Home တၢ်ကစီၣ် လ့က့ၣ်ကီာ်၀့ၢ်သီအပူၤ ခိ၀ံၣ်တၢ်ဘၣ်ကူဘၣ်ဂာ်ဟဲအါထီၣ်ဒီး ၦၤသံအိၣ်တုၤလၢ ၄ ဂၤလံ

လ့က့ၣ်ကီာ်၀့ၢ်သီအပူၤ ခိ၀ံၣ်တၢ်ဘၣ်ကူဘၣ်ဂာ်ဟဲအါထီၣ်ဒီး ၦၤသံအိၣ်တုၤလၢ ၄ ဂၤလံ

1538
0

လါယူၤလံ ၂၆ သီႇ ၂၀၂၁ နံၣ်ႇ ခ့ၣ်အဲးစံၣ်

ကညီကီၢ်စဲၣ် မၠၣ်၀တံၣ်၀့ၢ်ကလံၤထံးတကပၤ လ့က့ၣ်ကီာ်၀့ၢ်သီအပူၤ ခိ၀ံၣ်တၢ်ဆါဘၣ်ကူဘၣ်ဂာ်ဟဲအါထီၣ်အမဲာ်ညါ တုၤလၢတနံၤအံၤ(လါယူၤလံ ၂၆)သီအနံၤ ၦၤသံအိၣ်ထီၣ်တုၤလၢ(၄)ဂၤလံအဂ့ၢ်န့ၣ် သ့ၣ်ညါဘၣ်လၢ၀့ၢ်သီၦၤဘၣ်မူဘၣ်ဒါအအိၣ်န့ၣ်လီၤႉ

ဖဲလ့က့ၣ်ကီာ်၀့ၢ်သီတၢ်-တီဆၢဒီသဒၢခိ၀ံၣ်တၢ်ဆါအလီၢ်န့ၣ် တကီၢ်ခါခဲအံၤ ၦၤဘၣ်ကူဘၣ်ဂာ် လၢခိ၀ံၣ်တၢ်ဆါအိၣ်၀ဲ(၈၀)ဘျဲၣ်ဒီး သံ၀ဲ(၄)ဂၤလံအဂ့ၢ်န့ၣ် လ့က့ၣ်ကီာ်၀့ၢ်သီ ပၢဆှၢရဲၣ်ကျဲၤကမံးတံာ်ၦၤဘၣ်မူဘၣ်ဒါ စီၤထ့မၠ့ၣ်အီၤ စံးဘၣ်ခ့ၣ်အဲးစံၣ်-ကညီတၢ်ကစီၣ်၀ဲၤလီၢ်ခိၣ်သ့ၣ်န့ၣ်လီၤႉ

ၦၤသံလၢခိ၀ံၣ်တၢ်ဆါအဃိတဖၣ်အကျါ မ့ၢ်ၦၤသ့ၣ်တဖၣ်လၢအအိၣ်ပာ်ဒီးတၢ်ဆါအသိး ၦၤသံသ့ၣ်တဖၣ်အံၤမ့ၢ်၀ဲ ၦၤလၢအိၣ်လ့က့ၣ်ကီာ်၀့ၢ်သီပူၤ ၁ ဂၤႇ ၦၤအိၣ်ဟဲက့ၤလၢမၠၣ်၀တံၣ်၀့ၢ် ၂ ဂၤဒီး ၦၤဟဲအိၣ်လၢဖလူလီၢ်က၀ီၤ ၁ ဂၤ အဂ့ၢ်န့ၣ် သ့ၣ်ညါဘၣ်လၢၦၤဘၣ်မူဘၣ်ဒါအအိၣ်န့ၣ်လီၤႉ

ခိ၀ံၣ်တၢ်ဘၣ်ကူဘၣ်ဂာ်ရၤလီၤသးအါထီၣ်အဖီခိၣ် ခီဖျိတၢ်လီၢ်တကူတလၢဘၣ်အဃိ တကီၢ်ခါခဲအံၤ ၦၤဆါလၢတၢ်တယး၀ဲလၢအအိၣ်ဒီးခိ၀ံၣ်တၢ်ဆါတဖၣ်န့ၣ် တၢ်တပာ်အ၀ဲသ့ၣ်လၢ(Quarantine)လၢၤဘၣ်ဒီး တၢ်အိၣ်ခိးကွၢ်ပာ်အ၀ဲသ့ၣ်လၢဟံၣ်ပူၤလီၤအဂ့ၢ်န့ၣ် စီၤထ့မၠ့ၣ်အီၤ စံးအါထီၣ်၀ဲန့ၣ်လီၤႉ

အ၀ဲစံး၀ဲလၢ“တၢ်လီၢ်ဒုတလၢဘၣ် တၢ်လီၢ်လၢၦၤတ့ထီၣ်လၢအသီတဖၣ်နါက့ၦဲၤ၀ဲလီၤႉ ၦၤလၢ အိၣ်ဆူၣ်ထီၣ်ဒီးက့ၤန့ၣ်အိၣ်၀ဲစှၤဒီး ၦၤဆါလၢဘၣ်တၢ်ဆါန့ၣ်ဟဲအါထီၣ်မီၤနီၤႉ တၢ်အဃိန့ၣ် ၦၤလၢတၢ်ဆါ အပနီၣ်ဖျါထီၣ်တဖၣ်န့ၣ် ပမၢအအိၣ်လၢအဟံၣ်ဒီးပအိၣ်ခိးကွၢ်၀ဲတနွံလီၤႉ ခီဖျိခိ၀ံၣ်တၢ်ဆါအဃိ တနီၤနီၤတၢ်မၤလီၢ်ပံးလၢာ်ဒီး တၢ်ဂ့ၢ်ကီဟဲအိၣ်ထီၣ်ဒီး၀ဲတခါလၢတၢ်တခါန့ၣ်မီၤနီၤႉ လၢဒူဖိသ၀ီဖိကဘၣ်အီၣ်ဘၣ်အီအဂီၢ်တၢ်သ့ၣ်တဖၣ်အံၤနါက့ကဲထီၣ်တၢ်ဂ့ၢ်ကီတမံၤဒီးစ့ၢ်လီၤ”အဂ့ၢ်န့ၣ် စံး၀ဲန့ၣ်လီၤႉ

လ့က့ၣ်ကီာ်၀့ၢ်သီအပူၤ ဖဲအပူၤကွံာ်(လါယူၤ ၂၂)သီအနံၤ ခီဖျိတၢ်စးထီၣ်ထံၣ်န့ၢ်ၦၤဘၣ်ခိ၀ံၣ်တၢ်ဆါအဃိ တီၤထီကၠိလၢတၢ်အိးထီၣ်၀ဲလၢ၀့ၢ်ပူၤအံၤစ့ၢ်ကီး စးထီၣ်ဖဲလါယူၤ ၂၃ သီအနံၤန့ၣ် ဘၣ်တၢ်ကးတံၢ်ဃာ်အီၤန့ၣ်လီၤႉ

လ့ၣ်က့ၣ်ကီာ်၀့ၢ်သီလၢဟံၣ်ခိၣ်အိၣ်၀ဲ(၇၀၀)ဖျၢၣ်ဒီး ၦၤနီၣ်ဂံၢ်အိၣ်၀ဲ(၃ႇ၀၀၀)ဃၣ်ဃၣ်အံၤန့ၣ် တကီၢ်ခါဆၢကတီၢ်ခဲအံၤ ၦၤဆါလၢအဘၣ်ခိ၀ံၣ်အိၣ်၀ဲ(၈၂)ဂၤဒီး ၦၤသံအိၣ်၀ဲ(၄)ဂၤလံန့ၣ်လီၤႉ တကးဘၣ်အမဲာ်ညါ မၠၣ်၀တံၣ်၀့ၢ်လၢအအိၣ်ဘူးဒီးလ့က့ၣ်ကီာ်၀့ၢ်သီအံၤစ့ၢ်ကီး ခိ၀ံၣ်တၢ်ဆါဘၣ်ကူဘၣ်ဂာ်ဟဲအါထီၣ်ဒီး တုၤလၢတလါအံၤလါယူၤလံ ၂၆ သီအနံၤ ၦၤသံလၢခိ၀ံၣ်တၢ်ဆါအဃိအိၣ်၀ဲ(၁၀၀)ဘျဲၣ်လံအမဲာ်ညါ ခီဖျိခိ၀ံၣ်တၢ်ဆါဘၣ်ကူဘၣ်ဂာ်ဟဲအါထီၣ်အဃိ တၢ်ဘိးဘၣ်ရၤလီၤနဲၣ်လီၤတၢ်ကလုၢ်လၢ(stay at home)တဘၣ်ဟးထီၣ်လၢဟံၣ်ချၢဘၣ်စ့ၢ်ကီးန့ၣ်လီၤႉ