လါအီးကထိဘၢၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤပူၤ တၢ်ဒုးကဲထီၣ်လၢလါစဲးပထ့ဘၢၣ်တလါအတီၢ်ပူၤန့ၣ်ပယီၤသုးတကပၤသံ(၄၀)ဘျဲၣ်ဒီးဘၣ်ဒိစ့ၢ်ကီးအဂၤ(၄၀)ဘျဲၣ်အဂ့ၢ်န့ၣ်ခ့ၣ်အဲၣ်ယူၣ်ထုးထီၣ်ပာ်ဖျါ၀ဲဖဲမဟါလါအီးကထိဘၢၣ် ၆ သီအနံၤန့ၣ်လီၤႉ
ခ့ၣ်အဲၣ်ယူၣ်(သုးက့ ၁)ဟီၣ်က၀ီၤအပူၤ လါစဲးပထ့ဘၢၣ်ထီၣ် ၁ သီတုၤလၢလါလၢာ်န့ၣ် ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်ဒီးပယီၤသုးအဘၢၣ်စၢၤတၢ်ဒုးကဲထီၣ်၀ဲ(၃၉)ဘျီဒီးဖဲန့ၣ်ပယီၤသုးတကပၤသံ၀ဲ(၄၈)ဂၤႇဘၣ်ဒိ၀ဲ(၄၁)ဂၤအဂ့ၢ်န့ၣ်ခ့ၣ်အဲၣ်ယူၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
တၢ်ဒုးကဲထီၣ်အပူၤမ့မ့ၢ်လၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဒီကလုာ်ဂၢၤသးကရၢ(KNDO)တကပၤန့ၣ်ဘၣ်ဒိ၀ဲ(၅)ဂၤဒီးသံတအိၣ်၀ဲနီတဂၤဘၣ်န့ၣ်လီၤႉ
ဒ်လံာ်တၢ်ပာ်ဖျါအပူၤပာ်ဖျါ၀ဲအသိးန့ၣ်တၢ်ဒုးကဲထီၣ်အတီၢ်ပူၤန့ၣ်ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)မၤန့ၢ်၀ဲပယီၤသုးအကျိချံၦာ်သၣ်တဖၣ်လၢအမ့ၢ် MA(၂)ခိၣ်ႇကျိဒၢ(၈)ခါႇကျိချံ(၃၉၀)ဖျၢၣ်ဒီး ခၠီၣ်လိဘၠူအဖုၣ်(၁)ခိၣ် အဂ့ၢ်န့ၣ် လံာ်တၢ်ပာ်ဖျါအပူၤစံး၀ဲန့ၣ်လီၤႉ
လၢန့ၣ်အမဲာ်ညါတၢ်ဒုးကဲထီၣ်တလါအတီၢ်ပူၤသုးမီၤစိရိၤအသိလ့ၣ်ဟးဂီၤ၀ဲ(၁၀)ခိၣ်ဒီးပယီၤသုးမီၤစိရိၤအၦၤဟဲက့ၤပာ်ဖှိၣ်မၤသကိးတၢ်ဒီးခ့ၣ်အဲၣ်ယူၣ်(သုးက့ ၁)အိၣ်၀ဲ ၂ ဂၤစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ်လံာ်တၢ်ပာ်ဖျါပူၤအသိး သ့ၣ်ညါဘၣ်န့ၣ်လီၤႉ
ခီဖျိပယီၤသုးခးလီၤကျိဖးဒိၣ်ကျိဖိတဖၣ်ဆူဒူသ၀ီတၢ်ဖံးအီၣ်မၤအီၣ်လီၢ်ကျဲအဃိ ဘၣ်ဟးဂီၤ၀ဲလီၢ်က၀ီၤကမျၢၢ်အဟံၣ်(၄)ဖျၢၣ်ဒီးသိလ့ၣ်(၁)ခိၣ်အသိးဘၣ်သံစ့ၢ်ကီး၀ဲသ၀ီဖိအကျီၢ်ပနၢ်အိၣ်၀ဲအဂ့ၢ်န့ၣ်ခ့ၣ်အဲၣ်ယူၣ်စံး၀ဲန့ၣ်လီၤႉ
ပယီၤသုးလၢအိၣ်ဆီလီၤသးဖဲခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ဟီၣ်က၀ီၤအပူၤတဖၣ်အံၤလၢအ၀ဲသ့ၣ်ကဘှီဂ့ၤထီၣ်က့ၤအသုးကလၢၤႇကမၤအါထီၣ်သုးကလၢၤတၢ်သူၣ်ထီၣ်အလီၢ်တဖၣ်အဂီၢ်န့ၣ် ဃ့ဆူၣ်၀ဲဒၣ်သ့ၣ်ႇ၀ၣ်တဖၣ်လၢလီၢ်က၀ီၤကမျၢၢ်အအိၣ်အဂ့ၢ်န့ၣ်ပာ်ဖျါ၀ဲန့ၣ်လီၤႉ
သုးဟံးန့ၢ်ထံကီၢ်တၢ်စိတၢ်ကမီၤ၀ံၤအလီၢ်ခံခီဖျိဒုးယၤတၢ်သဘံၣ်သဘုၣ်အိၣ်ထီၣ်လၢ(ခ့ၣ်အဲၣ်ယူၣ်)တၢ်ပၢဟီၣ်က၀ီၤကိးဘ့ၣ်ဒဲးအပူၤဒီးတၢ်ဒုးတၢ်ယၤဆူၣ်ထီၣ်အဃိထံဖိကီၢ်ဖိကမျၢၢ်တဖၣ်ဘၣ်ပာ်တ့ၢ်ကွံာ်အဟံၣ်အဃီတၢ်လီၢ်တၢ်ကျဲဘၣ်ဃ့ၢ်မှံဟးဖျိးအနီၣ်ဂံၢ်အိၣ်လၢကလီၢ်ညါဒီးတုၤလၢခဲအံၤတစုဘၣ်ဃ့ၢ်မုၢ်ပြံပြါဒံး၀ဲအဖၢမုၢ်န့ၣ်လီၤႉ
လါအီးကထိဘၢၣ် ၇ သီႇ ၂၀၂၂ နံၣ်ႇ ခ့ၣ်အဲးစံၣ်
သ၀ီလၢအိၣ်ဖၣ်အၣ်၀့ၢ် ဃိၣ်လိာ်ကျိကပၤဒီတကျိၤန့ၣ် ခီဖျိတၢ်ထုးထီၣ်မဲးလၢၢ်လၢဃိၣ်လိာ်ကျိပူၤ ဟဲအါထီၣ်အဃိ ထံကျိကပၤကၢၢ်လာ်ဒိၣ်ထီၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ
ခီဖျိတၢ်ထုးထီၣ်မဲးလၢၢ်လၢဃိၣ်လိာ်ကျိပူၤအဃိထံဆဲးကၢၢ်ကပၤဒီးဃိၣ်လိာ်ကျိဒီတကျိၤမံၣ်ကယ့ၤသ၀ီႇဖါနွဲၣ်ကီးႇဖါပူးႇမိၣ်ကဒံၣ်သ၀ီတဖၣ်သဂၢၢ်ဘၣ်၀ဲထံကျိကၢၢ်လာ်အဂ့ၢ်န့ၣ် မိၣ်ကဒံၣ်လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ
“လၢညါန့ၣ်သ၀ီသးၦၢ်တဲဃာ်ချံစဲးတဖၣ်လၢကထုးထီၣ်မဲးလၢၢ်လၢအယံၤဒီးထံကျိကၢၢ်ကပၤမီၤနီၤႉခီဖျိအ၀ဲသ့ၣ်ထုးထီၣ်မဲးလၢၢ်လၢဟီၣ်ခိၣ်လာ်အဃိဟီၣ်ခိၣ်တူၢ်တန့ၢ်လၢၤဘၣ်ဒီးကၢၢ်လာ်၀ဲလီၤမီၤနီၤႉတၢ်စူၤခါအကတီၢ်ခီဖျိဃိၣ်လိာ်ကျိထံထီၣ်အဃိသ၀ီနါက့လီၤဘျၢႉမူခိၣ်နါက့စူၤဒံးအဃိနးဒိၣ်တစဲးမီၤနီၤႉမ့မ့ၢ်ဟီၣ်ခိၣ်လၢအိၣ်ထံကျိကပၤလၢၦၤသူၣ်အီၣ်တၢ်သူတၢ်သၣ်တၢ်ဒိးတၢ်လၣ်သ့ၣ်တဖၣ်ခီဒုခီဖျိကၢၢ်လာ်အဃိဆှူ၀ဲခဲလၢာ်လီၤမီၤနီၤ” အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
ဘၣ်ဃးတၢ်ထုးထီၣ်မဲးလၢၢ်လၢဃိၣ်လိာ်ကျိပူၤတၢ်ဂ့ၢ်အံၤတၢ်ကစီၣ်ဟးထီၣ်လၢသ၀ီၦၤဘၣ်မူဘၣ်ဒါဒီးသ၀ီပူၤသီဘူၣ်သီခါတဖၣ်ဒိးန့ၢ်ဘၣ်စ့လၢချံစဲးအအိၣ်အိၣ်၀ဲဘၣ်ဆၣ်ခ့ၣ်အဲးစံၣ်–ကညီတၢ်ကစီၣ် ပာ်ဂၢၢ်ပာ်ကျၢၤ၀ဲလီၤလီၤဆီဆီတန့ၢ်ဒံးဘၣ်န့ၣ်လီၤႉ
အပူၤကွံာ်နံၣ်လၢညါခါစ့ၢ်ကီးဘၣ်ဃးတၢ်ထုးထီၣ်မဲးလၢၢ်လၢဃိၣ်လိာ်ကျိပူၤတၢ်ဂ့ၢ်အံၤ ဟီၣ်က၀ီၤၦၤဘၣ်မူဘၣ်ဒါတြီ၀ဲအိၣ်အဂ့ၢ်န့ၣ်သ့ၣ်ညါဘၣ်န့ၣ်လီၤႉ
လါအီးကထိဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကညီကီၣ်စဲၣ် ကီးတရံး–မၠၣ်၀တံၣ်အ့ရှါကျဲမုၢ်ခိၣ်န့ၣ် ဖဲမဟါလါအီးကထိဘၢၣ် ၅ သီအနံၤ ခီဖျိ(ပွ့ၣ်န့ၤခၠံၤ)ၦၤဂဲၤကလံၣ်ကၠးကရူၢ်အသိလ့ၣ်လီၤတကျၢၢ်ကဲထီၣ်သးအဃိသံ၀ဲတဘျီဃီ(၅)ဂၤ၀ံၤ ဖဲတနံၤအံၤန့ၣ်သံကဒီး၀ဲ(၅)ဂၤအဃိၦၤသံခဲလၢာ်အိၣ်တုၤလၢအဂၤ(၁၀)လံအဂ့ၢ်န့ၣ် မၠၣ်၀တံၣ်၀့ၢ်တၢ်တိစၢၤမၤစၢၤကရူၢ်စံး၀ဲန့ၣ်လီၤႉ
ဖဲမဟါဟါခီ ၄ နၣ်ရံၣ်ဘျဲၣ်အဆၢကတီၢ်န့ၣ် လၢမၠၣ်၀တံၣ်အ့ရှါကစၢၢ်ကျဲ(ကိခၠၤကိ)တၢ်လီၢ်န့ၣ် (ပွ့ၣ်န့ၤခၠံၤ)ၦၤဂဲၤကလံၣ်ကၠးသိလ့ၣ်လီၤတကျၢၢ်အဃိၦၤသံ၀ဲဒၣ်(၅)ဂၤအကျါပၣ်ဃုာ်၀ဲဖိသၣ်(၂)နံၣ်တဂၤအဂ့ၢ်န့ၣ် အလ့သ့ၣ်(Rescue Myawaddy)ဂ့ၢ်ဂီၢ်အူတၢ်တိစၢၤမၤစၢၤကရူၢ်ၦၤဘၣ်မူဘၣ်ဒါတဂၤ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ
အ၀ဲစံး၀ဲလၢ“ခဲအံၤပဆှၢလီၤၦၤဆါ(၇)ဂၤလၢမီၣ်လမၠဲၣ်တၢ်ဆါဟံၣ်ဖးဒိၣ်န့ၣ်မီၤနီၤႉသိလ့ၣ်န့ၣ်ဟဲထီၣ်ခံခိၣ်ႉတခိၣ်ခီန့ၣ်အဟးဂီၤအိၣ်တ့ၢ်လၢကျဲႉလၢအ၀ဲတခိၣ်ခီန့ၣ်လီၤတကျၢၢ်ႉၦၤသံခဲလၢာ်န့ၣ်(၉)ဂၤႉဘၣ်တဘျီဃီန့ၣ်သံ(၅)ဂၤႉလဲၤတုၤလၢတၢ်ဆါဟံၣ်န့ၣ်သံကဒီး(၂)ဂၤႉတဂီၤညါအံၤသံကဒီး(၂)ဂၤႉဖဲမၠၣ်၀တံၣ်တၢ်ဆါဟံၣ်အံၤၦၤဆါအိၣ်တ့ၢ်(၁၂)ဂၤမီၤနီၤႉၦၤသံတဖၣ်အကျါန့ၣ်ပၣ်ဃုာ်ဖိသၣ်(၂)နံၣ်တဂၤႉဖိသၣ်ခီန့ၣ်အတုၤလၢတၢ်ဆါဟံၣ်မးသံႉဖိသၣ်န့ၣ်လီၤတဲာ်ဖျိးကွံာ်လၢအမိစုပူၤမီၤနီၤႉဟဲတုၤလၢတၢ်ဆါဟံၣ်ဘျီၦၤကူဆါဘၣ်ဆၣ်တန့ၢ်လၢၤဘၣ်ႉဖဲတဂီၤအံၤလဲၤတုၤလၢမီၣ်လမၠဲၣ်တၢ်ဆါဟံၣ်သံကဒီးပိာ်ခွါတဂၤ”အဂ့ၢ်န့ၣ်စံး၀ဲန့ၣ်လီၤႉ
(ပွ့ၣ်န့ၤခၠံၤ)ၦၤဂဲၤကလံၣ်ကၠးကရူၢ်အံၤဖဲအ၀ဲသ့ၣ်ကဟဲထီၣ်ဂဲၤကလံၣ်လၢမၠၣ်၀တံၣ်၀့ၢ်ဟဲလၢကျဲအခါသိလ့ၣ်လီၤတကျၢၢ်ကဲထီၣ်သးဒီးၦၤဆါႇၦၤသံအစိၣ်တဖၣ်တၢ်က့ၤစိာ်၀ဲလၢမီၣ်လမၠဲၣ်လံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
မၠၣ်၀တံၣ်–ကီးတရံးအ့ရှါကျဲ(ကိခၠၤကိ)တၢ်လီၢ်အံၤမ့ၢ်တၢ်လီၢ်တခါလၢသိလ့ၣ်လီၤတကျၢၢ်ႇ သိလ့ၣ်ဘၣ်သဂၢၢ်တဲးလိာ်သးကဲထီၣ်တလီၢ်လီၢ်န့ၣ်လီၤႉဖဲအပူၤကွံာ်နံၣ်အခါစ့ၢ်ကီးသိလ့ၣ်ဖးဒိၣ်လၢအတီၣ်၀ဲကီၢ်ပယီၤၦၤမၤတၢ်ဖိလၢကလဲၤထီၣ်မၤတၢ်လၢကီၢ်ကၠီၣ်တဲၣ်ပူၤအံၤလီၤတဲာ်လၢတၢ်တြီၤပူၤဒီးဖဲန့ၣ်ၦၤသံဘၣ်ဒိဘၣ်ထံးအါအါဂီၢ်ဂီၢ်ကဲထီၣ်တ့ၢ်အသးဒံးန့ၣ်လီၤႉ
လါအီးကထိဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ်
လၢဒူးပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ် ၀ီၢ်ရီဟီၣ်က၀ီၤအပူၤ ဖဲတနံၤအံၤလါအီးကထိဘၢၣ် ၆ သီ ဂီၤခီ ၂ နၣ်ရံၣ်ဘျဲၣ်အဆၢကတီၢ်န့ၣ် ခီဖျိပယီၤသုးကဘီယူၤ(၄)ဘ့ၣ်ဟဲတ့ၢ်လီၤမ့ၣ်ပိၢ်လၢ(မဲၢ်ကသး)သ၀ီ သီခါဖၠၣ်ကရၢၢ်ပူၤအဃိ သီခါဖၠၣ်အူအီၣ်ဟးဂီၤကွံာ်၀ဲဒီတဖျၢၣ်ဒီးသီခါဘၣ်ဒိ၀ဲ(၁)ပါအဂ့ၢ်န့ၣ်သ့ၣ်ညါဘၣ်န့ၣ်လီၤႉ
ခီဖျိပယီၤသုးကဘီယူၤ(၄)ဘ့ၣ်ဟဲတ့ၢ်လီၤမ့ၣ်ပိၢ်လၢ၀ီၢ်ရ့ၣ်ကီၢ်ဆၣ်(မဲၢ်ကသး)ကၠိကပၤ သီခါဖၠၣ်ကရၢၢ်ပူၤအဃိ မ့ၣ်အူအီၣ်ဟးဂီၤကွံာ်၀ဲသီခါဖၠၣ်ဒီတဖျၢၣ်ညါဒီးသ၀ီပူၤသီဘူၣ်သီခါႇသ၀ီဖိတဖၣ်ဘၣ်ဃ့ၢ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤၦၤဘၣ်မူဘၣ်ဒါအအိၣ်န့ၣ်လီၤႉ
(မဲၢ်ကသး)သီခါဖၠၣ်အံၤသီဘူၣ်သီခါဃုာ်ဒီးကၠိဖိခဲလၢာ်အိၣ်၀ဲအဂၤ (၆၀) ဃၣ်ဃၣ်ညါဒီးကၠိဖိသ့ၣ်တဖၣ်တၢ်သိၣ်လိန့ၢ်အ၀ဲသ့ၣ်ဘၣ်ဃးတၢ်ဘူၣ်တၢ်ဘါလံာ်လဲၢ်တဖၣ်ဒီးပယီၤသုးကဘီယူၤဟဲတ့ၢ်လီၤမ့ၣ်ပိၢ်ဒ်အံၤအဖီခိၣ်န့ၣ်ဘၣ်ဒိဘၣ်ထံး၀ဲတၢ်ဘူၣ်တၢ်ဘါအဂ့ၢ်န့ၣ်သီခါ(အူသံၤရ့ၤဒၣ်)လၢအအီၣ်ဖၠၣ်ဖဲသီခါဖၠၣ်အံၤတပါစံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ
သီခါ(အူသံၤရ့ၤဒၣ်)စံး၀ဲလၢ“ပစးထီၣ်မၤလိလၢဂံၢ်ခီၣ်ထံးႇတီၤဖုၣ်ႇတီၤခၢၣ်သးတုၤလၢန့ၢ်(သၤသနၤဘွဲၣ်)လံမီၤနီၤႉပမၤထဲတၢ်ဘူၣ်တၢ်ဘါတခါလီၤႉပမ့လဲၤပၣ်ဃုာ်လၢထံရူၢ်ကီၢ်သဲးပူၤဒုတမံၤမီၤနီၤႉခဲအံၤအ၀ဲသ့ၣ်ဟဲတ့ၢ်လီၤမ့ၣ်ပိၢ်ဒ်အံၤအဃိပသးဟးဂီၤဖးဒိၣ်ညါႉခဲအံၤသီခါဃုာ်ဒီးကၠိဖိခဲလၢာ်အဂၤ(၆၀)ဘျဲၣ်ဘၣ်လဲၤစံၣ်အိၣ်လၢကီၢ်ဆၢလံမီၤနီၤ”အဂ့ၢ်န့ၣ်စံး၀ဲန့ၣ်လီၤႉ
ဖဲအပူၤကွံာ်(၄)နံၣ်ဃၣ်ဃၣ်အခါသီခါတကၣ်သ့ၣ်တဖၣ်မၤဘူၣ်လီၤစ့ဒီးတ့ထီၣ်၀ဲ(မဲၢ်ကသး)သီခါဖၠၣ်အံၤန့ၣ်လီၤႉသီခါဖၠၣ်တၢ်သူၣ်ထီၣ်အံၤကလီၤလၢ၀ဲလၢစ့ယိၤ(အကလီၢ်တကယၤ)ဃၣ်ဃၣ်ညါဒီးတနံၣ်အံၤတၢ်ရဲၣ်တၢ်ကျဲၤအိၣ်လၢတၢ်က(ယ့ၤစဲၣ်ခၠၣ်)မၤဘူၣ်မၤဘါအိၣ်၀ဲအဂ့ၢ်န့ၣ် သ့ၣ်ညါဘၣ်လၢသီခါတကၣ်အအိၣ်န့ၣ်လီၤႉ
ဖဲအပူၤကွံာ်လါအီးကထိဘၢၣ် ၃ သီအနံၤစ့ၢ်ကီး ပယီၤသုးကဘီယူၤဟဲဆှၣ်တၢ်လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရ့ၣ်ကီၢ်ဆၣ် ၀ီၢ်ရီဟီၣ်က၀ီၤသ၀ီတဖၣ်အပူၤ၀ံၤအလီၢ်ခံ ခီဖျိလီၢ်က၀ီၤသ၀ီဖိတဖၣ်လဲၤစံၣ်အိၣ်၀ဲဒၣ်လၢကစၢၢ်ကလိၦၢ်ပူၤဒီးထံဆၢကီၢ်ဆၢအိၣ်အဃိ တၢ်ဘၣ်ဒိဘၣ်ထံးအိၣ်၀ဲစှၤအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ
လၢ(ခ့ၣ်အဲၣ်ယူၣ်)ဒူပျာ်ယာ်ကီၢ်ရ့ၣ် ကီၢ်ဆၣ်ကိးဘ့ၣ်ဒဲးတၢ်ပၢဟီၣ်က၀ီၤအပူၤ ပယီၤသုးကဘီယူၤ ဟဲတ့ၢ်လီၤမ့ၣ်ပိၢ်လၢကမျၢၢ်ဒူသ၀ီတၢ််ဖံးအီၣ်မၤအီၣ်လီၢ်ကျဲဒီးတၢ်ဘူၣ်တၢ်ဘါတၢ်သူၣ်ထီၣ်ကရၢၢ်ပူၤကဲထီၣ်သးအိၣ်၀ဲတလီၢ်လီၢ်န့ၣ်လီၤႉ
လၢန့ၣ်အမဲာ်ညါတၢ်လီၢ်လၢပယီၤသုးကလၢၤအိၣ်ဆီလီၤသးအလီၢ်တဖၣ်စ့ၢ်ကီးခးလီၤ၀ဲကျိဖးဒိၣ်ဆူသ၀ီပူၤအိၣ်အဃိ ၀ီၢ်ရီလီၢ်က၀ီၤတကူၣ်တၢၣ်ႇတီၤစိႇစ့ၤပၠ့ႇမဲၢ်ကသးသ၀ီဒီးသ၀ီလၢအိၣ်ဘူးသုးကလၢၤလၢအဂၤ သ၀ီဖိတဖၣ်ဘၣ်စံၣ်ထီၣ်၀ဲအဂ့ၢ်န့ၣ် သ့ၣ်ညါဘၣ်လၢၦၤမၤစၢၤၦၤဃ့ၢ်မှံဟးဖျိးတဖၣ်အအိၣ်န့ၣ်လီၤႉ
လါအီးကထိဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ဖၣ်အၣ်၀့ၢ်ပူၤ သုးမီၤစိရိၤအၦၤဟးထီထီၣ်(CCTV)ခဲမရၢ်အိၣ်၀ဲသကုၤဆးဒးဘၣ်ဆၣ် လၢမုၢ်နၤခီန့ၣ်တၢ်ဟုၣ်တၢ်ဘျၣ်ဟဲအါထီၣ်အါန့ၢ်ဒံးအပူၤကွံာ်အဂ့ၢ်န့ၣ် ကမျၢၢ်လၢအိၣ်ပူၤတဖၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤႉ
ဖဲအပူၤကွံာ်စှၤလါအခါလၢဖၣ်အၣ်၀့ၢ်ပူၤန့ၣ်သုးမီၤစိရိၤအၦၤဟးထီထီၣ်(CCTV)ခဲမရၢ်တၢ်ဂီၤဒၢလၢမ့ၣ်အူတၢ်ပနီၣ်လီၢ်(မံပွဲၣ်)ႇက၀ီၤဒ့ပူၤႇတိၤခိၣ်ထိးဒီး၀့ၢ်ပူၤတၢ်လီၢ်သကုၤဆးဒးအိၣ်၀ဲဘၣ်ဆၣ်ဖဲစှၤသီအတီၢ်ပူၤအံၤတၢ်ဟုၣ်တၢ်ဘျၢၣ်ဟဲအါထီၣ်၀ဲဒီးၦၤဘျၣ်တဖၣ်တၢ်ဖီၣ်န့ၢ်၀ဲတအိၣ်ဘၣ်အဂ့ၢ်န့ၣ်ကမျၢၢ်လၢအိၣ်၀့ၢ်ပူၤတဂၤစံး၀ဲဒ်အံၤန့ၣ်လီၤႉ
အ၀ဲစံး၀ဲလၢ“(CCTV)ခဲမရၢ်ဒုပထံၣ်တၢ်လီၢ်ကိးတီၤဒဲးလီၤႉလၢတၢ်ကခီတဲာ်မ့ၣ်အူတၢ်ပနီၣ်လီၢ်(မံပွဲၣ်)နါက့အိၣ်ႉလၢက၀ီၤဒ့ပူၤနါက့အိၣ်မီၤနီၤႉလၢက၀ီၤဒ့(၂)တိၤခိၣ်ထိးနါက့အိၣ်အိၣ်တၢ်လီၢ်ဒီဒူၣ်ညါႉနါက့ခဲအံၤဖဲစှၤသီအတီၢ်ပူၤန့ၣ်ၦၤစ့လီၤမၢ်ႇၦၤထီၣ်ဟုၣ်တၢ်လၢဟံၣ်ပူၤအိၣ်နါက့ၦၤတချုးန့ၢ်နီတဘျီဘၣ်ႉ(CCTV)ဟးဂီၤဒုတမ့ၢ်ဘၣ်ႇဘၣ်ဆၣ်မ့ၢ်အထီထီၣ်ကွၢ်၀ဲဖဲလဲၣ်န့ၣ်တသ့ၣ်ညါဘၣ်”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
တၢ်ဟးထီထီၣ်(CCTV)ခဲမရၢ်တၢ်ဂီၤဒၢသကုၤဆးဒးအိၣ်၀ဲဘၣ်ဆၣ်သနါက့လၢ၀့ၢ်ပူၤန့ၣ်တၢ်ဟုၣ်တၢ်ဘျၣ်ကဲထီၣ်သးတပယူာ်ဃီလီၤဒီးအါဒၣ်တက့ၢ်န့ၣ်လီၤမၢ်၀ဲသိလ့ၣ်ယီၢ်(ဆဲးကဲး)ဒီးလ့ၣ်ယီၣ်သ့ၣ်တဖၣ်လီၤႉ
တၢ်ကဲထီၣ်သးအခါၦၤဆဲးလီၤတဲစိလၢဖၣ်အၣ်ပၢၤကီၢ်၀ဲၤလီၢ်အအိၣ်ဘၣ်ဆၣ်ပၢၤကီၢ်အံၤတဟံးန့ၢ်အရ့ဘၣ်အဃိကမျၢၢ်ထံဖိကီၢ်ဖိတဖၣ်သူၣ်ဟးဂီၤသးဟးဂီၤ၀ဲအဂ့ၢ်န့ၣ်ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ
ကမျၢၢ်လၢအိၣ်၀့ၢ်ပူၤလၢအဂၤတဂၤစ့ၢ်ကီးစံး၀ဲ“တၢ်မ့လီၤမၢ်န့ၣ်အါလၢ(ဆဲးကဲး)လီၤႉဖဲအပူၤကွံာ်စှၤသီအခါန့ၣ်အဟဲဟုၣ်လ့ၣ်ယီၢ်ၦၤဖီၣ်ချုး၀ဲမီၤနီၤႉဖဲန့ၣ်ၦၤဆဲးဃီၤလီတဲစိလၢပၢၤကီၢ်အအိၣ်ဘျီန့ၣ်အ၀ဲသ့ၣ်ဟဲတုၤမီၤနီၤႉမ့၀ံၤကွၢ်ဃီၤ၀ဲတဘျး၀ံၤတဲ၀ဲလၢကွၢ်လၢသုအဲၣ်ဒိးမၤန့ၣ်ႉတဖီၣ်၀ဲဘၣ်ႉဖဲန့ၣ်ပဖီၣ်ဒုးဃာ်ၦၤဟုၣ်တၢ်ဖိအံၤတနၤဒီးပပျၢ်လီၤက့ၤအီၤလီၤႉခ့ခါစိၤခဲအံၤကမျၢၢ်န့ၣ်အိၣ်၀ဲဒၣ်ကမျၢၢ်လီၤအဃိသူၣ်ဟးဂီၤသးဟးဂီၤဒိၣ်မး”အဂ့ၢ်န့ၣ်စံးဘၣ်ခ့ၣ်အဲးစံၣ်န့ၣ်လီၤႉ
စးထီၣ်ဖဲအပူၤကွံာ်(၂၀၂၁) လါဒံၣ်စ့ဘၢၣ် ၁၇ သီအနံၤန့ၣ် သုးမီၤစိရိၤအၦၤတဖၣ်ဟးထီထီၣ်၀ဲ(CCTV)ခဲမရၢ်တၢ်ဂီၤဒၢလၢတၢ်လီၢ်သကုၤဆးဒးအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
သုးဟံးန့ၢ်ဆူၣ်ထံကီၢ်တၢ်စိတၢ်ကမီၤကဲထီၣ်သး၀ံၤအလီၢ်ခံ လၢကညီကီၢ်စဲၣ်အပူၤတကးဒံးဘၣ်လၢကီၢ်ခီဒီး ကီၢ်စဲၣ်တၢ်လီၢ်တဖၣ်အပူၤန့ၣ် တၢ်ဟုၣ်တၢ်ဘျၣ်ႇတၢ်တမျာ်တၢ်ကဲထီၣ်သးအိၣ်၀ဲကိးမုၢ်နံၤဒဲးန့ၣ်လီၤႉ
လါအီးကထိဘၢၣ် ၆ သီႇ ၂၀၂၂ နံၣ်ႇ ခ့ၣ်အဲးစံၣ်
ကညီကီၢ်စဲၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ်–မဲၢ်ဆီး နီၣ်ဂံၢ်(၂)တၢ်ရ့လိာ်မုာ်လိာ်တိၤအံၤ စးထီၣ်ဖဲမဟါလါအီးကထိဘၢၣ် ၅ သီ ဂီၤခီ ၆ နၣ်ရံၣ်န့ၣ် တၢ်စးထီၣ်ပျဲသိလ့ၣ်ဖးဒိၣ်တီၣ်ပနံာ်တၢ်ဖိတၢ်လံၤ တဖၣ်လၢကဟးထီၣ်က့ၤလီၤ၀ဲလံအဂ့ၢ်န့ၣ် သ့ၣ်ညါဘၣ်လၢၦၤနီသိလ့ၣ်ဖိတဖၣ်အအိၣ်န့ၣ်လီၤႉ
လၢတၢ်ကပျဲဟးထီၣ်က့ၤလီၤကီၢ်ကၠီၣ်တဲၣ်–ကီၢ်ပယီၤကီၢ်ဆၢ နီၣ်ဂံၢ်(၂)တၢ်ရ့လိာ်မုာ်လိာ်တိၤအံၤအဂီၢ် မၠၣ်၀တံၣ်ကီၢ်ဆၢ(တၢ်ကူၣ်လဲၤမၤကၤတၢ်ဆါတၢ်ၦ့ၤ)ၦၤဘၣ်မူဘၣ်ဒါဒီးကီၢ်ကၠီၣ်တဲၣ်ၦၤဘၣ်မူဘၣ်ဒါတဖၣ်မၤ၀ဲတၢ်ထံၣ်လိာ်အိၣ်သကိး၀ံၤဖဲတနံၤအံၤဂီၤခီအဆၢကတီၢ်န့ၣ်တၢ်ပျဲသိလ့ၣ်ဖးဒိၣ်တီၣ်ပနံာ်တၢ်ဖိတၢ်လံၤတဖၣ်ဟးထီၣ်က့ၤလီၤလံန့ၣ်လီၤႉဒ်န့ၣ်အသိးပာ်ပနီၣ်၀ဲတၢ်ဆၢကတီၢ်ဂီၤခီ(၆)နၣ်ရံၣ်တုၤလၢဟါခီ(၆)နၣ်ရံၣ်ဒီးမ့မ့ၢ်သိလ့ၣ်ဖိတဖၣ်တၢ်တပျဲဟးထီၣ်က့ၤလီၤ၀ဲဒံးဘၣ်အဂ့ၢ်န့ၣ်ၦၤနီသိလ့ၣ်ဖးဒိၣ်တီၣ်ပနံာ်တၢ်ဖိတၢ်လံၤကစၢ်တဂၤစံးဘၣ်ခ့ၣ်အဲးစံၣ်ဖဲမဟါလါအီးကထိဘၢၣ် ၅ သီအနံၤလီၤႉ
အ၀ဲစံး၀ဲလၢ“စးထီၣ်အိးထီၣ်ဖဲတဂီၤညါအံၤလီၤႉပထံၣ်သိလ့ၣ်ဟဲနုာ်လီၤတခိၣ်ဒံးလီၤႉဘၣ်ဆၣ်သိလ့ၣ်ဟဲနုာ်လီၤစှၤမီၤနီၤႉအ၀ဲသ့ၣ်န့ၣ်ဟံတၢ်ဖိတၢ်လံၤန့ၢ်ထဲတမံၤလီၤႉသိလ့ၣ်လၢအဂၤန့ၣ်တန့ၢ်ဘၣ်န့ၢ်လၢသိလ့ၣ်ဖးဒိၣ်တီၣ်ပနံာ်တၢ်ဖိတၢ်လံၤတဖၣ်လီၤႉမ့မ့ၢ်သိလ့ၣ်တီၣ်ပနံာ်တၢ်ဖိတၢ်လံၤန့ၣ်ဟဲန့ၢ်၀ဲထဲသိလ့ၣ်ကစၢ်တဂၤဒီးၦၤပိာ်သိလ့ၣ်ခံတဂၤလီၤႉတၢ်ဆၢကတီၢ်ခီန့ၣ်ပာ်ပနီၣ်၀ဲစးထီၣ်ဂီၤခီ ၆ နၣ်ရံၣ်တုၤလၢဟါခီ ၆ နၣ်ရံၣ်လီၤႉ တၢ်ဖိတၢ်လံၤနါက့ အ၀ဲသ့ၣ်ပာ်ပနီၣ်ဃာ်၀ဲအိၣ်အဃိၦၤနီသိလ့ၣ်ဖိတဖၣ်ဟဲနုာ်လီၤ၀ဲတဘၣ်ဂီၢ်အါအါဘၣ်” အဂ့ၢ်န့ၣ်စံး၀ဲန့ၣ်လီၤႉ
တၢ်ပျဲဟးထီၣ်က့ၤလီၤသိလ့ၣ်ဖးဒိၣ်တီၣ်ပနံာ်တၢ်ဖိတၢ်လံၤတဖၣ်ဘၣ်ဆၣ် မ့မ့ၢ်သိလ့ၣ်ဖးဒိၣ်တီၣ်ပနံာ်တၢ်ဖိတၢ်လံၤလၢအိၣ်မၠၣ်၀တံၣ်၀့ၢ်ပူၤတဖၣ်ခီန့ၣ်အိၣ်ခိးကွၢ်၀ဲတၢ်အိၣ်သးဒံးအဂ့ၢ်န့ၣ် ၦၤနီသိလ့ၣ်ဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
“လၢမၠၣ်၀တံၣ်တကပၤအံၤခီန့ၣ်တဒ်သိးဒီးလၢညါခါဘၣ်မီၤနီၤႉလၢညါခါန့ၣ်ဟးထီၣ်က့ၤလီၤဘၣ်သဘျ့ႉၦၤနုာ်လီၤန့ၢ်ကိးဂၤဒဲးလီၤႉၦၤမၤအီၣ်ဆၣ်သ့ကိးဂၤဒဲးဒ်န့ၣ်မီၤနီၤႉခဲအံၤခီန့ၣ်အက့ၤအိးထီၣ်နါက့အိၣ်ဒီးတၢ်ပာ်ပနီၣ်အဃိသိလ့ၣ်တီၣ်ပနံာ်တၢ်ဖိတၢ်လံၤကစၢ်တဖၣ်န့ၣ်ဟဲဒုဘၣ်ကွၢ်၀ဲတၢ်အိၣ်သးမီၤနီၤ” အဂ့ၢ်န့ၣ်ၦၤနီသိလ့ၣ်ဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
စးထီၣ်ဖဲအပူၤကွံာ်(၂၀၂၀)လါအ့ဖြ့ၣ်ထီၣ်အခါန့ၣ် တၢ်ကးတံၢ်ကွံာ်၀ဲမၠၣ်၀တံၣ်–မဲၢ်ဆီး နီၣ်ဂံၢ်(၁)တၢ်ရ့လိာ်မုာ်လိာ်တိၤဒီးကီၢ်ဆၢတြဲၤလၢအိၣ်သူမှဲကျိဒီတကျိၤအံၤတၢ်ဟးထီၣ်က့ၤလီၤဒီး မ့မ့ၢ်နီၣ်ဂံၢ်(၂)တိၤန့ၣ်တၢ်အိးထီၣ်က့ၤ၀ဲလၢ(တၢ်ကူၣ်လဲၤမၤကၤတၢ်ဆါတၢ်ၦ့ၤ)ဒီးကီၢ်ပယီၤခီကီၢ်ၦၤမၤတၢ်ဖိလၢအိၣ်ကီၢ်ကၠီၣ်တဲၣ်ပူၤလၢကက့ၤဆူအတၢ်လီၢ်တၢ်ကျဲတဖၣ်အဂီၢ်န့ၣ်လီၤႉ
ဖဲအပူၤကွံာ်(၂၀၂၀)နံၣ် လါအီးကထိဘၢၣ် ၁၈ သီအခါန့ၣ်...
လါအီးကထိဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ်
လၢကညီကီၢ်စဲၣ် ကၠၤအ့စ့ၣ်ကၠံ၀့ၢ်ပူၤ ဖဲမဟါလါအီးကထိဘၢၣ် ၄ သီ ႇဂီၤခီ ၁၀ နၣ်ရံၣ်ဒီး မုၢ်ထူၣ် ၁၂ နၣ်ရံၣ်အဆၢကတီၢ်န့ၣ် ပယီၤသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဘၣ်သဂၢၢ်ခးလိာ်သးကဲထီၣ်၀ဲ(၂)ဘျီအဂ့ၢ်န့ၣ်လီၢ်က၀ီၤဖိတဖၣ်စံး၀ဲန့ၣ်လီၤႉ
ပယီၤသုးခီၣ်သုးရ့ၣ်(ခလရ–၃၂)ႇ(ခလရ–၂၈၄)ႇ(ခလရ–၂၈၃)သုးရ့ၣ်တဖၣ်အံၤ ဖဲအဟဲထီၣ်မၤၦဲၤသုးဂံၢ်ဘါလၢကၠၤအ့စ့ၣ်ကၠံ(ကျိဖးဒိၣ်လူၢ်)အံၤဒီး KNLA သုးရ့ၣ်(၁၇)တဖၣ်အဘၢၣ်စၢၤ တၢ်ခးလိာ်သးကဲထီၣ်၀ဲ(၂)ဘျီဖဲသူလ့ၤလူၢ်သ၀ီချၢဒီးတၢ်သံတၢ်ဘၣ်ဒိဘၣ်ထံးခီန့ၣ်တသ့ၣ်ညါဒံးဘၣ်အဂ့ၢ်န့ၣ် လီၢ်က၀ီၤဖိတဂၤစံး၀ဲဒ်အံၤန့ၣ်လီၤႉ
“တဂီၤအံၤတၢ်ခးလိာ်သးကဲထီၣ် (၂) ဘျီညါမီၤနီၤႉဖဲ ၁၀း၃၀ တုၤလၢ ၁၁း၀၀ န့ၣ်တဘျီဒီးမ့၀ံၤဖဲ ၁၂း၀၀ နၣ်ရံၣ်ဘျဲၣ်န့ၣ်ကဲထီၣ်တဘျီမီၤနီၤႉဖဲမဂီၤန့ၣ်ကဲထီၣ်ဖဲကၠၤအ့–သူလ့ၤလူၢ်သ၀ီတဘျီမီၤနီၤႉမ့မ၀ံၤဖဲ ၁၂ နၣ်ရံၣ်န့ၣ်ကဲထီၣ်ကဒီးဖဲသ၀ီချၢတဘျီမီၤနီၤႉကဲထီၣ်ဒီးပယီၤသုးရ့ၣ် (၃၂)ႇ (၂၈၄)ႇ (၂၈၃) တဖၣ်မီၤနီၤႉမ့မ့ၢ်ဘၣ်ဒိဘၣ်ထံးခီန့ၣ်တသ့ၣ်ညါဒံးဘၣ်” အဂ့ၢ်န့ၣ်စံးဘၣ် ကညီတၢ်ကစီၣ်ဖဲမဟါလါအီးကထိဘၢၣ်...
လါအီးကထိဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ်
လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅)ဟီၣ်က၀ီၤအပူၤန့ၣ် လါစဲးပထ့ဘၢၣ်တလါအတီၢ်ပူၤ ပယီၤသုးႇသုးခိးကီၢ်ဆၢ(BGF)ဒီးဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)အဘၢၣ်စၢၤ တၢ်ဒုးကဲထီၣ်၀ဲအဘျီ(၁၀၀)ဘျဲၣ်ဒီးဖဲန့ၣ်ပယီၤသုးသံအကျါပၣ်ဃုာ်၀ဲသုးရ့ၣ်ခိၣ်တဖၣ်အဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ထုးထီၣ်ပာ်ဖျါ၀ဲအသိး သ့ၣ်ညါဘၣ်န့ၣ်လီၤႉ
လါစဲးပထ့ဘၢၣ်ထီၣ် ၁ သီတုၤလၢ ၃၀ သီအနံၤန့ၣ် ခံခီခံကပၤတၢ်ဒုးကဲထီၣ်၀ဲ(၁၂၉)ဘျီဒီး ဖဲန့ၣ်ပယီၤသုးသံ၀ဲ(၉၂)ဂၤႇဘၣ်ဒိ(၆၄)ဂၤန့ၣ်လီၤႉမ့မ့ၢ်(KNLA)တကပၤန့ၣ်ဘၣ်ဟ့ၣ်လီၤကွံာ်အသးသမူလၢထံကီၢ်ဒီးၦၤကလုာ်အဂီၢ်(၁)ဂၤဒီးဘၣ်ဒိ၀ဲ(၁၃)ဂၤအဂ့ၢ်န့ၣ် မုၢ်တြီၢ်တၢ်ကစီၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
လၢန့ၣ်အမဲာ်ညါပယီၤသုးသံတဖၣ်အကျါပၣ်ဃုာ်၀ဲသုးရ့ၣ်ခိၣ်(၂)ဂၤႇသုးခိၣ်ဖိ(၂)ဂၤဒီးမ့မ့ၢ်အဘၣ်ဒိတဖၣ်အကျါန့ၣ်ပၣ်ဃုာ်၀ဲသုးရ့ၣ်ခိၣ်(၁)ဂၤႇသုးရ့ၣ်ခိၣ်ခံ(၂)ဂၤဒီးတၢ်မၤဟးဂီၤသုးမီၤစိရိၤအသိလ့ၣ်(၄)ခိၣ်လၢအတီဆှၢတၢ်အီၣ်ဒီးကျိချံမျိာ်သၣ်တဖၣ်သိးတိၤဟးဂီၤ၀ဲ(၃)ဘိအဂ့ၢ်န့ၣ်လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ
ဒ်န့ၣ်အသိးပယီၤသုးဒီး(BGF)ခးလီၤကျိဖးဒိၣ်(၄၁)ဖျၢၣ်ဆူဒူသ၀ီကမျၢၢ်တၢ်ဖံးအီၣ်မၤအီၣ်လီၢ်ကျဲဒီး ကဘီယူၤဟဲခးလီၤကျိဖးဒိၣ်အိၣ်၀ဲ(၅)ဖျၢၣ်အသိးပယီၤသုးဒီး(BGF)ခးသံကွံာ်တလးအီခိၣ်သ၀ီဖိစီၤဖိငိၤ(၄၀)နံၣ်အံၤစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်စံး၀ဲန့ၣ်လီၤႉ
ဒ်န့ၣ်အသိး BGF(၁၀၁၄)သုးရ့ၣ်လၢအိၣ်ဆီလီၤသးဖဲဘုသိၣ်ကီၢ်ဆၣ်(၀ါဒူ)ကျဲလၢအဟံးကျဲတၢ်ဘံၣ်တၢ်ဘၢ အံၤတဖၣ်မၢဆူၣ်၀ဲဒၣ်လီၢ်က၀ီၤသ၀ီဖိတဖၣ်လၢကကျီန့ၢ်အ၀ဲသ့ၣ်လၢဖှ့ဖိပျိၢ်အကျီ(၁၀၀၀)အသိးမ့တကျီဘၣ်န့ၣ်တပျဲလဲၤသ၀ီဖိလၢတၢ်လီၢ်နီတတီၤလၢၤဘၣ်ဒီးကလဲၤဖံးအီၣ်မၤအီၣ်တၢ်အဂီၢ်စ့ၢ်ကီးကတြီ၀ဲဃံးဃံးအဂ့ၢ်န့ၣ်ပျီပူၤဂံၢ်ခီၣ်ထံးတၢ်ကစီၣ်စံးဘၣ်ခ့ၣ်အဲၣ်ယူၣ်မုၢ်တြီၢ်တၢ်ကစီၣ်န့ၣ်လီၤႉ
ကတီၢ်ခဲအံၤလၢခ့ၣ်အဲၣ်ယူၣ်(သုးက့ ၅) ကမၤမိၢ်ႇကတၢၢ်တံာ်ႇမဲၤ၀့ၤဟီၣ်က၀ီၤတဖၣ်အပူၤန့ၣ် တၢ်ဒုးကဲထီၣ်အါကတၢၢ်ဒီးဟီၣ်က၀ီၤဖဲန့ၣ်အပူၤတဖၣ်ပယီၤသုးခီၣ်သုးရ့ၣ်(ခလရ–၁၉)ႇ ခီၣ်ချ့သုးရ့ၣ်(ခမရ–၃၄၁)ႇ(ခမရ–၄၃၄)ႇ(ခမရ–၄၀၇)သုးရ့ၣ်တဖၣ်ဟူးဂဲၤ၀ဲတကးဒံးဘၣ်အမဲာ်ညါ သုးခိးကီၢ်ဆၢ(BGF)သုးခိၣ်မီၤလၣ်ကၠဲၤတီခိၣ်ရိၣ်မဲ(၁၀၁၃)သုးရ့ၣ်ဒီး(၁၀၁၄)သုးရ့ၣ်တဖၣ်စ့ၢ်ကီးဟူးဂဲၤ၀ဲအဂ့ၢ်န့ၣ်သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံးတၢ်ကစီၣ်အအိၣ်န့ၣ်လီၤႉ
လါအီးကထိဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ်
လၢဖၣ်ပူၣ်ကီၢ်ဆၣ်အပူၤ ခီဖျိတၢ်ဒုးကဲထီၣ်အဃိ ကမၤမိၢ်–ကတၢၢ်တံာ်သ၀ီကျဲႇတိၤဟးဂီၤ၀ဲဒီး လီၢ်က၀ီၤကမျၢၢ်တဖၣ်ဟးထီၣ်က့ၤလီၤကီခဲထီၣ်၀ဲအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိးသ့ၣ်ညါဘၣ်န့ၣ်လီၤႉ
“ဟဲန့ၢ်တုၤဖဲကတၢၢ်တံာ်သ၀ီကပၤလီၤႉလၢကမၤမိၢ်တကပၤန့ၣ်လဲၤတန့ၢ်ဘၣ်ႉကတၢၢ်တံာ်–ကမၤမိၢ်သ၀ီဘၢၣ်စၢၤတိၤန့ၣ်ဘၣ်ဒီးမ့ၣ်ပိၢ်ဟးဂီၤလၢၤလံႉကျဲဟးဂီၤဖးဒိၣ်ညါႉတိၤနါက့တအိၣ်လၢၤဘၣ်” အဂ့ၢ်န့ၣ်ကတၢၢ်တံာ်သ၀ီဖိလၢတအဲၣ်ဒိးပာ်ဖျါအမံၤတဂၤစံးဘၣ်ခ့ၣ်အဲးစံၣ်န့ၣ်လီၤႉ
ဖဲအပူၤကွံာ်လါစဲးပထ့ဘၢၣ်အခါစ့ၢ်ကီးခီဖျိတၢ်ခိးထုးပယီၤသုးသိလ့ၣ်တီၣ်တၢ်ဖိတၢ်လံၤတခိၣ်ဒီးမ့ၣ်ပိၢ်လၢအခီ၀ဲမၠဲၣ်ကၠံငူၣ်လီၢ်က၀ီၤ(အိတီ)အံၤအဃိသုးခိးကီၢ်ဆၢ(BGF)ကးတံၢ်ကွံာ်သ၀ီပူၤချံသန့တၢ်ဟးထီၣ်က့ၤလီၤတဖၣ်အဂ့ၢ်န့ၣ် လီၢ်က၀ီၤဖိတဂၤဃီ၀ဲန့ၣ်စံးအါထီၣ်၀ဲန့ၣ်လီၤႉ
လၢန့ၣ်အမဲာ်ညါကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးပာ်ဖှိၣ်နုာ်လီၤခးသုးခိးကီၢ်ဆၢ-BGF (၁၀၁၃)သုးရ့ၣ်သုးကလၢၤဖိတဖျၢၣ်လၢအိၣ်ဆီလီၤသးဖဲကတၢၢ်တံာ်သ၀ီပူၤ ဖဲ(ကည့ၤဒိၤ)တိၤ (ကဲတီ)သ၀ီကပၤ ဘီကၠိၣ်လဲၤသ၀ီပူၤကဲထီၣ်သးဒံးအဂ့ၢ်န့ၣ်သ့ၣ်ညါဘၣ်လၢဟီၣ်က၀ီၤဂံၢ်ခီၣ်ထံး ၦၤဟ့ၣ်တၢ်ကစီၣ်ဖိအအိၣ်န့ၣ်လီၤႉ
လီၢ်က၀ီၤသ၀ီဖိိတဂၤဃီ၀ဲန့ၣ်စံး၀ဲလၢ“ဖဲမဟါတလါန့ၣ်တၢ်ခိးထုးသိလ့ၣ်ဖးဒိၣ်တခိၣ်ဒီးမ့ၣ်ပိၢ်လၢအခီဃီၤဆူမၠၣ်ကၠံငူၣ်(အိတီ)အံၤအဃိသ၀ီပူၤချံတဖၣ်တၢ်တဟ့ၣ်လဲၤ၀ဲလၢကမၤမိၢ်လၢၤဘၣ်ႉဟဲန့ၢ်တုၤလၢတချုးတုၤကမၤမိၢ်(ဖီထံခုၣ်)သ၀ီလီၤမီၤနီၤႉအိးထီၣ်ချံသန့လၢတၢ်တဘျီန့ၣ်လီၤႉခဲအံၤက့ၤကးတံၢ်ကဒီး၀ဲလံ”အဂ့ၢ်န့ၣ်စံး၀ဲန့ၣ်လီၤႉ
ဖဲအပူၤကွံာ်မဟါတလါအခါန့ၣ်သုးခိးကီၢ်ဆၢ(BGF)နုာ်လီၤမၤအါထီၣ်သုးဂံၢ်ဘါအါအါဂီၢ်ဂီၢ်လၢမၠဲၣ်ကၠံငူၣ်ဟီၣ်က၀ီၤပူၤ(၂)ဘျီညါအသိးတၢ်ဒုးကဲထီၣ်လၢ(သုးက့ ၅)ဟီၣ်က၀ီၤပူၤကိးမုၢ်နံၤဒဲးဃၣ်ဃၣ််ညါအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ
လါအီးကထိဘၢၣ် ၅ သီႇ ၂၀၂၂ နံၣ်ႇ ခ့ၣ်အဲးစံၣ်
ပယီၤသုးတြိၤ(၄၄)အသုးတြိၤခိၣ် သုးခိၣ်ကျၢၢ်ဖိ တ့ၤမိနဲၤ လၢအဟံဒုးယၤဂ့ၢ်၀ီမူဒါဖဲကညီကီၢ်စဲၣ် မၠၣ်၀တံၣ်ကီၢ်ဆၣ်အပူၤအံၤ စးထီၣ်လါအီးကထိဘၢၣ် ၂ သီအနံၤန့ၣ် တၢ်ပာ်အိၣ်ဘှံးအီၤလၢအမူဒါလီၢ်လၤပူၤလံအဂ့ၢ်န့ၣ် သ့ၣ်ညါဘၣ်န့ၣ်လီၤႉ
သုးခိၣ်ကျၢၢ်ဖိ တ့ၤမိနဲၤလၢအဟံဒုးယၤဂ့ၢ်၀ီမူဒါဖဲမၠၣ်၀တံၣ် ဖလူ–ဂီၤလ့ၤဟီၣ်က၀ီၤအပူၤအံၤ ခီဖျိအ၀ဲဒုးဟံးထီၣ်ဖီၣ်ထီၣ်ဒုးယၤဂ့ၢ်၀ီမူဒါတလၢၦဲၤဘၣ်ႇသုးဖိနုာ်လီၤမၤ(CDM)ဟဲအါထီၣ်ဒီး(KNU)မၤန့ၢ်ကျိချံၦာ်သၣ်အါအဃိ ဖဲအပူၤကွံာ်လါစဲးပထ့ဘၢၣ်အခါန့ၣ် တၢ်ကိးထံၣ်သမံသမိးအီၤလၢ(န့ၣ်ပၠံၣ်တီၣ်)န့ၣ်လီၤႉ
ဖဲအပူၤကွံာ်လါစဲးပထ့ဘၢၣ် ၉ သီအခါ လၢမၠၣ်၀တံၣ်–ဂီၤလ့ၤကျဲ သဲဖၠူၤခၠီတၢ်လီၢ်န့ၣ် (KNLA) သုးပာ်ဖှိၣ် Cobra သုးကျိၤ ဖီၣ်ချုး၀ဲ သုးတြိၤ(၄၄)စုတီၤအဖီလာ်(ခမရ–၁၀၂)သုးခိၣ်ဒိၣ်ဖိ(၁)ဂၤဃုာ်ဒီးသုးဖိ(၅)ဂၤ ဒီးမၤန့ၢ်စ့ၢ်ကီး၀ဲကျိချံၦာ်သၣ်အါအါဂီၢ်ဂီၢ်ဒံးန့ၣ်လီၤႉ
ဖဲတၢ်ကိးထံၣ်သမံသမိးသုးခိၣ်ကျၢၢ်ဖိ တ့ၤမိနဲၤအကတီၢ်န့ၣ် ဘၣ်ထွဲမၠၣ်၀တံၣ်ဒီးကီးတရံးကီၢ်ဆၣ်ပူၤဒုးယၤဂ့ၢ်၀ီမူဒါတဖၣ်အံၤ မုၢ်ထီၣ်ကလံၤထံးသုး၀ဲၤလီၢ်ခိၣ်သ့ၣ် သုးကီၢ်ခီခိၣ်–၂ ဟဲပၢဆှၢရဲၣ်ကျဲၤ၀ဲတၢ်တစိၢ်တလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ