KIC News

လါနိၣ်ဝ့ဘၢၣ် ၂၄ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ်(သုးက့ ၁)ဟီၣ်ကဝီၤအပူၤ လါအီးကထိဘၢၣ် ၁ သီတုၤ ၃၁ သီတလါအတီၢ်ပူၤ ကျိဖးဒိၣ်ဒီး ကဘီယူၤအဃိ လီၢ်ကဝီၤကမျၢၢ်သံ ၈ ဂၤ ဒီး ဘၣ်ဒိဘၣ်ထံး ၂၇ ဂၤအဂ့ၢ်န့ၣ် သ့ၣ်ညါဘၣ်ဒ်တလါတဘျီ ကီၢ်ရ့ၣ်တၢ်မၤနီၣ်စရီ...

လါနိၣ်ဝ့ဘၢၣ် ၂၄ သီ, ၂၀၂၅ နံၣ်, ခ့ၣ်အဲးစံၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ စွ့ၤကိၣ်ကိၤဟီၣ်ကဝီၤအပူၤ ခီဖၠူထၢၣ်ဒီးလီတဲစိ(ဖိ)လၢတၢ်မၤန့ၢ်ဝဲဖဲအီၤလါ(ကၠါဖၠၣ်)တၢ်ဖံးတၢ်မၤလီၢ် အံၤတဖၣ် ကညီသုးခိးကီၢ်ဆၢ(BGF)ဒီးပယီၤသုးတဖၣ်ပၥ်ဖှိၣ်ထီၣ်သးမၤဟးဂီၤကွံၥ်ဝဲဒၣ်န့ၣ်လီၤ. ဒ် BGF ဒီး ကၠီၣ်တဲၣ်တၢ်ကစီၣ်သန့တနီၤပၥ်ဖျါဝဲအသိးန့ၣ် စွ့ၤကိၣ်ကိၤဟီၣ်ကဝီၤအပူၤလၢတၢ်ကမၤဆှဲကွံၥ်(ကၠါဖၠၣ်) တၢ်ဖံးတၢ်မၤအဂီၢ် စးထီၣ်ဖဲတလါအံၤလါနိၣ်ဝ့ဘၢၣ် ၁၈ သီအနံၤန့ၣ် သုးမီၤစိရိၤတီခိၣ်ရိၣ်မဲစးထီၣ်ဝဲတၢ်ဖံးတၢ်မၤသ့ၣ်တဖၣ်အံၤန့ၣ်လီၤ. ဖဲန့ၣ်လၢ(၅)သီအတီၢ်ပူၤ BGF ဒီးပယီၤသုးဖီၣ်န့ၢ်ဝဲ(ကၠါဖၠၣ်)ပှၤမၤတၢ်ဖိတစှၤန့ၢ်အဂၤ ၁၀၀၀ ဒီး...

လါနိၣ်ဝ့ဘၢၣ် ၂၄သီ, ၂၀၂၅နံၣ်, ခ့ၣ်အဲးစံၣ်, ကီၢ်ကၠီၣ်တဲၣ်-ကညီကီၢ်စဲၣ်ကီၢ်ဆၢသူမွဲထံကျိကၢၢ်နံၤတၢ်လီၢ်တဖၣ်အပူၤ,ကီၢ်ကၠီၣ်တဲၣ်တကပၤမၤဃံးထီၣ်ဝဲတၢ်အိၣ်ခိးတၢ်ဘံၣ်တၢ်ဘၢလံအဂ့ၢ်,ကၠီၣ်တဲၣ်(Khosoad)တၢ်ကစီၣ်သန့ပၥ်ဖျါထီၣ်ဝဲဒၣ်ဖဲမဟါလါနိၣ်ဝ့ဘၢၣ်(၂၃)သီအနံၤန့ၣ်လီၤ. ကညီကီၢ်စဲၣ်ရၤမတံကလံၤထံးဟီၣ်ကဝီၤအပူၤတၢ်ဒုးကဲထီၣ်ဝဲလၢကညီတၢ်ထူၣ်ဖျဲးသုးမုၢ်ဒိၣ်(KNLA),တၢ်ပၢၢ်ဆၢသုးပၥ်ဖှိၣ်ဒီးပယီၤသုးကရူၢ်(တမ၂၂)အဘၢၣ်စၢၤဒီးအပူၤကွံၥ်လါနိၣ်ဝ့ဘၢၣ်(၂၂)သီအနံၤကျိချံပှၥ်သၣ်လီၤတဲၥ်ဝဲလၢကီၢ်ကၠီၣ်တဲၣ်ကမျၢၢ်အိၣ်ဆိးဒူသဝီပူၤအဃိ,ထံဖိကီၢ်ဖိကမျၢၢ်တၢ်ဘံၣ်တၢ်ဘၢဒီးတၢ်လံၣ်အီၣ်လီအီၣ်(ကၠါဖၠၣ်)တၢ်ဒီသဒၢအဂီၢ်ကီၢ်ကၠီၣ်တဲၣ်တကပၤမၤဃံးထီၣ်ဝဲကီၢ်ဆၢတၢ်ဘံၣ်တၢ်ဘၢတၢ်အိၣ်ခိးတၢ်အဂ့ၢ်,ကၠီၣ်တဲၣ်(Khosoad)တၢ်ကစီၣ်သန့ပၥ်ဖျါဝဲဒၣ်န့ၣ်လီၤ. ဒီးကၠီၣ်တဲၣ်တကပၤမၤဃံးထီၣ်ကီၢ်ဆၢတၢ်ဘံၣ်တၢ်ဘၢအဖီခိၣ်,ကမျၢၢ်လီၢ်ကဝီၤဖိလၢအဘူးဒီးသူမွဲထံကျိကၢၢ်နံၤလၢအိၣ်ကညီကီၢ်စဲၣ်ပူၤတကပၤတဂၤစံးဝဲဒ်အံၤန့ၣ်လီၤ. “ပနၢ်ဟူလၢထံကျိကၢၢ်နံၤတၢ်မၤဃံးထီၣ်တၢ်အိၣ်ခိးတၢ်လံ,ဘၣ်မနုၤအဃိလဲၣ်န့ၣ်ပှၤခးလီၤတၢ်လီၤတဲၥ်လၢန့ၣ်တကပၤအမဲၥ်ညါတရူးစ့ၢ်ကီးစံၣ်နုၥ်လီၤအိၣ်စ့ၢ်ဝဲအသိး,ပနၢ်ဟူစ့ၢ်ကီးလၢအမဲရကၤအပှၤဘၣ်မူဘၣ်ဒါကဟဲဟးကွၢ်ထံဆၢကီၢ်ဆၢအဃိ,တၢ်ကပံးထံဆၢကီၢ်ဆၢကျဲအိၣ်ဝဲ,မ့ၢ်ကမၤဝဲတုၤလီၤတီၤလီၤဧါဒုတသ့ၣ်ညါဘၣ်.”အဂ့ၢ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,သူမွဲထံကျိကၢၢ်နံၤတၢ်လီၢ်တၢ်ကျဲတဖၣ်အပူၤ,တကီၢ်ခါခဲအံၤကၠီၣ်တဲၣ်သုးမုၢ်ဒိၣ်တဖၣ်သူဝဲပတီၢ်ထီစုကဝဲၤပီးလီတဖၣ်ဒီးမၤဃံးထီၣ်ဝဲမုၢ်နၤမုၢ်ဆါတၢ်ဟးဝ့ၤဝီၤဆှၣ်တၢ်တဖၣ်အဂ့ၢ်,ကၠီၣ်တဲၣ်(Khosoad)တၢ်ကစီၣ်သန့ပၥ်ဖျါဝဲဒၣ်န့ၣ်လီၤ. ဒီးစုကဝဲၤတၢ်ပီးတၢ်လီဒ်အမ့ၢ်,တၢ်ကွၢ်ဟုၣ်ကွၢ်စုၣ်ကလံၤကျါကဘီယူၤကျိၤအဂီၢ်(ကဘီယူၤလၢတၢ်နီအီၤတအိၣ်ယူၣ်နံး,တၢ်ဒီသဒၢပ့ၢ်ဆှါတၢ်တိဖျိအဂီၢ်(UAV)တၢ်တြီဆၢထီဒါယူၣ်နံး,ဃုၥ်ဒီး(၃)ပ့ၢ်ဆှါတၢ်ထၢဖှိၣ်ပၥ်ဖှိၣ်တၢ်ဒုးသ့ၣ်ညါဆိအတၢ်သုးထီၣ်ထီၣ်တၢ်သ့တၢ်ဘၣ်အဂီၢ်,တၢ်ဟးဆှၣ်တၢ်လၢအယံၤယူၣ်နံးသ့ၣ်တဖၣ်စ့ၢ်ကီးသူဝဲဒၣ်အိၣ်ဝဲအဂ့ၢ်,(Khosoad)တၢ်ကစီၣ်သန့ပၥ်ဖျါဝဲဒၣ်စ့ၢ်ကီးန့ၣ်လီၤ. ကညီကီၢ်စဲၣ်ကီၢ်ဆၢရၤမတံဝ့ၢ်ကလံၤထံးမ့လဲးပၤ,အ့ကၠ့မၠဲၣ်,ဖလူကျဲတၢ်လီၢ်တဖၣ်အပူၤတၢ်ဒုးကဲထီၣ်ဝဲတပယူၥ်ဃီအိၣ်ဝဲအဃိ,ကမျၢၢ်လီၢ်ကဝီၤဖိတဖၣ်ဘၣ်ဃ့ၢ်ထီၣ်အိၣ်ကဒုဝဲအသးလၢသူမွဲထံကျိကၢၢ်နံၤအိၣ်ဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,ကီၢ်ကၠီၣ်တဲၣ်တကပၤမၤဃံးဝဲကီၢ်ဆၢတၢ်အိၣ်ခိးကျဲဒ်အံၤအဖီခိၣ်,တၢ်ကဟ့ၣ်တၢ်ဆီၣ်ထွဲမၤစၢၤပှၤဃ့ၢ်တၢ်ဒုးလီၢ်အိၣ်ကဒုဖိတဖၣ်အဂီၢ်တၢ်ကီတၢ်ခဲတၢ်တၤတၢ်အိၣ်ဝဲအဂ့ၢ်,ပှၤမၤစၢၤပှၤဃ့ၢ်တၢ်ဒုးလီၢ်အိၣ်ကဒုပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ.

လါနိၣ်ဝ့ဘၢၣ် ၂၁ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူပျၥ်ယၥ်ကီၢ်ရ့ၣ်(သုးက့ ၆)ကီးတရံးကီၢ်ဆၣ်အပူၤ ပယီၤသုးကျိၤလၢနုၥ်လီၤဟူးဂဲၤတဖၣ်ခီဖျိကညီဒီကလုၥ်တၢ်ထူၣ် ဖျဲးသုးမုၢ်ဒိၣ်(KNLA)သုးပၥ်ဖှိၣ်ခိးခးဝဲအဃိ သံဘၣ်ဒိဘၣ်ထံးအါမးအဂ့ၢ်န့ၣ် သ့ၣ်ညါဘၣ်လၢဂံၢ်ခီၣ်ထံးပှၤဟ့ၣ်တၢ်ကစီၣ်ဖိ အအိၣ် န့ၣ်လီၤ. ဖဲလါနိၣ်ဝ့ဘၢၣ် ၁၉ သီအနံၤ ပယီၤသုးကျိၤ(၂)ကျိၤလၢအိၣ်ကီးတရံး-သ့ၣ်ဃးလီၤတီၢ်(သ့ၤကါညံၤနီၤ)ကျဲ ခီၣ်ချ့သုးရ့ၣ်(ခမရ-၃၅၅) သုးကလၢၤတၢ်လီၢ် အံၤတဖၣ် ဟဲလီၤဝဲဆူအ့ရှါကျဲမုၢ်ကစၢၢ်ခိၣ်ဝံၤနုၥ်လီၤဟူးဂဲၤဝဲလၢ(KNLA)သုးခိၣ်စီၤကၠီၤသဲၣ်တၢ်လီၢ် ဟီၣ်ကဝီၤ မီးမး, ယွၤသ့ၣ်...

လါနိၣ်ဝ့ဘၢၣ် ၂၁သီ, ၂၀၂၅နံၣ်, ခ့ၣ်အဲးစံၣ်. ကညီကီၢ်စဲၣ်သုးခိး ကီၢ်ဆၢ BGFအနဲၣ်ရွဲၣ် သုးခိၣ်ခၠံၣ်သူအံၤ မ့ၢ်တူၢ်ဘၣ်ဝဲတၢ်ပၥ်ဒ့ၣ်ပၥ်ကမၢ်ဘၣ်ဆၣ် ခီဖျိအတၢ်ကမၣ်တအိၣ်ဘၣ်အဃိ အတဃ့ၢ်ပူၤဖျဲးသးနီတပူၤဘၣ်အဂ့ၢ် BGF အပှၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ် နဲၣ်မီၣ်စီၣ် စံးဘၣ်ဝဲပှၤမၤတၢ်ကစီၣ်ဖိ ဖဲမဟါ လါနိၣ်ဝ့ဘၢၣ်(၂၁)သီအနံၤဖဲအဝဲသ့ၣ်မၤဝဲတၢ်ကတိၤရှဲလဲတၢ်ဒီးတၢ်ကစီၣ်ကစၢ်အဆၢကတီန့ၣ်လီၤ. ဖဲBGF မၤဝဲတၢ်ကတိၤရှဲလဲတၢ်ဂ့ၢ်တၢ်ကျိၤဒီး ကီၢ်ကၠီၣ်တဲၣ် တၢ်ကစီၣ်သန့တခါအဆၢကတီၢ် ကၠီၣ်တဲၣ်တၢ်ကစီၣ်သန့သံကွၢ်အီၤလၢ တကီၢ်ခါခဲအံၤခီဖျိသုးခိၣ်ခၠံၣ်သူဂၢၢ်ဘၣ်ဒီးထံဂုၤကီၢ်ဂၤတၢ်ဖီၣ်ဃံးဒီးတၢ်ဆီၣ်သနံးအဖီခိၣ်,သုးခိၣ်ကခၠံၣ်သူၣ် အအိၣ်ဖဲအံၤဒံးဧါမ့တမ့ၢ် အဃ့ၢ်ပူၤဖျဲးသးလံဧါ?တၢ်သံကွၢ်အိၣ်ထီၣ်ဝဲအဖီခိၣ်...

လါနိၣ်ဝ့ဘၢၣ် ၂၀ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်(သုးက့ ၄)တနီသရံၣ်ကီၢ်ဆၣ် ကီၢ်ကၠီၣ်တဲၣ်-ကီၢ်ပယီၤကီၢ်ဆၢ မီတီၤ(မိဒီၢ်)ဝ့ၢ်လၢတၢ်ပၢၢ်ဆၢ သုးပၥ်ဖှိၣ်ကရူၢ်ထီၣ်န့ၢ်ဝဲအံၤ လၢကထီၣ်မၤန့ၢ်က့ၤဝဲအဂီၢ် ပယီၤသုးမၤအါထီၣ်သုးဂံၢ်ဘါဒီးကဘီယူၤလဲၤ ခးလီၤတၢ်ကိးမုၢ်နံၤဒဲး ဃၣ်ဃၣ် ကီၢ်ရ့ၣ်နဲၢ်ရွဲၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. မီတီၤ(မိဒီၢ်)ကီၢ်ဆၢဝ့ၢ် ပယီၤသုးခီၣ်သုးရ့ၣ်(ခလရ-၂၂၄)သုးကလၢၤအံၤ ဖဲအပူၤကွံၥ်လါနိၣ်ဝ့ဘၢၣ် ၁၄ သီအနံၤ (KNLA) သုးပၥ်ဖှိၣ်ထီၣ်မၤ န့ၢ်ကွံၥ်ဝဲဝံၤ...

လါနိၣ်ဝ့ဘၢၣ် ၁၄ သီ ၂၀၂၅ နံၣ်, ခ့ၣ်အဲးစံၣ် DKBA ခိၣ်နၢ်ဒိၣ်ထီ(၄)ဂၤဖဲမဟါအနံၤအမဲရံၣ်ကၤထုးထီၣ်လၢကဟံဂ့ၢ်ဝီဝံၤလီၢ်ခံ ဖလူလီၢ်ကဝီၤခီဖျိလၢပယီၤသုးအကျိဖးဒိၣ် အံၤအဃိ (DKBA)အပှၤသံဘၣ်ဒိဘၣ်ထံးဝဲ(၃)ဂၤ ဒီး ကမျၢၢ်ဘၣ်ဒိသံဘၣ်ဒိဘၣ်ထံး တစှၤန့ၢ်(၁၀)ဂၤအဂ့ၢ်န့ၣ် လီၢ်ကဝီၤ ပှၤဘၣ်မူဘၣ်ဒါစံးဝဲန့ၣ်လီၤ. ဖဲမဟါလါနိၣ်ဝ့ဘၢၣ် ၁၃ သီ မုၢ်ထူၣ် ၁၂း၀၀ နၣ်ရံၣ်ခိၣ်ဃၢၤအဆၢကတီၢ်န့ၣ် (ကၠါဖၠၣ်)တၢ်မၤလီၢ်လၢအိၣ် DKBA ဟီၣ်ကဝီၤ ဖလူဖးဒိၣ်သဝီ...

လါနိၣ်ဝ့ဘၢၣ် ၁၄သီ, ၂၀၂၅နံၣ်, ခ့ၣ်အဲးစံၣ်, မဲၢ်ရၤမိၢ်ကညီဘၣ်ကီဘၣ်ခဲဒဲကဝီၤအပူၤ,တလါဘျဲၣ်အတီၢ်ပူၤပှၤဒဲကဝီၤဖိတူၢ်ဘၣ်ဝဲဒ့ၣ်ဘီး(ခၣ်သံၣ်ညိး)တၢ်ဆါအိၣ်ထီၣ်တုၤအဂၤ(၁၀၀)ဘျဲၣ်အဂ့ၢ်,ဒဲကဝီၤပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. အပူၤကွံၥ်လါအီးကထိဘၢၣ်(၂)သီတုၤလၢတလါအံၤလါနိၣ်ဝ့ဘၢၣ်အပူၤမဲၢ်ရၤမိၢ်ကညီဘၣ်ကီဘၣ်ခဲဒဲကဝီၤအပူၤဒ့ၣ်ဘီးတၢ်ဆါ(ကိး)(ခၣ်သံၣ်ညိး)တၢ်ဆါစးထီၣ်ကဲထီၣ်ဝဲဒီးတလါဘျဲၣ်အတီၢ်ပူၤပှၤတူၢ်ဘၣ်ဝဲတၢ်ဆါအိၣ်ထီၣ်ဝဲတုၤလၢအဂၤ(၁၀၀)ဘျဲၣ်အဂ့ၢ်, မဲၢ်ရၤမိၢ်ဒဲက၀ီၤခိၣ် စီၤထ့အ့စံးဝဲဒ်အံၤန့ၣ်လီၤ. “စးထီၣ်လၢအကဲထီၣ်တုၤခဲအံၤအိၣ်အဂၤ(၁၀၀)ဘျဲၣ်လံ,အခဲအံၤကိညၢ်လီၤဘၣ်ဆၣ်တပတုၥ်အသးဒံးဘၣ်.တသီခံသီတဂၤတသီခံသီတဂၤဟဲကဲထီၣ်သးအိၣ်ဒံးအဖၢမုၢ်လီၤ.တလါဘျဲၣ်အတီၢ်ပူၤအဂၤ(၁၀၀)ဘျဲၣ်အံၤဒ်(MI)အတၢ်ပၥ်ဖျါအသိးန့ၣ်မ့ၢ်ဒၣ်ထဲမဲၢ်ရၤမိၢ်ဒဲကဝီၤတဖျၢၣ်လီၤမီၤ.အါတက့ၢ်ကဲထီၣ်သးလၢဖိသၣ်ဒီးသးစၢ်ပှၤလၢတန့ၢ်ဆဲးကသံၣ်ဒီသဒၢ(ကၤကွဲၤဆ့)လၢအနီၢ်ဆံးခါတဖၣ်အါဝဲဒၣ်န့ၣ်လီၤ.”အဂ့ၢ်စံးဝဲဒၣ်န့ၣ်လီၤ. ပှၤလၢတူၢ်ဘၣ်ဒ့ၣ်ဘီး(ခၣ်သံၣ်ညိး)တၢ်ဆါသ့ၣ်တဖၣ်အံၤအါတက့ၢ်မ့ၢ်ဝဲဖိသၣ်(၅)နံၣ်တုၤ(၁၇)နံၣ်ဘၢၣ်စၢၤသးစၢ်သ့ၣ်တဖၣ်တဖၣ်အဂ့ၢ်,အဝဲစံးအါထီၣ်ဝဲဒၣ်န့ၣ်လီၤ. လၢန့ၣ်အမဲၥ်ညါ,တၢ်ကူစါယါဘျါအဂီၢ်ဒ်အလီၢ်အိၣ်ဝဲအသိးတၢ်ဟ့ၣ်ဝဲပှၤတူၢ်ဘၣ်တၢ်ဖိတဖၣ်ကသံၣ်အီဒီးဆူၣ်ချ့တၢ်အံးထွဲကွၢ်ထွဲတဖၣ်အိၣ်ဝဲအဂ့ၢ်,စံးစ့ၢ်ကီးဝဲဒၣ်န့ၣ်လီၤ. ဒ့ၣ်ဘီး(ခၣ်သံၣ်ညိး)တၢ်ဆါအံၤကဲထီၣ်သးခီဖျိ(Mumps)တၢ်ဆါဃၢ်(ဘဲရၢး)တမံၤဒီးဒီးဘၣ်ကူဘၣ်ဂၥ်သ့ဝဲခီဖျိပှၤဆါကူးဒိး,ကသါဘၣ်တၢ်ဆါဃၢ်လၢကလံၤကျါ,ဖီၣ်ဘၣ်တၢ်ဖိတၢ်လံၤလၢပှၤဆါသူတ့ၢ်ဝဲဒီးဖီၣ်ဘၣ်ပှၤထးပှဲၤထံသ့ၣ်တဖၣ်အဂ့ၢ်,ဟီၣ်ကဝီၤဆူၣ်ချ့ပှၤဘၣ်မူဘၣ်ဒါတဖၣ်ဘိးဘၣ်ရၤလီၤပၥ်ဖျါအိၣ်ဝဲဒၣ်န့ၣ်လီၤ. ဒီးတၢ်ဆါအံၤကဲထီၣ်ဝံၤအလီၢ်ခံ,တၢ်ဆါဒိၣ်ဒိၣ်မုၢ်မုၢ်ဒ်အမ့ၢ်ခိၣ်နုၥ်သလီညိးတၢ်ဆါ,ခိၣ်နုၥ်ညိးအတၢ်ပနီၣ်,နၢ်တအၢ,ဒီးနၢ်ကုအထူၣ်အပျၢ်တၢ်ဘၣ်ဒိဘၣ်ထံးတဖၣ်ပိၥ်ထွဲထီၣ်အခံကဲထီၣ်သ့အိၣ်ဝဲအဂ့ၢ်,ဆူၣ်ချ့ပှၤဘၣ်မူဘၣ်ဒါတဖၣ်ဘိးဘၣ်ပၥ်ဖျါစ့ၢ်ကီးဝဲဒၣ်န့ၣ်လီၤ. မဲၢ်ရၤမိၢ်ဒဲကဝီၤအပူၤဒ့ၣ်ဘီး(ခၣ်သံၣ်ညိး)တၢ်ဆါကဲထီၣ်အဃိ,အပူၤကွံၥ်တၢ်ပတုၥ်ဆိဝဲဖိဒံဖိသၣ်ဒီးသူၣ်ဘီၣ်သးစၢ်တဖၣ်တၢ်မၤလိမၤဒိးကၠိအိၣ်ဝဲဘၣ်ဆၣ်,တကီၢ်ခါခဲအံၤတၢ်က့ၤအိးထီၣ်ကဒါက့ၤဝဲဒ်ညီနုၢ်အသိးဒီးကၠိဖိလၢဘၣ်ကူဘၣ်ဂၥ်တူၢ်ဘၣ်တၢ်ဆါတဖၣ်တခီတၢ်နဲၣ်လီၤဝဲလၢကအိၣ်လၢဟံၣ်ကွၢ်ထွဲလီၤသးအဂ့ၢ်,သ့ၣ်ညါဘၣ်ဒ်ဒဲကဝီၤခိၣ်နၢ်တဖၣ်စံးဝဲအသိးန့ၣ်လီၤ. ဒ်န့ၣ်အသိး,လၢကဒီသဒၢဝဲဒ့ၣ်ဘီး(ခၣ်သံၣ်ညိး)တၢ်ဆါဒီးတၢ်ဘၣ်ကူဘၣ်ဂၥ်အဂီၢ်,တၢ်ကဘၣ်ဟးဆှဲးဝဲတၢ်လီၢ်လၢပှၤကညီအိၣ်ဖှိၣ်ရိဖှိၣ်အလီၢ်ဒီးတၢ်လီၢ်လၢပှၤကညီအိၣ်အါအလီၢ်တဖၣ်အမဲၥ်ညါ,တၢ်ကဘၣ်ကးဘၢဝဲနါစ့ၤ,ကိၥ်ပူၤ,တၢ်ကဘၣ်သူဝဲ(Mask),ကဘၣ်သ့ကဆှီဝဲစုစီစီ,ကဘၣ်အိၣ်စီၤစုၤယံၤဒီးဝဲပှၤကညီ,တၢ်တဘၣ်သူဝဲတၢ်ဖိတၢ်လံၤတၢ်ပီးတၢ်လီဒ်သိးသိးဘၣ်အသိး,ဆၢကတီၢ်ခဲအံၤတၢ်တဘၣ်လဲၤဟးထီၣ်ဟးလီၤဝဲဒၣ်လၢမဲၢ်ရၤမိၢ်ဒီးမဲၢ်လးအူဒဲကဝီၤတၢ်လီၢ်တၢ်ကျဲဃုၥ်ဒီးကျဲအဘၢၣ်စၢၤတဖၣ်အပူၤဘၣ်အဂ့ၢ်,ဆူၣ်ချ့ပှၤဘၣ်မူဘၣ်ဒါတဖၣ်ဘိးဘၣ်ပၥ်ဖျါဝဲဒၣ်န့ၣ်လီၤ.

လါနိၣ်ဝ့ဘၢၣ် ၁၃ သီ, ၂၀၂၅ နံၣ်, ခ့ၣ်အဲးစံၣ် လၢတၢ်ပၣ်ဃုၥ်ပၣ်ဂီၢ်လၢကၠါဖၠၣ်တၢ်လံၣ်အီၣ်လီအီၣ်တၢ်ဖံးတၢ်မၤပူၤအံၤအဃိ ဖဲမဟါလါနိၣ်ဝ့ဘၢၣ် ၁၂ သီအနံၤန့ၣ် ကီၢ်အမဲရကၤပဒိၣ်ကျိၣ်စ့ဝဲၤကျိၤထုးထီၣ်ဘိးဘၣ်ရၤလီၤဝဲလၢကဟံဝဲဂ့ၢ်ဝီဆူ တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီ သုးမုၢ်ဒိၣ်(DKBA) ခိၣ်နၢ်ဒိၣ်ထီ ၄ ဂၤ န့ၣ်လီၤ. ဘၣ်ဆၣ်လၢ(ကၠါဖၠၣ်)တၢ်ဖံးတၢ်မၤပူၤအကျါ ကရူၢ်ကရၢပူၤပှၤအဂၤတၢ်ပၣ်ဃုၥ်ပၣ်ဂီၢ်မ့အိၣ်သနါက့ ဘၣ်ဃးလၢတၢ်ဖံးတၢ်မၤ အပူၤအံၤအတၢ်ပၣ်ဃုၥ်ဂီၢ်တအိၣ်ဝဲဘၣ်အဂ့ၢ်န့ၣ် (DKBA)သုးဂ့ၢ်ဝီခိၣ် သုးခိၣ်ကျၢၢ်ဖိ စီၤစ့ၤဝ့ ခီၣ်ဆၢကဒါဝဲန့ၣ်လီၤ. အဝဲစံးဝဲလၢ“မ့ဘၣ်တဲတၢ်ကရၢကရိပူၤဒုပှၤမၤဒုအိၣ်သနါက့မ့ဘၣ်ဃးလၢယၤခီဘၣ်ဃးတၢ်တခါန့ၣ်တပၣ်ထွဲဃုၥ်နီမံၤမီၤ....

လါနိၣ်ဝ့ဘၢၣ် ၁၂ သီ, ၂၀၂၅ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ, ဘျံးဒဝဲၢ်ကီၢ်ရ့ၣ်, တနီသရံၣ်ကီၢ်ဆၣ်, ဖဲမိဒီၢ်ဝ့ၢ်ဟီၣ်ကဝီၤအပူၤဖဲလါနိၣ်ဝ့ ဘၢၣ်(၁၀)သီအနံၤန့ၣ်ခီဖျိပယီၤသုးကရူၢ်ဒီးကညီတၢ်ပၢၢ်ဆၢသုးမုၢ်ဒိၣ်,သုးပၥ်ဖှိၣ်အဘၢၣ်စၢၤတၢ်ဒုးဟဲဆူၣ်ထီၣ်ဝဲအဃိကမျၢၢ်လီၢ်ကဝီၤဖိလၢအိၣ်မိဒီၢ်ဟီၣ်ကဝီၤပူၤတဖၣ်လဲၤဃ့ၢ်အိၣ်ကဒုအသးဆူကီၢ်ကၠီၣ်တဲၣ်ကီၢ်ဆၢတကပၤအဂ့ၢ်ဘျံးဒဝဲၢ်ကီၢ်ရ့ၣ်ပှၤဘၣ်မူဘၣ်ဒါစံးဝဲန့ၣ်လီၤ. စးထီၣ်ဖဲအပူၤကွံၥ်လါနိၣ်ဝ့ဘၢၣ်အသီ(၁၀)အနံၤ,ဖဲမိဒီၢ်ဟီၣ်ကဝီၤအပူၤန့ၣ်ပယီၤသုးကျိၤဟဲထီၣ်ဟူးဂဲၤတဖၣ်ဒီးကညီတၢ်ပၢၢ်ဆၢသုးမုၢ်ဒိၣ်(သုးပၥ်ဖှိၣ်)အဘၢၣ်စၢၤတၢ်ဒုးကဲထီၣ်ဝဲဒီးပယီၤသုးလၢအိၣ်ဆီလီၤအသးဖဲမိဒီၢ်ဝ့ၢ်ပူၤတဖၣ်ခးတပျုၤတပျီၤလီၤဝဲကျိဖးဒိၣ်အဃိမိဒီၢ်ဟီၣ်ကဝီၤဃုၥ်ဒီးမိဒီၢ်ဝ့ၢ်ဒီတဖျၢၣ်ကမျၢၢ်လၢအကထိဃၣ်ဃၣ်လဲၤဃ့ၢ်အိၣ်ကဒုဆူကီၢ်ကၠီၣ်တဲၣ်ကီၢ်ဆၢဒီးတၢ်လီၢ်အဂၤစ့ၢ်ကီးအဂ့ၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဝဲန့ၣ်လီၤ. “မ့ၢ်ဘၣ်မိဒီၢ်ဝ့ၢ်န့ၣ်ဝ့ၢ်ဒီတဖျၢၣ်လၢၤလီၤ. သနါက့ပှၤလီၢ်ကဝီၤဖိသ့ၣ်တဖၣ်န့ၣ်ဃ့ၢ်ဝဲတၢ်လီၢ်အါတီၤန့ၣ်လီၤ. တသ့ၣ်ညါ လီၤတံၢ်ခဲလၢၥ်ဘၣ်. မ့မ့ၢ်ပှၤဃ့ၢ်လၢကီၢ်ကၠီၣ်တဲၣ်ကီၢ်ဆၢန့ၣ်ကအိၣ်ဝဲအဂၤ(၅၀၀)ဘျဲၣ်န့ၣ်လီၤ. ဒီးပှၤလၢအဃ့ၢ်လၢတၢ် ကပိၥ်ကပၤန့ၣ်မ့ၢ်ကအိၣ်ဆံးအါလဲၣ်တသ့ၣ်ညါဘၣ်ဒံးဘၣ်. ” အဂ့ၢ်စံးဘၣ်ဝဲခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ‎ခီဖျိပယီၤသုးကရူၢ်အံၤအတၢ်စိတၢ်ကမီၤကဂၢၢ်ကျၢၤအဂီၢ်တၢ်လီၢ်လၢအဝဲသ့ၣ်ပၢဆှၢဝဲန့ၢ်သ့ၣ်တဖၣ်အပူၤန့ၣ်ကျဲးစၢၤမၤကဲထီၣ်ဝဲတၢ်ဃုထၢအယီၤအဘျၣ်အံၤအသိးတၢ်လီၢ်လၢအဝဲသ့ၣ်ပၢဆှၢဝဲတန့ၢ်ဒီးဘၣ်ပျၢ်စုကွံၢ်ဝဲသ့ၣ်တဖၣ်န့ၣ်မၤပျံၤမၤဖုးဝဲကမျၢၢ်သ့ၣ်တဖၣ်ဒီးတ့ၢ်လီၤဝဲမ့ၣ်ပိၢ်,ခးလီၤဝဲကျိဖးဒိၣ်လၢကမျၢၢ်အိၣ်ဆိးတၢ်လီၢ်သ့ၣ်တဖၣ်ပူၤအဂ့ၢ်ခ့ၣ်အဲၣ်ယူၣ်-ဘျံးဒဝဲၢ်ကီၢ်ရ့ၣ်တၢ်ပၥ်ဖျါပူၤပၥ်ဖျါဝဲန့ၣ်လီၤ. တကီၢ်ခါခဲအံၤစ့ၢ်ကီးန့ၣ်မိဒီၢ်ဝ့ၢ်တၢ်ကပိၥ်ကပၤ(တၢ်ခိၣ်တၢ်ဃၢၤ)အလီၢ်လၢပှၤလီၢ်ကဝီၤဖိသ့ၣ်တဖၣ်လဲၤအိၣ်ကဒုဝဲအသးအလီၢ်န့ၣ်တၢ်လိၣ်ဘၣ်ဝဲဂ့ၢ်ဂီၢ်အူတၢ်အီၣ်တၢ်အီ, ဆ့ကၤကလၢၤဒီးကသံၣ်ကသီအဂ့ၢ်သ့ၣ်ညါဘၣ်အသိးအါန့ၣ်အ အမဲၥ်ညါဖဲပယီၤသုးထိထီၣ်သုးကျိၤဆူမိဒီၢ်ဝ့ၢ်အခါဖဲဟဲလၢကျဲကတီၢ်န့ၣ်ပံးကွံၥ်ဝဲတၢ်လဲၤတၢ်က့ၤကျဲအဃိကီခဲလၢတၢ်ကမၤစၢၤဝဲပှၤလီၢ်အိၣ်ကမှံဖိအဂ့ၢ်တနီသရံၣ်ကီၢ်ဆၣ်ပှၤလၢမၤစၢၤလီၢ်အိၣ်ကမှံတဂၤစံးဝဲဒၣ်န့ၣ်လီၤ.