ခ့ၣ်အဲးစံၣ် – KIC News

လါဒံၣ်စ့ဘၢၣ် ၃၀ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤ လါဒံၣ်စဲဘၢၣ် ၃၀ သီဂီၤခီအဆၢကတီၢ် တၢ်ဒုးကဲထီၣ်လၢလ့ၣ်က့ၣ်ကီာ်အခါ (KNLA)သုးပာ်ဖှိၣ်ဖီၣ်န့ၢ်၀ဲသုးမီၤစိရိၤအသုး(၇)ဂၤ ဃုာ်ဒီးကျိချံၦာ်သၣ်တဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအ၀ဲသ့ၣ်ဟဲ၀ဲဒီးၦၤကမျၢၢ်သိလ့ၣ်လၢကဆီတလဲတၢ်လီၢ်အခါ တၢ်ဖီၣ်ချုးန့ၢ်၀ဲဖဲယသ့ၣ်ကူၤသ၀ီကပၤအဂ့ၢ်န့ၣ် လီၢ်က၀ီၤတၢ်ကစီၣ်လၢအဘူးဒီး(KNLA)အံၤ စံး၀ဲန့ၣ်လီၤႉ အ၀ဲစံး၀ဲလၢ“တၢ်ဖီၣ်ချုးန့ၢ်၀ဲဖဲတနံၤအံၤတၢ်ဒုးကဲထီၣ်အပူၤလီၤႉ ဖီၣ်ချုး၀ဲ ၇ ဂၤႇပၣ်၀ဲဒီးသုးဒ့ခိၣ်တဂၤလီၤႉ အဂၤန့ၣ်မ့ၢ်၀ဲသုးဖိတဖၣ်လီၤႉ ခဲအံၤအိၣ်၀ဲဒၣ်လၢခိၣ်နၢ်အစုပူၤလီၤ”အဂ့ၢ်န့ၣ် ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ််လီၤႉ ဖဲအပူၤကွံာ်လါဒံၣ်စ့ဘၢၣ် ၁၆ သီအနံၤ တၢ်ဒုးကဲထီၣ်လၢလ့က့ၣ်ကီာ်ဟီၣ်က၀ီၤပူၤအခါစ့ၢ်ကီး (KNLA)သုးပာ်ဖှိၣ်ဖီၣ်ချုးသမူန့ၢ်၀ဲသုးမီၤစိရိၤ(ခမရ-၂၇၅)အၦၤ ၆ ဂၤဒီး သုးခိးကီၢ်ဆၢ(၂)ဂၤဒံးန့ၣ်လီၤႉ ပယီၤသုးလၢတၢ်ဖီၣ်ချုးန့ၢ်၀ဲသ့ၣ်တဖၣ်တၢ်ပာ်အ၀ဲသ့ၣ်ဂ့ၤဂ့ၤလီၤအဂ့ၢ်န့ၣ် ခ့ၣ်အဲၣ်ယူၣ်စံးဃာ်၀ဲဒၣ်န့ၣ်လီၤႉ

လါဒံၣ်စ့ဘၢၣ် ၂၉ သီႇ ၂၀၂၁ နံၣ်ႇ ခ့ၣ်အဲးစံၣ် တကီၢ်ခါတၢ်ကဲထီၣ်သးလၢသုးမီၤစိရိၤအသုးဒီးကညီဒီကလုာ်တၢ်ထူၣ်ဖျဲးသုးမုၢ်ဒိၣ်-KNLA အဘၢၣ်စၢၤတၢ်ဒုးကဲထီၣ်၀ဲဒၣ်ဖဲလ့က့ၣ်ကီာ်ဟီၣ်က၀ီၤအဖီခိၣ်အံၤ ကညီတၢ်မုာ်တၢ်ခုၣ်ကီၣ်ကး(KNU/KNLA-PC)ဒီးတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)တဖၣ်တတူၢ်လိာ်၀ဲဘၣ်အဂ့ၢ်န့ၣ် စံး၀ဲဒၣ်န့ၣ်လီၤႉ ဖဲစှၤသီအတီၢ်ပူၤအံၤ ပယီၤသုးမီၤစိရိၤမၤ၀ဲတၢ်ထီၣ်ဒုးလၢကဘီယူၤဖဲ(KNU)သုးက့ ၆ ဟီၣ်က၀ီၤပူၤအဖိခိၣ်အံၤ အ၀ဲသ့ၣ်တကပၤတူၢ်လိာ်၀ဲတသ့ဘၣ်အဂ့ၢ်န့ၣ် ကညီတၢ်မုာ်တၢ်ခုၣ်ကီၣ်ကးအနဲၣ်ရွဲၣ်သဃဲၤ သုးခိၣ်ဒိၣ်စိစီၤကၠီၤညိၣ်စံး၀ဲဒ်အံၤန့ၣ်လီၤႉ အ၀ဲစံး၀ဲလၢ“တၢ်တခါအံၤပတထံၣ်လၢအကြၢးဘၣ်မီၤနီၤႉ ပတအဲၣ်ဒိးဘၣ်ႇပထီဒါ၀ဲဒၣ်လီၤႉ တမံၤဂ့ၤတမၠိဂ့ၤသုးမီၤစိရိၤမၤတၢ်ဖံးတၢ်မၤသ့ၣ်တဖၣ်အံၤပတဆီၣ်ထွဲအ၀ဲသ့ၣ်ဘၣ်ႉ မ့မ့ၢ်လၢကညီဘၣ်တူၢ်ဘၣ်ကီၤတၢ်ခဲလၢာ်ခဲစ့ခီန့ၣ်ဒ်သိးဒီးပတူၢ်ဘၣ်ကီၤဘၣ်စ့ၢ်ကီးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါ ပတဆၢမုၢ်လၢ်လၢတၢ်ဒုးကကဲထီၣ်ဘၣ်ႇဘၣ်ဆၣ်မ့မ့ၢ်ကစၢ်ဂီၢ်တၢ်ဒီသဒၢဒု တၢ်ရဲၣ်တၢ်ကျဲၤလၢသုးတကပၤန့ၣ်အိၣ်၀ဲဒၣ်အသိး ပသုးဂ့ၢ်၀ီတၢ်မၤန့ၣ်ပတဲပၠးတသ့ခဲလၢာ်ဘၣ်ဒီး တမံၤဂ့ၤတမၠိဂ့ၤကညီဖီၣ်စုက၀ဲၤတၢ်ဃူတၢ်ဖိးကရၢကအိၣ်ဖှိၣ်ကတၢၣ်ပီၣ်တဲသကိးတၢ်ဒုတၢ်ရဲၣ်တၢ်ကျဲၤအိၣ်၀ဲအဂ့ၢ်န့ၣ် သုးခိၣ်ဒိၣ်စိစီၤကၠီၤညိၣ်စံးအါထီၣ်၀ဲဒၣ်န့ၣ်လီၤႉ ဘၣ်ထွဲဒီးသုးမီၤစိရိၤအကဘီယူၤဟဲကွံာ်လီၤမ့ၣ်ပိၢ်လၢလ့က့ၣ်ကီာ်ဟီၣ်က၀ီၤတၢ်ဂ့ၢ်အံၤအဖီခိၣ် (DKBA)သုးရိၣ်မဲခိၣ်-၂ သုးခိၣ်ဒိၣ်ဖိ စီၤဖါဘျဲၣ်စ့ၢ်ကီးစံး၀ဲလၢ“လၢယၤတဂၤယတၢ်ထံၣ်ခီဒုတၢ်တခါအံၤလ့ၤတက့ၤတကြၢးဘၣ်မီၤနီၤႉ မ့မၤလၢဒုၣ်ဒါန့ၣ်တဘၣ်နီမံၤဘၣ်မီၤနီၤႇ ခဲအံၤမၤဘၣ်ဒိဘၣ်ထံး၀ဲဟံၣ်ဃီႇကမျၢၢ်ႇတၢ်ဖံးအီၣ်မၤအီၣ်လီၢ်ကျဲခီန့ၣ်ပတူၢ်လိာ်တသ့ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တကီၢ်ခါခဲအံၤလ့က့ၣ်ကီာ်တၢ်ကဲထီၣ်သးတၢ်ဂ့ၢ်အမဲာ်ညါတၢ်ဒုးကဲထီၣ်လၢကညီကီၢ်စဲၣ်ပူၤဒီး လီၢ်က၀ီၤကညီကမျၢၢ်ထံဖိကီၢ်ဖိလၢအကလးဘၣ်ဃ့ၢ်မှံဟးဖျိး၀ဲအဖီခိၣ်အံၤ ထံၣ်ဘၣ်လၢ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢဒီးလီၢ်က၀ီၤဂံၢ်ခီၣ်ထံးတၢ်ကရၢကရိတဖၣ်ပဲာ်အၢပဲာ်သီ၀ဲတၢ်ဂ့ၢ်အံၤတဲာ်တဲာ်ဖျုဖျုဒီး ထုးထီၣ်ပာ်ဖျါ၀ဲလံာ်တၢ်ပာ်သးတဖၣ်အိၣ်၀ဲဒၣ်ဘၣ်ဆၣ် မ့မ့ၢ်လၢကညီဖီၣ်စုက၀ဲၤတၢ်ကရၢကရိလၢအဂၤတဖၣ် ထုးထီၣ်ပာ်ဖျါလံာ်လၢအဖိးသဲစးတအိၣ်၀ဲဘၣ်န့ၣ်လီၤႉ စးထီၣ်ဖဲအပူၤကွံာ်လါဒံၣ်စ့ဘၢၣ် ၁၅ သီအနံၤ...

လါဒံၣ်စ့ဘၢၣ် ၂၉ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲအပူၤကွံာ်လါဒံၣ်စ့ဘၢၣ် ၂၃ သီအနံၤ ခီဖျိပယီၤသုးဆှၢအါထီၣ်သုးဂံၢ်ဘါအါအါဂီၢ်ဂီၢ်လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ချၢၣ်လွံၢ်ထူၣ်ကီၢ်ရ့ၣ်(သုးက့ ၃) လၢၢ်ဒိၣ်ကီၢ်ဆၣ် မုၢ်သဲးဟီၣ်က၀ီၤပူၤအဃိ လီၢ်က၀ီၤဖိတဖၣ်ဘၣ်ဃ့ၢ်မှံဟးဖျိးအဂ့ၢ်န့ၣ် ခ့ၣ်အဲၣ်ယူၣ်တၢ်ကစီၣ်ဒီးတၢ်ဘိးဘၣ်ရၤလီၤ၀ဲၤကျိၤထုးထီၣ်ပာ်ဖျါ၀ဲန့ၣ်လီၤႉ ပယီၤသုးခီၣ်သုးရ့ၣ်(ခလရ-၃၅၁ႇခလရ-၁၂၄ႇခလရ-၅၈၉ႇခလရ-၅၉၈ႇခလရ-၄၄၀)ဒီးခီၣ်ချ့သုးရ့ၣ်(ခမရ-၇၉)တဖၣ်ပာ်ဖှိၣ်ထီၣ်သးႇသုးသိလ့ၣ်အခိၣ်(၃၀)သုးဂံၢ်ဘါကအိၣ်(၄၈၀)ဃၣ်ဃၣ်ဒီး ကသ့ၣ်လၢအတီၣ်တၢ်အီၣ်တၢ်အီအဒု(၁၀၀)ဃၣ်ဃၣ်အံၤ ဟဲနုာ်လီၤဟူးဂဲၤ၀ဲဒၣ်လၢခ့ၣ်အဲၣ်ယူၣ်မုၢ်တြီၢ်ကီၢ်ရ့ၣ်ဟီၣ်က၀ီၤပူၤအဃိ လီၢ်က၀ီၤဖိလၢအအိၣ်ဖဲမုၢ်သဲးကျဲဖီခိၣ်အကပိၤကပၤတဖၣ်ပျံၤတၢ်ဖုးတၢ်ဘၣ်ဟးဃ့ၢ်အိၣ်ခူသူၣ်လၢတၢ်လီၢ်အဂၤအဂ့ၢ်န့ၣ် KNU ထုးထီၣ်ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ခီဖျိသုးမီၤစိရိၤအသုးတဖၣ်ဟူးဂဲၤ၀ဲဒုးယာ်ဂ့ၢ်၀ီအဃိ သ့ၣ်နွဲၤထၣ်သ၀ီ(ကိး)မုၢ်သဲးသ၀ီဖိတဖၣ်ဘၣ်ဃ့ၢ်မှံဟးဖျိးအမဲာ်ညါ ပီၤဖီခံသ၀ီႇစ့ဘီလူၢ်ႇထံပနၢ်အ့ၣ်ခံႇဃဲၢ်ကၢ်ခိၣ်သ၀ီ ဟံၣ်ခိၣ်(၈၆)ဖျၢၣ် ၦၤနီၣ်ဂံၢ်(၅၅၀)ဘျဲၣ် အိၣ်လၢသ၀ီပူၤတဘူၣ်လၢၤဘၣ်ဒီးဃ့ၢ်အိၣ်ဆူတၢ်လီၢ်အဂၤအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဂၤစံး၀ဲန့ၣ်လီၤႉ အ၀ဲစံး၀ဲလၢ“ၦၤစံၣ်ခဲအံၤသ့ၣ်တဖၣ်န့ၣ်အပူၤကွံာ်နါက့ဘၣ်စံၣ်ဒီးတုၤလၢခဲအံၤက့ၤလၢအဟံၣ်တဘူၣ်ဒံးဘၣ်ႉ စံၣ်အိၣ်၀ဲဒၣ်လၢၦၢ်ပူၤလီၤႉ ၦၤစံၣ်ခဲအံၤတဖၣ်အါလၢမုၢ်သဲးသ၀ီဖိလီၤႉ ခဲအံၤခီဖျိပယီၤသုးဆီလီၤအသုးဖဲသ၀ီပူၤအဃိ လီၢ်က၀ီၤဖိတဖၣ်ဘၣ်ဟးပလဲာ်အသးမီၤနီၤႇတုၤလၢခဲအံၤက့ၤလၢဟံၣ်တဘူၣ်ဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လီၢ်က၀ီၤဖိလၢအဃ့ၢ်ထီၣ်သ့ၣ်တဖၣ်အံၤခီဖျိဘၣ်ဟးအိၣ်ကဒုသးလၢၦၢ်လၢ်ကျါအဃိ အ၀ဲသ့ၣ်အံၤလိၣ်ဘၣ်၀ဲဒၣ်တၢ်အီၣ်တၢ်အီႇတၢ်အိၣ်တၢ်ဆိးလီၢ်ကျဲဒီးကသံၣ်ကသီတဖၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါဖဲအပူၤကွံာ်လါဒံၣ်စ့ဘၢၣ် ၇ သီ ဟါခီအဆၢကတီၢ်စ့ၢ်ကီး ခီဖျိပယီၤသုးမီၤစိရိၤအသုးခးလီၤကျိဖးဒိၣ်လၢသ့ၣ်နွဲၤထၣ်(ကိး)မုၢ်သဲးသ၀ီပူၤအဃိ လီၢ်က၀ီၤသ၀ီဖိ(၃)ဂၤဘၣ်ဒိဘၣ်ထံးခီဖျိဘၣ်၀ဲဒီးကျိဖးဒိၣ်အက့အဃိလီၤအဂ့ၢ်န့ၣ် လီၢ်က၀ီၤဖိတဖၣ်စံး၀ဲအသိး...

လါဒံၣ်စ့ဘၢၣ် ၂၈ သီႇ ၂၀၂၁ နံၣ်ႇ ခ့ၣ်အဲးစံၣ် ကညီဒီကလုာ်စၢဖှိၣ်ကရၢ-KNU သုးက့(၇)ဒီးသုးက့(၆)အဘၢၣ်စၢၤ ကီးတရံး-မၠၣ်၀တံၣ်အ့ရှါကျဲမုၢ်ဖီခိၣ်အံၤ ခီဖျိပယီၤသုးစူးကါ၀ဲကမျၢၢ်အသိလ့ၣ်လၢအသုးဂ့ၢ်၀ီတၢ်မၤအဃိ ဖဲမဟါလါဒံၣ်စ့ဘၢၣ် ၂၇ သီအနံၤ ခ့ၣ်အဲၣ်ယူၣ်လီၢ်ခၢၣ်သးထုးထီၣ်နဲၣ်လီၤကမျၢၢ်လၢကလူၤပိာ်မၤထွဲတၢ်သိၣ်တၢ်သီ(၄)ထံၣ်န့ၣ်လီၤႉ တကီၢ်ခါခဲအံၤခီဖျိပယီၤသုးမီၤစိရိၤအံၤစူးကါ၀ဲဒၣ်ကမျၢၢ်သိလ့ၣ်လၢအသုးဂ့ၢ်၀ီတၢ်မၤအဃိ ခ့ၣ်အဲၣ်ယူၣ်လီၢ်ခၢၣ်သး နဲၣ်လီၤဒုးသ့ၣ်ညါကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)လၢကနဲၣ်လီၤဒုးသ့ၣ်ညါက့ၤဟီၣ်က ၀ီၤသုးက့/သုးရ့ၣ်ၦၤဘၣ်မူဘၣ်ဒါတဖၣ်လၢကဒုးသ့ၣ်ညါဘၣ်ကမျၢၢ်လၢကလူၤပိာ်မၤထွဲတၢ်သိၣ်တၢ်သီတဖၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ KNU လီၢ်ခၢၣ်သးကမံးတံာ်ပဒိၣ်စီၤတီနံစံး၀ဲလၢ “ပယီၤသုးတဖၣ်ဟဲထီၣ်ဒီးစူးကါ၀ဲဒၣ်ကမျၢၢ်သိလ့ၣ်ႇကးဘၢသိလ့ၣ်ဒီးတၢ်ခိၣ်ဒုး(တၤလပၣ်)အဃိ ပၦၤသုးဖိလၢအိၣ်တၢ်မဲာ်ညါသ့ၣ်တဖၣ်မၤဘၣ်ကီခဲ၀ဲလီၤႉ မၤ၀ဲဒီးဟဲထီၣ်၀ဲဒ်အံၤတုၤလၢမၠၣ်၀တံၣ်န့ၣ်အိၣ်ခံဘျီလံလီၤႉ ဆၢကတီၢ်ခဲအံၤကမျၢၢ်ထံဖိကီၢ်ဖိတဖၣ်မ့တဟးထီၣ်က့ၤလီၤဘၣ်န့ၣ်အဂ့ၤကတၢၢ်လီၤႉ အဲၣ်ဒိးတဲကမျၢၢ်တဖၣ်လၢမ့လဲၤထီၣ်က့ၤလီၤန့ၣ်ဆိကမိၣ်လီၤတံၢ်လီၤဆဲး၀ံၤမးလဲၤအီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ တၢ်သိၣ်တၢ်သီလၢ(KNU)လီၢ်ခၢၣ်သးနဲၣ်လီၤ၀ဲ ၄ ထံၣ်န့ၣ်မ့ၢ်၀ဲ ကဘၣ်အိးထီၣ်သိလ့ၣ်ပဲတြီဖဲလဲၤထီၣ်က့ၤလီၤအဆၢကတီၢ်ႇ ကဘၣ်ဒိးသမံသမိးသးတဘျီလၢ်လၢ်ဖဲ(KNLA)ၦၤဘၣ်မူဘၣ်ဒါသမံသမိး၀ဲအဆၢကတီၢ်ႇ တဘၣ်ကျၢၢ်ဘၢဃာ်သိလ့ၣ်ဒီးတၢ်ခိၣ်ဒုး(တၤလပၣ်)ဘၣ်ႇတဘၣ်တီဒုၣ်ဒါသုးဒီးဒုးယၤပီးလီသ့ၣ်တဖၣ်ဘၣ်န့ၣ်လီၤႉ တၢ်သိၣ်တၢ်သီလၢတၢ်ပာ်လီၤ၀ဲသ့ၣ်တဖၣ်အံၤ ၦၤနီသိလ့ၣ်ဖိတဖၣ်ကဘၣ်လူၤပိာ်မၤထွဲ၀ဲတုၤလီၤတီၤလီၤကိးဂၤဒဲးဒီး မ့တလူၤပိာ်မၤထွဲဘၣ်န့ၣ်တၢ်ကဟံးဂ့ၢ်၀ီတုၤလီၤတီၤလီၤအဂ့ၢ်န့ၣ် လံာ်တၢ်နဲၣ်လီၤအပူၤပာ်ဖျါ၀ဲန့ၣ်လီၤႉ စးထီၣ်ဖဲအပူၤကွံာ်လါဒံၣ်စ့ဘၢၣ် ၁၅ သီအနံၤန့ၣ် ခီဖျိ သုးမီၤစိရိၤအသုးနုာ်လီၤဖီၣ်၀ဲဘျီၣ်ဒိၣ်ခၢၣ်စးဒီးကမျၢၢ်ထံဖိကီၢ်ဖိတဖၣ်လၢလ့က့ၣ်ကီာ်၀့ၢ်သီပူၤတၢ်ဂ့ၢ်အဃိ ပယီၤသုးအံၤတၢ်ခးလိာ်သးစးထီၣ်ဟဲကဲထီၣ်၀ဲဒီးဟီၣ်က၀ီၤ(KNLA)အၦၤတဖၣ်န့ၣ်လီၤႉ...

လါဒံၣ်စ့ဘၢၣ် ၂၇ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲမဟါလါဒံၣ်စ့ဘၢၣ် ၂၆ သီအနံၤ လၢမၠၣ်၀တံၣ်-ကီးတရံး၀့ၢ်အဘၢၣ်စၢၤ အ့ရှါကျဲမုၢ်ဖီခိၣ်န့ၣ် တၢ်ဒုးကဲထီၣ်၀ဲလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)ဒီးပယီၤသုးအဘၢၣ်စၢၤဒီး ဖဲန့ၣ်ပယီၤသုး သံ(၉)ဂၤအကျါပၣ်ဃုာ်၀ဲသုးရ့ၣ်ခိၣ်တဂၤန့ၣ်လီၤႉ ခီဖျိတၢ်ဒုးကဲထီၣ်အဃိ လီၢ်က၀ီၤဖိလၢအအိၣ်ဘူးဖဲန့ၣ်အဂၤတကထိဃၣ်ဃၣ်ဘၣ်ဃ့ၢ်ထီၣ်၀ဲဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါတၢ်ဒုးကဲထီၣ်လၢခ့ၣ်အဲၣ်ယူၣ် မွ့မၠူၤယ့ကပၤဒီးသဲးကျီးတၢ်က့ၣ်နၢၣ်အလီၢ် ဖဲန့ၣ်ပယီၤသုးသံတစှၤန့ၢ်ဒံး(၉)ဂၤဘၣ်အကျါပၣ်ဃုာ်၀ဲသုးရ့ၣ်ခိၣ်တဂၤဒီးဘၣ်ဒိ၀ဲ(၁၃)ဂၤအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤ(KNLA)အအိၣ်န့ၣ်လီၤႉ “ဖဲမဟါန့ၣ်ပပာ်ဖှိၣ်ထီၣ်သးသုးရ့ၣ်(၂)ဘ့ၣ်ဒီးပလဲၤထီၣ်ခးအ၀ဲသ့ၣ်လၢတၢ်တီၤလိၤမီၤနီၤႉ ပယီၤသုးရ့ၣ်တရ့ၣ်လၢအပၣ်၀ဲဒၣ်(၄၅)ဂၤအံၤန့ၣ် ဘၣ်၀ဲဒၣ်အဂၤ(၂၀)ဘျဲၣ်လီၤႉ လၢကဟဲထၢက့ၤၦၤလၢအဘၣ်ဒိဘၣ်ထံးဖဲမွ့မၠူၤယ့လီၢ်အံၤအဂီၢ် ပျၢ်လီၤ၀ဲဒၣ်(BGF)တဖၣ်လီၤႉ ခီဖျိပခးအဃိဟဲ၀ဲတဘူၣ်လၢၤဘၣ်ႉ လၢမုၢ်နၤခီမးဟဲတီၣ်၀ဲဒီးသိလ့ၣ်တခိၣ်န့ၣ်(၅)ဂၤလီၤ”အဂ့ၢ်န့ၣ် KNLA ၦၤဘၣ်မူဘၣ်ဒါတဂၤစံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါဖဲမုၢ်နၤခီန့ၣ်သိလ့ၣ်လၢအဟဲက့ၤတီၣ်၀ဲပယီၤသုးလၢအသံဒီးအဘၣ်ဒိဘၣ်ထံးလၢတၢ်ဒုးပူၤသ့ၣ်တဖၣ်အံၤစ့ၢ်ကီး ဖဲအတုၤဖဲတတၤကူဒီးကီးတရံးခၠီတီၤအဘၢၣ်စၢၤန့ၣ် (KNLA)အၦၤခိးထုးအ၀ဲသ့ၣ်ဒီးမ့ၣ်ပိၢ်ဒံးအဂ့ၢ်န့ၣ် လီၢ်က၀ီၤတၢ်ကစီၣ်တဖၣ်စံး၀ဲန့ၣ်လီၤႉ တၢ်ဒုးကဲထီၣ်ဖဲအ့ရှါကျဲမုၢ်အံၤ မ့ၢ်၀ဲဒၣ်ဟီၣ်က၀ီၤ(KNLA)သုးရ့ၣ်(၁၈)ႇသုးရ့ၣ်(၂၇)သုးပာ်ဖှိၣ်ဒီး ပယီၤသုးမီၤစိရိၤသုးတြိၤ(၂၂)စုဒုၣ်တီၤအဖီလာ်သုးရ့ၣ်(၂၁၀)တဖၣ်ခးလိာ်သးန့ၣ်လီၤႉ ဖဲတနံၤအံၤဂီၤခီအဆၢကတီၢ်စ့ၢ်ကီး ပယီၤသုးသိလ့ၣ်(၂)ခိၣ်လၢသုးဂံၢ်ဘါကအိၣ်အဂၤ(၁၀၀)ဃၣ်ဃၣ်အံၤ ဟဲထီၣ်တုၤကဒီးလၢတတၤကူသ၀ီဒီး အ၀ဲသ့ၣ်အံၤတလဲၤ၀ဲဒၣ်လၢညီနုၢ်ကျဲအသိးလၢၤဘၣ်ဒီး လဲၤထီၣ်၀ဲဒၣ်လၢၦၢ်ပူၤတကပၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲစှၤသီအတီၢ်ပူၤအံၤ ခီဖျိပယီၤသုးလၢအအိၣ်ဖဲကီးတရံး၀့ၢ်ပူၤတဖၣ်ခးလီၤကျိဖးဒိၣ်လၢဒူသ၀ီပူၤတပယူာ်ဃီအဃိ ကီးနွဲၣ်သ၀ီႇအၤကလီၤဒီးယွၤသ့ၣ်ကိသ၀ီလၢအအိၣ်ဘူးဖဲအ့ရှါကျဲမုၢ်အံၤတဖၣ် လီၢ်က၀ီၤဖိတကထိဃၣ်ဃၣ်...

လါဒံၣ်စ့ဘၢၣ် ၂၇ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤလါဒံၣ်စ့ဘၢၣ် ၂၇ သီ မုၢ်ဃ့ၢ်လီၤ ၁ နၣ်ရံၣ်တခီဃၣ်ဃၣ်အဆၢကတီၢ် (၄)ဘျီတဘျီပယီၤသုးမီၤစိရိၤအကဘီယူၤဟဲကွံာ်လီၤကဒီးမ့ၣ်ပိၢ်လၢကညီကီၢ်စဲၣ် မၠၣ်၀တံၣ်ကလံၤထံး ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့(၆) လ့ၣ်က့ၣ်ကီာ်ဟီၣ်က၀ီၤပူၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၂၃ သီ မုၢ်နၤခီ ၁၀ နၣ်ရံၣ်ဃၣ်ဃၣ်အဆၢကတီၢ် တၢတဘျီပယီၤသုးမီၤစိရိၤအကဘီယူၤဟဲကွံာ်လီၤမ့ၣ်ပိၢ်လၢလ့က့ၣ်ကီာ်ဟီၣ်က၀ီၤဒီး ခံဘျီတဘျီဟဲကွံာ်လီၤ၀ဲဖဲလါဒံၣ်စ့ဘၢၣ် ၂၄ သီ ဟါခီ ၄ နၣ်ရံၣ်ဒီး သၢဘျီတဘျီဟဲကွံာ်လီၤ၀ဲဖဲလါဒံၣ်စ့ဘၢၣ် ၂၅ သီ မုၢ်ဃ့ၢ်လီၤ ၁ နၣ်ရံၣ်ဃၣ်ဃၣ်အဆၢကတီၢ်န့ၣ်လီၤႉ ဖဲတနံၤအံၤဂီၤခီ ၄ နၣ်ရံၣ်အဆၢကတီၢ်စ့ၢ်ကီး ပယီၤသုးမီၤစိရိၤခးလီၤကျိဖးဒိၣ်အထံၣ်(၁၀၀)ဘျဲၣ်လၢမၠ့ၣ်တၤလ့မၠဲၤသ၀ီကပၤဒီးကၠီၣ်လိကၠံတကပၤ၀ံၤအလီၢ်ခံ ဖဲတနံၤအံၤမုၢ်ဃ့ၢ်လီၤ...

လါဒံၣ်စ့ဘၢၣ် ၂၇ သီႇ ၂၀၂၁ နံၣ်ႇ ခ့ၣ်အဲးစံၣ် ပယီၤသုးမီၤစိရိၤအသုးလၢအအိၣ်ဆီလီၤသးဟူးဂဲၤဖဲခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့(၅)ဒွဲၣ်လိကီၢ်ဆၣ်ပူၤအံၤ အသုးစကီၤပြံတဂၤဟဲဃ့ၢ်ထီၣ်ဆူကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA) သုးက့(၅)အအိၣ်ဃုာ်ဒီးတၢ်စုက၀ဲၤတဖၣ်အဂ့ၢ်န့ၣ် ခ့ၣ်အဲၣ်ယူၣ်မုၢ်တြီၢ်တၢ်ကစီၣ်ထုး ထီၣ်ပာ်ဖျါ၀ဲဖဲမဟါလါဒံၣ်စ့ဘၢၣ် ၂၆ သီအနံၤန့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၂၄ သီအနံၤ ပယီၤသုးပၢဆှၢရဲၣ်ကျဲၤသုး၀ဲၤလီၢ်ခိၣ်သ့ၣ်အစုဒုၣ်တီၤအဖီလာ်ခီၣ်သချ့သုးရ့ၣ်(ခမရ-၄၀၇)လၢအအိၣ်ဖဲဖၣ်ပူၣ်၀့ၢ် နါကူနါသုးကလၢၤ သုးစကီၤပြံမီၤညိၣ်(၃၀)နံၣ် ကစၢ်နီၣ်ဂံၢ်(တ/၃၉၂၉၇၈)အံၤ ဟဲဃ့ၢ်ထီၣ်၀ဲလၢ KNLA သုးရ့ၣ်(၁၀၂)ႇ သုးဒ့(၁)အအိၣ်အဂ့ၢ်န့ၣ် မုၢ်တြီၢ်တၢ်ကစီၣ်ပာ်ဖျါ၀ဲန့ၣ်လီၤႉ “အတဲ၀ဲဒၣ်န့ၣ်ဖဲအ၀ဲထီၣ်သုးတၢ်သိၣ်လိအခါတၢ်သိၣ်လိ၀ဲလၢကဘၣ်တြီဆၢဒီသဒၢကမျၢၢ်ထံဖိကီၢ်ဖိမီၤနီၤႉ အနီၢ်ကီၢ်ကီၢ်ဖဲအတုၤလၢတၢ်ဒုးအမဲာ်ဖံးခိၣ်န့ၣ်ခိၣ်နၢ်သ့ၣ်တဖၣ်တမ့ၢ်လၢအတြီဆၢဒီသဒၢကမျၢၢ်ထံဖိကီၢ်ဖိသ့ၣ်တဖၣ်လၢၤဘၣ်ႉဟံးဆူူၣ်၀ဲထံကီၢ်တၢ်စိတၢ်ကမီၤဒီးဖီၣ်ထၢနုာ်၀ဲဒၣ်ထံကီၢ်ခိၣ်နၢ်လၢဃိာ်ပူၤလၢကမျၢၢ်ဃုထၢထီၣ်၀ဲတဖၣ်မီၤနီၤႉ လၢန့ၣ်အမဲာ်ညါ ကမျၢၢ်ထံဖိကီၢ်ဖိဃ့ထီၣ်က့ၤတၢ်ခွဲးတၢ်ယၤဒီး အခိၣ်အနၢ်တဖၣ်ဟ့ၣ်လီၤတၢ်ကလုၢ်လၢဘၣ်ခးသံ၀ဲအဃိ ထံဖိကီၢ်ဖိတဖၣ်ဘၣ်သံႇဘၣ်ဃ့ၢ်မှံဟးဖျိးတူၢ်ဘၣ်၀ဲတၢ်ကီကီခဲခဲဒ်န့ၣ်မီၤနီၤႉ ထံၣ်၀ဲဒီးအသးတမုာ်ဘၣ်ႇ လၢခံန့ၣ်တဲ၀ဲလၢအမိအပါနါက့န့ၣ်သုးကီၣ်ကးအၦၤခးသံ၀ဲအဃိတူၢ်၀ဲတန့ၢ်လၢၤဘၣ်ဒီး ဃ့ၢ်ထီၣ်ကွံာ်၀ဲလၢသုးကီၣ်ကးအတၢ်တီခိၣ်ရိၣ်မဲဖီလာ်ဒီးဟဲဃ့ၢ်ထီၣ်၀ဲလီၤ”အဂ့ၢ်န့ၣ် သုးက့(၅)ၦၤကတိၤတၢ်ပၢ သုးခိၣ်ဒိၣ်ဂီၢ်ဂ့ၢ်စီၤကျၢၤဒိၣ်စံး၀ဲန့ၣ်လီၤႉ လၢန့ၣ်အမဲာ်ညါသုးစကီၤပြံမီၤညိၣ်အံၤဟဲက့ၤစိာ်ဃုာ်၀ဲဒီး(MA 1)တခိၣ်ႇ ကျိချံဒၢ(၅)ခါႇအချံ(၂၅၀)ဖျၢၣ်ႇမ့ၣ်ပိၢ်(၁)ဖျၢၣ်ႇမ့ၣ်ပိၢ်(M 14)တဖျၢၣ်ဒီး တကီၢ်ခါခဲအံၤ...

လါဒံၣ်စ့ဘၢၣ် ၂၄ သီႇ ၂၀၂၁ နံၣ်ႇ ခ့ၣ်အဲးစံၣ် ပယီၤသုးမီၤစိရိၤမၤ၀ဲတၢ်ထီၣ်ဒုးလၢကညီကီၢ်စဲၣ်ထံဖိကီၢ်ဖိကမျၢၢ်တဖၣ်ဒ်အံၤအဖီခိၣ် ဖဲတနံၤအံၤလါဒံၣ်စ့ဘၢၣ် ၂၄ သီအနံၤ မီၢ်သီရူခိၣ်နၢ်ဒိၣ်ထီလၢအအိၣ်ဆီလီၤသးဖဲကီၢ်ပယီၤပူၤတဖၣ်ထုးထီၣ်သဃဲၤ၀ဲလံာ်တၢ်ပာ်ဖျါတဘ့ၣ်ဒီး ပဲာ်အၢပဲာ်သီ၀ဲတၢ်ဂ့ၢ်အံၤတဲာ်တဲာ်ဖျုဖျုန့ၣ်လီၤႉ လံာ်တၢ်ပာ်ဖျါ၀ဲအံၤမ့ၢ်၀ဲဒၣ်အီးစထြ့လယါထံကီၢ်ႇခဲနဒၣ်ႇယူရပၤကီၢ်စၢဖှိၣ်မီၢ်သီရူဘၣ်ထွဲကီၢ်ပယီၤဒီးယူရပၤကီၢ်စၢဖှိၣ်ထံကီၢ်ကရူၢ်ဖိတဖၣ်အမီၢ်သီရူတဖၣ်လၢအမ့ၢ် ခၠဲၣ်ကီၢ်ခိၣ်ထံကီၢ်ႇဒ့မၣ်ႇဖ့ၤလဲၤႇပၠ့ၤသ့ၣ်ႇကၠၤမနံၤႇအံၤတလံၤႇနဲၤသလဲၤႇစပ့ၤဒီးစွံၤဒံၤထံကီၢ်တဖၣ်အမဲာ်ညါ ညူစံၤလဲၤႇနီၤ၀့ႇစွံၤစလဲၤႇယူၤက့ၤဒီးအမဲရံၣ်ကၤထံကီၢ်တဖၣ် အမီၢ်သီဒိၣ်ထီဘၣ်ထွဲကီၢ်ပယီၤတဖၣ်ႇတစိၢ်တလီၢ်မီၢ်သီရူမူဒါခိၣ်တဖၣ်ဒီးမီၢ်သီရူခိၣ်နၢ်ဒိၣ်ထီတဖၣ်ပာ်ဖှိၣ်ဆဲးလီၤ၀ဲစုမုၢ်ကျၢၢ်အံၤန့ၣ်လီၤႉ တယံၤတမီၢ်ခီဖျိတၢ်ခးလီၤကျိဖးဒိၣ်လၢကညီကီၢ်စဲၣ်ဒူသ၀ီတဖၣ်အပူၤဃုာ်ဒီးတၢ်ထီၣ်ဒုးကမျၢၢ်ထံဖိကီၢ်ဖိတဖၣ်အဖီခိၣ်ဒ်အံၤ မ့ၢ်တၢ်မၤကမၣ်လုၢ်သ့ၣ်ခါပတာ်၀ဲဒၣ်ထံဂုၤကီၢ်ဂၤၦၤဂ့ၢ်၀ီခွဲးယာ်ဒီး တၢ်မၤဒ်အံၤသ့ၣ်တဖၣ်တၢ်ကဘၣ်ပတုာ်ကွံာ်၀ဲအဂ့ၢ်န့ၣ် မီၢ်သီရူခိၣ်နၢ်ဒိၣ်ထီတဖၣ်စံး၀ဲန့ၣ်လီၤႉ ခီဖျိတၢ်ထီၣ်ဒုးတဖၣ်အဃိ ထံဖိကီၢ်ဖိကမျၢၢ်လၢအကထိဘၣ်ပာ်တ့ၢ်ကွံာ်အဟံၣ်အဃီဘၣ်ဃ့ၢ်မှံဟးဖျိး၀ဲဒၣ်ဒီး တကီၢ်ခါခဲအံၤလၢအ၀ဲသ့ၣ်တဖၣ်အဂီၢ်လိၣ်ဘၣ်၀ဲဒၣ်ဂ့ၢ်ဂီၢ်အူၦၤဂ့ၢ်၀ီတၢ်ဆီၣ်ထွဲမၤစၢၤတဖၣ်အဂ့ၢ်န့ၣ် စံး၀ဲန့ၣ်လီၤႉ လၢတၢ်န့ၣ်အဃိ သုးမီၤစိရိၤအံၤပကတုာ်ကွံာ်တၢ်ထီၣ်ဒုးလၢကညီကီၢ်စဲၣ်အပူၤဒီး တၢ်ကပာ်ကမျၢၢ်ထံဖိကီၢ်ဖိတဖၣ်ခဲလၢာ်လၢတၢ်ပူၤဖျဲးအလီၢ်ဒ်ထံဂုၤကီၢ်ဂၤတၢ်သိၣ်တၢ်သီအိၣ်၀ဲအသိးအဂ့ၢ်န့ၣ် မီၢ်သီရူခိၣ်နၢ်ဒိၣ်ထီသ့ၣ်တဖၣ်အံၤဃ့ထီၣ်၀ဲဒၣ်န့ၣ်လီၤႉ

လါဒံၣ်စ့ဘၢၣ် ၂၄ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲမဟါလါဒံၣ်စ့ဘၢၣ် ၂၃ သီ မုၢ်နၤခီအဆၢကတီၢ် သုးမီၤစိရိၤအသုးကဘီယူၤဟဲကွံာ်လီၤမ့ၣ်ပိၢ်လၢမၠၣ်၀တံၣ် လ့က့ၣ်ကီာ်ဟီၣ်က၀ီၤဒီး ခးလီၤစ့ၢ်ကီးကျိဖးဒိၣ်အထံၣ်(၅၀)ဘျဲၣ်တပယူာ်ဃီန့ၣ်လီၤႉ ဖဲမဟါလါဒံၣ်စ့ဘၢၣ် ၂၃ သီ မုၢ်နၤခီ ၁၀ နၣ်ရံၣ်တခီဃၣ်ဃၣ်အဆၢကတီၢ် ပယီၤသုးမီၤစိရိၤကဘီယူၤဟဲဆှၣ်တၢ်ကွံာ်လီၤ၀ဲမ့ၣ်ပိၢ်(၂)ဖျၢၣ်ဒီးတကတီၢ်ဃီခးလီၤစ့ၢ်ကီး၀ဲကျိဖးဒိၣ်အါအါဂီၢ်ဂီၢ်အဂ့ၢ်န့ၣ် လီၢ်က၀ီၤတၢ်ကစီၣ်ပာ်ဂၢၢ်ပာ်ကျၢၤစံး၀ဲအသိး သ့ၣ်ညါဘၣ်န့ၣ်လီၤႉ “ဟဲကွံာ်လီၤမ့ၣ်ပိၢ်ဒီးကဘီယူၤန့ၣ် ၂ ဖျၢၣ်မီၤနီၤႉ လီၤတဲာ်၀ဲဒၣ်ဖဲထံလီၤဆှူဒီးထံကီာ်ထီၣ်ကစၢၢ်အဘၢၣ်စၢၤလီၤႉ တၢ်ဘၣ်ဒိဘၣ်ထံးခီဒုတအိၣ်ဘၣ်ႉ ၀ံၤဘျီန့ၣ်ခးလီၤ၀ဲဒီကျိဖးဒိၣ်တပယူၤဃီလီၤ”အဂ့ၢ်န့ၣ် ၦၤလၢအသ့ၣ်ညါတၢ်ကဲထီၣ်သးတဂၤ စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် ခးလီၤကျိဖးဒိၣ်(၆၀-မမ)ႇ(၈၁-မမ)ႇ(၁၂၀-မမ)အဖျၢၣ်(၅၀)ဘျဲၣ်တပယူၤဃီလၢမဲၢ်ထီးတလ့ႇဖလူဖးဒိၣ်ႇထံမဲး၀ါခံဒီးယသ့ၣ်ကူၤသ၀ီတကပၤန့ၣ်လီၤႉ ခီဖျိတၢ်ခးလီၤကျိဖးဒိၣ်အဃိ လီၢ်က၀ီၤအဟံၣ်တနီၤဟးဂူာ်ဟးဂီၤ၀ဲအသိး ဖလူဖိသ၀ီဖိတဖၣ်စ့ၢ်ကီးဘၣ်ဃ့ၢ်ထီၣ်၀ဲလၢကီၢ်ကၠီၣ်တဲၣ်တကပၤလၢမုၢ်နၤတၢ်ခံးဒီး ကၠီၣ်တဲၣ်သုးတဖၣ်လဲၤဆှၢအ၀ဲသ့ၣ်လၢတစိၢ်တလီၢ်ၦၤလီၢ်အိၣ်ကမှံအလီၢ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဖဲမဟါတၢ်ဒုးကဲထီၣ်အပူၤခံခီခံကပၤသံဘၣ်ဒိဘၣ်ထံးဒီးကမျၢၢ်ထံဖိကီၢ်ဖိသံဘၣ်ဒိဘၣ်ထံးတၢ်အိၣ်သးခီန့ၣ် တၢ်ပာ်ဂၢၢ်ပာ်ကျၢၤ၀ဲတန့ၢ်ဒံးဘၣ်န့ၣ်လီၤႉ ဒ်ပဒိးန့ၢ်ဘၣ်တၢ်ကစီၣ်လီၢ်ခံကတၢၢ်အသိး ဖဲတနံၤအံၤလါဒံၣ်စ့ဘၢၣ် ၂၄ သီ ဂီၤခီအဆၢကတီၢ် လၢကီးတရံးကီၢ်ဆၣ်...

လါဒံၣ်စ့ဘၢၣ် ၂၄ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲလါဒံၣ်စ့ဘၢၣ် ၂၁ သီ ဂီၤခီအဆၢကတီၢ် လၢခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢ ဒူသထူၣ်ကီၢ်ရ့ၣ် ဘံလ့ကီၢ်ဆၣ် သုးက့(၁)ဟီၣ်က၀ီၤ နိၣ်ဘၢၣ်ဘီသ၀ီကရူၢ်အပူၤ တၢ်မၤသံ၀ဲထီးကျီးခံသ၀ီဖိ ပိာ်မုၣ်တဂၤလၢအအိၣ်ဖဲကျီးအခါအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ ဖဲအပူၤကွံာ်လါဒံၣ်စ့ဘၢၣ် ၂၁ သီအနံၤ ဖဲပယီၤသုးတြိၤ(၂၂)စုဒုၣ်တီၤအဖီလာ်(ခမရ-၁၀၁)ဒီးသုးခိးကီၢ်ဆၢ(BGF)သုးပာ်ဖှိၣ်တဖၣ် ကဟဲက့ၤနုာ်လီၤလၢယိၤကျါ(BGF)သုးကလၢၤလၢကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့ ၁ မၤန့ၢ်၀ဲအံၤ ဖဲအဟဲတုၤလၢထီးကျီးခံသ၀ီအဆၢကတီၢ် တၢ်ခးလိာ်သးကဲထီၣ်၀ဲဒီးဟီၣ်က၀ီၤ(KNLA)အၦၤတဖၣ်ကအိၣ်တခီနၣ်ရံၣ်ဃၣ်ဃၣ်န့ၣ်လီၤႉ တၢ်ခးလိာ်သးကဲထီၣ်၀ံၤအလီၢ်ခံ ဖီၣ်ဒီးမၤသံ၀ဲဒၣ်နီၢ်ခံး(၅၆)နံၣ်လၢအအိၣ်ဖဲကျီးပူၤလၢ တၢ်ဂ့ၢ်တအိၣ်နီတမံၤဘၣ်အဂ့ၢ်န့ၣ် လီၢ်က၀ီၤဖိလၢတအဲၣ်ဒိးပာ်ဖျါအမံၤတဂၤစံး၀ဲန့ၣ်လီၤႉ “လီၢ်က၀ီၤကညီသုးနုာ်လီၤအိၣ်ဘှံးသွီလီတဲစိအဂံၢ်လၢအဒဲပူၤဒုအိၣ်မီၤနီၤႉ ပယီၤသုးဟဲဘျီကညီသုးဃ့ၢ်ထီၣ်၀ဲလီၤႉ ဖဲအ၀ဲသ့ၣ်ဃ့ၢ်ထီၣ်အကတီၢ်ပယီၤသုးထံၣ်ထွဲ၀ဲအဃိ ပယီၤသုးဟဲသမံသမိးသံကွၢ်၀ဲဒဲကစၢ်ပိာ်မုၣ်အံၤဒီး မ့ၢ်အစံးဆၢ၀ဲတဘၣ်ဘၣ်ခီဧါဒုတသ့ၣ်ညါဘၣ်ႇပယီၤသုးခးသံကွံာ်အီၤလီၤ”အဂ့ၢ်န့ၣ် လီၢ်က၀ီၤသ၀ီဖိစံးဘၣ်ခ့ၣ်အဲးစံၣ်န့ၣ်လီၤႉ ပယီၤသုးဒီးသုးခိးကီၢ်ဆၢ(BGF)သုးပာ်ဖှိၣ်လၢအမၤသံ၀ဲနီၢ်ခံးလၢအအိၣ်ဖဲထီးကျီးခံသ၀ီပူၤအံၤ တကီၢ်ခါခဲအံၤအ၀ဲသ့ၣ်ဆီလီၤအသုးဖဲယိၤကျါသ၀ီပူၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲန့ၣ်လီၤႉ ဖဲမဟါလါဒံၣ်စ့ဘၢၣ် ၂၃ သီအနံၤ ဒ်ကညီဂ့ၢ်၀ီခွဲးယာ်ကရူၢ်(KHRG)အတၢ်မၤနီၣ်မၤဃါထုးထီၣ်ပာ်ဖျါ၀ဲအသိးန့ၣ်...