သုးကီၣ်ကးကထီၣ်မၤ၀ဲသုးဂ့ၢ်၀ီတၢ်ဒိၣ်စိအဃိကမျၢၢ်ကအိၣ်ဒီးတၢ်ပလီၢ်သးလၢတၢ်လဲၤတၢ်က့ၤပူၤအဂ့ၢ် ခ့ၣ်အဲၣ်ယူၣ် ဘျံးဒ၀ဲၢ်ကီၢ်ရ့ၣ် ထုးထီၣ်ဒုးသ့ၣ်ညါ၀ဲ
လါဒံၣ်စ့ဘၢၣ် ၂၅ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဘျံးဒ၀ဲၢ်ကီၢ်ရ့ၣ်(သုးက့ ၄)ဟီၣ်က၀ီၤအပူၤ သုးမီၤစိရိၤအံၤအိၣ်ဒီးတၢ်ရဲၣ်တၢ်ကျဲၤလၢ ကမၤက့ၤသုးဂ့ၢ်၀ီတၢ်ဒိၣ်စိလၢဟီၣ်က၀ီၤပူၤတဖၣ်အဃိ ကမျၢၢ်ထံဖိကီၢ်တဖၣ်ကပလီၢ်သးလၢတၢ်လဲၤတၢ်က့ၤပူၤအဂ့ၢ်န့ၣ် ခ့ၣ်အဲၣ်ယူၣ် ထုးထီၣ်ဟ့ၣ်ပလီၢ်ဒုးသ့ၣ်ညါလီၤ၀ဲဖဲတနံၤအံၤလါဒံၣ်စ့ဘၢၣ် ၂၅ သီ အနံၤ န့ၣ်လီၤ. ဒ်ဘျံးဒ၀ဲၢ်ကီၢ်ရ့ၣ်လံၥ်တၢ်ဒုးသ့ၣ်ညါပူၤပၥ်ဖျါ၀ဲအသိးန့ၣ် ပယီၤသုးမီၤစိရိၤအံၤအိၣ်ဒီးတၢ်ရဲၣ်တၢ်ကျဲၤလၢကမၤက့ၤသုးဂ့ၢ်၀ီတၢ်ဒိၣ်စိ လၢသုးက့ဟီၣ်က၀ီၤတဖၣ်အပူၤတကးဒံးဘၣ် တၢ်ရဲၣ်တၢ်ကျဲၤအိၣ်စ့ၢ်ကီးလၢကဖီၣ်၀ဲဒၣ်ကမျၢၢ်အသိလ့ၣ်, လ့ၣ်ယီၢ်စဲးလၢ ဒ၀ဲၢ်မုၢ်ထီၣ် ၀့ၢ်တၢ်အဲၣ်,ကၠီးမဲဒိၣ်ဟီၣ်က၀ီၤကပိၤကပၤအဂ့ၢ်န့ၣ် စံး၀ဲန့ၣ်လီၤ. တကးဒံးဘၣ်လၢန့ၣ်အမဲၥ်ညါ လီၢ်က၀ီၤကမျၢၢ်လၢအသးနံၣ်စးထီၣ်(၁၈)နံၣ်တုၤလၢ(၃၅)နံၣ်တဖၣ်အံၤ သုးမီၤစိရိၤအပှၤတၢ်ရဲၣ် တၢ်ကျဲၤအိၣ်လၢကဖီၣ်ဆူၣ်၀ဲသုးအဃိ ကမျၢၢ်ထံဖိကီၢ်ဖိတဖၣ်ကပလီၢ်ပဒီသးဖဲတၢ်လဲၤတၢ်က့ၤအခါကိးဂၤဒဲးအဂ့ၢ်န့ၣ် ဘျံးဒ၀ဲၢ်ကီၢ်ရ့ၣ်လံၥ်တၢ်ပၥ်ဖျါအပူၤ စံး၀ဲန့ၣ်လီၤ. ဘၣ်ဃးတၢ်ဂ့ၢ်အံၤန့ၣ် ဘျံးဒ၀ဲၢ်ကီၢ်ရ့ၣ် နဲၣ်ရွဲၣ် ပဒိၣ်စီၤအဲၣ်နၤ စံး၀ဲလၢ“ဒုၣ်ဒါဒုထီဘိလီၤမီၤနီၤဘၣ်ဃးလၢတၢ်ထၢဆူၣ်သုး တဖၣ်န့ၣ်.ခီဖျိလၢအ၀ဲသ့ၣ်န့ၣ်ကမၤပှဲၤထီၣ်က့ၤအသုးဂံၢ်ဘါအဂီၢ်န့ၣ် ပှၤသးစၢ်မ့ၢ်ဂ့ၤ,ပှၤလၢအသးအိၣ်(၃၅)နံၣ်ဆူဖီလၥ်မ့ၢ်ဂ့ၤန့ၣ် ထီဘိအ၀ဲသ့ၣ်ဃုထံၣ်၀ဲတၢ်ခွဲးတၢ်ယၥ်လၢကဖီၣ်ဆူၣ်လီၤမီၤ.ဒီးဒ်န့ၣ်အသိးဒုၣ်ဒါတဖၣ်ဖဲအ၀ဲသ့ၣ်မၤ၀ဲတၢ်ထီၣ်ဒုးအဆၢကတီၢ်န့ၣ် သူ၀ဲဒၣ်ကမျၢၢ်အသိလ့ၣ်အိၣ်,ဆှၢ၀ဲဒၣ်ပှၤဆူးပှၤဆါသ့ၣ်တဖၣ်န့ၣ်သူ၀ဲဒၣ်အသိလ့ၣ်အိၣ်မီၤနီၤ.လၢဒ၀ဲၢ်မုၢ်ထီၣ်တပၤနါက့ အသုးကျိၤန့ၣ်ဟဲထီၣ်တုၤလၢ(ကၠီးမဲတီၤ)တဘိအဃိပတၢ်ဘၣ်ယိၣ်အိၣ်ထီၣ်လၢအ၀ဲသ့ၣ်ကဟူးဂဲၤအါထီၣ်ကဖီၣ်၀ဲဒၣ်ကမျၢၢ်တဖၣ်မ့ၢ်ဂ့ၤ,ကဖီၣ်ဆူၣ်၀ဲကမျၢၢ်အသိလ့ၣ်တဖၣ်လီၤပဃိအဲၣ်ဒိးလၢကမျၢၢ်တဖၣ်ကပၥ်သူၣ်ပၥ်သးထီဘိလီၤ.”အဂ့ၢ်န့ၣ် စံးဘၣ် ခ့ၣ်အဲးစံၣ်-ကညီတၢ်ကစီၣ်ဖဲ တနံၤအံၤန့ၣ်လီၤ. ဒ်န့ၣ်အသိးဖဲအပူၤကွံၥ်လါဒံၣ်စ့ဘၢၣ် ၂၁ သီအနံၤစ့ၢ်ကီး ပယီၤသုးဂံၢ်ဘါ(၂၀၀)ဃၣ်ဃၣ် ဟဲထီၣ်နုၤလီၤ၀ဲဒၣ်လၢ တနီသရံၣ်ကီၢ်ခီဒိၣ် ဒ၀ဲၢ်မုၢ်ထီၣ် ဟီၣ်က၀ီၤပူၤဒီး ဖဲဟဲထီၣ်လၢကျဲအခါန့ၣ်ဖီၣ်ဆူၣ်၀ဲဒၣ်ကမျၢၢ်သူ၀ဲဒ်တၢ်ဒီသဒၢတခါအသိးအဃိ ကမျၢၢ်သ့ၣ်တဖၣ်ဘၣ်ဟး စံၣ်အိၣ်ခူသူၣ်သးအိၣ်၀ဲအဂ့ၢ်န့ၣ် လီၢ်က၀ီၤကမျၢၢ်စံး၀ဲန့ၣ်လီၤ. တကီၢ်ခါခဲအံၤ ဘျံးဒ၀ဲၢ်ကီၢ်ရ့ၣ်အမဲၥ်ညါ ၀့ၢ်ပူၤက၀ီၤဒ့,ဒူသ၀ီတၢ်လီၢ်ကိးတီၤဒဲးဃၣ်ဃၣ်အပူၤ သုးကီၣ်ကးအံၤလၢကမၤပှဲၤ အါထီၣ်သုး ဂံၢ်ဘါအဂီၢ် ဟးထၢ၀ဲဒၣ်သုးတကးဒံးဘၣ်အိၣ်ခိးသမံသမိးဖီၣ်တၢ်လၢကျဲပူၤအိၣ်အဃိ...
ကၠဲးထိၣ်ကီၢ်ဆၣ် စှၤသီအတီၢ်ပူၤပယီၤသုးခးလီၤကျိဖးဒိၣ်ဟဲအါထီၣ် ကမျၢၢ်သံဘၣ်ဒိဘၣ်ထံးအိၣ်
လါဒံၣ်စ့ဘၢၣ် ၂၃ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)ကၠဲးထိၣ်ကီၢ်ဆၣ်အပူၤ စှၤသီအတီၢ်ပူၤအံၤ ပယီၤသုးခးလီၤ ကျိဖးဒိၣ်ဟဲအါထီၣ်အဃိ ကမျၢၢ်တၢ်သံတၢ်ဘၣ်ဒိဘၣ်ထံးအိၣ်၀ဲအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲန့ၣ်လီၤ. ဖဲအပူၤကွံၥ်လါဒံၣ်စ့ဘၢၣ် ၁၉ သီ ဟါခီ ၉း၄၅ နၣ်ရံၣ်အဆၢကတီၢ်န့ၣ် လၢ၀ီၢ်ကျီၢ်ကရူၢ်အပူၤ တၢ်ဒုးကဲထီၣ်တအိၣ် သုးကီၣ်ကး(၆၀၂)သုးရ့ၣ် ခးလီၤကျိဖးဒိၣ်(၂)ဖျၢၣ် လီၤတဲၥ်ပိၢ်ဖးထီၣ်၀ဲလၢ ကၠီယွၤသ၀ီဃၢၤ(၁)ဖျၢၣ်ဒီး လၢ ၀ီၢ်ကျီၢ်သ၀ီပူၤ ပှၤဟံၣ်ဖီခိၣ်(၁)ဖျၢၣ်အဃိ ကိၤမၠိလဲၤ၀့(၃၂)နံၣ်အံၤ ဘၣ်၀ဲဒီးကျိဖးဒိၣ်အက့အခီသံ၀ဲအဂ့ၢ်န့ၣ် သ့ၣ်ညါဘၣ်န့ၣ်လီၤ. တကးဒံးဘၣ် ကိၤမၠိလဲၤ၀့သံအမဲၥ်ညါ အမါမၣ်ကၠူကၠူ၀့(၂၇)နံၣ်အံၤစ့ၢ်ကီး ဘၣ်ဒိ၀ဲဒၣ်နးနးခီဖျိကျိဖးဒိၣ်အက့ဘၣ်၀ဲအခိၣ်ဒီး အိၣ်၀ဲဒၣ်လၢသးသမူတၢ်ဘၣ်ယိၣ်ပူၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါစံး၀ဲအသိး သ့ၣ်ညါဘၣ်န့ၣ်လီၤ. ဒ်န့ၣ်အသိးဖဲလါဒံၣ်စ့ဘၢၣ် ၁၈ သီ ဟါခီ ၇း၀၀ နၣ်ရံၣ်ဃၣ်ဃၣ်အဆၢကတီၢ်စ့ၢ်ကီး တၢ်ဒုးကဲထီၣ်တအိၣ် သုးကီၣ်ကး(၃၁၀) အမျိၥ်သုးအံၤ ခးလီၤကျိဖးဒိၣ်(၃)ဖျၢၣ် လီၤတဲၥ်ပိၢ်ဖးထီၣ်၀ဲလၢ လၢခရၢၢ်ကရူၢ်ပူၤ သိခွးသ၀ီခိၣ်ထိး(၂)ဖျၢၣ်, လၢ၀ီၢ်ကျီၢ်ကရူၢ် လၢၢ်ပူၤသ၀ီဃၢၤ ကျဲမုၢ်ခိၣ်(၁)ဖျၢၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. တကတီၢ်ဃီဖဲတနံၤန့ၣ် ဟါခီ ၁၀း၄၀ မံးနံးအဆၢကတီၢ် သုးကီၣ်ကးအပှၤလၢအိၣ်ဆီလီၤသးဖဲ(သုးက့ ၃) ၀ီကီၢ်ဆၣ် လဲၣ်ပၤသ၀ီပူၤအံၤ...
အခါဘၣ်လၢပကဘၣ်ဂုၥ်ကျဲးစၢးထိၣ်ဃူထိၣ်ဖိးလိၥ်သးလံအဂ့ၢ် (DKBA)သုးရိၣ်မဲခိၣ်ကျၢၢ်-၂ စီၤစွ့ၤ၀ၣ် စံး၀ဲ
လါဒံၣ်စ့ဘၢၣ် ၂၂ သီ, ၂၀၂၄ နံၣ်, ခ့ၣ်အဲးစံၣ် ခါဆူညါပကမၤလဲၤထီၣ်လဲၤထီတၢ်ဂ့ၤန့ၢ်ဒံးအလီၢ်ဒီးတၢ်ဆၢကတီၢ်ဘၣ်လံလၢပကဘၣ်ထိၣ်ဃူထိၣ်ဖိးလိၥ်က့ၤသးအဂ့ၢ်န့ၣ် တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA) သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤစွ့ၤ၀ၣ် စံးလီၤ၀ဲဖဲမဟါလါဒံၣ်စ့ဘၢၣ် ၂၁ သီ (DKBA)နံၣ်ပှဲၤထီၣ် ၃၀ ၀ီတ၀ီ တၢ်ရဲၣ်တၢ်ကျဲၤမူးအပူၤန့ၣ်လီၤ. ကရူၢ်ကရၢမ့လီၤဆီလိၥ်သးဘၣ်ဆၣ်ပ၀ဲကိးဂၤဒဲးပတၢ်တိၥ်ပၥ်အိၣ်လၢပကမၤတၢ်လၢကညီနီၢ်တယၢ်တဘ့ၣ်ဃီအဖီလၥ်အဃိ အလီၢ်အိၣ်လၢပကဘၣ်ထိၣ်ဃူထိၣ်ဖိးလိၥ်သးလံအဂ့ၢ်န့ၣ် သုးခိၣ်ကျၢၢ်စိ စီၤစွ့ၤ၀ၣ် စံးလီၤ၀ဲလၢမူးတၢ်ရဲၣ်တၢ်ကျဲၤပူၤ ဒ်အံၤန့ၣ်လီၤ. အ၀ဲစံး၀ဲလၢ“ယၤဒီးအဖု(AG)န့ၣ်ပဟံထီၣ်ဖီၣ်ထီၣ်ပမူဒါဆဲးခံတစဲး.ဆူညါပကမၤလဲၤထီၣ်လဲၤထီတၢ်ဂ့ၤန့ၢ်အလီၢ်,တၢ်ဃူတၢ်ဖိးပကဂုၥ်ကျဲးစၢး.ပကဘၣ်ထိၣ်ဃူထိၣ်ဖိးလိၥ်သးဆၢကတီၢ်ဘၣ်လံ.ပှၤဆ့ၣ်နီၤလၢတၢ်မဲၥ်ညါသ့ၣ်တဖၣ်အံၤမ့ၢ်မတဂၤလဲၣ်န့ၣ်သုကသ့ၣ်ညါလီၤ.ပှၤဟဲဟ့ၣ်ဂံၢ်ဟ့ၣ်ဘါပှၤ.အဃိပကဲပှၤကညီဖဲတၢ်သ့တၢ်ဘၣ်အိၣ်ဒီးပှၤန့ၣ်ပကဘၣ်ထိၣ်ဃူထိၣ်ဖိးလိၥ်သး,တၢ်အဲၣ်တၢ်ကွံန့ၣ်မ့ၢ်တၢ်အကါဒိၣ်ကတၢၢ်လီၤ.အဃိပအိၣ်တဒူၣ်ဂ့ၤတဒူၣ်ဂ့ၤန့ၣ်အခိၣ်သ့ၣ်န့ၣ်ပကမၤတၢ်လၢနီၣ်တယၢ်တဘ့ၣ်ဃီအဖီလၥ်န့ၣ်ပတၢ်တိၥ်ပၥ်အိၣ်ခဲလၢၥ်လီၤ.ပကဲပှၤကညီပဘၣ်အဲၣ်က့ၤပှၤကညီလီၤ.”အဂ့ၢ်န့ၣ် စံး၀ဲန့ၣ်လီၤ. သုးရိၣ်မဲခိၣ်ကျၢၢ် စီၤစွ့ၤ၀ၣ်အံၤ ဖဲတလါအံၤလါဒံၣ်စ့ဘၢၣ် ၃ သီအနံၤန့ၣ် ဒ်(DKBA)လီၢ်ခၢၣ်သးကမံးတၢ်အိၣ်ဖှိၣ် တၢ်ဆၢတဲၥ် အိၣ်ထီၣ်အသိး န့ၣ် လၢကျိၣ်ထူဘီလီၢ်ခၢၣ်သးသုးက့ခိၣ် သုးခိၣ်ကျၢၢ်ဖိ လီၢ်လၤအံၤတဆီ ဘၣ်တၢ်သုးထီထီၣ် အလီၢ်လၤဆူ သုးခိၣ်ကျၢၢ်စိ အဃိ ခဲအံၤဟံထီၣ်ဖီၣ်က့ၤ၀ဲမူဒါဒ်သုးရိၣ်မဲခိၣ်ကျၢၢ်-၂ တဂၤ အသိးအဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိးအ၀ဲမ့ၢ်စ့ၢ်ကီးပှၤတဂၤလၢအတၢ်ရ့လိၥ်မုၥ်လိၥ်သးဒီးခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဂ့ၤ၀ဲဒီး လၢန့ၣ်အမဲၥ်ညါ အ၀ဲန့ၣ်အိၣ်ဒီးသးလၢအဲၣ်ဒိးမၤဃူမၤဖိးက့ၤကညီဖီၣ်စုက၀ဲၤကရူၢ်ကရၢတဖၣ်အဂ့ၢ်န့ၣ် တၢ်ပဲၥ်ထံနီၤဖးစံး၀ဲအိၣ်န့ၣ်လီၤ. တၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)မုၢ်နံၤဆၢက့ၤဘျီ၀ဲအံၤ ဘၣ်တၢ်မၤအီၤဖဲ(DKBA)သုး၀ဲၤလီၢ်ခိၣ်သ့ၣ်တၢ်လီၢ် ဆိၣ်စံမၠဲၣ်ဟီၣ်က၀ီၤလီၤဆီအပူၤဒီး တၢ်ရဲၣ်တၢ်ကျဲၤဘျီ၀ဲအံၤအပူၤ (DKBA)သုးရိၣ်မဲခိၣ်ကျၢၢ် သုးခိၣ်ကျၢၢ်ဒိၣ်စိ စီၤစတံ, သုးရိၣ်မဲခိၣ်ကျၢၢ်-၂ သုးခိၣ်ကျၢၢ်စိ စီၤစွ့ၤ၀ၣ်, ပၢဆှၢသုးဂ့ၢ်၀ီခိၣ်ကျၢၢ် သုးခိၣ်ကျၢၢ်ဂီၢ်ဂ့ၢ် စီၤဆါအီၤ...
သထူၣ်ကီၢ်ဆၣ်ပူၤ (KNLA)သုးပၥ်ဖှိၣ်ခိးထုးပယီၤသုးလၢမ့ၣ်ပိၢ် ဘၣ်ဒိ ၃ ဂၤဒီးပယီၤသုးခးလီၤကျိဖးဒိၣ်ဟဲအါထီၣ်
လါဒံၣ်စ့ဘၢၣ် ၁၉ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ ဒူသထူၣ်ကီၢ်ရ့ၣ်(သုးက့ ၁)သထူၣ်ကီၢ်ဆၣ်အပူၤ ဖဲတနံၤအံၤဂီၤခီအဆၢကတီၢ် ပယီၤသုးလၢအိၣ်ခိးသမံသမိးတၢ်လၢကျဲပူၤတဖၣ် (KNLA)သုးပၥ်ဖှိၣ်ခိးထုး၀ဲဒီးမ့ၣ်ပိၢ်အဃိ ဘၣ်ဒိ(၃)ဂၤအဂ့ၢ်န့ၣ် ဂံၢ်ခီၣ်ထံး ပှၤဟ့ၣ်တၢ်ကစီၣ်ဖိ စံးဘၣ်ခ့ၣ်အဲးစံၣ်-ကညီ တၢ်ကစီၣ်န့ၣ်လီၤ. ဖဲတနံၤအံၤလါဒံၣ်စ့ဘၢၣ် ၁၉ သီ ဂီၤခီ ၇း၃၀ အဆၢကတီၢ် သုးကီၣ်ကးသုးတြိၤ(၄၄)စုတီၤဖီလၥ် ပယီၤသုးလၢအိၣ်ခိးသမံသမိး တၢ်ဖဲ လ့တဲၤ(လေးတိုင်)ဒီးညီၤ၀ဲ(ညောင်ဝိုင်း) ဘၢၣ်စၢၤ စါယ့မၠဲၤ(စမ်းရေးမြိုင်)ကျဲခိၣ်ထိးအံၤ တဖၣ် လီၢ်က၀ီၤကညီဒီကလုၥ် တၢ်ထူၣ်ဖျဲးသုးမုၢ်ဒိၣ်(KNLA) သုးရ့ၣ်(၂)သုးပၥ်ဖှိၣ် ခိးထုး၀ဲဒီးမ့ၣ်ပိၢ်အဃိ ပယီၤသုးတကပၤဘၣ်ဒိဘၣ်ထံးကဲထီၣ်သး ဒ်အံၤလီၤအဂ့ၢ်န့ၣ် သ့ၣ်ညါဘၣ်န့ၣ်လီၤ. ပယီၤသုးလၢတၢ်လဲၤခးအီၤဖဲမဂီၤသ့ၣ်တဖၣ်အံၤ ဟးအိၣ်ခိးသမံသမိးသိလ့ၣ်လၢကျဲပူၤ,ဃ့အီၣ်စ့လၢပှၤကမျၢၢ်အအိၣ် အိၣ်၀ဲတလီၢ်လီၢ်ဒီးဒ်န့ၣ်အသိးဖဲတၢ်လဲၤခးအ၀ဲသ့ၣ်အခါအနီၣ်ဂံၢ်ကအိၣ်အဂၤ(၁၀)ခိၣ်ဃၢၤအဂ့ၢ်န့ၣ် ဂံၢ်ခီၣ်ထံးပှၤဟ့ၣ်တၢ်ကစီၣ်ဖိ တဂၤ စံးဘၣ်ခ့ၣ်အဲးစံၣ်- ကညီတၢ်ကစီၣ်ဒ်အံၤန့ၣ်လီၤ. အ၀ဲစံး၀ဲလၢ“တၢ်ဂ့ၢ်ကဲထီၣ်သးဖဲမဂီၤတခါန့ၣ်ဒ်အံၤ ပယီၤသုးတဖၣ်န့ၣ်အကဲ၀ဲဒၣ်သုးတြိၤ(၄၄)အပှၤလီၤ.အ၀ဲသ့ၣ်ဟးအိၣ်ခိး သမံသမိးတၢ်မၢ်မၢ်လီၤ.အ၀ဲသ့ၣ်ဟးသမံသမိးတၢ်န့ၣ်တမ့ၢ်အလီၢ်လၢအအိၣ်ဂၢၢ်၀ဲဘၣ်.အ၀ဲသ့ၣ်န့ၣ်အိၣ်ခိးသမံသမိးသိလ့ၣ်,ခိးထၢ၀ဲဒၣ်ကျိၣ်စ့ဒ်န့ၣ်.ဖဲမဂီၤပှၤလဲၤမၤအီၤန့ၣ်အ၀ဲသ့ၣ်ကအိၣ်အဂၤ(၁၀)ခိၣ်ဃၢၤလီၤ.တမ့ၢ်လၢအအိၣ်ခိး၀ဲမၢ်မၢ်စ့ၢ်ဘၣ်,ဟးခိး၀ဲလၢအံၤတတီၤလၢန့ၣ်တတီၤ,ဟဲပူၤဘျီပူၤဘျီဒ်န့ၣ်မီၤ”အဂ့ၢ်န့ၣ် စံး၀ဲန့ၣ်လီၤ. တကတီၢ်ဃီဒ်န့ၣ်အသိး ဖဲမဟါလါဒံၣ်စ့ဘၢၣ် ၁၈ သီအနံၤစ့ၢ်ကီး တၢ်ဒုးကဲထီၣ်တအိၣ် ပယီၤသုးခးလီၤ (၁၂၀ မမ)ကျိဖးဒိၣ် ခံဘျီလီၤတဲၥ်ပိၢ်ဖးထီၣ်၀ဲလၢကျူမဲသ၀ီဃၢၤ ကျီးပူၤအဂ့ၢ်န့ၣ် လီၢ်က၀ီၤပှၤဘၣ်မူဘၣ်ဒါတဂၤ စံး၀ဲန့ၣ်လီၤ. “မဟါဟါခီ ၇း၃၇ မံးနံးန့ၣ် ခမရ-၂၀၆ ခးလီၤကျိဖးဒိၣ်လၢကျူမဲသ၀ီဃၢၤတထံၣ်....
ဘံလ့ကီၢ်ဆၣ်ပူၤကၠိတဖၣ်သဂၢၢ်ဘၣ်လံၥ်မိၢ်ပှၢ်တကူတလၢတၢ်ဂ့ၢ်ကီအဂ့ၢ် ကူၣ်သ့ပှၤဘၣ်မူဘၣ်ဒါစံး၀ဲ
လါဒံၣ်စ့ဘၢၣ် ၁၈ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဒူသထူၣ်ကီၢ်ရ့ၣ် ဘံဘ့ကီၢ်ဆၣ်အပူၤ သုးဟံန့ၢ်တၢ်စိတၢ်ကမီၤ၀ံၤလီၢ်ခံ ပှၤကၠိဖိနီၣ်ဂံၢ်ဟဲအါထီၣ်အဖီခိၣ် ကၠိတဖၣ်အါဒၣ်တက့ၢ်သဂၢၢ်ဘၣ်၀ဲလံၥ်မိၢ်ပှၢ်တကူတလၢတၢ်ဂ့ၢ်ကီအဂ့ၢ်န့ၣ် ကီၢ်ဆၣ်ကူၣ်သ့ပှၤဘၣ်မူဘၣ်ဒါဒီး ကၠိသရၣ်တဖၣ် စံး၀ဲအသိး သ့ၣ်ညါဘၣ်န့ၣ်လီၤ. ဘံလ့ကီၢ်ဆၣ်ပူၤ (၂၀၂၁)သုးဟံန့ၢ်တၢ်စိတၢ်ကမီၤ၀ံၤလီၢ်ခံ ခီဖျိထံရူၢ်ကီၢ်သဲးတၢ်အိၣ်သးတဂ့ၤလၢၤဘၣ်အဃိ လၢဒူသ၀ီ တၢ်လီၢ် အါတီၤအပူၤ သုးမီၤစိရိၤပဒိၣ်ကၠိတဖၣ်ဆဲးအိးထီၣ်ကၠိတဘူၣ်,အါဒၣ်တက့ၢ်နုၥ်လီၤအိၣ်ဆၢထၢၣ်က့ၤလၢကညီကူၣ်သ့ဆဲးလၤ ၀ဲၤကျိၤ(KECD) စုတီၤဖီလၥ်ကၠိဟဲအိၣ်ထီၣ်အဖီခိၣ်ဒီးခီဖျိကၠိဖိနီၣ်ဂံၢ်ဟဲအါထီၣ်အဃိ ကၠိတဖၣ်သဂၢၢ်ဘၣ်၀ဲလံၥ်မိၢ်ပှၢ်တကူတလၢ တၢ်ဂ့ၢ်ကီ ဟဲအိၣ်ထီၣ်၀ဲဒ်အံၤလီၤအဂ့ၢ်န့ၣ် လီၢ်က၀ီၤကူၣ်သ့ပှၤဘၣ်မူဘၣ်ဒါစံး၀ဲန့ၣ်လီၤ. ဘၣ်ဃးတၢ်ဂ့ၢ်အံၤန့ၣ် ဃီဖိပျဲၢ်ကၠိခိၣ် သရၣ်စီၤအဲၣ်ဒူဒူ စံး၀ဲလၢ “လၢလံၥ်ညိၣ်သိၣ်တကပၤဒုယဆိမိၣ်ဆၢကတီၢ်ခဲအံၤ အတမ့ၢ်ထဲပကၠိဘၣ်.လၢလီၢ်က၀ီၤအါတီၤန့ၣ်သုးဟံန့ၢ်တၢ်စိတၢ်ကမီၤ၀ံၤလီၢ်ခံန့ၣ်ကၠိဟဲက့ၤနုၥ်လီၤလၢ(KECD)ပူၤအိၣ်အါအဃိပနၢ်ပၢၢ်သ့လီၤ.အ၀ဲသ့ၣ်ကမၤစၢၤ၀ဲလၢလၢပှဲၤပှဲၤကၠိကိးဖျၢၣ်ဒဲးန့ၣ်အမၤ၀ဲတတုၤထီၣ်ထီၣ်ဘးဘၣ်န့ၣ်ပနၢ်ပၢၢ်လီၤ.အဒိ…ပမ့န့ၢ်၀ဲတတီၤန့ၣ်(တစိၣ်)န့ၣ်ပကစၢ်ထုးထီၣ်အါထီၣ်က့ၤဖဲအံၤလီၤ.ပမ့တထုးထီၣ်(ဖြ့း)အါထီၣ်ဘၣ်ခီဒုပ(ဖြ့း)ထီၣ်တနံၤဂီၢ်တနံၤဂီၢ်ဒ်န့ၣ်.တၢ်ဂ့ၢ်ကီဒုပမ့ထံၣ်အီၤလၢတၢ်ဂ့ၢ်ကီန့ၣ်ကမ့ၢ်တၢ်ဂ့ၢ်ကီလီၤဘၣ်ဆၣ်တၢ်ဂ့ၢ်ကီန့ၣ်ပဘှါဆှဲအီၤကဘၣ်သ့မီၤနီၤ.အဃိပဘှါဆှဲအီၤလၢတနံၤဂီၢ် တဂီၢ်ဒ်န့ၣ်လီၤ”အဂ့ၢ်န့ၣ် စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ခီဖျိလၢကၠိဖိနီၣ်ဂံၢ်ဟဲအါထီၣ်ဒီးလံၥ်မိၢ်ပှၢ်တကူတလၢဘၣ်ဟဲအိၣ်ထီၣ်ဒ်အံၤအဖီခိၣ် တၢ်ကီတၢ်ခဲအိၣ်ထီၣ်ကၠိသရၣ်/ပှၤကၠိဖိဂီၢ် တကး ဒံးဘၣ်အမဲၥ်ညါ လၢကကူအါထီၣ်လံၥ်မိၢ်ပှၢ်အဂီၢ်စ့ၢ်ကီးခီဖျိတၢ်အိၣ်သးအကလုၥ်ကလုၥ်အဃိ ထံၣ်ဘၣ်၀ဲတၢ်ကီ တၢ်ခဲ အဂ့ၢ်န့ၣ် ကၠိ၀ဲတီၤထီကၠိ ကၠိခိၣ် သရၣ်စီၤလၢၥ်ဒိၣ် စံးစ့ၢ်ကီး ၀ဲဒ်အံၤန့ၣ်လီၤ. “ကၠိတၢ်သိၣ်လိဒုလဲၤသးဘၣ်လီၢ်ဘၣ်ဆးလီၤဘၣ်ဆၣ်ပထံၣ်ဘၣ်တၢ်ကီတၢ်ခဲတမံၤလၢလံၥ်မိၢ်ပှၢ်တကူတလၢဘၣ်.အ၀ဲသ့ၣ်န့ၣ် လံၥ်မိၢ်ပှၢ်တဘ့ၣ်န့ၣ်ဘၣ်ကွၢ်ဖှိၣ်၀ဲသၢဂၤလွံၢ်ဂၤညါ.ခီဖျိပှၤကၠိဖိနီၣ်ဂံၢ်အါ,လံၥ်မိၢ်ပှၢ်အိၣ်စှၤအဃိဖဲပဆှဲပၠးပှၤကၠဖိလံၥ်အခါန့ၣ်တၢ်ကီတၢ်ခဲအိၣ်.လၢပကကူအါထီၣ်အဂီၢ်န့ၣ်ပစဲးတၢ်ဖိတၢ်လံၤတလၢတပှဲၤစ့ၢ်ဘၣ်.ပကလဲၤကူလၢ၀့ၢ်ပူၤခီဒုပှၤစိၥ်န့ၢ်ပှၤတဘူၣ်စ့ၢ်ဘၣ်ခီဖျိလၢတၢ်ဘံၣ်တၢ်ဘၢတၢ်အိၣ်သးအဃိမီၤနီၤ.မ့၀ံၤခဲအံၤနကလဲၤကူလံၥ်တဘ့ၣ်န့ၣ်လၢစ့ပယီၤ(၇၀၀၀၀)ဘျဲၣ်ညါ.အဃိလၢကၠိဖိမိၢ်ပၢ် အဂီၢ်န့ၣ်တၢ်ကီတၢ်ခဲအိၣ်ဖးဒိၣ်ညါ,ထံရူၢ်ကီၢ်သဲးတၢ်အိၣ်သးခဲအံၤဘျီပှၤဖံးအီၣ်မၤအီၣ်တဘၣ်ဂီၢ်နီတမံၤလၢၤဘၣ်”အဂ့ၢ်န့ၣ် စံး၀ဲန့ၣ်လီၤ. တကးဒံးဘၣ်လၢန့ၣ်အမဲၥ်ညါတီၤဒၢးပူၤခီဖျိလၢလံၥ်မိၢ်ပှၢ်တကူတလၢဘၣ်အဃိ ဒ်သိးပှၤကၠိဖိတဖၣ်ကထံၣ်ဘၣ်၀ဲတၢ်မၤလိ အဂ့ၢ်အကျိၤခဲလၢၥ်အဂီၢ် ကၠိသရၣ်တဖၣ်ဘၣ်သူ၀ဲတၢ်ဆၢကတီၢ်လၢဘၣ်ကွဲးလီၤလံၥ်လၢလၢၢ်သ့ၣ်ပၣ်အပူၤန့ၣ်လီၤ. အဃိလၢတၢ်ဖံးလိမၤဒိးပူၤခါဆူညါလၢပှၤကၠိဖိအဂီၢ်လံၥ်မိၢ်ပှၢ်မ့န့ၢ်အါထီၣ်န့ၣ်တၢ်ဆၢကတီၢ်ကလဲၤတရံးသးဘၣ်လီၢ်ဘၣ်ဆး၀ဲအဂ့ၢ်န့ၣ် ထံဆံၣ်ဘီကၠိခိၣ် သရၣ်စီၤအ့ထိ စံး၀ဲဒၣ်န့ၣ်လီၤ. အ၀ဲစံး၀ဲလၢ “ပမ့ဘၣ်ကွၢ်တနံၣ်ညါအံၤန့ၣ်လၢပှၤဖိသၣ်အဂီၢ်န့ၣ်လိၣ်၀ဲဒၣ်လံၥ်မိၢ်ပှၢ်မီၤနီၤ. ခဲအံၤပမ့ဘၣ်ကွၢ်န့ၣ်လံၥ်န့ၣ်...
မၤနၢၤပျီဟီၣ်ကဝီၤသုးကီၣ်ကးပွဲၣ်(၉၁၃)သုးကလၢၤအပူၤတၢ်ဖီၣ်မူဒံးန့ၢ်ဝဲသုးကီၣ်ကးအပှၤ(၆)ဂၤအကျါပၣ်ဃုၥ်ဝဲဒီးအသုးရ့ၣ်ခိၣ်ဒီးသုးစကီၤတဖၣ်
လါဒံၣ်စဲဘၢၣ် ၁၈သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲးယူၣ်ကညီဒီကလုၥ်စၢဖှိၣ်ကရၢ,သုးက့(၇)မၤနၢၤပျီဟီၣ်ကဝီၤအပူၤသုးကီၣ်ကးပွဲၣ်(၉၁၃)သုးကလၢၤအံၤတၢ်ထီၣ်မၤန့ၢ်ကွံၥ်ဝဲဖဲအပူၤကွံၥ်လါဒံၣ်စဲဘၢၣ်(၁၆)သီအနံၤအပူၤဒီးတၢ်ထီၣ်မၤန့ၢ်ပယီၤသုးကလၢၤအံၤအပူၤ,ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဖီၣ်မူဒံးန့ၢ်ဝဲသုးကီၣ်ကးအပှၤ(၆)ဂၤအကျါပၣ်ဃုၥ်ဝဲဒီးပယီၤအသုးရ့ၣ်ခိၣ်ဒီးအသုးစကီၤပတီၢ်ခံဂၤအဂ့ၢ်,ဟီၣ်ခိၣ်မဲၥ်ဖံးခိၣ်ပှၤဘၣ်မူဘၣ်ဒါတဖၣ်စံးဝဲန့ၣ်လီၤ. ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA)ဒီးကညီဒီကလုၥ်ဂၢၤသးကရၢ(KNDO)ပၥ်ဖှိၣ်သးထီၣ်မၤန့ၢ်ကွံၥ်ဝဲပွဲၣ်(၉၁၃)သုးကီၣ်ကးအသုးကလၢၤအံၤ,ပယီၤသုးအနီၢ်ဂံၢ်နီၢ်ဒွးအိၣ်ဝဲ(၃၀)ဂၤဒီး,တၢ်ဖီၣ်မူဒံးဝဲသုးကီၣ်ကးအပှၤ(၆)ဂၤအကျါပၣ်ဃုၥ်ဝဲ,အခိၣ်ခံဂၤလၢအမ့ၢ်,(၉၁၃)သုးကလၢၤ(၇တမ-၃၃၈)အသုးရ့ၣ်ခိၣ်(ဖၠိသံၣ်ဟၣ်)ဒီးသုးစကီၤပတီၢ်အပှၤတဂၤအဂ့ၢ်,ကညီဒီကလုၥ်ဂၢၤသးကရၢ,( KNDO)သုးရိၢ်မဲခိၣ်ကျၢၢ်,သုးခိၣ်ကျၢၢ်ဖိစီၤရှံလ့ၣ်စံးဝဲဒ်အံၤန့ၣ်လီၤ. အဝဲစံးဝဲလၢ“သုးကီၣ်ကးအံၤအိၣ်ဖဲအသုးကလၢၤ(၉၁၃)အပူၤဒီးဒ်သိးကလဲၤမၤအါထီၣ်အပှၤလၢအီၣ်စ့ၣ်ယၣ်သုးကျိၤအဂီၢ်အကဘီယူၤလဲၤကိးအဝဲသ့ၣ်အိၣ်ဝဲ(၂)ဘျီလံအဃိအိၣ်တ့ၢ်ထဲအဂၤ(၃၀)လီၤ.ပထီၣ်ခးအဝဲသ့ၣ်အဆၢကတီၢ်စံၣ်ကွံၥ်အဃိ,ပဖီၣ်န့ၢ်မူဒံး(၆)ဂၤ.လၢ(၆)ဂၤအကျါပၣ်ဝဲအသုးရ့ၣ်ခိၣ်ဒီးသုးစကီၤစ့ၢ်ကီးန့ၣ်လီၤ.ခဲအံၤမ့ၢ်တၢ်ဆှၢအဝဲသ့ၣ်ဆူလဲၣ်တခီန့ၣ်,ပတသ့ၣ်ညါဒံးဘၣ်”အဂ့ၢ်စံးဝဲဒၣ်န့ၣ်လီၤ. ဒ်သိးတၢ်ထီၣ်ဒုးမၤန့ၢ်က့ၤဝဲသုးကီၣ်ကးပွဲၣ်(၉၁၃)သုးကလၢၤတၢ်လီၢ်အံၤအဂီၢ်,(KNLA)တၢ်ပၢၢ်ဆၢသုးပၥ်ဖှိၣ်တဖၣ်ဘၣ်ဟ့ၣ်လီၤဝဲတၢ်ဆၢကတီၢ်ယံၥ်တ့ၢ်ဝဲ(၃)လါဃၣ်ဃၣ်အိၣ်ဝဲဒီး,ကးတံၥ်ကွံၥ်ဝဲဟီၣ်ခိၣ်အမဲၥ်ဖံးခိၣ်တၢ်ဆှၢထီၣ်တၢ်အီၣ်တၢ်အီအကျဲအမဲၥ်ညါ,သူဒြိခးထီၣ်ဒုးဝဲဒီး,ခးစိဝဲဒီးစနဲၣ်ဖၢၣ်အိၣ်ဝဲဒၣ်အဂ့ၢ်,ပှၤဘၣ်မူဘၣ်ဒါတဖၣ်စံးဝဲဒၣ်န့ၣ်လီၤ. လၢန့ၣ်အမဲၥ်ညါ,တၢ်ထီၣ်မၤန့ၢ်ဝဲသုးကီၣ်ကးသုးကလၢၤဘျီဝဲအံၤအပူၤ,သုးကီၣ်ကးတကပၤဘၣ်ဒိဘၣ်ထံးသံအိၣ်ဝဲအဂၤ(၂၀)ဃၣ်ဃၣ်ဒီးတၢ်ပၢၢ်ဆၢသုးပၥ်ဖှိၣ်တကပၤမၤန့ၢ်ဝဲဒုၣ်ဒါစုကဝဲၤဒ်အမ့ၢ်,(၁၂၀)မမတခိၣ်,(၈၁)မမတခိၣ်,ပွဲၣ်(၅)တခိၣ်,(MA)(၂၉)ခိၣ်အသိး,တၢ်ပၢၢ်ဆၢသုးပၥ်ဖှိၣ်တကပၤဘၣ်ဟ့ၣ်လီၤကွံၥ်ဝဲအသး(၁)ဂၤအိၣ်ဝဲအဂ့ၢ်သ့ၣ်ညါဘၣ်ဒ်ပှၤဘၣ်မူဘၣ်ဒါတဖၣ်စံးဝဲအသိးန့ၣ်လီၤ. တကတီၢ်ဃီ,မၤနၢၤပျီဟီၣ်ကဝီၤအပူၤသုးကီၣ်ကးတဖၣ်အတၢ်လီၢ်တၢ်ကျဲပျီရှဲကွံၥ်ဝဲလံအဖီခိၣ်,ကညီဒီကလုၥ်ဂၢၤသးကရၢ,( KNDO)သုးရိၢ်မဲခိၣ်ကျၢၢ်,သုးခိၣ်ကျၢၢ်ဖိစီၤရှံလ့ၣ်စံးအါထီၣ်စ့ၢ်ကီးဝဲဒ်အံၤန့ၣ်လီၤ. အဝဲစံးဝဲလၢ“ပမၤနၢၤပျီဟီၣ်ကဝီၤအပူၤတကီၢ်ခါခဲအံၤသုးကီၣ်ကးအတၢ်လီၢ်တၢ်ကျဲတဖၣ်ပျီရှဲဝဲလံ,လၢတၢ်န့ၣ်အဃိန့ၣ်ဃိၣ်လိၥ်ကျိဒီးသူမွဲကျိကျဲဒီတဘိအပူၤကမျၢၢ်တဖၣ်ဟးထီၣ်က့ၤလီၤသဘျ့န့ၣ်ဝဲလံ,ဒ်န့ၣ်အသိး,တမ့ၢ်ထဲဟးထီၣ်ဟးလီၤဘၣ်,ပကမျၢၢ်လီၢ်ကဝီၤဖိတဖၣ်သနါက့မၤအီၣ်မၤအီက့ၤဒ်သိးလၢညါန့ၣ်ဝဲလံ,အဃိန့ၣ်,ပအဲၣ်ဒိးတဲနၢ်ဟူက့ၤပှၤကိးဂၤဒဲးလၢကဟဲက့ၤဖံးမၤအီၣ်အီက့ၤန့ၣ်လီၤ”အဂ့ၢ်စံးဝဲဒၣ်န့ၣ်လီၤ. မၤနၢၤပျီဟီၣ်ကဝီၤတၢ်လီၢ်အံၤ,မ့ၢ်တ့ၢ်ဝဲ(KNU)လီၢ်ခၢၣ်သးဝဲၤလီၢ်ခိၣ်သ့ၣ်တၢ်လီၢ်တတီၤဘၣ်ဆၣ်ဖဲအပူၤကွံၥ်(၁၉၉၅)န့ၣ်လါယနူၤအါရံၤအပူၤန့ၣ်သုးကီၣ်ကးတဖၣ်စးထီၣ်နုၥ်လီၤအိၣ်ဆိးဝဲဒၣ်အဂ့ၢ်,သ့ၣ်ညါဘၣ်န့ၣ်လီၤ. ဒီးတကတီၢ်ဃီ,တကီၢ်ခါခဲအံၤ,ခီဖျိတၢ်ဒုးဖျိးကွံၥ်ဝဲသုးကီၣ်ကးပွဲၣ်(၉၁၃)သုးကလၢၤဒီးအတၢ်လီၢ်တၢ်ကျဲလၢအိၣ်ဆီလီၤသးတဖၣ်ခဲလၢၥ်လံအဃိ,မ့ၢ်ဝဲတၢ်ဂံၢ်တၢ်ဘါလၢကမျၢၢ်ထံဖိကီၢ်ဖိဒီးကညီတၢ်ပၢၢ်ဆၢဖီၣ်စုကဝဲၤဖိတဖၣ်အဂီၢ်အသိး,ဒ်သိးဟီၣ်ကဝီၤအဂၤအပူၤသုးကီၣ်ကးအတၢ်လီၢ်တၢ်ကျဲတဖၣ်ကလီၤမၢ်ကွံၥ်ဝဲအဂီၢ်,ကဆဲးမၤဝဲတၢ်ဒုးဖျိးကွံၥ်သုးကီၣ်ကးတၢ်လီၢ်တၢ်ကျဲတဖၣ်အဂ့ၢ်,ကညီတၢ်ပၢၢ်ဆၢခိၣ်နၢ်တဖၣ်စံးဝဲဒၣ်န့ၣ်လီၤ.
ကတၢၢ်တံၥ်သုးကလၢၤမၤအါထီၣ်သုးဂံၢ်ဘါအဃိ လီၢ်က၀ီၤကမျၢၢ်(၁၀၀၀)ဃၣ်ဃၣ်လဲၤဃ့ၢ်ထီၣ်ဆူ(သုးက့ ၁)ဟီၣ်က၀ီၤပူၤ
လါဒံၣ်စ့ဘၢၣ် ၁၈ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢ မုၢ်တြီၢ်ကီၢ်ရ့ၣ်(သုးက့ ၅) ဒွဲၣ်လိကီၢ်ဆၣ်အပူၤ ကတၢၢ်တံၥ်သုးကလၢၤအံၤသုတလီၤ တဂ့ၤအဂီၢ် ခီဖျိပယီၤသုးဒီး(BGF)မၤအါထီၣ်သုးဂံၢ်ဘါအဃိ ဖဲလါဒံၣ်စ့ဘၢၣ် ၁၄ သီအနံၤန့ၣ် ဒူသ၀ီလီၢ်က၀ီၤကမျၢၢ်အဂၤ (၁၀၀၀)ဃၣ်ဃၣ်လၢအိၣ်ဘူးဖဲသုးကလၢၤအခိၣ်အဃၢၤအံၤတဖၣ် ဟဲဃ့ၢ်ထီၣ်၀ဲဆူ(သုးက့ ၁)ဘံလ့ကီၢ်ဆၣ်ပူၤအဂ့ၢ်န့ၣ် (သုးက့ ၁) သုးက့ခိၣ် စံး၀ဲန့ၣ်လီၤ. ဟီၣ်က၀ီၤဖဲန့ၣ်အပူၤစးထီၣ်ဖဲကစၢၢ်သၢဖျၢၣ်(တီၤသိလိ)ပယီၤသုးကလၢၤဒီး(ထံကဆီမဲ)သုးကလၢၤလီၤ၀ံၤလီၢ်ခံန့ၣ် ပယီၤသုးလၢ အိၣ်သုးကလၢၤခံဖျၢၣ်အံၤအပူၤတဖၣ်ဟဲက့ၤပၥ်ဖှိၣ်ထီၣ်သးလၢကတၢၢ်တံၥ်သုးကလၢၤဒီး တကးဒံးဘၣ်စှၤသီ အတီၢ်ပူၤ ကမၤမိၢ်ပယီၤသုးစ့ၢ်ကီးဟဲထီၣ်မၤအါထီၣ်သုးဂံၢ်ဘါလၢကတၢၢ်တံၥ်သုးကလၢၤအိၣ်ထီၣ်အဖီခိၣ် ကမျၢၢ်တဖၣ်ဘၣ်ယိၣ် လၢတၢ်ဒုးကကဲထီၣ်အဃိအ၀ဲသ့ၣ်ဟဲဃ့ၢ်၀ဲဒၣ်ဆူ(သုးက့ ၁)ဟီၣ်က၀ီၤပူၤကဲထီၣ်သးဒ်အံၤလီၤအဂ့ၢ်န့ၣ် သုးက့ခိၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးဘၣ်ခ့ၣ်အဲးစံၣ်-ကညီတၢ်ကစီၣ်ဒ်အံၤန့ၣ်လီၤ. “ဖဲပှၤထီၣ်ထံကဆီမဲဒီးတီၤသိလိပယီၤသုးကလၢၤန့ၢ်၀ံၤဘျီန့ၣ်ပှၤဂုၤလီၤသးလၢကတၢၢ်တံၥ်ဘျီပှၤကမျၢၢ်န့ၣ်ပျံၤတၢ်ဟဲဃီၤစံၣ်အိၣ်လၢ(သုးက့ ၁)ဘံလ့ကီၢ်ဆၣ်ပူၤမီၤနီၤ. အ၀ဲသ့ၣ်ဟဲစံၣ်စးထီၣ်လၢလါဒံၣ်စ့ဘၢၣ် ၁၄ သီအနံၤန့ၣ်လံ. ပှၤလၢအဟဲစံၣ်ထီၣ် တဖၣ်န့ၣ်မ့ၢ်၀ဲ ပှၤကတၢၢ်တံၥ်, ဘီကၠိၣ်လဲၤ,ဖါလိ, တီသူကျါ,နိၣ်ဖီထံ, ထံသဲလ့,လ့ဖိထၣ်သ၀ီဖိတဖၣ်လီၤ”အဂ့ၢ်န့ၣ် စံး၀ဲန့ၣ်လီၤ. (သုးက့ ၅)ပှၤကမျၢၢ်လၢအဟဲဃ့ၢ်အိၣ်ဖဲဘံလ့ကီၢ်ဆၣ်အပူၤတဖၣ်အံၤလီၢ်က၀ီၤပှၤဘၣ်မူဘၣ်ဒါဆီလီၤပၥ်လီၤရဲၣ်ကျဲၤန့ၢ်၀ဲ တၢ်အီၣ်တၢ်အီအိၣ်ဘၣ်ဆၣ်လိၣ်ဘၣ်အါထီၣ်၀ဲကသံၣ်ကသီ,ဘုသး,ယၣ်လုး,တၢ်အီၣ်တၢ်အီသ့ၣ်တဖၣ်လၢအ၀ဲသ့ၣ်အဂီၢ် အဂ့ၢ်န့ၣ် သုးခိၣ်ကျၢၢ်ဖိ စီၤစိမၠ့ၣ်ထွ့ စံးအါထီၣ်၀ဲန့ၣ်လီၤ. ပယီၤသုးကလၢၤလၢအိၣ်ဖၣ်ပူၣ်-ကမၤမိၢ်ကျဲဒီတကျိၤန့ၣ် တနံၣ်အံၤအတီၢ်ပူၤ ဟီၣ်က၀ီၤကညီဒီကလုၥ်တၢ်ထူၣ်ဖျဲးသုးမုၢ်ဒိၣ် (KNLA)သုးပၥ်ဖှိၣ် ထီၣ်မၤ၀ဲသုးကလၢၤတဖျၢၣ်၀ံၤတဖျၢၣ်ကဲထီၣ်သးဒီး ဒ်န့ၣ်အသိးဖဲအပူၤကွံၥ်လါဒံၣ်စ့ဘၢၣ် ၁၁ သီအနံၤ...
လၢၢ်ဒိၣ်ကီၢ်ဆၣ်ပှၤလီၢ်အိၣ်ကမှံဖိသံ(၂),ဘၣ်ဒိဝဲ(၂)ဂၤခီဖျိပယီၤသုးခးကျိဖးဒိၣ်
လါဒံၣ်စဲဘၢၣ် ၁၈ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ်-ကီၢ်သူလ့ၤတၢ်ပၢ ချၢၣ်လွံၢ်ထူၣ်ကီၢ်ရ့ၣ်,လၢၢ်ဒိၣ်ကီၢ်ဆၣ်ဟီၣ်ကဝီၤ,ဖဲမဟါလါဒံၣ်စဲဘၢၣ်(၁၇)သီအနံၤ န့ၣ်ပှၤလီၢ်အိၣ်ကမှံဖိလၢအဃ့ၢ်အိၣ်ကဒုအသးသ့ၣ်တဖၣ်ခီဖျိပယီၤသုးခးလီၤကျိဖးဒိၣ်အဃိဘၣ်သံဝဲ(၂)ဂၤ,ဒီးဘၣ်ဒိ(၂)ဂၤအဂ့ၢ်န့ၣ်လၢၢ်ဒိၣ်ကီၢ်ဆၣ်အပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပယီၤသုးကီၣ်ကးလၢအမ့ၢ်ဝဲ(နၣ်သၤကွံ)ပယီၤသုးကလၢၤအံၤဖဲလါဒံၣ်စဲဘၢၣ်(၁၇)သီအနံၤ,ဂီၤခီအနၣ်ရံၣ်(၁၀)ဘျဲၣ်အဆၢကတီၢ်န့ၣ်ခးလီၤဝဲဒၣ်ကျိဖးဒိၣ်ဆူ(သူကဘံ)သဝီပူၤအဃိပှၤလီၢ်အိၣ်ကမှံဖိလၢအဟဲဃ့ၢ်အိၣ်ကဒုအသးဖဲ(သူကဘံ)သဝီအပူၤတဖၣ်ဘၣ်သံကွံၥ်ဝဲ(၂)ဂၤ,ဒီးဘၣ်ဒိစ့ၢ်ကီးဝဲ(၂)ဂၤအဂ့ၢ်န့ၣ်သ့ၣ်ညါဘၣ်လၢလၢၢ်ဒိၣ်ကီၢ်ဆၣ်ပှၤဘၣ်မူဘၣ်ဒါအိၣ်န့ၣ်လီၤ. လၢၢ်ဒိၣ်ကီၢ်ဆၣ်အပှၤကတိၤတၢ်ပၢပဒိၣ်စီၤဝါမုၢ်စံးဝဲလၢ "ဒုၣ်ဒါလၢအိၣ်(နၣ်သၤကွ့)သ့ၣ်တဖၣ်န့ၣ်ခးစိလီၤဝဲကျိဖးဒိၣ်ဆူ(သူကဘံ) သဝီပူၤလီၤ. ခီဖျိလၢတၢ်ခးလီၤကျိဖးဒိၣ်အဃိပှၤလၢအဘၣ်ဒိဘၣ်ထံးသ့ၣ်တဖၣ်န့ၣ်မ့ၢ်ဝဲပှၤလီၢ်အိၣ်ကမှံဖိမီၤနီၤ. ပှၤလီၢ်အိၣ်ကမှံဖိ သ့ၣ်တဖၣ်အံၤတၢ်အံးထွဲကွၢ်ထွဲအဝဲသ့ၣ်ဖဲ(သူကဘံ)သဝီပူၤလီၤ. အဝဲသ့ၣ်အိၣ်ဆိးဖဲန့ၣ်န့ၣ်ဒုၣ်ဒါခးလီၤကျိဖးဒိၣ်အဃိလီၤတဲၥ် ဘၣ်ဖဲအဝဲသ့ၣ်အိၣ်ဆိးဝဲအလီၢ်ဒီးဘၣ်သံဝဲ(၂)ဂၤ,ဘၣ်ဒိဝဲ(၂)ဂၤလီၤ. " အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. လၢန့ၣ်အမဲၥ်ညါကမျၢၢ်ပှၤလီၢ်ကအိၣ်ကမှံဖိလၢအဘၣ်သံ,ဘၣ်ဒိဘၣ်ထံးသ့ၣ်တဖၣ်န့ၣ်မ့ၢ်ဝဲပှၤသးပှၢ်လၢသးနံၣ်အိၣ်(၅၀)နံၣ်ဆူအဖီခိၣ်သ့ၣ်တဖၣ်န့ၣ်လီၤ. ပယီၤသုးအကျိဖးဒိၣ်အဃိပှၤလီၢ်အိၣ်ကမှံဖိလၢအဘၣ်သံဝဲန့ၣ်မ့ၢ် စီၤဘိမၠး-သးနံၣ်(၉၂)နံၣ်, နီၢ်ထိလွံၢ်ထူ-သးနံၣ်(၅၀)နံၣ်, ဒီးဘၣ်ဒိဝဲ ယါအဲၣ်စ့-သးနံၣ်(၅၃)နံၣ်, နီၢ်ပှဲၤကၠံ-သးနံၣ်(၇၃)နံၣ် သ့ၣ်တဖၣ်အံၤအဂ့ၢ်န့ၣ်လၢၢ်ဒိၣ်ကီၣ်ဆၣ်ပှၤဘၣ် မူဘၣ်ဒါစံးစ့ၢ်ကီးဝဲန့ၣ်လီၤ. ဒ်န့ၣ်အသိး(သူကဘံ)သဝီအံၤအပူၤကွံၥ်ဖဲလါနိၣ်ဝ့ဘၢၣ်(၂၆)သီအနံၤန့ၣ်ပယီၤသုးကီၣ်ကးအဒြိဟဲတ့ၢ်လီၤမ့ၣ်ပိၢ်အဃိ(သူကဘံ)သဝီတၢ်ဆါဟံၣ်တဖျၢၣ်ဘၣ်ဟးဂီၤကွံၥ်ဝဲဒၣ်ဒီးမ့မ့ၢ်ပှၤဆါလၢအိၣ်တၢ်ဆါဟံၣ်အပူၤသ့ၣ်တဖၣ်န့ၣ်တၢ်ဘၣ်ဒိဘၣ်ထံးတအိၣ်ဘၣ်အဂ့ၢ်လီၢ်ကဝီၤပှၤဘၣ်မူဘၣ်ဒါစံးဘၣ်ခ့ၣ်အဲးစံၣ်-ကညီတၢ်ကစီၣ်ဖဲတနံၤအံၤလါနိၣ်ဝ့ဘၢၣ်(၂၆)သီအနံၤန့ၣ်လီၤ.
တၢ်ထီၣ်မၤန့ၢ်မၤနၢၤပျီဟီၣ်ကဝီၤအပူၤသုးကီၣ်ကး(ခမရ-၉၁၃)သုးကလၢၤအဂ့ၢ်,(KNU)ပၥ်ဂၢၢ်ပၥ်ကျၢၤ
လါဒံၣ်စဲဘၢၣ်(၁၇)သီ, ၂၀၂၄နံၣ်, ခ့ၣ်အဲးစံၣ်, ခ့ၣ်အဲၣ်ယူၣ်ကညီဒီကလုၥ်စၢဖှိၣ်ကရၢ,သုးက့(၇)တၢ်ပၢ,မၤနၢၤပျီဟီၣ်ကဝီၤသုးကီၣ်ကးခီၣ်ချ့သုးရ့ၣ်(ခမရ-၉၁၃)ပယီၤသုးကလၢၤအံၤ,ကညီဒီကလုၥ်တၢ်ထူၣ်ဖျဲးသုးမုၢ်ဒိၣ်(KNLA),ကညီဒီကလုၥ်ဂၢၤသးကရၢ(KNDO),ဒီးတၢ်ပၢၢ်ဆၢသုးပၥ်ဖှိၣ်တဖၣ်ထီၣ်မၤန့ၢ်ကွံၥ်ဝဲဖဲမဟါလါဒံၣ်စဲဘၢၣ်(၁၆)သီအနံၤအဂ့ၢ်,(KNU)ပှၤကတိၤတၢ်ပၢပဒိၣ်စီၤကျၢၤစ့ပၥ်ဂၢၢ်ပၥ်ကျၢၤစံးဝဲဒၣ်န့ၣ်လီၤ. သုးကီၣ်ကး,သုးကလၢၤအံၤကလီၤကွံၥ်ဝဲအဂီၢ်,တၢ်ဆၢကတီၢ်ယံၥ်ဝဲလၢ(၆)လါဘျဲၣ်ဃၣ်ဃၣ်ဒီးခီဖျိတၢ်တူၢ်ခီၣ်ပၥ်သးအိၣ်ဝဲလၢဟီၣ်ကဝီၤအပူၤသုးကီၣ်ကးသုတဘၣ်အိၣ်လၢၤတဂ့ၤအဖီခိၣ်,တၢ်မၤန့ၢ်ကွံၥ်ဝဲသုးကီၣ်ကးခီၣ်ချ့သုးရ့ၣ်(ခမရ၉၁၃)လီၤအဂ့ၢ်,ပဒိၣ်စီၤကျၢၤစ့စံးဝဲဒ်အံၤန့ၣ်လီၤ. အဝဲစံးဝဲလၢ“တကီၢ်ခါခဲအံၤပၥ်ဂၢၢ်ပၥ်ကျၢၤလၢတၢ်ထီၣ်န့ၢ်ကွံၥ်ဝဲန့ၢ်လံ,တၢ်ဂ့ၢ်တၢ်ကျိၤပတဒိးန့ၢ်လီၤတံၢ်ခဲလၢၥ်ဒံးဘၣ်သနါက့ပတဲလၢတၢ်အိၣ်သးဂ့ၤဝဲသ့လီၤ.တၢ်ထီၣ်မၤန့ၢ်ကွံၥ်ဝဲသုးကီၣ်ကးအသုးကလၢၤအံၤတခီန့ၣ်,မ့ၢ်ဒၣ်ခီဖျိလၢတၢ်သူၣ်ခီၣ်ပၥ်သးအိၣ်ဝဲလၢတၢ်ကမၤပျီရှဲကွံၥ်သုးကီၣ်ကးလၢပဟီၣ်ကဝီၤအပူၤအဖီခိၣ်အဃိလီၤန့ၣ်ပတဲသ့ဝဲလီၤ.”အဂ့ၢ်စံးဝဲဒၣ်န့ၣ်လီၤ. ဒီးလၢတၢ်ထီၣ်မၤန့ၢ်ကွံၥ်ဝဲသုးကီၣ်ကးအသုးကလၢၤအံၤအဖီခိၣ်န့ၣ်,စိၤရှၢၣ်မံးဒံးယၢၣ်တၢ်ကစီၣ်တနီၤအပူၤပၥ်ဖျါဝဲလၢ,သုးကီၣ်ကးတကပၤဘၣ်ဒိဘၣ်ထံးဒီးသံဝဲဒၣ်ခဲလၢၥ်ဃၣ်ဃၣ်အိၣ်ဝဲဘၣ်ဆၣ်,ဘၣ်ဃးသုးကီၣ်ကးအတၢ်ဘၣ်ဒိဘၣ်ထံးသံခဲလၢၥ်အဂ့ၢ်အကျိၤအံၤန့ၣ်,တၢ်ပၥ်ဂၢၢ်ပၥ်ကျၢၤမၤလီၤတံၢ်တန့ၢ်ဒံးဝဲဘၣ်အဂ့ၢ်,ပဒိၣ်စီၤကျၢၤစ့စံးအါထီၣ်ဝဲဒၣ်န့ၣ်လီၤ. လၢန့ၣ်အမဲၥ်ညါ,တၢ်ကထီၣ်မၤန့ၢ်ကွံၥ်ဝဲသုးကီၣ်ကး(ခမရ၉၁၃)အသုးကလၢၤအံၤအဂီၢ်,ထဲဒၣ်ကဘီယူၤကလံၤကျိၤတခါအမဲၥ်ညါ,တၢ်ကးတံၥ်ဝဲသုးကီၣ်ကးအတၢ်ဆှၢထီၣ်တၢ်အီၣ်တၢ်အီအကျဲအိၣ်ဝဲဒီး(KNLA)တၢ်ပၢၢ်ဆၢသုးပၥ်ဖှိၣ်တကပၤ,သူဒြိမၤတၢ်ခးစဲးပြဲးအိၣ်ဝဲအဃိ,သုးကီၣ်ကးတကပၤတၢ်ဘၣ်ဒိဘၣ်ထံးအိၣ်အါဝဲအဂ့ၢ်,သ့ၣ်ညါဘၣ်လၢ(ခ့ၣ်အဲးစံၣ်)ဂံၢ်ခီၣ်ထံးပှၤဟ့ၣ်တၢ်ကစီၣ်ဖိတဖၣ်အအိၣ်န့ၣ်လီၤ. တကတီၢ်ဃီ,တချူးသုးကီၣ်ကးအသုးကလၢၤအံၤလီၤကွံၥ်အဆၢကတီၢ်,ဖဲအပူၤကွံၥ်လါဒံၣ်စဲဘၢၣ်(၁၄)သီအနံၤအပူၤန့ၣ်,သုးကီၣ်ကးအံၤဆှၢထီၣ်ဝဲတၢ်အီၣ်တၢ်အီလၢကဘီယူၤကျဲအိၣ်ဝဲအသိး,ခးလီၤဝဲတၢ်ဆူ(KNLA)တၢ်ပၢၢ်ဆၢသုးပၥ်ဖှိၣ်တဖၣ်အိၣ်ဆိးတၢ်လီၢ်အပူၤအိၣ်ဝဲအဂ့ၢ်,သ့ၣ်ညါဘၣ်န့ၣ်လီၤ. ဒ်န့ၣ်အသိး,မၤနၢၤပျီဟီၣ်ကဝီၤအပူၤအံၤသုးကီၣ်ကးအသုးကလၢၤဒ်အမ့ၢ်(ခမရ-၉၁၃),နိၣ်ဒ့,ဖုလီ,ကဆီဝါလ့,ပွဲၣ်၅၆၀,ကၢၢ်ဂီၤစိ,ထံသ့ၣ်ဃံၣ်,ထံထီထၣ်ဃုၥ်ဒီးထူပီၢ်သ့ၣ်တဖၣ်အံၤအိၣ်ဝဲဘၣ်ဆၣ်,အပူၤကွံၥ်လါနိၣ်ဝ့ဘၢၣ်(၁)သီအနံၤအပူၤကဆီဝါလ့ပယီၤသုးကလၢၤအပူၤပယီၤသုးတဖၣ်အံၤ,ဟးထီၣ်ကွံၥ်ဝဲလၢအသုးကလၢၤအပူၤဒီးလဲၤပၥ်ဖှိၣ်က့ၤဝဲအသးဆူ,(၉၁၃)အပူၤဒီးအဂံၢ်ဘါအိၣ်ဝဲလၢ(၁၀၀)ဂၤဃၣ်ဃၣ်အိၣ်ဝဲအလီၢ်ခံ,(ခမရ၉၁၃)အံၤတၢ်ထီၣ်မၤန့ၢ်က့ၤဝဲဒၣ်န့ၣ်လီၤ.
တနီသရံၣ်ကီၢ်ဆၣ် ပၠံၣ်ဒီၣ်စူၣ်ကျဲမုၢ်ဖးဒိၣ် ပယီၤသုးဒီၣ်တဲၥ်ကွံၥ်တၢ်အီၣ်တၢ်အီကျဲ
လါဒံၣ်စဲဘၢၣ် ၁၇ သီ, ၂၀၂၄ နံၣ်, ခ့ၣ်အဲးစံၣ် ခ့ၣ်အဲၣ်ယူၣ် ဘျံးဒဝဲၢ်ကီၢ်ရ့ၣ်,တနီသရံၣ်ကီၢ်ဆၣ်အပူၤ ကျဲမုၢ်တဘိလၢအမ့ၢ်ဝဲ(ပၠံၣ်ဒီၣ်စူၣ်)ကျဲမုၢ်ဖးဒိၣ်အံၤ ဖဲတလါအံၤ လါဒံၣ်စဲဘၢၣ်(၁၅)သီအနံၤန့ၣ် ပယီၤသုးဒီၣ်တဲၥ်ကွံၥ်ဝဲတၢ်အီၣ်တၢ်အီၣ်ကျဲအဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါစံးဘၣ်ဝဲခ့ၣ်အဲးစံၣ်-ကညီတၢ်ကစီၣ်ဖဲမဟါ(၁၆)အနံၤန့ၣ်လီၤ. ပယီၤသုးအံၤလၢကဟဲထီၣ်မၤန့ၢ်က့ၤအသုးကလၢၤဒီးကျဲမုၢ်ကျဲဘိလၢအဘၣ်တၢ်စူးကါအီၤလၢမုၢ်ကျိၤဝဲၤကွၥ်သ့ၣ်တဖၣ်အံၤ အဂီၢ်န့ၣ် စးထီၣ်ဒီၣ်တဲၥ်ကွံၥ်ဝဲတၢ်အီၣ်တၢ်အီကျဲ, တပျဲပှၤစိၥ်တီဆှၢဝဲတၢ်အီၣ်တၢ်အီ တကးဒံးဘၣ်စဲးဖီကဟၣ်အသိစ့ၢ်ကီး တပျဲစိၥ်ဝဲလၢၤဘၣ်အဂ့ၢ်န့ၣ် ကီၢ်ဆၣ်ပှၤဘၣ်မူဘၣ်ဒါ ပဒိၣ်စီၤထံဝါ စံးဝဲဒၣ်ဒ်အံၤန့ၣ်လီၤ. "သိလ့ၣ်တီပနံၥ်လၢအိၣ်ဘျံးဝ့ၢ်ဒီးဟဲထီၣ်ဝဲဆူခိခိၣ်ဒူသဝီန့ၣ်တၢ်တပျဲဟဲထီၣ်လၢၤဘၣ်. အခဲအံၤန့ၣ်ပှၤစိၥ်တၢ်အီၣ်တၢ်အီမ့ၢ်ဂ့ၤ, ဟု သးမ့ၢ်ဂ့ၤ, တၢ်အီၣ်ဃ့ၢ်မ့ၢ်ဂ့ၤန့ၣ်တၢ်ပံးကွံၥ်ဝဲလၢၤလံ. ပယီၤသုးကီၣ်ကးဒီၣ်တဲၥ်ကွံၥ်ဝဲဒၣ်ကျဲအံၤန့ၣ်အဝဲသ့ၣ်တၢ်ကူၣ်အဒိၣ်ကတၢၢ် န့ၣ်အဝဲသ့ၣ်ကထီၣ်ဝဲဒၣ်တနီသရံၣ်ကီၢ်ဆၣ်လၢအမ့ၢ်သုးရ့ၣ်(၁၁)ဟီၣ်ကဝီၤမီၤနီၤ.အဝဲသ့ၣ်အိၣ်ဒီးတၢ်ရဲၣ်တၢ်ကျဲၤလၢကထီၣ်ဝဲတနီသရံၣ်ကီၢ်ဆၣ်ထံဆၢကီၢ်ဆၢဒီး(မိတီၤ)ကျဲမုၢ်လီၤ. " အဂ့ၢ်န့ၣ်စံးဘၣ်ခ့ၣ်အဲးစံၣ်-ကညီတၢ်ကစီၣ်န့ၣ်လီၤ. ပၠံၣ်ဒီၣ်စူၣ် ကျဲမုၢ်ဖးဒိၣ်အဖီခိၣ်အံၤအပူၤကွံၥ်ပယီၤသုးအိၣ်ခိးသမံသမိးတၢ်အိၣ်ဝဲဘၣ်ဆၣ် စးထီၣ်ဖဲတလါအံၤ လါဒံၣ်စဲဘၢၣ်ထီၣ်(၁၅)သီအနံၤန့ၣ် ပယီၤသုးအံၤ သိလ့ၣ်ဖးဒိၣ်မ့ၢ်ဂ့ၤ,သိလ့ၣ်ဖိမ့ၢ်ဂ့ၤ မ့ၢ်ဝံစိၥ်တီဆှၢဟုသး, တၢ်အီၣ်ဃ့, စဲးဖီကဟၣ်အသိတဖၣ် တပျဲစိၥ်ထီၣ်စိၥ်လီၤဝဲဒၣ်လၢၤဘၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. ဒ်န့ၣ်အသိး သိလ့ၣ်လၢအတီဆှၢတၢ်ဖိတၢ်လံၤတၢ်အီၣ်တၢ်အီလၢကလဲၤလီၤဒူသဝီပူၤသ့ၣ်တဖၣ်စ့ၢ်ကီး ပယီၤသုးအံၤ အိၣ်ခိးသမံသမိးဝဲဒီးလ့တက့ၤတပျဲလဲၤဝဲဒၣ်ဘၣ် မ့မ့ၢ်တခီပျဲက့ၤလီၤကဒါက့ၤဝဲဆူဘျံးဝ့ၢ်ဒီးဘၣ်ဆၣ်မ့မ့ၢ်လၢသိလ့ၣ် တီပှၤလဲၤတၢ်က့ၤတၢ်ဖိသ့ၣ်တဖၣ်န့ၣ်တၢ်ပျဲလ့ၢ်ထီၣ်လ့ၢ်လိၤဝဲဒၣ်အဂ့ၢ်န့ၣ် သ့ၣ်ညါဘၣ်န့ၣ်လီၤ. လၢတၢ်န့ၣ်အဃိတၢ်မ့ၢ်တပျဲသိလ့ၣ်တီတၢ်အီၣ်တၢ်အီသ့ၣ်တဖၣ်ဘၣ်န့ၣ် ခါဆူမဲၥ်ညါပှၤကမျၢၢ်သ့ၣ်တဖၣ် ကထံၣ်ဘၣ်ဝဲ တၢ်အီၣ်တၢ်အီ,ကသံၣ်ကသီ, ဒီး စဲးဖီကဟၣ်သိတၢ်ဂ့ၢ်ကီသ့ၣ်တဖၣ်အကလုၥ်ကလုၥ်သ့ဝဲအဂ့ၢ်န့ၣ် တနီသရံၣ်ကီၢ်ဆၣ် အပှၤဘၣ်မူဘၣ်ဒါစံးစ့ၢ်ကီးဝဲဒၣ်န့ၣ်လီၤ. "အဝဲသ့ၣ်မ့ၢ်မၤဝဲဒ်သိးအံၤန့ၣ်ပှၤလီၢ်ကဝီၤဖိသ့ၣ်တဖၣ်ကပှ့ၤအီၣ်ဝဲဟံၣ်ပူၤဃီပူၤတၢ်အီၣ်တၢ်အီဒီးဟုသးအဂီၢ်န့ၣ်ကကဲထီၣ်ဝဲတၢ်ကီတၢ်ခဲလီၤ. ဒီးကသံၣ်ကသီလၢတၢ်ကူဆါယါဘျါဝဲတၢ်ဆူးတၢ်ဆါအဂီၢ်စ့ၢ်ကီးကကီခဲဝဲလီၤ. မ့ၢ်ဝံၤန့ၣ်စဲးဖီကဟၣ်သိနါက့န့ၣ်တၢ်...