Home တၢ်ကစီၣ် ကီးတရံးကီၢ်ဆၣ်ပူၤၦၤဃ့ၢ်မှံဟးဖျိး(၂၀၀၀)ဘျဲၣ်အံၤ လီၢ်က၀ီၤဖိကဒဲကဒဲပာ်ဖှိၣ်မၤစၢၤသကိး၀ဲ

ကီးတရံးကီၢ်ဆၣ်ပူၤၦၤဃ့ၢ်မှံဟးဖျိး(၂၀၀၀)ဘျဲၣ်အံၤ လီၢ်က၀ီၤဖိကဒဲကဒဲပာ်ဖှိၣ်မၤစၢၤသကိး၀ဲ

167
0

လါယနူၤအါရံၤ ၁၃ သီႇ ၂၀၂၂ နံၣ်ႇ ခ့ၣ်အဲးစံၣ်

ခီဖျိပယီၤသုးမီၤစိရိၤအကဘီယူၤဟဲကွံာ်လီၤမ့ၣ်ပိၢ်ဒီးခးလီၤကျိဖးဒိၣ်တဖၣ်ဆူ ခ့ၣ်အဲၣ်ယူၣ်-ကညီဒီကလုာ်စၢဖှိၣ်ကရၢတၢ်ပၢဟီၣ်က၀ီၤ ဒူပျာ်ယာ်ကီၢ်ရ့ၣ်(သုးက့ ၆) ကီးတရံး၀့ၢ်ပူၤအဃိ လီၢ်က၀ီၤဖိလၢအဘၣ်ဃ့ၢ်မှံဟးဖျိးအဂၤ(၂၀၀၀)ဘျဲၣ်အံၤ လီၢ်က၀ီၤကမျၢၢ်ကဒဲကဒဲပာ်ဖှိၣ်ထီၣ်သးကွၢ်ထွဲမၤစၢၤသကိး၀ဲၦၤဃ့ၢ်မှံဟးဖျိးဖိတဖၣ်အံၤအဂ့ၢ်န့ၣ် သ့ၣ်ညါဘၣ်လၢလီၢ်က၀ီၤဖိအအိၣ်န့ၣ်လီၤႉ

ၦၤဃ့ၢ်တၢ်ဒုးဖိတဖၣ်အံၤတနီၤန့ၣ်လဲၤအိၣ်၀ဲဒၣ်လၢသီခါဖၠၣ်ဒီးအသကိးအဘူးတံၢ်အဟံၣ်အိၣ်၀ဲအသိး တနီၤန့ၣ်ဒိးန့ၢ်ဘၣ်၀ဲဂံၢ်ခီၣ်ထံးတၢ်အီၣ်တၢ်အီလၢဟီၣ်က၀ီၤတၢ်ကရိကရိအအိၣ်အိၣ်၀ဲဘၣ်ဆၣ် ဘၣ်ဃးလၢတၢ်အီၣ်တၢ်အီအဂီၢ်န့ၣ်အါဒၣ်တက့ၢ်လီၢ်က၀ီၤကမျၢၢ်ကဒဲကဒဲပာ်ဖှိၣ်မၤစၢၤသကိး၀ဲလီၤအဂ့ၢ်န့ၣ် လီၢ်က၀ီၤဖိတဂၤစံး၀ဲန့ၣ်လီၤႉ

အီဖးဖိသ၀ီ လီၢ်က၀ီၤဖိတဂၤစံး၀ဲ“လၢသ၀ီပူၤန့ၣ်ၦၤဟးထၢၦၤစံၣ်အနီၣ်ဂံၢ်ဒုအိၣ်လီၤႉ ၦၤထၢစရီ၀ံၤ လံႇဆိမိၣ်ဒုဟီၣ်က၀ီၤၦၤဘၣ်မူဘၣ်ဒါဒီးတၢ်ကရၢကရိတဖၣ်ကဟဲမၤစၢၤ၀ဲလီၤႉ ခဲအံၤလီလီစဲၤဒု ကဒဲကဒဲကွၢ်ထွဲမၤစၢၤလိာ််သးလီၤႉ မ့ဟဲအိၣ်လၢပဟံၣ်ဒုပကဘၣ်ဒုအီၣ်မ့ၤလီၤမီၤနီၤ ကဒဲကဒဲလီၤအဃိတၢ်ကီတၢ်ခဲတအိၣ်ဘၣ်”အဂ့ၢ်န့ၣ် စံးဘၣ်ခ့ၣ်အဲးစံၣ်န့ၣ်လီၤႉ

ကီးတရံး၀့ၢ်ပူၤ သ၀ီလၢအဘၣ်ဃ့ၢ်မှံဟးဖျိးတဖၣ်မ့ၢ်၀ဲ ကီးနွဲၢ်သ၀ီႇမၠိၣ်ဟီႇယွၤသ့ၣ်ႇယွၤသ့ၣ်ကိႇ တတၤကူႇကၠီၣ်စလ့ၣ်ကိႇယ့ၤလဲၤကိႇမဲၣ်ကသ့ၣ်ႇအၤကလီၤႇကမဲၣ်ကိႇအီဖးဖိႇကၠီၤစှၤကိႇဖါခါကိႇ သၤယၤကိဒီးကတိထၣ်သ၀ီဖိသ့ၣ်တဖၣ်လီၤအဂ့ၢ်န့ၣ် သ့ၣ်ညါဘၣ်န့ၣ်လီၤႉ

အၤကလီၤတကီၢ်ခါခဲအံၤ ခီဖျိပယီၤသုးဆီလီၤအသုးဖဲမံၣ်ကသ့ၣ်ဃိၣ်လူၢ်ဒီးကီးနွဲၢ်သ၀ီပူၤဒံးဒီး တၢ်ဒုးကဲ ထီၣ်၀ဲကိးဆၢကတီၢ်ဒဲးသ့၀ဲဒံးအဃိ လီၢ်က၀ီၤၦၤဃ့ၢ်မှံဟးဖျိးသ့ၣ်တဖၣ်အံၤ က့ၤလၢအဟံၣ်တဘူၣ်ဒံးဘၣ်ဒီးဘၣ်စံၣ်ပလဲာ်သးဒံးအဂ့ၢ်န့ၣ် လီၢ်က၀ီၤဖိတဖၣ်စံး၀ဲန့ၣ်လီၤႉ

“ခဲအံၤတၢ်ခးလိာ်သးဟဲက့ၤကဲထီၣ်တစဲးလံႇအ၀ဲသ့ၣ်အၦၤတၢ်ဘၣ်ဒိဘၣ်ထံးမ့အိၣ်ထီၣ်န့ၣ် ကဟဲထီၣ်ဒုးတၢ်အဂီၢ်ကိး၀ဲတၢ်မၤစၢၤလၢကဘီယူၤလီၤႉ မ့ဟဲခး၀ဲဒ်အံၤန့ၣ် လၢအံၤတကပၤသုးဖိသ့ၣ်တဖၣ်ခီဖျိထီၣ်ဘၣ်တၢ်သိၣ်လိအဃိတၢ်ကီတၢ်ခဲတအိၣ်ဘၣ်ႉ ဘၣ်ဆၣ်ကမျၢၢ်ဘၣ်ဃ့ၢ်မှံဟးဖျိးဒုတၢ်ကီတၢ်ခဲအိၣ်လီၤႉ လၢတၢ်ဘၣ်ဒိဘၣ်ထံးတကပၤန့ၣ် ဘၣ်၀ဲဒၣ်အါလၢကမျၢၢ်လီၤ”အဂ့ၢ်န့ၣ် လီၢ်က၀ီၤဘၣ်ၦၤဘၣ်မူဘၣ်ဒါတဂၤစံးဘၣ်ခ့ၣ်အဲးစံၣ်န့ၣ်လီၤႉ

လၢကၠဲးဒိကျဲဖးဒ့အ့ရှါကျဲမုၢ်ခိၣ်န့ၣ် ဖဲအပူၤကွံာ်လါယနူၤအါရံၤ ၇ သီအနံၤ စးထီၣ်လၢတၢ်ခး၀ဲသိလ့ၣ်လၢအတီၣ်၀ဲသိတၢ်ဂ့ၢ်ကဲထီၣ်သးအံၤန့ၣ် လီၢ်က၀ီၤဖဲန့ၣ်သ့ၣ်တဖၣ်အပူၤတၢ်ခးလိာ်သးဟဲအိၣ်ထီၣ်၀ဲဒၣ်န့ၣ်လီၤႉ

ခီဖျိပယီၤသုးမီၤစိရိၤခးလီၤကျိဖးဒိၣ်အဃိ မၠိၣ်ဟီသ၀ီဖိ(၇)ဂၤႇသ၀ီသီ သ၀ီဖိ(၂)ဂၤႇတမဲၤကိသ၀ီဖိ(၂)ဂၤဘၣ်ဒိ၀ဲဒီး ၦၤဘၣ်ဒိအကျါသံကွံာ်၀ဲတဂၤအသိး ဟံၣ်တနီၤဟးဂုာ်ဟးဂီၤအိၣ်၀ဲစ့ၢ်ကီးန့ၣ်လီၤႉ