ကမျၢၢ်လၢအလီၤဘၣ်တၢ်ကီတၢ်ခဲတဖၣ် KNU ၀ီၢ်ရီကီၢ်ဆၣ် ဆီၣ်ထွဲမၤစၢၤ၀ဲဟုသး
လါအီကူး ၉ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ် ကၠၤအ့စ့ၣ်ကၠံကီၢ်ဆၣ်အပူၤ ခီဖျိထံဒိၣ်ဃိၣ်ယွၤဒီးတၢ်ဆူးတၢ်ဆါအဃိ ကမျၢၢ်ထံဖိကီၢ်ဖိလၢအလီၤဘၣ်တၢ်ကီတၢ်ခဲသ့ၣ်တဖၣ် ဖဲလါအီကူး ၇ သီအနံၤန့ၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရီကီၢ်ဆၣ် ၦၤဘၣ်မူဘၣ်ဒါတဖၣ် လဲၤဆီၣ်ထွဲမၤစၢၤ၀ဲဒၣ်ဟုသးဒီး ဂံၢ်ခီၣ်ထံးတၢ်အီၣ်တၢ်အီတဖၣ်အဂ့ၢ်န့ၣ် သ့ၣ်ညါဘၣ်လၢၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ ခီဖျိထံဒိၣ်ဃိၣ်ယွၤႇတၢ်ဆူးတၢ်ဆါဒီးထံရူၢ်ကီၢ်သဲးတၢ်အိၣ်သးတဂၢၢ်တကျၢၤ၀ဲအဃိ တၢ်ဖံးတၢ်မၤဒီးတၢ်လုၢ်အီၣ်နီၢ်ခိသးသမူတဖၣ် ဟဲကီခဲထီၣ်၀ဲဒိၣ်မးန့ၣ်လီၤႉ ခီဖျိဟီၣ်က၀ီၤတဖၣ်အပူၤစ့ၢ်ကီးထံဒိၣ်အဃိ ၦၤသူၣ်အီၣ်ဖျးအီၣ်တၢ်တသ့ဒံးဘၣ်ဒီး ဒ်သိးၦၤလၢအလီၤဘၣ်တၢ်ကီတၢ်ခဲသ့ၣ်တဖၣ်ကဘၣ်ဂီၢ်ဘၣ်ဒွါအဂီၢ် ပပညိၣ်ဒီးမၤစၢၤ၀ဲလီၤအဂ့ၢ်န့ၣ် KNU ၀ီၢ်ရီကီၢ်ဆၣ် ၦၤဘၣ်မူဘၣ်ဒါ စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ “ဖဲကမျၢၢ်ထံဖိကီၢ်ဖိတဖၣ်လီၤဘၣ်တၢ်ကီတၢ်ခဲအဆၢကတီၢ် ပ၀ဲခ့ၣ်အဲၣ်ယူၣ်အံၤ ဒ်တၢ်သ့အိၣ်ၦၤအသိး အမၤစၢၤ၀ဲဒၣ်ဂံၢ်ခီၣ်ထံးတၢ်အီၣ်တၢ်အီတဖၣ်မီၤနီၤႉ ကယဲၢ်မ့ၢ်ကမျၢၢ်လၢအလီၤဘၣ်တၢ်ကီ တၢ်ခဲတဖၣ်အဲၣ်ဒိးမၤစၢၤခဲလၢာ်လီၤႉ ဖဲထံဒိၣ်ဃိၣ်ယွၤတၢ်ဆူးတၢ်ဆါဒီးထံရူၢ်ကီၢ်သဲးတဂၢၢ်တကျၢၤဒံးဘၣ်အကတီၢ် အ၀ဲသ့ၣ်လီၤဘၣ်တၢ်ကီတၢ်ခဲန့ၣ်ပသ့ၣ်ညါလီၤႉ ဒ်သိးဆဲးမၤစၢၤကန့ၢ်ဒီးအဂီၢ်ကဂုာ်ကျဲးစၢး၀ဲလီၤ” အဂ့ၢ်န့ၣ် KNU ၀ီၢ်ရီကီၢ်ဆၣ် ပၢပြးကရူၢ် ၦၤဘၣ်မူဘၣ်ဒါတဂၤလၢအမ့ၢ် စီၤကၠီၤဟ့ စံး၀ဲန့ၣ်လီၤႉ ၀ီၢ်ရီကီၢ်ဆၣ် မၠဲၣ်သၣ်ယၣ်သ၀ီအပူၤ တၢ်လဲၤမၤစၢၤ၀ဲဟုသးဒီးဂံၢ်ခီၣ်ထံးတၢ်အီၣ်တၢ်အီတဖၣ်လၢသိလ့ၣ် ၂ ခိၣ်ဒီး KYO ကညီသးစၢ်ကရူၢ်လၢအအိၣ်ကီၢ်ချၢအံၤစ့ၢ်ကီး မၤစၢၤ၀ဲဒၣ်တၢ်လီၢ်လၢ ၦၤဘၣ်ဃ့ၢ်မှံဟးဖျိးအိၣ်အလီၢ်ဒီးဂံၢ်ခီၣ်ထံးကမျၢၢ်ထံဖိကီၢ်ဖိတဖၣ်လၢဂံၢ်ခီၣ်ထံးတၢ်အီၣ်တၢ်အီလၢအလီၤလၢလၢစ့ပယီၤအကလီၢ်(၃၀၀)ကၠးစ့ၢ်ကီးအဂ့ၢ်န့ၣ် သ့ၣ်ညါဘၣ်လၢ KNU ၀ီၢ်ရီကီၢ်ဆၣ် ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ မၠဲၣ်သၣ်ယၣ်သ၀ီ...
အၣ်စံၣ်ယၣ်ခၢၣ်စးလီၤဆီကနုာ်လီၤကျဲၤဃူကျဲၤဖိးလၢတၢ်ဘၢၣ်စၢၤ ဒ်သိးကတုၤထီၣ်ဘးထီၣ်အဂီၢ် ကပာ်ဖှိၣ်မၤကသကိးတၢ်အဂ့ၢ် PPST စံး၀ဲ
လါအီကူး ၆ သီႇ ၂၀၂၁ နံၣ်ႇ ခ့ၣ်အဲးစံၣ် ဒ်သိးတၢ်ကဘှါရှဲကီၢ်ပယီၤထံကီၢ်တၢ်ဃံးတၢ်စ့ၤတဖၣ်အဂီၢ် တၢ်တီၣ်ထီၣ်၀ဲကီၢ်ပယီၤဂ့ၢ်၀ီအၣ်စံၣ်ယၣ်ခၢၣ်စးလီၤဆီ အဖီခိၣ် PPST သဂၢၢ်၀ဲဒီး ဒ်သိးတၢ်နုာ်လီၤကျဲၤဃူကျဲၤဖိးလၢတၢ်ဘၢၣ်စၢၤကတုၤထီၣ်ဘးထီၣ်အဂီၢ် ကပာ်ဖှိၣ်မၤသကိးတၢ်အဂ့ၢ်န့ၣ် ကလုာ်ဒူၣ်ဖီၣ်စုက၀ဲၤကရူၢ်ကရၢလၢအဆဲးလီၤ(NCA)တဖၣ် တၢ်တီခိၣ်ရိၣ်မဲတၢ်မုာ်တၢ်ခုၣ်တၢ်မၤအကျဲကရူၢ်(PPST) ထုးထီၣ်ဘိးဘၣ်ရၤလီၤ၀ဲဖဲမဟါ(လါအီကူး ၅)သီ တၢ်အိၣ်ဖှိၣ်၀ံၤအခါန့ၣ်လီၤႉ ဖဲမဟါ(PPST)တၢ်အိၣ်ဖှိၣ်၀ံၤအလီၢ်ခံထုးထီၣ်ပာ်ဖျါ၀ဲလၢ ကီၢ်ပယီၤဂ့ၢ်၀ီအၣ်စံၣ်ယၣ်ခိၣ်နၢ်ဒိၣ်ထီလီၤဆီတၢ်အိၣ်ဖှိၣ်အပူၤ ဒ်သိးတၢ်ကမၤဖျါထီၣ်တၢ်သးလီၤပလိာ်(၅)ထံၣ်လၢတၢ်ပာ်ပနီၣ်၀ဲအံၤအမိၢ်လံၤမိၢ်ၦၢ်အဂီၢ် တၢ်ဃုထၢတီၣ်ထီၣ်ဘြူၣ်နဲထံကီၢ်ထံဂုၤကီၢ်ဂၤကိတိာ်(၂) Erywan Yusof လၢခၢၣ်စးလီၤဆီအဖီခိၣ်အံၤသဂၢၢ်၀ဲဒီး ထံဂုၤကီၢ်ဂၤကနုာ်လီၤကျဲၤဃူကျဲၤဖိးလၢတၢ်ဘၢၣ်စၢၤအဖီခိၣ် ကဂုာ်ကျဲးစၢးထဲးဂံၢ်ထဲးဘါမၤ၀ဲဒ်သိးကဖိးမံလိာ်သးဒီးတကီၢ်ခါထံရူၢ်ကီၢ်သဲးတၢ်အိၣ်သးလၢကီၢ်ပယီၤအပူၤအဂ့ၢ်န့ၣ် ပာ်ဖျါ၀ဲန့ၣ်လီၤႉ PPST ၦၤကတိၤတၢ်ပၢ ခိၤမၠ့ၣ်ထိ စံး၀ဲ“အၣ်စံၣ်ယၣ်ထုးထီၣ်ဘိးဘၣ်ရၤလီၤ၀ဲအိၣ်(၅)ထံၣ်လီၤႉ တၢ်ယဲၢ်ထံၣ်အံၤန့ၣ် တပၣ်ဃုာ်၀ဲဒီးတၢ်ကဘၣ်ပျၢ်လီၤကွံာ်ၦၤဟ့ၣ်ကူၣ်တၢ်ဒီၣ်အီၣ်ဆါစူးကၠံၣ်ဒီးကီၢ်ခိၣ်အူ၀့မၠ့ၣ်ဃုာ်ဒီး ၦၤလၢတၢ်ဖီၣ်ဃာ်အီၤတဖၣ်ဘၣ်ႉ အဃိန့ၣ်ပတူၢ်လိာ်သဂၢၢ်၀ဲဒၣ်အၣ်စံၣ်ယၣ်ခၢၣ်စးတဖၣ်လီၤႉ ဘၣ်ဆၣ်လၢတၢ်ကနုာ်လီၤကျဲၤဃူကျဲၤဖိးလၢတၢ်ဘၢၣ်စၢၤဒ်အံၤန့ၣ် ဒ်သိးကကၢကီၣ်၀ဲဒီးတကီၢ်ခါထံကီၢ်တၢ်အိၣ်သးဒီးတၢ်လိၣ်ဘၣ်တဖၣ်အဂီၢ်ကပာ်ဖှိၣ်မၤသကိးတၢ်လီၤန့ၣ် ဘၣ်တၢ်ထုးထီၣ်ဘိးဘၣ်ရၤလီၤ၀ဲလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကီၢ်ပယီၤထံကီၢ်ဂ့ၢ်၀ီအၣ်စံၣ်ယၣ်ခၢၣ်စးလီၤဆီလၢဘၣ်တၢ်တီၣ်ထီၣ်၀ဲအံၤန့ၣ် ကဘၣ်မၤဖျါထီၣ်၀ဲအပူၤကွံာ် အၣ်စံၣ်ယၣ်တၢ်သးလီၤပလိာ်(၅)ထံၣ်လၢတၢ်ဆၢတဲာ်ပာ်ပနီၣ်လီၤ၀ဲအံၤအမိၢ်လံၤမိၢ်ၦၢ်ဒီး တၢ်(၅)ထံၣ်န့ၣ်မ့ၢ်၀ဲ ပတုာ်ကွံာ်တၢ်စုဆူၣ်ခီၣ်တကးတဘျီဃီႇ ကဃုသကိးတၢ်အစၢလၢတၢ်မုာ်တၢ်ခုၣ်အပူၤလၢ ကီၢ်ပယီၤကမျၢၢ်ထံဖိကီၢ်တၢ်ဘၣ်ဘျုးအဂီၢ် ထံၣ်လိာ်တဲသကိးတၢ်ဒီးတၢ်ကရၢကရိလၢအဘၣ်ထွဲခဲလၢာ်တဖၣ်ႇ အၣ်စံၣ်ယၣ်ကရူၢ်ၦၤပၢၤလီၢ်ဆ့ၣ်နီၤမီၢ်သီလီၤဆီကနုာ်လီၤကျဲၤဃူကျဲၤဖိးလၢတၢ်ဘၢၣ်စၢၤ ဒ်သိးတၢ်တၢၣ်ပီၣ်တဲ သကိးကကဲထီၣ်အဂီၢ်ႇ ဒ်သိးအၣ်စံၣ်ယၣ်ကဟ့ၣ်၀ဲၦၤဂ့ၢ်၀ီတၢ်တိစၢၤမၤစၢၤအဂီၢ်ဒီး အၣ်စံၣ်ယၣ်ကရူၢ်အမီၢ်သီလီၤဆီဒီးခၢၣ်စးကရူၢ်ကဟဲလၢကီၢ်ပယီၤအပူၤဒီး တကီၢ်ခါတၢ်အိၣ်သးလၢအကဲထီၣ်သးလၢကီၢ်ပယီၤအပူၤတဖၣ်အံၤ ကထံၣ်လိာ်သးဒီးတၢ်ကရၢကရိလၢအဘၣ်ထွဲတဖၣ်အဂီၢ်၀ဲန့ၣ်လီၤႉ တၢ်အိၣ်ဖှိၣ်လၢတၢ်မၤအီၤလၢ(၂)သီအတီၢ်ပူၤအံၤ တၢ်တၢၣ်ပီၣ်တဲသကိးဘၣ်ထွဲဒီးတကီၢ်ခါကီၢ်ပယီၤအပူၤ...
တၢ်သုးကွံာ်ခ့ၣ်အဲၣ်ယူၣ်ခီကရဲးအဖီခိၣ် -ကၢးဒုးသ့ၣ်ညါထံဖိကီၢ်ဖိအဂ့ၢ် တၢ်ပဲာ်ထံနီၤဖးအိၣ်ထီၣ်
လါအီကူး ၅ သီႇ ၂၀၂၁နံၣ်ႇ ခ့ၣ်အဲးစံၣ် တနံၣ်အံၤဖဲလါယူၤအတီၢ်ပူၤတၢ်တိာ်ပာ်၀ဲလၢတၢ်ကမၤ KNU- ကညီဒီကလုာ်စၢဖှိၣ် ကရၢ(၁၇) ဘျီတဘျီ ခီကရဲးတၢ်အိၣ်ဖှိၣ်ဒီး တကီၢ်ခါလၢကီၢ်ပယီၤအပူၤ ခီဖျိသုး ဟံးန့ၢ်ကွံာ်တၢ်စိတၢ်က မီၤဒီး ခိ၀ံၣ်တၢ်ဆါသံသ-တိာ်တၢ်အိၣ်သးအဃိ တၢ်တမၤဘၣ်ဒံးခီကရဲး တၢ်အိၣ်ဖှိၣ်ဘၣ်ဒီးတၢ်သုး ကွံာ်၀ဲမုၢ် နံၤမုၢ်သီတၢ်ဆၢကတီၢ်န့ၣ်လီၤႉ သုးမီၤစိရိၤဟံးန့ၢ်ကွံာ်တၢ်စိတၢ်ကမီၤ၀ံၤအလီၢ်ခံ လၢခ့ၣ်အဲၣ်ယူၣ်တၢ်ပၢဟီၣ်က၀ီၤတနီၤအပူၤ ခီဖျိသုးမီၤစိရိၤအသုးဒီးကညီတၢ်ထူၣ်ဖျဲးသုးမုၢ်ဒိၣ်(KNLA)တဖၣ်အဘၢၣ်စၢၤ တၢ်ဒုးဟဲက့ၤကဲ ထီၣ်ကဒါအဃိ သုးက့ကိးဘ့ၣ်ဒဲးခိၣ်နၢ်တဖၣ်ႇခၢၣ်စးတဖၣ် ကဟဲထီၣ်ခီကရဲးတၢ်အိၣ်ဖှိၣ်အဂီၢ် တၢ်ကီတၢ်ခဲအိၣ်၀ဲအသိး ခီဖျိခိ၀ံၣ်တၢ်ဆါဒီးတၢ်ကးတံၢ်ဃာ်ကျဲတဖၣ်အိၣ်၀ဲအဃိ ဘၣ်တၢ်သုးကွံာ်ခီ ကရဲးတၢ်အိၣ်ဖှိၣ်မုၢ်နံၤမုၢ်သီလီၤအဂ့ၢ်န့ၣ် ၁၇ ၀ီတ၀ီ ခီကရဲးကကဲထီၣ်အဂီၢ် ကမံးတံာ်ၦၤဘၣ်မူ ဘၣ်ဒါတဖၣ် စံး၀ဲန့ၣ်လီၤႉ KNU နဲၣ်ရွဲၣ်ခိၣ်ကျၢၢ်သဃဲၤ(၁)ပဒိၣ်စီၤဆၢၦဲၤစံး၀ဲလၢ“အဆိကတၢၢ်ပပာ်ပနီၣ်ဖဲလါယူၤမီၤနီၤႉ သနါက့တၢ်ဒုးတၢ်ယၤကဲထီၣ်ဖဲလါမးရှးအပူၤဖဲသုးက့(၅)ဒီးသုးက့(၃)တခီမီၤနီၤႉ ဖဲလါမ့ၤထီၣ်လါအ့ဖြ့ၣ်လၢာ်စ့ၢ်ကီးတၢ်ဒုးတၢ်ယၤကဲထီၣ် ကဘီယူၤဟဲခးတၢ်စ့ၢ်ကီးအိၣ်စ့ၢ်လီၤႉ ကမျၢၢ်တဖၣ်ဘၣ်ဃ့ၢ်မှံဟးဖျိးဒီးတၢ်ကးတံၢ်ဃာ်ထံကျိတဘိန့ၣ်အိၣ်လီၤႉ မ့မ့ၢ်လၢကီၢ်ပယီၤတခီန့ၣ်ဒ်သုသ့ၣ်ညါအသိးလီၤသုးဟံးဆူၣ်န့ၢ်တၢ်စိတၢ်ကမီၤ၀ံၤအလီၢ်ခံန့ၣ် တၢ်ဒုးတၢ်ယၤစ့ၢ်ကီးလၢသုးက့(၁)အိၣ်ထီၣ်စ့ၢ်ကီးလီၤႉ သုးက့(၁ႇ၃ႇ၅)တၢ်သ့ၣ်တဖၣ်အံၤကအိးထီၣ်ကျဲလၢကဟဲ၀့ၢ်ပူၤစ့ၢ်ကီးတမ့ၢ်တၢ်ညီဘၣ်ႉ ထံကျိတဘိန့ၣ်စ့ၢ်ကီးတၢ်ကးတံၢ်ဃာ်အီၤအဃိတၢ်လဲၤတၢ်က့ၤတညီအဃိပသုးကွံာ်လီၤမီၤနီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ KNU (၁၇)ဘျီတဘျီ ခီကရဲးတၢ်အိၣ်ဖှိၣ်အဂီၢ် တၢ်အိၣ်တၢ်ဆိးလီၢ်လၢအလိၣ်၀ဲတဖၣ်ဒီး တၢ်ဖိတၢ်လံၤသ့ၣ်တဖၣ်ၦၤဘၣ်မူဘၣ်ဒါတဖၣ်ရဲၣ်ကျဲၤဃာ်၀ဲအိၣ်ဒီး ခီဖျိတကီၢ်ခါတၢ်ဘံၣ်တၢ် ဘၢဒီးတၢ်လဲၤထီၣ်က့ၤလီၤတၢ်ကီတၢ်ခဲအဃိ တၢ်ကစးထီၣ်ကဒါက့ၤခီကရဲးတၢ်အိၣ်ဖှိၣ်အခါဖဲလဲၣ်န့ၣ် တဲလီၤတံၢ်တဘၣ်ဒံးဘၣ်ဘၣ်ဆၣ် ဒိးသန့ၤထီၣ်သးလၢတၢ်အိၣ်သးအဖီခိၣ်ဒီးကဆဲးမၤ၀ဲလီၤအဂ့ၢ်န့ၣ် ပဒိၣ်စီၤဆၢၦဲၤ စံး၀ဲန့ၣ်လီၤႉ တၢ်တမၤ...
တချုးတၢ်ဃုထၢထီၣ်(DKBA)သုးရိၣ်မဲခိၣ်ကျၢၢ်ဒံးဘၣ်အကတီၢ် (EC)ကဟံးထီၣ်ဖီၣ်ထီၣ်တီခိၣ်ရိၣ်မဲဟံးစုနဲၣ်ကျဲ
လါအီကူး ၄ သီႇ ၂၀၂၁ နံၣ်ႇ ခ့ၣ်အဲးစံၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်စိ စီၤမိၤရှ›စူးကွံာ်သး၀ံၤအလီၢ်ခံ လၢတၢ်ကဃုထၢထီၣ်က့ၤသုးခိၣ်ကျၢၢ်စိအလီၢ်အဂီၢ်တသ့ဒံးဘၣ်အဃိ တၢ်ဘၢၣ်စၢၤအတီၢ်ပူၤလီၢ်ခၢၣ်သးပၢဆှၢတၢ်ကမံးတံာ်(EC)ကဟံးထီၣ်ဖီၣ်ထီၣ်ဟံးစုနဲၣ်ကျဲ၀ဲအဂ့ၢ်န့ၣ် (DKBA)လံာ်တၢ်ဒုးသ့ၣ်ညါအပူၤအသိး သ့ၣ်ညါဘၣ်န့ၣ်လီၤႉ ဖဲအပူၤကွံာ်(လါယူၤလံ ၂၁)သီအနံၤ သုးရိၣ်မဲခိၣ်ကျၢၢ် သုးခိၣ်ကျၢၢ်စိ စီၤမိၤရှ့စူးကွံာ်သးခီဖျိခိ၀ံၣ်တၢ်ဆါဒီး လၢတၢ်ကဃုထၢထီၣ်သုးရိၣ်မဲခိၣ်ကျၢၢ်အသီအဂီၢ် ခီဖျိတၢ်ဆူးတၢ်ဆါဒီးတၢ်ဂ့ၢ်ကီအိၣ်လၢတၢ်လဲၤတၢ်က့ၤအဃိ တၢ်ကိးတၢ်အိၣ်ဖှိၣ်တသ့ဒံးဘၣ်ဒီး ဖဲတၢ်ဘၢၣ်စၢၤအတီၢ်ပူၤ လီၢ်ခၢၣ်သးပၢဆှၢတၢ်ကမံးတံာ်(EC) ကဟံးထီၣ်ဖီၣ်ထီၣ်တီခိၣ်ရိၣ်မဲဟံးစုနဲၣ်ကျဲ၀ဲအဂ့ၢ်န့ၣ် လံာ်တၢ်ဒုးသ့ၣ်ညါအပူၤ ပာ်ဖျါ၀ဲန့ၣ်လီၤႉ DKBA လီၢ်ခၢၣ်သး သုးရိၣ်မဲခိၣ်(၂) သုးခိၣ်ဒိၣ်ဖိ စီၤစးမ့ စံး၀ဲ “ခဲအံၤခီဖျိတၢ်ဆူးတၢ်ဆါဒီး ထံဒိၣ်ဃိၣ်ယွၤအဃိ လၢကမၤတၢ်အိၣ်ဖှိၣ်အဂီၢ်တသ့၀ဲဒံးဘၣ်ႉ သုးခိၣ်ကျၢၢ်မိၤရှ့အလီၢ်ခီဒု မ့ၢ်ဘၣ်ကွၢ်လၢတၢ်ကရၢကရိအတၢ်သူၣ်ထီၣ်ဆီလီၤအပူၤန့ၣ် သုးခိၣ်စတံဘၣ်ဟံထီၣ်သုးခိၣ်ကျၢၢ်အမူဒါလီၤႉ အိၣ်ဒၣ်တၢ်ဆၢကတီၢ်မ့ၢ်ဘၣ်ဒု ကဘၣ်ထံၣ်လိာ်တၢၣ်ပီၣ်ဒီးကဘၣ်ပာ်ဂၢၢ်ပာ်ကျၢၤအီၤလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါ သုးခိၣ်ကျၢၢ်စိ စီၤမိၤရှ›မူဒါအလီၢ်လၢအလီၤဟိလီၤဘျဲၣ်၀ဲအံၤ ဒ်တၢ်သူၣ်ထီၣ်ဆီလီၤအိၣ်အသိး သုးရိၣ်မဲခိၣ်ကျၢၢ်(၂)ကဘၣ်ဟံးထီၣ်ဖီၣ်ထီၣ်မူဒါဘၣ်ဆၣ် လၢတၢ်ကဃုထၢထီၣ်က့ၤ သုးရိၣ်မဲခိၣ်ကျၢၢ်(၂)အလီၢ်အဂီၢ် ခိၣ်နၢ်လၢအဘၣ်ထွဲတဖၣ်ကဘၣ်ထံၣ်လိာ်တၢၣ်ပီၣ်လီၤတံၢ်လီၤဆဲး၀ံၤမး တၢ်ကပာ်ဂၢၢ်ပာ်ကျၢၤ၀ဲကသ့လီၤအဂ့ၢ်န့ၣ် သုးခိၣ်ဒိၣ်ဖိ စီၤစးမ့ စံးအါထီၣ်၀ဲန့ၣ်လီၤႉ သုးရိၣ်မဲခိၣ်ကျၢၢ် သုးခိၣ်ကျၢၢ်စိ စီၤမိၤရှ့အံၤ ခီဖျိခိ၀ံၣ်တၢ်ဆါဘၣ်ကူဘၣ်ဂာ်အီၤအဃိ...
တၢ်ဆီတလဲကွံာ်သုးကီၣ်ကးဆူကီၢ်စၢဖှိၣ်ပဒိၣ်ကွၢ်ထွဲတၢ်အံၤ မ့ၢ်ဒ်သိးတၢ်စိတၢ်ကမီၤကအိၣ်ဂၢၢ်ဆိးကျၢၤအဂီၢ်အဂ့ၢ် KNU စံး၀ဲ
လါအီကူး ၄ သီႇ ၂၀၂၁ နံၣ်ႇ ခ့ၣ်အဲးစံၣ် စးထီၣ်ဖဲတလါအံၤလါအီကူးထီၣ် ၁ သီအနံၤ သုးခိၣ်ကျၢၢ်ဒိၣ်စိ မ့အီၣ်လဲၣ် တီခိၣ်ရိၣ်မဲသုးကီၣ်ကးအံၤ ဆီတလဲက့ၤ၀ဲအမံၤဆူကီၢ်စၢဖှိၣ်ပဒိၣ်ကွၢ်ထွဲတၢ်အံၤန့ၣ် မ့ၢ်ဒၣ်ဒ်သိးဒီးအ၀ဲသ့ၣ်တၢ်စိတၢ်ကမီၤက အိၣ်ဂၢၢ်ဆိးကျၢၤအဂီၢ်လီၤအဂ့ၢ်န့ၣ် KNU- ကညီဒီကလုာ်စၢဖှိၣ်ကရၢ စံး၀ဲန့ၣ်လီၤႉ သုးမီၤစိရိၤဟံးန့ၢ်ဆူၣ်ကွံာ်တၢ်စိတၢ်ကမီၤယံၤ(၆)လါ၀ံၤအလီၢ်ခံ ဒုးအိၣ်ထီၣ်ဆီတ လဲက့ၤ၀ဲသုးကီၣ်ကးဆူကီၢ်စၢဖှိၣ်ပဒိၣ်ကွၢ်ထွဲတၢ်အံၤ အ၀ဲသ့ၣ်ဂုာ်ကျဲးစၢး၀ဲဒ်သိးထံဂုၤကီၢ်ဂၤကသ့ၣ်ညါပာ်ပနီၣ်အီၤဒီးဒ်သိးအ၀ဲသ့ၣ်တၢ်စိတၢ်ကမီၤကဆဲးအိၣ်ဂၢၢ်ဆိးကျၢၤ အဂီၢ်လီၤအဂ့ၢ်န့ၣ် KNU ကရၢခိၣ်(၂)ပဒိၣ်စီၤကွဲၤထူ၀့ စံး၀ဲဒ်အံၤန့ၣ်လီၤႉ “မ့ၢ်ဆီတလဲက့ၤ၀ဲလၢ(အိမ်စောင့်အစိုးရ)နါက့ဂ့ၤမ့ၢ်ဒၣ်ၦၤသ့ၣ်တဖၣ်အံၤလီၤမီၤနီၤႉ ခဲအံၤၦဲၤ၀ဲ(၆)လါလံအဃိ အ၀ဲသ့ၣ်အ ကစၢ်ဒၣ်၀ဲဒီးအကစၢ်လၢအမ့ၢ်ပၢပြးပဒိၣ်န့ၣ်အဲၣ်ဒိးနဲၣ်ဖျါထီၣ်၀ဲလၢဟီၣ်ခိၣ်ဒီဘ့ၣ်ညါႇ လၢခံတခါအ၀ဲသ့ၣ် အဲၣ်ဒိးနဲၣ်ဖျါထီၣ်၀ဲကီၢ်ပယီၤကမျၢၢ်ထံဖိကီၢ်ဖိဒီးထံဂုၤကီၢ်ဂၤတဖၣ်လၢအ၀ဲသ့ၣ်ပၢတၢ်န့ၢ်အဃိ ဂုာ်ကျဲးစၢးမၤ၀ဲဒ်သိးထံဂုၤကီၢ်ဂၤကသ့ၣ်ညါပာ်ပနီၣ်အ၀ဲသ့ၣ်လီၤႉ မ့မ့ၢ်(KNU)အတၢ်ပာ်သးခီန့ၣ် ဒ်အပူၤကွံာ်လၢညါအသိးလီၤႉ တမ့ၢ်လၢကဆီတလဲသးနီတမံၤဘၣ်ႉ အ၀ဲသ့ၣ်မ့ၢ်မၤ၀ဲဒ်လဲၣ်ဂ့ၤဒ်လဲၣ်ဂ့ၤန့ၣ် မၤ၀ဲလၢအတၢ်စိတၢ်ကမီၤကအိၣ်ဂၢၢ်ဆိးကျၢၤအဂီၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်–ကညီတၢ်ကစီၣ််၀ဲၤလီၢ်ခိၣ်သ့ၣ်န့ၣ်လီၤႉ ဖဲလါအီကူး ၁ သီအနံၤ ဘိးဘၣ်ရၤလီၤ၀ဲလၢဆီတလဲကွံာ်သုးကီၣ်ကးအမံၤဆူပဒိၣ်ကွၢ်ထွဲတၢ်၀ံၤအလီၢ်ခံ သုးမီၤစိရိၤအခိၣ် သုးခိၣ်ကျၢၢ်ဒိၣ်စိ မ့အီၣ်လဲၣ် ကဟံးထီၣ်ဖီၣ်မူဒါဒ်ကိတိာ်ခိၣ်ကျၢၢ်တဂၤအသိးအဂ့ၢ်န့ၣ် ဘိးဘၣ်ရၤလီၤ၀ဲန့ၣ်လီၤႉ ဖဲလါအီကူး ၁ သီအနံၤ သုးခိၣ်ကျၢၢ်ဒိၣ်စိ မ့အီၣ်လဲၣ်စံးကတိၤလီၤတၢ်အကျါန့ၣ် ဘၣ်ထွဲဒီးတၢ်မုာ်တၢ်ခုၣ်အတၢ်လဲၤကျဲအံၤစံးကတိၤလီၤ၀ဲတဆံးတက့ၢ်န့ၣ်လီၤႉ ဖဲန့ၣ်စံး၀ဲလၢ ကဆဲးအိၣ်ဆၢထၢၣ်၀ဲဒ်တၢ်ဆဲးလီၤတ့ၢ်ဃာ်(NCA)လံာ်ဃံးဃာ်အသိးဂၢၢ်ဂၢၢ်ကျၢၤကျၢၤဒီး အုၣ်ကီၤ၀ဲလၢကသူၣ်ထီၣ်ကီၢ်စၢဖှိၣ်ဒံၣ်မိၣ်ခြ့ၣ်စံၣ်ဒီးဖဲၣ်ဒရၢၣ်သနူူအဖီၣ်ခိၣ်အံၤ ပဒိၣ်စီၤကွဲၤထူ၀့ စံးအါထီၣ်၀ဲဒ်အံၤန့ၣ်လီၤႉ “ဒ်အ၀ဲသ့ၣ်တၢ်ပတုာ်တၢ်ခးလံာ်ဃံးဃာ်အသိးန့ၣ်ပလဲၤ၀ံၤတ့ၢ်လံလီၤႉ ခဲအံၤအ၀ဲသ့ၣ်တဲအကျါန့ၣ် လၢတၢ်ကသူၣ်ထီၣ်ဖဲၣ်ဒရၢၣ်ဒံၣ်မိၣ်ခြ့ၣ်စံၣ်ကီၢ်စၢဖှိၣ်အဂီၢ်န့ၣ်...
KNU/KNLA-PC သုးဂ့ၢ်၀ီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤန့ၢ်စိမၠးလဲၤပူၤကွံ၁်
လါအီကူး ၄ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲမဟါလါအီကူး ၃ သီ မုၢ်နၤခီ(၁၀း၃၀)ဘျဲၣ်အဆၢကတီၢ် ကညီတၢ်မုာ်တၢ်ခုၣ်ကီၣ်ကးကရၢ (KNU/KNLA-PC) သုးဂ့ၢ်၀ီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤန့ၢ်စိမၠး(ကိး)စီၤတ့လ့ လဲၤပူၤကွံာ်ခီဖျိခိ၀ံၣ်တၢ်ဆါဖဲကီၢ်ကၠီၣ်တဲၣ်ႇ၀့ၢ်မဲၢ်ဆီးပူၤအဂ့ၢ်န့ၣ် ၦၤလၢအဘူးဒီးအီၤတဖၣ်စံး၀ဲန့ၣ်လီၤႉ သုးခိၣ်ကျၢၢ်ဂီၢ်ဂ့ၢ်စီၤန့ၢ်စိမၠးလၢအသးနံၣ်အိၣ်(၄၆)နံၣ်အံၤ ဖဲအ၀ဲၢ်အဒိၣ်ကတၢၢ် လၢအမ့ၢ်သုးခိၣ်ဒိၣ်ဂီၢ်ဂ့ၢ်စီၤန့ၢ်ကီၢ်မၠးဟံးမူဒါလၢ KNLA- ကညီဒီကလုာ်တၢ်ထူၣ်ဖျဲးသုးမုၢ်ဒိၣ် သုးရ့ၣ်(၂၀၂)ဒ်သုးရ့ၣ်ခိၣ်အကတီၢ် အ၀ဲဟံမူဒါဒ်သုးဒ့ခိၣ်တဂၤအသိးန့ၣ်လီၤႉ ဖဲန့ၣ်၀ံၤအလီၢ်ခံ ဖဲ(၂၀၀၉)နံၣ်အခါ အ၀ဲက့ၤလီၤဆူတၢ်မုာ်တၢ်ခုၣ်ကီၣ်ကးဒီးဟံမူဒါဒ်(၇၇၇)ဒုးယၤလီၤဆီ ဒုးယၤခိၣ်တဂၤအသိးဒီး စးထီၣ်ဖဲ(၂၀၂၁)နံၣ်န့ၣ် အ၀ဲဟံ၀ဲမူဒါလၢ တၢ်ပၢၤဃာ်သုးဂ့ၢ်၀ီတၢ်သိၣ်တၢ်သီကမံတံာ် အၦၤပၢၤလီၢ်ဆ့ၣ်နီၤဒီးသုးဂ့ၢ်၀ီခိၣ်ကျၢၢ်တဂၤအသိး တုၤလၢအလဲၤပူၤကွံာ်သးတစုန့ၣ်လီၤႉ “အ၀ဲမ့ၢ်ခိၣ်နၢ်လၢအဲၣ်အဖိအလံၤႇအဲၣ်အၦၤကလုာ်ႇအဲၣ်အတၢ်ကရၢကရိလီၤႉ ဂုာ်ကျဲးစၢးမၤတၢ်သၦၢ်ကတၢၢ်ဟ့ၣ်လီၤသးလၢထံကီၢ်ဒီးၦၤကလုာ်အဂီၢ်လီၤႉ အ၀ဲန့ၣ်အမီထိၣ်အိၣ်တခါအမီထိၣ်န့ၢ်မ့ၢ်၀ဲ(We want real peace)လီၤ”အဂ့ၢ်န့ၣ် ၦၤလၢအဟံးန့ၢ်အတၢ်ဘံၣ်တၢ်ဘၢတဂၤလၢအမ့ၢ်ပတြီာ်သုးခိၣ်ဖိ စီၤဘံၤထူ စံး၀ဲန့ၣ်လီၤႉ သုးခိၣ်ကျၢၢ်ဂီၢ်ဂ့ၢ် စီၤန့ၢ်စိမၠးအံၤ အ၀ဲမ့ၢ်၀ဲဒၣ်ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ ကရၢခိၣ် ဒီး သုးရိၣ်မဲခိၣ်ကျၢၢ်လီၢ်လံၤ သုးခိၣ်ကျၢၢ်စိ စီၤဘိၤမၠးဒီး ကညီပိာ်မုၣ်ကရၢ(KWO)ၦၤပၢၤလီၢ်ဆ့ၣ်နီၤ ပဒိၣ်နီၢ်လါဖိအဖိအဖိမုၣ်ဖိခွါ(၇)အကျါမ့ၢ်စ့ၢ်ကီးဖိအဆံးကတၢၢ်တဂၤန့ၣ်လီၤႉ ဖဲသုးခိၣ်ကျၢၢ်ဂီၢ်ဂ့ၢ် စီၤန့ၢ်စိမၠးလဲၤပူၤကွံာ်သးအကတီၢ် အမါဒီးအဖိမုၣ်ဖိခွါ(၄)ဂၤအမဲာ်ညါ အမိပဒိၣ်နီၢ်လါဖိႇအနီခံဂၤႇအပုၢ်မုၣ်ဒီးအ၀ဲၢ်သုးခိၣ်ကျၢၢ်ဖိ စီၤနၢၤဒါမၠးတဖၣ်အိၣ်လီၤတဲာ်ကွံာ်၀ဲန့ၣ်လီၤႉ
“ကျီၢ်ပျၢဘုဒီး ကျီၢ်အီၣ်ဘု”
“ကျီၢ်ပျၢဘုဒီး ကျီၢ်အီၣ်ဘု” ၁.ဟီၣ်ခိၣ်ပမ့ၢ်ၦၤတမှံၤ သုးလီၢ်သုးကျဲကိးမုၢ်နံၤ ပထံနီၢ်ကီၢ်တီတအိၣ် ဟးအိၣ်သကုၤဝးဟီၣ်ခိၣ် ပထံပကီၢ်တအိၣ်ဃိ မ့ၢ်ဆိမိၣ်လီၤသးဘၣ်ဒိ ခွဲးယ၁်တု၁်သိးဒီးလီၢ်လၤ လ့ၤတက့ၤတအိၣ်ဒီးၦၤ ၂.ပတၢ်အိၣ်မူလၢဟီၣ်ခိၣ် အိၣ်ၦဲၤဝဲထဲတၢ်ဘၣ်ယိၣ် ဒ်ပကဲထီၣ်ၦၤကညီ ဘၣ်ခီဖျိတၢ်အၢတၢ်သီ ပဝဲၦၤကညီကလု၁် လိၣ်ဘၣ်ဝဲဟီၣ်ခိၣ်တၢ်မု၁် ဆၢမၤတၢ်ဂ့ၤမၤဘျုးတၢ် ဆူဖိလံၤသူၣ်ဘီၣ်သးစၢ် ၃.ကညီခိၣ်နၢ်ကဒဲဒဲ ကွၢ်ကပၤလိ၁်သးအိၣ်ဝဲ ဖိလံၤသးစၢ်တူၢ်ဘၣ်ဝဲ ထီၣ်ထီလံ ထုးလီၤကွံ၁်ဝဲ ဖိလံၤတနီၤလၢလီၤဃံၢ် တုၤဒၣ်လဲ၁်ထူတံၢ်ယီၢ်တံၢ် တပိၢ်တလိၣ်ဒီးပဒဲ မ့ၢ်ပကညီအတၢ်လဲၤကျဲ ၄.ကညီခိၣ်နၢ်ဒီးသးၦၢ် ကွၢ်ကပၤကွံ၁်ၦၤသးစၢ် ဒိၣ်စိလၢဖိလံၤဖီခိၣ် တၢ်ထံၣ်ဆိဆူညါတအိၣ် တၢ်ဖှီၣ်တၢ်ယ၁်ဂံၢ်ခိၣ်သ့ၣ် တၢ်ဟဲနု၁်ဒ်သိးတန့ၢ် နၣ်ရံၣ်နံၤသီမၤၦဲၤသိး ဒိးန့ၢ်က့ၤတၢ်တဒ်သိး ၅.ကျီၢ်ပျၢဘုဒီးကျီၢ်အီၣ်ဘု ကျီၢ်လၢပျၢဘုတအီၣ်ဘု ...
KNU သုးက့(၅)တၢ်ဒုးအပူၤ သုးမီၤစိရိၤအၦၤသံကဒီး ၆၅ ဂၤ
လါအီကူး ၃ သီႇ ၂၀၂၁ နံၣ်ႇ ခ့ၣ်အဲးစံၣ် ခ့ၣ်အဲၣ်ယူၣ်–ကညီဒီကလုာ်စၢဖှိၣ်ကရၢ မုၢ်တြီၢ်ကီၢ်ရ့ၣ် သုးက့(၅)တၢ်ပၢဟီၣ်က၀ီၤအပူၤ ဖဲလါယူၤလံတလါအတီၢ်ပူၤ သုးမီၤစိရိၤအၦၤသံကဒီး(၆၅)ဂၤအကျါပၣ်ဃုာ်၀ဲဒီး သုးခိၣ်ဒိၣ်ဂီၢ်ဂ့ၢ်တဂၤအဂ့ၢ်န့ၣ် ခ့ၣ်အဲၣ်ယူၣ် သုးက့(၅) ကိးလါဒဲးတၢ်ဒုးစရီအသိး သ့ၣ်ညါဘၣ်န့ၣ်လီၤႉ စးထီၣ်ဖဲလါယူၤ ၁ သီတုၤလၢ ၃၁ သီအနံၤန့ၣ် ခ့ၣ်အဲၣ်ယူၣ်တၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ်အပူၤ ဟီၣ်က၀ီၤကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့(၅)ဒီး သုးမီၤစိရိၤအသုးတဖၣ်အဘၢၣ်စၢၤ တလါအတီၢ်ပူၤတၢ်ဒုးကဲထီၣ်၀ဲ(၁၃၃)ဘျီ ဖဲန့ၣ်သုးမီၤစိရိၤအၦၤသံ၀ဲ(၆၅)ဂၤဒီးဘၣ်ဒိ၀ဲ(၁၀၁)ဂၤအဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ ခ့ၣ်အဲၣ်ယူၣ် သုးက့ ၅ တၢ်ပၢဟီၣ်က၀ီၤအပူၤ လၢဟီၣ်က၀ီၤတၢ်ဒိၣ်စိအဂီၢ်သုးမီၤစိရိၤအသုးမၤ၀ဲသုးတၢ်ဟူးတၢ်ဂၤအဆၢတဲာ်၀ဲဘၣ်အဃိ တၢ်ခးလိာ်သးဘၣ်ဟဲကဲထီၣ်ဒ်အံၤလီၤအဂ့ၢ်န့ၣ် သုးက့(၅)တကပၤ စံး၀ဲန့ၣ်လီၤႉ တၢ်ဒုးကဲထီၣ်ဖဲလါယူၤလံအတီၢ်ပူၤ KNLA သုးက့(၅)တကပၤစ့ၢ်ကီးဘၣ်ဒိ(၃)ဂၤအမဲာ်ညါ လီၢ်က၀ီၤဖိသံ၀ဲ(၁)ဂၤဒီးဘၣ်ဒိ(၄)ဂၤအဂ့ၢ်န့ၣ် ထုးထီၣ်ပာ်ဖျါ၀ဲန့ၣ်လီၤႉ လၢန့ၣ်အမဲာ်ညါ သုးမီၤစိရိၤအသုးဒွဲၣ်အူဟးဂီၤကွံာ်လီၢ်က၀ီၤကမျၢၢ်အဟံၣ်(၅)ဖျၢၣ်အသိး ခီဖျိအ၀ဲသ့ၣ်ခးလီၤကျိဖးဒိၣ်လၢသ၀ီပူၤအဃိ ဟံၣ်(၁)ဖျၢၣ်ဘၣ်၀ဲဒီးကျိဟးဂီၤကွံာ်၀ဲအဂ့ၢ်န့ၣ် ခ့ၣ်အဲၣ်ယူၣ် သုးက့(၅)ထုးထီၣ်ပာ်ဖျါ၀ဲန့ၣ်လီၤႉ ခ့ၣ်အဲၣ်ယူၣ် သုးက့(၅)ဟီၣ်က၀ီၤအပူၤ ဖဲအပူၤကွံာ်လါမ့ၤန့ၣ် တၢ်ဒုးကဲထီၣ်ပာ်ဖှိၣ်ခဲ လၢာ်အိၣ်၀ဲ(၁၉၃)ဘျီႇသုးမီၤစိရိၤအၦၤသံ(၁၂၈)ဂၤဒီး ဖဲလါယူၤအတီၢ်ပူၤတၢ်ဒုးကဲထီၣ်၀ဲ(၂၅၄)ဘျီ ဖဲန့ၣ်သုးမီၤစိရိၤအၦၤသံ(၁၅၆)ဂၤန့ၣ်လီၤႉ မ့မ့ၢ်လါယူၤလံအတီၢ်ပူၤတၢ်ဒုးကဲထီၣ်ပာ်ဖှိၣ်အိၣ်၀ဲ(၁၃၃)ဘျီ ဖဲန့ၣ်သုးမီၤစိရိၤအၦၤသံကဒီး(၆၅)ဂၤအဃိ လၢ(၃)လါအတီၢ်ပူၤ ခ့ၣ်အဲၣ်ယူၣ် သုးက့(၅)ဟီၣ်က၀ီၤအပူၤ သုးမီၤစိရိၤအၦၤသံခဲလၢာ်အိၣ်၀ဲ(၃၄၉)ဂၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ကညီကီၢ်စဲၣ်ပူၤဖိသၣ်လၢအိၣ်ဒူသ၀ီပူၤတဖၣ် တဆဲးဘၣ်ကသံၣ်ဒီသဒၢဘၣ်ဆၢဘၣ်ကတီၢ်လၢၤဘၣ်
လါယူၤလံ ၃၀ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲခိ၀ံၣ်တၢ်ဘၣ်ကူဘၣ်ဂာ်ရၤလီၤသးအကတီၢ်ဒီးသုးမီၤစိရိၤဟံးန့ၢ်ကွံာ်တၢ်စိတၢ်ကမီၤအတီၢ်ပူၤ ဒူသ၀ီတၢ်လီၢ်လၢအိၣ်ကညီကီၢ်စဲၣ်ပူၤတနီၤန့ၣ် ဖိဒံဖိသၣ်သ့ၣ်တဖၣ်တဆဲးဘၣ်(ကာကွယ်ဆေး)ကသံၣ်ဒီသဒၢ ဘၣ်ဆၢဘၣ်ကတီၢ်လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ ဒူသ၀ီတနီၤအပူၤ ကဆဲးန့ၢ်ဖိသၣ်ကသံၣ်ဒီသဒၢအဂီၢ် ခီဖျိဆူၣ်ချ့၀ဲၤ ကျိၤဒီးတၢ်ဆါဟံၣ်လၢအအိၣ်ဘူးတဖၣ်ႇတၢ်ဟ့ၣ်ကသံၣ်ဒၢးတဖၣ်ကးတံၢ်ဃာ်သးအဃိ ဖိဒံဖိသၣ်သ့ၣ်တဖၣ်တဆဲးဘၣ်ကသံၣ်ဒီသဒၢဘၣ်ဆၢဘၣ်ကတီၢ်ဘၣ်အဂ့ၢ်န့ၣ် ကီးတရံးကီၢ်ဆၣ် ဖိသၣ်အမိၢ်တဂၤစံး၀ဲဒ်အံၤန့ၣ်လီၤႉ “အပူၤကွံာ်လၢညါန့ၣ်ဖဲသ၀ီပူၤအံၤတၢ်ဟ့ၣ်ကသံၣ်ဒၢးအိၣ်အဃိဆဲးန့ၢ်၀ဲထီဘိလီၤႉ ခဲအံၤလၢတၢ်ဆါဟံၣ်န့ၣ်သရၣ်စ့ၢ်ကီးတအိၣ်ဘၣ်ႉ တၢ်ဆါဟံၣ်လၢအဘူးသ့ၣ်တဖၣ်စ့ၢ်ကီးတၢ်ကးတံၢ်ဃာ်၀ဲႉ ဖဲကီးတရံးႇကၠဲၤဒိန့ၣ် နၢ်ဟူလၢတၢ်ဆဲးန့ၢ်၀ဲလီၤႉ ခီဖျိခိ၀ံၣ်အကတီၢ်တၢ်ကးတံၢ်ဃာ်ကျဲအဃိလဲၤဆဲးတသ့ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ဘၣ်ဆၣ်ကညီကီၢ်စဲၣ် ကမျၢၢ်ဆူၣ်ချ့ဒီးတၢ်ကူစါယါဘျါ၀ဲၤကျိၤခိၣ် ဒီၣ်ကထၢၣ်ကၠီၤစွၤမၠ့ၣ် စံး၀ဲလၢ ဘၣ်ထွဲဒီးတၢ်ဆဲးကသံၣ်တၢ်ဒီသဒၢတၢ်ဂ့ၢ်အံၤ တမ့ၢ်လၢလ့ၤတက့ၤပာ်ပတုာ်အိၣ်ဘှံးဘၣ််အသိး တၢ်လီၢ်လၢခိ၀ံၣ်ရၤလီၤသးအါအလီၢ်န့ၣ် ကီၢ်ဆၣ်အပတီၢ် ဆူၣ်ချ့ၦၤဘၣ်မူဘၣ်ဒါလၢအဘၣ်ထွဲတဖၣ်် ဆီတလဲတၢ်ရဲၣ်တၢ်ကျဲၤဒီးဆဲးန့ၢ်၀ဲဖိသၣ် ကသံၣ်ဒီသဒၢအိၣ်၀ဲအဂ့ၢ်န့ၣ် စံး၀ဲန့ၣ်လီၤႉ တၢ်ဆဲးကသံၣ်ဒီသဒၢတၢ်ရဲၣ်တၢ်ကျဲၤအံၤ ကလုာ်ဒူၣ်ဖီၣ်စုက၀ဲၤကရူၢ် တၢ်ပၢဟီၣ်က၀ီၤတနီၤအပူၤလၢကီၢ်ပယီၤပဒိၣ်ဖီၣ်၀ဲတတုၤဘၣ်သ့ၣ်အံၤစ့ၢ်ကီး ခီဖျိကလုာ်ဒူၣ်ဖီၣ်စုက၀ဲၤကရူၢ်ကရၢလၢအဘၣ်ထွဲဆူၣ်ချ့၀ဲၤကျိၤအံၤ ဟံးမူဒါဆဲးန့ၢ်၀ဲအိၣ်၀ဲဘၣ်ဆၣ် ခီဖျိခိ၀ံၣ်အကတီၢ်တၢ်ကးတံၢ်၀ဲတၢ်နုာ်လီၤဟးထီၣ်အဃိ တကီၢ်ခါဆၢကတီၢ်ခဲ အံၤလၢခ့ၣ်အဲၣ်ယူၣ်တၢ်ပၢဟီၣ်က၀ီၤအပူၤ တၢ်ပာ်ပတုာ်ဃာ်၀ဲတၢ်ဆဲးကသံၣ်ဒီသဒၢတၢ်ဖံးတၢ်မၤအဂ့ၢ်န့ၣ် ကညီဆူၣ်ချ့မၤစၢၤ၀ဲၤကျိၤ(KDHW)စံး၀ဲန့ၣ်လီၤႉ KDHW ၀ဲၤကျိၤခိၣ် ပဒိၣ်စီၤဒဲမိခ့ၤ စံး၀ဲလၢ“စးထီၣ်လၢခိ၀ံၣ်ကဲထီၣ်န့ၣ် တဆဲးကသံၣ်ဒီသဒၢဒ်ညီနုၢ်အသိးလၢၤဘၣ်ႉ သုးဟံးန့ၢ်တၢ်စိတၢ်ကမီၤအဃိနးဒိၣ်ထီၣ်၀ဲလီၤႉ လဲၤထီၣ်က့ၤလီၤတညီလၢၤဘၣ်ႉ အပူၤကွံာ်လၢညါန့ၣ် ကီၢ်ပယီၤပဒိၣ်တကပၤဟ့ၣ်၀ဲကသံၣ်ဒီသဒၢအိၣ်လီၤႉ ကသံၣ်ဒီသဒၢလၢ(၂၀၂၀)နံၣ်အခါအိၣ်တ့ၢ်ဒံးလီၤႉ ပဃုလၢပကစၢ်အကျိၤအကျဲနါက့အိၣ်လီၤႉ ခိ၀ံၣ်တၢ်အိၣ်သးမ့ၢ်ဘၣ်ဂီၢ်ထီၣ်တစဲးန့ၣ်ကက့ၤဆဲးကဒါလီၤႉ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ စးထီၣ်ဖဲသုးဟံးန့ၢ်ကွံာ်ထံကီၢ်တၢ်စိတၢ်ကမီၤ၀ံၤအလီၢ်ခံ ခီဖျိဆူၣ်ချ့ၦၤမၤတၢ်ဖိတဖၣ်သဂၢၢ်ဘၣ်ဒီးတၢ်မၤပျံၤမၤဖုးဒီးတၢ်ဆီၣ်တံၢ်မၤနၢၤတဖၣ်အဃိ တၢ်ဟ့ၣ်တၢ်အိၣ်ဆူၣ်အိၣ်ချ့အတၢ်ဖံးတၢ်မၤတဖၣ်ကဲထီၣ်၀ဲတၢ်နိးတၢ်ဘျးဖးဒိၣ်တခါညါအဃိ ဖိသၣ်(၁)ကကွဲၢ်ဃၣ်ဃၣ်တဆဲးဘၣ်ကသံၣ်တၢ်ဒီသဒၢလၢၤဘၣ်အမဲာ်ညါ...
လူၢ်ပျဲၢ်ကီၢ်ဆၣ် ကီၣ်မၠးကၠံသ၀ီအပူၤ ဖိသၣ် ၂ ဂၤလီၤအုးသံလၢထံ
လါယူၤလံ ၃၀ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ် လူၢ်ပျဲၢ်ကီၢ်ဆၣ် ကီၣ်မၠးကၠံသ၀ီအပူၤခီဖျိထံဒိၣ်ထီၣ်အဃိ ဖဲမဟါ(လါယူၤလံ ၂၉)သီ ဟါခီ ၃ နၣ်ရံၣ်တခီအဆၢကတီၢ် ဖိသၣ် ၂ ဂၤလီၤအုးသံလၢထံအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိတဖၣ်အအိၣ်န့ၣ်လီၤႉ ဖိသၣ်လၢအလီၤအုးသံလၢထံ ၂ ဂၤအံၤ အသးနံၣ်အိၣ်ဒံးထဲ(၄)နံၣ်ဒီး(၁)နံၣ် မ့ၢ်၀ဲပိာ်မုၣ်ဖိခံဂၤလၢာ်အသိး ဖိသၣ်ခံဂၤအံၤအမိအပါလဲၤမၤတၢ်မၤလၢကီၢ်ကၠီၣ်တဲၣ်ဒီးအိၣ်တ့ၢ်၀ဲဒီးအဖံန့ၣ်လီၤႉ ဖဲအဖံလဲၤလၢတၢ်ချၢအဆၢကတီၢ် လီၤအုးသံ၀ဲလၢထံလီၤအဂ့ၢ်န့ၣ် ကီၣ်မၠးကၠံ လီၢ်က၀ီၤဖိတဂၤ စံး၀ဲန့ၣ်လီၤႉ အ၀ဲစံး၀ဲလၢ“လၢအ၀ဲသ့ၣ်အိၣ်တတီၤန့ၣ်တၢ်လီၢ်လီၤဖုၣ်တစဲးလီၤႉ ဖဲအဖံလဲၤဒုးအီၣ်ကျီၢ် ဆၣ်လၢသ၀ီပူၤလဲၤၦ့ၤဃုာ်ဒီးတၢ်အီၣ်တၢ်ဆၢကတီၢ်ယံၤ၀ဲတစဲးလီၤႉ က့ၤတုၤဘျီဖိသၣ်တဖၣ်သံလၢထံကျါလံလီၤႉ လၢတၢ်တပာ်သူၣ်ပာ်သး အကတီၢ်ဖိသၣ်အံၤကဘၣ်မ့ၢ်အလဲၤစံၣ်လီၤဂဲၤလိာ်ကွဲထံလီၤႉ အဖံနါက့တဆိမိၣ်လၢကကဲထီၣ်သးဒ်အံၤဘၣ်မီၤနီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ ကီၢ်မၠးကၠံသ၀ီအပူၤ ထံတဒိၣ်ထီၣ်ဒ်အံၤအိၣ်၀ဲ(၂)နံၣ်လံအသိး ထံဒိၣ်ထီၣ်တနံၣ်ညါအံၤစ့ၢ်ကီးဒိၣ်န့ၢ်အပူၤကွံာ်နံၣ်ဒံးအမဲာ်ညါ ဖိသၣ်လၢအသံ ၂ ဂၤအံၤအဟံၣ်စ့ၢ်ကီး အိၣ်၀ဲဒၣ်လၢတၢ်လီၢ်လီၤဖုၣ်အဂ့ၢ်န့ၣ် ကီၣ်မၠးကၠံလီၢ်က၀ီၤဖိတဂၤဃီအ၀ဲန့ၣ် စံးအါထီၣ်၀ဲန့ၣ်လီၤႉ ကီၢ်မၠးကၠံသ၀ီအံၤ အိၣ်သူၣ်လီၤအသးတဘူးတယံၤဒီးလူၢ်ပျဲၢ်ကျိဘၣ်ဒီး ခီဖျိလူၢ်ပျဲၢ်ကျိထံဒိၣ်ထီၣ်အဃိ ထံသ့ၣ်တဖၣ်နုာ်လီၤလၢသ၀ီပူၤဒ်အံၤလီၤအဂ့ၢ်န့ၣ် လီၢ်က၀ီၤသ၀ီဖိတဖၣ်စံး၀ဲအသိး သ့ၣ်ညါဘၣ်န့ၣ်လီၤႉ ဖဲအပူၤကွံာ်လါယူၤလံ ၂၈ သီအနံၤစ့ၢ်ကီး ကညီကီၢ်စဲၣ် ဖၣ်အၣ်၀့ၢ် ထံဒိၣ်ထီၣ်လၢက၀ီၤဒ့ နီၣ်ဂံၢ်(၅) အီၣ်နါ (၄)ကျဲဒီး ဖဲန့ၣ်ပိာ်ခွါတဂၤလီၤအုးသံလၢထံကဲထီၣ်သးဒံးအဂ့ၢ်န့ၣ် ဖၣ်အၣ်တၢ်တိစၢၤမၤစၢၤကရူၢ် ထုးထီၣ်ပာ်ဖျါ၀ဲန့ၣ်လီၤႉ