Home တၢ်ကစီၣ် (သုးက့ ၅)ဟီၣ်က၀ီၤတလါအတီၢ်ပူၤတၢ်ဒုးကဲထီၣ်(၃၀၀)ဘျဲၣ် ပယီၤသုးသံ(၂၀၀)ဃၣ်ဃၣ်

(သုးက့ ၅)ဟီၣ်က၀ီၤတလါအတီၢ်ပူၤတၢ်ဒုးကဲထီၣ်(၃၀၀)ဘျဲၣ် ပယီၤသုးသံ(၂၀၀)ဃၣ်ဃၣ်

425
0
Photo: KNLA

လါမ့ၤ ၆ သီႇ ၂၀၂၂ နံၣ်ႇ ခ့ၣ်အဲးစံၣ်

လၢခ့ၣ်အဲၣ်ယူၣ်–ကညီဒီကလုာ်စၢဖှိိၣ်ကရၢ(သုးက့ ၅)ဟီၣ်က၀ီၤအပူၤလါအ့ဖြ့ၣ်တလါအတီၢ်ပူၤ တၢ်ဒုးကဲထီၣ်၀ဲအဘျီ(၃၀၀)ဘျဲၣ် ပယီၤသုးတကပၤသံ၀ဲအဂၤ(၂၀၀)ဃၣ်ဃၣ်ဒီး မ့မ့ၢ်(KNLA)တကပၤဘၣ်လုၢ်ထီၣ်ကွံာ်အသးသမူ(၃)ဂၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲန့ၣ်လီၤႉ

ဖဲအပူၤကွံာ်လါအ့ဖြ့ၣ်တလါအတီၢ်ပူၤ ကညီဒီကလုာ်တၢ်ထူၣ်ဖျဲးသုးမုၢ်ဒိၣ်-ုKNLA(သုးက့ ၅)ဒီး ပယီၤသုးႇသုးခိးကီၢ်ဆၢ(BGF)သုးပာ်ဖှိၣ်တဖၣ်အဘၢၣ်စၢၤတၢ်ဒုးကဲထီၣ်၀ဲခဲလၢာ်(၃၈၃)ဘျီဒီး ဖဲန့ၣ်ပယီၤသုးတကပၤသံ၀ဲ(၁၇၃)ဂၤႇဘၣ်ဒိ၀ဲ(၈၇)ဂၤန့ၣ်လီၤႉပယီၤသုးသံတဖၣ်အကျါပၣ်ဃုာ်၀ဲသုးရ့ၣ်ခိၣ်(၁)ဂၤႇသုးရ့ၣ်ခိၣ်–၂(၁)ဂၤႇသုးစကီၤ(၂)ဂၤဒီးသုးစကီၤဖိ(၁)ဂၤအဂ့ၢ်န့ၣ် ပာ်ဖျါ၀ဲန့ၣ်လီၤႉ

ဒ်န့ၣ်အသိးမ့မ့ၢ်(KNLA)အၦၤတကပၤဘၣ်လုၢ်ထီၣ်ကွံာ်အသးသမူ(၃)ဂၤဒီးဘၣ်ဒိ၀ဲဒၣ်(၁၆)ဂၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ပာ်ဖျါ၀ဲအသိးသ့ၣ်ညါဘၣ်န့ၣ်လီၤႉ

လၢန့ၣ်အမဲာ်ညါကညီဒီကလုာ်တၢ်ထူၣ်ဖျဲးသုုးမုၢ်ဒိၣ်-KNLA(သုးက့ ၅)မၤဟးဂီၤ၀ဲ သုးမီၤစိရိၤအသိလ့ၣ်(၄)ခိၣ်ႇ၀ံစိာ်တီဆှၢတၢ်ကဲဘျုးအဂီၢ်တိၤ(၃)ဘိဒီးကျိချံဖီဟးဂီၤ၀ဲ(၂)ဖျၢၣ်န့ၣ်လီၤႉလၢန့ၣ်အမဲာ်ညါပယီၤသုးမီၤစိရိၤအကဘီယူၤဒုးသုးဟဲတ့ၢ်လီၤမ့ၣ်ပိၢ်(၇)ဖျၢၣ်ဒီးခးလီၤကျိဖးဒိၣ်ဆူကမျၢၢ်ထံဖိကီၢ်ဖိဒူသ၀ီတၢ်ဖံးအီၣ်မၤအီၣ်လီၢ်ခဲလၢာ်(၆၁၄)ဖျၢၣ်အဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)တၢ်ပာ်ဖျါအပူၤ ပာ်ဖျါ၀ဲန့ၣ်လီၤႉ

ဒ်ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲအသိး လါအ့ဖြ့ၣ်အတီၢ်ပူၤတၢ်ဒုးကဲထီၣ်အဘျီအါန့ၢ်ဒံးအပူၤကွံာ်လါမးရှးအခါဒံးဒီးထံၣ်ဘၣ်လၢပယီၤသုးတကပၤသံဘၣ်ဒိဘၣ်ထံးအါထီၣ်၀ဲန့ၣ်လီၤႉဖဲအပူၤကွံာ်လါမးရှးအတီၢ်ပူၤန့ၣ်တၢ်ဒုးကဲထီၣ်(၃၅၉)ဘျီ ဖဲန့ၣ်ပယီၤသုးဒီး(BGF)သုးပာ်ဖှိၣ်သံ၀ဲခဲလၢာ်(၁၁၈)ဂၤအဂ့ၢ်န့ၣ် ခ့ၣ်အဲၣ်ယူၣ်(သုးက့ ၅)ထုးထီၣ်ပာ်ဖျါ၀ဲဖဲအပူၤကွံာ်တလါန့ၣ်လီၤႉ