လ့က့ၣ်ကိၥ်,မ့လဲၣ်ပၤဟီၣ်ကဝီၤကမျၢၢ်ပှၤဃ့ၢ်တၢ်ဒုးလီၢ်အိၣ်ကဒုဖိတဖၣ်စ့ၢ်ကီးဘၣ်ဃ့ၢ်ထီၣ်မံဝဲလၢသူမွဲကျိကၢၢ်နံၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ.

လါနိၣ်ဝ့ဘၢၣ် ၃၀သီ, ၂၀၂၅နံၣ်, ခ့ၣ်အဲးစံၣ်, တနံၤအံၤလါနိၣ်ဝ့ဘၢၣ်၃၀သီ,ဂီၤခီ(၉)နၣ်ရံၣ်ဘျဲၣ်အဆၢကတီၢ်ပယီၤသုးကရူၢ်ခးလီၤကျိဖးဒိၣ်လီၤတဲၥ်ဝဲလၢကီၢ်ကၠီၣ်တဲၣ်မဲၢ်ကိးက့သဝီပူၤအဃိ,ဘၣ်ဒိဝဲလီၢ်ကဝီၤကမျၢၢ်ဖိသၣ်(၂)ဂၤဒီးသးပှၢ်(၁)ဂၤအဂ့ၢ်,သ့ၣ်ညါဘၣ်န့ၣ်လီၤ. ဂီၤခီအတီၢ်ပူၤပယီၤသုးခးလီၤတၢ်လီၤတဲၥ်ဝဲလၢကီၢ်ကၠီၣ်တဲၣ်အပူၤ(၅)ဖျၢၣ်ဘၣ်ဝဲဟံၣ်,တၢ်အိၣ်တၢ်ဆိးတၢ်သူၣ်ထီၣ်(တါယါ)တဖျၢၣ်အမဲၥ်ညါ,ပှၤငါအိၣ်ဟံၣ်တနီၤဘၣ်ဒိဝဲအဂ့ၢ်,သ့ၣ်ညါဘၣ်န့ၣ်လီၤ. ပယီၤသုးခးလီၤတၢ်လီၤတဲၥ်လၢကီၢ်ကၠီၣ်တဲၣ်ပူၤတၢ်ဘၣ်ဒိဘၣ်ထံးအိၣ်ဝဲအဖီခိၣ်,ပှၤမၤစၢၤပှၤဃ့ၢ်တၢ်ဒုးလီၢ်အိၣ်ကဒုပိၥ်ခွါလၢအိၣ်ဘူးဖဲန့ၣ်တဂၤစံးဝဲဒ်အံၤန့ၣ်လီၤ. အဝဲစံးဝဲလၢ“မ့လဲၣ်ပၤဒီးမဲၢ်ကိးက့အိၣ်ဘူးလိၥ်သးကွၢ်လိၥ်မဲၥ်လီၤ.ပယီၤသုးခးလီၤတၢ်လီၤတဲၥ်ဝဲလၢကၠီၣ်တဲၣ်တကပၤ(၅)ဖျၢၣ်န့ၣ်လီၤ.ဘၣ်ဒိဖိသၣ်(၂)ဂၤတၢ်ဘၣ်ဆှၢဝဲဆူတၢ်ဆါဟံၣ်န့ၣ်လီၤ.မ့မ့ၢ်သးပှၢ်တဂၤဘၣ်ဒိဝဲအစုန့ၣ်လီၤ”အဂ့ၢ်စံးဝဲဒၣ်န့ၣ်လီၤ. ပယီၤသုးကရူၢ်အံၤတကီၢ်ခါခဲအံၤမၤဝဲဒြိ,ကဘီယူၤတၢ်ထီၣ်ဒုးလၢသူမွဲကျိကၢၢ်နံၤလီၢ်အိၣ်ကဒုဖိတဖၣ်အိၣ်ဆိးတၢ်လီၢ်တၢ်ကျဲတဖၣ်အပူၤအိၣ်ဝဲအဃိ,မုၢ်ဆါအဆၢကတီၢ်အိၣ်ဝဲလၢတၢ်ပၥ်ပှၤဃ့ၢ်တၢ်ဒုးလီၢ်အိၣ်ကဒုဖိအလီၢ်ဘၣ်ဆၣ်,မုၢ်နၤအဆၢကတီၢ်ဃ့ၢ်ထီၣ်မံဝဲဒၣ်လၢသူမွဲကျိကၢၢ်နံၤအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,တၢ်လီၢ်ဖဲန့ၣ်သ့ၣ်တဖၣ်အပူၤတၢ်ဒုးတၢ်ယၤအိၣ်ဝဲဒီးပယီၤသုးတကပၤခးလီၤဝဲကျိဖးဒိၣ်(၂)နၣ်ရံၣ်တဘျီမ့တမ့ၢ်(၃)နၣ်ရံၣ်တဘျီတယူၥ်ဃီအိၣ်ဝဲအဃိ,ကိးနံၤဒဲးတၢ်ခးလိၥ်သးအိၣ်ဝဲအဂ့ၢ်,ပှၤမၤစၢၤပှၤဃ့ၢ်တၢ်ဒုးလီၢ်အိၣ်ကဒုဖိတဖၣ်စံးဝဲဒၣ်န့ၣ်လီၤ.

လါနိၣ်၀့ဘၢၣ် ၂၉သီ, ၂၀၂၅နံၣ်, ခ့ၣ်အဲးစံၣ်, ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)တကပၤဖီၣ်ကတီၤဃၥ်ဝဲ(DKBA)သုးဖိသံၣ်ဖိတဖၣ်ဒီးဆှၢက့ၤကဒါက့ၤဝဲဝံၤအလီၢ်ခံ,(DKBA)တကပၤထုးကွံၥ်ဝဲတၢ်ဘိးဘၣ်ရၤလီၤတၢ်ကးတံၥ်ဖလူ,ဂီၤလ့ၤ,စူးကလံကျဲတၢ်ဟးထီၣ်က့ၤလီၤအဂ့ၢ်,ထုးထီၣ်ပၥ်ဖျါက့ၤဝဲဒၣ်ဖဲတနံၤအံၤလါနိၣ်ဝ့ဘၢၣ်(၂၉)သီအနံၤန့ၣ်လီၤ. ဒံၣ်မိၣ်ကရ့ၣ်စံၣ်တၢ်ဘၣ်ဘျူးကညီသုးမုၢ်ဒိၣ်(DKBA)အတၢ်ဘိးဘၣ်ရၤလီၤအပူၤ,လၢတၢ်ကွၢ်က့ၤဝဲဟီၣ်ကဝီၤတၢ်မုၥ်တၢ်ခုၣ်အဂီၢ်အဖီခိၣ်,ဘၣ်ဃးအပူၤကွံၥ်လါနိၣ်ဝ့ဘၢၣ်(၂၆)သီအနံၤအပူၤတၢ်ဘိးဘၣ်ရၤလီၤအံၤတၢ်ထုးကွံၥ်ဝဲအဂ့ၢ်,ပၥ်ဖျါဝဲဒၣ်န့ၣ်လီၤ. ဒီးခီဖျိတၢ်ဆှၢက့ၤဝဲသုးဖိသံၣ်ဖိဒီးစုကဝဲၤပီးလီတဖၣ်ခဲလၢၥ်လံအဃိ,အလီၢ်တအိၣ်လၢကဆဲးပံးဝဲကျဲဘၣ်အဖီခိၣ်တၢ်အိးထီၣ်က့ၤတၢ်ဟးထီၣ်က့ၤလီၤဒ်ညီနုၢ်သ့အသိးအဂ့ၢ်,(DKBA)သုးဂ့ၢ်ဝီခိၣ်သုးခိၣ်ကျၢၢ်ဖိစီၤစ့ၤဝ့စံးဘၣ်ခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ. “ပထုးထီၣ်တၢ်ကစီၣ်လီၢ်ခံနါက့တၢ်ဟးထီၣ်က့ၤလီၤအိၣ်ဝဲလီၤ.ဒ်သိးပပှၤဒီးစုကဝဲၤတဖၣ်နါက့တၢ်က့ၤဟ့ၣ်က့ၤပှၤခဲလၢၥ်လံအဃိ,ခဲအံၤခီတလိၣ်လၢၤဘၣ်အဖီခိၣ်တၢ်ထုးကွံၥ်ဝဲတၢ်ရၤလီၤတၢ်ကလုၢ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. အပူၤကွံၥ်လါနိၣ်ဝ့ဘၢၣ်(၂၁)သီအနံၤ,မ့လဲၣ်ပၤဟီၣ်ကဝီၤအပူၤတၢ်ဒုးကဲထီၣ်လၢကညီတၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးကရူၢ်အဘၢၣ်စၢၤအပူၤ(DKBA)သုးခိၣ်နဲၤလွဲၤကရူၢ်ကရၢဒီးအပှၤတဖၣ်အိၣ်ပှိၤဝဲပယီၤသုးဒီးမၤသီၣ်ထီၣ်ကျိၣ်ချံပှၥ်သၣ်အဃိ,(KNLA)နုၥ်လီၤဖီၣ်ကတီၤကွံၥ်ဝဲ(DKBA)အပှၤလၢအဟံးန့ၢ်ဝဲအီၤလဲတၢ်လံၣ်အီၣ်လီအီၣ်ကျိၣ်စ့တၢ်ဖံးတၢ်မၤလီၢ်အတၢ်ဘံၣ်တၢ်ဘၢတဖၣ်ဃုၥ်ဒီး(DKBA)ကရူၢ်ကရၢအဂၤ(၂၀၀)ဘျဲၣ်ကဲထီၣ်တ့ၢ်ဝဲအသးန့ၣ်လီၤ. ဒီး(DKBA)အပှၤလၢ(KNLA)ဖီၣ်ကတီၤဃၥ်ဝဲသ့ၣ်တဖၣ်အံၤ,အပူၤကွံၥ်လါနိၣ်ဝ့ဘၢၣ်(၂၈)သီအနံၤတၢ်ဆှၢက့ၤကဒါက့ၤဝဲအီၤလၢ(ဆိၤစံမၠဲၤ)လီၢ်ခၢၣ်သးအပူၤဃုၥ်ဒီးစုကဝဲၤတဖၣ်အိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. (KNLA)နုၥ်လီၤဖီၣ်ကတီၤဝဲမ့လဲၣ်ပၤအိၤလဲတၢ်လံၣ်အီၣ်လီအီၣ်တၢ်ဖံးတၢ်မၤလီၢ်အံၤ,တရူးထံဖိကီၢ်ဖိဃုၥ်ဒီးထံဂုၤကီၢ်ဂၤဖိအဂၤတဖၣ်(၆၀၀)ဘျဲၣ်စံၢ်နုၥ်ဝဲလၢကၠီၣ်တဲၣ်အပူၤအိၣ်ဝဲဒီးတနီၤခီဖျိကၠီၣ်တဲၣ်တကပၤတတူၢ်လိၥ်ဝဲဘၣ်အဃိ,အိၣ်ကတၥ်ထီဝဲလၢသူမွဲကျိကၢၢ်နံၤအဂၤ(၃၀၀)ဘျဲၣ်ဒံးအမဲၥ်ညါ,ပှၤလၢကဘၣ်ဟးထီၣ်ကွံၥ်အဝဲလၢတၢ်ဖံးတၢ်မၤလီၢ်ပူၤတဖၣ်အိၣ်ဒံးဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,တကီၢ်ခါခဲအံၤမ့လဲၣ်ပၤ,မဲၢ်ဝါခံ,အ့ကၠ့မၠဲၤခိၣ်ဃၢၤတၢ်လီၢ်တဖၣ်အပူၤတၢ်ဒုးကဲထီၣ်ဝဲလၢပယီၤသုးကရူၢ်ဒီးတၢ်ပၢၢ်ဆၢသုးပၥ်ဖှိၣ်အဘၢၣ်စၢၤတပယူၥ်ဃီအိၣ်ဝဲအသိး,ပယီၤသုးတကပၤသူဝဲဒြိ,ကဘီယူၤဒီးကျိဖးဒိၣ်တဖၣ်အိၣ်ဝဲအဂ့ၢ်,ဟီၣ်ကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.

လါနိၣ်ဝ့ဘၢၣ် ၂၈သီ, ၂၀၂၅နံၣ်, ခ့ၣ်အဲးစံၣ်. ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်-KNLA က့ၤဟ့ၣ်ကဒါက့ၤ တၢ်ဘၣ်ဘျုးဒံၣ်မိၣ်ကရ့ၣ်စံၣ်-DKBA အပှၤသုးဖိဒီးတၢ်ကစုကဝဲၤလၢ ဖီၣ်တ့ၢ်ဝဲသ့ၣ်တဖၣ်အဂ့ၢ် သ့ၣ်ညါဘၣ်လၢ DKBA ခိၣ်နၢ်ဒိၣ်ထီအအိၣ်န့ၣ်လီၤ. ဖဲအပူၤကွံၥ်လါနိၣ်ဝ့ဘၢၣ် ၂၁သီအနံၤ တၢ်ဒုးကဲထီၣ်ဝဲလၢ KNLAဒီး သုးကရူၢ်အပှၤအဘၢၣ်စၢၤဖဲ အ့ကၠ့မၠဲၣ်ဒီးမ့လဲၣ်ပၤဟီၣ်ကဝီၤအဆၢကတီၢ်ခီဖျိ KDBA အပှၤလၢအိၣ်ဖဲသဝီကပၤလၢအိၣ်ခိးကၠါဖၠၣ်တၢ်ဖံးတၢ်မၤလီၢ်စှၤဂၤခးပိၢ်ကျိအဃိ KNLA တၢ်ပၢၢ်ဆၢသုးပၥ်ဖှိၣ်ဝၣ်နုၥ်ဖီၣ်အဝဲသ့ၣ်ဝံၤဟံးန့ၢ်ကွံၥ်ဝဲတၢ်စုကဝဲၤန့ၣ်လီၤ. တၢ်န့ၣ်ဝံၤအလီၢ်ခံ ဖဲမဟါလါနိၣ်ဝ့၂၇သီအနံၤန့ၣ် DKBAသုးဖိအဂၤ(၁၀၀)ဘျဲသ့ၣ်တဖၣ် KNLA က့ၤဟ့ၣ်လီၤက့ၤဆူ...

လါနိၣ်ဝ့ဘၢၣ် ၂၇ သီ, ၂၀၂၅ နံၣ်, ခ့ၣ်အဲးစံၣ် ကညီကီၢ်စဲၣ် ဖၣ်အၣ်ဝ့ၢ်ပူၤ စှၤသီအတီၢ်ပူၤအံၤ (ကၠါဖၠၣ်)ပှၤမၤတၢ်ဖိလၢအိၣ်ဃ့ၢ်ထီၣ်လၢကီၢ်ကၠီၣ်တဲၣ်-ကီၢ်ပယီၤကီၢ်ဆၢ မၠၣ်ဝတံၣ် ဟီၣ်ကဝီၤ (KK park)အပူၤတဖၣ် နုၥ်လီၤအိၣ်ဆိးဝဲလၢ(Hotel)ပူၤဟဲအါထီၣ်ဝဲအဃိ (ဟိၤထဲ)လၢအိၣ်ဝ့ၢ်,ဝ့ၢ်ချၢတဖၣ် ပှဲၤဝဲ ခဲလၢၥ်ဃၣ်ဃၣ် အဂ့ၢ်န့ၣ် ကမျၢၢ်လၢအိၣ်ဝ့ၢ်ပူၤတဖၣ် စံးဝဲန့ၣ်လီၤ. ကၠါဖၠၣ်ပှၤမၤတၢ်ဖိလၢအိၣ်ဃ့ၢ်ထီၣ်လၢ(KK park)အပူၤတဖၣ်အါဒၣ်တက့ၢ်န့ၣ်မ့ၢ်ဝဲယိၤဒိၣ်တရူးကလုၥ်သ့ၣ်တဖၣ်လီၤဒီး ဘၣ်ဃးအဝဲသ့ၣ်နုၥ်လီၤငါအိၣ်အလီၢ်လၢဖၣ်အၣ်ဝ့ၢ်(Hotel)ပူၤအဂ့ၢ်အံၤန့ၣ် ကမျၢၢ်လၢအိၣ်ဝ့ၢ်ပူၤတဂၤ စံးဘၣ်ခ့ၣ်အဲးစံၣ်-ကညီ...

လါနိၣ်ဝ့ဘၢၣ် ၂၆ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ,ဘျံးဒဝဲၢ်ကီၢ်ရ့ၣ်(သုးက့-၄),တနီသရံၣ်ကီၢ်ဆၣ်ဟီၣ်ကဝီၤအပူၤ(KNLA)ဒီးပ ယီၤသုးကရူၢ်အဘၢၣ်စၢၤတၢ်ဒုးကဲထီၣ်ဖဲကီၢ်ဆၢ(မိဒီၢ်)ဝ့ၢ်ဟီၣ်ကဝီၤအဆၢကတီၢ်ကမျၢၢ်လၢလဲၤဃ့ၢ်ထီၣ်အိၣ်ကဒုအသးဆူကီၢ်ကၠီၣ်တဲၣ်သ့ၣ်တဖၣ်တုၤတကီၢ်ခါခဲအံၤဟဲက့ၤလၢအဒူသဝီတဘူၣ်ဒံးဘၣ်အဂ့ၢ်ဘျံးဒဝဲၢ်ကီၢ်ရ့ၣ်ပှၤဘၣ်မူဒါဘၣ်ဒါစံးဝဲန့ၣ်လီၤ. တနီသရံၣ်ကီၢ်ဆၣ်,မိဒီၢ်ဝ့ၢ်လၢအဘူးဒီးကီၢ်ကၠီၣ်တဲၣ်ကီၢ်ဆၢအံၤဖဲလါနိၣ်ဝ့ဘၢၣ်(၁၄)သီအနံၤန့ၣ်ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်ထီၣ်မၤန့ၢ်ကွံၥ်ဝဲဝ့ၢ်အံၤလံဘၣ်ဆၣ်မ့ၢ်လၢပယီၤသုးကရူၢ်တကပၤမၤဆူၣ်ထီၣ်ဝဲတၢ်ဟူးတၢ်ဂဲၤတပယူၥ်ဃီအဃိကမျၢၢ်လၢလဲၤဃ့ၢ်အိၣ်ကဒုအသးဆူကီၢ်ကၠီၣ်တဲၣ်တဖၣ်တုၤလၢခဲအံၤဟဲက့ၤဆူဒူသဝီတဘူၣ်ဒံးဘၣ်အဂ့ၢ်ကီၢ်ရ့ၣ်ပှၤဘၣ်မူဘၣ်ဒါစံးန့ၣ်လီၤ. “တၢ်ဒုးန့ၣ်ပတဲလၢအိၣ်ကိးနံၤဒဲးသ့လီၤ. မ့ၢ်ဝံၤပယီၤသုးမီၤစိရိၤတကပၤလၢကဟဲက့ၤထီၣ်ဒုးမၤန့ၢ်က့ၤဝဲအဂီၢ်န့ၣ် အဝဲသ့ၣ်ထိထီၣ်ဝဲသုးကျိၤလီၤ. ဒ်န့ၣ်အသိးလၢကလံၤကျါတကပၤသူဝဲကဘီယူၤဖးဆူၣ်ညါမီၤနီၤ. အဃိန့ၣ်ကမျၢၢ်တ နီၤဟဲက့ၤနုၥ်လီၤက့ၤတန့ၢ်ဒံးဘၣ်. မ့ၢ်လၢပယီၤသုးသ့ၣ်တဖၣ်န့ၣ်သူဝဲကဘီယူၤအဃိန့ၣ်တၢ်ဘၣ်ယိၣ်အိၣ်စ့ၢ်ကီးလၢ ကမျၢၢ်အဂီၢ်လီၤ. ” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကီၢ်ခါခဲအံၤန့ၣ်(မိဒီၢ်)ဝ့ၢ်ကမျၢၢ်လၢအလဲၤဃ့ၢ်အိၣ်ကဒုးအသးလၢကီၢ်ကၠီၣ်တဲၣ်တကပၤသ့ၣ်တဖၣ်အနီၣ်ဂံၢ်နီၣ်ဒွးအိၣ်ဒံးဝဲဒၣ်ပှၤအဂၤတကထိဃၣ်ဃၣ်ဒံးအသိး(မိဒီၢ်)ဝ့ၢ်ဃုၥ်ဒီးသံခိသဝီ,မဲးဝါသဝီပှၤလီၢ်ကဝီၤဖိသ့ၣ်တဖၣ်စ့ၢ်ကီးက့ၤဝဲတသ့ဒံးဘၣ်အဂ့ၢ်ဒ်ပှၤဘၣ်မူဘၣ်ဒါစံးဝဲအသိးသ့ၣ်ညါဘၣ်န့ၣ်လီၤ. ခီဖျိပယီၤသုးကရူၢ်အံၤလၢတၢ်ကဟဲက့ၤထီၣ်ဒိၣ်စိကဒါက့ၤဝဲကီၢ်ဆၢမိဒီၢ်ဝ့ၢ်အဂီၢ်တၢ်ဒုးကဲထီၣ်ဝဲလၢ(KNLA)တၢ်ပၢၢ်ဆၢသုးပၥ်ဖှိၣ်အဘၢၣ်စၢၤကိးနံၤဒဲးဃၣ်ဃၣ်ဒီးသူစ့ၢ်ကီးဝဲကလံၤကျါကဘီယူၤအမဲၥ်ညါဟဲထီၣ်ထိထီၣ်ဝဲအသုးကျိၤအဃိကတီၢ်အံၤတၢ်ဒုးကဲထီၣ်ဝဲလၢသံခိသဝီတတီၤဒီးမဲးဝါသဝီတတီၤအဖၢမုၢ်ဒံးအဂ့ၢ်သ့ၣ်ညါဘၣ်လၢဟီၣ်ကဝီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤ. တနီသရံၣ်ကီၢ်ဆၣ်, မိဒီၢ်ဝ့ၢ်အံၤစးထီၣ်လၢလါနိၣ်ဝ့ဘၢၣ်(၁၀)သီအနံၤလံၤလံၤခီဖျိပယီၤသုးကရူၢ်ဒီးကညီဒီကလုၥ်တၢ် ထူၣ်ဖျဲးသုးမုၢ်ဒိၣ်အဘၢၣ်စၢၤတၢ်ဒုးဟဲဆူၣ်ထီၣ်ဝဲအဃိကမျၢၢ်ပှၤလီၢ်ကဝီၤဖိသ့ၣ်တဖၣ်လဲၤဃ့ၢ်အိၣ်ကဒုအသးဆူကီၢ်ကၠီၣ်တဲၣ်ကီၢ်ဆၢတကပၤဒ်အံၤလီၤအဂ့ၢ်ဘျံးဒဝဲၢ်ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ.

လါနိၣ်ဝ့ဘၢၣ် ၂၅ သီ, ၂၀၂၅ နံၣ်, ခ့ၣ်အဲးစံၣ် လၢ(ကၠါဖၠၣ်)တၢ်ပၣ်ဃုၥ်ပၣ်ဂီၢ်အပူၤ DKBA ခိၣ်နၢ်ဒိၣ်ထီ(၄)ဂၤကီၢ်အမဲရံၣ်ကၤဘိးဘၣ်ရၤလီၤလၢကဟံဂ့ၢ်ဝီဝံၤလီၢ်ခံ ထံဂုၤ ကီၢ်ဂၤဃုၥ်ဒီးတရူး(ကၠါဖၠၣ်)ပှၤမၤတၢ်ဖိလၢအိၣ်ဂီၤလ့ၤဒီးကၠီးခဲးဟီၣ်ကဝီၤပူၤတဖၣ်ကဟးထီၣ်ကွံၥ်လၢအဆိအချ့အဂ့ၢ်န့ၣ် DKBA ထုးထီၣ်နဲၣ်လီၤဝဲကလုၢ်လံန့ၣ်လီၤ. ဖဲတလါအံၤ ၁၂ သီအနံၤ ဒ်သိးမၠၣ်ဝတံၣ်ဟီၣ်ကဝီၤ(ကၠါဖၠၣ်)တၢ်လံၣ်အီၣ်လီအီၣ်တၢ်ဖံးတၢ်မၤကလီၤမၢ်ကွံၥ်အဂီၢ်န့ၣ် အမဲရံၣ် ကၤဒုးအိၣ်ထီၣ်(Scam Center Strike Force)ဝံၤ တကီၢ်ခါခဲအံၤကၠီးခဲးဒီးဂီၤလ့ၤဟီၣ်ကဝီၤလၢ(ကၠါဖၠၣ်)တၢ်လံၣ်အီၣ်လီအီၣ် တၢ်ဖံး တၢ်မၤအိၣ် ဆီလီၤသးအံၤ...

လါနိၣ်ဝ့ဘၢၣ် ၂၅ သီ, ၂၀၂၅ နံၣ်, ခ့ၣ်အဲးစံၣ် တၢ်ဘၣ်ဘျုးဒံၣ်မိၣ်ကရ့ၣ်စံၣ်ကညီသုးမုၢ်ဒိၣ်(DKBA)သုးဝဲၤလီၢ်ခိၣ်သ့ၣ်အစုတီၤဖီလၥ်လၢအမ့ၢ်သုးရ့ၣ်(၉၀၅)အသုးရ့ၣ်ခိၣ်ခံလၢအမ့ၢ်သုးခိၣ်ဒိၣ်ဖိ စီၤကၠီၣ်ကိၤမ့(ကိး)သခွါသံ အံၤခီဖျိလၢအမၤကမၣ်သုးတၢ်သိၣ်တၢ်သီတၢ်ဘျၢအဃိတၢ် ထုးထီၣ်လံၥ်တၢ်ကလုၢ်လၢတၢ်ကဖီၣ်အီၤအဂ့ၢ်(DKBA)သုးဝဲၤလီၢ်ခိၣ်သ့ၣ်ထုးထီၣ်ဝဲလံၥ်(Warrant)ဖဲမဟါလါနိၣ်ဝ့ဘၢၣ်(၂၄)သီအနံၤန့ၣ်လီၤ. သုးခိၣ်ဒိၣ်ဖိ စီၤကၠီၣ်ကိၤမ့(ကိး)သခွါသံ အံၤဒ်တၢ်ကရၢကရိအပူၤတၢ်ပၥ်လီၤဃၥ်ဝဲသုးတၢ်သိၣ်တၢ်သီအိၣ်ဝဲအသိးန့ၣ် မၤကမၣ်ဝဲဒၣ်အဖီခိၣ်ကဘၣ်ဟံးန့ၢ်ဝဲမူဒါဘၣ်ဆၣ်တကီၢ်ခါခဲအံၤမ့ၢ်လၢအဃ့ၢ်ပလဲၥ်အသးအဃိဘၣ်တၢ်ထုးထီၣ်လံၥ်တၢ်ကလုၢ်လၢတၢ်ကဖီၣ်အီၤအဂ့ၢ်(DKBA)အပှၤကတိၤတၢ်ပၢစံးဝဲဒ်အံၤန့ၣ်လီၤ. “ပ(DKBA)တၢ်ကရၢကရိဒီးပသုးမုၢ်ဒိၣ်သဲစးတၢ်ဘျၢအဖီခိၣ်အဝဲခီကပၥ်ဝဲအဃိပကဘၣ်ဟံးထီၣ်အရ့ဒီးဖီၣ်အီၤန့ၣ်လီၤ. ဘၣ်မနုၤလဲၣ်န့ၣ်အတဃ့ထီၣ်တၢ်ကလုၢ်လၢတၢ်ဖီခိၣ်ဘၣ်,အတန့ၢ်တၢ်ကလုၢ်လၢတၢ်ဖီခိၣ်ဘၣ်ဒီးမၤဝဲတထံၣ်. မ့ၢ်ဝံၤအတန့ၢ်တၢ်ကလုၢ်ဘၣ်ဒီးနဲၣ်လီၤကဒါက့ၤဝဲန့ၣ်လီၤ. တၢ်ကမၣ်န့ၣ်အိၣ်ဝဲခံထံၣ်န့ၣ်လီၤ. တၢ်ကဲထီၣ်သးအံၤအဖီ ခိၣ်အဝဲကဘၣ်ဟံးမူဒါန့ၣ်လီၤ. အခဲအံၤအဝဲဃ့ၢ်ပလဲၥ်သးအဃိပထုးထီၣ်လံၥ်(Warrant)လၢတၢ်ကဖီၣ်အီၤမီၤနီၤ.” အဂ့ၢ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. တကီၢ်ခါခဲအံၤသုးခိၣ်ဒိၣ်ဖိစီၤကၠီၣ်ကိၤမ့(ကိး)သခွါသံအံၤမ့ၢ်အဃ့ၢ်ပလဲၥ်အသးလၢတၢ်လီၢ်ဖဲလဲၣ်ခီန့ၣ်တၢ်တသ့ၣ်ညါဘၣ်ဝဲဒံးဘၣ်ဆၣ်သနါက့ဒ်ခိၣ်နၢ်ပှၤဘၣ်မူဘၣ်ဒါလၢတၢ်ဖီခိၣ်သ့ၣ်တဖၣ်တၢ်နဲၣ်လီၤအသိးတၢ်လူၤဃုဖီၣ်ဝဲလံဒီးတၢ်ဖီၣ်မ့ၢ်ချုးခီန့ၣ်တၢ်ကဆှၢထီၣ်ဆူလီၢ်ခၢၣ်သးဒီးမ့ၢ်တၢ်ကထုးထီၣ်တထုးထီၣ်အီၤလၢမူဒါလီၢ်လၤအပူၤန့ၣ်ခိၣ်နၢ်တၢ်လၢတၢ်ဖီၣ်ခိၣ်ကဆၢတဲၥ်ဝဲအဂ့ၢ်စံးအါထီၣ်ဝဲန့ၣ်လီၤ. ဒ်န့ၣ်အသိးပှၤတဂၤလၢမ့ၢ်ထံၣ်ထွဲဝဲသုးခိၣ်ဒိၣ်ဖိ(သခွါသံ)တဂၤအံၤကဖီၣ်န့ၢ်ဘၣ်ဝဲဒီးဆှၢထီၣ်ဘၣ်အီၤဆူ(DKBA)သုးဝဲၤလီၢ်ခိၣ်သ့ၣ်အအိၣ်အဂ့ၢ်လၢလံၥ်တၢ်ပၥ်ဖျါအပူၤပၥ်ဖျါထီၣ်ဝဲဒၣ်န့ၣ်လီၤ....