လါအီးကထိဘၢၣ် ၁၆သီ, ၂၀၁၄နံၣ်, ခ့ၣ်အဲးစံၣ်
ခ့ၣ်အဲၣ်ယူၣ်-ကညီဒီကလုၥ်စၢဖှိၣ်ကရၢဘျံးဒဝဲၢ်ကီၢ်ရ့ၣ်, လၢၢ်ကဆီကီၢ်ဆၣ် ဒဝဲၢ်မုၢ်ထီၣ် တၢ်ကဲထီၣ်သးလၢတၢ်ထံၣ်န့ၣ်ကမျၢၢ်(၃)ဂၤအဆိၣ်လၢဘၣ်တၢ်ဖီၣ်မၤသံအီၤလၢပှၤဖီၣ်စုကဝဲၤကရူၢ်တဖုဝံအလီၢ်ခံ ကတီၢ်ခါခဲအံၤလီၢ်ကဝီၤကမျၢၢ်သ့ၣ်တဖၣ် ပျံၤဘၣ်ဖုးဘၣ်ဝဲ ပှၤဖီၣ်စုကဝဲၤကရူၢ်လၢၥ်ဃုၥ်ဒီး (KNU)အဂ့ၢ် (KNU) ဘျံးဒဝဲၢ်ကီၢ်ရ့ၣ်အပှၤဘၣ်မူဘၣ်ဒါစံးဝဲဒၣ်န့ၣ်လီၤ.
တၢ်ကဲထီၣ်သးဝံၤအလီၢ်ခံတၢ်ပိၥ်ထွဲထီၣ်အခံလၢတၢ်ပၥ်ဒ့ၣ်ပၥ်ကမၢ်ဟဲထီၣ်ဆူ(KNU)အဖီခိၣ်ဒီးတၢ်ပၢၢ်ဆၢကရူၢ်ကရၢလၢဂၤသ့ၣ်တဖၣ်အဖီခိၣ်အိၣ်ဝဲအသိးတကီၢ်ခါခဲအံၤန့ၣ်ကမျၢၢ်သ့ၣ်တဖၣ်ပျံၤဘၣ်ဝဲပှၤဖီၣ်စုကဝဲၤကိးဖုဒဲးအဃိကဲထီၣ်ဝဲတၢ်ကီတၢ်ခဲလၢတၢ်ပၢၢ်ဆၢကရူၢ်ကရၢလၢအဂၤသ့ၣ်တဖၣ်အဂီၢ်အဂ့ၢ် ဘျံးဒဝဲၢ်ကီၢ်ရ့ၣ်နဲၣ်ရွဲၣ်ပဒိၣ်စီၤအဲၣ်နၤစံးဘၣ်ဝဲခ့ၣ်အဲးစံၣ်ကညီတၢ်ကစီၣ်ဒ်အံၤန့ၣ်လီၤ.
အဝဲစံးဝဲလၢ“တၢ်ပိၥ်ထွဲထီၣ်အခံန့ၣ်မ့ၢ်ဒၣ်တၢ်ပၥ်ဒ့ၣ်ပၥ်ကမၢ်ဟဲထီၣ်ဆူ ပ(KNU)အဖီခိၣ်မ့ၢ်ဂ့ၤ တၢ်ပၢၢ်ဆၢပှၤဖီၣ်စုကဝဲၤကရူၢ်ကရၢအဖီခိၣ်ခဲလၢၥ်န့ၣ်လီၤ. အခဲအံၤကမျၢၢ်န့ၣ်ပျံၤတၢ်, တမ့ၢ်လၢပျံၤထဲအဝဲသ့ၣ်ဘၣ်. ပျံၤဃုၥ်ဝဲဒီးပဝဲတၢ်ပၢၢ်ဆၢကရူၢ်ကရၢလၢအဂၤအဃိကဲထီၣ်တၢ်ကီတၢ်ခဲလၢ တၢ်ပၢၢ်ဆၢကရူၢ်ကရၢလၢအဂၤအဂီၢ်ဖးဒိၣ်ညါန့ၣ်လီၤ.တၢ်ကီတၢ်ခဲ(၁)တမံၤန့ၣ်ကမျၢၢ်ပျံၤပှၤ,(၂)မံၤတမံၤန့ၣ်မ့ၢ်ဝဲတၢ်မၤဘၣ်ဒိတၢ်ပၢၢ်ဆၢသကဲးပဝးဒီးသူးသ့ၣ်လၤကပီၤန့ၣ်လီၤ.ထံဖိကီၢ်ဖိကမျၢၢ်န့ၣ်ကဒိးသန့ၤသး,ပၥ်ဂံၢ်ပၥ်ဘါပှၤန့ၣ်မ့ၢ်တၢ်လၢအရ့ဒိၣ်န့ၣ်လီၤ.ပပှၤတၢ်ပၢၢ်ဆၢဖိသ့ၣ်တဖၣ်န့ၣ်ကဘၣ်မ့ၢ်ပှၤဒ်န့ၣ်သ့ၣ်တဖၣ်န့ၣ်လီၤ.ပမ့တကဲတၢ်ဒ်န့ၣ်သၢပျၢၤန့ၣ်ပတလီၤဆီဒီးသုးမီၤစိရိၤဘၣ်.ထံဖိကီၢ်ဖိအဂီၢ်တကဲထီၣ်တၢ်ဒီသဒၢနီတမံၤဘၣ်.အဃိန့ၣ်အဝဲအံၤမ့ၢ်တၢ်ပနီၣ်တခါလၢပကဘၣ်မၤဂ့ၤထီၣ်ဒီးမၤလီၤမၢ်ကွံၥ်အီၤန့ၣ်လီၤ.”အဂ့ၢ်စံးဝဲဒၣ်လီၤ.
ဘၣ်ဃးဒီးတၢ်မၤသံကမျၢၢ်(၃)ဂၤတၢ်ဂ့ၢ်န့ၣ် တၢ်ကစီၣ်ဟးထီၣ်လၢမ့ၢ်(KTLA)အပှၤမၤသံဘၣ်ဆၣ် KTLAခိၣ်နၢ်ဒိၣ်ထီတပၤစံးကတိၤဝဲလၢအဂ့ၢ်တအိၣ်နီတမံၤဒံးဘၣ်န့ၣ်လီၤ.ဘၣ်ဆၣ်သနၥ်က့ ဒ်ကီၢ်သူလ့ၤသုးမုၢ်ဒိၣ်တၢ်ကစီၣ်(Kawthoolei Army News) အ Youtube channel ပၥ်ဖျါဝဲဒၣ်အသိးန့ၣ် ကမျၢၢ်လၢအသံ(၃)ဂၤန့ၣ် အသ့ၣ်ခိၣ်န့ၣ်မၤသကိးတၢ်ဒီး KNU, ဒီးပျၢ်လီၤဝဲဒ်တၢ်မဲၥ်ချံအသိးလၢကဟဲဃုသ့ၣ်ညါ KTLA တၢ်အိၣ်သးအဃိ ဖဲပှၤစုတချုးလီၤဒံးဘၣ်အဆၢကတီၢ် အဝဲသ့ၣ်ဒုးလီၤစိအဝဲသ့ၣ်စုလၢပှၤမဲၥ်အဂ့ၢ်ပၥ်ဖျါဝဲဖဲလါအီးကထိဘၢၣ်(၁၄)သီအနံၤအိၣ်ဝဲဒၣ်န့ၣ်လီၤ.
ဒ်သုးက့(၄)လီၢ်ကဝီၤပှၤဘၣ်မူဘၣ်ဒါအတၢ်ပၥ်ဖျါအိၣ်အသိးန့ၣ် (KTLA) သုးဖိလၢပၣ်ဃုၥ်ပၣ်ဂီၢ်လၢတၢ်မၤသံကမျၢၢ်(၃)ဂၤဘျီဝဲန့ၣ်န့ၣ် မ့ၢ်ဝဲ ဘၣ်အဲၣ်ဒိၣ်, ဘးအံသါ,ဖိအိၣ်သံဒီးအပှၤသ့ၣ်တဖၣ်အဂ့ၢ်ပၥ်ဖျါဝဲဒၣ်န့ၣ်လီၤ.
တကတီၢ်ဃီကမျၢၢ်သ့ၣ်တဖၣ်န့ၣ်ဆိမိၣ်ဝဲလၢပှၤဖီၣ်စုဝဲၤကိးဖုဒဲးန့ၣ်မၤတၢ်လၢအဝဲသ့ၣ်အဂီၢ်အဃိအဝဲသ့ၣ်ဆီၣ်ထွဲဝဲဒၣ်ဒီးကမျၢၢ်သ့ၣ်တဖၣ်ကဘၣ်ပၥ်သူၣ်ပၥ်သးဆီၣ်ထွဲပှၤဖီၣ်စုကဝဲၤလၢအအိၣ်ဒီးထံရူၢ်ကီၢ်သဲးတၢ်တီခိၣ်ရိၣ်မဲလီၤတံၢ်လီၤဆဲးသ့ၣ်တဖၣ်ဂ့ၢ်ပဒိၣ်စီၤအဲၣ်နၤဆီၣ်တခူထီၣ်ဝဲဒၣ်စ့ၢ်ကီးန့ၣ်လီၤ.
KNU ဘျံးဒဝဲကီၢ်ရ့ၣ်တၢ်ပၢပူၤ, လီလိ,သယဲၣ်ခၠီ,ဒဝဲၢ်, ယ့ၤဖၠူၤဟီၣ်ကဝီၤသ့ၣ်တဖၣ်အပူၤန့ၣ်ဖီၣ်စုကဝဲၤကရူၢ်ကရၢဒ်အမ့ၢ် KTLA, KNLA, ပကဖ,ဒီမ့,စ့ၤမ့ ခဲလၢၥ်ပှၤဖီၣ်တၢ်စုကဝဲၤကရူၢ်ကရၢအိၣ်ဝဲ (၃၆)ဒူၣ်ဒီးပှၤလၢအိၣ်လၢ(KNU) တၢ်တီခိၣ်ရိၣ်မဲဖီလၥ်လိၤလိၤန့ၣ်အိၣ်ဒၣ် KNLA ဒီး KNDO အဂ့ၢ်ကီၢ်ရ့ၣ်ပှၤဘၣ်မူဘၣ်ဒါစံးဝဲဒၣ်အသိး တၢ်ဖီလိၥ်စုမၤသကိးတၢ်ဒီး(NUG) ဖီလၥ်(PDF),ဒီး(ပကဖ)သ့ၣ်တဖၣ်အိၣ်ဘၣ်ဆၣ်တမ့ၢ် အမျးကယၤ (၁၀၀)ပှဲၤပှဲၤဘၣ်အဂ့ၢ်ဘျံးဒဝဲၢ်ကီၢ်ရ့ၣ်အပှၤဘၣ်မူဘၣ်ဒါစံးဝဲဒၣ်န့ၣ်လီၤ.
