ကီးတရံးလီၢ်က၀ီၤကမျၢၢ်တဖၣ်စံၣ်တၢ်ဒုးယံၤထီၣ်လံအဃိတၢ်ကီတၢ်ခဲအိၣ်ထီၣ်လၢအီၣ်အီအိၣ်ဆိးလီၢ်ကျဲ
လါအီးကထိဘၢၣ် ၅ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ်အပူၤ ဒူသ၀ီၦၤကမျၢၢ်လၢအိၣ်ကီးတရံး၀့ၢ်ခိၣ်၀့ၢ်ဃၢၤတဖၣ်အံၤ ခီဖျိအ၀ဲသ့ၣ်ဘၣ်ဟးစံၣ် ဟးဃ့ၢ်တၢ်ဆၢကတီၢ်ယံၤထီၣ်လံအဃိ တၢ်ကီတၢ်ခဲတၢ်ဃံးတၢ်စ့ၤအိၣ်ထီၣ်လၢတၢ်အီၣ်တၢ်အီတၢ်အိၣ်တၢ်ဆိး လီၢ်ကျဲတကပၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လီၢ်က၀ီၤကမျၢၢ်လၢအိၣ်ကီးတရံး၀့ၢ်ခိၣ်၀့ၢ်ဃၢၤတဖၣ်အံၤဘၣ်ဟးစံၣ်ဟးဃ့ၢ်ကအိၣ်လၢတနံၣ်ဃၣ်ဃၣ်လံဒီး တကီၢ်ခါခဲအံၤအ၀ဲသ့ၣ်တဒိးန့ၢ်ဘၣ်တၢ်ဆီၣ်ထွဲမၤစၢၤဘၣ်အသိး အ၀ဲသ့ၣ်တဖံးအီၣ်မၤအီၣ်ဘၣ်တၢ်လၢၤဘၣ်အဃိ တၢ်ကီတၢ်ခဲအိၣ်ထီၣ်လၢတၢ်အီၣ်တၢ်အီတၢ်အိၣ်တၢ်အိၣ်လီၢ်ကျဲတကပၤအဂ့ၢ်န့ၣ် ကမျၢၢ်ၦၤဃ့ၢ်တၢ်ဒုးတဂၤ စံး၀ဲဒ်အံၤန့ၣ်လီၤႉ “ကသံၣ်ကသီအၦ့ၤမ့ၢ်ဂ့ၤႇတၢ်အီၣ်တၢ်အီၣ်ႇတၢ်အိၣ်တၢ်ဆိးလီၢ်ကျဲစ့ၢ်ကီးတၢ်ကီတၢ်ခဲအိၣ်အကလုာ်ကလုာ်လီၤႉ ပတ့ထီၣ်ဒဲပအိၣ်ဆိလၢၦၤကျီးပူၤဒ်န့ၣ်လီၤႉခီဖျိကျီးကစၢ်န့ၣ်ဆါက့ၤဟီၣ်ခိၣ်ႇၦၤၦ့ၤဟီၣ်ဖိခီဒၢးတဒုးအိၣ်ၦၤလၢၤဘၣ် အဃိပဘၣ်ရိၢ်လီၤကွံာ်ဒဲပဘၣ်တ့ထီၣ်ကဒါလၢအသီမီၤနီၤႉကျီးကစၢ်နီဟးထီၣ်ၦၤအဃိပဘၣ်တ့ထီၣ်ကဒါဒဲလၢသီ န့ၣ်တဘျီခံဘျီလံႉကျိၣ်စ့တၢ်ဟဲနုာ်တအိၣ်ဘၣ်အဃိတၢ်ကီဒိၣ်မး”အဂ့ၢ်န့ၣ် စံး၀ဲန့ၣ်လီၤႉ လီၢ်က၀ီၤကမျၢၢ်တဖၣ်အံၤအ၀ဲသ့ၣ်ဘၣ်ဟးစံၣ်ဟးဃ့ၢ်တၢ်ဆၢကတီၢ်ယံၤထီၣ်လံဒီးတကီၢ်ခါခဲအံၤ အ၀ဲသ့ၣ်တဒိးန့ၢ်ဘၣ် စ့ၢ်ကီးတၢ်ဆီၣ်ထွဲမၤစၢၤဘၣ်တကးဒံးဘၣ်အမဲာ်ညါခီဖျိတၢ်ဖံးတၢ်မၤႇကျိၣ်စ့တၢ်ဟဲနုာ်တအိၣ်ႇတၢ်ၦ့ၤစ့ၢ်ကီးထီၣ်အဃိ ဘၣ်ကိၢ်ဘၣ်ဂီၤတၢ်လၢဟံၣ်ဖိဃီဖိတၢ်အိၣ်မူခါဆူညါအဂီၢ်အဂ့ၢ်န့ၣ် ကမျၢၢ်ၦၤဃ့ၢ်တၢ်ဒုးလၢအိၣ်ကီးတရံး၀့ၢ်ဃၢၤတဖၣ် စံး၀ဲန့ၣ်လီၤႉ အပူၤကွံာ်လၢညါကမျၢၢ်ၦၤဃ့ၢ်မှံဟးဖျိးတဖၣ်ဒိးန့ၢ်ဘၣ်တၢ်ဆီၣ်ထွဲမၤစၢၤဘၣ်ဆၣ်ဖဲလီၢ်ခံအံၤ ကီၢ်ပယီၤဒီတဘ့ၣ်အပူၤ ခီဖျိထံဖိကီၢ်ဖိကမျၢၢ်ဘၣ်ဃ့ၢ်မှံဟးဖျိးဟဲအါထီၣ်အဃိ ကီၢ်ပူၤကီၢ်ချၢတၢ်ဆီၣ်ထွဲမၤစၢၤ လီၤစှၤ၀ဲအဂ့ၢ်န့ၣ် ကီးတရံးကီၢ်ဆၣ် ၦၤဂ့ၢ်၀ီတၢ်တိစၢၤမၤစၢၤကမံးတံာ် ၦၤဘၣ်မူဘၣ်ဒါတဂၤ စံး၀ဲဒ်အံၤန့ၣ်လီၤႉ “ဖဲကီးတရံး၀့ၢ်ပူၤအံၤလၢညါခါန့ၣ်တၢ်မၤစၢၤအိၣ်ဒံးတစဲးဒံးႉလၢကီၢ်ပယီၤထံကီၢ်ဒီတဘ့ၣ်အံၤအပူၤ ၦၤဘၣ်စံၣ်မှံဟးဖျိး အါအဃိ ကီၢ်ပူၤကီၢ်ချၢတၢ်ဆီၣ်ထွဲမၤစၢၤလီၤစှၤႉလၢပကီၢ်ဆၣ်ပူၤ ၦၤလၢအမၤတၢ်လၢ တၢ်တိစၢၤမၤစၢၤတကပၤန့ၣ်စ့ၢ်ကီး အ၀ဲသ့ၣ်ဂုာ်ကျဲးစၢးဃုကျဲအဘိဘိလီၤႉလၢပကဒိးန့ၢ်ဘၣ်တၢ်ဆီၣ်ထွဲမၤစၢၤအဂီၢ်န့ၣ်ပတီၣ်ထီၣ်ဃာ်စရီအိၣ်မီၤနီၤႉ မ့ၢ်တၢ်အိၣ်သးအိၣ်ဒ်လဲၣ်န့ၣ်တုၤလၢခဲအံၤပတသ့ၣ်ညါဒံးဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲမဟိတနံၣ်လါဒံၣ်စ့ဘၢၣ်အခါန့ၣ်လၢကီးတရံး၀့ၢ်ခိၣ်၀့ၢ်ဃၢၤတၢ်ဒုးကဲထီၣ်၀ဲလၢတၢ်ပၢၢ်ဆၢသုးပာ်ဖှိၣ်ဒီး ပယီၤသုးအဘၢၣ်စၢၤအဃိ ကၠီၤစှၤကိႇတန့ၤမူၤႇကီၢ်မူႇကမဲၤကိႇကီးနွဲၣ်ႇယွၤသ့ၣ်ကိႇနါကတိသ၀ီ ၦၤကမျၢၢ်လၢအကထိ ဘၣ်ဟးစံၣ်အိၣ်လၢအသမူသကိးအဟံၣ်လၢတၢ်လီၢ်အဂၤဒီးတုၤလၢခဲအံၤၦၤက့ၤအိၣ်လၢ သ၀ီပူၤတအိၣ်ဒံးဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ တကီၢ်ခါခဲအံၤခံခီခံကပၤတၢ်ဒုးကဲထီၣ်တအိၣ်လၢၤ၀ဲဘၣ်ဆၣ်ခီၣ်သုးရ့ၣ်(ခလရ–၉၇)လၢအိၣ်ဆီလီၤသးဖဲ ကီးတရံး၀့ၢ်အံၤ ခီဖျိအ၀ဲသ့ၣ်ခးလီၤကျိဖးဒိၣ်ကိးမုၢ်နံၤဒဲးဃၣ်ဃၣ်အဃိ ဖဲလါအီးကထိဘၢၣ် ၃ သီအနံၤစ့ၢ်ကီး နါကတိသ၀ီ ဖိသၣ်မုၣ်(၁၅)နံၣ်တဂၤဘၣ်ဒိ၀ဲဒၣ်ဒံးအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ
ကညီကီၢ်စဲၣ် မၠၣ်၀တံၣ်၀့ၢ်ပူၤ ၦၤစိ၁်စုက၀ဲၤကျိဟဲအါထီၣ်
လါအီးကထိဘၢၣ် ၄ သီ ၂၀၂၃ နံၣ်၊ ခ့ၣ်အဲးစံၣ် သုးဟံးန့ၢ်တၢ်စိတၢ်ကမီၤ၀ံၤလီၢ်ခံ လၢကညီကီၢ်စဲၣ် ကီၢ်ကၠီၣ်တဲၣ်–ကီၢ်ပယီၤကီၢ်ဆၢ မၠၣ်၀တံၣ်၀့ၢ်ပူၤ ၦၤစိာ်စုက၀ဲၤကျိလၢတၢ်သ့ၣ်ညါအမံၤဟဲအါထီၣ်၀ဲအဂ့ၢ်န့ၣ် ကမျၢၢ်အိၣ်၀့ၢ်ပူၤတဖၣ်စံး၀ဲန့ၣ်လီၤႉ သုးဟံးန့ၢ်ထံကီၢ်တၢ်စိတၢ်ကမီၤ(၂)နံၣ်ဘျဲၣ်အတီၢ်ပူၤလၢကီၢ်ဆၢမၠၣ်၀တံၣ်၀့ၢ်ပူၤန့ၣ် ၦၤဟးၦ့ၤကျိဖုၣ်ဆံးဆံးဖိန့ၢ်၀ဲ ညီညီကဒၣ်ဒီး ဆှိးထီၣ်ကျိလၢအယီၢ်ဒ့ႇၦၤစိာ်စုက၀ဲၤကျိလၢတၢ်တသ့ၣ်ညါအမံၤတဖၣ်ဟဲအါထီၣ်၀ဲဒၣ်အဂ့ၢ်န့ၣ် မၠၣ်၀တံၣ် ကမျၢၢ်လၢအထံၣ်တၢ်အံၤလၢအမဲာာ်တဂၤ စံး၀ဲဒ်အံၤန့ၣ်လီၤႉ “ခဲအံၤနစ့မ့အိၣ်န့ၣ်နဟးၦ့ၤအိၤန့ၢ်ကိးတီၤဒဲးလီၤႉဖဲအံၤခီန့ၣ်လၢကီၢ်ဆၢအဃိနး၀ဲန့ၣ်ႉမ့၀ံၤလၢ(KTV)တၢ်လီၢ်န့ၣ် ၦၤဆှိးထီၣ်ကျိဖုၣ်လၢယီၢ်ဒ့လိၤဒ်န့ၣ်အိၣ်ႉၦၤစိာ်ကျိတဖၣ်အံၤတမ့ၢ်အကဲကရူၢ်ကရၢနီတမံၤဘၣ်ႉၦၤစိာ်ကျိဒ်အံၤဟဲအါထီၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢန့ၣ်အမဲာ်ညါဖဲလါအီးကထိဘၢၣ် ၂ သီ ဟါခီ ၅ နၣ်ရံၣ်ဃၣ်ဃၣ်အဆၢကတီၢ်န့ၣ်စ့ၢ်ကီး လၢမၠၣ်၀တံၣ် က၀ီၤဒ့(၄)အပူၤ ၦၤဖီၣ်စုက၀ဲၤလၢတၢ်တသ့ၣ်ညါအမံၤခံဂၤအကျါအူတ့ၤမီၤအ့အံၤခး၀ဲဒၣ်(ကၤဘီစၣ်)စ့တၢး ၦၤမၤတၢ်ဖိတဂၤအဃိ သံ၀ဲတဘျီဃီဖဲတၢ်ကဲထီၣ်သးအဂ့ၢ်န့ၣ် ၦၤလၢအဘူးဒီးသုးကီၣ်ကးတဂၤ စံး၀ဲန့ၣ်လီၤႉ အ၀ဲစံး၀ဲလၢ“ၦၤခးသံအီၤတဂၤန့ၣ်အကဲ၀ဲဒၣ်စ့တၢး(မဲၣ်န့ၣ်ကၠၢၣ်)ႉၦၤလၢအဟဲခးတၢ်တဂၤန့ၣ် အဟဲဃ့လိၢ်စ့လၢၦၤသံတဂၤန့ၣ်အအိၣ်ႉက၀ီၤဒ့သးၦၢ်တဂၤန့ၣ်တဲပၠးကဒါ၀ဲမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ပယီၤသုးအံၤမၤဃံးထီၣ်တၢ်ဘံၣ်တၢ်ဘၢလၢ၀့ၢ်ပူၤဘၣ်ဆၣ်တၢ်ခးလိာ်သးကဲထီၣ်လၢ၀့ၢ်ပူၤခဲအံၤခဲအံၤဒီး ၦၤကမျၢၢ်သံဘၣ်ဒိဘၣ်ထံးအိၣ်၀ဲအသိး လီၢ်က၀ီၤကမျၢၢ်တဖၣ်စ့ၢ်ကီးဘၣ်ဟးထီၣ်က့ၤလီၤလၢတၢ်ပလီၢ်ပဒီပူၤ အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ဘၣ်ဃးၦၤကမျၢၢ်စိာ်တၢ်စုက၀ဲၤကျိတၢ်ဂ့ၢ်အံၤ ဖဲလါဖ့ၤဘြူၤအါရံၤထီၣ် ၁၀ သီအနံၤ သုးကီၣ်ကးထုးထီၣ်တၢ်ဘျၢသဲစးလၢ စိာ်ကျိလၢအလံာ်လဲၢ်(လဲၣ်စ့ၣ်)အိၣ်သ့၀ဲဒီး ဖဲန့ၣ်လီၢ်ခံ ၦၤကမျၢၢ်စိာ်ကျိဟဲအါထီၣ်၀ဲဒၣ်ဒ်အံၤလီၤအဂ့ၢ်န့ၣ် လီၢ်က၀ီၤကမျၢၢ်ပဲာ်ထံနီၤဖးစံး၀ဲန့ၣ်လီၤႉ ဒ်သုးကီၣ်ကးထုးထီၣ်ပာ်ဖျါ၀ဲအသိးန့ၣ် ကျိလၢအလံာ်လဲၢ်(လဲၣ်စ့ၣ်)အိၣ်လၢတၢ်စိာ်အီၤန့ၢ်တဖၣ်အကျါပၣ်ဃုာ်၀ဲ qHk 9mm ကျိတရံးဖိႇ ကျိဖုၣ်ႇ ကျိဟးခးအီၣ်ဆၣ်ဖိကီၢ်ဖိႇကျိကလံၤသ့ၣ်တဖၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ
တလါအတီၢ်ပူၤသုးကီၣ်ကးသူတၢ်စုဆူၣ်ခီၣ်တကးလၢၦၤဖိဒံဖိသၣ်အဖီခိၣ်ကဲထီၣ်အိၣ်အခါ(၂၀)ဘျဲၣ်
လါအီးကထိဘၢၣ် ၄ သီႇ ၂၀၂၃ နံၣ်ႇ ခ့ၣ်အဲးစံၣ် တနံၣ်အံၤ(၂၀၂၃)လါစဲးပထ့ဘၢၣ်တလါတီၢ်ပူၤ ခီဖျိပယီၤသုးသူတၢ်စုဆူၣ်ခီၣ်တကးအဃိ (၁၈)နံၣ်ဆူဖီလာ် ၦၤဖိဒံဖိသၣ်သံကဲထီၣ်အိၣ်၀ဲဒၣ်(၂၃)ခါအဂ့ၢ်န့ၣ် (New Myanmar Foundation-NMF)အ Human Rights Program-ၦၤဂ့ၢ်၀ီခွဲးယာ်တၢ်ရဲၣ်တၢ်ကျဲၤ ပာ်ဖျါ၀ဲဖဲလါအီးကထိဘၢၣ် ၂ သီအနံၤန့ၣ်လီၤႉ (NMF)အတၢ်ပာ်ဖျါအပူၤ ၦၤဖိဒံဖိသၣ်သံဘၣ်ဒိဘၣ်ထံးကဲထီၣ်တဖၣ်အကျါ လၢစကဲကီၢ်ခီဒိၣ်ႇပကိကီၢ်ခီဒိၣ်ဒီး ကညီကီၢ်စဲၣ်တဖၣ်အပူၤ ခီဖျိကဘီယူၤဟဲခးလီၤတၢ်ႇပယီၤသုးခးလီၤကျိဖးဒိၣ်လၢကၠိႇဟံၣ်ဖီခိၣ်အဃိ ၦၤဖိဒံဖိသၣ် သံဘၣ်ဒိဘၣ်ထံးအနီၣ်ဂံၢ်ဟဲအါထီၣ်၀ဲအဂ့ၢ်န့ၣ် ပာ်ဖျါ၀ဲန့ၣ်လီၤႉ ဖဲန့ၣ်အကျါလၢစကဲကီၢ်ခီဒိၣ် ၀ိသိၤကီၢ်ဆၣ်အပူၤ ခီဖျိပယီၤသုးကဘီယူၤဟဲခးလီၤတၢ်အဃိ ၦၤဖိသၣ်အနံၣ်(၁၀)တဂၤဒီး ကညီကီၢ်စဲၣ် ဖၣ်ပူၣ်ကီၢ်ဆၣ် ထံဂီၤထၣ် ကၠိ ၦၤကၠိဖိ(၄)ဂၤ သံ၀ဲဒၣ်အဂ့ၢ်န့ၣ် ပာ်ဖျါ၀ဲန့ၣ်လီၤႉ ကီၢ်ဆၣ်လၢအိၣ်ဖျါတၢ်ဖီခိၣ်တဖၣ်အံၤဒီးပကိကီၢ်ခီဒိၣ် ဆီထံးကီၢ်ဆၣ်အပူၤ ၦၤဖိဒံဖိသၣ်ဘၣ်ဒိဘၣ်ထံးခဲလၢာ် (၃၁)ဂၤအကျါပၣ်ဃုာ်ၦၤဖိသၣ်(၆)လါဒီးၦၤဖိသၣ်(၈)နံၣ် ၂ ဂၤအဂ့ၢ်န့ၣ် တၢ်ထုးထီၣ်ပာ်ဖျါပူၤအသိး သ့ၣ်ညါဘၣ်န့ၣ်လီၤႉ “လၢပအိၣ်တကပၤအံၤပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်ဒီးပယီၤသုးဒိးလီၤမ့ၣ်ပိၢ်အဃိ ၦၤဖိသၣ်သံဘၣ်ဒိဘၣ်ထံးအိၣ်ႉပယီၤသုးမ့ခးတၢ်န့ၣ်ခးနါစိၤတၢ်အဃိၦၤဘၣ်ဒီးကျိၦၤသံလၢဟံၣ်န့ၣ်အါမီၤနီၤႉ အ၀ဲသ့ၣ်က့ၤလၢကျဲနါက့ဒိးလီၤဃာ်ဟီၣ်လာ်မ့ၣ်ပိၢ်အဃိၦၤဖိဒံဖိသၣ်လၢအဃ့ၢ်တၢ်ဒုးတဖၣ် ဖဲအ၀ဲသ့ၣ်က့ၤဟံ အီၣ်ဟုသးက့ၤလၢကျဲအခါယီၢ်ဘၣ်၀ဲဒၣ်ဒ်န့ၣ်အိၣ်မီၤနီၤ”အဂ့ၢ်န့ၣ် ပကိကီၢ်ခီဒိၣ် ချၢၣ်လွံၢ်ထူၣ်ကီၢ်ရ့ၣ် လီၢ်က၀ီၤပိာ်မုၣ်တဂၤ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၃)တၢ်ပၢဟီၣ်က၀ီၤ ချၢၣ်လွံၢ်ထူၣ်ကီၢ်ရ့ၣ်အပူၤ တနံၣ်အံၤ(၂၀၂၃)ဒီတကတီၢ် ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်အါအါဂီၢ်ဂီၢ်အဃိ ကၠိတဖၣ်ဘၣ်ပံးအိးထီၣ်တလီၢ်လီၢ်ဒီးၦၤဖိဒံဖိသၣ်တဖၣ်တၢ်မၤလိမၤဒိးစဲးခံ၀ဲအဂ့ၢ်န့ၣ် သ့ၣ်ညါဘၣ်လၢဟီၣ်က၀ီၤ ဂံၢ်ခီၣ်ထံး တၢ်ကစီၣ်အအိၣ်န့ၣ်လီၤႉ လၢတၢ်န့ၣ်အဃိသုးကီၣ်ကးလၢအလုၢ်သ့ၣ်ခါပတာ်မၤကမၣ်ထံဂုၤကီၢ်သးၦၤဂ့ၢ်၀ီတၢ်တိစၢၤမၤစၢၤတၢ်ဘျၢသဲစး...
ပယီၤသုးကဘီယူၤဟဲခးလီၤတၢ်အဃိ မုၢ်တြီၢ်ကီၢ်ရ့ၣ်ပူၤ ၦၤကၠိဖိသံ(၃)ဂၤႇ ဘၣ်ဒိ(၈)ဂၤ
လါအီးကထိဘၢၣ် ၄ သီႇ ၂၀၂၃ နံၣ်ႇ ခ့ၣ်အဲးစံၣ် လၢခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ(သုးက့ ၅) မုၢ်တြီၢ်ကီၢ်ရ့ၣ် ဒူသ၀ီတဖၣ်အပူၤ လါစဲးပထ့ဘၢၣ် တလါအတီၢ်ပူၤ ခီဖျိပယီၤသုး(Jet-Fighter)ကဘီယူၤဟဲတ့ၢ်လီၤမ့ၣ်ပိၢ်အဃိ ၦၤကၠိဖိသံ(၃)ဂၤႇ ကၠိသရၣ်၊မုၣ်ဃုာ်ဒီး လီၢ်က၀ီၤသ၀ီဖိခဲလၢာ်ဘၣ်ဒိ၀ဲဒၣ်(၈)ဂၤအဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်တၢ်ကစီၣ် ထုးထီၣ်ပာ်ဖျါ၀ဲဖဲမဟါ လါအီးကထိဘၢၣ် ၃ သီ အနံၤန့ၣ်လီၤႉ လၢခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် ကီၤရိၢ်ဘီထၣ်သ၀ီႇသ့ၣ်သူခံႇဒ့ၣ်ဘူးနိၣ်ဟီၣ်က၀ီၤႇတၢ်ခံဒၢဟီၣ်က၀ီၤႇ ဂဲၤယုၢ်ဒၢဟီၣ်က၀ီၤဒီးထံဂီၤထၣ်သ၀ီတဖၣ်အပူၤ ခီဖျိပယီၤသုးကဘီယူၤဟဲခးလီၤတၢ်ကအိၣ်လၢအဘျီ(၁၀) ဃၣ်ဃၣ် ညါအဃိ ဘၣ်သံ၀ဲဒၣ် ထံဂီၤထၣ်သ၀ီ(၁၅)နံၣ်ဖီလာ် ၦၤကၠိဖိ ၃ ဂၤႇ ကၠိကမံးတံာ်တဂၤအသိး ကၠိသရၣ်၊မုၣ်ဃုာ်ဒီး ၦၤသ၀ီဖိခဲလၢာ်ဘၣ်ဒိ၀ဲဒၣ်(၈)ဂၤ အဂ့ၢ်န့ၣ် ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ် လံာ်တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ ပယီၤသုးကဘီယူၤဟဲတ့ၢ်လီၤမ့ၣ်ပိၢ်လၢအတယၢၢ်ဃၢအိၣ်အပီၣ်(၅၀၀)လၢအမ့ၢ်ချဲးစထၢၣ်မ့ၣ်ပိၢ်(၂၃)ဖျၢၣ်တကးဒံးဘၣ် သူစ့ၢ်ကီး၀ဲကျိစဲးဒီးခးလီၤကျိဖးဒိၣ်ဆူပျီပူၤကအိၣ်လၢအဖျၢၣ်(၂၀)ညါအဃိကမျၢၢ်တၢ်သံတၢ်ဘၣ်ဒိဘၣ်ထံးဟဲအိၣ်ထီၣ်၀ဲဒၣ်န့ၣ်လီၤႉကဘီယူၤဟဲခးလီၤတၢ်အဃိဘၣ်ဟးဂီၤ၀ဲဒၣ်တၢ်ဘါယွၤသရိာ်တၢ်သူၣ်ထီၣ်(၂)ဖျၢၣ်ႇတၢ်သိၣ်လိကၠိ (၁)ဖျၢၣ်ႇ ဟံၣ်(၁၂)ဖျၢၣ်ဒီးဆၣ်ဖိကီၢ်ဖိသံဘၣ်ဒိဘၣ်ထံးစ့ၢ်ကီးအိၣ်၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လၢခ့ၣ်အဲၣ်ယူၣ်(သုးက့ ၅)ဟီၣ်က၀ီၤ တလါအတီၢ်ပူၤ ပယီၤသုးႇသုးခိးကီၢ်ဆၢ(BGF)ဒီးကညီဒီကလုာ်တၢ်ထူၣ် ဖျဲးသုးမုၢ်ဒိၣ်(KNLA)အဘၢၣ်စၢၤတၢ်ဒုးကဲထီၣ်၀ဲခဲလၢာ်(၈၄)ဘျီဒီး ပယီၤသုးတကပၤသံ၀ဲ(၃၉)ဂၤႇ ဘၣ်ဒိ(၄၆)ဂၤအကျါ ပၣ်ဃုာ်၀ဲသုးခိၣ်စိခံဂၤအသိး မ့မ့ၢ်လၢ(KNLA)တကပၤခီန့ၣ် ဘၣ်လုၢ်ထီၣ်ကွံာ်အသးသမူလၢ ထံကီၢ်ဒီးၦၤကလုာ်အဂီၢ် (၅)ဂၤႇ ဘၣ်ဒိ(၁၃)ဂၤအဂ့ၢ်န့ၣ် ခ့ၣ်အဲၣ်ယူၣ်တကပၤစံး၀ဲန့ၣ်လီၤႉ ခံခီခံကပၤတၢ်ဒုးအပူၤဘၣ်ဃးပယီၤသုးသံဘၣ်ဒိဘၣ်ထံးဒီးပယီၤသုးသူကျိချံၦာ်သၣ်လၢတၢ်ဒုးပူၤတဖၣ်အံၤန့ၣ် (KNLA)တကပၤထုးထီၣ်ပာ်ဖျါ၀ဲအိၣ်ဘၣ်ဆၣ်မ့မ့ၢ်သုးကီၣ်ကးတကပၤန့ၣ်ထုးထီၣ်ပာ်ဖျါ၀ဲတၢ်ကစီၣ်တအိၣ်...
တၢ်ဒွဲၣ်အူအီၣ်ကီးတရံး(လ၀က)၀ဲၤဒၢး၀ံၤလီၢ်ခံလၢမုၢ်နၤခီပယီၤသုးဟးအိၣ်ခိးခူသူၣ်တၢ်ဟဲအါထီၣ်
လါအီးကထိဘၢၣ် ၄ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲအပူၤကွံာ်လါစဲးပထ့ဘၢၣ် ၂၇ သီ ဟါခီအဆၢကတီၢ် တၢ်ဒွဲၣ်အူအီၣ်၀ဲသုးကီၣ်ကးစုတီၤဖီလာ် ကီးတရံး (လ၀က)၀ဲၤဒၢး ကဲထီၣ်၀ံၤလီၢ်ခံလၢမုၢ်နၤခီန့ၣ်ပယီၤသုးဟးအိၣ်ခိးခူသူၣ်တၢ်လၢ၀့ၢ်ပူၤက၀ီၤဒ့တဖၣ်အပူၤဟဲအထီၣ်၀ဲ အဂ့ၢ်န့ၣ် ကမျၢၢ်လၢအိၣ်၀့ၢ်ပူၤတဖၣ်စံး၀ဲန့ၣ်လီၤႉ ပယီၤသုးတဖၣ်အံၤဖဲအ၀ဲသ့ၣ်ဟးအိၣ်ခိးခူသူၣ်တၢ်အခါအ၀ဲသ့ၣ်မၢ၀ဲဒၣ်က၀ီၤဒ့ပူၤၦၤကမျၢၢ်တဖၣ် အိးထီၣ်အဟံၣ်ပဲတြီ အဂ့ၢ်န့ၣ် ၀့ၢ်ပူၤကမျၢၢ်လၢအသဂၢၢ်ဘၣ်တၢ်ကဲထီၣ်သးလၢအနီၢ်ကစၢ်အံၤစံး၀ဲအသိး သ့ၣ်ညါဘၣ်န့ၣ်လီၤႉ ၀့ၢ်ပူၤကမျၢၢ်တဂၤစံး၀ဲလၢ“လၢမုၢ်နၤခီန့ၣ်အ၀ဲသ့ၣ်ဟးအိၣ်ခိးခူသူၣ်တၢ်ခီဧါႇမ့ၢ်မတၤလဲၣ်တသ့ၣ်ညါဘၣ်ႉ အ၀ဲသ့ၣ်မၢၦၤအိးထီၣ်ပဲတြီႇကိးတၢ်လၢဟံၣ်မဲာ်ညါန့ၣ်ဖးယံၤညါႉအ၀ဲသ့ၣ်မ့နုာ်လီၤလၢဟ့ၣ်ပူၤန့ၣ်မ့ၢ်အကမၤမနုၤလဲၣ်န့ၣ်ပတသ့ၣ်ညါဘၣ်မီၤနီၤႉပဘၣ်ယိၣ်လၢပမ့အိးထီၣ်ပဲတြီန့ၣ်ကဟံတၢ်ဖိတၢ်လံၤမီၤနီၤႇအဃိပအိးထီၣ်ပဲတြီတဘူၣ်ဘၣ်” အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ကိးမုၢ်နံၤဒဲးဃၣ်ဃၣ်ပယီၤသုးဟးဆှၣ်တၢ်လၢကီးတရံး၀့ၢ်ပူၤဟဲအါထီၣ်၀ဲအသိး ဖဲအ၀ဲသ့ၣ်ဟးဆှၣ်တၢ်အခါ ခး၀ဲဒၣ်ကမျၢၢ်လၢအဟးထီၣ်က့ၤလီၤတဖၣ်စ့ၢ်ကီးအိၣ်၀ဲအဂ့ၢ်န့ၣ် ကီးတရံး၀့ၢ်ပူၤ ကမျၢၢ်တဖၣ် စံး၀ဲန့ၣ်လီၤႉ “လၢမုၢ်နၤခီန့ၣ်ပယီၤသုးဟးဆှၣ်တၢ်အိၣ်မီၤနီၤႉလၢအ၀ဲတနံၤန့ၣ်ပပံးမ့ၣ်အူစဲး၀ံၤပလ့(ဒးမံ)ဘျီ အ၀ဲသ့ၣ်ခးပိၢ်ထီၣ် ကျိမီၤနီၤႉလၢတတါအူတကပၤန့ၣ်နါက့ဖဲလါအပူၤကွံာ်လါစဲးပထ့ဘၢၣ်အခါန့ၣ် ၦၤကမျၢၢ်လၢဟးထီၣ်လၢ မုၢ်နၤခီတဂၤ ပယီၤခးသံအီၤ”အဂ့ၢ်န့ၣ် ကမျၢၢ်လၢအဂၤတဂၤစ့ၢ်ကီး စံး၀ဲန့ၣ်လီၤႉ ပယီၤသုးဟးဆှၣ်တၢ်လၢမုၢ်နၤခီဘၣ်ဆၣ်လၢ၀့ၢ်ခိၣ်၀့ၢ်ဃၢၤ၀့ၢ်ကပိၤကပၤန့ၣ်ခီဖျိတၢ်ပၢၢ်ဆၢသုးကရူၢ်နုာ်လီၤဟံးန့ၢ် အလီၢ်အကျဲအဃိတၢ်နုာ်လီၤခးအ၀ဲသ့ၣ်လၢ၀့ၢ်ပူၤသ့ကိးဆၢကတီၢ်ဒဲးလီၤအဂ့ၢ်န့ၣ် ၦၤလၢအဘူးဒီးတၢ်ပၢၢ်ဆၢသုးကရူၢ်တဖၣ် စံး၀ဲန့ၣ်လီၤႉ
လၢတၢ်ကကွၢ်ဆၢၣ်မဲ၁်သုးမီၤစိရိၤအံၤအဂီၢ်တၢ်ကရၢကရိတၢ်ဃူတၢ်ဖိးဒီးၦၤကလု၁်အတၢ်ပ၁်ဖှိၣ်မၤသကိးအံၤ အရ့ဒိၣ်၀ဲအဂ့ၢ် KNU ကရၢခိၣ် စံး၀ဲ
လါအီးကထိဘၢၣ် ၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢတၢ်ကဒုးဖျိးထီၣ်ကွံာ်သုးမီၤစိရိၤလၢအမ့ၢ်၀ဲဒၣ်ကညီဒီတကလုာ်အဒုၣ်ဒါအံၤအဂီၢ်န့ၣ် တၢ်ကရၢကရိတၢ်ဃူတၢ်ဖိးဒီး ကမျၢၢ်အတၢ်ပာ်ဖှိၣ်မၤသကိးဆီၣ်ထွဲဟ့ၣ်ဂံၢ်ဟ့ၣ်ဘါမ့ၢ်တၢ်လၢအရ့ဒိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကရၢခိၣ် ပဒိၣ်စီၤကွဲၤထူ၀့ စံး၀ဲန့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၃၀ သီအနံၤ အဆိကတၢၢ်တဘျီ ခ့ၣ်အဲၣ်ယူၣ် ကရၢခိၣ် ပဒိၣ်စီၤကွဲၤထူ၀့ စံးကတိၤလီၤတၢ်ဆူ ကညီကမျၢၢ်ထံဖိကီၢ်ဖိအအိၣ်လၢ(အီၤလါ)တၢ်ရဲၣ်တၢ်ကျဲၤပူၤဒီး လၢတၢ်ရဲၣ်တၢ်ကျဲၤအံၤအပူၤ အ၀ဲစံးလီၤ၀ဲဒ်အံၤန့ၣ်လီၤႉ ခ့ၣ်အဲၣ်ယူၣ် ကရၢခိၣ် စံး၀ဲလၢ“မုၢ်မဆါတနံၤအံၤတၢ်လၢအကမၤတံာ်တာ်ၦၤအကမၤဟးဂီၤၦၤန့ၣ်မ့ၢ်၀ဲဒၣ် ပဒုၣ်ကဒါ လၢပဘၣ်ကွၢ်ဆၢၣ်မဲာ်အီၤခဲအံၤလီၤဆီဒၣ်တၢ်လၢသုးမီၤစိရိၤကရူၢ်န့ၣ်လီၤႉအဃိန့ၣ်လၢတၢ်ကွၢ်ဆၢၣ်မဲာ်၀ဲ ဒၣ်သုးမိၤစိရိၤ ကရူၢ်လၢအိၣ်ဒီးဂံၢ်ဒီးဘါအိၣ်ဒီးတၢ်စုက၀ဲၤဂီၢ်မုၢ်ဂီၢ်ပၤအံၤအဂီၢ်န့ၣ်ပတၢ်ကရၢကရိအဒွဲပူၤပထံရူၢ်ကီၢ်သဲးပတၢ်မၤသကိးလၢဃုာ်ဒီးပၦၤကလုာ်သ့ၣ်တဖၣ်အတၢ်နၢ်ပၢၢ်ဆီၣ်ထွဲမၤသကိးတၢ်မ့ၢ်အတၢ်အလီၢ်အိၣ်ဒိၣ်ကတၢၢ်လၢပၦၤကလုာ်အသိး အကျါ န့ၣ်လီၤႉ”အဂ့ၢ်န့ၣ် စံးလီၤ၀ဲန့ၣ်လီၤႉ လီၤဆီဒၣ်တၢ်တၢ်ဘၣ်ကွၢ်ဆၢၣ်မဲာ်ဒ်အံၤန့ၣ်တမ့ၢ်လၢထဲလၢပစိၤဆၢကတီၢ်ခဲအံၤဘၣ်ႇမ့မ့ၢ်တခီပဘၣ်ကွၢ်ဆၢၣ်မဲာ်ဒီတကတီၢ်ညါလီၤႉလၢပတၢ်စံၣ်စိၤတဲစိၤအပူၤန့ၣ်ပဘၣ်ကွၢ်ဆၢၣ်မဲာ်ဒီးပယီၤႇဘၣ်တၢ်မၤအၢမၤသီမၤတရီတပါမၤဟး ဂီၤဒူသ၀ီ ပဘၣ်ဃ့ၢ်မှံဟးဖျိးႇပၦၤကညီဖိသ့ၣ်တဖၣ်အိၣ်မူကန့ၢ်ကသ့အဂီၢ်ဘၣ်ဃ့ၢ်အိၣ်ကဒုသးလၢထံခံကွာ်စိာ်လၢပျၢၤလံၤလံၤလီၤအဂ့ၢ်န့ၣ် ခ့ၣ်အဲၣ်ယူၣ် ကရၢခိၣ် စံး၀ဲန့ၣ်လီၤႉ လၢန့ၣ်အမဲာ်ညါ(၂၀၂၁)သုးဟံးန့ၢ်တၢ်စိတၢ်ကမီၤ၀ံၤလီၢ်ခံန့ၣ် ထံဖိကီၢ်ဖိကမျၢၢ်တဖၣ်ထီဒါသုးမီၤစိရိၤ လီၤဆီဒၣ်တၢ်လၢ ကီၢ်ပူၤၦၤပယီၤဖိသ့ၣ်တဖၣ်မ့ၢ်ဂ့ၤႇကလုာ်ၦၤသူၣ်ဘီၣ်သးစၢ်တဖၣ်မ့ၢ်ဂ့ၤအတၢ်ထီဒါ၀ဲဒၣ်သုးမီၤစိရိၤအံၤအိၣ်လၢကျဲအကလုာ်ကလုာ်န့ၣ်လီၤႉပယီၤသုးအံၤစူးကါ၀ဲဒၣ်တၢ်စုဆူၣ်ခီၣ်တကးႇစူးကါ၀ဲဒၣ်စုက၀ဲၤသ့ၣ်တဖၣ် မၤသံမၤ၀ီ၀ဲအဃိ ၦၤဟဲဃ့ၢ်ထီၣ်ဆူပအိၣ်လီၤႉလၢတၢ်ဒီသဒၢအ၀ဲသ့ၣ်တဖၣ်အဂီၢ်န့ၣ်တၢ်မၤအီၤန့ၣ်လီၤႉတကတီၢ်ဃီတၢ်ဒုးတၢ်ယၤသ့ၣ်တဖၣ်ခီဖျိသးလၢတၢ်မၤတရီတပါတၢ်မၤတတၢာ်တနါသ့ၣ်တဖၣ်အံၤပၦၤသုးမုၢ်သံၣ်ဘိပတၢ်ကရၢကရိသ့ၣ်တဖၣ်တူၢ်လိာ်အီၤတန့ၢ်ဘၣ်အဃိဒီသဒၢ၀ဲဒၣ်ဒီးကီၢ်ပယီၤတကပၤစ့ၢ်ကီးမၤဆူၣ်ထီၣ်အသုးအဃိတၢ်ဒုးဘၣ်ကဲထီၣ်၀ဲအဂ့ၢ်န့ၣ် ခ့ၣ်အဲၣ်ယူၣ် ကရၢခိၣ် စံးလီၤ၀ဲန့ၣ်လီၤႉ ခီဖျိတၢ်ဒုးကဲထီၣ်အဃိကညီကမျၢၢ်ထံဖိကီၢ်ဖိတဖၣ်ဘၣ်ဃ့ၢ်မှံဟးဖျိးအနီၣ်ဂံၢ်အါထီၣ်အါန့ၢ်အပူၤကွံာ်ဒံးဒီး ထဲဒၣ်ကညီဟီၣ်က၀ီၤတဘ့ၣ်အပူၤန့ၣ်ၦၤဃ့ၢ်မှံဟးဖျိးအနီၣ်ဂံၢ်အိၣ်၀ဲ(၆)ကလီၢ်လံဒီး ပအိၣ်၀ဲဒၣ်ဒီးတၢ်ကရၢကရိ တဖၣ်လၢအဆီၣ်ထွဲမၤစၢၤ၀ဲဒၣ်ၦၤဃ့ၢ်မှံဟးဖျိးသ့ၣ်တဖၣ်အံၤဒီးတကးဒံးဘၣ်အမဲာ်ညါထံဂုၤကီၢ်ဂၤတၢ်ကရၢကရိဒီးၦၤတဂၤစုာ်စုာ်ဆီၣ်ထွဲမၤစၢၤစ့ၢ်ကီးအိၣ်၀ဲန့ၣ်လီၤႉဒီးတၢ်မၤစၢၤသ့ၣ်တဖၣ်အံၤတမ့ၢ်တၢ်လၢတၢ်ၦဲၤဘၣ်ႉအဂ့ၢ်ဒ်လဲၣ်န့ၣ်တၢ်မၤစၢၤတၢ်လိၣ်အနီၣ်ဂံၢ်နီၣ်ဒွးဒိၣ်၀ဲအဃိသးန့ၣ်တမ့ၢ်တၢ်လၢတၢ်ၦဲၤလၢကတီၢ်ယံၤဘၣ်ႉအလီၢ်အိၣ်လၢတၢ်ကဘၣ်မၤအါထီၣ်အီၤပကဘၣ်ဃုကျဲန့ၣ်လီၤအဂ့ၢ်န့ၣ် ပဒိၣ်စီၤကွဲၤထူ၀့ စံး၀ဲန့ၣ်လီၤႉ ကညီတၢ်ပၢၢ်ဆၢန့ၣ်တမ့ၢ်ကညီဒီကလုာ်စၢဖှိၣ်ကရၢ–ခ့ၣ်အဲၣ်ယူၣ်အတၢ်ပၢၢ်ဆၢဘၣ်ႇ မ့ၢ်၀ဲဒၣ်ကညီဒီတကလုာ် အတၢ်ပၢၢ်ဆၢန့ၣ်လီၤႉကညီဒီကလုာ်စၢဖှိၣ်ကရၢထဲတဖုဧိၤဒီးအၦၤမၤသကိးတၢ်ဖိသ့ၣ်တဖၣ်အံၤကမၤလၢၦဲၤ၀ဲဒီး ကမၤထူၣ်ဖျဲးထီၣ်၀ဲန့ၣ်တန့ၢ်ဘၣ်ႇပၦၤကလုာ်သ့ၣ်တဖၣ်လၢအသနၢၣ်လၢအလီၢ်အကျဲဒၣ်၀ဲကဘၣ်မၤ၀ဲဒၣ်န့ၣ်လီၤ အဂ့ၢ်န့ၣ် ဆီၣ်တခူစံးလီၤ၀ဲန့ၣ်လီၤႉ
တၢ်ထံၣ်လိ၁်သးဒီးခိၣ်နၢ်လီၢ်လံၤအံၤတမ့ၢ်အဘျုးကအိၣ်လၢသုးကီၣ်ကးအဂီၢ်ဘၣ်အဂ့ၢ် KNU စံး၀ဲ
လါအီးကထိဘၢၣ် ၃ သီႇ ၂၀၂၃ နံၣ်ႇ ခ့ၣ်အဲးစံၣ် သုးမီၤစိရိၤအခိၣ် သုးခိၣ်ကျၢၢ်ဒိၣ်စိ မ့အီၤလဲၤ ကွဲမုာ်ကိးထံၣ်၀ဲခိၣ်နၢ်လီၢ်လံၤလၢအမူဒါတအိၣ်လၢၤဘၣ် သ့ၣ်တဖၣ်အံၤန့ၣ် တမ့ၢ်လၢအဘျုးကအိၣ်နီတမံၤဘၣ်အဂ့ၢ်န့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ၦၤကတိၤတၢ်ပၢ ပဒိၣ်စီၤကျၢၤစ့ စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဖဲအပူၤကွံာ်လါစဲးပထ့ဘၢၣ် ၃၀ သီအနံၤ (ခ့ၣ်အဲၣ်ယူၣ်)ကရၢခိၣ်လီၢ်လံၤ သုးခိၣ်ကျၢၢ်ဒိၣ်စိ စီၤမူၤတူစ့ဖိႇ တၢ်ဒီသဒၢ၀ဲၤကျိၤခိၣ်လီၢ်လံၤ ပဒိၣ်စီၤရီကၠၢၤခ့ၤ ဒီး ဒူပျာ်ယာ်ကီၢ်ရ့ၣ်ခိၣ် ပဒိၣ်စီၤစွ့ၤမီ တဖၣ်အံၤ လဲၤထံၣ်လိာ်သးဒီး သုးမီၤစိရိၤအခိၣ် သုးခိၣ်ကျၢၢ်ဒိၣ်စိ မ့အီၤလဲၤ လၢန့ၣ်ပၠံၣ်တီၣ် ဘယ့ၣ်နီၤဘျီၣ်ပူၤအဂ့ၢ် သုးကီၣ်ကးအတၢ်ကစီၣ်သန့ ထုးထီၣ်ပာ်ဖျါ၀ံၤလီၢ်ခံ (ခ့ၣ်အဲၣ်ယူၣ်)က့ၤခီၣ်ဆၢစံးကဒါ၀ဲန့ၣ်လီၤႉ တၢ်လဲၤဘျီ၀ဲအံၤသုးကီၣ်ကးကွဲမုာ်၀ဲလၢနီၢ်တဂၤအဖီခိၣ် မ့ၢ်ဒၣ်(ခ့ၣ်အဲၣ်ယူၣ်)ကရၢခိၣ်လီၢ်လံၤဒီးအကရူၢ် လဲၤထံၣ်လိာ်သးလီၤဒီးခီဖျိအ၀ဲသ့ၣ်မ့ၢ်ခိၣ်နၢ်လီၢ်လံၤႇလၢတၢ်ကရၢကရိအပူၤအတၢ်စိတၢ်ကမီၤတအိၣ်လၢၤဘၣ်အဃိ တမ့ၢ်လၢအဘျုးကအိၣ်လၢသုးကီၣ်ကးအဂီၢ်ဘၣ်အဂ့ၢ်န့ၣ် ပဒိၣ်စီၤကျၢၤစ့ စံး၀ဲဒ်အံၤန့ၣ်လီၤႉ “သုးကီၣ်ကးကွဲမုာ်၀ဲဒၣ်ခိၣ်နၢ်လီၢ်လံၤအံၤလၢကကဲထီၣ်တၢ်တိစၢၤမၤစၢၤလၢအ၀ဲသ့ၣ်ဂီၢ်တခါခါလီၤမီၤနီၤႉ ကမၤပူၤဖျဲးအ၀ဲသ့ၣ်တၢ်၀ံဃၢထဲထဲအံၤန့ၣ်လ့ၤတက့ၤတသ့ဘၣ်န့ၣ်ပတဲအီၤသ့လီၤႉအ၀ဲသ့ၣ်ကဟဲမၤကဒံကဒါမၤနါစိၤတၢ်ဒ်အံၤစ့ၢ်ကီးန့ၣ်ပဆိမိၣ်ပတယးဃာ်အီၤလံမီၤနီၤ”အဂ့ၢ်န့ၣ် စံး၀ဲန့ၣ်လီၤႉ လၢန့ၣ်အမဲာ်ညါတၢ်လဲၤထံၣ်လိာ်သးဘျီ၀ဲအံၤအပူၤ ပၣ်ဃုာ်စ့ၢ်ကီး ဒူပျာ်ယာ်ကီၢ်ရ့ၣ်ခိၣ် ပဒိၣ်စီၤစွ့ၤမီ ဒီး အ၀ဲန့ၣ်ဟးထီၣ်လၢအမူဒါပူၤလံအဃိတၢ်လဲၤထံၣ်လိာ်သးအံၤတမ့ၢ်အဘျုးကအိၣ်လၢသုးကီၣ်ကးအဂီၢ်ဘၣ်အသိး တၢ်လီၤဆီတအိၣ်လၢကမျၢၢ်ၦၤဃ့ၢ်မှံဟးဖျိးအတၢ်ဘံၣ်တၢ်ဘၢအဂီၢ်စ့ၢ်ကီးဘၣ်အဂ့ၢ်န့ၣ် ခ့ၣ်အဲၣ်ယူၣ် ၦၤကတိၤတၢ်ပၢ စံးအါထီၣ်၀ဲန့ၣ်လီၤႉ ဒ်သုးကီၣ်ကးအတၢ်ကစီၣ်သန့ထုးထီၣ်ပာ်ဖျါ၀ဲအသိးန့ၣ် သုးကီၣ်ကးစံး၀ဲလၢ ခ့ၣ်အဲၣ်ယူၣ် ကရၢခိၣ်လီၢ်လံၤအံၤ မ့ၢ်၀ဲဒၣ်ကလုာ်ဒူၣ်ခိၣ်နၢ်တဂၤလၢအဆဲးလီၤတ့ၢ်ဃာ်၀ဲ(NCA)အသိးလၢကမျၢၢ်တၢ်မုာ်တၢ်ခုၣ်အဂီၢ်အမူဒါအိၣ်ဒံး၀ဲ အဃိလၢဟီၣ်က၀ီၤတၢ်မုာ်တၢ်ခုၣ်ဒီးတၢ်ဂုၤထီၣ်ပသီထီၣ်အဂီၢ်ဘၣ်တၢ်ကွဲမုာ်၀ဲလီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ လၢန့ၣ်အမဲာ်ညါ(ခ့ၣ်အဲၣ်ယူၣ်)ကရၢခိၣ်လီၢ်လံၤဒီးအကရူၢ်အံၤစံး၀ဲလၢ ပမ့အဲၣ်ဒိးတၢ်မုာ်တၢ်ခုၣ်နီၢ်နီၢ်န့ၣ် ပမၤအီၤလၢတၢ်သူၣ်ဟ့သးဟ့ႇပမၤအီၤလၢဖီၣ်စုက၀ဲၤအကျဲတန့ၢ်၀ဲဘၣ်အသိးမ့မ့ၢ်တခီကလဲၤလၢတၢ်ထံၣ်လိာ်တၢၣ်ပီၣ်တဲသကိးဒီးကလဲၤလၢ(NCA)အကျဲအဂ့ၢ်...
ဆီဘၣ်တၢ်ဆါကဲထီၣ်သးလၢ လူၢ်ပျဲၢ်ဒီးတၢ်ကြဲၢ်ကီၢ်ဆၣ် ဒူသ၀ီတဖၣ်အပူၤ
လါအီးကထိဘၢၣ် ၃ သီႇ ၂၀၂၃ နံၣ်ႇ ခ့ၣ်အဲးစံၣ် လၢကညီကီၢ်စဲၣ် လူၢ်ပျဲၢ်ဒီးတၢ်ကြဲၢ်ကီၢ်ဆၣ် ဒူသ၀ီတဖၣ်အပူၤ ခီဖျိဆီဘၣ်တၢ်ဆါကဲထီၣ်သးဆီသံအါမးအဃိ လီၢ်က၀ီၤကမျၢၢ်လၢအဘုၣ်အီၣ်ဆီသ့ၣ်တဖၣ်အံၤဆှူ၀ဲဒၣ်အဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤႉ ကီၢ်ဆၣ်၀ဲန့ၣ်ဒူသ၀ီတဖၣ်အပူၤ လၢဟံၣ်ဖိဃီဖိကျိၣ်စ့တၢ်ဟဲနုာ်အဂီၢ် ၦၤသ၀ီဖိကမျၢၢ်(၈၀)မျးကယၤဃၣ်ဃၣ်န့ၣ် အ၀ဲသ့ၣ်ဘုၣ်ဆါ၀ဲဒၣ်ဆီဒီးစးထီၣ်ဖဲတလါအံၤတၢ်စူၤဘူးကလၢာ်အခါန့ၣ် ဆီဘၣ်တၢ်ဆါကဲထီၣ်သးဆီသံ၀ဲဒၣ် အါမးအဂ့ၢ်န့ၣ် တၢ်ကြဲၢ်လီၢ်က၀ီၤကမျၢၢ်တဂၤ စံး၀ဲဒ်အံၤန့ၣ်လီၤႉ “တနံၣ်န့ၣ်ပဆါဘၣ်ဆီခံဘျီညါႉလၢဟံၣ်ဖီဃီဖိကအီၣ်ကအီအဂီၢ်န့ၣ်ဘီၣ်စၢ်တစဲးမီၤနီၤႉ န့ၢ်ဘၣ်စ့ၢ်ကီးစ့လၢတၢ်ချၢတစဲးတမွဲးအဃိအါဒၣ်တက့ၢ်ဟံၣ်ကိးဖျၢၣ်ဒဲးန့ၣ်ဘုၣ်ဆီလီၤႉဆီတၢ်ဆါလီၤအသံအါအဃိ ၦၤကမျၢၢ်လၢအဘုၣ်ဆီတဖၣ်တၢ်ဆၢကတီၢ်ဒၢးလၢာ်ႇအဆၣ်ဒၢးလၢာ်ဂီၤ ဆှူဒ်န့ၣ်လီၤမီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ခီဖျိဆီဘၣ်တၢ်ဆါဆီသံအါဒီးတကီၢ်ခါခဲအံၤစ့ၢ်ကီးခီဖျိတၢ်ၦ့ၤထီၣ်ကိးမံၤဒဲးအဃိ လီၢ်က၀ီၤသ၀ီဖိတဖၣ်အံၤ တၢ်ဘၣ်ဒိဘၣ်ထံးအိၣ်ထီၣ်လၢဟံၣ်ဖိဃီဖိတၢ်သူတၢ်စွဲအဂီၢ်အဂ့ၢ်န့ၣ် လီၢ်က၀ီၤကမျၢၢ်တဂၤဃီ၀ဲန့ၣ် စံးအါထီၣ်၀ဲန့ၣ်လီၤႉ လၢကညီကီၢ်စဲၣ်အပူၤအါဒၣ်တက့ၢ်ဖဲတၢ်စူၤခါဒီးတၢ်ဆၢကတီၢ်ဆီတလဲသးအကတီၢ်န့ၣ် ဆီဒီးဆၣ်ဖိကီၢ်ဖိလၢအဂၤ တဖၣ် ဘၣ်တၢ်ဆါကဲထီၣ်သးအိၣ်အဃိ ဖဲတၢ်ဆၢကတီၢ်ဆီတလဲသးအဆၢကတီၢ်အံၤ ဘၣ်ပလီၢ်သးဒီး မ့တပလီၢ်သးဘၣ်န့ၣ်ဆီသံကအါထီၣ်သ့၀ဲအဂ့ၢ်န့ၣ် လူၢ်ပျဲၢ်ကီၢ်ဆၣ် ၦၤဘုၣ်ဆီဖိတဂၤစံး၀ဲန့ၣ်လီၤႉ အ၀ဲစံး၀ဲလၢ“အခီၣ်ထံးန့ၣ်ပဆိမိၣ်လၢအသံယိယိဒ်န့ၣ်လီၤႉလီၢ်ခံမးလၢသ၀ီပူၤအံၤဆီဘၣ်တၢ်ဆါဟဲအါထီၣ် မးပသ့ၣ်ညါလၢဆီဘၣ်တၢ်ဆါမီၤနီၤႉနမ့တပလီၢ်သးဘၣ်ဒုကကူ၀ဲဟံၣ်တဖျၢၣ်၀ံၤတဖျၢၣ်လီၤႉတၢ်လၢဆီဘၣ်တၢ်ဆါအံၤအဘၣ်ကူဘၣ်ဂာ်ချ့မး”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ်န့ၣ်လီၤႉ ဆီလၢအဘၣ်တၢ်ဆါသ့ၣ်တဖၣ်အံၤအတၢ်ပနီၣ်န့ၣ်မ့ၢ်၀ဲ အတအီၣ်ဆၣ်ဘၣ်ႇအမဲာ်ချံထီၣ်ဂီၤသံ၀ဲဒီး လီၢ်က၀ီၤၦၤကမျၢၢ်တဖၣ်ကူစါယါဘျါ၀ဲဆီသ့ၣ်တဖၣ်အံၤဘၣ်ဆၣ် ဆီတဖၣ်ဆဲးသံဒံး၀ဲအဂ့ၢ်န့ၣ် လီၢ်က၀ီၤကမျၢၢ် စံး၀ဲန့ၣ်လီၤႉ ခီဖျိဆီဘၣ်တၢ်ဆါအဃိလီၢ်က၀ီၤကမျၢၢ်တဖၣ်ဘၣ်ယိၣ်လၢဆီဘၣ်တၢ်ဆါအဃၢ်အံၤကဘၣ်ကူဘၣ်ဂာ်အဃိ ၦၤတၦ့ၤအီၣ်ဆီဟံၣ်အါအါလၢၤဘၣ်ႇဆီစ့ၢ်ကီးအၦ့ၤလီၤ၀ဲဒီး ဆီညၣ်ကျးလၢအိၣ်၀့ၢ်ပူၤတဖၣ်စ့ၢ်ကီးၦၤဆါ၀ဲတန့ၢ် အါအါလၢၤဘၣ်အဂ့ၢ်န့ၣ် လူၢ်ပျဲၢ်၀့ၢ် ဆီညၣ်ကျးကစၢ်တဂၤ စံး၀ဲန့ၣ်လီၤႉ ဒ်န့ၣ်အသိးဖဲတနံၣ်အံၤ(၂၀၂၃)ထီၣ်လါယနူၤအါရံၤအခါစ့ၢ်ကီး လၢတၢ်ကြဲၢ်ကီၢ်ဆၣ် ဒူသ၀ီတဖၣ်အပူၤ ခီဖျိဆီဘၣ်တၢ်ဆါႇဆီသံကဲထီၣ်တ့ၢ်သးအါအါဂီၢ်ဂီၢ်အဃိ လီၢ်က၀ီၤကမျၢၢ်တဖၣ်အဆီသံဆှူ၀ဲဒၣ်အါမးဒံး န့ၣ်လီၤႉ
KNU ကရၢခိၣ်လီၢ်လံၤဒီးအကရူၢ် လဲၤထံၣ်လိ၁်သးဒီးသုးကီၣ်ကးအခိၣ်
လါအီးကထိဘၢၣ် ၂ သီႇ ၂၀၂၃ နံၣ်ႇ ခ့ၣ်အဲးစံၣ် ဖဲအပူၤကွံာ်လါစဲးပထ့ဘၢၣ် ၃၀ သီအနံၤန့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကရၢခိၣ်လီၢ်လံၤ စီၤမူၤတူစ့ဖိႇ တၢ်ဒီသဒၢ၀ဲၤကျိၤခိၣ်လီၢ်လံၤ ပဒိၣ်ရီကၠၢၣ်ခ့ၤႇ ဒူပျာ်ယာ်ကီၢ်ရ့ၣ် ပဒိၣ်စီၤစွ့ၤမီ လဲၤထံၣ်လိာ်အသးဒီး သုးမီၤစိရိၤအခိၣ် သုးခိၣ်ကျၢၢ်ဒိၣ်စိ မ့အီၤလဲၤ လၢန့ၣ်ပၠံၣ်တီၣ် ဘယ့ၣ်နီၤဘျီၣ်ပူၤအဂ့ၢ်န့ၣ် သုးကီၣ်ကးအတၢ်ကစီၣ် သန့တဖၣ် ပာ်ဖျါ၀ဲန့ၣ်လီၤႉ သုးခိၣ်ကျၢၢ်ဒိၣ်စိ စီၤမူၤတူစ့ဖိႇ ပဒိၣ်ရီကၠၢၣ်ခ့ၣ် ဒီး ပဒိၣ်စီၤစွ့ၤမီ တဖၣ်အံၤ လဲၤထံၣ်လိာ်သးအဒီး သုးကီၣ်ကးခိၣ် သုးခိၣ်ကျၢၢ်ဒိၣ်စိ မ့အီၤလဲၤႇ အူယဲ၀့အူႇ သုးခိၣ်နၢ်ဒိၣ်ထီႇ တၢ်ဒုးဘၣ်လိာ်ဖိးဒ့ဒီကလုာ်တၢ်မုာ်တၢ်ခုၣ်တၢ်ထိၣ်ဃူ ကမံးတံာ် သုးခိၣ်ကျၢၢ်ဒိၣ်စိ ယၤပၠ့ၣ်သ့ၣ်တဖၣ်ဒီး တၢ်လဲၤဘျီ၀ဲအံၤအ၀ဲသ့ၣ်တၢၣ်ပီၣ်တဲသကိးဘၣ်ဃးတၢ်မုာ်တၢ်ခုၣ် အဂ့ၢ်အကျိၤသ့ၣ်တဖၣ်အဂ့ၢ်န့ၣ် သုးကီၣ်ကးတကပၤထုးထီၣ်ပာ်ဖျါ၀ဲန့ၣ်လီၤႉ တကီၢ်ခါခဲအံၤလၢ(ခ့ၣ်အဲၣ်ယူၣ်)ဒူပျာ်ယာ်ကီၢ်ရ့ၣ် ၀ီၢ်ရီဟီၣ်က၀ီၤအပူၤန့ၣ် စးထီၣ်ဖဲအပူၤကွံာ်လါစဲးပထ့ဘၢၣ် ၁၂ သီ တုၤလၢလါစဲးပထ့ဘၢၣ် ၃၀ သီအနံၤ ခီဖျိပယီၤသုးနုာ်လီၤအိၣ်ဆီလီၤသးလၢချၢၣ်တကူၣ်တၢၣ်သ၀ီပူၤအဃိ လီၢ်က၀ီၤကမျၢၢ်အဂၤ(၁၀၀၀၀)ဃၣ်ဃၣ်ဘၣ်ဃ့ၢ်မှံဟးဖျိးဒံး၀ဲတုၤလၢခဲအံၤတစုန့ၣ်လီၤႉ (ခ့ၣ်အဲၣ်ယူၣ်)ကရၢခိၣ်လီၢ်လံၤ တီခိၣ်ရိၣ်မဲကရူၢ် လဲၤထံၣ်လိာ်သးဒီးသုးကီၣ်ကးအခိၣ်လၢတၢ်ဂ့ၢ်တၢ်ကျိၤ မနုၤလဲၣ်န့ၣ် ခံခီခံကပၤထုးထီၣ်ပာ်ဖျါ၀ဲတအိၣ်ဘၣ် ဘၣ်ဆၣ် အတၢ်လဲၤထံၣ်လိာ်သးအံၤ တမ့ၢ်လၢထံရူၢ်ကီၢ်သဲးႇ...
သုးကီၣ်ကးဒီး(TNLA)တၢ်ဒုးအပူၤ ၦၤပိ၁်မုၣ်ႇၦၤဖိသၣ်ဘၣ်ဒိဘၣ်ထံးအိၣ်အဂ့ၢ် ယိၤဒိၣ်ဂ့ၢ်၀ီခွဲးယ၁်ကရူၢ်စံး၀ဲ
လါစဲးပထ့ဘၢၣ် ၂၉ သီႇ ၂၀၂၃ နံၣ်ႇ ခ့ၣ်အဲးစံၣ် လၢယိၤဒိၣ်ကီၢ်စဲၣ်ကလံၤစိး မူၤစဲၤကီၢ်ဆၣ်အပူၤ တၢ်ဒုးကဲထီၣ်လၢသုးကီၣ်ကးဒီးပလီၣ်ဒီကလုာ်တၢ်ထူၣ်ဖျဲးသုးမုၢ်ဒိၣ် (TNLA)အဘၢၣ်စၢၤအခါန့ၣ် ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤတၢ်အဃိ ကမျၢၢ်ၦၤပိာ်မုၣ်(၃)ဂၤဒီး ၦၤဖိသၣ်မုၣ်(၁)ဘၣ်ဒိ၀ဲဒၣ်အဂ့ၢ်န့ၣ် ယိၤဒိၣ်ဂ့ၢ်၀ီခွဲးယာ်ကရူၢ်(SHRF)ထုးထီၣ်ပာ်ဖျါ တၢ်ကစီၣ် ဖဲမဟါလါစဲးပထ့ဘၢၣ် ၂၈ သီ အနံၤန့ၣ်လီၤႉ စးထီၣ်ဖဲအပူၤကွံာ်လါစဲးပထ့ဘၢၣ် ၂၀ သီ တုၤလၢလါစဲးပထ့ဘၢၣ် ၂၅ သီ တၢ်ဒုးကဲထီၣ်လၢ(၆)သီအတီၢ်ပူၤ ခီဖျိပယီၤသုးခးလီၤကျိဖးဒိၣ်ႇကဘီယူၤဟဲခးလီၤစၢၤတၢ်အဃိၦၤမုၢ်ၦၢ်အနံၣ်(၄၀)တဂၤဘၣ်၀ဲဒၣ်အခီၣ်ကံၣ်ဒုၣ်ဒီး နါလ့(၅၀)နံၣ်ႇနါစွဲၣ်ဒီးနါအံၤ(၁၇)နံၣ်သ့ၣ်တဖၣ်အံၤဘၣ်ဒိဘၣ်ထံး၀ဲအဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ လံာ်တၢ်ပာ်ဖျါ ၦၤကတိၤတၢ်ပၢ Ying Leng Harn စံး၀ဲလၢ“သုးကီၣ်ကးလုၢ်သ့ၣ်ခါပတာ်မၤကမၣ်ၦၤဂ့ၢ်၀ီခွဲးယာ် ဒ်အံၤ အိၣ်ဃာ်လၢညါခါလံၤလံၤလံႉခဲအံၤနါက့အိၣ်လီၤႉဘၣ်ဆၣ်သုးဟံးန့ၢ်တၢ်စိတၢ်ကမီၤ၀ံၤလီၢ်ခံလၢပဟီၣ်က၀ီၤပူၤအံၤတၢ်ဒုးကဲထီၣ်တအိၣ်ဘၣ်ဘၣ်ဆၣ်ပထံၣ်လၢအ၀ဲသ့ၣ်ခးလီၤကျိဖးဒိၣ်ဟဲအါထီၣ်မီၤနီၤႉသုးကီၣ်ကးပညိၣ်ကမျၢၢ်ထံဖိကီၢ်ဖိဒီးအတၢ်မၤကမၣ်ဒုးယၤကွီၢ်မ့ၣ်တဖၣ်န့ၣ်ပမၤနီၣ်မၤဃါအီၤခဲလၢာ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ် န့ၣ်လီၤႉ လၢန့ၣ်အမဲာ်ညါကလုာ်ဒူၣ်ဖီၣ်စုက၀ဲၤကရူၢ်ကရၢလၢအိၣ်ဟီၣ်က၀ီၤကိးဘ့ၣ်ဒဲးအပူၤတဖၣ် လၢသုးမီၤစိရိၤစုတီၤအဖီလာ် တသ့ဖဲအသ့ကဒီသဒၢၦၤဃ့ၢ်မှံဟးဖျိးကမျၢၢ်ထံဖိကီၢ်ဖိတဖၣ်အဂ့ၢ်န့ၣ် အ၀ဲစံးအါထီၣ်၀ဲန့ၣ်လီၤႉ မူၤစဲၤ၀့ၢ်တကးဘၣ်လၢန့ၣ်အမဲာ်ညါ ပယီၤသုးတြိၤ(၉၉)လၢအနီၣ်ဂံၢ်ကအိၣ်အဂၤ(၄၀)လၢအိၣ်ဆီလီၤသးဖဲ (ဘဲၣ်စါစၤတီၤ)ဒီး(ခူ၀့ၤ)သ၀ီပူၤတဖၣ်အံၤဒီး မၠိၣ်မၣ် ဂၢၤကီၢ်သုးႇ ကီခါ ဂၢၤကီၢ်သုးႇ ပ့စၤ ဂၢၤကီၢ်သုးတဖၣ် ပာ်ဖှိၣ်ထီၣ်သး ကအိၣ်လၢအဂၤ(၁၀၀)ဃၣ်ဃၣ်အံၤ ထီၣ်ဒုး၀ဲ(TNLA)ကရူၢ်လၢအိၣ်ဆီလီၤသးဖဲ(စဲၤလၣ်)သ၀ီမုၢ်ထီၣ် (လွဲၤတ့မ့)အံၤ အဃိ ဖဲန့ၣ်ခံခီခံကပၤတၢ်ဒုးဆူၣ်ထီၣ်၀ဲဒီးတုၤလၢခဲအံၤတစုတၢ်ဒုးဆဲးကဲထီၣ်ဒံး၀ဲအဖၢမုၢ်န့ၣ်လီၤႉ ခီဖျိခံခီခံကပၤတၢ်ဒုးကဲထီၣ်အဃိ မူၤစဲၤ၀့ၢ် နၣ်မ်ကၣ်သ၀ီကရူၢ်ႇစဲၤလၣ်သ၀ီကရူၢ်ဒီး ၀့နါသ၀ီ လီၢ်က၀ီၤကမျၢၢ် အဂၤ(၇၀၀)ဃၣ်ဃၣ် လဲၤဃ့ၢ်အိၣ်၀ဲလၢ...