လါအီးကထိဘၢၣ် ၂၄ သီ, ၂၀၂၅ နံၣ်, ခ့ၣ်အဲးစံၣ်
ကၠါဖၣ်အခိၣ်ဒိၣ်ကတၢၢ်(She Zhijiang)လၢအမံၤဟူသၣ်ဖျါလၢတၢ်လံၣ်အီၣ်လီအီၣ်ကျိၣ်စ့တၢ်မၤကၤပှၤကညီ,တၢ်တၤကျိၣ်တၤစ့ လၢ(အီၤလါ)ပူၤအံၤ တကီၢ်ခါခဲအံၤကၠီၣ်တဲၣ်ပဒိၣ်ကအးလီၤက့ၤအီၤဆူတရူးထံကီၢ်အစုပူၤဒ် ပှၤမၤကမၣ်ကွီၢ်မ့ၣ်သဲးစးဖိတဂၤ အသိးအဂ့ၢ်န့ၣ် ကၠီၣ်တဲၣ်တၢ်ကစီၣ်ထုးထီၣ်ပၥ်ဖျါ ဝဲဖဲမဟါအနံၤန့ၣ်လီၤ.
(She Zhijiang)လၢအတၢ်ရ့လိၥ်သးအိၣ်ဝဲဘူးဘူးတံတံၢ်ဒီးသုးခိးကီၢ်ဆၢ(BGF)ခိၣ်နၢ်ဒိၣ်ထီတဖၣ်အံၤ ခီဖျိလၢ (အီၤလါ)တၢ်လံၣ် အီၣ်လီအီၣ်အံၤအဃိ မ့ၢ်ပှၤလၢတရူးထံကီၢ်ပဒိၣ်လိၣ်ဘၣ်အီၤတဂၤဒီး ဖဲအပူၤကွံၥ် ၂၀၂၂ နံၣ် လါအီကူၥ် အခါ န့ၣ် ကၠီၣ်တဲၣ်ပှၤ ဘၣ်မူဘၣ်ဒါဖီၣ်ချုးအီၤဖဲဘီကီးဝ့ၢ်ပူၤ တၢ်လီၢ်တတီၤန့ၣ်လီၤ.
ဖဲန့ၣ်ကၠီၣ်တဲၣ်ပဒိၣ်လိၥ်ဘၢလိၥ်ကွီၢ်အီၤလၢဘၣ်ဃးတၢ်လံၣ်အီၣ်လီအီၣ်လၢ(အီၤလါ)ပူၤ ,တၢ်မၤ ကၤပှၤကညီ,တၢ်တၤကျိၣ်တၤစ့ လၢအတဖိးသဲစးကွီၢ်မ့ၣ်သ့ၣ်တဖၣ်အံၤတၢ်ဆၢကတီၢ်တံၥ်တၥ်(၃)နံၣ်ဘျဲၣ်ဝံၤလီၢ်ခံ ဖဲမဟါအနံၤ န့ၣ် တၢ်ကအးလီၤက့ၤအဝဲ ဆူတရူးထံကီၢ်အစုပူၤဘၣ်ဟဲအိၣ်ထီၣ်ဝဲဒ်အံၤန့ၣ်လီၤ.
ကၠါဖၠၣ်အခိၣ်(She Zhijiang)အံၤ လၢတပၣ်ဃုၥ်ဒီးပှၤထံဂုၤကီၢ်ဂၤထံဖိကီၢ်ဖိဘၣ် လံၣ်အီၣ်လီအီၣ်ဝဲတရူးအထံကီၢ်ဖိ အစ့လီၤလၢဝဲလၢ စ့ယိၤအကကွဲၢ်(၅၀၀၀)ညါဒီး ဖဲ ၂၀၂၁ လါမ့ၤအခါန့ၣ် ထံဂုၤကီၢ်ဂၤပၢၤကီၢ်ကရူၢ်ထုးထီၣ်အီၤလၢ (ဖမ်း၀ရမ်း) အံၤန့ၣ်လီၤ.
ဒ်န့ၣ်အသိးဖဲတၢ်ဖီၣ်(She Zhijiang)ဝံၤလီၢ်ခံဖဲ(၂၀၂၄)လါအီကူၥ်အခါန့ၣ်စ့ၢ်ကီး လၢ(She Zhijiang)အံၤအဂီၢ် သုးခိးကီၢ်ဆၢ (BGF)သုးခိၣ်စီၤခၠ့ၣ်သူၤ တီခိၣ်ရိၣ်မဲမၤဝဲတၢ်ဘါထုကဖၣ်တၢ်ရဲၣ်တၢ်ကျဲၤဒိၣ်ဒိၣ်မုၢ်မုၢ်ဒံးဖဲစွ့ၤကိၣ်ကိၤအပူၤအံၤ န့ၣ်လီၤ.
ကၠါဖၠၣ်အခိၣ်ဒိၣ်(She Zhijiang)လၢထံဂုၤကီၢ်ဂၤလိၣ်ဘၣ်အီၤအံၤ ဖဲအပူၤကွံၥ်(၂၀၁၆)အခါန့ၣ် အဝဲပၥ်ဖှိၣ်ထီၣ်သးဒီးသုးခိးကီၢ်ဆၢ (BGF)ခိၣ်နၢ်ဒိၣ်ထီၣ်ဝံၤ သူၣ်ထီၣ်ဝဲစွ့ၤကိၣ်ကိၤဝ့ၢ်သီအံၤဒီး ဖဲန့ၣ်တဆီဘၣ်တဆီကယဲၢ်မ့ၢ် (အီၤလါ)ကၠါဖၠၣ်တၢ်ဖံးတၢ်မၤ အတဖိးသဲစးအံၤတဖၣ်စးထီၣ်ရၤလီၤအသး လၢဟီၣ်ကဝီၤခိၣ်ဃၢၤဖဲန့ၣ်တဖၣ်အပူၤန့ၣ်လီၤ.
ဒီးဖဲ(၂၀၂၁)သုးဟံန့ၢ်တၢ်စိတၢ်ကမီၤဝံၤလီၢ်ခံန့ၣ် ကၠါဖၠၣ်တၢ်လံၣ်အီၣ်လီအီၣ်တၢ်ဖံးတၢ်မၤသ့ၣ်တဖၣ်အံၤ ဟူထီၣ်ဝဲလၢထံဂုၤကီၢ်ဂၤ ဟီၣ်ခိၣ်ဒီဘ့ၣ် အပူၤဖျိဖျိဖျါဖျါတုၤလၢခဲအံၤအဂံၢ်စဲၤလီၤအသးတတဲၥ်ဒံးဝဲဘၣ်န့ၣ်လီၤ.
တကတီၢ်ဃီကယဲၢ်မ့ၢ်(ကၠါဖၠၣ်)တၢ်ဖံးတၢ်မၤလၢအိၣ်ဆီလီၤသးဖဲန့ၣ်သ့ၣ်တဖၣ်ခဲလၢၥ်ဃၣ်ဃၣ်န့ၣ် ဘၣ်တၢ်အိၣ်ခိးဟံန့ၢ်အီၤ တၢ်ဘံၣ်တၢ်ဘၢလၢသုးခိးကီၢ်ဆၢ(BGF)ဒီးကညီတၢ်ဘၣ်ဘျုးဒံၣ်မိၣ်ခြ့ၣ်စံၣ်ကညီသုးမုၢ်ဒိၣ်(DKBA)ကရူၢ်လၢအကဆီၣ်ထွဲမၤစၢၤဝဲသုးမီၤစိရိၤတၢ်ဃုထၢအံၤအဂ့ၢ်န့ၣ် သ့ၣ်ညါဘၣ်န့ၣ်လီၤ.
လၢန့ၣ်အမဲၥ်ညါခီဖျိလၢ(အီၤလါ)တၢ်လံၣ်အီၣ်လီအီၣ်တၢ်ဖံးတၢ်မၤအံၤတဖၣ်အဃိ ထံဂုၤကီၢ်ဂၤဟ့ၣ်ဝဲတၢ်ဆီၣ်သမံးတကးဒံးဘၣ် ဖဲအပူၤကွံၥ်လါဖ့ၤဘြူၤအါရံၤအခါန့ၣ်စ့ၢ်ကီးကီၢ်ကၠီၣ်တဲၣ်ဒီၣ်တဲၥ်ကွံၥ်ဝဲတၢ်ဟ့ၣ်မ့ၣ်အူ,(အ့ထနဲး),တၢ်ဆါန့ၢ်စဲးဖီကဟၣ်သိသ့ၣ်တဖၣ်ဟဲအိၣ်ထီၣ်ဝဲအဖီခိၣ် (BGF)ဒီး(DKBA)ဆှၢက့ၤဝဲထံဂုၤကီၢ်ဂၤ(ကၠါဖၠၣ်)ပှၤမၤတၢ်ဖိဆူအထံအကီၢ်ဟဲအိၣ်ထီၣ်ဝဲစ့ၢ်ကီးန့ၣ်လီၤ.
တကီၢ်ခါခဲအံၤစ့ၢ်ကီးလၢ(ကၠါဖၠၣ်)တၢ်ဖံးတၢ်မၤတၢ်ဂ့ၢ်ပိၥ်ထွဲအံၤအဃိ ဖဲအပူၤကွံၥ်လါအီးကထိဘၢၣ် ၁၉ သီ အနံၤန့ၣ် ပယီၤသုး နုၥ်လီၤဆူမၠၣ်ဝတံၣ်ဝ့ၢ်ဃၢၤ(KK Park)ကၠါဖၠၣ်တၢ်သူၣ်ထီၣ်အပူၤဖီၣ်ဝဲတၢ်အဃိဒီးဖဲန့ၣ်(ကၠါဖၠၣ်)ထံဂုၤကီၢ်ဂၤပှၤမၤတၢ်ဖိဃုၥ်ဒီး ကီၢ်ပယီၤ ပှၤမၤတၢ်ဖိတဖၣ်ဃ့ၢ်ထီၣ်ဆူကၠီၣ်တဲၣ်တကပၤအါအါဂီၢ်ဂီၢ်ဒံးန့ၣ်လီၤ.
