သုးမီၤစိရိၤအသုး ဟဲခး KNU မုၢ်တြီၢ်ကီၢ်ရ့ၣ်သုး၀ဲၤလီၢ်ခိၣ်သ့ၣ်ဒီးကဘီယူၤအဃိ သံဒီးဘၣ်ဒိဘၣ်ထံးအိၣ်
လါမးရှး ၂၈ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲမဟါ လါမးရှး ၂၇ သီ ဟါခီ ၇ နၣ်ရံၣ်တုၤလၢမုၢ်၀ါထီၣ် ၂ နၣ်ရံၣ်အဆၢကတီၢ် ခီဖျိသုးမီၤစိရိၤလၢအဟံးန့ၢ်ဆူၣ်ထံကီၢ်တၢ်စိတၢ်ကမီၤအသုးတဖၣ်ဟဲနုာ်လီၤခး၀ဲ မုၢ်တြီၢ်ကီၢ်ရ့ၣ် သုးက့ ၅ သုး၀ဲၤလီၢ်ခိၣ်သ့ၣ်ဒီးကဘီယူၤ ၂ ဘ့ၣ်အဃိ ဖဲန့ၣ်သံဒီးဘၣ်ဒိဘၣ်ထံးအိၣ်၀ဲအဂ့ၢ်န့ၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ ထုးထီၣ်ဘိးဘၣ်ရၤလီၤတၢ်ကစီၣ်န့ၣ်လီၤႉ ခီဖျိသုးမီၤစိရိၤအသုးတဖၣ်ခးလီၤကျိဖးဒိၣ်အဃိ ဟံၣ်တဖျၢၣ်မ့ၣ်အူအီၣ်ဟးဂီၤကွံာ်၀ဲဒီး ၦၤလၢအအိၣ်ဖဲဟံၣ်တဖျၢၣ်န့ၣ်အပူၤတဖၣ်စ့ၢ်ကီး မ့ၣ်အူအီၣ်သံဘၣ်ဒိဘၣ်ထံး၀ဲအသိး ကမျၢၢ်လၢအဂၤတဖၣ်ဘၣ်ဒိဘၣ်ထံးဒီးသံအိၣ်၀ဲစ့ၢ်ကီးအဂ့ၢ်န့ၣ် ခ့ၣ်အဲၣ်ယူၣ် တၢ်ထုးထီၣ်ပာ်ဖျါအပူၤ ပာ်ဖျါ၀ဲန့ၣ်လီၤႉ ဖဲမဟါ(လါမးရှး ၂၇ သီ) KNU သုးက့ ၅ အသုး ထီၣ်ဒုးဟံးန့ၢ်ကွံာ်၀ဲသံမုၢ်ထၣ်သုးကလၢၤတၢ်လီၢ်၀ံၤအလီၢ်ခံ တၢ်ဟဲက့ၤခးကဒါဟဲကဲထီၣ်သးဒ်အံၤန့ၣ်လီၤႉ ခီဖျိလၢသုးမီၤစိရိၤသုးတဖၣ်ဟဲခးတၢ်ဒီးကဘီယူၤအဃိ လီၢ်က၀ီၤကမျၢၢ်ထံဖိကီၢ်ဖိတဖၣ် ဘၣ်ဃ့ၢ်မှံအိၣ်ခူသူၣ်အဂ့ၢ်န့ၣ် သ့ၣ်ညါဘၣ်န့ၣ်လီၤႉ
တၢ်ထီၣ်ဟံးန့ၢ်သုးကလၢၤတၢ်ဒုးအပူၤ ပယီၤသုးသံ ၁၀ ဂၤ တၢ်ဖီၣ်ချုးန့ၢ် ၈ ဂၤအဂ့ၢ် KNU စံး၀ဲ
လါမးရှး ၂၇ သီႇ ၂၀၂၁ နံၣ်ႇ ခ့ၣ်အဲးစံၣ် ဖဲတနံၤအံၤဂီၤခီအဆၢကတီၢ် တၢ်ထီၣ်ဒုးဟံးန့ၢ်ကွံာ်၀ဲသံမုၢ်ထၣ်ပယီၤသုးကလၢၤလၢအအိၣ်ဆီလီၤအသးဖဲမုၢ်တြီၢ်ကီၢ်ရ့ၣ်ႇဃိၣ်လိာ်ကျိကၢၢ်နံၤဒီး ဖဲန့ၣ်ပယီၤသုးသံ ၁၀ ဂၤကျါပၣ်ဃုာ်၀ဲဒီးသုးရ့ၣ်ခိၣ်(၂) တဂၤဒီး တၢ်ဖီၣ်ချုးသမူ၀ဲ ၈ ဂၤအဂ့ၢ်န့ၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ သုးက့ ၅ တကပၤစံး၀ဲန့ၣ်လီၤႉ ဖဲတနံၤအံၤ ဂီၤခီ ၆ နၣ်ရံၣ် တုၤလၢ ၇ နၣ်ရံၣ်အဆၢကတီၢ် ခ့ၣ်အဲၣ်ယူၣ် သုးက့ ၅ သုးတဖၣ် လဲၤထီၣ်ဒုးဟံးန့ၢ်ကွံာ်၀ဲ ကလံၤထံးကီၢ်ခီသုး၀ဲၤလီၢ်ခိၣ်သ့ၣ်=တပခ စုဒုၣ်တီၤအဖီလာ် ခီၣ်ချ့သုးရ့ၣ်=ခမရ ၃၄၉ သံမုၢ်ထၣ်သုးကလၢၤအဂ့ၢ်န့ၣ် ခ့ၣ်အဲၣ်ယူၣ် သုးက့ ၅ ၦၤကတိၤတၢ်ပၢ ပဒိၣ်မါမါ စံးဘၣ်ခ့ၣ်အဲးစံၣ်န့ၣ်လီၤႉ အ၀ဲစံး၀ဲလၢ “သုုးမီၤစိရိၤကလီၤၦီၢ်ကွံ၁်အဂီၢ်ဒ်ကမျၢၢ်ဃ့ထီၣ်၀ဲအဖီခိၣ် မ့ၢ်မုၢ်နံၤတနံၤဃီဒီးတနံၤအံၤ လါမးရှး ၂၇ သီ လၢအမ့ၢ်ပယီၤသုးမုၢ်ဒိၣ်မုၢ်နံၤဒီး ပ၀ဲသုးက့ ၅ အံၤ မ့ၢ်တၢ်မၤဖျါထီၣ်အမိၢ်လံၤမိၢ်ၦၢ်လီၤႉ ပယီၤသုးလၢအသံတဖၣ်အကျါပၣ်ဃုုာ်၀ဲဒီး သုးရ့ၣ်ခိၣ်(၂)တဂၤလီၤႉ လၢတၢ်ဖီၣ်ချုးသမူ၀ဲအကျါ ပၣ်ဃုာ်၀ဲဒီးဆၣ်တဖီးတဂၤလီၤႉ တနီၤန့ၣ်ဃ့ၢ်ပူၤဖျဲးထီၣ်အသးလီၤႉ မၤန့ၢ်၀ဲစုက၀ဲၤဒီး တၢ်ဖိတၢ်လံၤလၢအဂၤတနီၤစ့ၢ်ကီးလီၤ” အဂ့ၢ်န့ၣ် စံး၀ဲန့ၣ်လီၤႉ ဘၣ်ထွဲဒီးတၢ်ထီၣ်ဟံးန့ၢ်ကွံာ်ပယီၤသုးကလၢၤတၢ်ဂ့ၢ်အံၤ...
ခီဖျိပယီၤသုးခးလီၤကျိဖးဒိၣ်ဆူသ၀ီပူၤအဃိ ၦၤဒီဖိပၢ်ခံဂၤဘၣ်ဒိဘၣ်ထံး
လါမးရှး ၂၇ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ်ႇကီးတရံးကီၢ်ဆၣ်ႇအ့ရှါကျဲမုၢ်ကပၤ ဖဲမဟါလါမးရှး ၂၆ သီ မုၢ်နၤခီ ၉ နၣ်ရံၣ်အဆၢကတီၢ် ခီဖျိပယီၤသုးခးလီၤကျိဖးဒိၣ်ဆူကီၤနွဲၣ်သ၀ီပူၤအဃိ လီၢ်က၀ီၤသ၀ီဖိဒီဖိပၢ်ခံဂၤဘၣ်ဒိၣ်ဘၣ်ထံး၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ ကီးတရံး=မၠၣ်၀တံၣ်အ့ရှါကျဲမုၢ်ကပၤဒီတကျိၤ ပယီၤသုးပၢဆှၢရဲၣ်ကျဲၤသုး၀ဲၢ်လီၢ်ခိၣ်သ့ၣ်=စကခ ၁၂ စုဒုၣ်တီၤအဖီလာ်သုးကရူၢ်တဖၣ် ခီဖျိခးလီၤကျိဖးဒိၣ် ၃ ဖျၢၣ်ဆူကီၤနွဲၣ်သ၀ီပူၤအဃိ စီၤ၀ါခိၣ် ၂၇ နံၣ် ဒီး အဖိခွါစီၤအဲၣ်စ့ ၅ နံၣ်အံၤ ဘၣ်ဒိ၀ဲဒီးကျိချံအက့အခီအဂ့ၢ်န့ၣ် လီၢ်က၀ီၤၦၤဘၣ်မူဘၣ်ဒါတဖၣ် စံးဘၣ်ခ့ၣ်အဲးစံၣ်န့ၣ်လီၤႉ “ခးလီၤ၀ဲကျိဖးဒိၣ်လၢသ၀ီပူၤ ၃ ဖျၢၣ်လီၤႉ ၃ ဖျၢၣ်အကျါပိၢ်ဖး၀ဲ ၂ ဖျၢၣ်လီၤႉ ကျိချံန့ၣ်ကဘၣ်မ့ၢ်၀ဲ(၆၀ မမ)လီၤႉ စီၤ၀ါခိၣ်န့ၣ်ဘၣ်ဒိ၀ဲအခီၣ်လ့ၢ်ခိၣ်လီၤႉ မ့မ့ၢ်အဖိခွါစီၤအဲၣ်စ့န့ၣ်ဘၣ်၀ဲအခီၣ်လ့ၢ်ခိၣ်အစ့ၣ်လီၤႉ အပါန့ၣ်ဘၣ်ဒိ၀ဲနးတစဲးလီၤႉ မ့မ့ၢ်ဖိသၣ်ခီန့ၣ်ကျိချံအိၣ်တ့ၢ်ဒံး၀ဲလီၤႉ ခဲအံၤတၢ်ဆှၢ အ၀ဲသ့ၣ်ဆူတီနီၢ်တၢ်ဆါဟံၣ်ႉ ကဘၣ်ဆဲးမၤဒ်လဲၣ်န့ၣ်ယတသ့ၣ်ညါဒံးဘၣ်”အဂ့ၢ်န့ၣ် စံး၀ဲန့ၣ်လီၤႉ တကီၢ်ခါခဲအံၤ ဖဲကီးတရံး=မၠၣ်၀တံၣ်အ့ရှါကျဲမုၢ်ခိၣ်ဒီတကျိၤန့ၣ် ပယီၤသုးတဖၣ်ဟံးန့ၢ်၀ဲလီၢ်ကျဲအမဲာ်ညါ ကီးတရံးကီၢ်ဆၣ်ကလံၤထံးဒူသ၀ီတနီၤအပူၤစ့ၢ်ကီး ဖဲစှၤသီအတီၢ်ပူၤအံၤခီဖျိပယီၤသုးမၤအါထီၣ်ဂံၢ်ဘါအဃိ လီၢ်က၀ီၤဖိတဖၣ်ဘၣ်ယိၣ်၀ဲလၢတၢ်ခးလိာ်သးကကဲထီၣ်န့ၣ်လီၤႉ လၢန့ၣ်မဲာ်ညါစးထီၣ် ဖဲလါမးရှး ၂၅ သီအနံၤ ကီးတရံး၀့ၢ်ပူၤ ခီဖျိနုာ်လီၤသမံးသမိး၀ဲဖးဖီမုၢ်စရီလၢက၀ီၤဒ့ပူၤအဃိ...
KNU တၢ်ပၢဟီၣ်က၀ီၤအပူၤ တၢ်က့ၤဃုထၢထီၣ်က့ၤသ၀ီသးၦၢ်လၢအသီ
လါမးရှး ၂၆ သီႇ ၂၀၂၁ နံၣ်ႇ ခ့ၣ်အဲးစံၣ် KNU-ကညီဒီကလုာ်စၢဖှိၣ်ကရၢ ဒူပျာ်ယာ်ကီၢ်ရ့ၣ် ၀ီၢ်ရီကီၢ်ဆၣ်အပူၤ စးထီၣ်ဖဲလါမးရှးထီၣ်တၢတနွံန့ၣ် ဒူသ၀ီကရူၢ်တဖၣ်စုာ်စုာ်အပူၤ တၢ်က့ၤဃုထၢထီၣ်က့ၤသ၀ီသးၦၢ်တဖၣ်လၢအသီလံအဂ့ၢ်န့ၣ် သ့ၣ်ညါဘၣ်လၢကီၢ်ဆၣ်ၦၤဘၣ်မူဘၣ်ဒါတဖၣ်အအိၣ်န့ၣ်လီၤႉ ဒ် KNU အတၢ်သူၣ်ထီၣ်ဆီလီၤအိၣ်ပာ်အသိး တၢ််မၤ၀ဲတၢ်ဃုထၢဒူသ၀ီသးၦၢ်တဖၣ် ၂ နံၣ်တဘျီဘၣ်ဆၣ် ဒ်ဒူသ၀ီကမျၢၢ်တဖၣ်အတၢ်ဃ့ထီၣ်အသိး တၢ်မၤအါထီၣ်ၦၤသ၀ီသးၦၢ်မူဒါန့ၢ်၀ဲဒီး အလီၢ်မ့ၢ်အိၣ်န့ၣ်တၢ်က့ၤဃုထၢထီၣ်က့ၤဒ်ၦၤအါဂၤတၢ်ဟ့ၣ်တၢ်ဖးသနူအကျဲသ့၀ဲအဂ့ၢ်န့ၣ် ခ့ၣ်အဲၣ်ယူၣ် ကီၢ်ဆၣ်ၦၤဘၣ်မူဘၣ်ဒါစံး၀ဲန့ၣ်လီၤႉ ၀ီၢ်ရီကီၢ်ဆၣ်ခိၣ် ပဒိၣ်စီၤမီၤစွ့ၤ စံး၀ဲလၢ “ခီဖျိလၢကမျၢၢ်တဖၣ်အတၢ်ဃ့ထီၣ်အဖီခိၣ် တၢ်က့ၤဃုထၢဒုးအိၣ်ထီၣ်က့ၤဒူသ၀ီကရူၢ်သးၦၢ်တဖၣ်လီၤမီၤနီၤႉ ပဃုထၢတီၣ်ထီၣ်၀ဲဒ်ၦၤအါဂၤ ဟ့ၣ်တၢ်ဖးသနူအကျဲအသိးလီၤႉ သ၀ီတနီၤန့ၣ်ဆဲးလဲၤ၀ဲဒ်သးၦၢ်လၢအအိၣ်တ့ၢ်ပာ်၀ဲအသိးလီၤႉ ပ၀ဲသ့ၣ်တဖၣ်ပသ့ၣ်ညါပာ်ပနီၣ်၀ဲလီၤႉ ဒ်ညီနုၢ်တၢ်မၤ၀ဲအသိးန့ၣ် ဒူသ၀ီတဖျၢၣ်စုာ်စုာ်အပူၤတၢ်ကဆဲးဃုထၢ ထီၣ်သ၀ီသးၦၢ်ဒ်တၢ်ဃုထၢအကျဲသနူအသိးလီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်ဖဲ လါမးရှး ၂၄ သီအနံၤန့ၣ်လီၤႉ KNU ၀ီၢ်ရီကီၢ်ဆၣ်(ကၠၤအ့စ့ၣ်ကၠံကီၢ်ဆၣ်)အပူၤ သ၀ီသးၦၢ်လၢအပူၤကွံာ် NLD ပဒိၣ်တီၣ်ထီၣ်ဃာ်၀ဲတဖၣ်အံၤ ဒ်တၢ်ပၢဆှၢအတၢ်သိၣ်တၢ်သီ အဆၢဖိ(၉)အဆၢဖိ(နီၤဖး)အသိး ပယီၤသုးမီၤစိရိၤအံၤပာ်ပတုာ်ကွံာ်၀ဲဒၣ်လၢမူဒါအဂ့ၢ်န့ၣ် ဖဲအပူၤကွံာ် လါဖ့ၤဘြူၤအါရံၤ ၂၀ သီ အ၀ဲသ့ၣ်တၢ်ထုးထီၣ်ပာ်ဖျါအသိး သ့ၣ်ညါဘၣ်န့ၣ်လီၤႉ မါယၤနဲၤလၢအဘၣ်တၢ်ဃုထၢထီၣ်လၢချၢၣ်သ၀ီသးၦၢ်အံၤစံး၀ဲ“ကမျၢၢ်တဖၣ်လၢတၢ်နာ်အီၣ်ယၤအပူၤ ထၢနုာ််၀ဲတၢ်ဖးအဖီခိၣ်သးခုဒိၣ်မးလီၤႉ ဖဲတၢ်ဘၢၣ်စၢၤဆၢကတီၢ်အံၤ တၢ်တၤတၢ်ဒုကအိၣ်၀ဲန့ၣ်လီၤတံၢ်လီၤႉ ကမျၢၢ်အဂံၢ်အဘါဒီးဒူသ၀ီလီၢ်က၀ီၤအဂီၢ် ကပာ်ဖှိၣ်မၤသကိးတၢ်လၢအဂ့ၤကတၢၢ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်...
ဖၣ်အၣ်၀့ၢ်ပူၤ ဖဲပာ်ဖှိၣ်ထီၣ်သးလၢကပာ်ဖျါထီၣ်သးအဂီၢ်ဆၢကတီၢ် တၢ်ဖီၣ်ချုး၀ဲသးစၢ် ၃ ဂၤ
လါမးရှး ၂၆ သီႇ ၂၀၂၁ နံၣ်ႇ ခ့ၣ်အဲးစံၣ် ကညီကီၢ်စဲၣ်ႇဖၣ်အၣ်ကီၢ်ဆၣ်ႇ(ကမ်းနား)ကျဲန့ၣ် ဖဲတဂီၤအံၤဂီၤခီ ၆ နၣ်ရံၣ်အဆၢကတီၢ် ဖဲလၢကပာ်ဖှိၣ်ထီၣ်သးဒ်သိးကလဲၤပာ်ဖျါထီၣ်သးအဂီၢ်ဆၢကတီၢ် ပၢၤကီၢ်တဖၣ် နုာ်လီၤဖီၣ်၀ဲသးစၢ် ၃ ဂၤအဂ့ၢ်န့ၣ် ဖၣ်အၣ်၀့ၢ်ဖိသးစၢ်တဂၤ ပာ်ဂၢၢ်ပာ်ကျၢၤစံးဘၣ်ခ့ၣ်အဲးစံၣ်န့ၣ်လီၤႉ ဖဲလၢကမျၢၢ်တဖၣ်ပာ်ဖှိၣ်ထီၣ်သးဖဲ ဖၣ်အၣ်၀့ၢ်ႇ Welcome to Hpan-An လံာ်မဲာ်ဖျၢၣ်လၢအအိၣ်ဖဲ (ကမ်းနား)ကျဲတၢ်လီၢ်အံၤဆၢကတီၢ် ပၢၤကီၢ်ခးသီၣ်ထီၣ်ကျိခံထံၣ်ဒီးမၤလီၤမုၢ်ပြံပြါကမျၢၢ်အဃိ သးစၢ်ပိာ်ခွါ ၁ ဂၤဒီးပိာ်မုၣ် ၂ ဂၤလၢအကပာ်ဖျါထီၣ်သးတဖၣ် ပၢၤကီၢ်သုးဖီၣ်က့ၤကိး၀ဲအဂ့ၢ်န့ၣ် ၦၤလၢအထံၣ်၀ဲဒီးအမဲာ်တဖၣ် စံး၀ဲန့ၣ်လီၤႉ “တဂီၤအံၤပၢၤကီၢ်သုးတဖၣ်ခးသီၣ်ကျိဒီးမၤလီၤမုၢ်ပြံပြါ၀ဲကမျၢၢ်လီၤႉ ဖဲန့ၣ်ဆၢကတီၢ်ဖီၣ်၀ဲတၢ်လီၤႉ ပၢၤကီၢ်သုးအံၤတီၢ်၀ဲပိာ်ခွါဖိတဖၣ်ဒီးတီၣ်ထီၣ်၀ဲလၢဃိာ်သိလ့ၣ်အပူၤလီၤန့ၣ် ၦၤလၢအိၣ်ဖဲ (ကမ်းနား)ကျဲတဖၣ်ထံၣ်၀ဲလီၤ” အဂ့ၢ်န့ၣ် ဖၣ်အၣ်၀့ၢ်သးစၢ်ဖိတဖၣ် စံးဘၣ်ခ့ၣ်အဲးစံၣ်န့ၣ်လီၤႉ လၢန့ၣ်အမဲာ်ညါ သးစၢ်ပိာ်ခွါလၢတၢ်ဖီၣ်ချုး၀ဲအံၤမ့ၢ်ၦၤတဖၣ်လၢအသးနံၣ်တၦဲၤဒံး၀ဲဘၣ်အဂ့ၢ်ဒီး သးစၢ်ပိာ်မုၣ် ၂ ဂၤအံၤစ့ၢ်ကီး ဟဲတုၤ၀ဲဒၣ်လၢတၢ်ပာ်ဖျါထီၣ်သးအပူၤဘူးက၀ံၤမး တၢ်ဖီၣ်ချုးန့ၢ်၀ဲလီၤအဂ့ၢ်န့ၣ် သးစၢ်တဂၤဃီအ၀ဲန့ၣ်စံးအါထီၣ်၀ဲန့ၣ်လီၤႉ ဒ်န့ၣ်အသိး ဖဲမဟါ လါမးရှး ၂၅ သီအနံၤစ့ၢ်ကီး တၢ်ပာ််ဖျါထီၣ်သးလီၢ်လၢအအိၣ်ဖဲဖၣ်အၣ်=လူၢ်ပျဲၢ် ကျဲဖးဒ့အံၤစ့ၢ်ကီး ပၢၤကီၢ်သုးႇပယီၤသုးပာ်ဖှိၣ်ထီၣ်သးဒီးမၤလီၤမုၢ်ပြံပြါကမျၢၢ်အသိး ခီဖျိခးကျိမၤလီၤမုၢ်ပြံပြါတၢ်အဃိ သးစၢ်တဂၤအခီၣ်ဘၣ်ဒိ၀ဲဒၣ်ဒီးကျိစ့ၢ်ကီးအဂ့ၢ်န့ၣ် သ့ၣ်ညါဘၣ်န့ၣ်လီၤႉ
ဒ်သိးတၢ်ကဟ့ၣ် (social punishment) ဆူမါည့မီၣ်ဒီးစီၤထိအီၤမၠ့ၣ်အဂီၢ် ကညီသးစၢ်ကရၢဃ့ထီၣ်
လါမးရှး ၂၅ သီႇ ၂၀၂၁ နံၣ်ႇ ခ့ၣ်အဲးစံၣ် သုးကီၣ်ကးကရၢဖိ မါည့မီၣ်ဒီးစီၤထိအီၤမၠ့ၣ်ခံဂၤလၢသုးမီၤစိရိၤကီၣ်ကးဟ့ၣ်လီၤလီၢ်လးတဖၣ်အံၤ ဒ်သိးတၢ်ကဟ့ၣ်အ၀ဲသ့ၣ်(social punishment)အဂီၢ် ကညီသးစၢ်ၦာ်ဘျးစဲ(KYN) ထုးထီၣ်ဘိးဘၣ်ရၤလီၤဃ့ထီၣ်၀ဲ ဖဲမဟါလါမးရှး ၂၃ သီအနံၤန့ၣ်လီၤႉ မါည့မီၣ်ဒီးစီၤထိအီၤမၠ့ၣ်ခံဂၤအံၤ ဖဲ ၂၀၂၀ တၢ်ဃုထၢအခါ နုာ်လီၤဒိးဃုထၢသးလၢ ကညီကမျၢၢ် ပၣ်တံၣ်(KPP)ပၣ်တံၣ်ခၢၣ်စးဒီး ဒ်သိးကမၤနၢၤတၢ်ဃုထၢအဂီၢ် ကညီသးစၢ်တဖၣ်မၤစၢၤဆီၣ်ထွဲဟ့ၣ်ဂံၢ် ဟ့ၣ်ဘါ၀ဲဘၣ်ဆၣ် က့ၤပာ်ဖှိၣ်မၤသကိးတၢ်ဒီးသုးမီၤစိရိၤဒ်အံၤန့ၣ် မ့ၢ်တၢ်လၢအထီဒါက့ၤ၀ဲဒၣ်ကညီသး စၢ်ဒီးၦၤလၢအတူၢ်လိာ်ထၢနုာ်ဟ့ၣ်တၢ်ဖးတဖၣ်အဂ့ၢ်န့ၣ် ကညီသးစၢ်ၦာ်ဘျးစဲ ထုးထီၣ်ပာ်ဖျါစံး၀ဲန့ၣ်လီၤႉ မါည့မီၣ်ဒီးစီၤထိအီၤမၠ့ၣ်လၢအပာ်ဖှိၣ်မၤသကိးတၢ်ဒီးသုးမီၤစိရိၤလၢအဆီၣ်တံၢ်မၤနၢၤမၤသံမၤ၀ီ၀ဲ ကညီက လုာ်ဃုာ်ဒီးကမျၢၢ်ထံဖိကီၢ်ဖိလၢအတၢ်ကမၣ်တအိၣ်ဘၣ်တဖၣ်အံၤ လၢကညီတၢ်စံၣ်စိၤတဲစိၤအပူၤ ကညီသးစၢ်တဖၣ်ပာ်ပနီၣ်၀ဲလၢအမ့ၢ်ၦၤတဖၣ်လၢအအၢကတၢၢ်ဒီးၦၤတူၢ်ကွီၢ်လၢအအၢသီတဖၣ်အဂ့ၢ်န့ၣ် လံာ်တၢ်ပာ်ဖျါအပူၤပာ်ဖျါ၀ဲန့ၣ်လီၤႉ “ၦၤတဂၤလၢ်လၢ်ႇတၢ်ကရၢကရိႇပၣ်တံၣ်မ့ၢ်ဂ့ၤလၢအမၤစၢၤ၀ဲဒၣ်သုးမီၤစိရိၤတဖၣ် ကဘၣ်ပာ်ပနီၣ်လၢအမ့ၢ်ၦၤယိာ်ကဒါဘီလီၤႉ ပမၤ၀ဲဒၣ်ဒ်အံၤန့ၣ် မ့ၢ်လၢမါည့မီၣ်ဒီးစီၤထိအီၤမၠ့ၣ်ခံဂၤအံၤတၢ်သ့ၣ်ညါအီၤအါအဃိလီၤႉ ၦၤလၢအဂၤတဖၣ်စ့ၢ်ကီး လၢခံလၢလာ်ဒ်သိးကတီဒီးကညီကလုာ်အဂီၢ်ဒီးသုတထီဒါက့ၤကလုာ်အဂီၢ်န့ၣ်လီၤႉ ၀ံၤဘျီအ၀ဲသ့ၣ်ဃုာ်ဒီးအဟံၣ်ဖိဃီဖိအဘူးအတံၢ်တဖၣ်စ့ၢ်ကီး ဖဲလၢကညီမုၢ်နံၤဒိၣ်မုၢ်နံၤထီအခါ တဘၣ်လိၣ်ကွဲမုာ်အ၀ဲသ့ၣ်ဘၣ်ဒီးတၢ်ကဘၣ်ပာ်တ့ၢ်ကွံာ်၀ဲလီၤ”အဂ့ၢ်န့ၣ် ကညီသးစၢ်ၦာ်ဘျးစဲ ၦၤကတိၤတၢ်ပၢတဂၤ စံးဘၣ်ခ့ၣ်အဲးစံၣ်န့ၣ်လီၤႉ ၦၤခံဂၤအံၤ လၢနီၢ်တဂၤအသိးမ့ၢ်ဂ့ၤႇလၢပၣ်တံၣ်အသိးမ့ၢ်ဂ့ၤႇတၢ်ကရၢကရိအသိးမ့ၢ်ဂ့ၤႇၦၤဂ့ၢ်၀ီႇ မုၢ်ကျိၤ၀ဲၤကွာ်ဒီးကလုာ်ဂ့ၢ်၀ီလၢအဘၣ်ထွဲတဖၣ်ခဲလၢာ်ဒ်သိးကပတတုာ်ကွံာ်၀ဲတဘျီဃီအဂီၢ်ဒီး တဘၣ်လိၣ်မၤဘၣ်ဃးလိာ်သးဒီးအ၀ဲသ့ၣ်ဘၣ်အဂ့ၢ်န့ၣ် ကညီသးစၢ်ၦာ်ဘျးစဲဆီၣ်တခူထီၣ်၀ဲန့ၣ်လီၤႉ လၢန့ၣ်အမဲာ်ညါၦၤခံဂၤအံၤ တကွၢ်ကဒါက့ၤကညီကလုာ်တဖၣ်ဃုာ်ဒီးကမျၢၢ်ထံဖိကီၢ်ဖိဘၣ်ဒီး သူၣ်လီသးကွံ၀ဲဒၣ်မီၤစိရိၤလီၢ်လးတဖၣ်န့ၣ်လီၤႉ ကညီကလုာ်တဖၣ်လၢအမၤသကိးတၢ်ဒီးသုးမီၤစိရိၤတဖၣ်အံၤ ကညီသးစၢ်တဖၣ်ကဆဲးဃုသ့ၣ်ညါမၤဖျါထီၣ်၀ဲဒီး လၢကညီကလုာ်အဖီခိၣ် ၦၤလၢအယိးကဒါဘီတဂၤလၢ်လၢ်န့ၣ် ကထီဒါပၢၢ်ဆၢ၀ဲဒၣ်အဂ့ၢ်န့ၣ် ကညီသးစၢ်ထုးထီၣ်ပာ်ဖျါ၀ဲန့ၣ်လီၤႉ
ကလဲၤထီၣ်ပယီၤသုးမုၢ်ဒိၣ်မုၢ်နံၤတၢ်ရဲၣ်တၢ်ကျဲၤတလီၤတံၢ်ဘၣ်အဂ့ၢ် ကညီဖီၣ်စုက၀ဲၤကရူၢ် ၂ ဒူၣ်စံး၀ဲ
လါမးရှး ၂၄ သီႇ ၂၀၂၁ နံၣ်ႇ ခ့ၣ်အဲးစံၣ် တၢ်ကမၤပယီၤသုးမုၢ်ဒိၣ်မုၢ်နံၤတၢ်ရဲၣ်တၢ်ကျဲၤ ဖဲလါမးရှး ၂၇ သီအနံၤအံၤ ကလဲၤထီၣ်၀ဲအဂီၢ် တလီၤတံၢ်ဒံးဘၣ်အဂ့ၢ် ကညီဖီၣ်စုက၀ဲၤကရူၢ် ၂ ဒူၣ်လၢအမ့ၢ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်- DKBA ဒီး ကညီတၢ်မုာ်တၢ်ခုၣ်ကီၣ်ကး(KNU/KNLA-PC) ၦၤဘၣ်မူဘၣ်ဒါတဖၣ် စံးဘၣ်ခ့ၣ်အဲးစံၣ်န့ၣ်လီၤႉ ဘၣ်ထွဲဒီးတၢ်ကစီၣ်ဟူထီၣ်လၢ ကညီဖီၣ်စုက၀ဲၤတၢ်ကရၢကရိ ၂ ဒူၣ်ဃုာ်ဒီး ကလုာ်ဒူၣ်ဖီၣ်စုက၀ဲၤကရူၢ် ၄ ဒူၣ်လၢအဆဲးလီၤ၀ဲထံကီၢ်ဒီဘ့ၣ်တၢ်ပတုာ်တၢ်ခး(NCA)တဖၣ် ကလဲၤထီၣ်၀ဲသုးကီၣ်ကးအသုးမုၢ်ဒိၣ်မုၢ်နံၤတၢ်ရဲၣ်တၢ်ကျဲၤအံၤ ကညီဖီၣ်စုက၀ဲၤၦၤဘၣ်မူဘၣ်ဒါလၢအဘၣ်ထွဲတဖၣ် စံးဘၣ်ခ့ၣ်အဲးစံၣ်ဒ်အံၤန့ၣ်လီၤႉ DKBA ၦၤကတိၤတၢ်ပၢ သုးခိၣ်ကျၢၢ်ဖိ စီၤမူခိၣ် စံး၀ဲ“အိၣ်ဒၣ်လၢပနၢ်ဟူလၢၦၤတဲလီၤႉ တၢ်ကစီၣ်ဒု ဟးထီၣ်အမၠိအါမးလီၤခဲအံၤႉ သုးရိၣ်မဲခိၣ်ကျၢၢ်ဒီးပ၀ဲ CEC တဖၣ် တၢ်တၢၣ်ပီၣ်တဲသကိးတအိၣ်နီတမံၤဒံးဘၣ်ႉ တၢ်ဆၢတဲာ်မ့ၢ်အိၣ်တၢၣ်ပီၣ်တဲသကိး၀ံၤမးဒီး မ့ၢ်ဘၣ်လဲၤဒီးလဲဲၤမီၤနီၤႉ ပယီၤသုးမုၢ်ဒိၣ်အံၤကဲထီၣ်လၢၦၤအၢၦၤသီလံႇမၤသံမၤ၀ီကမျၢၢ်ဒီး အ၀ဲသ့ၣ်တၢ်ဂ့ၢ်တၢ်ကျိၤအဖီခိၣ်န့ၣ် လၢကလဲၤဆီၣ်ထွဲဒုအခီပညီတအိၣ်ဘၣ်ႉ မ့ၢ်ဘၣ်လဲၤ၀ဲဒုကလဲၤ၀ဲဒၣ်လၢတဂၤဂီၢ်ႇတမ့ၢ်လၢ(DKBA)တၢ်ကရၢကရိအဂီၢ်ဘၣ်ႉ မ့ၢ်ကွဲမုာ်ၦၤနါ က့ပတလဲၤဘၣ်ႉ မ့ၢ်လဲၤထီၣ်နါက့ဘၣ်ကနၣ်ထံစ့ၢ်မီၤနီၤႉ မ့ၢ်လဲၤထီၣ်န့ၣ်ကမျၢၢ်ထံၣ်ကရှဲ၀ဲလဲၣ်” အဂ့ၢ်န့ၣ် စံး၀ဲန့ၣ်လီၤႉ သုးကီၣ်ကးသုးမုၢ်ဒိၣ်မုၢ်နံၤတၢ်ရဲၣ်တၢ်ကျဲၤလၢတၢ်ကမၤ၀ဲ ဖဲလါမးရှး ၂၇ သီအနံၤအံၤ တၢ်ကစီၣ်ဟူထီၣ်လၢ ကညီဖီၣ်စုက၀ဲၤကရူၢ်လၢအမ့ၢ် -DKBA˜...
ပယီၤသုးကလၢၤလၢအအိၣ်ဖဲဃိၣ်လိာ်ကျိကၢၢ်နံၤသီလဲၤထၣ်တၢ်လီၢ်တဖၣ်ခးသီၣ်ကျိအဃိ လီၢ်က၀ီၤဖိတဖၣ်အိၣ်ဒီးတၢ်ပျံၤတၢ်ဖုး
လါမးရှး ၂၄ သီႇ ၂၀၂၁ နံၣ်ႇ ခ့ၣ်အဲးစံၣ် ကီၢ်ကၠီၣ်တဲၣ်=ကီၢ်ပယီၤကီၢ်ဆၢ ပယီၤသုးလၢအအိၣ်ဖဲဃိၣ်လိာ်ကျိကၢၢ်နံၤသီလဲၤထၣ်တၢ်လီၢ်တဖၣ် ဖဲမဟါ လါမးရှး ၂၃ သီ မုၢ်ထူၣ်ခါအဆၢကတီၢ်ခီဖျိခးသီၣ်ကျိအဃိ လီၢ်က၀ီၤဖိလၢအအိၣ်ဘူးဖဲတၢ်လီၢ်ဖဲန့ၣ်သ့ၣ်တဖၣ် အိၣ်ဒီးတၢ်ဘၣ်ယိၣ်ဘၣ်ဘှီပျံၤတၢ်ဖုးတၢ်ဒီးဘၣ်သုးလီၢ်သုးကျဲအဂ့ၢ်န့ၣ် သ့ၣ်ညါဘၣ်န့ၣ်လီၤႉ တၢ်ဖိတၢ်လံၤတၢ်အီၣ်တၢ်အီဟုသးထၢၣ်လၢတၢ်ပာ်ဃာ်၀ဲဖဲသီလဲၤထၣ်ဃိၣ်လိာ်ကျိကၢၢ်နံၤတဖၣ်အံၤ ဖဲလီၢ်က၀ီၤဖိတဖၣ်လဲၤကွၢ်၀ဲအဆၢကတီၢ် ပယီၤသုးလၢအအိၣ်လၢထံကျိ၀ၢ်ခီတကပၤတဖၣ် ခးသီၣ်၀ဲဒၣ်ကျိတစှၤန့ၢ်ဒံး ၅ ထံၣ်ဘၣ်အဂ့ၢ်န့ၣ် သီလဲၤထၣ်လီၢ်က၀ီၤဖိတဂၤ စံးဘၣ် The Reporter ကၠီၣ်တဲၣ်တၢ်ကစီၣ်သန့န့ၣ်လီၤႉ ခီဖျိလၢတၢ်ဂ့ၢ်ကဲထီၣ်သးဒ်အံၤအဃိ လီၢ်က၀ီၤသ၀ီဖိလၢအအိၣ်ဘူးဖဲတၢ်လီၢ်ဖဲန့ၣ်သ့ၣ်တဖၣ် လဲၤၦ့ၤအီၣ်တၢ်အီၣ်တၢ်အီၣ်လၢသီလဲၤထၣ်သ၀ီပူၤတဘူၣ်အါအါလၢၤဘၣ်အဂ့ၢ်န့ၣ် လီၢ်က၀ီၤဖိဖဲန့ၣ်တဖၣ် စံး၀ဲန့ၣ်လီၤႉ ဟုးသးအထၢၣ် ၇၀၀ ဘျဲၣ်ဒီးတၢ်အီၣ်တၢ်အီလၢအဂၤသ့ၣ်တဖၣ်လၢအအိၣ်ဖဲသီလဲၤထၣ်ထံကျိကၢၢ်နံၤအံၤ ဖဲအပူၤကွံာ် လါမးရှး ၂၀ သီအခါန့ၣ် တၢ်အိၣ်ဟဲစိာ်၀ဲဒၣ်လၢမဲၢ်ဆီးတကပၤအဂ့ၢ်န့ၣ် ကၠီၣ်တဲၣ်တၢ်ကစီၣ်သန့တနီၤပာ်ဖျါ၀ဲန့ၣ်လီၤႉ ပယီၤသုးတနီၤလၢအဆီလီၤသးဖဲဃိၣ်လိာ်ကျိကၢၢ်နံၤ ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ မုၢ်တြီၢ်ကီၢ်ရ့ၣ်အပူၤတဖၣ် ဒ်သိးတၢ်ကဆှၢန့ၢ်အ၀ဲသ့ၣ်တၢ်အီၣ်တၢ်အီအဂီၢ် ခီဖျိလၢဟီၣ်က၀ီၤ ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢသုးကရူၢ်တဖၣ်တြီဃာ်၀ဲအဃိ ဃ့၀ဲတၢ်မၤစၢၤလၢကီၢ် ကၠီၣ်တဲၣ်အအိၣ်ဒီး ဖဲန့ၣ်ဟုသးဒီးတၢ်အီၣ်တၢ်အီအဂၤတဖၣ် ဆှၢခီဖျိ၀ဲဒၣ်လၢကီၢ်ကၠီၣ်တဲၣ်တကပၤအဂ့ၢ်န့ၣ် ကၠီၣ်တဲၣ်တၢ်ကစီၣ်သန့တနီၤပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ ဖဲလါမးရှး ၂၁ သီအနံၤ ခ့ၣ်အဲၣ်ယူၣ်ႇမုၢ်တြီၢ်ကီၢ်ရ့ၣ်(သုးက့ ၅) ထုးထီၣ်ပာ်ဖျါ၀ဲလံာ်တၢ်ဘိးဘၣ်ရၤလီၤတဘ့ၣ်ဒီးပာ်ဖျါ၀ဲ လၢအ၀ဲသ့ၣ်ဟီၣ်က၀ီၤအပူၤ ကၠီၣ်တဲၣ်ၦၤဘၣ်မူဘၣ်ဒါတဖၣ်ဆှၢမၤစၢၤ၀ဲသုးကီၣ်ကးလၢအဟံးဆူၣ်ကွံာ်တၢ်စိတၢ်ကမီၤအသုးဖိိတဖၣ်တၢ်အီၣ်တၢ်အီအံၤ လ့ၤတက့ၤတတူၢ်လိာ်ဘၣ်အဂ့ၢ် စံးဃာ်၀ဲဒၣ်န့ၣ်လီၤႉ
ကဃုသ့ၣ်ညါခိးကွၢ် ၦၤဟူးဂဲၤထံရူၢ်ကီၢ်သဲးဖိလၢအနုာ်လီၤအိၣ်ခူသူၣ် KNU ဟီၣ်က၀ီၤအပူၤတဖၣ်အဂ့ၢ် သုးကီၣ်ကးစံး၀ဲ
လါမးရှး ၂၃ သီႇ ၂၀၂၁ နံၣ်ႇ ခ့ၣ်အဲးစံၣ် ဘၣ်ထွဲဒီးၦၤဟူးဂဲၤထံရူၢ်ကီၢ်သဲးဖိလဲၤနုာ်လီၤအိၣ်ခူသူၣ်သး လၢကီၢ်ကၠီၣ်တဲၣ်=ကီၢ်ပယီၤကီၢ်ဆၢ ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤအပူၤ တၢ်ဂ့ၢ်အံၤ ကဃုသ့ၣ်ညါအိၣ်ခိးကွၢ်၀ဲအဂ့ၢ်န့ၣ် ဖဲလါမးရှး ၂၃ သီအနံၤ လံာ်တၢ်ကစီၣ်လၢသုးကီၣ်ကးပၢ၀ဲတဖၣ် ထုးထီၣ်ပာ်ဖျါ၀ဲန့ၣ်လီၤႉ တၢ်ကစီၣ်ဟူထီၣ်သါလီၤလၢ NLD ပၣ်တံၣ်ဖိတဖၣ်ႇဘျီၣ်ဒိၣ်ခၢၣ်စးတဖၣ်ႇၦၤလၢအပၣ်ဃုာ်ဟူးဂဲၤလၢ CDM အပူၤတဖၣ်ႇ ၦၤလၢအတူၢ်လိာ် NLD ပၣ်တံၣ်တဖၣ်ဒီး ၦၤဟူးဂဲၤလၢထံရူၢ်ကီၢ်သဲးဖိလၢတၢ်ထုးထီၣ်ဃာ်လၢတၢ်ကဖီၣ်၀ဲတဖၣ် လဲၤဃ့ၢ်အိၣ်ခူသူၣ်လၢ ကီၢ်ကၠီၣ်တဲၣ်=ကီၢ်ပယီၤကီၢ်ဆၢ KNU တၢ်ပၢဟီၣ်က၀ီၤအပူၤအဃိ ပယီၤသုးတၢ်ဘံၣ်တၢ်ဘၢတဖၣ် ကဃုသ့ၣ်ညါ၀ဲလီၤတံၢ်လီၤဆဲးအဂ့ၢ်န့ၣ် သုးကီၣ်ကးလံာ်တၢ်ကစီၣ်အပူၤ ပာ်ဖျါ၀ဲန့ၣ်လီၤႉ ဘၣ်ထွဲသုးကီၣ်ကးထုးထီၣ်ပာ်ဖျါ၀ဲအံၤ ခ့ၣ်အဲၣ်ယူၣ် ဒူပျာ်ယာ်ကီၢ်ရ့ၣ် နဲၣ်ရွဲၣ် ပဒိၣ်စီၤလ့ၣ်စတၤ စံး၀ဲလၢ “ဒ်လီၢ်ခၢၣ်သးထုးထီၣ်၀ဲအသိးလီၤ လၢပ၀ဲသ့ၣ်တကပၤန့ၣ်ပတူၢ်လိာ်၀ဲၦၤဟူးဂဲၤလၢ(CDM)အပူၤတဖၣ် ဒီးၦၤလၢအပာ်ဖျါထီၣ်သးတဖၣ်လီၤႉ ပမၤစၢၤအ၀ဲသ့ၣ်လီၤႉ တၢ်သ့ၣ်တဖၣ်န့ၣ်တၢ်ပာ်ပနီၣ်တဖၣ်အိၣ်၀ဲလီၤႉ ဒုၣ်ဒါတကပၤကဟဲဃုသ့ၣ်ညါတၢ်န့ၣ်လီၤတံၢ်လီၤႉ တၢ်သ့ၣ်တဖၣ်အံၤ ဒ်ပတၢ်ဘံၣ်တၢ်ဘၢအတၢ်သိၣ်တၢ်သီအသိး ပသမံသမိးတၢ်လၢတၢ်ပလီၢ်ပဒီသးလီၤတံၢ်လီၤဆဲးလီၤ”အဂ့ၢ်န့ၣ် စံး၀ဲန့ၣ်လီၤႉ တၢ်ထီဒါသုးမီၤစိရိၤသနူအပူၤ ၦၤပာ်ဖျါထီၣ်သးအခိၣ်လၢအပာ်ဖျါထီၣ်သးတဖၣ်ႇ ပဒိၣ်ၦၤမၤတၢ်ဖိလၢအဟူးဂဲၤပၣ်ဃုာ်လၢ(CDM)အပူၤတဖၣ်ႇပယီၤပၢၤကီၢ်သုးဒီးသုးတဖၣ်ႇ ဒီးဘျီၣ်ဒိၣ်ခၢၣ်စးတနီၤ ပာ်ဖှိၣ်ခဲလၢာ်တကထိဃၣ်ဃၣ်လဲၤဃ့ၢ်အိၣ်ခူသူၣ်လၢခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤပူၤအဂ့ၢ်န့ၣ် တၢ်ကစီၣ်ဟူထီၣ်သါလီၤအိၣ်၀ဲန့ၣ်လီၤႉ
ပယီၤသုးခးလီၤကျိဖးဒိၣ်ဒီးဒွဲၣ်အူတၢ်မၤအီၣ်အလီၢ်
လါမးရှး ၁၇ သီႇ ၂၀၂၁ နံၣ်ႇ ခ့ၣ်အဲးစံၣ် မုၢ်တြီၢ်ကီၢ်ရ့ၣ်ႇလူၢ်သီကီၢ်ဆၣ်အပူၤ ခီဖျိပယီၤသုးတဖၣ်ခးလီၤကျိဖးဒိၣ် ဒီးဒွဲၣ်အူ၀ဲလီၢ်က၀ီၤဖိတဖၣ်တၢ်မၤအီၣ်အလီၢ်တဖၣ်အဃိ လီၢ်က၀ီၤသ၀ီဖိတဖၣ်ဘၣ်စံၣ်မှံအိၣ်ခူသူၣ်အဂ့ၢ်န့ၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ တၢ်ဘိးဘၣ်ရၤလီၤတၢ်ကစီၣ်၀ဲၤကျိၤသူလ့ၤတၢ်ကစီၣ် ထုးထီၣ်ဘိးဘၣ်ရၤလီၤတၢ်ကစီၣ် ဖဲတနံၤအံၤ(လါမးရှး ၁၇)သီအနံၤန့ၣ်လီၤႉ လူၢ်သီကီၢ်ဆၣ် လၢၢ်မုၢ်ပျီသ၀ီကရူၢ် ပယီၤသုးကလံၤထံးကီၢ်ခီသုး၀ဲၤလီၢ်ခိၣ်သ့ၣ်(တပခ)ဒီး ပၢဆှၢရဲၣ်ကျဲၤ သုး၀ဲၤလီၢ်ခိၣ်သ့ၣ် စကခ(၄)စုဒုၣ်တီၤအဖီလာ်သုးတဖၣ် ဖဲလါမးရှး ၁၅ သီ ဒီး ၁၆ သီအနံၤန့ၣ် ဒွဲၣ်အူ ၀ဲသ၀ီဖိတဖၣ်တၢ်မၤအီၣ်အလီၢ်အသိး ခးလီၤ၀ဲကျိဖးဒိၣ်တစှၤန့ၢ်ဒံး ၃၀ ဖျၢၣ်အဂ့ၢ်န့ၣ် ခ့ၣ်အဲၣ်ယူၣ် သူလ့ၤတၢ်ကစီၣ်ပာ်ဖျါ၀ဲန့ၣ်လီၤႉ ခီဖျိလၢပယီၤသုးခးလီၤကျိဖးဒိၣ်တဖၣ်အဃိ လၢၢ်မုၢ်ပျီသ၀ီ လီၢ်က၀ီၤဟံၣ်ဖိဃီဖိ(၅၆)ဒူၣ်ႇၦၤနီၣ်ဂံၢ်(၄၇၀)ဂၤႇ ဟံၣ်ဂိၤလိာ်ဒၢသ၀ီ ဟံၣ်ဖိဃီဖိ(၂၅)ဒူၣ်ႇၦၤနီၣ်ဂံၢ်(၂၈၀)ဂၤ ဘၣ်ဃ့ၢ်မှံအိၣ်ခူသူၣ်သးအဂ့ၢ်န့ၣ် သူလ့ၤတၢ်ကစီၣ် ပာ်ဖျါ၀ဲန့ၣ်လီၤႉ ဖဲလါဖ့ၤဘြူၤအါရံၤ ၁ သီအနံၤ သုးမုၢ်ဒိၣ်ဟံးဆူၣ်ကွံာ်တၢ်စိတၢ်ကမီၤလၢ ဒီကလုာ်ဒံၣ်မိၣ်ခြ့ၣ်စံၣ်ကရၢ(NLD)ကမျၢၢ်ပဒိၣ်အအိၣ်၀ံၤအလီၢ်ခံ စးထီၣ်ဖဲလါဖ့ၤဘြူၤအါရံၤအလီၢ်ခံန့ၣ် ခ့ၣ်အဲၣ်ယူၣ်=ကညီဒီကလုာ်စၢဖှိၣ်ကရၢ ဟီၣ်က၀ီၤအပူၤတနီၤန့ၣ် တၢ်ခးလိာ်သးဟဲက့ၤကဲထီၣ်၀ဲဒၣ်တလီၢ်လီၢ်န့ၣ်လီၤႉ ဒ်န့ၣ်အသိး ခ့ၣ်အဲၣ်ယူၣ် မုၢ်တြီၢ်ကီၢ်ရ့ၣ်အပူၤ လူၢ်သီႇဒွဲၣ်လိဒီးဘုသိၣ် ကီၢ်ဆၣ် ၃ ဘ့ၣ်အပူၤစ့ၢ်ကီး ပယီၤသုးဒီး ခ့ၣ်အဲၣ်ယူၣ် ကညီဒီကလုာ်တၢ်ထူၣ်ဖျဲးသုးမုၢ်ဒိၣ်(KNLA)သုးက့ ၅ တဖၣ်အဘၢၣ်စၢၤ တၢ်ခးလိာ်သးဟဲက့ၤကဲထီၣ်ဒီး...