လါယူၤ ၁၇သီႇ ၂၀၂၄နံၣ်ႇ ခ့ၣ်အဲးစံၣ်ႇ
ခ့ၣ်အဲၣ်ယူၣ်-ကညီဒီကလုၢ်စၢဖှိၣ်ကရၢႇသုးက့(၇)ဖၣ်အၣ်၀့ၢ်အပူၤႇစးထီၣ်ဖဲအပူၤကွံာ်လါမ့ၤအတီၢ်ပူၤ(ဖၠါ)တၢ်ဆါတၢ်ၦ့ၤကသံၣ်တၢ်လီၢ်တၢ်ကျဲတဖၣ်အပူၤကသံၣ်ကသီဘၣ်ထွဲတၢ်ဖိတၢ်လံၤပီးလီတဖၣ်လီၤတူာ်ကွံာ်၀ဲဒီးတနီၤတၢ်ဘၣ်ပာ်ပနီၣ်နီၤလီၤဆါက့ၤအီၤအိၣ်၀ဲအသိးႇအလုၢ်အၦ့ၤတဖၣ်ထီၣ်၀ဲလၢ(ခံဆး)ညါအဂ့ၢ်ကသံၣ်ကျးၦၤဆါတၢ်ဖိတဖၣ်စံး၀ဲန့ၣ်လီၤႉ
သုးကီၣ်ကးပာ်ပနီၣ်ကျဲတၢ်ဟးထီၣ်က့ၤလီၤအဃိတၢ်၀ံစိာ်တီဆှၢကသံၣ်ကသီကီခဲဒိၣ်ထီၣ်၀ဲဒီးတၢ်စူၤခါကတီၢ်ကျဲဟးဂီၤအတၢ်ကီတၢ်ခဲအိၣ်၀ဲသိးစ့(ဒီၣ်လၣ်)အဘူးအလဲထီၣ်စ့ၢ်ကီး၀ဲအဃိဂံၢ်ခီၣ်ထံးကသံၣ်ခီပနံၣ်တၢ်ရၤလီၤဆါကသံၣ်ကသီတဖၣ်အပူၤဒၣ်လဲာ်ကသံၣ်အၦ့ၤထီၣ်၀ဲဒီးကသံၣ်ၦၤဆါတၢ်ဖိတဖၣ်သဂၢၢ်ဘၣ်၀ဲကသံၣ်လီၤတူာ်တၢ်ကီတၢ်ခဲအဂ့ၢ်ၦၤဆါကသံၣ်ကသီဖိတဖၣ်စံး၀ဲန့ၣ်လီၤႉ
(ဖၠါ)တၢ်ဆါတၢ်ၦ့ၤတၢ်လီၢ်တဖၣ်အပူၤတၢ်ဆှၢနုာ်လီၤကသံၣ်ကသီစှၤ၀ဲအဃိကသံၣ်ကသီလၢညီနုၢ်တၢ်ဆိးကါအီၤတဖၣ်လီၤတူာ်ကွံာ်၀ဲဒီးတၢ်ဘၣ်သူက့ၤ၀ဲကသံၣ်လၢညီနုၢ်တၢ်ဆိးကါအီၤလၢအသဟီၣ်(တၢ်ကဲဘျူး)ဒ်သိးလိာ်သးတဖၣ်အခၢၣ်စးအိၣ်၀ဲအမဲာ်ညါကသံၣ်လၢတလီၤတူာ်ဒံးဘၣ်တဖၣ်စ့ၢ်ကီးတၢ်ဘၣ်ရဲၣ်ကျဲၤနီၤဖးဆါလီၤက့ၤအီၤအိၣ်၀ဲအဂ့ၢ်ကသံၣ်ၦၤဆါတၢ်ဖိတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ကသံၣ်လၢၦၤသူအါတဖၣ်န့ၣ်ဒုလီၤတူာ်၀ဲအဃိပဘၣ်ဆါ၀ဲက့ၤ၀ဲကသံၣ်လၢတၢ်သူအီၤလၢခၢၣ်စးသ့သ့ၣ်တဖၣ်အိၣ်၀ဲပကသံၣ်လီၤစှၤန့ၣ်ပဘၣ်ကွၢ်ဆါနီၤဖးဆါလီၤအီၤလၢတလါဘျဲၣ်အဂီၢ်ဒ်သိးၦၤကိးဂၤဒဲးကဒိးန့ၢ်ဘၣ်ကသံၣ်ကသီအဂီၢ်လီၤ”အဂ့ၢ်စံး၀ဲန့ၣ်လီၤႉ
သုးကီၣ်ကးမၤဃံးထီၣ််၀ဲကသံၣ်တၢ်၀ံစိာ်တီဆှၢလၢတၢ်ဒုးတၢ်ယၤကဲထီၣ်တၢ်လီၢ်တၢ်ကျဲတဖၣ်အပူၤအဃိကညီကီၢ်စဲၣ်တၢ်ဒုးကဲထီၣ်တၢ်လီၢ်တဖၣ်အပူၤကသံၣ်လဲၤနုာ်လီၤစှၤ၀ဲဒီးအပူၤကွံာ်လါမ့ၤအပူၤမိၢ်(တလၢၤ)ကီၢ်စဲၣ်တၢ်ထုးပိၢ်ဖးထီၣ်တိၤခံဘိကဲထီၣ်တ့ၢ်ဒံး၀ဲအသးအဃိကျဲတၢ်ဟးထီၣ်က့ၤလီၤကီခဲထီၣ်၀ဲဒၣ်န့ၣ်လီၤႉ
တကီၢ်ခါခဲအံၤကသံၣ်လၢတၢ်ဆါန့ၢ်ညီတဖၣ်တကးဘၣ်ကသံၣ်လၢတၢ်ဆါအီၤတညီဘၣ်တဖၣ်စ့ၢ်ကီးအၦ့ၤထီၣ်၀ဲအဂ့ၢ်ႇလီၢ်က၀ီၤဖိလၢအလဲၤၦ့ၤကသံၣ်ကသီတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ကျးလၢယလဲၤၦ့ၤညီနုၢ်ကသံၣ်တဖျၢၣ်န့ၣ်တဲယၤလၢအ၀ဲသ့ၣ်သနာ်က့ကၦ့ၤ၀ဲဒ်လိၣ်ဘၣ်၀ဲအသိးန့ၣ်ၦ့ၤ၀ဲတန့ၢ်ဘၣ်ဘၣ်ၦ့ၤ၀ဲဒ်တၢ်နီၤလီၤဆါအီၤအသိးလီၤအဃိန့ၣ်ကက့ၤဆါကဒါက့ၤ၀ဲလၢအဟံၣ်အဃီတဆီဒၣ်လဲၣ်တဒိးန့ၣ်ၦ့ၤဘၣ်၀ဲကသံၣ်ကသီလၢလၢၦဲၤၦဲၤဘၣ်ႉန့ၢ်လၢတနွံလံႉကသံၣ်အၦ့ၤကလံၤနါက့ထီၣ်လၢတဆးခံဆးလံႉတၢ်ဖိတၢ်လံၤလၢအအိၣ်စှၤတဖၣ်န့ၣ်အၦ့ၤထီၣ်အါတစဲးဖိႉဂံၢ်ခီၣ်ထံးကသံၣ်ကသံၣ်ကသီအၦ့ၤထီၣ်လီၤဆီလိာ်အသးထဲတစဲးဖိလီၤႉတၢ်ၦ့ၤကလံၤဒုထီၣ်မ့၀ံၤကလီၤက့ၤတအိၣ်နီဘျီဘၣ်”အဂ့ၢ်စံးဘၣ်ခ့ၣ်အဲးစံၣ်ကညီတၢ်ကစီၣ်န့ၣ်လီၤႉ
တကးဒံးဘၣ်ႇတကီၢ်ခါခဲအံၤတၢ်စူၤလီၤအဆၢကတီၢ်ဘၣ်၀ဲဒီးၦၤအါဂၤတူၢ်ဘၣ်တၢ်ဆူးတၢ်ဆါကဲထီၣ်၀ဲအသးအသိးဂံၢ်ခီၣ်ထံးကသံၣ်ကသီလၢကမျၢၢ်လီၢ်က၀ီၤဖိတဖၣ်ဆိးကါ၀ဲဒ်အမ့ၢ်(ဒံၣ်ကိၣ်ကၠ့ၣ်)ဒီး(ပၣ်ရၣ်စံၣ်တမီၣ်)တဖၣ်အံၤအၦ့ၤမ့ထီၣ်၀ဲသနာ်က့ခီဖျိဘၣ်ယိာ်၀ဲကသံၣ်ကလီၤတူာ်အဃိထဲသိးန့ၣ်ဘၣ်ၦ့ၤပာ်၀ဲအဂ့ၢ်၀့ၢ်လီၢ်က၀ီၤဖိတဂၤစံး၀ဲန့ၣ်လီၤႉ
သုးဟံန့ၢ်တၢ်စိကမၤ၀ံၤအလီၢ်ခံႇကီၢ်ပယီၤဒီတဘ့ၣ်အပူၤစုက၀ဲၤတၢ်သဘံၣ်သဘုၣ်အါထီၣ်၀ဲဒီးမုၢ်ကျိၤ၀ဲၤကွာ်တၢ်ဖံးတၢ်မၤတဖၣ်တဂၢၤကျၢၤ၀ဲဘၣ်အသိးကျိၣ်စ့အလုၢ်အၦ့ၤလီၤ၀ဲအဃိကီၢ်ပူၤဂံၢ်ခီၣ်ထံးတၢ်အီၣ်တၢ်အီႇတၢ်ဖိတၢ်လံၤဒီးကသံၣ်ကသီတဖၣ်အၦ့ၤဒိၣ်ထီၣ်၀ဲကွ့ၢ်ကွ့ၢ်န့ၣ်လီၤႉ ခီဖျိတၢ်လုၢ်တၢ်ၦ့ၤဒိၣ်ထီၣ်၀ဲဒ်အံၤအဃိဂံၢ်ခီၣ်ထံးကမျၢၢ်မုၢ်ဆ့ၣ်မုၢ်ဂီၤၦၤမၤတၢ်ဖိတဖၣ်အဂီၢ်တၢ်ဖံးတၢ်မၤႇကျိၣ်စ့တၢ်ဟဲနုာ်ဟးထီၣ်တဘၣ်လီၢ်ဘၣ်စးတဖိးမံလိာ်သးဘၣ်ဒီးတၢ်အိၣ်ဆူၣ်အိၣ်ချ့တၢ်အိၣ်တၢ်ဆိးတၢ်အီၣ်တၢ်အီတၢ်ကီတၢ်ခဲတၢ်ဂ့ၢ်ကီသ့ၣ်တဖၣ်အိၣ်ထီၣ်၀ဲဒၣ်န့ၣ်လီၤႉ
လါယူၤ ၁၇ သီႇ ၂၀၂၄ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ဒူသထူၣ်ကီၢ်ရ့ၣ် ကၠဲးထိၣ်ကီၢ်ဆၣ် ၀ီၢ်ကျီၢ်ကရူၢ်ဒီးအ့ကၣ်ဘိၤသ၀ီပူၤန့ၣ် အပူၤကွံာ်စှၤသီအခါ ပယီၤသုးနုာ်လီၤသမံသမိး၀ဲတၢ်ခူၣ်ဟီၣ်လာ်တၢ်ထူးတၢ်တီၤထူပူၤလၢတၢ်လီၢ်ခံတီၤဒီးဖီၣ်က့ၤကိး၀ဲဒၣ်ၦၤမၤထူဖိ တဖၣ်ဘၣ်ဆၣ်တုၤလၢခဲအံၤတၢ်တပျၢ်လီၤ၀ဲဒံးဘၣ်အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါ စံး၀ဲန့ၣ်လီၤႉ
ကၠဲးထိၣ်ကီၢ်ဆၣ် ၀ီၢ်ကျီၢ်ကရူၢ်ဒီးအ့ကၣ်ဘိၤ တၢ်ခူၣ်ထူပူၤတၢ်လီၢ်ခံတီၤအံၤ သုးကီၣ်ကးအၦၤ ခီၣ်ချ့သုးရ့ၣ် (ခမရ-၄၁၀) ဒီး(ခမရ-၂)နုာ်လီၤသမံသမိးတၢ်၀ံၤဖီၣ်က့ၤကိး၀ဲဒၣ်ၦၤမၤထူဖိ(၈)ဂၤ တကးဒံးဘၣ် က့ၤစိာ်ဃုာ်၀ဲ သိလ့ၣ်သ့ၣ်တဖၣ် အဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤႉ
ဖဲအပူၤကွံာ်လါယူၤ ၅ သီအနံၤန့ၣ် သုးကီၣ်ကး(ခမရ-၄၁၀)သုးရ့ၣ် အံၤ နုာ်လီၤ၀ဲဒၣ်လၢ ကၠဲးထိၣ်၀့ၢ်ဆၢခိၣ် ၀ီၢ်ကျီၢ်ကရူၢ် ၀ီၢ်ကျီသ၀ီဆၢလာ် ကၠီၤယဲအီၤ ထူပူၤတၢ်လီၢ်ဒီး ဖဲန့ၣ်ဖီၣ်က့ၤကိး၀ဲဒၣ်တၢ်မၤခိၣ် မၣ်န့ၣ်ကၠၢၣ်(၁)ဂၤႇ ၦၤနီသိလ့ၣ်ကွးဟီၣ်...
လါယူၤ ၁၅ သီ, ၂၀၂၄ နံၣ်, ခ့ၣ်အဲးစံၣ်
လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲမဟါလါယူၤ ၁၄ သီ ဟါခီ ၁ နၣ်ရံၣ်ဘျဲၣ်အဆၢကတီၢ် သုးကီၣ်ကးအမျိာ်သုး(၃၁၀)လၢအိၣ်သ့ၤစယၣ်အံၤ ခးလီၤ၀ဲဒၣ်ကျိဖးဒိၣ် (၂)ဖျၢၣ် လီၤတဲာ်ပိၢ်ဖးထီၣ်လၢအခဲၤသ၀ီဒီးသိခွၣ်သ၀ီဘၢၣ်စၢၤ အူစိမ့အီၤ အကျီးပူၤဒဲဃၢၤအဃိ ၀ါဒၣ်ကွ့သ၀ီ အူစိမ့အီၤအဖိမုၣ် မၣ်နဒၤလ့(၁၄)နံၣ်အံၤသံ၀ဲဒၣ်ဒီး ဘၣ်ဒိ၀ဲဒၣ်ဖိသၣ်ဆံး မၣ်စွ့ၤစ့ၤလ့(၁)နံၣ်ဘျဲၣ် သ့ၣ်တဖၣ်အံၤ အဂ့ၢ်န့ၣ် ကီၢ်ရ့ၣ်ၦၤဘၣ်မူဘၣ်ဒါစံး၀ဲန့ၣ်လီၤႉ
လၢန့ၣ်အမဲာ်ညါတၢ်တနံၤ၀ဲန့ၣ်အတီၢ်ပူၤသုးကီၣ်ကးအမျိာ်သုး(၃၁၀)ဒီး(ခမရ-၂၀၇)ခးလီၤကျိဖးဒိၣ်လၢ လီၢ်က၀ီၤကမျၢၢ်ဒူသ၀ီပူၤကအိၣ်လၢ (၁၅)ဖျၢၣ်ဃၣ်ဃၣ်ညါအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ.
ဒ်န့ၣ်အသိးဖဲအပူၤကွံာ်လါယူၤ ၁၂ သီအနံၤစ့ၢ်ကီး သုးကီၣ်ကးအမျိာ်သုး(၃၁၀)တဒူၣ်ဃီ၀ဲအံၤခးလီၤကျိဖးဒိၣ်အဃိ ပ့နဲကိသ၀ီဖိ ဒီဖိပၢ်ခံဂၤဘၣ်ဒိဘၣ်ထံးကဲထီၣ်တ့ၢ်အသးဒံးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
လါယူၤ ၁၄သီႇ ၂၀၂၄နံၣ်ႇ ခ့ၣ်အဲးစံၣ်ႇ
ကသူၣ်ထီၣ်သကိး“ကီၢ်သူလ့ၤ”ဒီးဖဲၣ်ဒရဲၣ်ဒံၣ်မိၣ်ကရ့ၣ်စံၣ်ကီၢ်စၢဖှိၣ်အဂီၢ်ကဘၣ်ဒုးလီၤၦီၢ်ကွံာ်မီၤစိရိၤသနူဒီးကလုာ်ဒိၣ်စိသနူအဂ့ၢ်ႇခ့ၣ်အဲးယူၣ်-ကညီဒီကလုာ်စၢဖှိၣ်ကရၢႇကရၢခိၣ်ပဒိၣ်စီၤကွဲၤထူ၀့ဆီၣ်တခူစံး၀ဲလၢလံာ်ဟ့ၣ်ယုၢ်အပူၤဖဲတနံၤအံၤလါယူၤ(၁၄)သီႇလၢအလီၤဘၣ်၀ဲကီၢ်သူလ့ၤမုၢ်နံၤၦဲၤထီၣ်(၇၅)နံၣ်အပူၤအံၤန့ၣ်လီၤႉ
လံာ်ဟ့ၣ်ယုၢ်အပူၤဆီၣ်တခူပာ်ဖျါ၀ဲလၢ“ကတီၢ်အံၤပအိၣ်လၢတၢ်ပၢၢ်ဆၢအကတီၢ်ဒီးပမူပဒါမ့ၢ်ပကဘၣ်ဒုးလီၤၦီၢ်ကွံာ်မီၤစိရိၤသနူဃုာ်ဒီးၦၤလၢအစူးကါ၀ဲကလုာ်ဒိၣ်စိသနူလၢအဒုးအိၣ်ထီၣ်ထံလီၢ်ကီၢ်ပူၤတၢ်ဒုးတၢ်ယၤတဖၣ်အမဲာာ်ညါပကဘၣ်သူၣ်ထီၣ်သကိးကီၢ်သူလ့ၤဃုာ်ဒီးဖဲၣ်ဒရဲၣ်ဒံၣ်မိၣ်ကရံၣ်စံၣ်ကီၢ်စၢဖှိၣ်လၢအအိၣ်ဒီးတၢ်အုၣ်ကီၤသးလၢကလုာ်ဒူၣ်ထံဖိကီၢ်ဖိကမျၢၢ်အတၢ်အိၣ်မူအဘူၣ်အတီၢ်လၢအဂ့ၤလါခါဆူညါအဂီၢ်အဂ့ၢ်”ပာ်ဖျါ၀ဲန့ၣ်လီၤႉ
ဒီးလၢတၢ်ကဒုးလီၤၦီၢ်ကွံာ်မီၤစိၤရိၤသနူဒီးကသူၣ်ထီၣ်၀ဲ“ဲကီၢ်သူလ့ၤ”ဒီးဖဲၣ်ဒရဲၣ်ကီၢ်စၢဖှိၣ်အဂီၢ်အဖီခိၣ်အံၤန့ၣ်ႇပကထိၣ်ဃူပာ်ဖှိၣ်သးမၤသကိးတၢ်ဒီးကလုာ်ဒူၣ်ဒံၣ်မိၣ်ကရ့ၣ်စံၣ်ဂံၢ်ဘါကရူၢ်ႇကရူၢ်ကရၢလၢအထီဒါကလုာ်ဒိၣ်စိသနူတဖၣ်လၢသုးဂ့ၢ်၀ီႇထံရုၢ်ကီၢ်သဲးဂ့ၢ်၀ီအကျဲလၢတၢ်ဆီတလဲ၀ဲကီၢ်ပယီၤထံရူၢ်ကီၢ်သဲးအက့ၢ်အဂီၤလၢအဖိးမံဒီးထံကီၢ်အံၤအတၢ်အိၣ်သးအတၢ်လိၣ်ဘၣ်အဂ့ၢ်ႇပာ်ဖျါ၀ဲလၢလံာ်ဟ့ၣ်ယုၢ်အပူၤန့ၣ်လီၤႉ
ဒ်န့ၣ်အသိးႇဒ်ခ့ၣ်အဲၣ်ယူၣ်အိၣ်၀ဲဒီးအတၢ်ပညိၣ်လၢကသူၣ်ထီၣ်ကီၢ်သူလ့ၤ(Kawthoolei Federal Unit)အသိးန့ၣ်ႇကွဲမုာ်ဆီၣ်တခူ၀ဲကညီသူၣ်ဘီၣ်သးစၢ်ကူၣ်သ့ကူၣ်သ့တဖၣ်လၢကပၣ်ဃုာ်ပၣ်သကိးလၢတၢ်ရဲၣ်တၢ်ကျဲၤပူၤအဂ့ၢ်ႇခ့ၣ်အဲၣ်ယူၣ်လီၢ်ခၢၣ်သးကမံတံာ်-အၦၤကတိၤတၢ်ပၢပဒိၣ်စီၤကျၢၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဒ်ပတၢ်ပညိၣ်ပတၢ်မုၢ်လၢ်ကွၢ်စိအိၣ်၀ဲလၢပကစံၣ်ညီၣ်တီနံလီၤပသးအဂီၢ်အသိးန့ၣ်တုၤမုၢ်မဆါတနံၤအံၤန့ၣ်ပပာ်ကတီၢ်ကွံာ်အီၤတသ့ဘၣ်ႇလိၣ်ထီၣ်ဖးထီၣ်ကသ့အဂီၢ်ပကဘၣ်ဆဲးဂုၢ်ကျဲးစၢးအီၤန့ၣ်အလီၢ်အိၣ်၀ဲသၦၢ်ကတၢၢ်လီၤႉမုၢ်မဆါတနံၤအံၤန့ၣ်ပညီဒီကလုာ်စၢဖှိၣ်ကရၢခီကရဲး(၁၇)၀ီတ၀ီ၀ံၤအလီၢ်ခံပဘိးဘၣ်ရၤလီၤ၀ဲလၢပကဒုးအိၣ်ထီၣ်က့ၤ၀ဲကီၢ်သူလ့ၤဖဲၣ်ဒရဲၣ်ယူၣ်နံၣ်အဃိန့ၣ်ဒီးဒ်သိးပတၢ်ပညိၣ်ကလၢၦဲၤထီၣ်အဂီၢ်ပအိၣ်ဒီးတၢ်ရဲၣ်တၢ်ကျဲၤလီၤတံၢ်လီၤဆဲးလီၤအဃိလၢပတၢ်ရဲၣ်တၢ်ကျဲၤ၀ဲအံၤအပူၤန့ၣ်ပအဲၣ်ဒိးလၢသူၣ်ဘီၣ်သးစၢ်တဖၣ်မ့ၢ်ဂ့ၤကညီဖိလၢအိၣ်ဒီးတၢ်ကူၣ်ဘၣ်ကူၣ်သ့တဖၣ်မ့ၢ်ဂ့ၤန့ၣ်ကြၢးလၢဟဲနုာ်လီၤပၣ်ဃုာ်ပာ်ဖှိၣ်မၤသကိးတၢ်လီၤန့ၣ်ပအဲၣ်ဒိးတဲဒုးသ့ၣ်ညါလီၤ”အဂ့ၢ်စံး၀ဲန့ၣ်လီၤႉ
တကတီၢ်ဃီႇတၢ်ဒုးအိၣ်ထီၣ်ကီၢ်သူလ့ၤမုၢ်နံၤအံၤအတၢ်ပညိၣ်တၢ်တိာ်ပာ်မ့ၢ်၀ဲဒ်သိးတၢ်ကစံၣ်ညီၣ်ပီတ့လီၤက့ၤပဘူၣ်ပတီၢ်လၢပနီၢ်ကစၢ်သ့၀ဲအဂီၢ်ခိၣ်နၢ်တဖၣ်ထံၣ်၀ဲလၢတၢ်လိၣ်ဘၣ်တမံၤအဃိဒုးအိၣ်ထီၣ်တ့ၢ်၀ဲအဂ့ၢ်ႇစံးစ့ၢ်ကီး၀ဲန့ၣ်လီၤႉ
ဒ်န့ၣ်အသိးႇဖဲ(၁၉၄၉)နံၣ်လါယူၤ(၁၄)သီအနံၤတၢ်ကရၢကရိဒုးအိၣ်ထီၣ်၀ဲကီၢ်သူလ့ၤပဒိၣ်ဒီးအတၢ်ပၢတၢ်ပြးတဖၣ်၀ံၤအလီၢ်ခံႇမုၢ်နံၤအံၤဘၣ်တၢ်ပာ်ပနီၣ်က့ၤစ့ၢ်ကီး၀ဲလၢ“ကီၢ်သူလ့ၤမုၢ်နံၤ”အဂ့ၢ်လံာ်ဟ့ၣ်ယုၢ်ပူၤပာ်ဖျါ၀ဲဒၣ်န့ၣ်လီၤႉ
လါယူၤ ၁၄ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကီၢ်သူလ့ၤတၢ်ပၢချၢၣ်လွံၢ်ထူၣ်ကီၢ်ရ့ၣ် သုးက့(၃)ဟီၣ်က၀ီၤ လၢၢ်ဒိၣ်ကီၢ်ဆၣ်ႇ ဆီထံးကီၢ်ဆၣ်ဒီး မူကီၢ်ဆၣ်ကီၢ်ဆၣ်သၢဘ့ၣ်လၢၤအပူၤ စးထီၣ်လါယနူၤအါရံၤ(၂၀၂၄)နံၣ်တုၤလါမ့ၤလၢယဲၢ်လါအတီၢ်ပူၤအံၤ ခီဖျိပယီၤသုးကီၣ်ကးခးလီၤကျိဖးဒိၣ်ဒီးအကဘီယူၤဟဲတ့ၢ်လီၤမ့ၣ်ပိၢ်အဃိဘၣ်သံကမျၢၢ်(၅၃)ဂၤဒီးဘၣ်ဒိ၀ဲ(၁၀၀)ဂၤဘျဲၣ်အဂ့ၢ်ချၢၣ်လွံၢ်ထူၣ်ကီၢ်ရ့ၣ်အၦၤဘၣ်မူဘၣ်ဒါစံး၀ဲန့ၣ်လီၤႉ
ပယီၤသုးကီၣ်ကးအံၤကိးနံၤဒဲးဃၣ်ဃၣ်န့ၣ်ဟူးဂဲၤခးလီၤ၀ဲကျိဖးဒိၣ်ဆူကမျၢၢ်ဒူသ၀ီတၢ်လီၢ်တၢ်ကျဲႇ တၢ်ဖံး အီၣ်မၤအီၣ်လီၢ်ပူၤဒ်အံၤအဖီခိၣ်လၢယဲၢ်လါအတီၢ်ပူၤကမျၢၢ်ဘၣ်သံ(၅၃)ဂၤအကျါပိာ်မုၣ်ပာ်ဃုာ်၀ဲ(၂၂)ဂၤအသိးကမျၢၢ်လၢဘၣ်ဒိဘၣ်ထံး(၁၅၄)ဂၤအကျါပိာ်မုၣ်ဘၣ်ဒိစ့ၢ်ကီး၀ဲ(၆၈)ဂၤအဂ့ၢ်ချၢၣ်လွံၢ်ထူၣ်ကီၢ်ရ့ၣ်ၦၤကတိၤတၢ်ပၢပဒိၣ်စီၤဟဲဂ့ၤစံးဘၣ်၀ဲခ့ၣ်အဲးစံး-ကညီတၢ်ကစီၣ်န့ၣ်လီၤႉ
“ပမ့ၢ်ကွၢ်က့ၤဒုၣ်ဒါတၢ်ဟူးတၢ်ဂဲၤန့ၣ်ခးလီၤ၀ဲကျိဖးဒိၣ်ကိးနံၤဒဲးဃၣ်ဃၣ်လၢဒူသ၀ီအပူၤလီၤႉ ပမ့ၢ်ကွၢ်က့ၤ စးထီၣ်(၂၀၂၄)နံၣ်တုၤလၢလါမ့ၤအတီၢ်ပူၤန့ၣ်ဒုၣ်ဒါခးလီၤကျိဖးဒိၣ်အဃိန့ၣ်ကမျၢၢ်ဘၣ်သံ(၅၃)ဂၤအကျါန့ၣ်ပိာ်ခွါန့ၣ်(၃၁)ဂၤဒီးပိာ်မုၣ်န့ၣ်(၂၂)ဂၤမီၤနီၤႉ ကမျၢၢ်လၢအဘၣ်ဒိန့ၣ်အိၣ်၀ဲဒၣ်(၁၅၄)ဂၤအကျါန့ၣ်ပိာ်ခွါပာ်၀ဲ (၈၆)ဂၤဒီးပိာ်မုၣ်န့ၣ်(၆၈)ဂၤမီၤနီၤႉ” အဂ့ၢ်န့ၣ်စံး၀ဲဒၣ်န့ၣ်လီၤႉ
လၢန့ၣ်အမဲာ်ညါပယီၤသုးကီၣ်ကးအံၤဖီၣ်၀ဲကမျၢၢ်ထံဖိကီၢ်ဖိလၢလဲၤက့ၤၦ့ၤအီၣ်ၦ့ၤအီတၢ်မ့ၢ်ဂ့ၤႇ လ့ၢ်ထီၣ် လ့ၢ်လိၤသ့ၣ်တဖၣ်မ့ၢ်ဂ့ၤခဲလၢာ်အိၣ်၀ဲ(၂၈)ဂၤဒီးၦၤသ့ၣ်တဖၣ်န့ၣ်သုးကီၣ်ကးဃ့အီၣ်လီၤ၀ဲလၢကျိၣ်စ့၀ံၤပျၢ်လီၤက့ၤ၀ဲတနီၤအိၣ်၀ဲအသိးတနီၤန့ၣ်တန့ၢ်ဘၣ်တၢ်ဆဲးကျိၤဘၣ်ဒီးဟါမၢ်ကွံာ်၀ဲဒၣ်အိၣ်၀ဲအဂ့ၢ်ပဒိၣ်စီၤဟဲဂ့ၤစံးအါထီၣ်၀ဲဒၣ်န့ၣ်လီၤႉ
တကးဒံးဘၣ်လၢယဲၢ်လါအတီၢ်ပူၤခီဖျိသုးကီၣ်ကးခးလီၤကျိဖးဒိၣ်အဃိဘၣ်ဟးဂီၤကွံာ်၀ဲကမျၢၢ်ဟံၣ်ဃီမ့ၢ်ဂ့ၤႇ ပယီၤသုးကီၣ်ကးနုာ်လီၤလၢကမျၢၢ်ဒူသ၀ီအပူၤဒွဲၣ်အူကွံာ်၀ဲကမျၢၢ်ဟံၣ်ဃီမ့ၢ်ဂ့ၤခဲလၢာ်အိၣ်၀ဲ(၂၀၅)ဖျၢၣ် အဂ့ၢ်သ့ၣ်ညါဘၣ်န့ၣ်လီၤႉ
ဒ်န့ၣ်အသိးဖဲပူၤကွံာ်လါမ့ၤအတီၢ်ပူၤပယီၤသုးကီၣ်ကးအသုးကလၢၤတဖျၢၣ်လၢအမ့ၢ်(ဘီကထၣ်)သုးကလၢၤအံၤဖဲလၢတၢ်လဲၤက၀ီၤတံာ်ခး၀ဲဒီးဘၣ်ဂုာ်က့ၤ၀ဲအခံ၀ံၤအလီၢ်ခံပယီၤသုးကီၣ်ကး(ကီၢ်ခီဒိၣ်အခိၣ်ခံဂၤတဂၤ)အနီၢ်ကစၢ်ဒၣ်၀ဲဟဲထီၣ်ဟူးဂဲၤမၤ၀ဲဒုးယၤတၢ်ရဲၣ်တၢ်ကျဲၤအဂ့ၢ်ပဒိၣ်စီၤဟဲဂ့ၤစံး၀ဲဒ်အံၤန့ၣ်လီၤႉ
“တၢ်လဲၤက၀ီၤတံာ်ခး၀ဲသုးကီၣ်ကး(ဘီကထၣ်)သုးကလၢၤ၀ံၤဒီးသုးကီၣ်ကးဂုာ်က့ၤအခံ၀ံၤအလီၢ်ခံန့ၣ်အ၀ဲသ့ၣ်မၤအါထီၣ်အဂံၢ်ဘါဒီးမၤ၀ဲဒၣ်ဒုးယၤတၢ်ရဲၣ်တၢ်ကျဲၤသ့ၣ်တဖၣ်လီၤႉ လၢဒုးယၤတၢ်ရဲၣ်တၢ်ကျဲၤအပူၤန့ၣ် ပမ့ၢ်ကွၢ်န့ၣ်သုးကီၣ်ကးကီၢ်ခီဒိၣ်အခိၣ်ခံဂၤတဂၤအနီၢ်ကစၢ်ဒၣ်၀ဲဟဲဆ့ၣ်နီၢ်၀ဲလၢဆီထံးကီၢ်ဆၣ်ဒီးတီခိၣ်ရိၣ်မဲဒီးရဲၣ်ကျဲၤ၀ဲဒၣ်လီၤ” အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ဒ်န့ၣ်အသိးပယီၤသုးကီၣ်ကးအသုးကျိၤလၢအဟဲထီၣ်သ့ၣ်တဖၣ်တကီၢ်ခါခဲအံၤန့ၣ်ဟူးဂဲၤအိၣ်ဒံး၀ဲဒၣ်ဖဲ ကီၢ်သၣ်စ့ႇ ကိမၠ့ၣ်သါယၤႇ ရှူၣ်ခ့သါယၤ ဒူသ၀ီဖဲန့ၣ်သ့ၣ်တဖၣ်အပူၤအသိးနုာ်လီၤဒွဲၣ်အူကွံာ်ကမျၢၢ်ဒူသ၀ီ ဒီးၦၤလီၢ်အိၣ်ကမှံဖိ သ့ၣ်တဖၣ်အိၣ်တၢ်အလီၢ်အဃိတကီၢ်ခါခဲအံၤၦၤလီၢ်အိၣ်ကမှံသ့ၣ်တဖၣ်ဘၣ်ကွၢ်ဆၢ မဲာ်ဘၣ်၀ဲဒီးတၢ်အိၣ်တၢ်ဆိးႇ တၢ်အီၣ်တၢ်အီၣ်ဒီးကသံၣ်ကသီတၢ်ဂ့ၢ်ကီအဂ့ၢ်သ့ၣ်ညါဘၣ်လၢလီၢ်က၀ီၤၦၤ ဘၣ်မူဘၣ်ဒါအအိၣ်န့ၣ်လီၤႉ
လါယူၤ ၁၄ သီႇ ၂၀၂၄ နံၣ်ႇ ခ့ၣ်အဲးစံၣ်
တနံၤအံၤလါယူၤ ၁၄ သီအနံၤန့ၣ် မ့ၢ်၀ဲဒၣ်ကီၢ်သူလ့ၤမုၢ်နံၤၦဲၤထီၣ်၀ဲဒၣ်(၇၅)နံၣ်ဒီး လၢမုၢ်နံၤအံၤအဖီခိၣ် ကညီကီၢ်ကအိၣ်ဖျါထီၣ်က့ၤဒီးကမၤန့ၢ်က့ၤတၢ်သဘျ့အဂီၢ် ကညီဖိတဖၣ်အလီၢ်အိၣ်လၢကမၤသကိးတၢ် အိၣ်ဒီးတၢ်ပညိၣ်တခါဃီလၢကမၤန့ၢ်က့ၤကီၢ်သူလ့ၤအဂ့ၢ်န့ၣ် ကီၢ်သူလ့ၤသုးမုၢ်ဒိၣ်(KTLA) သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤနၢၤဒါဘိၣ်မၠး စံးလီၤ၀ဲလၢအလံာ်ဟ့ၣ်ယုၢ်ပူၤန့ၣ်လီၤႉ
ဒ်သုးခိၣ်ကျၢၢ်ဒိၣ်စိ စီၤနၢၤဒါဘိၣ်မၠး အလံာ်ဟ့ၣ်ယုၢ်ပူၤပာ်ဖျါ၀ဲအသိးန့ၣ် ကီၢ်သူလ့ၤမ့ၢ်၀ဲၦၤကညီအကီၢ်လၢ မိၢ်ပၢ်ဖံဖု ဟ့ၣ်န့ၢ်သါ၀ဲကညီဖိဒီးလၢန့ၣ်အမဲာ်ညါကညီဖိအံၤအိၣ်ဒီးအထံအကီၢ်အတၢ်စံၣ်စိၤတဲစိၤအတၢ်ကွဲးနီၣ်ကွဲး ဃါသ့ၣ်တဖၣ် အဂ့ၢ်န့ၣ် လံာ်ဟ့ၣ်ယုၢ်အပူၤစံး၀ဲန့ၣ်လီၤႉ
ဒ်န့ၣ်အသိးခီဖျိကလုာ်ဂၤဒီးသုးမီၤစိရိၤဟံန့ၢ်ဆူၣ်ပထံပကီၢ်ႇဆီၣ်ဘံၣ်ဆီၣ်ဘၢပၦၤကလုာ်အဃိ ၦၤတသ့ၣ်ညါ လၢၤက့ၤကညီအကီၢ်ဘၣ်ဒီးလၢတၢ်န့ၣ်အဃိဒ်သိးပၦၤကညီဖိအထံအကီၢ်ကအိၣ်ဖျါထီၣ်က့ၤႇ ကညီကဒိးန့ၢ် က့ၤ တၢ်သဘျ့အဂီၢ် ပ၀ဲပၦၤကညီဖိခဲလၢာ်ကမၤသကိးတၢ်ဃူဃူအိၣ်ဒီးတၢ်ပညိၣ်တခါဃီလၢကမၤန့ၢ်က့ၤ ပထံပကီၢ် အဂ့ၢ်န့ၣ် စီၤနၢၤဒါဘိၣ်မၠး ဟ့ၣ်သဆၣ်ထီၣ်၀ဲလၢအလံာ်ဟ့ၣ်ယုၢ်ပူၤန့ၣ်လီၤႉ
လၢတၢ်န့ၣ်အဃိၦၤလၢခံတစိၤကအိၣ်မုာ်မုာ်ခုၣ်ခုၣ်ဒီးသုတဘၣ်တၢ်ဆီၣ်ဘံၣ်ဆီၣ်ဘၢအီၤတဂ့ၤအဂီၢ်န့ၣ်ကီၢ်သူလ့ၤအံၤမ့ၢ်တၢ်အရ့ဒိၣ်လၢကညီဖိခဲလၢာ်အဂီၢ်အဃိကညီဖိခဲလၢာ်ကပာ်ဖှိၣ်ထီၣ်သးမၤန့ၢ်က့ၤပကီၢ်သူလ့ၤအဂ့ၢ်န့ၣ် သုးခိၣ်ကျၢၢ်ဒိၣ်စိ စီၤနၢၤဒါမၠး...
လါယူၤ ၁၃သီႇ ၂၀၂၄နံၣ်ႇ ခ့ၣ်အဲးစံၣ်ႇ
ကီၢ်ကၠီၣ်တဲၣ်-ကီၢ်ပယီၤကီၢ်ဆၢသူမွဲကျိအနံၤႇလၢၢ်ဃီၤၦၤဃ့ၢ်တၢ်ဒုးလီၢ်အိၣ်ကဒုကၠိဖိတဖၣ်အံၤႇလၢတနံၣ်အံၤ(၂၀၂၄-၂၀၂၅)ကၠိတၢ်မၤလိနံၣ်အဂီၢ်ႇလိၣ်ဘၣ်၀ဲကၠိဖိအတၢ်သူတၢ်စွဲတၢ်ပီးတၢ်လီသ့ၣ်တဖၣ်အဂ့ၢ်ႇၦၤကွၢ်ထွဲလီၢ်အိၣ်ကဒုၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
လၢၢ်ဃီၤလီၢ်အိၣ်ကဒုဖိသၣ်တဖၣ်အံၤႇအပူၤကွံာ်တၢ်မၤလိနံၣ်အပူၤမၤလိ၀ဲတၢ်လၢအနီၢ်ကစၢ်လီၢ်အိၣ်ကဒုတၢ်အိၣ်ဆိးလီၢ်ကျဲပူၤဘၣ်ဆၣ်ႇတနံၣ်အံၤခီဖျိတၢ်သူၣ်ထီၣ်န့ၢ်၀ဲအ၀ဲသ့ၣ်တၢ်မၤလိလီၢ်တန့ၢ်လၢၤဘၣ်အဃိပာ်ဖှိၣ်သးလဲၤမၤလိက့ၤ၀ဲတၢ်လၢလၢၢ်ဃီၤသ၀ီတီၤဖုၣ်ကၠိအပူၤအဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
လီၢ်အိၣ်ကဒုကၠိဖိတဖၣ်အံၤႇပာ်ဖှိၣ်သးမၤလိတၢ်တပူၤဃီအိၣ်၀ဲဘၣ်ဆၣ်ခီဖျိကၠိတၢ်ပီးတၢ်လီတၢ်သူတၢ်စွဲတဖၣ်တကူတလၢဘၣ်အိၣ်၀ဲအဃိအ၀ဲသ့ၣ်တဖၣ်လိၣ်ဘၣ်၀ဲကၠိတၢ်သူတၢ်စွဲတၢ်ပီးတၢ်လီဒ်အမ့ၢ်လံာ်လဲၢ်တၢ်ကွဲးထိၣ်ဒံးဘိတၢ်သူတၢ်စွဲတဖၣ်အဂ့ၢ်ႇလၢၢ်ဃီၤၦၤကွၢ်ထွဲၦၤဃ့ၢ်အိၣ်ကဒုဖိမူဒါခိၣ်နီၢ်အဲၣ်၀ါစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ကိးနံၣ်ဒဲးပသိၣ်လိတၢ်လၢလီၢ်အိၣ်ကဒုတၢ်လီၢ်တၢ်ကျဲအပူၤလီၤႉတနံၣ်ညါအံၤန့ၣ်ပလီၢ်အိၣ်ကဒုဖိတဖၣ်ပတ့ထီၣ်တၢ်မၤလိလီၢ်သ့ၣ်တဖၣ်တန့ၢ်ဘၣ်အဃိပတၢၣ်ပီၣ်သကိးတၢ်ဒီးလၢၢ်ဃီၤတီၤဖုၣ်ကၠိ၀ံၤႇပဟ့ၣ်ထီၣ်အ၀ဲသ့ၣ်တဖၣ်တပူၤဃီလီၤႉဖိသၣ်သ့ၣ်တဖၣ်အံၤကထီၣ်ကၠိအဂီၢ်တၢ်ကီတၢ်ခဲအိၣ်၀ဲလၢကၠိတၢ်သူတၢ်စွဲလံာ်လဲၢ်ဒ်သိးခီပ့ၣ်ႇစၢၢ်ဘိႇထိၣ်ဒံးဘိႇပနိဘျၢသ့ၣ်တဖၣ်လီၤႉခဲအံၤစးထီၣ်ထီၣ်ကၠိလံဘၣ်ဆၣ်အလံာ်အလဲၢ်တဖၣ်န့ၣ်က၀ံထီၣ်၀ံလီၤ၀ဲမးတအိၣ်ဘၣ်ႉဒီးဘၣ်လၢတၢ်စူၤခါကတီၢ်လံဘၣ်ဆၣ်အခိၣ်မီၤသ့ၣ်တဖၣ်တအိၣ်ဘၣ်အဃိဒ်သိးကအိၣ်ဆူၣ်အိၣ်ချ့အဂီၢ်လိၣ်ဘၣ်၀ဲခိၣ်မီၤသ့ၣ်တဖၣ်လီၤ”အဂ့ၢ်စံး၀ဲဒၣ်န့ၣ်လီၤႉ
လၢန့ၣ်အမဲာ်ညါႇလီၢ်အိၣ်ကဒုဖိသၣ်တဖၣ်အံၤခီဖျိတဒိးန့ၢ်ဘၣ်၀ဲတၢ်အီၣ်တၢ်အီလၢၦဲၤဘၣ်အဃိႇလိၣ်ဘၣ်၀ဲနီၢ်ခိတၢ်အီၣ်တၢ်အီလၢကအိၣ်ဆူၣ်အိၣ်ချ့ၦဲၤဂံၢ်ၦဲၤဘါစ့ၢ်ကီးအဂ့ၢ်ႇအ၀ဲစံးအါထီၣ်၀ဲဒၣ်န့ၣ်လီၤႉ
တကးဒံးဘၣ်ႇဒ်သိးကၠိဖိသ့ၣ်တဖၣ်အံၤသုတဘၣ်ဟးထီၣ်ကွံာ်ကၠိႇဟးဃုဖံးဃုမၤႇမၤစၢၤက့ၤမိၢ်ပၢ်ဒံးဘၣ်အဆၢကတီၢ်မုၢ်လၢ်၀ဲလၢတၢ်ကဆီၣ်ထွဲမၤစၢၤ၀ဲလီၢ်အိၣ်ကဒုဖိသၣ်တဖၣ်အံၤအဂ့ၢ်ႇစံးစ့ၢ်ကီး၀ဲဒၣ်န့ၣ်လီၤႉ
လၢၢ်ဃီၤတီၤဖုၣ်ကၠိအံၤႇတနံၣ်အံၤကၠိတၢ်မၤလိနံၣ်အပူၤကၠိဖိခဲလၢာ်ပာ်ဖှိၣ်အိၣ်၀ဲအဂၤ(၇၀)ဘျဲၣ်အကျါၦၤလီၢ်အိၣ်ကဒုဖိပာ်ဃုၣ်၀ဲအဂၤ(၃၀)ဘျဲၣ်ဒီးသရၣ်၊သရၣ်မုၣ်အိၣ်၀ဲ(၆)ဂၤအကျါႇလီၢ်အိၣ်ကဒုသရၣ်မုၣ်ပၣ်ဃုာ်၀ဲ(၂)ဂၤအဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ဒ်န့ၣ်အသိးႇလၢၢ်ဃီၤလီၢ်အိၣ်ကဒုတၢ်အိၣ်တၢ်ဆိးအပူၤလီၢ်က၀ီၤဖိလၢဟဲအိၣ်ဆိး၀ဲတဖၣ်အံၤမ့ၢ်၀ဲလ့က့ၣ်ကီၤႇအူကရ့ၣ်ထၣ်ႇလ့ဂီၤကၠိႇလီၢ်က၀ီၤဖိတဖၣ်ဒီးၦၤသ့ၣ်တဖၣ်အံၤအိၣ်ဆိး၀ဲဖဲလၢၢ်ဃီၤလီၢ်အိၣ်ကဒုတၢ်လီၢ်အပူၤယံာ်၀ဲလၢ(၂)နံၣ်လံဒီးအ၀ဲသ့ၣ်တဖၣ်အံၤအနီၢ်ဂံၢ်အိၣ်၀ဲအဂၤ(၃၀၀)ဘျဲၣ်အဂ့ၢ်ႇၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
လါယူၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ်
တနီသရံၣ်ကီၢ်ခီဒိၣ် ယ့ၣ်ဖၠူၣ်ကီၢ်ဆၣ် ယါဖူသ့ၣ်သ၀ီအကပိာ်ကပၤတၢ်လီၢ်သ့ၣ်တဖၣ်မ့ၢ်လၢတၢ်ဒုးတၢ်ယၤ ကဲထီၣ်၀ဲလၢခံခီခံကပၤအဘၢၣ်စၢၤအဃိၦၤလီၢ်က၀ီၤဖိလၢဘၣ်ဃ့ၢ်တၢ်ဒုးတၢ်ယၤသ့ၣ်တဖၣ်ကတီၢ်ခဲအံၤန့ၣ်မ့ၢ်လၢတၢ်စူၤခါကတီၢ်အဃိဘၣ်သဂၢၢ်၀ဲဒၣ်ဒီးတၢ်အိၣ်တၢ်ဆိးလီၢ်ကျဲၤအဂ့ၢ်ၦၤမၤစၢၤၦၤလီၢ်အိၣ်ကမှံသ့ၣ်တဖၣ်စံး၀ဲန့ၣ်လီၤႉ
ယါဖူသ့ၣ်သ၀ီအကပိာ်ကပၤတၢ်လီၢ်အပူၤအံၤဖဲလါယူၤ(၇)သီအနံၤန့ၣ်ခီဖျိတၢ်ဒုးတၢ်ယၤကဲထီၣ်၀ဲလၢခံခီခံကပၤအဘၢၣ်စၢၤအမဲာ်ညါသုးကီၣ်ကး(မီရၣ်၀တံ)ထံသုးအ၀ဲၤလီၢ်ခိၣ်သ့ၣ်လၢအိၣ်(ယ့ၣ်ဖၠူၣ်)ကီၢ်ဆၣ်အပူၤအံၤခးလီၤ၀ဲကျိၣ်ဖးဒိၣ်အဃိသ၀ီဒီဖျၢၣ်ၦၤလီၢ်က၀ီၤဖိသ့ၣ်တဖၣ်ဘၣ်ဃ့ၢ်ထီၣ်၀ဲဒ်အံၤအဖီခိၣ်တကီၢ်ခါခဲအံၤန့ၣ်အ၀ဲသ့ၣ်သဂၢၢ်ဘၣ်၀ဲဒီးတၢ်အိၣ်တၢ်ဆိးတၢ်ကီတၢ်ခဲအဂ့ၢ်ယ့ၣ်ဖၠူၣ်ကီၢ်ဆၣ်ၦၤမၤစၢၤၦၤလီၢ်အိၣ်ကမှံဖိတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ “စးထီၣ်လၢဘၣ်ဃ့ၢ်တုၤခဲအံၤန့ၣ်အ၀ဲသ့ၣ်ဘၣ်ကွၢ်ဆၢၣ်မဲာ်၀ဲတၢ်အိၣ်တၢ်ဆိးလီၢ်ကျဲအဖၢ မုၢ်လီၤႉ ကတီၢ် ခဲအံၤန့ၣ်မ့ၢ်လၢတၢ်စူၤခါမီၤနီၤႉ ၀ံၤဒီးအ၀ဲသ့ၣ်ဃ့ၢ်အိၣ်ကဒုသးတၢ်လီၢ်လၢအဘူးန့ၣ်အိၣ်၀ဲ ကျီးကရၢၢ်အပူၤလီၤအဃိန့ၣ်အ၀ဲသ့ၣ်ဘၣ်အိၣ်လၢကျီးကရၢၢ်တၢ်လီၢ်လၢအလီၤဟိအလီၢ်ပူၤလီၤႉ တၢ်အခိၣ်ဒု(တၤလပၣ်)သ့ၣ်တဖၣ်ဒီးကဆ့ၣ်နီၤအဂီၢ်တၢ်အဒါ(ချီၣ်)သ့ၣ်တဖၣ်လိၣ်၀ဲမီၤနီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ပယီၤသုးကီၣ်ကးခီၣ်ချ့သုးရ့ၣ်(ခမရ-၄၁၀)လၢအိၣ်ဆီလီၤအသးဖဲ(ယ့ၣ်ဖၠူၣ်)၀့ၢ်ဟီၣ်က၀ီၤအပူၤအၦၤသ့ၣ် တဖၣ်တကီၢ်ခါခဲအံၤန့ၣ်ခီဖျိအ၀ဲသ့ၣ်နုာ်လီၤဟံန့ၢ်တၢ်လီၢ်လၢ(ယါဖူသ့ၣ်)သ၀ီပူၤအဃိၦၤလီၢ်က၀ီၤဖိသ့ၣ်တဖၣ်က့ၤအိၣ်က့ၤဆိးလၢဒူသ၀ီအပူၤတဘူၣ်ဒံးဘၣ်အဂ့ၢ်အ၀ဲစံးအါထီၣ်၀ဲဒၣ်န့ၣ်လီၤႉ
တကီၢ်ခါခဲအံၤတနီသရံၣ်ကီၢ်ခီအပူၤမ့ၢ်လၢတၢ်စူၤလီၤ၀ဲတပယူာ်ဃီအဃိၦၤဃ့ၢ်တၢ်ဒုးဖိလၢလဲၤအိၣ်လဲၤဆိးလၢကျီးကရၢၢ်ပူၤသ့ၣ်တဖၣ်သဂၢၢ်ဘၣ်၀ဲဒီးတၢ်အိၣ်တဆူၣ်အိၣ်တချ့တၢ်ဂ့ၢ်ကီအမဲာ်ညါကသံၣ်ကသီတကူတလၢတၢ်ဂ့ၢ်ကီစ့ၢ်ကီးသဂၢၢ်ဘၣ်၀ဲအဂ့ၢ်ၦၤမၤစၢၤၦၤလီၢ်အိၣ်ကမှံဖိစံးအါထီၣ်၀ဲဒၣ်န့ၣ်လီၤႉ
“ၦၤဃ့ၢ်တၢ်ဒုးဖိသ့ၣ်တဖၣ်န့ၣ်အနီၣ်ဂံၢ်အိၣ်၀ဲ(၅၀၀)ဂၤဘျဲၣ်မီၤနီၤႉ ၦၤဖိသၣ်သ့ၣ်တဖၣ်န့ၣ်အါကတၢၢ်လီၤႉ ၦၤဖိသၣ်အါဒၣ်တၢ်တက့ၢ်န့ၣ်တၢ်စူၤခါအဆၢကတီၢ်န့ၣ်မ့ၢ်လၢတၢ်ချံၣ်အဃိန့ၣ်ဆိက့ဆါဘီအိၣ်၀ဲလီၤႉ မ့မ့ၢ်ဆၢကတီၢ်ခဲအံၤဒုကသံၣ်ကသီလၢအိၣ်ဒီးၦၤန့ၣ်ပကူဆါယါဘျါန့ၢ်၀ဲလီၤ”အဂ့ၢ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
လၢန့ၣ်အမဲာ်ညါ(ယါဖူသ့ၣ်)သ၀ီအဃၢၤမ့ၢ်လၢခံခီခံကပၤတၢ်ဒုးတၢ်ယၤကဲထီၣ်၀ဲဒီးသုးကီၣ်ကးထံသုးစ့ၢ်ကီးခးတပျုာ်တပျီၤကျိဖးဒိၣ်အဃိဘၣ်သံ၀ဲဖိသၣ်ဆံး(၈)လါတဂၤႇ ဖိသၣ်ဖိ(၇)နံၣ်တဂၤဃုာ်ဒီးအမိၢ်အပၢ် ခဲလၢာ်(၄)ဂၤဘၣ်သံ၀ဲဒၣ်အဂ့ၢ်လီၢ်က၀ီၤဖိသ့ၣ်တဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
တကီၢ်ခါခဲအံၤသုးကီၣ်ကးသ့ၣ်တဖၣ်လၢတၢ်ကက့ၤထီၣ်မၤန့ၢ်က့ၤ၀ဲတၢ်ပၢၢ်ဆၢသုးပာ်ဖှိၣ်သ့ၣ်တဖၣ်ဒိၣ်စိဖီၣ်ဂၢၢ်ဃာ်၀ဲယ့-ဒ၀ဲၢ်ကျဲမုၢ်အံၤအဂီၢ်သုးကီၣ်ကးအံၤဟူးဂဲၤဟဲထီၣ်၀ဲဒၣ်ဒီးကမျၢၢ်အသိလ့ၣ်ႇ သိလ့ၣ်တီၣ်လၢၢ် သ့ၣ်တဖၣ်အဖီခိၣ်စးထီၣ်ဖဲလါယူၤ(၉)သီအနံၤန့ၣ်တၢ်ဂ့ၢ်အရ့ဒိၣ်မ့ၢ်တအိၣ်ဘၣ်န့ၣ်တဘၣ်လ့ၣ်ထီၣ်လ့ၣ်လိၤ၀ဲကျဲမုၢ်အံၤဘၣ်အဂ့ၢ်(MSRF)ဟ့ၣ်ပလီၢ်ဃာ်၀ဲဒၣ်န့ၣ်လီၤႉ
လါယူၤ ၁၃ သီႇ ၂၀၂၄ နံၣ်ႇ ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ ဖဲမဟါလါယူၤ ၁၂ သီ တနံၤဃီအတီၢ်ပူၤ ပယီၤသုးခးလီၤ၀ဲဒၣ်ကျိဖးဒိၣ်(၁၂)ဖျၢၣ်ဆူဒူသ၀ီပူၤအဃိ ကျိဖးဒိၣ်အက့အခီဘၣ်၀ဲဒၣ် ၦၤဒီဖိပၢ်ခံဂၤ ဒီး ဟံၣ်ဟးဂီၤ၀ဲဒၣ်(၃)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဖဲမဟါလါယူၤ ၁၂ သီ ဂီၤခီ(၁၀)ဃၣ်ဃၣ်အဆၢကတီၢ် သုးကီၣ်ကးအမျိာ်သုး(၃၁၀)လၢအိၣ်သ့ၤစ့ၤယၣ်အံၤ ပညိၣ်ခးလီၤ၀ဲဒၣ်ကျိဖးဒိၣ်(၈)ဖျၢၣ်ဆူ စ့ၣ်ကွ့ဒီးအခဲၤသ၀ီပူၤအဃိ ဟံၣ်လီၤၦီၢ်ဟးဂီၤ၀ဲဒၣ်(၃)ဖျၢၣ်ဒီး တကတီၢ်ဃီ ဖဲဟါခီ(၁)နၣ်ရံၣ်အဆၢကတီၢ်ခးလီၤကဒီး၀ဲကျိဖးဒိၣ်(၄)ဖျၢၣ််ဆူပ့နဲကိသ၀ီဃၢၤအဃိ ကျိဖးဒိၣ်အက့အခီဘၣ်၀ဲ ဒၣ်ၦၤဒီဖိပၢ်(၂)ဂၤလၢအမ့ၢ် အူသါအူ(၆၄)နံၣ်ဒီးအဖိမုၣ် ညံၤညံၤ၀့(၃၁)နံၣ်သ့ၣ်တဖၣ်အံၤ အဂ့ၢ်န့ၣ် ဒူသထူၣ်ကီၢ်ရ့ၣ် ၦၤကတိၤတၢ်ပၢ ပဒိၣ်စီၤအ့နဲၤ စံး၀ဲန့ၣ်လီၤႉ
အ၀ဲစံး၀ဲလၢ“အခဲၤသ၀ီနါက့ကျိဖးဒိၣ်လီၤတဲာ်ႇစ့ၣ်ကွ့သ၀ီနါက့လီၤတဲာ်စ့ၢ်လီၤႉတၢ်မၢၤဖဲဟါခီ ၁ နၣ်ရံၣ်န့ၣ်...
လါယူၤ ၁၂သီႇ ၂၀၂၄နံၣ်ႇ ခ့ၣ်အဲးစံၣ်ႇ
လါလၢကဟဲလါယူၤလံ(၁၃)သီဒီး(၁၄)သီအနံၤန့ၣ်ႇ(Burma Children Medical Fund- BCMF)တီခိၣ်ရိၣ်မဲကအိးထီၣ်ကဒီး၀ဲ(၄)ဘျီတဘျီတၢ်မၤကွၢ်သးတၢ်ဆါ(Echo Screening)တၢ်ရဲၣ်တၢ်ကျဲၤလၢမဲၢ်ဆီးတၢ်ဆါဟံၣ်ဖးဒိၣ်ကရၢၢ်အပူၤအဂ့ၢ်ႇကီၢ်ပယီၤဖိသၣ်ကသံၣ်ကသီစ့ပာ်ကီၤ(BCMF)ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ
ဘၣ်ဃးဒီးတၢ်ကမၤ၀ဲတၢ်မၤကွၢ်သးတၢ်ဆါအတၢ်ရဲၣ်တၢ်ကျဲၤအံၤန့ၣ်ကမၤ၀ဲလၢခံသီအတီၢ်ပူၤဒီးႇအဆိတသီအနံၤအပူၤကကိးထံၣ်၀ဲၦၤဆါလီၢ်လံၤလၢအလဲၤပၠးတ့ၢ်သးဖဲအပူၤကွံာ်တဖၣ်ဒီးႇမ့မ့ၢ်လၢခံသီတသီအနံၤတခီကမၤကွၢ်၀ဲၦၤသီလၢအအိၣ်ဒီးသးတၢ်ဆါတဖၣ်အဂ့ၢ်(BCMF)ၦၤကွၢ်ထွဲၦၤဆူးၦၤဆါမူဒါခိၣ်သရၣ်မုၣ်နီၢ်ဘူ၀ါစ့စံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“ဘၣ်ဃးလၢပမၤ၀ဲဒၣ်တၢ်မၤကွၢ်သးတၢ်ဆါအံၤလၢပကိးလၢကိၤလၤ၀ါကျိာ်လၢအမ့ၢ်၀ဲ(Echo Screening)အံၤန့ၣ်ပကမၤအီၤလၢခံသီအတီၢ်ပူၤလီၤႉအဆိကတၢၢ်တသီတခီန့ၣ်ပကိးထံၣ်၀ဲၦၤဆါအလီၢ်လံၤလၢအပူၤကွံာ်ဟဲပၠးသး၀ံၤတခွဲဘၣ်အသးဒံးဘၣ်တဖၣ်ဃုာ်ဒီးၦၤလၢအခွဲအသး၀ံၤဘၣ်ဆၣ်ကဘၣ်မၤကွၢ်ကဒီးအသးတဖၣ်န့ၣ်လီၤႉမ့မ့ၢ်လၢလီၢ်ခံကတၢၢ်တသီခီန့ၣ်ပမ့ၢ်၀ဲဒၣ်လၢၦၤလၢအတပၠးဘၣ်အသးနီတဘျီဒံးဘၣ်ႇၦၤလၢအဲၣ်ဒိးပၠးအသးသ့ၣ်တဖၣ်လီၤအဂ့ၢ်”စံး၀ဲဒၣ်န့ၣ်လီၤႉ
လၢန့ၣ်အမဲာ်ညါႇၦၤလၢအကဟဲမၤကွၢ်သးအတၢ်ဆါသ့ၣ်တဖၣ်အံၤကဘၣ်မ့ၢ်၀ဲၦၤသ့ၣ်တဖၣ်လၢတၢ်ဟ့ၣ်ကသံၣ်ဒၢး(clinic)ပာ်ပနီၣ်အီၤလၢအအိၣ်ဒီးသးတၢ်ဆါနီၢ်နီၢ်(မ့တမ့ၢ်)ကဘၣ်မ့ၢ်ၦၤလၢအသ့ၣ်ညါလီၤအသးလၢအအိၣ်ဒီးသးတၢ်ဆါနီၢ်နီၢ်တဖၣ်လီၤအဂ့ၢ်ႇစံးအါထီၣ်၀ဲဒၣ်န့ၣ်လီၤႉ
တကးဒံးဘၣ်ႇတၢ်မၤကွၢ်သးတၢ်ဆါတၢ်ရဲၣ်တၢ်ကျဲၤအံၤႇအပူၤကွံာ်တူၢ်လိာ်မၤကွၢ်၀ဲထဲဖိသၣ်(၁၈)နံၣ်ဆူအဖီလာ်တဖၣ်လီၤဘၣ်ဆၣ်ႇခီဖျိတၢ်ဃုထံၣ်သ့ၣ်ညါ၀ဲသးစၢ်တနီၤလၢအအိၣ်ဖျဲၣ်ပၣ်ဃုာ်၀ဲဒီးသးတၢ်ဆါတဖၣ်တဒိးန့ၢ်ကူစါယါဘျါဘၣ်အသးဘၣ်အဃိႇတကီၢ်ခါအံၤကတူၢ်လိာ်၀ဲမၤကွၢ်၀ဲတုၤလၢၦၤသးနံၣ်(၃၀)သ့ၣ်တဖၣ်အဂ့ၢ်ႇစံးစ့ၢ်ကီး၀ဲဒၣ်န့ၣ်လီၤႉ
တကတီၢ်ဃီႇတၢ်မၤ၀ဲတၢ်မၤကွၢ်သးတၢ်ဆါတၢ်ရဲၣ်တၢ်ကျဲၤအံၤ(BCMF)တီခိၣ်ရိၣ်မဲဖီၣ်လိာ်စုမၤသကိး၀ဲတၢ်ဒီး Safe Blue Hearts Foundation˜မဲၢ်ဆီးတၢ်ဆါဟံၣ်ႇဃုာ်ဒီးကသံၣ်သရၣ်ဖးဒိၣ်လၢ(The Pediatric Cardiac SurgeryFoundation(PCSF)လၢအိၣ်၀ဲဟဲလၢကၠီၣ်တဲၣ်၀့ၢ်ခိၣ်ဘီကီးႇလၢအဘၣ်ထွဲဒီးတၢ်ယါဘျါသးတၢ်ဆါကရူၢ်ကရၢသ့ၣ်တဖၣ်ဒီးအ၀ဲသ့ၣ်တဖၣ်မၤ၀ဲတၢ်မၤကွၢ်သးတၢ်ဆါဖဲမဲၢ်ဆီးအံၤန့ၣ်ႇအတၢ်ပညိၣ်မ့ၢ်၀ဲဒ်သိးၦၤကိးဂၤဒဲးလၢအိၣ်ဒီးသးတၢ်ဆါတဖၣ်ကဒိးန့ၢ်ကူစါယါဘျါဘၣ်အသးတၢ်ဆါလၢအဆိအချ့အဂီၢ်အဂ့ၢ်ႇသ့ၣ်ညါဘၣ်ဒ်ၦၤဘၣ်မူဘၣ်ဒါတဖၣ်စံး၀ဲအသိးန့ၣ်လီၤႉ
ဘၣ်ဃးဒီးတၢ်မၤကွၢ်သးတၢ်ဆါအံၤကျိၣ်စ့တၢ်လၢာ်ဘူၣ်လၢၤစ့ၤတအိၣ်၀ဲဘၣ်ဒီးၦၤအသီလၢအဲၣ်ဒိးမၤကွၢ်၀ဲအသးတၢ်ဆါတဖၣ်ဆဲးကျိးဆဲးကျၢ၀ဲ(BCMF)ၦၤဘၣ်မူဘၣ်ဒါတဖၣ်သ့၀ဲလၢ(BCMF Facebook Massager)အသိးႇဆဲးကျိး၀ဲလၢလီတဲစိနီၣ်ဂံၢ်သ့၀ဲဒၣ်အဂ့ၢ်ၦၤဘၣ်မူဘၣ်ဒါတဖၣ်စံး၀ဲန့ၣ်လီၤႉ ...